Raban nembiak patut nemu reti konsep penyerakup

BERI PUJI ... Datuk Haji Fadillah Haji Yusof (dua kanan) nyuaka perais ngagai seiku orang ke menang ba pekit ngepan entarabansa bepalan ba SMK Tunku Abdul Rahman. Sama bisi dipeda Datin Evelyn Ritikos (dua kiba), Rakayah Haji Madon (kanan) Mohd Khairulzaim Abdullah (kiri) enggau Tony Merril (tengah). 

KUCHING : Raban sida ke nembiak dipinta bebendar agi ngulihka penemu sereta nemu reti konsep penyerakup ti dikembuan mayuh pupu raban bansa ba menua tu.

Sapit Menteri Sains, Teknologi enggau Inovasyen Malaysia, Datuk Haji Fadillah Haji Yusof madah, genap iku rayat Malaysia kelebih agi nembiak sekula nemu reti konsep penyerakup ke dikembuan mayuh pupu raban bansa laban penyerakup pemadu beguna ngagai pemansang menua.

"Pengelantang enggau pengelikun sesebengkah menua kelebih agi baka nengeri Sarawak ke endang dikelala nyadi chunto konsep 1Malaysia enda ulih kumbai baka nya enti sema rayat ba nengeri tu enda bebaik enggau pangan diri," ku iya bejaku rambau pengerami nutup Eksibisyen Entarabansa British Council Connecting Classroom (BCCC) 2012 ba SMK Tunku Abdul Rahman, ba ditu empai lama.

"Pemansang mega enda ulih japai enti nadai penyerakup. Malaysia sebengkah menua ke likun, lantang sereta ngembuan rayat ke beserakup enggau pangan diri taja enda sebaka adat asal," ku iya.

Iya madah, adat asal ba menua Malaysia ulih dipeda nengah pemakai, ngepan, enggau main asal enggau jalai pengarap lama.

Iya mega madah, genap iku rayat ba menua Malaysia ngembuan adat asak ke bebida, nya alai beguna amat rayat ba menua tu gauk ke pangan diri sereta enda nyebut utai ti tau ngachau pengelantang sesebengkah bansa.

Kaban Parlimen Petra Jaya tu ngajar sida ke nembiak meseti nyaup perintah ngamatka juluk ati nyadi menua maju nengah konsep penyerakup ke bisi dikembuan jam ke diatu.

Kelimpah ari nya, program ke diatur sepanjai hari nya ngempung lapan buah sekula sekondari enggau dua buah sekula primari ba Sarawak sereta sebuah sekula ari Pasir Gudang, Johor ke ngembuan program BCCC dikena masuk Pekit Nyumai enggau Pekit Ngepan Entarabansa.

Fadillah madah, dua bengkah pekara ke patut ditemu reti ungkup sida ke nembiak iya nya penyerakup ti teguh.

Ba pekit nyumai, orang ke bulih gelar lumur satu iya nya Chia Yuen Xin ari SMK Chuang Hua Miri, udah nya, lumur dua enggau tiga iya nya Frinchel Cheremie ari SMK Siburan enggau Christopher Ling ari SMK Sacred Heart.

Berebak enggau nya, ba pekit ngepan entarabansa, orang ke champion iya nya Nurdiana Rufika (St. Mary), udah nya, lumur dua diempu Alisa Spencer ari Kolej Datuk Patinggi Abang Haji Abdillah enggau Hafiza Nurisha Haswadi dari St Mary bulih lumur tiga.

Semua sida ke udah menang diberi perais duit RM500, RM300 enggau RM200 sereta tujuh iku orang sama nyereta pekit diberi perais rindu ati iya nya duit RM50 ungkup seiku-seiku.

Sama bisi datai iya nya Koordinator Program BCCC Nengeri Sarawak, Datin Evelyn Ritikos, Prinsipal Rakayah Haji Madon, Tuia Dipebasa Gerempung Apai Indai enggau Pengajar (PIBG), Mohd Khairulzaim Abdullah, enggau pengari Nestle Malaysia, Tony Merril.