Bala Iban setuju tekat hidro elektrik digaga

NYUKUNG PROJEK HIDRO… Temenggong Datuk Kenneth Kanyan nyuaka Bup Temenggong Koh ngagai Andrew Pattle sepengudah tembu dialog projek Tekat Hidro Baleh di Rumah Laso, Nanga Antawau, Kapit.

KAPIT : Bala Iban ke nguan menua di Sungai Baleh udah setuju nerima perambu pemansang ngaga tekat hidro elektrik di Ulu Sungai Baleh.

Siku tuai raban bansa Iban ke dikelala mensia mayuh ba endur nya, Temenggong Datuk Kenneth Kanyan madahka, rayat menua nya endang udah setuju projek pemansang nya laban semina chara ke bansa nya mih ulih dikena perintah ngubah sereta ngangkatka daya pengidup rayat.

Bejaku rambau dialog ke diatur ba rumah Pengulu Jampi, Rumah Laso, Nanga Antawau empai lama, iya madahka rayat ba nedur nya endang udah lama deka ke pemansang ke bansa nya, awakka ulih nyungkak penatai pemisi rayat.

Dialog nya diatur Sarawak Energy Berhad (SEB) dikena nerangka ngagao mensia mayuh senentang projek nya lalu deka ninga pemendar ari bala rayat. Bala staf SEB deka bejalaika pansik dulu udah tu laban sida iya udah diberi tanggungjawap bejalaika projek nya.

Iya arap bendar projke nya ila deka mai penguntung ngagai rayat ke diau di Baleh.

Nitihka jaku Temenggong Kanyan, rayat di Sungai Baleh endang landik ngereja pengawa dagang ngati ke diri, diatu sida semina nganti peluang ke bisi aja endur nunjukka pengelandik sida iya.

Enti bisi peluang mega, ku iya, rayat Baleh mega ulih setanding enggau orang dagang ke diau ba bandar. Nya alai iya ngarapka perintah udah tu ila ulih meri peluang ngagai rayat ke diau ba menua nya empu endur bejalaika pengawa dagang sida ba taba tekat hidro kempai.

Kelimpah ari nya, iya merambu minta perintah numbuhka Tabung Pelajar Baleh awakka dikena nulung bala anak ke deka nyambung pelajar sereta minta digaga perintah jalai simpang belabuh ari Nanga Mujong ke Nanga Antawau.

Temenggong Kanyan mega madahka, Komiti protem Pemansang Baleh (BDC) ke betuaika Bangsa Untang udah ditumbuhka lalu ngarapka komiti tu ulih bekerejasama enggau SEB ngambi nyediaka peluang dagang ngagai rayat menua nya empu.

Iya mega minta awakka perintah ulih berunding manah, projek nya ila enda ngeruga penatai pemisi rayat lalu iya minta pengawa ngaga jalai simpang ari Nanga Mujong ke Nanga Antawau ulih dipasuk dalam pakej projek nya.

“Jalai nya patut digaga dulu awakka ngenyamaika rayat ngereja pengawa kulu kili. Ketegal ai ba Tekat Bakun udah ditekat diatu, jalai ai ari ari Kapit ngagai Ulu Bakun pedis amat ditengah diatu laban ai Sungai Rejang majak pabu. Nya alai jalai raya patut digaga dikena mutarka penanggul ke ditapi rayat diatu," ku iya.

Sapit Presiden Senior SEB, Stell Sindau mega bisi bejaku madahka pengaga ati iya laban sukung ari bala rayat pasal projek hidro Baleh nya.

Projek Bakun dipelanja Perintah Besai lalu tekat Murum enggau Baleh dipelanja perintah negeri lalu dikemujurka SCORE. Dalam timpoh 20 ngagai 30 taun ke deka datai, mayuh industri ke besai-besai deka digaga ba endur nya, ku iya.

“Tekat tu ila deka ngasuh negeri tu nyadi sebengkah negeri industri lalu ulih ngemujurka pelin transformasyen baka ngasuh rayat bempu  penatai pemisi ke tinggi," ku iya ti mega madahka SEB nyamin diri tetap bebasa adat asal rayat ba menua nya.

Kaban Parlimen Hulu Rajang, Datuk Billy Abit Joo. Seketeri Politik Kepala Menteri, Daniel Jubang enggau Wilson Nyabong Ijang, DO Kapit, Elvis Didit, Menija Besai EIA, Douglas Lon, Seketeri Majlis Adat Istiadat, Sallang Munjan, Pemancha David Dian, Pengulu Jampi Rawing, Pengulu Baleng Jengen, TR Laso, TR Tajai enggau dua iku usahawan Iban ke udah mujur, Dato Kristofter Nyuak Bajok enggau Bangsa Untang sama bisi datai.

DSP Sarifuddin Mustafa dipadu nyadi KPD Betong

KE PENGINGAT...Bala pemesai polis enggau raban IPD Betong begambar begulai enggau ACP Azam Abdul Hamid pengudah tembu pengawa ke diatur sida.

BETONG : Deputi Superitenden Polis (P/DSP) Sarifuddin Mustafa dipadu mangku pengawa Tuai Polis Daerah (KPD) Betong ke baru.

Iya sebedau tu, kelalu manah ngereja pengawa ba pampang Jenayah Berat (D9), Indu Opis  Polis Kontinjen (IPK) Sarawak lalu udah tu iya nerima surat mangku pengawa ke baru ari mandal pengawa nya, Asisten Komisioner (ACP) Henry Nyuhai.

Henry udah mangku pengawa nya pengelama empat bulan  KPD, udah nya Supritendan (Supt.) Mohd Bukhori Saffai pindah ngagagi Limbang lalu nyadi KPD Limbang ke baru.

Pengawa Serah / Nerima Pengawa KPD Betong nya diatur ba Bilik Gerakan, Indu Opis Polis Daerah (IPD) Betong.

Lebuh ke bejaku ba pengawa nya, Sarifuddin madahka iya deka neruska pengawa nya enggau naka iya pemanah baka ke dikereja KPD sebedau tu. Nambahka nya mega, iya naka ulih mutarka penyalah jenayah nyengkaum penyalah ke dikereja bala polis enggau pemesai ke bukai.

"Taja pia, pengawa munaska jenayah begunaka bantu ari mensia mayuh sereta mesti ngatur mayuh program dikena nyeliahka pengawa ke enda manah,"ku iya.

Kelimpah ari nya, diatur serimbai enggau pengawa nya mega ACP Azam Abdul Hamid ngaga pengawa meresa bala polis lalu ngatur dialog begulai enggau kaban IPD Betong.

Sama bisi datai ba pengawa nya, bala pemesai enggau kaban IPD Betong.

Program I Want U mai pelajar menua pesisir ke universiti

TERIMA KASIH... Siti Norafidah ngarika Rosey Yunus nyuaka MRP ngagai Prinsipal SMK Suai Abu Saran.  Sama bisi dipeda dalam gambar  Ahmad Lai Bujang, Ipat Bakar Chairman PIBG enggau Ali Mudin (Tuai Program). 

NIAH/SUAI : Program I want U diatur Sekula Sekondari (SMK) Suai bepalan ba Universiti Utara Malaysia (UUM) Kedah udah mujur dipejalaika pengelama lima hari. Pemanah program tu diatur dikena meransang bala nembiak menua pesisir bebendar agi belajar ngambika mujur masuk universiti dudi hari.

Kaban Parlimen Sibuti Ahmad Lai Bujang bejaku ba pengerami nyuaka projek mit menua pesisir (MRP) ngagai SMK Suai madahka, tuju program ‘I want U’ diatur dikena muka runding pikir bala nembiak awakka sida ulih ngasai baka ni gaya pengidup lebuh belajar ba universiti.

Ku iya, program nya tau meransang bala nembiak awakka sida ngembuan juluk ati ke besai iya nya belajar sampai ke universiti.

“Objektif penemuai sida tu dikena meri motivasi ngagai bala pelajar awakka sida bebendar belajar enti deka masuk universiti," ku iya.

Iya mega madahka, pemanah program nya awakka pelajar SMK Suai ulih meda sereta betanya baka ni gaya bala mahasiswa enggau mahasiswi di UUM belajar ba universiti.

Iya madah, program nya ulih ngemujurka konsep integrasyen nasional nengah pengawa penemuai pelajar ari Borneo (Sarawak)
ke Semenanjung Malaysia lalu udah nya negapka kaul 1Malaysia.

"Kelimpah ari nya mega, penguntung iya ngagai bala nembiak baka nambahka penemu sida ba senentang pengawa ngatur pengawa enggau ngatur gerempung," ku iya.

Program ke sama bansa tu, berengkah diatur taun siti ke udah lalu atur iya baka tu, bala nembiak ke deka nyereta program nya, sida mesti nyulut dalam peresa sereta ngembuan disiplin.

Kira 33 iku pelajar enggau tujuh pengajar bisi enggau nyereta program nya.

Sama bisi datai maya pengerami ke diatur nya mega Seketeri ngagai Menteri Muda Pelajar Tumu Nembiak enggau Pemansang Ruang Bilik Siti Norafidah, Prinsipal SMK Suai Abu Saran, Tuai Program Ali Mudin, Chairman Gerempung Apai Indai  enggau Pengajar (PIBG) Ipat Bakar enggau bala apai indai nembiak ke nyereta program nya.

Maya pengerami nya mega, Ahmad Lai Bujang bisi nyuaka MRP RM10,000 lalu Rosey Yunus meri (RM6,000) ngagai PIBG SMK Suai.

Pemendar perintah ngemansangka rayat

PROJEK BARU...Cassidy (kanan) nyuaka dokumen projek ngagai pekereja LFC Construction (kiri) lalu dikemataka Nyalau enggau Rayong ba sebengkah pengerami ke diatur kena Hari Enam ke udah.

