Anang ngumbai perintah ngerampas tanah rayat - John Sikie

BINTULU : Penulung Menteri ba Opis Kepala Menteri (Pekara Adat Bumiputera enggau Penan) sereta nyadi Penulung Menteri Perintah Pelilih Menua Datuk John Sikie Tayai nganu sekeda orang ke nuduh perintah nguji deka ngerampas tanah temuda asal bumiputera rayat  ba negeri  tu.

Iya ngumbai jaku tuduh ke baka nya enda patut, lalu iya nerangka lebih RM9 juta pampas udah dibayar ngagai orang ke ngempu tanah enggau pesereta ke dikena bungkur projek pemansang tanah NCR naka ke diatu.

"Kebendar iya, rayat tauka orang ke ngempu tanag ke dibungkur projek pemansang tanah   NCR tu udah ngasaika penguntung asil ari mayuh bengkah sukut pengidup, ku iya.

Nya alai, orang ke nyebar berita bula tauka jaku petenah baka nya kebendar iya begedika asil ke diulih bala pesereta, ku iya rambau pengerami bejadi tanah endur projek pemansang tanah temuda asal bumiputera (NCR) ungkup kandang menua Sungai  Tanyil,  Sungai  Majau   enggau Sungai  Sangan, Tatau ba ditu.

John Sikie  mega madah, perintah endang nadai kuasa deka ngambi tanah NCR rayat enti nadai bulih pemendar ari ornag ke ngempu tanah nya.

Perintah nengah Opis Tanah  enggau Survei semina deka bejalaika pengawa nyukat (tanah) dikena nentuka garis antara tanah NCR enggau tanah Negeri  pengudah nerima surat ari orang ke ngempu tanah NCR awakka tanah sida dikemansangka enggau projek kelapa  sawit, ku iya.

Perintah nengah Opis Menteri Pemansang Tanah,  udah nya deka milih kontraktor dikena ngemansangka tanah  NCR  rayat enggau projek  nanam kelapa  sawit  ke diadang tau meri penguntung ngagai sida nengah dividen, ku iya seraya madahka projek  pemansang tanah NCR   nya deka meri penguntung tauka ngenataika sumber jereki kelimpah bulih jalai raya.

Nya alai, ku John Sikie orang ke ngempu tanah NCR  anang sesekali mendingka jaku selebubu ngapa ke ngumbai perintah ke deka ngerampas tanah  NCR rayat laban utai ke baka nya enda amat lalu semina deka dikena raban orang ke nadai betanggungjawap ngulihka undi kelebih agi rambau PRU13 tu tadi.

Projek  pemansang tanah  NCR ba menua Sungai  Tanyil,  Sungai  Majau  enggau Sungai  Sangan  dipasuk lebih 1,050  iku pesereta   ari 14   buah  rumah  panjai ari DUN   Kakus   enggau Parlimen  Selangau  ke mungkur 5,727   ekar  pemesai tauka 916  hektar   tanah  NCR.

Nangkan ke nya, chairman Komiti Pemansang Genturung Pendiau (ADC)  Projek   Pemansang Tanah  NCR  Sungai   Tanyil,  Sungai  Majau   enggau Sungai  Sangan,  Tr.  Gerosen  ak  Jubin   ngelalau rayat kelebih agi ke bisi ngempu tanah dalam projek nya bela bebendar ngemansangka tikas ekonomi pengidup diri.

Perintah, ku iya enda kala mejal rayat (pengempu tanah  NCR)  nyereta projek baka nya, tang tepulai ngagai sida ngaga pemutus.

Bela bisi datai iya nya pengari ari Opis Menteri Pemansang Tanah  Wilfred Jolie, Pengarah Pengatur Pengawa Ikrar Gemilang Sdn. Bhd.,  Datuk Ahmad Ibrahim enggau Pegawai Daerah Tatau, Nyurak Keti.


  

Kerembaika jaku Iban ngena perengka ICT

BETONG : Pengawa ngerembai sereta ngangkatka jaku Iban endang patut digaga bebendar setipal enggau ubah pemansang perengka teknologi, ku Menteri Pengawa Ladang enggau Komoditi Dato Seri Douglas Uggah Embas.

Iya madah, setipak enggau ubah ke maya hari tu, tanggungjawap orang Iban empu bebendar ngetanka jaku nya ngambika penulen iya enda lenyau jemah.

"Nya alai, tanggungjawap apai indai nyengkaum Gerempung Pemansang Jaku Iban (AEDIL) tu endang patut amat ngambika jaku Iban ti dikena enggau chara ke enda betul sereta balat bebalut ba sida ke nembiak ke maya hari tu.

"Ukai nya aja, aku ngarapka AEDIL sereta gerempung-gerempung ke ngembuan juluk ke sebaka ulih ngemeratka atur ke manah dikena terus ngemansangka jaku Iban," ku iya.

Iya madah munyi nya rambau bejadi Aum Besai AEDIL 2013 semak ditu kemari (Hari Enam).

Nangkan ke nya, sehari tu sepil muntang sereta ngena jaku ke bechampur nyau ngerekai amay nyengkaum ba aktiviti belajar enggau maya peresa ba palan-palan pelajar.

