Lydia Desmond bulih gelar Miss Tourism Benak 2012

TUCHUM TANDA GAGA... Lydia Desmond Bangga mujur digelar Ratu Dagang Temuai Benak 2012 lalu iya nerima perais ari Simba Nalang, Datuk Rohani Karim, Hajah Simoi Haji Peri enggau Felicia Tan ba Panggau Main Asal, Sri Aman.

SRI AMAN : Endang chukup bajik anak dara ibuk iya nya Lydia Desmond Bangga pengudah ke bulih gelar Miss Tourism Benak 2012.

Lydia, 23, endang peranak asal ari menua Sri Aman, bebansa Iban mujur ngalahka empat iku finalis ke bukai lain. Bala akim tekuing meda pemajik mua sereta pengelandik Lydia ke bejaku nyaut tanya ngagai iya rambau final pekit nya.

Pengudah ke menang anak pengkuan ari tiga iku diri menyadi ke benung nyambung belajar ba UITM tu nerima perais duit RM1,500, tikit bilun pulai enggau mansang ari Kuching-Kuala Lumpur, mahkota, setipikit, trofi, bungai enggau selampai.

Orang ke bulih lumur dua iya nya Liyana Eddie Eskal Eyaw, 21, penakan China enggau Melayu datai ari menua Kuching lalu lumur tiga Jacqualyn Jubin, 22, penatai asal ari menua Sibu.

Beduduk ari nya, Liyana enggau Jacqualyn nerima perais RM1,250 enggau 1,000 udah nya diberi baucher palan endur bemalam dua hari semalam ba Damai Beach Resort, setipikit, tfofi enggau bungai. Kategori Ratu Landik 2012 (Miss Talented 2012) dipenggi Shazmin Naziela Mohd Zuhairi penatai asal ari Sarikei, udah nya, Tracy Hilary Kinyang ari menua Sri Aman empu bulih gelar Ratu Gambar Bajik 2012 (Miss Photogenic 2012).

Beduduk ari ke bulih gelar nya Shazmin enggau Tracy nerima perais duit RM500, baucher endur bemalam dua hari semalam ba Hotel Magherita Kuching, setipikit, trofi enggau bungai. Empat iku pesereta bukai ke udah mujur datai ba tikas semak final nerima perais rindu ati iya nya Zierra Enjoo, Ragnall Johnothan, Priscilla Yii enggau Alice Yii, sida empat mega diberi duit RM200, tikit raun ngagai Kampung main Asal Sarawak, setipikit enggau trofi.

Dua iku agi pesereta ke semina datai ba tikas semak final lalu bulih lumur lima enggau enam. Dua iku indu dara tu diberi perais rindu ati iya nya duit RM200, bungai enggau setipikit. Bini Menteri Muda Pemansang Tanah, Simba Nalang ti disempulang Sapit Menteri Opis Menteri Dagang Dalam Negeri, Koperasi enggau Pengguna (KPDNKK) Datuk Rohani Karim, Kaban Kunsil Negeri (ADUN) Lingga, Hajah Simoi Haji Peri enggau Sapit Residen Sri Aman, Felicia Tan udah bejadi pengawa nyuaka perais ngagai bala pemenang.

Sama bisi datai maya nya, Datuk Patinggi Tan Sri Jabu Numpang enggau bala temuai ke dipebasa ke bukai. Kelimpah ari pekit tu, mensia mayuh ti datai malam nya diperindang bala artis ari menua tu empu enggau champion benak Idol 2012, Malam Main Asal Pesta Benak Sri Aman 2012 ti sereta meda tanda main asal.

Pekit Ratu Dagang Temuai Benak 2012 dikemataka lebih 5,000 iku bala temuai lalu pengawa malam nya dirami enggau bunga api pengudah pemutus pekit disebut.