ENGKILILI : Pemendar perintah ngemansangka pengidup rayat ba kandang menua Engkilili ulih dipeda kitai diatu baka pengawa ngaga jalai raya Ulu Skrang bepun ari Nanga Murad ke Rumah Rantai, Lepong Kepayang.

Kaban Parlimen Lubok Antu, William Nyalau anak Badak madahka, projek ngagai jalai raya Ulu Skrang ari Nanga Murad ke Lepong Kepayang tu beungkus  RM27.9 juta lalu digaga sepemanjai 50 kilometer.

 “Pengawa ngaga projek jalai raya Ulu Skrang tu dipelabaka dalam timpoh 18 bulan lalu dipelabaka tembu 31 Julai taun siti nyin ila.

“Enti projek jalai raya Ulu Skrang tu ila udah tembu, iya tau mai penyamai ngagai kira-kira 2,000 iku rayat ke nguan menua nya, sida tu nyengkaum rayat ba 11 buah rumah panjai, tiga buah sekula primari enggau sebuah klinik pengerai,” ku iya.

Iya madah munyi nya ngagai pengarang berita pengudah tembu pengawa Nyuaka Dokumen Projek ari JKR Sri Aman ngagai Pekereja LFC Construction Sendirian Berhad enda jauh ari Rumah Anggang, Nanga Mejong, Ulu Skrang, Engkilili kena Hari Enam miggu siti ke udah.

Projek ngaga jalai raya Ulu Skrang tu ku Nyalau nandaka perintah Barisan Nasional (BN)endang bebendar ngemansangka rayat ninting maya.

Udah nya, Kaban Kunsil Negeri (ADUN) Engkilili, Dr Johnnical Rayong anak Ngipa ke sama bisi datai maya nya madahka, udah tu projek ke deka diberi perintah baka Projek Bekal Elektrik ungkup menua pesisir.

Nya alai iya ngelalau rayat kelebih agi ke diau ba menua pesisir awakka terus nyukung perintah BN maya pengawa bepilih besai Ke-13 (PRU13) ila.

Sama bisi datai maya nya, Injinir Opis Kereja Raya (JKR) Sri Aman, Cassidy Morris enggau Pemesai JASA Parlimen Lubok Antu, Geoffry Baja Ricky Maba.

Pesta Benak diatur 6 ngagai 8 April

BENAK...Harden (tengah) lebuh randau enggau media pasal atur Pesta Benak, sama bisi dipeda dalam gambar (ari kiba) Felicia, Johnathan, Rayong enggau Jack.

SRI AMAN : Program ninting taun lumur lima pemadu manah ba Sarawak iya nya Pesta Benak Sri Aman. Pengawa tu deka diatur baru bepun 6 ngagai 8 April tu.

Residen Bagi Sri Aman, Johnathan Lugoh lebuh ke bejaku rambau randau enggau media ba Opis Pejabat Residen Sri Aman madahka, haribulan nya udah ditetapka laban ai pasang tauka Benak deka mangka enggau naka iya peninggi maya nya.

“Sekeda aktiviti ke deka diatur beserimbai enggau Pesta Benak tu ila baka Regatta Benak Batang Lupar, Ngelunchur Benak Batang Lupar, Bazaar Ria Benak, Budaya Ria Benak, Bejadi Pesta Benak, Eksibisyen Benak enggau Karnival Moto. Entara main ke ulih narit ati mensia mayuh maya nya ila baka lumba perau, lumba jet ski, malam mandangka main asal, Miss Tourism Benak, Benak Idol, Pengawa Mandangka Bungai Api, Pekit Betanda enggau mayuh agi,”ku iya.

Lumba jet ski sebengkah main ke baru diatur maya nya ila, bala kami deka ngangauka empat iku pelunchur ari menua Perancis, siku ari United Kingdom enggau empat iku ari Semenanjung Malaysia awakka ngerami agi Pesta Benak.

“Objektif program tu diatur dikena ngelakuka Benak Batang Lupar nyadi sebengkah Produk Dagang Temuai Nyelai Sarawak enggau Malaysia, nambahka nya mega dikena nikika penuduk rikot Pesta Benak Sri Aman dalam rintai 10 program ke pemadu manah ba Sarawak,” ku iya.

Pesta Benak Sri Aman 2012 tu ila ku Johnathan deka dipejadi Kepala Menteri, Pehin Sri Haji Abdul Taib Mahmud kena 7 April berengkah pukul 3.00 lemai bepalan ba Astaka Reggata Batang Lupar.

Kelimpah ari nya, Menteri Muda Pemansang Menua Pesisir enggau Pengawa Berumah, Datuk Francis Harden Hollis lebuh ke nyadi chairman randau begulai enggau media madahka, bala iya melabaka lebih ari 50,000 iku temuai deka datai ngulu Pesta Benak tu.

“Nambahka nya aku minta kerejasama bala Tuai Raban Bansa ba Sri Aman awakka nyaup bala komiti Pesta Benak ngemujurka Pekit Local Food beserimbai enggau pengerami tu ila.

“Ngarapka main ke deka diatur maya Pesta Benak tu ila ulih narit bala temuai ke datai enda ngira sekalika sida ari menua tu empu tauka ari endur bukai,” ku iya.

Sama bisi datai maya randau enggau media nya Kaban Kunsil Negeri (ADUN) Engkilili, Dr Johnnical Rayong Ngipa, District Officer (DO) Lubok Antu, Jack Aman Luat enggau Sapit Residen Sri Aman, Felicia Tan Yan Hua.

Dipelabaka pangka benak tauka ai pasang besai ba Sungai Batang Lupar deka begelumbang enggau tikas peninggi 5.9 meter kena 6 April, 6.2 meter kena 7 April enggau 6.4 meter kena 8 April.

Konvoi Kabong-Mukah ujung bulan tu

KABONG : Sebengkah Konvoi Jalinan Mesra Dekat Di Hati Kabong-Mukah, deka diatur Opis Kunsil (daerah) Kabong kena 31 March berengkah ari  Balai Kabong ke Mukah urung pukul 8.00 pagi.

Chairman pengatur Program, Nazari Bujang madahka, lebuh ke datai ba Mukah ila, bala sida tu deka dibai raun ngagai kilang ngaga kuih tradisional, palan Pesta Kaul, enggau Homestay Lamin Dana. 

Bala penyereta konvoi mega deka dibai bemain badminton ngelaban bala staf Opis Residen enggau Opis Kunsil Mukah.

Mua ke malam 31 march, bala penyereta deka dibai meda Panggau Rayat Jalinan Mesra Dekat Di Hati Kabong-Mukah ti ngayanka pemerindang ari Semenanjung Malaysia ti bisi nyereta pengawa konvoi.

Nya alai, konvoi nya diatu dibuka ngagai sapa-sapa tang mih bisi tatak, semina ungkup 25 buah kerita aja.

Pom dikena nyereta konvoi, ulih diambi ari Opis Kunsil Kabong berengkah 7 March lalu haribulan ke penudi endur ngerijista diri kena 23 March tu.

“Genap iku penyereta ke deka enggau konvoi mesti mayar yuran RM100 ungkup sebuah kerita. Bayar nya mesti disuaka maya kita ngambi pom. Bala penyereta konvoi deka mulai ke diri ari Mukah ke Kabong kena 1 April.

“Semua makai enggau ngirup sereta palan endur diau deka disediaka pengatur pengawa. Bala penyereta mega deka diberi baju T perchuma,” ku Nazari.

Tanya silik, ngagai kita ke bisi ati nyereta konvoi tu tau betanya ngagai pengatur program ngena lumur  083-411267.

UMW Toyota ngatur karnival

RANDAU MEDIA ... Ismail Saufi (kiba) enggau Andrea Suharto (kanan) ngatur randau enggau media ba kedai kompeni nya pasal Karnival Hari Jadi ke-29 Toyota di Jalai Samariang, Kuching.

KUCHING : UMW Toyota Motors Sdn. Bhd., deka ngatur karnival beserimbai enggau Hari Jadi ke-29 Toyota di negeri tu bepalan ba Best Motors Corporation Sdn. Bhd., Jalai Samariang kena 10 Mac (Hari Enam) tu.

Pengarah Best Motors Corporation Sdn. Bhd., Ismail Saufi madahka, karnival nya berengkah diatur pukul 10.00 pagi ngagai 5.00 lemai lalu diatur mega sekeda main ke dipelaba ulih ngerinduka ati bala temuai.

"Kami nesau mensia mayuh kelebih agi bala pengguna kerita Toyota ke diau ba menua Kuching awakka sama sampal ngulu karnival tu. Entara main ke bisi diatur maya tu ila baka bekaroake, ngira barang lalai, kedai bemain, palan bemain endur nembiak, pekit nyura, eksibisyen pemakai enggau main bukai," ku iya.

Iya madah munyi nya maya randau enggau media pasal Karnival Hari Jadi ke-29 ba opis iya di Jalai Samariang apin lama ke udah.

Ismail madahka, pengudah ke berengkah beoperasyen ari pun bulan November taun siti ke udah, kompeni nya enda kala ngatur promosyen ke besai-besai baka nya.

"Ngena pengawa ke bansa tu, kami arapka mensia mayuh ulih ngelala enggau terang agi pasal kereban pengangkut ti dipansutka Toyota," ku iya.

Maya nya mega ku iya, bala pengguna kerita Toyota ulih meda kereban ke disediaka kompeni maya karnival nya baka perengka ganti, betanyaka servis, enggau pekara bukai pasal Toyota.

Kelimpah ari nya, Penyanding Penemu Lembaga Best Motors Corporation Sdn. Bhd., Andre Suharto madahka, Palan 3S Toyota, Jalai Samariang ulih nangkup 20 ngagai 30 buah kerita enti pengguna bisi ati ngaduka kerita sida.

"Mensia mayuh kelebih agi pengguna  Toyota enda ibuh irau ati agi laban diatu udah bisi 25 iku orang ke landik pasal kerita Toyota," ku iya.