"Tu endang siti utai ke patut dikemata sereta dirara enggau lengkas ngambika enda majak nyadi.

"Kitai enggai meda pemanah jaku Iban ke dipeda nyelai nyau dikenyai," ku iya.

Uggah ti mega nyadi Kaban Parlimen Betong madah, setipak enggau penatai perengka teknologi ICT iya mega ngasuh raban bansa Iban ba menua tu ulih nguna perengka nya dikena nyapai juluk ngemansangka jaku Iban.

"Kena perengka teknologi diatu baka laman sosial Facebook berandauka atur dikena ngetanka jaku Iban.

"Aku mega ngarapka, AEDIL ulih ngaga laman web awakka bisi dipeda serea endur berundingka mayuh pekara nyengkaum nyediaka kamus jaku Iban Iban ngambika nembiak kemaya hari tu ulih belajarka jaku Iban enggau betul ari laman web nya," ku iya.

Dulu ari nya, Uggah nyadaka agih belanja MRP penyampau RM30,000 ngagai AEDIL dikena belajaika program ngeringka jaku Iban ba pengerami nya.

"Gaga mayuh program baka kus enggau utai bukai laban kitai deka meda AEDIL nyadi tibang tauka palan endur belajarka jaku Iban.

"Ukai nya aja, dikena nyemai pengasai ati rinduka jaku Iban ba sida ke nembiak sereta ngerembaika jaku nya ngagai semua rayat Malaysia, program baka pekit pidato enggau bejerita patut diatur," ku iya.

Berebak enggau nya,  Uggah madahka penyanggup diri nyukung aktiviti dikena ngeringka jaku Iban laban pengarap enggau perintah endang deka mai rayat Malaysia nemu bejaku Iban.

Bela bisi datai ba pengerami tu iya nya Presiden AEDIL, Dr. Lambat Lindong, Pegawai Tadbir Sarawak (SAO), Ludan Lintong, Seketeri Politik Dr Richard Rapu, Chairman Program, Paul Langgang, Kepala enggau pengari opis, AJK enggau kaban AEDIL.

Gerempung orang pinchin agi ngiga kaban

KUCHING : Buah penemu ari kaban Gerempung Orang Pinchin Perintah diguna awakka peminta ti dianjung ulih datai ba orang ke besangkut paut.

Presiden Gerempung Orang Pinchin Perintah Sarawak, Julaihi Ismail madah, taja pan sehari tu, Sarawak ngembuan lebih kurang 40,000 orang pinchin perintah, tang semina  7,047 iku orang pinchin ke bisi ngerijista diri enggau gerempung nya.

"Kami begunaka penemu mayuh orang, tang laban penyampau kaban dalam gerempung tu mimit, peminta ari kami enda bangat didingga orang," ku iya lebuh dirandau media beserimbai enggau Hari Orang Pinchin ke disambut ba Indu Opis Gerempung Orang Pinchin Perintah Sarawak, Rumah Ramin, Jalai Reservoir ditu kemari (Hari Lima).

Julaihi madah, enggau penyampau kaban ke mayuh gerempung mudah ngenataika mayuh utai pinta ngagai perintah.

"Kitai chukup begunaka kaban baru ke datai ngerijista diri masuk gerempung tu, sekalika sida nya orang pinchin ari perintah besai tauka perintah negeri," ku iya.

Ku iya, enti masuk nyadi kaban gerempung tu mayuh pemanah, nya alai orang pinchin ke deka masuk gerempung tu patut nama utai ke ulih digaga sida ngagai gerempung enggau mensia mayuh.

"Ngelama tu kami bisi ngenataika sekeda utai pinta ngagai perintah ngambika diperunding, lalu kami ngarapka peminta nya ulih diberi," ku iya.

Antara peminta ke udah dianjung iya nya, minta geran ninting taun, sebidang tanah dikena ngaga indu opis baru enggau mayuh agi ke bukai.

Nangkan ke nya, Sapit Presiden Gerempung Orang Pinchin Perintah Sarawak, Haji Abg Mohd. Atei Abg Madaan madah, gerempung nya deka ngatur program pengelantang pendiau enggau raban bansa beserimbai enggau bulan Ramadan tu.

"Kami deka meri sukung sereta nulung orang ke begunaka tulong dikena ngelempungka penyuntuk sida sebedau ngintu Hari Raya enda lama agi," ku iya madahka gerempung nya deka nyuaka duit ngagai bala penerima.

Berebak enggau nya, iya nesau orang ke deka masuk nyadi kaban gerempung nulung ngemujurka program nya.

"Kami merambu deka ngatur program tu kena 27 Julai ba Dewan Hikmah, Petra Jaya enggau pengeremi ke numbas iya laban ukai pemesai pengerami ke deka dipeda tang pengelurus atu bekunsika pengaga ati kelebih agi ba pengawa ngabang ngagai pangan diri,' ku iya.

Atei mega madahka, gerempung nya deka ngatur program landik bejaku Inggeris, program nemu kuing pengawa sebedau pinchin ngagau orang ke deka pinchin perintah.

