Rega Barang Enda Nemu Nurun

Lemambang Sada Sarawak

Munya, urung taun 70 ngagai taun 80 orang tuai suah besebut duit agai pedis bendar diulihka. Rambau nya jarang bendar kitai ninga orang begaji lebih seribu ringgit sebulan. Endang besai meh pangkat orang nya enti iya nerima lebih seribu ringgit sebulan baikka nya gawa ba kompeni tauka nya gawa ba perintah.
Orang ke masuk gawa perintah ngena setipiket pom lima pass Senior Cambridge enti masuk gawa nyadi kerani maya semina nerima 180 ringgit aja sebulan. Ke baruh agi ari nya pangkat, bisi ke enda sampai seratus ringgit sebulan.

Enti ngidupka diri ngena chara bumai betaun amat pedis ga ngulihka duit, maya nya rega getah sekati ngira sen aja, padi enti enda salah ingat aku 16 ringgit sepikul, lada pan maya nya agi baruh bendar rega. Kelimpah ari nya nadai tentu jalai bukai dikena ngidupka diri.  Taja munyi duit ke ulih nya enda mayuh tang enda ga bangat tusah ngidupka diri maya nya. Datai ga anak gaji nya,  sampai ke ujung bulan. Suah kitai ninga orang tuai nyebut, ‘duit maya nya agi bisa.’

Nama kebuah pia kini? Kati enda munyi nya laban rega barang maya nya kelia agi murah bendar. Ambika banding kopi o semina 15 sen sechangkir.  Tambang bas dini-dini endur ti dituju ba Kuching ditu sigi 15 sen aja. Mee rangkai tauka ke bekuah nya agi ulih 50 sen ngagai 70 semangkuk. Asi champur  seringgit tauka seringgit lebih sepinggai rambau nya.

Kereta baru maya nya mar amat nya enti rega iya nyau bebelas ribu. Rumah batu kenu ku orang kelia enti ke setingkat besambung agi ulih nya rega iya bebelas ribu ringgit.
Uji bandingka rega barang ke bisi disebut nya tadi enggau rega iya ke diatu? Jangka aku semua kitai nemu semua rega barang nya diatu. Uji kira berapa kali lipat ganda iya udah niki dalam kandang 30 puluh taun. Nyampau nya wai.

Enti kitai beratika barang ti dikena kitai besari-sehari nya endang semampai niki belama.  Jarang bendar, tau dikumbai nadai barang ti dikena kitai besehari-sehari nya kala turun rega. Laban rega barang ke enda nemu turun nya meh ti ngasuh kitai suah berasai pedis ngidupka diri napi pemar barang sereta napi penyampat rega barang niki.

Nyepi  pemedis ngidupka diri dia kitai kala  ninga orang ke gawa perintah tauka kompeni minta ditikika gaji laban rega barang nyau majak mar pia jaku.  Tang lebuh perintah tauka kompeni benung berunding deka meri gaji niki ngagai orang ti gawa, rega barang pan lalu berengkah niki baru. Lebuh maya gaji udah ditikika, niki baru ga rega barang.

Suah setaun udah nya niki baru, lalu pia mega taun ke nangkanka nya niki baru. Lalu gaya pengidup orang ke nerima nya lebih kurang asai ke empai ditikika gaji, laban orang dagang endang udah dulu nikika rega barang. Penyuah gaji niki enda tetitihka penyuah rega barang niki.

Ba orang ti gawa perintah dalam kandang lebih tiga puluh taun tu enti enda salah ingat aku, enda bulih sepuluh kali udah niki, baka ari baruh Skim Suffian Report, Cabinet Committee Report, Sistem Saraan Baru enggau Sistem Saraan Malaysia. Tang munyi ke udah dikerandauka dulu tadi mega sebedau gaji tauka skim tu dipejalaika barang lalu berengkah niki.

Barang ti dijaga perintah rega baka gula, tusu, minyak makai, tepung enggau sekeda ti bukai mega kadang-kadang tau niki. Ambika banding gula, laban rega iya dijaga perintah, gula nemu nadai dijual di pasar. Suah enggau orang begigaka gula rambau ke suntuk gula nya, nadai ga bulih. Bisi maya orang ke nyual nya rambau ke suntuk nya, nyau ditakar ga pemayuh ke tau dibeli siku-siku. Semadi udah ditikika rega nya baru iya mayuh baru.
 Alit ati kitai, kati nya tau baka nya. Pangka iya ke udah niki nya besai bendar. Utai irup baka, kopi, teh, enggau ai manis bukai lalu bela sama niki. Barang bukai ke digaga begunaka gula mega lalu niki baka, kek, kuih, enggau bansa pemakai manis bukai.

Minyak enti bisi niki, pangka iya mega chukup besai ngagai rega semua utai ke dikena serata dipakai kitai besehari-sehari. Sigi lalu tekala nya iya niki, kebuah iya mayuh bendar, nyumai ngena minyak, ngangkut semua utai ngena kereta, ngena lori begunaka minyak, mindah kin kitu begunaka minyak, enggau mayuh macham perengka enggau kereban ke dipadahka begunaka minyak.

Rega barang bukai ti dijaga perintah enti iya ditikika sigi besai magang pangka iya ba pengidup kitai. Kitai tau beterima kasih ngagai perintah laban ke udah meri subsidi dikena nagang rega barang ti dijaga nya ari ti niki. Nya alai kitai ke nyadi pembeli tauka pengguna tu suah tak bedemuh ngenang rega barang ti dipeguna nyau majak mar.

Kenu ku orang ti pandai ba ekonomi rega barang niki enti duit mayuh lalu barang ti dipeguna nya mimit. Ba ekonomi nya konsep ‘supply and demand’. Rega barang niki enti peminta mayuh lalu barang nya kurang. Nya penemu orang ti pandai ba bidang tu. Awak ke sida meh berundingka nya.

Ba kitai empu wai, kitai patut bejimat-jimat bekenaka belanja ke ulih diri. Ukai nyamai ngulihka duit. Duit ke ulih enda patut dibasau ngapa. Duit ke ulih patut bisi meh bagi iya digalau, disimpan ke penabat maya hari kitai ti suntuk sendat. Sigi enda ulih anti rega barang ti nurun. Suah kitai ninga sebana orang tuai, barang ti dijual kitai baka getah, koko, lada nya baru nemu nurun niki rega!