Ku iya, sebengkah palan deka disediaka maya tu ila yngkup 12 iku pengguna ke deka ngaduka kerita Toyota sida.

"Sebedau kami ngambi bala sida (staf) tu gawa ba kompeni kami, sida  tu diasuh kami belatih ba indu opis UMW Toyota Motors Sdn. Bhd.,ditu dulu," ku iya.

Nya alai, naka ke diatu laban opis sida ke besai agi nyadi kompeni pengeluar kerita Toyota Kuching, kami endang bisi ngeluarka kerita mayuh mimit ari pampang Toyoto ke bukai.

'Wireless walk' digaga awakka narit temuai datai ke Miri

BISI PENGELANDIK ...Abang Johari mandangka pengelandik iya nusun bata tanda bejadi pengawa ngaga Balai Raya Kampung Beraya kira-kira 25 kilometer ari bandaraya Miri, di Miri.

MIRI : Perintah deka ngaga 'Wireless Walk' sepemanjai 100 meter ba tengah-tengah bandaraya Miri dikena narit mayuh agi temuai datai ngagai Miri udah tu.

Menteri Pengawa Berumah enggau Dagang Temuai, Datuk Amar Abang Haji  Abdul Rahman Johari Tun Abang Haji Openg madahka, mayuh macham rengka rama nyengkaum kedai endur bejual mandangka main asal ke diempu rayat di menua tu deka digaga ba palan nya udah tu.

Ku iya, wireless walk deka digaga berengkah ari Hotel Mega nyentuk ngagai Hotel Imperial udah tu deka disediaka enggau perengka internet nadai bewayar tauka dikumbai palan 'Hot Spots' enggau enam iti kiosk.

"Ba endur (wireless walk) tu mega deka digaga enam iti kiosk ti nyediaka macham pemakai ke suah dipeda dinahka ba rumah orang Melayu, Melanau, Kedayan, China, Iban enggau Orang Ulu. Pemisi pemakai ti disediaka ditu ila dipelabaka ulih narit mayuh agi temuai datai sereta ngerami bandar Miri," ku iya.

Iya madah munyi nya lebuh ke dirandau maya Pengerami Bejadi Pengawa Ngaga Balai Raya Kampung Beraya kira-kira 25 kilometer ari bandaraya Miri, apin lama ke udah.

Ngenang pasal wireless walk nya, ku iya ba tengah palan wireless walk nya ila deka digaga balai puang awakka bisi alai endur ngatur aktiviti begulai enggau mensia mayuh baka konset enggau pengawa bukai.

Iya madahka, pengawa ngaga palan nya deka ditembuka enggau lengkas, lalu ungkus ngaga palan empai temu laban bala iya diatu agi benung ngaga pansik.

Abang Johari madahka, palan nya mega deka dijaga tiga bengkah raban polis ti deka ngemataka pengelikun mensia mayuh ke bis nemuai kia.

Maya nya mega, iya madahka ngaga palan wireless walk tu nyengkaum pelin ngaga endur ke manah di Miri awakka mayuh agi temuai datai ngagai Miri udah tu.

Ku iya, jam ke diatu, opis menteri iya benung merambu ngaga penerebai terus ari Padang Bilun Miri ngagai menua luar nyengkaum Korea, Hong Kong, Jepun enggau China.

"Tu mih sebengkah atur pengawa ke digaga perintah dikena ngelakuka bandar Miri ngagai temuai menua luar," ku iya.

Abang Johari nyemetak bendar madahka penyerakup ke udah dikembuan rayat ba Kampung Beraya terus diteritka agi udah tu.

Nambahka nya iya ngarapka rayat terus nyukung perintah Barisan Nasional (BN), ku iya, semina perintah BN aja ke ulih meri pemansang ngagai rayat di negeri tu.

"Nya alai, rayat mesti ngelala ni bagi intan enggau kacha, intan mesti manchar ngagai utai ke udah terang. Baka nya mih utai ke udah nyadi ba Balai Raya tu, aku kala bedanji deka ngaga balai tu maya aku datai kitu sebedau pengawa bepilih besai kunsil negeri taun siti ke udah, lalu diatu aku udah ngamatka danji aku nya," ku iya.

Maya nya mega, iya mesan semua orang ke bisi datai maya nya awakka enda saru penemu, laban diatu nengah surat berita, majalah tauka internet ulih dikena orang nusi cherita ke enda manah dikena bejai orang bukai, utai ke bansa nya ulih nanggul pemansang.

Taun siti ke udah, iya udah ngagihka RM125,000 dikena ngaga  Balai Raya Kampung Beraya tang mih belanja nya enda chukup, nya alai diatu iya nambahka penyampau RM25,000 dikena ngemujurka perojek balai raya nya.

Sama bisi datai, Menteri Muda Pelajar Tumu Nembiak enggau Pemansang Ruang Bilik, Rosey Yunus, Kaban Parlimen Sibuti Ahmad Lai Bujang, Kaban Kunsil Negeri (ADUN) Lambir Ripin Lamat, Residen Miri, Antonio Khati Galis, Tuan DO Miri Boniface Intang Apat, bala Tuai Opis enggau agensi perintah sereta bala rayat ke semak menua Kampung Beraya.

Regata enggau lumba bot nyadi produk dagang temuai

KAPIT : Belumba ba ai nyengkaum regata enggau belumba bot endang tebilang amat di kapit jam ke diatu, lalu nya mih nyadi sebengkah produk dagang temuai ba bandar nya.

Chairman Kelab Bot Laju Kapit, Koh Kumbong madahka, kelimpah ari nya mega, kitai di menua tu untung amat laban ngembuan rayat endang iya landik ngukir bot laju setat ari kelia. Nya sebengkah penyelai ti dikembuan kitai lalu nya ulih narit temuai datai kitu.

Lebuh maya Kelab Bot Laju Kapit bisi ngatur pekit bot laju empai lama ke udah, dia kitai meda mayuh amat temuai ke datai nyengkaum sida ari Kanowit, Sibu, Mukah enggau Brunei, ku iya madah ngagai pengraang berita pengudah nerima geran MRP RM10,000 ari Kaban Parlimen Kapit, Datuk Alexander Nanta Linggi apin lama ke udah.

Alexander Nanta empu nyuaka chek nya ngagai Koh, lalu pengawa nya diatur ba Hotel Meligai, Kapit. Tuju geran nya diberi ngambika bisi dikena ngemujurka aktiviti ke diatur sepemanjai taun tu.

Koh lebuh ke bejaku madahka pengaga ati, lalu iya meri puji ngagai Alexander Nanta laban udah meri geran nya, ku iya geran nya ulih dikena kelab ngatur mayuh agi aktiviti ke tau mai penguntung ngagai mensia mayuh di Kapit.

Iya madahka, maya aum sida iya empai lama, kelab nya udah sama seati maduka Alexander Nanta enggau Menteri Pemansang Tanah, Tan Sri Dato Sri Dr. James Jemut Masing nyadi penyanding penemu kelab.

Nya alai iya ngarika kelab nya, nesau mensia mayuh ti rinduka lumba ai awakka masuk ngerijista diri nyadi kaban kelab,"

Ngagai kita ke deka nyereta kelabtu, ku iya, tau ngerijista diri diatu tauka datai ngelawa Koh ba Opis Pemadah Kapit, ringkat baruh, Wisma Persekutuan, Jalai Pengulu Nyanggau maya opis tebuka.

Pemesai Raban Nembiak enggau Lumba Kapit, Jack Janda Pioh, Supervisor KEMAS, Ambrose Abong Bugek enggau Seketeri Kelab Bot Laju Kapit, Philip Jalal entara orang ke bisi datai maya nya.

BANTU… Datuk Alexander Nanta (kanan) nyuaka chek geran MRP ngagai Koh Kumbong lalu dikemataka bala Kaban Kelab Bot Laju Kapit enggau bala bukai ba Hotel Meligai, Kapit.

Program Ngiga kereja di Miri

MIRI : Opis Pengatur Pengawa pampang  Miri deka ngatur Program Ngiga Kereja (3P) bepalan ba balai Dewan Suarah Miri, kena 24 March tu.

Beduduk ari nya, ngagai mensia mayuh ke benung begigaka kereja nyengkaum sida ti timpang pendiau (OKU) ditesau sama datai ngulu program tu ti deka berengjah diatur pukul 8.30 pagi ngagai 4.30 lemai.

Penulung Pengarah Pengatur Pengawa Miri, Dorrhea Chuat madahka, tuju program tu diatur awakka meri peluang kelebih agi ngagai sida nadai pengawa milih pengawa ti dikedeka ati lalu betemu mua enggau pengaji empu.

“Entara pengawa ke bisi diatur maya baka inerview, ngerijista diri ba JobsMalaysia sereta minta pengawa puang ke bisi dalam ruai siber JobsMalaysia,” ku iya.

Nitihka penerang iya, entara objektif program dikena mantu mensia begigaka pengawa kelebih agi ngagai sida ke udah kena buai kereja tauka ngagai raban OKU.

Kelimpah ari nya, ku iya genap iku rayat Malaysia endang ulih minta kereja.

Maya nya mega, iya ngelalau mensia mayuh ke ulih datai, sida dilalau awakka mai kad pengelala, penerang pasal diri empu tauka resume sereta setipikit ke besangkut paut dikena minta pengawa.

Penerang ke silik pasal program tu, kita tau betelefon ngagai Nur Atiqah Abdullah enggau Syed Jamaludin ngena lumur 085-420195 tauka 419949.

Besabar nganti rengka rama menua pesisir

TERIMA KASIH ... Datuk Aaron Dagang nerima   tepa ari Wan Mohd Zuki lalu dikemataka Tuai  
 Rumah Awan (empat kanan) di Kanowit.

KANOWIT : Rayat ba sitak Parlimen Kanowit diasuh besabar nganti pemeri rengka rama nyengkaum bekal elektrik, ai beresi enggau jalai raya.

