'Wireless walk' digaga awakka narit temuai datai ke Miri

BISI PENGELANDIK ...Abang Johari mandangka pengelandik iya nusun bata tanda bejadi pengawa ngaga Balai Raya Kampung Beraya kira-kira 25 kilometer ari bandaraya Miri, di Miri.

MIRI : Perintah deka ngaga 'Wireless Walk' sepemanjai 100 meter ba tengah-tengah bandaraya Miri dikena narit mayuh agi temuai datai ngagai Miri udah tu.

Menteri Pengawa Berumah enggau Dagang Temuai, Datuk Amar Abang Haji  Abdul Rahman Johari Tun Abang Haji Openg madahka, mayuh macham rengka rama nyengkaum kedai endur bejual mandangka main asal ke diempu rayat di menua tu deka digaga ba palan nya udah tu.

Ku iya, wireless walk deka digaga berengkah ari Hotel Mega nyentuk ngagai Hotel Imperial udah tu deka disediaka enggau perengka internet nadai bewayar tauka dikumbai palan 'Hot Spots' enggau enam iti kiosk.

"Ba endur (wireless walk) tu mega deka digaga enam iti kiosk ti nyediaka macham pemakai ke suah dipeda dinahka ba rumah orang Melayu, Melanau, Kedayan, China, Iban enggau Orang Ulu. Pemisi pemakai ti disediaka ditu ila dipelabaka ulih narit mayuh agi temuai datai sereta ngerami bandar Miri," ku iya.

Iya madah munyi nya lebuh ke dirandau maya Pengerami Bejadi Pengawa Ngaga Balai Raya Kampung Beraya kira-kira 25 kilometer ari bandaraya Miri, apin lama ke udah.

Ngenang pasal wireless walk nya, ku iya ba tengah palan wireless walk nya ila deka digaga balai puang awakka bisi alai endur ngatur aktiviti begulai enggau mensia mayuh baka konset enggau pengawa bukai.

Iya madahka, pengawa ngaga palan nya deka ditembuka enggau lengkas, lalu ungkus ngaga palan empai temu laban bala iya diatu agi benung ngaga pansik.

Abang Johari madahka, palan nya mega deka dijaga tiga bengkah raban polis ti deka ngemataka pengelikun mensia mayuh ke bis nemuai kia.

Maya nya mega, iya madahka ngaga palan wireless walk tu nyengkaum pelin ngaga endur ke manah di Miri awakka mayuh agi temuai datai ngagai Miri udah tu.

Ku iya, jam ke diatu, opis menteri iya benung merambu ngaga penerebai terus ari Padang Bilun Miri ngagai menua luar nyengkaum Korea, Hong Kong, Jepun enggau China.

"Tu mih sebengkah atur pengawa ke digaga perintah dikena ngelakuka bandar Miri ngagai temuai menua luar," ku iya.

Abang Johari nyemetak bendar madahka penyerakup ke udah dikembuan rayat ba Kampung Beraya terus diteritka agi udah tu.

Nambahka nya iya ngarapka rayat terus nyukung perintah Barisan Nasional (BN), ku iya, semina perintah BN aja ke ulih meri pemansang ngagai rayat di negeri tu.

"Nya alai, rayat mesti ngelala ni bagi intan enggau kacha, intan mesti manchar ngagai utai ke udah terang. Baka nya mih utai ke udah nyadi ba Balai Raya tu, aku kala bedanji deka ngaga balai tu maya aku datai kitu sebedau pengawa bepilih besai kunsil negeri taun siti ke udah, lalu diatu aku udah ngamatka danji aku nya," ku iya.

Maya nya mega, iya mesan semua orang ke bisi datai maya nya awakka enda saru penemu, laban diatu nengah surat berita, majalah tauka internet ulih dikena orang nusi cherita ke enda manah dikena bejai orang bukai, utai ke bansa nya ulih nanggul pemansang.

Taun siti ke udah, iya udah ngagihka RM125,000 dikena ngaga  Balai Raya Kampung Beraya tang mih belanja nya enda chukup, nya alai diatu iya nambahka penyampau RM25,000 dikena ngemujurka perojek balai raya nya.

Sama bisi datai, Menteri Muda Pelajar Tumu Nembiak enggau Pemansang Ruang Bilik, Rosey Yunus, Kaban Parlimen Sibuti Ahmad Lai Bujang, Kaban Kunsil Negeri (ADUN) Lambir Ripin Lamat, Residen Miri, Antonio Khati Galis, Tuan DO Miri Boniface Intang Apat, bala Tuai Opis enggau agensi perintah sereta bala rayat ke semak menua Kampung Beraya.