Nyikap diri enggau mayuh penemu

Pengawa nyadi seketeri chukup besai reti ba jeman ekonomi 

SELAMAT HARI PENGADA... Tan Sri Datuk Amar Haji Adenan Haji Satem begulai enggau komiti pengatur pengawa melah kek hari pengada ke-40 taun, Gerempung Seketeri Sarawak (SSS) ba Kuching, hari enam tu tadi.

KUCHING : Raban seketeri meseti nyikap diri enggau mayuh penemu ngambika segaris enggau teknologi ke maya hari sereta ulih besemekih pengawa nya.

Menteri ba Opis Kepala Menteri (Pengawa Khas), Tan Sri Datuk Amar Haji Adenan Haji Satem madah, pengawa nyadi seketeri endang manah amat, penguji ke ditapi ngujungka pengawa nyadi seketeri dikelala amat.

"Ubah ke pemadu besai ba pengawa tu iya nya, seketeri diatu dikumbai 'Opis Profesional', 'Pengatur Pengawa Profesional', 'Seketeri Profesional' lalu ba pengawa perintah iya dikumbai 'Seketeri Opis," ku iya.

Iya madah munyi nya rambau Pengerami Hari Pengada Ke-40 taun, Gerempung Seketeri Sarawak (SSS) ke diatur ba sebengkah hotel tebilang ba ditu, malam hari enam tu tadi.

Adenan madah, mayuh bengkah pengawa digaga orang ke nyadi seketeri nulung bos sida iya taja pan, sekeda orang ngumbai pengawa nya bisi nyamai mimit beduduk ari arus pemanang jeman moden.

"Batang pengawa nyadi seketeri sehari tu iya nya ngatur utai, ngemataka, nyaga, ngelatih, nulis note, ngatur pengawa betemu, megai bup, ngatur pengawa dalam opis, landik Teknologi Pemadah (IT) enggau mayuh agi ke bukai.

"Kelimpah ari nya, batang pengawa seketeri mega ulih ngaga pemutus enti sema bos iya nadai datai gawa," ku iya.

Beduduk ari nya, iya madah, pengawa nyadi seketeri chukup besai reti ba jeman ekonomi ke maya hari, laban bisi sekeda ketuai enggau menija rindu bekenaka komputer diri empu, ipad enggau perengka bukai ti ngemuntangka pengawa.

Adenan ti mega Kaban Kunsil Nengeri (ADUN) Tanjung Datu madah, raban seketeri meseti landik nambahka penemu ngambika sikar agi ngereja pengawa ke bisi dalam opis.

"Ubah ke bisi nyadi ba opis ngasuh bala seketeri nyikap diri enggau mayuh penemu lalu anang terunda-runda ngereja pengawa baka kelia laban enti kita (seketeri) enda nyikap diri enggau penemu ke chukup, kita enda tan ati mangku pengawa tu," ku iya.

Dulu ari nya, Adenan madahka penyampau belanja ke diberi iya ngagai SSS iya nya RM20,000 SSS dikena mantu gerempung ngatur program.

Sama bisi datai iya nya Penulung Menteri Pengerai, Dr. Jerip Susil, Penulung Menteri Pemansang Dagang Bumiputera, Datuk Mohd. Naroden Haji Majais enggau Presiden SSS, Caroline Chan.