Kaban Parlimen Kanowit, Datuk Aaron Ago Dagang madahka, projek nya endang endang tetap dipejalai tang lubah mimit laban ke diatur berenggat-ranggat sereta beguna ke timpuh ti chukup.

"Utai ti dikemeratka aku diatu iya nya perintah endang seruran bebendar ngemujurka rengka rama diberi rayat.

Iya madah munyi nya lebuh bejadi Pengerami Tuai Begulai enggau Rayat 1 Malaysia ke diatur ba Rumah Awan, Rantau Dilang, Kanowit, apin lama ke udah.

Iya ngelalau rayat ke diau ba sitak Parlimen Kanowit awakka seruran beserakup enggau pangan diri sereta anang badu meri sukung ngagai perintah Barisan Nasional (BN).

"Rayat endang patut nyukung program transformasyen perintah laban nya mai pengelantang enggau penyenang ngagai rayat di menua tu.

Ku iya, perintah udah ngaga mayuh macham skim nyengkaum skim nanam getah, sawit, lada enggau utai bukai dikena ngangkat tikas pengidup rayat.

Sama bisi datai maya nya Pemesai Opis Pemadah Kanowit, Wan Mohd Zuki, Tuai Raban Bansa enggau Tuai Rumah ari genturung pendiau Rantau Dilang, Nanga Woh, Nanga Lepan enggau Nanga Dap.

PERINTAH SEMAMPAI NINGA SEREBANA RAYAT

KEMARI (hari empat) nyangka mayuh bala kitai ke kereja perintah duduk betimpai ngerimbai radio, duduk entap nunga televisyen.

Udah Menteri Besai Datuk Seri Najib Tun Razak ngerah senentang tikas gaji niki sama rata, iya nya 13 peratus ungkup Gred 1 ngagai Gred 54, nyangka mayuh orang tuchum gaga ati.

Urung iya 1.4 juta sida ke kereja perintah endang lama udah nganti berita nya ke lalu ngetuka 'Skim Saraan Baru Perkhidmatan Awam' (SBPA) lalu diganti enggau 'Jadual Gaji Minimum-Maksimum Sistem Saraan Malaysia' (SSM).

Kati ku enda gaga, ambika banding enti gaji RM1,000, enggau sistem gaji ke baru nitihka SSM, gaji sida ke kereja perintah nya deka niki RM130, nyadi RM1,130, pama mih nya.

Asil ari gaji 'minimum-maksimum' nya gaji niki ninting taun ari RM80 nyentuk ngagai RM320 ungkup sida Gred 1-54, tang ngagai 'Jawatan Utama Sektor Awam (JUSA) terus nitihka SSM.

Tikas gaji nya berengkah dipejalaika bulan Januari suba sereta deka berengkah dibayar bulan tu tauka bulan April ila.

Perintah nitihka digerah Najib udah nyanggup mayar tikas 'Bantuan Sara Hidup' tauka COLA ngagai genturung menua B deka ditikika ari RM200 ngagai RM250 sereta ngagai genturung menua C ari RM100 ngagai RM150.

Ukai naka nya aja, mayuh agi gerah bukai ke nampak bendar ngasuh sidak ke bekerja perintah gaga bendar ati.

Mayuh mega madahka, gerah ti dipansutka Najib nya nyadi berita ke ngasuh ati gaga sereta endang adil ngagai rayat ke gawa perintah ke kurang penatai pemisi.

Nya meh pemanah perintah kemaya hari ke dipegai Najib, semampai taluk ati mantu rayat, semampai ninga penusah sereta jaku serebana sida ke bekereja perintah.

Udah nya mega, Najib lalu nyirika Tuai Direktor ba Pengawa Perintah, Tan Sri Ismail Adam nyadi Chairman nyadi sida ke ngatur pengawa khas ngambika mansik runding sida bekerja perintah sereta merambu jalai mutarka pengawa nya enggau manah agi ngagai perintah.

Berindik ari nya, Presiden CUEPACS Omar Osman lalu ngarapka sida ke bekereja perintah badu agi mansutka penemu ke enda puas ati tang udah tu bekereja enggau regas sereta chakah agi.

Lebuh beratika semua nya, rayat lebih agi sida ke bekereja perintah patut bendar beterima kasih ngagai perintah menua tu. Lebuh maya dunya benung betangkup enggau gaya ekonomi ke enda tentu, perintah di menua tu agi ulih mantu sereta semampai ninga serebana rayat.

Bah, nya berita ke ngasuh ati sida ke kereja perintah gaga ati, kati ku enggau sida ke kereja ba kompeni deh?

Kala didinga suba, maya gaji sida ke kereja perintah niki, raban sidak ke kereja kompeni mantai ke penemu ke enda puas ati.

Kati ku enda pia kenu ku sida iya, ketegal gaji sida ke bekereja perintah niki, rega barang mega niki, tang tikas gaji sida ke kereja kompeni bedau enda diatur sereta nadai berubah.

Tang bisi mega ninga, berita pasal gaji sida ke kereja kompeni deka diatur, tikas gaji ke pemadu mit deka diserataka ngambika enda kelalu mit enggaika munyi ku penemu bala di kedai kopi, runding deka ngasuh rayat ngembuan penatai pemisi tinggi, tang gaji orang agi bedau dibaruh tikas rayat ti dikumbai seranta.

Ditangkanka nya, perintah mega anang enda ingat, enti terus ngarapka sukung ari rayat ke ukai semina sukung ari orang bekereja perintah, sida iya patut berundingka orang ti bekerja ba kompeni laban sida tu mayuh agi ari orang ke bekereja perintah.

Taja pengawa ke deka ngatur tikas gaji orang ba pengawa kompeni nya pedis diatur, tang lebuh beratika perintah kemaya hari diatu ke betuaika Najib, nyangka deka mutarka semua serebana rayat nya enggau jampat sereta enggau jalai ke bepengelandik.

Nya alai, ngagai sida ke kereja perintah, gaga ati buah engkabang labuh enda lama agi, tang anang enda ingat ke pemanah sereta penaluk ati perintah ke semampai deka mantu rayat.

Ngagai kitai ke bekerja kompeni tauka enggau Gerempung Ukai Perintah (NGO) anti mih, angka enda lama agi ngagai sida ke begaji mit tau diatur baru.

BELAJAR JAKU IBAN

A

abur        - 1.terkenal, masyur    2. hura-hara, kacau bilau
achar       - sj kail byk mata
adan        -garis penamat
adang       -persediaan
ading        -persediaan makan, hidangan (manakan)
adu          -1.susunan, hiasan    2,aduan, rayuan, dakwaan
agang       -ranting kayu mati
ajih           -sihir
akal         -daya kemahiran, kepintaran
alah         -1.kalah,tewas        2.Bboleh, dapat
alai          -tempat,keadaan
alun         -1.alun (alun gelumbangt)     2.serangan,serbuan    3.bertambak,berbatas (jalai alun) cth :ngalunka
                 (menambak tanah)
ama        -kadang-kadang, kadangkala
amang     -ancaman,ugutan
ami          -1.(tanah) subur        2.lembap,basah,berlumpur
amok       -amukan,serangan
ampuh     -tenggelam, terbenam
andal       -1.percaya,yakin    2.gembira,suka
andau       -titi,jembatan (kecil)
andi         -khabar angin,omongan
anga        -selera,nafsu makan
angkun     -sayang(akan0,sangat kasih    2.haloba
ani           -1.NGANI -mendiami (utk sementara)    2.menjaga,menunggu
ansak       -hasut,desak,gesa
ansal        -miskin,kekurangan (harta,benda)
ansang     -insang ikan
ansau       -mencari
anta        -dandan,perhisan (wanita)
antap       -alas,lapisan
antoh       -1.baik hati,lemah lembut     2.tiang utk roda,pemantul paku gasing
arai        -mendedah, membuka
awak      -1.peluang,kesempatan        2.supaya,agar
ayong     -terlindung,dilindungi
ayu        -1.semangat             2.alamat,petanda,makna mimpi        3.kesihatan,kekuatan,semangat tinggi


B

babal        -1.empangan,ampang    2.lembap (fikiran),pelupa
badas        -baik hati,elok,halus
bagak        -besemangat (ramah tamah)
bagas        -rajin,kuat berusaha,tekun
bagi          -bagi,bahagi,bahagian,agihan
bajik        -cantik,menarik(wanita)
bajong      -sakit lumpuh
baka         -macham,seperti
bakal        -luka
bakih        -kawan,rakan
balang       -kosong, hampa,gagal,sia-sia
ban           -1.pertukangan(kayu)    2.bangunan
banchak    -menikam (dgn tombak)
bangai       -lama;sepanjang masa
bangat       -sangat lebat (bkn hujan)
banggur     -bengkak,kembung (bkn bibir)
bangkas    -(warna) kekuning-kuningan, perang    2.sj ikan sungai
bangkit      -1.tuduhan,fitnah.celaan        2,sj buah
bansi         -1.anggaran,agakan    2.tambhan (bayaran dll)
bap           -tutup,tudung
basa         -budi bahsa,sopan,hormat
basau        -boros
batak        -tarik,ragut
bauh         -panjang (rambut,kuku,rumput)
beba         -kusut hati, mengelirukan
bebal        -1.sumbat,penyumbat,    2.penahan;ampangan
beduan     -mengajuk;mengejek;mengusik
begah        -megah
begau        -(dlm keadaan)cemas,takut,riuh rendah
begaut       -cepat,lekas
bejuak       -kejang (urat;mulas perut
bekau        -kesan,tanda,bekas
bela           -1.persedian (bkn makanan);masakan;sajian;layanan    2.sama,semua;rata
belayong    -gagah perkasa
belulang     -tali pinggang
belunggang     -(tebelunggang) -terbalik (tebelungging) -jatuh terjunam;tertungging
bendar         -1.sunguh-sungguh    2.betul,benar     (pemendar)=kesungguhan,keikhlasan
bengal         -pekak
bengkah      -bahagian,kelas,,jenis,tempat,lot
berai           -berahi;merindui sedih dan dukacita
berapun        -jauh
berundang    -pergi ke sana ke mari atau ke depan ke belakang
berupai        -(kelihtannya) terang;nyata;ketara
betu             -melecur,terbakar
bidik            -beruntung,bernasib baik
bintis            -serangan (ayam),belaga
biring           -warna merah (bulu ayam sabung),atau warna muka yg sihat,bersemangat
bumbus        -berlubang,ditembusi
bungah        -jenaka,gurau,kelakar
bungas        -pertama,baru
butang         -zina,perzinaan;perlakuan sumbang
buti             -bergurau
buya           -1.dikotori,dicemari,tercemar    2.turut campur,terlibat,terbabit