"Kami deka, genap iku orang pinchin perintah ngasaika diri sebagi ari rayat mayuh lalu awakka sida ngasaika diri terus dipebasa taja pan udah badu gawa perintah,' ku iya.

Bela bisi datai iya nya Tuai Akaun Gerempung Orang Pinchin Perintah Sarawak, Ting Hwa Ling enggau Seketeri Gerempung Orang Pinchin Perintah Sarawak, Haji Daud Piee.

Opis Menteri Sumber Mensia nulung nempa pekereja landik

   
KUCHING : Opis Menteri Sumber Mensia deka nyaup perintah negeri nyediaka latih pengelandik kelebih agi ngagai pekereja bumiputera ba menua pesisir ngambika sida ulih bepintaka pengawa ba mayuh bengkah industri ke dikuasa Koridor Renewabel Energy Sarawak (Score)), ku Menteri iya Datuk Richard Riot.
   
Iya madah, opis menteri nya deka bekerejasam enggau agensi swasta nyediaka latih ba palan endur gawa setipak enggau pengerembai projek Score.
   
"Nya meh antara pekara ke diperundingka aku enggau Kepala Menteri Tan Sri Abdul Taib Mahmud ke meri penemu batang pekara ke patut digaga ba Sarawak," ku iya madah ngagai Bernama pengudah ngaga penemuai basa ngagai  Abdul Taib ba Menara Pelita, Petra Jaya ditu.
   
Riot diuluka Kepala Seketeri Opis Menteri iya, Datuk Seri Zainal Rahim Seman, Kepala Pegawai Eksekutif/Kepala Pengarah Gerempung Pengelikun Sosial Datuk K. Selvarajah sereta sekeda pemesai senior ke dikuasa opis menteri nya.
   
Iya madah, nitihka penemu Abdul Taib anatar pemanah makit kereja ba Sarawak iya nya ngemeratka  rakyat Sarawak empu belajarka pekara baru.

Ambika banding dalam manifesto 'Danji Dikamatka' (Janji Ditepati) Barisan Nasional (BN) dikena ngamatka mayuh pengawa puang enggau latih vokasional yke besangkut paut, Riot madah, atur opis menteri nya deka meri bekau ke manah laban naka ke diatu mayuh rayat di negeri tu empu diambi gawa.
   
Taja baka nya, semina 28 peratus ari 12 juta pekereja ba menua tu ngembuan pengelandik, lalu iya pechaya Malaysia ulih nyapai juluk 50 peratus
pekereja landik maya taun 2020.
   
Ba Sarawak, perintah negeri dipelaba namabahka penyampau pekereja landik ngagai 37 peratus maya taun 2015 dikena ngenyukupka peminta senentang pekereja landik ba taun 2020, kelebih agi ba pengwa servis enggau pengelandik ngaga barang ke dipelaba begunaka pekereja semak 3.3 juta iku. Bernama.

22 Julai sejarah besai negeri Sarawak

MERI PENERANG... Menteri Perambu Sumber enggau Rampa Menua Kedua,  Datuk Amar Awang Tengah Ali Hassan enggau Seketeri Perintah Negeri Sarawak, Tan Sri Datuk Amar Mohamad Morshidi Abdul Ghani (kanan) maya dirandau raban media ba Wisma Bapa Malaysia ba Kuching.

"Kena 22 Julai 1963 tu meh, bepelasarka Perlembagaan Sarawak, Gabenor British maya nya suba iya nya Sirl Alexander Waddel udah maduka Encik Stephen Kalong Ningkan nyadi Kepala Menteri Sarawak ti keterubah."
Datuk Amar Awang Tengah Ali Hassan
Menteri Perambu Sumber enggau Rampa Menua Kedua

ALVESTER BIGOL SULANG

KUCHING : Dikena ngingatka sejarah besai negeri Sarawak ke udah genap 50 taun medeka enggau numbuhka serakup menua Malaysia nyadi pengerami ke disambut kena 22 haribulan Julai taun tu (Hari Satu) patut dirami enggau naka pemesai, ku Menteri Perambu Sumber enggau Rampa Menua Kedua, Datuk Amar Awang Tengah Ali Hassan.

Awang Tengah madah, pekara ke pemadu beguna sereta patut ditemu iya nya kebuah pengerami tu disambut maya tu laban agi mayuh orang enda nemu sejarah besai negeri Sarawak ke nyadi kena 22 Julai 1963.

"Kena 22 Julai 1963 tu meh, bepelasarka Perlembagaan Sarawak, Gabenor British maya nya suba iya nya Sirl Alexander Waddel udah maduka Encik Stephen Kalong Ningkan nyadi Kepala Menteri Sarawak ti keterubah," ku iya lebuh ke dirandau pemberita pengudah tembu baum senentang Atur Pengawa Ngingatka Sarawak Medeka ba Tingkat 2 Wisma Bapa Malaysia ditu kemari (Hari Lima).

Berebak enggau maya nya, ku Awang Tengah Gabenor British mega milih lima iku kaban Supreme Kunsil Negeri ke baru lalu bepun haribulan ke sehari nya dikumbai Kabinet Negeri Sarawak ti keterubah.

