Palan bebeli barang ngena nama Premium Outlet deka ditumbuh

KUCHING : Opis Menteri Dagang Temuai Malaysia merambu numbuhka sebuah palan endur bebelika barang ngena nama (Premium Outlet) ba nengeri tu ngambika Sarawak nyadi nengeri dagang temuai di Malaysia ke pemadu lantang.

Sapit Menteri iya Dato Dr James Dawos Mamit madah, Sarawak entara nengeri ke pemadu dikerinduka temuai ba dalam enggau ba luar nengeri.

"Enti sema sida datai nemuai kitu, sida endang tetap bisi utai dibeli nyengkaum tepa atuka barang bukai ti dikena diri empu lalu tu manah amat laban nyungkak penatai pemisi ba nengeri tu," ku iya rambau ngelanlancharka Pakej Bebelika Barang ba Kubah Ria, ba ditu, empai lama ke udah.

Iya madah, enti udah bisi palan endur bebelika barang ngena nama baru tu ila, dipelabaka mayuh agi temuai datai ngagai nengeri tu laban sida enda ibuh ngelawa menua bukai enti sema deka meli barang ti bisi nama (Premium Outlet).

"Ba palan bebeli barang nya ila dek nyediaka 300 barang import mayuh bengkah nama baka beg sandik, jam lengan, gari enggai mayuh agi barang bukai ke dijual enggau rega ke patut.

"Kebuah pia laban semua barang ke bisi dijual ba endur nya ila endang diudar terus ari kilang menua luar lalu penyampau chukai import udah dikurangka perintah menua Malaysia 30 peratus.

"Naka ke diatu semina Johor aja ngembuan palan ngena nama Premium Outlet lalu sukung ari temuai menua luar dipeda manah amat," ku iya.

"Nya alai enti palan nya udah ditumbuh ba ditu (Sarawak) mayuh agi temuai menua luar datai laban Sarawak semak Pontianak, Brunei enggau Filipina.

"Aku pechaya temuai ari menua luar nya tadi deka ngetu tauka raun ngagai Sarawak, sida mega nadai begunaka ungkus belanja ti besai nemuai kitu," ku iya.

Dawos ngarapka kompeni-kompeni penerebai ba menua bukai ulih nambahka penyampau pejalai penerebai sida ngagai nengeri tu ngambika nemuai nyamai raun kitu ke Sarawak.

"Kompeni penerebai meseti ngaga atur tauka ngiga chara dikena ngelakuka servis kompeni sida.

"Tu ukai semina meri penguntung ngagai ekonomi Sarawak tang mega nguntungka kompeni penerebai empu laban mayuh temuai ngena servis sida," ku iya.

Iya madah,  temuai ukai semina rindu ngelawa palan bebeli barang tu aja tang mega rindu meda barang bukai ke endang dikeluarka rayat asal di menua tu.

"Entara barang asal ba menua tu baka digaga ari kayu, buluh, marik, kain tenun sereta barang pemakai baka ikan terubuk, kek lapis, laksa sarawak, mee kolok enggau mayuh agi ke bukai.

"Semua utai ke dijual nya endang dikerinduka temuai lalu nadai dipeda ba nengeri bukai di Malaysia," ku iya.

Pakej Bebelika barang dipenyadi beserimbai enggau Karnival Bejual Besai 1Malaysia ke diatur berengkah 15 June nyentuk ngagai 2 September 2012 ngambika meransang mensia mayuh bebelika barang ba dalam menua tu empu.