C

chabang      -(bkn pohon kayu)
chakah        -1.cergas,aktif    2.berbalah,bertengkar    3.sudut yg tidak tepat
chakap        -cakap besar,(sombong) NYAKAP -mencabar orang
chara          -1.cara,aturan (sistem)    2.dakwa,acara,kes
chegai         -bediri lurus
chegi           -bediri tegak-tegak
chego          -tegak,lurus
chelak        -1.celik,buka    2.cetak
chinang        -merah
chunto        -contoh;acuan
chuan         -1.acuan    2.teladan,contoh,panduan
chuban        -mangkuk(cawan getah0


D

da            -1.lagi    2.hampir-hampir
dabal        -denda yg ditambah sekali ganda
dadak        -bodoh
dagang       -perniagaan,perdagangan,jualbeli
daja           -jaja
dampa        -rumah panjang sementara
dampih        -hampir,dekat
damping     -dekat,hampir
dandang     -besambung tanpa sempadan (bkn huma;bidang)
dandong     -kain (sarung)
danjang       -1(bkn wanita)segak bentu badan        2.berbantah-bantahan
danji           -janji
dapat        -(bkn org tua)sihat,baik,aktif
dawa        -dakwa,tuduhan,tuntutan
dedat        -pukul,palu
deka         -ingin,hasrat,mahu
demoh      -mengerang
dengah      -mangsa (dlm peperangan -ngayau)
dijir          -baris,deretan,jajaran
duju         -rempuhan,langgaran,tolakan
dupan       -(bkn babi)taring yg besar panjang dan melengkung
durok       -gotong-royong,derau
duru        -deru

NYAMBUT PENATAI TAUN NAGA

Penatai Taun Baru endang di anti sereta di sambut enggau pengabis ati ngena mayuh macham chara pengerami enggau adat asal bansa nitihka daya idup raban bansa siti-siti.

"Taun 2011...aku meri selamat tinggal ngagai nuan. Penatai nuan aku sambut enggau pengabis gaga..365 hari tua bejalai berimbai bekunsi pengingat enggau kenang...pait, manis, pedis, nyamai, senang, merinsa... bekunsi napi penanggul, penusah...pengaga, pengelantang...semua nya asam garam pengidup...sama enggau nuan siang enggau malam."

"Taun 2012 ... Selamat datai ngagai nuan.. Aku udah sedia begulai enggau nuan nujah pejalai idup alam baru..enggau juluk ati baru ...sepemanjai umur nuan 366 hari taun tu. Tingkatka asil pengawa..sungkakka tikas pengidup...bai berekat pengerai enggau pengelantang...tanam pemereti ati begulai enggau bala pangan, diri sebilik...entara diri sama diri...entara raban bansa...lindung pengidup rayat kami diau dalam pengelikun enggau pemaik."

Di serata dunya 'Taun Baru' dirami sereta disambut enggau mayuh macham pengerami nitihka chara daya idup sekeda raban bansa, Laban 'Taun Baru' di sambut beberapa kali dalam setaun, nitihka pemayuh raban bansa.

Mensia di serata dunya nyambut taun baru nitihka daya idup ke di amal sereta di guna kenyau ari kelia menya. Taun tu 2012...Penatai iya udah di sambut di serata dunya kena malam 31 Disember 2011. Pengerami nya kena ngelekaka taun 2011 lalu nyambut penatai 2012.

Taja pia mayuh agi pengerami 'Taun Baru' disambut nitihka pengarap enggau daya idup sebengkah raban bansa. Kena 23 Januari tu raban bansa China ngelaluka penatai sereta ngerami 'Taun Baru China'.

Kenyau ari pun bulan Januari tu, pengudah nyambut taun baru 2012 raban bansa China endang udah nyendiaka diri ngerami penatai taun baru sida iya, Pemeri, baka mata duit, buah limau mandarin, kek, sereta enggau mayuh macham barang pemakai udah di agih ngagai orang ke kurang penatai pemisi, orang ke enda bidik lansik, ke diau di rumah pengandai tuai enggau mayuh macham rumah pengasih sereta  enggau rumah pengintu pengelantang rayat ke kurang benasip, enggau rumah anak patu balu di serata menua tu.

Tu maya bala raban bansa China ke bisi agi penatai pemisi ngereja tanggung sosial kontrak sida sereta meri basa enggau terima kasih ngagai pangan dagang sida.

Taun baru China disambut malam 22 Januari. Nitihka penemu siku raban bansa China ke nyadi Chairman Kelab Budaya Fizikal Ho Soon,Then Shui Ted, malam nya semua bala dalam bilik sida begempuru lalu belabuh enggau jamu makai malam kena ngeratka tanggam kaul diri sebilik.

Maya nya sida minta ampun ngagai pangan diri atas penyilap sereta penyalah taun lepas lalu ngarapka kaul enggau pangan diri ulih mai pengelantang sereta pemujur dalam semua pengawa. Lebuh ditemu Then Shui Ted ngambi peluang nya meri Selamat Taun Baru ngagai semua rayat Malaysia.

Udah pengerami jamu malam entara sida sebilik,bala raban bansa China nyendiaka diri nyambut taun baru. Merechun di selup. Malam nyadi terang. Merechun di selup...munyi letup dandang buluh maya nunu reban umai.

Belabuh mih pengerami Taun Baru China... Tiap iku orang meri Gong Xi Fa Cai (Selamat Taun Baru) lalu di sempulang enggau pemeri ang pow. Taun tu taun Naga, nitihka kalendar raban bansa China, lalu sida naruh pengarap taun tu mai penyenang enggau pengelantang sereta mai jereki ngagai komuniti sida ke mayuh ngemeranka pengawa dagang.

Raban bansa India (Tamil) udah tembu ngerami taun baru sida iya. Pengerami Ponggal nya nanda pengujung pengawa bumai sereta selamatka pemujur asil umai sida taun nya.

Raban bansa Melayu (Islam) mega bisi chara kediri nyambut taun baru sida iya. Awal Muharam kena 27 November...taun baru 1433 Hijrah.

Raban Bansa Dayak nyambut Taun Baru sida tiap taun kena 1 Jun. Taun baru di sambut semua raban bansa Dayak, nyengkaum Iban, Bidayuh, Orang Ulu enggau mayuh agi raban bansa asal menua tu. Taun baru di sambut enggau piring, enggau ading, enggau asi enggau tumpi, di sempulang enggau sampi minta jereki.

Semua pengerami nyambut taun baru endang bedau lengkap enti enda ngereja pengawa agama. Tiap kali pengerami Taun Baru, gerija, masjid sereta enggau semua rumah pengarap endang tempat alai raban pengarap nya besembiang...meri terima kasih ngagai petara Allah Taala ke pemanah, pemujur, pengerai, pengelantang enggau pengelikun maya taun nya, lalu besampi minta tulung, minta lindung 'petara' ari semua utai ke jai ke tau mai penusah idup... sereta besampi minta panjai umur, bepengerai, betuah, belimpah, bidik lansik  sereta idup dalam pemaik enggau pengelikun sepemanjai taun...

Ngerami ulang taun ke-77 Raja Rock Elvis Presley 7 Jan

Elvis Aaron Presley anak Vernon Presley enggau Gladys ada kena 8 Januari 1935, ba sebuah rumah kayu mit di Tupelo, Mississippi, Amerika. Menyadi sapit iya benama Jesse Garon ada lulus ke ngujungka Elvis nyadi anak tunggal.

Kenyau ari mit Elvis sigi rindu belagu lalu lebuh umur iya 10 taun iya bediri atas mangku mai lagu ‘Old Sheep’ merindang bala panggan ke sama sekula enggau iya kena 10 March, 1945.

Elvis kala menang ba pekit belagu lalu bulih perais $5.00 ba taun 1946. Iya keran deka meli ensikal tang apai enggau indai iya enda cukup duit lalu meli ka iya siti guitar rega $12.00 ba kedai Tupelo Hardware.

Sida Elvis sebilik pindah ke Memphis kena 6 November, 1948, lalu Elvis mai lagu ‘Leaf on Tree’ dikena beserara enggau Tupelo.

Ba taun 1953, Elvis nembu ke pelajar iya ari Homes High School.

Pengawa iya ke belagu berengkah mujur ba taun 1956 lebuh iya ngerikut lagu keterubah iya nya ‘That’s Alright Mama’ dikeluarka ngena pirin chelum.

Sepemanjai pengidup iya, Elvis bisi ngerikut 715 lagu lalu bisi dijual penyampau 1.5 billion iti pirin chelum sereta kala melakun ba 33 buah wayang gambar kelimpah ari menang bulih 14 gelar.


Elvis keterubah iya betemu enggau Priscilla kena 13 September,1959 di Jerman.

Priscilla siku anak indu pilot soldadu tasik, James Wagner ke mati bebadi lebuh bilun meletup ngujung ke Priscilla nyadi anak tunggal diau enggau indai iya Ann Beaulieu ke balu lalu belaki baru enggau pemesai soldadu.