Nya alai, pengudah Kabinet Menteri nya dipilih sida megai tanggung pengawa merintah negeri Sarawak lalu nadai agi diperintah orang putih baka ke nyadi pengelama 100 taun jeman Brooke enggau 17 taun maya Jeman Koloni Britian.

Taja pan maya nya Sarawak bedau medeka dalam Malaysia tang negeri Sarawak udah dulu nyadi siti negeri ke ngembuan perintah ke diri empu.

Nyadi kena 22 Julai (Hari Satu) tu ila mayuh bengkah program bisi diatur nyerumba hari sejarah besai negeri Sarawak baka pengawa mandangka pantomin ba Tebing Kuching enggau eksibisyen khas, "Sarawak Gemilang 50 tahun" ba Kompleks Pelancongan Sarawak (PKS), ku Awang Tengah.

"Tuju pengawa mandangka pentomin tu dikena nyeritaka baru gaya perintah British nyerahka kuasa ngagai anak bansa ba menua tu empu merintah negeri Sarawak," ku iya.

Pengerami tu ila deka dipenyadi Tuai Pemegai Menua (TYT) Negeri, Tun Datuk Patinggi Abang Muhammad Salahuddin enggau Kepala Menteri, Pehin Sri Haji Adul Taib Mahmud ba Tebing Kuching kena pukul 9.00 pagi.

Bekaul enggau eksibisyen ke diatur ba KPS, Awang Tengah madah eksibisyen tu dibuka ngagai mensia mayuh belabuh 22 Julai ngagai 29 Sepetember 2013 lalu dibagi ngagai empat galeri.

"Galeri keterubah deka mandangka sejarah pemansang Sarawak sebedau medeka nyentuk ngagai ujung taun 1970 lalu galeri kedua senententang pemansang falsafah politik ke ditempa Kepala Menteri,  Pehin Sri Haji Adul Taib Mahmud.
"Udah nya, galeri ketiga mandangka pejalai pemansang projek Koridor Renewable Energy Sarawak (SCORE) enggau galeri keempat bekaul enggau pemaju ke udah dijapai Sarawak neyntuk ke diatu," ku iya.
Nya alai, eksibisyen tu deka dibuka ninting Hari Lima, Hari Enam enggau Hari Minggu bepun pukul 10.00 pagi ngagai 10.00 malam lalu masuk pechuma.

"Taja pia, ungkup minggu keterubah eksibisyen tu dibuka ninting hari.

"Enggau tu, mensia mayuh kelebih agi nembiak sekula enggau pelajar Palan Pelajar Tinggi Perintah (IPT) ditesau datai beratika eksibisyen sereta meda orang mandangka pantomin ke nyadi sebagi ari pengerami ulang taun ke-50 Sarawak Medeka dalam Malaysia," ku iya.

Iya madah, nengah pengawa ke baka tu raban nembiak rebak baru ulih nemu enggau silik senentang sejarah Sarawak sereta ulih nambahka agi pemansang negeri tu jemah ila.

Ku iya, perintah negeri benung nguji ngengkahka jerita sejarah Sarawak tu dipelajarka bala nembiak ba bup sekula.

Ba pemansang ke sebaka, Menteri Rengka Rama nya mega madahka nadai pemisi deka digaga beserimbai enggau hari Sejarah negeri Sarawak kena 22 Julai.
"Tang taja pia kena 16 September enggau 31 Ogos endang pemisi hari besai ungkup semua rayat Malaysia," ku iya.

Kerejasama nempa pelajar bekualiti

DEKA BEKEREJASAMA... Sapit Kepala Menteri, Datuk Patinggi Tan Sri (Dr.) Alfred Jabu Numpang nerima penemuai basa ari Penulung Chanselor University of Canterbury, New Zealand, Dr. Rod Carr's (dua kiba) begulai enggau bala kaban iya ba Wisma Bapa Malaysia, di Kuching.

"Penyampau ex graduan ke udah tembu belajar ba University of Canterbury ari serata menua tu endang mayuh lalu 40 peratus ari penyampau nya datai ari Kuching, Sarawak."
Datuk Patinggi Tan Sri Alfred Jabu Numpang
Sapit Kepala Menteri


ALVESTER BIGOL

KUCHING : Perintah negeri endang rinduka pengawa kerejasama pelajar antara University of Canterbury, New Zealand enggau Universiti Malaysia Sarawak tauka Unimas ba pengawa ngadaka graduan ke bekualiti ari menua tu jemah ila.

Sapit Kepala Menteri, Datuk Patinggi Tan Sri Alfred Jabu Numpang madah, iya udah berandau enggau raban ari University of Canterbury ti diuluka Penulung Canselor iya, Dr. Rod Carr.

Jabu madah, nengah randau nya, University of Canterbury bisi ati deka bekerjasama enggau sebuah universiti ba negeri tu kelebih agi ungkup bala pelajar ke udah bulih degree ba bidang enjinir.

Iya madah munyi nya rambau dirandau pemberita pengudah nerima penemu basa ari Penulung Censelor University of Canterbury, New Zealand, Dr. Rod Carr ba Wisma Bapa Malaysia ditu kemari (Hari Empat).

