Pesta Benak diatur 6 ngagai 8 April

BENAK...Harden (tengah) lebuh randau enggau media pasal atur Pesta Benak, sama bisi dipeda dalam gambar (ari kiba) Felicia, Johnathan, Rayong enggau Jack.

SRI AMAN : Program ninting taun lumur lima pemadu manah ba Sarawak iya nya Pesta Benak Sri Aman. Pengawa tu deka diatur baru bepun 6 ngagai 8 April tu.

Residen Bagi Sri Aman, Johnathan Lugoh lebuh ke bejaku rambau randau enggau media ba Opis Pejabat Residen Sri Aman madahka, haribulan nya udah ditetapka laban ai pasang tauka Benak deka mangka enggau naka iya peninggi maya nya.

“Sekeda aktiviti ke deka diatur beserimbai enggau Pesta Benak tu ila baka Regatta Benak Batang Lupar, Ngelunchur Benak Batang Lupar, Bazaar Ria Benak, Budaya Ria Benak, Bejadi Pesta Benak, Eksibisyen Benak enggau Karnival Moto. Entara main ke ulih narit ati mensia mayuh maya nya ila baka lumba perau, lumba jet ski, malam mandangka main asal, Miss Tourism Benak, Benak Idol, Pengawa Mandangka Bungai Api, Pekit Betanda enggau mayuh agi,”ku iya.

Lumba jet ski sebengkah main ke baru diatur maya nya ila, bala kami deka ngangauka empat iku pelunchur ari menua Perancis, siku ari United Kingdom enggau empat iku ari Semenanjung Malaysia awakka ngerami agi Pesta Benak.

“Objektif program tu diatur dikena ngelakuka Benak Batang Lupar nyadi sebengkah Produk Dagang Temuai Nyelai Sarawak enggau Malaysia, nambahka nya mega dikena nikika penuduk rikot Pesta Benak Sri Aman dalam rintai 10 program ke pemadu manah ba Sarawak,” ku iya.

Pesta Benak Sri Aman 2012 tu ila ku Johnathan deka dipejadi Kepala Menteri, Pehin Sri Haji Abdul Taib Mahmud kena 7 April berengkah pukul 3.00 lemai bepalan ba Astaka Reggata Batang Lupar.

Kelimpah ari nya, Menteri Muda Pemansang Menua Pesisir enggau Pengawa Berumah, Datuk Francis Harden Hollis lebuh ke nyadi chairman randau begulai enggau media madahka, bala iya melabaka lebih ari 50,000 iku temuai deka datai ngulu Pesta Benak tu.

“Nambahka nya aku minta kerejasama bala Tuai Raban Bansa ba Sri Aman awakka nyaup bala komiti Pesta Benak ngemujurka Pekit Local Food beserimbai enggau pengerami tu ila.

“Ngarapka main ke deka diatur maya Pesta Benak tu ila ulih narit bala temuai ke datai enda ngira sekalika sida ari menua tu empu tauka ari endur bukai,” ku iya.

Sama bisi datai maya randau enggau media nya Kaban Kunsil Negeri (ADUN) Engkilili, Dr Johnnical Rayong Ngipa, District Officer (DO) Lubok Antu, Jack Aman Luat enggau Sapit Residen Sri Aman, Felicia Tan Yan Hua.

Dipelabaka pangka benak tauka ai pasang besai ba Sungai Batang Lupar deka begelumbang enggau tikas peninggi 5.9 meter kena 6 April, 6.2 meter kena 7 April enggau 6.4 meter kena 8 April.