Elvis Presley nikah enggau Priscilla Beaulieu kena 1 May, 1967 di Alladin Hotel di Las Vegas lalu kena 24 May,1967 iya ngerami mensia mayuh ke enda ulih datai dudi ari nya di Graceland.

Seduai bisi siku anak indu, benama Lisa Marie Presley.

Elvis meli rumah berega $40,000.00 kena ngemunka pendiau baru di Beverly Hill lalu udah nya dijual iya baru dikena meli Graceland enggau pemesai kandang tanah 14 ekar ti mega dikena endur nginang kuda.

Bandar Raya Kuching mega enda tinggal deka ngatur pengerami kena ngingatka pengada Elvis Presley ke genap 77 taun kena ka 7 January, 2012 tu urung pukul 7.30 malam diatur ba Sapphire Executive Lounge, Jalai Ban Hock.

Empat iku orang ke tebilang sereta landik belagu nundaka chara Elvis deka merindang mensia mayuh nya Elchris Gomes ari Kota Kinabalu Sabah, Wilfred Vincent Ragam ti mega digelar Elvince ke udah dua kali bulih gelar Elvis Sarawak ba taun 1964 enggau 1965, Valentine Tawie Salok tauka Elval ke digelar Elvis mulut-simbang, Pulau Pinang, enggau Ges ak Barundang tauka Elges ke agi mengkang digelar Elvis Presley, Kuching. Elges bisi udah kala raun ngagai Graceland ba taun 2004 lalu diau ba Heartbreak Hotel.

Penyanyi empat iku tu deka belagu merindang mensia mayuh ngena pakayan niru gaya Elvis Presley ke deka belagu Suspicious Mind, Don’t Be Cruel, It’s Now or Never, Hurt, G.I. Blues, Girl Happy, Way Down enggau Gave Me a Mountain.

Penyanyi lama mega sama bisi datai deka merindang mensia mayuh malam nya.

Tiket dikena masuk meda pengerami nya semina RM35 ke tau dibeli ari Ivan (016 8601857), Wilfred (0198181949), Valentine (014697748) tauka Elges(0198898251).

Semug Beer tauka oren enggau pemakai bisi disediaka ngagai orang ke bisi meli tiket dikena meda pengerami tu.

Elvis datai di hawaii deka belagu
'Aloha Ari Hawaii'








Elvis enggau Priscilla kawin kena 1 may 1967

Rega Barang Enda Nemu Nurun

Lemambang Sada Sarawak

Munya, urung taun 70 ngagai taun 80 orang tuai suah besebut duit agai pedis bendar diulihka. Rambau nya jarang bendar kitai ninga orang begaji lebih seribu ringgit sebulan. Endang besai meh pangkat orang nya enti iya nerima lebih seribu ringgit sebulan baikka nya gawa ba kompeni tauka nya gawa ba perintah.
Orang ke masuk gawa perintah ngena setipiket pom lima pass Senior Cambridge enti masuk gawa nyadi kerani maya semina nerima 180 ringgit aja sebulan. Ke baruh agi ari nya pangkat, bisi ke enda sampai seratus ringgit sebulan.

Enti ngidupka diri ngena chara bumai betaun amat pedis ga ngulihka duit, maya nya rega getah sekati ngira sen aja, padi enti enda salah ingat aku 16 ringgit sepikul, lada pan maya nya agi baruh bendar rega. Kelimpah ari nya nadai tentu jalai bukai dikena ngidupka diri.  Taja munyi duit ke ulih nya enda mayuh tang enda ga bangat tusah ngidupka diri maya nya. Datai ga anak gaji nya,  sampai ke ujung bulan. Suah kitai ninga orang tuai nyebut, ‘duit maya nya agi bisa.’

Nama kebuah pia kini? Kati enda munyi nya laban rega barang maya nya kelia agi murah bendar. Ambika banding kopi o semina 15 sen sechangkir.  Tambang bas dini-dini endur ti dituju ba Kuching ditu sigi 15 sen aja. Mee rangkai tauka ke bekuah nya agi ulih 50 sen ngagai 70 semangkuk. Asi champur  seringgit tauka seringgit lebih sepinggai rambau nya.

Kereta baru maya nya mar amat nya enti rega iya nyau bebelas ribu. Rumah batu kenu ku orang kelia enti ke setingkat besambung agi ulih nya rega iya bebelas ribu ringgit.
Uji bandingka rega barang ke bisi disebut nya tadi enggau rega iya ke diatu? Jangka aku semua kitai nemu semua rega barang nya diatu. Uji kira berapa kali lipat ganda iya udah niki dalam kandang 30 puluh taun. Nyampau nya wai.

Enti kitai beratika barang ti dikena kitai besari-sehari nya endang semampai niki belama.  Jarang bendar, tau dikumbai nadai barang ti dikena kitai besehari-sehari nya kala turun rega. Laban rega barang ke enda nemu turun nya meh ti ngasuh kitai suah berasai pedis ngidupka diri napi pemar barang sereta napi penyampat rega barang niki.

Nyepi  pemedis ngidupka diri dia kitai kala  ninga orang ke gawa perintah tauka kompeni minta ditikika gaji laban rega barang nyau majak mar pia jaku.  Tang lebuh perintah tauka kompeni benung berunding deka meri gaji niki ngagai orang ti gawa, rega barang pan lalu berengkah niki baru. Lebuh maya gaji udah ditikika, niki baru ga rega barang.

Suah setaun udah nya niki baru, lalu pia mega taun ke nangkanka nya niki baru. Lalu gaya pengidup orang ke nerima nya lebih kurang asai ke empai ditikika gaji, laban orang dagang endang udah dulu nikika rega barang. Penyuah gaji niki enda tetitihka penyuah rega barang niki.

Ba orang ti gawa perintah dalam kandang lebih tiga puluh taun tu enti enda salah ingat aku, enda bulih sepuluh kali udah niki, baka ari baruh Skim Suffian Report, Cabinet Committee Report, Sistem Saraan Baru enggau Sistem Saraan Malaysia. Tang munyi ke udah dikerandauka dulu tadi mega sebedau gaji tauka skim tu dipejalaika barang lalu berengkah niki.

Barang ti dijaga perintah rega baka gula, tusu, minyak makai, tepung enggau sekeda ti bukai mega kadang-kadang tau niki. Ambika banding gula, laban rega iya dijaga perintah, gula nemu nadai dijual di pasar. Suah enggau orang begigaka gula rambau ke suntuk gula nya, nadai ga bulih. Bisi maya orang ke nyual nya rambau ke suntuk nya, nyau ditakar ga pemayuh ke tau dibeli siku-siku. Semadi udah ditikika rega nya baru iya mayuh baru.
 Alit ati kitai, kati nya tau baka nya. Pangka iya ke udah niki nya besai bendar. Utai irup baka, kopi, teh, enggau ai manis bukai lalu bela sama niki. Barang bukai ke digaga begunaka gula mega lalu niki baka, kek, kuih, enggau bansa pemakai manis bukai.

Minyak enti bisi niki, pangka iya mega chukup besai ngagai rega semua utai ke dikena serata dipakai kitai besehari-sehari. Sigi lalu tekala nya iya niki, kebuah iya mayuh bendar, nyumai ngena minyak, ngangkut semua utai ngena kereta, ngena lori begunaka minyak, mindah kin kitu begunaka minyak, enggau mayuh macham perengka enggau kereban ke dipadahka begunaka minyak.

Rega barang bukai ti dijaga perintah enti iya ditikika sigi besai magang pangka iya ba pengidup kitai. Kitai tau beterima kasih ngagai perintah laban ke udah meri subsidi dikena nagang rega barang ti dijaga nya ari ti niki. Nya alai kitai ke nyadi pembeli tauka pengguna tu suah tak bedemuh ngenang rega barang ti dipeguna nyau majak mar.

Kenu ku orang ti pandai ba ekonomi rega barang niki enti duit mayuh lalu barang ti dipeguna nya mimit. Ba ekonomi nya konsep ‘supply and demand’. Rega barang niki enti peminta mayuh lalu barang nya kurang. Nya penemu orang ti pandai ba bidang tu. Awak ke sida meh berundingka nya.

Ba kitai empu wai, kitai patut bejimat-jimat bekenaka belanja ke ulih diri. Ukai nyamai ngulihka duit. Duit ke ulih enda patut dibasau ngapa. Duit ke ulih patut bisi meh bagi iya digalau, disimpan ke penabat maya hari kitai ti suntuk sendat. Sigi enda ulih anti rega barang ti nurun. Suah kitai ninga sebana orang tuai, barang ti dijual kitai baka getah, koko, lada nya baru nemu nurun niki rega!

JAKU KITAI NYAU NEMPUSUNG

Keranjai jari : Lemambang Sada Sarawak

BELAJARKA jaku sigi nadai kala pulai ke pengerugi.  Mayuh agi jaku ditemu nyamai agi ga kitai bejaku, berandau tauka berkomunikasyen enggau orang bukai ti nemu siti-siti jaku nya. Jaku English, jaku Melayu, jaku Iban,  jaku China, jaku India, jaku  German, jaku Sepanyol, jaku Peranchis, jaku Portugis, jaku Jipun enggau beratus bemacham jaku bukai di dunya endang manah semua. Enti sema kitai nemu nya magang kitai tau meri ensumbar, meri jejuluk, nitah, ngelar, tauka ngela orang nya anda jaku.

Jangka enggau pelaba aku, deka pedis nemu mensia ke tau ngena jaku ke ngemayuh nya. Semadi meh mensia nya bisi batu pending, nemu meh iya semua jaku nya. Enti kitai bisi ngembuan batu pending, ukai semina jaku kitai mensia tu ulih temu kitai, jaku antu jaku jelu nemu meh kitai. Kala ninga ensera Batu Pending unggal, tau betanya, pansik ba bup lama ensera kitai Iban, ba majalah lama, laban endang bisi nya udah dirikodka nyadi dokumen kitai. Dalam ensera, nyau pengujung, iya ke ngembuan batu pending nyau nyadi kaya raja laban mayuh bendar reta pesaka dikerandauka jelu,lalu  tegal iya ke nemu sereta meretika utai ti ku antu, jelu nya lalu sepeneka ati iya ngambi  meh reta pengaya nya. Ukai jelu, antu bisi begunaka nya. Ukai nya bisi orang ngempu. Ambi meh sepeneka, sepemulih diri. Nyamai amai nya enda ibuh gawa tau meh!