Nya alai, ku Jabu, ex pelajar Unimas diperansang nyambung belajar ngagai tikas Doktor Falsafah (PhD) ba University of Canterbury.

"Penyampau ex graduan ke udah tembu belajar ba University of Canterbury ari serata menua tu endang mayuh lalu 40 peratus ari penyampau nya datai ari Kuching, Sarawak," ku iya.

Ba pemansang ke sebaka, ku Rod, bala universiti meri terima kasih ngagai perintah negeri enggau Unimas lalban udah meri timbal ke manah bekaul enggau kerejasama nya.

"Dalam sempekat pemereti ati (MoU) tu ila, raban pengatur pengawa ari dua bengkah University of Canterbury enggau Unimas deka berunding enggau dalam agi.

"Udah nya, antara pekara ke ditumpu iya nya pengawa betukarka bala pelajar, besaup ngaga pansik, besaup dalam fakulti enggau meri bantu biasiswa ngagai pelajar ke ngambi PhD," ku iya.

Rod madah, universiti nya bepengkalan ba negeri besai Christchurch, iya nya sebuah negeri besai ke tebilang ba Pulau New Zealand, pia mega pegari nama ketegal bidang sains enggau pelajar enjinir.

"Kitai ba penuduk ke-21 dunya ba bidang nyukat barang lalu masuk dalam rintai 100 universiti ke epamdu manah ba dunya," ku iua seraya madahka bala universiti deka nyediaka biasiswa ngagai pelajar ke nyulut.

Nya alai, ku iya dikena meri peransang ngagai mayuh agi pelajar antrabansa nyambung pelajar ngagai tikas PhD ba universiti nya, 70 peratus ari ungkus belanja bala pelajar endang deka dipelanja.

Iya madah, ungkus belajar pelajar antarabansa endang sama baka enggau ungkus belajar ke dipelanja ungkup pelajar domestik.

Bela bisi datai iya nya Menija Pemansang enggau Alumni University of Canterbury, New Zealand enggau Presiden Gerempung Graduan New Zealand, Pampang Sarawak, Alex Ting.

Pengaji patut nyediaka palan nyaga anak mit ba palan gawa

KUCHING : Pengaji dilalau ngemeratka sukut pengelantang pendiau ruang bilik pekereja kelebih agi orang indu ngambika pendiau ruang bilik sida terus meruan.

Menteri Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah, pengaji patut mantaika polisi struktur pengawa enggau kaban ruang bilik ba opis diri empu ngambika nulung orang indu ke udah berumah tangga ngaduka pengidup sida.

"Nyema sukut ruang bilik tu enda dikemerat nyadi pendiau ruang bilik nya ulih pambar lalu rayat tentu deka charut," ku iya.

Iya madah munyi nya rambau nutup pengerami enggau nyuaka setipikit .Program Latih Pengarah Indu (Women Directors' Training Programme" ditu kemari (Hari Empat).

Iya madah, pengaji patut mantu pekereja indu bebendar agi bejalaika tanggung pengawa sida awakka ruang bilik sida nadai penanggul.

Ku iya, pengaji tau muka palan nyaga anak ba opis sida ngambi ngemuntangka pekereja indu ngemataka anak sida.

Nangkan ke nya, ku iya pengaji mega patut ngubah sistem chara endur ngawa awakka meri penguntung ngagai pekereja indu enggau lelaki.

Fatimah mega madah, orang lelaki patut nguna pemisi sida dalam nyeliahka persepsi orang indu ke bisi penanggul.

"Nya alai penau orang indu deka nulung ngangkatka chara kereja ke manah sereta nitihka peneleba sida," ku iya.

Iya mega madah, penyampau orang indu ke ngaga pemutus kurang amat iya nya semina 32 peratus aja ba opis perintah.

Udah nya, ku iya semina 12.3 peratus ari sida ke mangku tanggung pengawa ngaga pemutus ba negeri tu nyengkaum sida ke indu.

Ba opis swasta, ku iya semina 8.4 peratus aja orang indu ba menua tu mangku pengawa ngaga pemutus.

"Nya alai, penyampau orang indu ke mangkau pengawa ngaga pemutus chukup mimit ba negeri tu," ku iya.

Nya alai, Fatimah madah mayuh bengkah atur patut digaga dikena ngangkatka penau orang indu ba menua tu.

Iya mega ngelalau orang indu awakka nguna peluang nya enggau manah awakka sida ulih tepangku pengawa ke besai-besai ba opis.

Nembiak sekula diperansang nyulut ba pengawa lumba

MARUDI : Kaban Kunsil Negeri Telang Usan Dennis Ngau madah, pengawa lumba tau dikumbai siti pekara ke beguna laban tau nempa pemereti ati bala nembiak sekula.

Kelimpah nempa pemereti ati nengah pengawa lumba, Dennis ngarapka bala pelajar ulih numpuka pengawa belajar sida laban nya meh pemadu beguna sereta nyamin pengidup sida dudi hari.

"Berindik ari nya, aku ngarapka sekula ke bisi enggau ba pengawa lumba tu jemah ila ulih ngadaka atlet ke landik ulih dianjung ngagai tikas antarabansa baka Pendela Rinong enggau atlet bukai ke udah pengari nama ba tikas antarabansa," ku iya.