Kitai mensia naka ke ditemu ba dunya moden, ba melinium baru nadai ngembuan batu pending. Berani aku madahka nadai, baik ke nya di menua Amerika di menua China, di menua Jipun, di Europa, menua Timur Tengah tauka Asia Tenggara. Enti bisi tentu iya nyadi orang ti tebilang, dipandangka ba internet ba televisyen enggau ba kereban komunikasyen bukai.

Kita mensia idup meseti nemu bejaku, indah orang ke bangkal bengal enggau agu isu, sinu kasih meh kitai ke sida ti bisi penimpang nya,  pan tau bejaku taja semina enggau tanda jari aja, lalu utai ti dikedeka iya ditemu mensia bukai. Nadai-nadai pan sebansa jaku mesti ditemu kitai baka jaku ti dibai ada, jaku dilah diri, tauka ‘bahasa ibunda’ tauka ‘mother tounge’ kitai.

Tegal kitai ti enda diau kediri-diri, enda mangkang menua enggau dunya tu nengali, nya alai kitai patut nemu jaku bukai. Ba kitai di Malaysia tu kitai patut nemu jaku Bahasa Malaysia tauka Jaku Melayu laban nya endang udah ditetapka dalam undang-undang perintah besai menua kitai. Semua jaku enggau pengawa perintah sigi dipejalaika ngena jaku perintah nya. Nya alai nya beguna bendar ke kitai ke diau di menua Malaysia tu. Kitai patut landik ngena jaku perintah tu.

Jaku English tauka Inggeris lalu kala  ga sekeda kitai ngumbai nya jaku orang putih taja ukai semua orang ti bekulit putih ngambu diri ngempu jaku nya, nya jaku ke balat bendar dikena mensia ba tikas entara bansa. Jaku nya meh dikena ba pengawa dagang entarabansa, ba palan pelajar tinggi baka kolej enggau universiti entarabansa, lalu jaku tu meh ke mayuh sereta lama bendar udah dikena orang nuliska penemu dalam bup, enggau jaku tu meh ti masai dikena mensia lebuh bejalaika aum entarabansa. Enda tesat tua unggal ba dini-dini endur di dunya tu enti tua landik jaku tu. Sigi enda ulih kelaungka ga jaku entarabansa tu kemaya hari tu. Pasang televisyen tebal agi program ke memanah nya dalam jaku tu, tekanka internet tauka komputer  tebal agi jaku dikena komputer nya jaku Inggeris ga, semua jaku lalau, jaku asuh, jaku suruh iya nya dalam jaku tu. Puas betanya ngagai orang bukai enti enda nemu jaku nya. Timpang amai asai iya. Mayuh pemanah nemu jaku tu, kitai patut sama landik ba jaku tu.

Baka kitai ke ngumbai, ngaku diri Iban tu, nyelai sereta nyeliah udu nya wai, enti kitai madahka diri enda nemu jaku Iban. Jaku nya meh ti ulih nyadi ke tanda kitai nya Iban. Keba suah amat didinga orang nyebut rambai jaku, ‘… dikelala buah ari langgu, dikelala daun ari kayu,  DIKELALA BANSA ARI JAKU.’

Enti kitai beratika enggau silik, enti kitai lansik mendingka ba radio, enggau ba kereban bukai mayuh amai orang ti ngena jaku Iban tu. Kaban belayan, suku juru kitai ke bansa China, Melayu, Melanau, Bidayuh,  Orang Ulu enggau ke bukai mayuh amai meh nemu sereta ngena jaku tu ari kelia nyentukka diatu. Penyanyi lagu Iban enti kitai rindu ninga lagu, ukai kitai Iban aja belagu ngena jaku nya.Mayuh nya ke bansa bukai, rindu kitai ninga nya. Terima kasih ngagai sida laban rindu belagu dalam jaku Iban. Bup dalam jaku Iban nyau mayuh, Majalah dalam jaku Iban enggau diatu surat kabar dalam jaku Iban nyengkaum Sada Sarawak tu pan udah bisi.

Diatu, enda nemu asai nuan unggal, enggai ga nyeramaka iya, Lemambang Sada Sarawak temegah amat ati ninga jaku Iban tu nyau diajar ba taga jam pelajar sekula baka jaku China, Arab enggau Tamil. Enti enda salah dinga aku jaku kitai tu deka berengkah diajar ari Primari Satu, lalu endang udah diajar ngagai Pom Lima diatu, lalu jaku tu mega deka dikira lebuh milih nembiak masuk ngagai Pom Enam. Berengkah ari taun 2011 tu mega enti nitihka padah surat kabar deka dikena matih orang ke deka ngajar jaku Iban di sekula, ba Palan Pematih Pengajar ti udah dipilih di Sarawak. Orang ke dilatih nya deka diberi setipiket  tikas degree nya. Ditu bisi ga Universiti udah ngajar jaku Iban ba tikas minor, lalu bisi ga universiti bukai agi ke bisi andi deka ngajar jaku tu. Naka pemanah-manah meh nya.

Tabi puji ngagai tuai-tuai kitai Iban ke endang balat deka ngemajuka jaku kitai Iban,  opis opis perintah ke nangkup pengawa tu baka ti begagaka kereban pelajar enggau bup teks ti dikena nembiak, enggau semua bala kitai ke deka meda jaku Iban tu mansang, maju sereta ngerembai. Kitai sigi besampika jaku kitai tu mansang, ngebung baka langit, nempusung baka bukit.

TAJU REMAUNG BA DUNYA SIBER

Keranjai Jari : LEMAMBANG SADA SARAWAK

UNTUNG  bulih beliung enda ngambuh, mudah bulih peredah enda ningkuh. Gaga. Andal. Betempap pah.
 Ketuchum lelegup, berundingka diri ke tau nyadi kaya raja nadai pansut setitik peluh. Bulih duit bejuta, enda temu penatai, enda nyenggala nemu sapa ti bejanji deka meri. Buka internet meda surat  e mel orang meri tabi puji madahka nomor akaun ba e mel teulihka perais beratus juta wang Amerika.

Duh enti nya amat parai tau meh! Akai rai kati ke enggau duit ngemayuh nya. Meli rumah. Meli kedai. Meli bilun, raun ngelingi dunya mai diri sebilik, kaban belayan suku juru , enti beratus juta munyi ku surat ba internet nya pan sigi chukup meh. Badas chukup pemadas. Tegepang, sigi tedadang meda nya. Tang nyau pengujung ba e mel ti bansa nya kitai dipinta meri penerang pasal diri empu. Dipinta meri nomor akaun bank, ngambika ckek tau terus dipasukka ngagai akaun kitai nya kenu. Suah ba pengujung e mel, nangkan kitai ti nerima e mel nya, enda ngasuh madah ngagai orang bukai, laban enggaika orang bukai ngambu kenu.

Kenu ku orang ti kala ibuhka  e mel ti bansa tu, sebedau orang ti madahka kitai bulih perais nya ulih ngemasuk tauka ngirumka perais beratus juta nya, penerima dipinta bebayarka tu nya, bayar proses, bayar insuran, entah bayar nama agi ti tau dibayar di dunya tu sigi diletakka magang dia. Neh wai kala kita ninga pelaba aku orang ti kena tipu ba dunya siber, ti bebayarka lenyau duit beribu-ribu ringgit dikena ngulihka perais ti beratus juta nya.

Nyau ke pengujung, nama deh, nganti senganti meh,  nganti sungai enda beulu. Nganti puang, nganti kusung, nganti hari siti ngagai hari siti. Nadai! Nyamai agi nganti bulan labuh ari langit. Telefon.  Nomor  telefon ti diberi orang nyau agu, bisu, enda nemu nyaut agi. Giga. Bah kini ngiga dih. Ukai nya baka ti dikelala tua orang ke empu akaun ti endur kitai masuk ke duit bayar nya. Betanya. Ngagai sapa betanya dih? Parai kitai ditipu orang ba internet baka nya wai.

Mayuh agi wai, jalai bukai orang tau nipi kitai ba internet. Bisi nya nganjung  e mel, mai kitai bepangan, mai kitai bekelala enggau iya laban iya orang ti kelalu kaya, ngembuan mayuh reta pesaka ti berega beratus juta, madahka diri sakit  tang nadai nemu sapa orang ke tau diberi iya semu reta pesaka nya. Ngasuh kitai nyadi orang ti beempu reta pesaka nya, enti kitai sanggup ngereja utai ti dipinta iya. Dipadahka orang,  iya udah mati ke enggau kitai betulis  e mel nya tadi. Udah nya orang bukai ngasuh kitai bebayarka tu nya, sebedau kitai ulih nerima reta nya ke dijanjika ngagai kitai. Uji perundingka wai, berapa pinta orang ti endang deka nipu kitai nya sebedau kitai nerima duit beratus juta munyi ke dijanjika.

Bisi ga sekeda mensia ba dunya siber madahka diri, bekereja ba bank, nyimpan duit bepuluh juta duit dalam akaun ti nadai temu orang empu agi. Besemaya iya enggau kitai, deka masukka  tauka deka mindahka duit nya ngagai akaun kitai. Ke pengujung nya sama ga minta nomor akaun kitai, ngasuh kitai bebayar ke bemacham fee, ngambika duit ulih dipindahka.