Nitihka penerang Dennis, sid atu mega bepun ari sekula primari ke majak nyulut ba bidang lumba ke dipasuk sida.

Iya madah, sida nya ngembuan pengeransing ati lalu asil latih ke digaga belama ngujungka sida nyapai penyulut ba pengawa lumba lalu mujur ngarika menua tu.

“Kitai bisi peluang ke besai dikena ngulihka pemujur ba bidang lumba sereta ba pengawa belajar asal kitai ngembuan pemereti ati dikena nyapau pemujur," ku iya rambau bejadi Pekit Lumba Ninting Taun SJK Sungai Jaong  Kali Ke-17 taun 2013 ba Kompleks Sukan Marudi pagi kemari (Hari Empat).

Nya alai, Dennis madah pengawa pengajar, apai indai enggau staf sekula patut besaup ngaduka bala nembiak sekula ba pengawa lumba awakka bela mujur ba pengawa belajar enggau lumba.

Apai indai patut ngajar bala anak enggau meruan ngambika tau bulih degree laban ulih nyamin pengidup sida lantang jemah ila.

“Terima kasih ngagai bala apai indai ketegal sukung sida ti ngemendarka bala anak sida nyereta pengawa lumba.

Aku ngarapka bala apai indai, staf sekula enggau opis pengatur sekula ulih neruska kerejasama dalam meri sukung ngagai bala nembiak sekula dudi hari," ku Dennis.

Berebak enggau nya, Dennis Ngau bisi nyadaka agih belanja MRP RM10,000 ngagai staf opis SJK Sungai Jaong dikena sida ngemujurka sebarang aktiviti udah tu.

Bela bisi datai ba pengerami tu  Kepala Pengajar SJK Sungai Jaong Choo Chong Lok, Pegawai Pemadah Marudi Joseph James, Yang Dipertua Gerempung Apai Indai enggau Pengajar SJK Sg. Jaong Kapitan Jimmy Kiu Boon Fatt enggau Chairman Pengatur SJK Sg. Jaong  Wong Kiong Ching.

Unit trafik DBKU nulung mutarka jalai sekut

KUCHING : Dikena mutarka penanggul jalai sekut ketegal mensia enggau kerita ke majak nambah, kira 27 Unit Trafik Warden Dewan Bandaraya Kuching Utara (DBKU) dikerah ngawa ba tiga bengkah kandang endur jalai besai ba bandar tu.

Sapit Pengarah Opis Servis Penyaga DBKU, Andrew Joris Noyen madah, tiga bengkah kandang endur tu nyengkaum ba Jalai Bepeling Datuk Kipali bin Abang Akip, Jalai Bepeling Datuk Menteri Abang Haji Mohammad Zin bin Haji Salleh enggau simpang empat Jalai Satok-Jalai Tun Abang Haji Openg.

"Ninting hari Trafik Warden tu deka nyaup Polis Diraja Malaysia (PDRM) nyaga jalai ke sekut berengkah pukul 6.00 pagi ngagai pukul 8.30 pagi maya opis tebuka.

"Udah nya mua ke lemai, maya semua pekereja pulai ari opis, sida deka berengkah nyaga jalai sekut bepun pukul 5.00 ngagai 6.00 lemai," ku iya.

Iya madah munyi nya, rambau dirandau pemberita pengudah ngulu program Lawatan Media: Publisiti Bagi Trafik Warden DBKU ba Jalai Bepeling Datuk Kipali bin Abang Akip, Petra Jaya, ditu pagi kemari (Hari Enam).

Taja pan Unit Trafik Warden ditumbuh kenyau lapan taun ke udah, tang agi mayuh orang enda nemu pemisi unit nya enggau tanggung pengawa sida.

"Sida diberi latih bejalaika "Latihan Kecemasan Lalu Lintas Khas Tahunan" dikena ngujika pengelandik diri nyema bisi nyadi penusah jalai sekut maya kuasa karan tejanggal.

"Selalu iya, unit tu deka dianjung gawa 10 minit pengudah "Pusat Khidmat 24 Jam" nerima ripot ari mensia mayuh madahka lampu trafik enda idup," ku iya.

Ngenang pekara nya, iya madah aktiviti Trafik Warden enggau pengawa nyaga jalai sekut endang atur ke manah ba mengeri besai tu.

Tu setipak enggau pelin pemansang ke dikumbai "Cantik, Bersih enggau Selamat (CBS) awakka menua Kuching tau nyadi mengeri besai ke manah dipeda.

Bela bisi datai iya nya Kepala Unit Pengelikun DBKU, Dennis Achil enggau Kepala Unit Khidmat Sosial enggau Raban Bansa, Shamsuri Sahari.

Kerita ke benung dipenyadi Karim eksiden

BEBADI NYAWA...  Haji Abdul Karim Rahman Hamzah meratika gaya kerita ke baru diuji pengudah ke siden ba Trivilion, Kuching.

KUCHING, Hari Minggu -  Penulung Menteri Pemansang Nembiak, Haji Abdul Karim Rahman Hamzah berasai kesal pengudah ke kerita baru dipenyadi sereta ditepan iya maya ke deka diuji nyau eksiden ba Trivilion ditu kemari (Hari Enam).

Penusah nyadi pukul 10.30 pagi pengudah kerita SUV ke semina dikena nguji nya tebelunging lalu ngelantar lebih kurang tiga meter ari jalai raya.

Penusah nyadi dipelabaka laban deriba kelalu laju maya ke beputar pulai ngujungka tayar belakang kerita terangkat lalu tebambang ke tisi jalai.

Maya penusah nyadi, empat iku sida ke nepan kerita nya nyengkaum Abdul Karim Rahman Hamzah, Sheikh Muhamad Azli Tan Sri Nasimuddin Kamal, Hong Boon Pau enggau deriba kerita ke benama Muzamin, 40-an.

Semua penumpang nadai bakal semina deriba aja bisi bakal ba pala sereta dipelabaka kena pechik sempiar kacha lalu tepantup ke mua.

Karim lebuh ke dirandau madahka, maya kerita nya diuji kedua kali orang ke deriba nya mai kerita bangat kelalu laju.

"Nama-nama bansa kerita tau eksiden, nyema dibai laju-laju tang taja baka nya anang bangat kesal maya udah siden, pansut meh belubah-lubah ari kerita," ku iya ti mega bisi selau mimit ba lengan kiba.

Taja baka nya, Karim ti nepan ba penuduk mua kerita nya meri terima kasih ngagai petara laban ke nadai balat bebadi ba penusah nya.

Orang ke deriba kerita nya dianjung terus ke sepital ngambika diperubat.

Nangkan ke nya, Kepala Pegawai Esekutif Green Oranges Sales & Services Sdn. Bhd., Sheikh Muhamad Azli Tan Sri Nasimuddin Kamal madah, bala sida deka ngaga pansik kebuah kerita nya tau bebadi.

"Kami pechaya, penusah nyadi ketegal ulah mensia, taja baka nya kami deka terus ngaga pansik," ku iya madah ngagai pemberita ba palan penusah nyadi.

Iya madah, tu meh keterubah kerita nya bebadi laban ngelama tu bala sida udah kala nguji ke kerita nya tujuh kali beserimbai enggau roadshow ke sebaka ba menua Borneo enggau 10 kali ba Semenanjung Malaysia.

"Penusah eksiden tu terang amat mandangka kerita tu endang bekualiti sereta nadai penanggul," ku iya.

Riot berasai asa

NULUNG KITA … Datuk Richard Riot Jaem nyuaka geran MRP ngagai seiku penerima nyerumba pengerami Nyuaka Chek MRP  Renggat ke-3 ungkup sitak Parlimen Serian, ba Serian. Bela bisi dipeda Seketeri Politik Menteri Sumber Mensia, Mejar (B) Peter Runin (kanan).

"Tu kebendar iya awakka nguntungka semua, sereta endang udah nyadi tanggungjawap aku ke nyadi Menteri tang aku asa laban maya musin Pengawa Bepilih Besai (PRU) ke -13 tu tadi aku meda penyampau undi chukup ngasuh ati aku asa."
Datuk Richard Riot Jaem
Menteri Sumber Mensia


SERIAN, Hari Minggu - Bisi 77 pengari kampung enggau Gerempung Raban Nembiak kampung ba pelilih Serian nerima chek MRP ke diatur ba Dewan Masyarakat Serian ditu kemari (Har Enam).

Menteri Sumber Mensia, Datuk Richard Riot Jaem mada, semak RM 700,000 pemeri nya udah disuaka ngagai rayat ba kandang menua N.119 Serian dikena ngemansangka menua ba kandang kampung.

“Aku deka nguji naka ulih nulung rayat ba kandang menua ke dijaga aku enda bekira bansa enggau jalai pengarap.

"Tu kebendar iya awakka nguntungka semua, sereta endang udah nyadi tanggungjawap aku ke nyadi Menteri tang aku asa laban maya musin Pengawa Bepilih Besai (PRU) ke -13 tu tadi aku meda penyampau undi chukup ngasuh ati aku asa," ku iya ti mega nyadi kaban Parlimen Dun N.119.

Iya madah diri endang nyadi Menteri ungkup semua, enda ngira nya China, Iban, tauka Melayu, iya endang deka nulung meri utai ke dipinta rayat ba menua ke dikuasa iya.

“Nama kebuah penyakal ke nadai kala meri nama-nama pemansang tau bulih undi ke mayuh, pekara nya chukup ngasuh aku berasai asa.

"Aku udah gawa ditu pengelama 20 taun, nya alai utai ke dikarap ke aku ngagsai semua kita endang deka meda kita nyukung aku magang awakka rindu agi ngereja pengawa," ku iya rambau Pengerami Nyuaka Chek MRP.

Nangkan ke nya, iya madah berindik ari nya kira RM 700,000.00 deka diberi iya ngagai Sekolah Chung Hwa Serian udikena sida ngaga pemansang.