Bisi ga mensia ba dunya siber mai kitai kunsi, saum bisnes enggau iya. Sereta deka magi untung besai ngagai kitai. Ke pengujung iya ngagai tuju ti sama, ngasuh kitai bebayar ke mayuh macham bayar, sebedau iya meri ungkup kitai ti beratus juta kenu.

Enti kitai bisi laman web ke diri empu, mensia ba dunya siber tau ngereja sereta menyati laman kitai nya lalu ngirumka e mel, ngagai semua pangan kitai dia. Nyadi pangan kitai, ngumbai kitai ke empu laman web nya meh ke e mel ngagai sida. Kitai dipadahka  iya tasah lebuh nemuai ke menua tasik, kena rumpak, kena churi orang duit, lalu minta bantu, minta kirumka duit ngambika bisi dikena tambang pulai ke menua. Nya-a! Enti kitai enda bejimat ngirum mih kitai duit, ngagai akaun ti dipadahka dia. Nemu nya pangan kitai ke bendar nya agi dugau-dugau ba rumah iya empu, nadai nemu nya-nya.

Bisi ga, mensia ba dunya siber deka nipu orang ngena tektik deka bepangan, ngambi kitai ke bini tauka laki iya, anang mega kitai kelalu gagit, kelalu andal, lalu ke besai bendar nya anang sekali  mayar sebarang utai dipinta iya sebedau iya jadi enggau kitai amat-amat. Anang mega kitai kempang nyanggup sebarang utai ti diasuh iya laban kitai tau teparuk diasuh iya nyadi keledai dadah.

 Kekadang mensia dunya siber tu, munyi iya tak amat-amat deka jadi enggau kitai, lalu sanggup deka ngambi kitai pulai ngagai menua iya, nyadi bini tauka laki iya. Datai iya kenu, ngagai menua kitai tu ngumbai diri mai duit bejuta, tang udah nya ngagau ngena telefon madahka diri ditan orang ti bekuasa ba padang bilun, tegal kenu mai duit, tekelalu mayuh masuk ngagai menua kitai tu.

Udah nya enggau sabak-sabak bejaku ba telefon ngasuh ngirum duit dikena mayar orang ti bekuasa, ngambika iya tau dilepaska. Kitai pan nganjung, ngirum duit! Beribu ringgit. Anti datai, udah nya, ni nya bisi tau datai. Ga endang nipu. Sendikit penipu nya ba dunya siber.  Nama penyadi udah nya. Nadai meh, duit lenyau, ati regau, kada enda duit nya ulih nyanda.

Mayuh amat jalai enggau chara orang ba dunya siber tau nipu kitai wai. Anang empelita. Anang teparuk. Anang kena sintak panjuk. Anang negu taju sendikit orang jai, orang penipu ba dunya siber. Ke ingat amat wai ulih kitai, nadai orang ti enda dikelala deka meri kitai duit taja sesen pan. Sapa deka meri duit ngagai kitai, enti iya enda dikelala kitai.  Nya mih anang ngumbai diri tau untung bulih beliung enda ngambuh,mudah bulih peredah enda ningkuh ari dunya siber.  Anang nguji negu taju remaung ba dunya siber wai. Bejimat mih.

JASA LEMAMBANG JINGAN SERURAN DIKENANG

Keranjai Jari : Michael Anchang

'Pemati kitai mensia ukai baka pemati matahari, enti malam iya tebenam padam, tang siang iya pegari tampak terang...'

PEMATI niang Jingan anak Lanchang, siku lemambang ke tebilaang di Krian Tengah, Saratok, ninggalka mayuh buah kenang, ninggalka mayuh abi kaki, abi jari, ngagai bansa Iban lebih agi mensia mayuh di Saratok
 
Dalam jaku kenang iya, Dunstan Melling Undau, (Executive Editor Sarawak Tribune), ST  kena 12 Disember,2011 madahka, Jingan @ Udang nya siku lemambang ti chukup tebilang dalam adat, leka main sereta enggau chara pengidup raban bansa Iban, baka renung, pengap, sugi timang jalung enggau sampi udah nyadi ke buah mulut raban bansa  Iban lebih agi mensia mayuh di tengah Batang Krian.

Ari pengelandik iya, niang Udang tauka Jingan selalu dikangau ngaduka pengawa maya gawai, pengerami nikah di rumah panjai, di tikas pelilih menua Saratok sereta mega dikangau ngaduka pengawa asal raban bansa Iban di menua tu. Iya mega udah kala diambi miau pengerami Tikah Iban ke diatur di Bukit Bintang Plaza, Kuala Lumpur serimbai enggau pengerami Hari Kebangsaan taun 1981.

Lebuh Sarawak nyambut pengerami 20 taun udah merintah diri dalam tau 1983, Lemambang Jingan mega nyadi temuai ke dipebasa perintah Sarawak mandangka pengawa, pendiau enggau mainasal raban bansa Iban. Niang Jingan tu orang ke nelap ati, sedia nulung nembuka pengawa tauka pengerami raban bansa Iban. Pengelandik sereta enggau peneleba iya udah ditemu mensia mayuh  lalu ari nya Niang tu tau digelar penyanding penemu senentang adat, leka main, sereta enggau cahar pengidup raban bansa Iban.

Sebedau pemati iya, Niang tu bisi dikangauka Yayasan Tun Jugah ngajar berenung sereta bisi mega ngerikut sekeda leka main iya.
    
Melling mega madahka, "pemati iya tu mai pengerugi besai ukai semina ngagai sida sebilik, tang ngagai raban bansa Iban  sereta enggau menua tu taja pan pengawa ke udah ditinggalka  iya agi begulai enggau kitai."  Leka renung, pengap, sugi, sampi iya enggau semua abi jari iya kena nulung lalu ngerembaika leka main raban bansa Iban agi didinga di radio (RTM).         

Pia mega pengawa sosial ke udah digaga iya senentang pengawa asal raban bansa Iban. Iya udah dipadu nyadi konselor  Kunsil Sitak Saratok lalu udah nyadi tuai rumah megai nembiak rumah panjai iya empu. Semua nya nyadika buah kenang pengingat kitai magang.

Ari pemanah sereta pemayuh bidang pengawa ke udah digaga iya, ba taun  1985 iya udah nerima midul Bentara Bintang Sarawak (BBS) lalu ba taun 1988 iya mega nerima Bintang Jasa Mu Di Kenang ari Yang Di Pertuan Agong.

Penelap ati, pemanah sereta penalam runding enggau penemu, peneleba enggau pengerindu iya ke leka main, jalai pendiau sereta enggau adat basa raban bansa Iban ti dikembuan iya diatu nyau nyadika lanting peninggal iya ke chukup besai reti ngagai raban  bansa kitai.

Pemati Niang Udang @ Jingan ak Lanchang tau di kenang ngena sulu leka jaku:

'Gajah mati ninggalka gading, mensia mati ninggalka lanting.'

BEJIMAT ORANG KE DEKA NIPU SERURAN BISI BA DINI ENDUR

 Keranjai Jari : LEMAMBANG SADA SARAWAK

LEKA jaku sindiket nyau ninting hari didingaka kitai . Sindiket nipu, sendikit bejual mensia, sindiket niru enggau mayuh bengkah sindiket ke bukai. Ke baru bisi nyadi nya sindiket ngerijistar peminta bantu niru ke seruran begigaka orang ke deka minta Program Bantu RM500.

Sindiket nya bulih penerang ari chara ke enda dikemendarka lebuh sida iya ninga senentang Belanja 2012 ke meri agih RM500 ngagai genap buah ruang bilik ke kurang ari RM3,000 penantai pemisi sebulan. Lebuh penerang senentang pekara bisi madahka genap iku orang ke deka minta duit nya meseti ngisi pom ke ulih diambi ari opis Lembaga Hasil Dalam Negeri (LHDN)  ke semak.

Ba maya ke diatu pom nya endang sigi udah bisi semina LHDN bedau mansutka pom nya. Nitihka padah pemesai penerang LHDN, Masrun Maslim sida ke enda betanggungjawap nya udah berengkah meri pom peminta tiru ke dijual sida iya ngagai orang mayuh. Iya ke betul pom pechuma  nya bedau diberi ngagai mensia mayuh.  Ditu kitai bisi meda bala sindiket ke baka nya lebih agi jampat deka ngulih ke untung ari orang ke ulih dikemulaka sida iya.

Raban sindiket nya nemu senentang sekeda mensia mayuh ke tekelalu deka jampat lebuh ninga bisi duit ke deka diberi perintah. Sida iya enda sabar sereta deka nerima duit RM500 enggau naka penyampat. Pekara ke baka tu deka dikena bala sindiket ke enda betanggungjawap. Nya alai,  kitai ngarapka bedau mayuh bala kita kena tipu orang ke nadai ati perut bejalaika pengawa ke enda dikemendar .

Pekara ke baka tu mayuh udah nyadi sebedau tu. Tany ngagai orang ke nyimpan duit di Kumpulan Wang Simpanan Pekerja (KWSP) tauka sida ke ngempu tanah nyengkaum tanah Hak Adat Bumiputera (NCR). Nya alai, mensia mayuh mesti pintar berunding lalu anang tekelalu mudah kena tipu. Ketegal ke deka jampat nerima duit RM500 bala sida ke nadai ati perut puas ati laban udah mujur bulih mayuh duit enggau ngena chara ke senang.

Enti sema bisi orang tauka raban orang nguji deka ngenyemakka diri anang sekali-kali kita pechaya sereta nitihka jaku sida iya. Kita bisi hak kediri empu nanya pemetul utai ke disebut sida iya  lebuh nguji deka ngenyemakka diri ngagai kitai. Kita mesti nemu, LHDN nadai bejaliaka pengawa ngena seiku orang tauka beraban mit kelimpah ari ngena opis LHDN empu. Ba jaman changgih baka ke diatu pom ke betul ulih diambi ari laman sesawang. Program bantu khas nya kena ngelempungka belanja apai indai,  nya alai anang ngasuh iya nyadi mimpi ke jai.