Program Star -Quest dipuji raban nembiak

Indinina Jering ak Jenau

Ricky ak Jefery

Debra Lister ak Litar

ALVESTER BIGOL SULANG

KUCHING, Hari Minggu - Sebengkah program baru ke diatur Gerempung Artis enggau Pemuzik Dayak (DAMA) ke dikumbai Pekit Ngiga Bintang tauka (Star-Quest) nerima sukung ke chukup manah ari bala raban nembiak ba serata negeri tu.

Bisi 34 iku pesereta nguji nyadaka pemanah nyawa diri belagu ba sesi nguji pengandik ba hari keterubah diatur kemari (Hari Enam) bepalan ba Kuching Sentral ba ditu. Program nguji pengelandik agi benung diatur sehari tu nyentuk ngagai pukul 6.00 lemai tu.

Ngagai barang sapa raban nembiak ke beumur antara 16 ngagai 30 taun ke bisi ati deka nyadi pemerindang dalam industri kreatif menua tu sereta ngembuan sada nyawa ke chukup manah, sida endang diperansang datai nguli sesi nguji pengelandik tu.

Champion ba pekit Star Quest tu ila deka diambi nyadi artis pemerindang dibaruh payung Kompeni DAMA Media Production. Nangkan ke nya, pemenang lumur satu mega deka nerima perais duit RM3000 disempulang sebuah trofi enggau setipikit.

Sekeda ari pesereta ke bisi enggau dalam sesi nguji pengelandik belagu madahka pengaga diri sereta muji program ke diatur DAMA tu laban ulih peluang ngagai sida nempa pemerani diri sereta mandangka pengelandik ba pengawa belagu.
Seiku ari pesereta ke bisi datai iya nya, Indinina Jering ak Jenau, 20 ari Julau madahka Program Star Quest endang chukup manah laban ulih dikena ngiga raban nembiak ke ngembuan pengelandik belagu.

"Aku rinduka pengawa belagu endang bepun ari mit, pengerindu nya ngujungka aku berani masuk mayuh bengkah pekit belagu," ku iya seraya madahka diri kala bulih lumur dua ba sebengkah pekit belagu ke diatur Radio Televisyen Malaysia nyerumba pengerami Gawai taun siti nyin kemari.

Udah nya, Ricky ak Jefery, 21 ari Sibu madahka, iya berengkah enggau pengawa belagu kenyau ari umur 12 taun. Ku Ricky pemanah Program Star Quest ulih meri peluang ngagai nembiak rebak baru ngemasukka diri dalam industri muzik Dayak.

"Nyema mujur ba sesi nguji pengelandik tu ila, aku deka naka ulih nguji ngaga iya ke pemadu manah awakka aku tau nyadi seiku ari kaban artis pemerindang ba menua kitai," ku iya seraya madahak diri kala masuk sebengkah pekit belagu ke diatur Kompeni Panggau Buluh Pengerindu ba taun 2010.

Seiku agi pesereta ke bisi enggau program tu iya nya, Debra Lister ak Litar, 21 madah, iya nyereta sesi nguji pengelandik tegal ari peransang seiku kaban laban ke endang ngelala iya seiku ari orang ke chukup rinduka pengawa belagu.

"Aku datai kitu endang ketegal pengerindu ke pengawa belagu, tambah mega kami sebilik endang nadai nagang aku," ku iya sereta madahka diri suah enggau pekit belagu kenyau ari jeman sekula suba.

Ari pemayuh sida ke enggau pengawa nguji pengelandik tu, semina 16 iku aja deka dipilih betanding ba renggat semi final ke deka diatur ba On Top Lounge & Restaurant di Taman Bukit Mata ditu kena 27 Julai pukul 7.00 malam.

Lalu pekit final deka diatur kena 28 September, pukul 7.00 malam bepalan ba Dewan Suarah Negeri ba ditu.

PAV beguna kena napi SCORE

TABI PUJI...Dua pelajar ari Jabatan Teknologi Maklumat enggau Komunikasi begambar ngambika pengingat pengudah tembu Pengerami Konvokesyen Ke-5 Politeknik Mukah ba Hari Kedua ke diatur ba Dewan Serbaguna, PMU.

"Nyema mujur jemah, sida (pelajar) mega bepeluang napi pengawa ke bisi disedia ba industri-industri ke dikuasa Koridor Energi Sarawak (SCORE) baka Aluminum Smelting Plant ba Mukah enggau Bintulu, Tekat Hidro Elektrik, Eco Dagang Temuai enggau industri-industri ke bekaul enggau servis."
Datuk Hajah Fatimah Abdullah  
Menteri Pengintu Pendiau, Orang Indu enggau Pemansang Ruang Bilik



MUKAH : Dalam arus ubah  Transformasyen Pelajar Teknik enggau Vokasional Malaysia, perintah udah ngemujurka 15 buah sekula di menua tu belajarka Pelajar Asas Vokasional (PAV) bepun ari Pom Satu.

Menteri Pengintu Pendiau, Orang Indu enggau Pemansang Ruang Bilik  Datuk Hajah Fatimah Abdullah madah, di nengeri tu Sekuka Sekondari (SMK) Belaga udah dipilih ngepunka PAV (Wiring) lalu bisi 30 iku nembiak udah berengkah belajarka kus nya.
"Bala pelajar ke mujur dalam kus PAV ba tikas sekula tu ila deka diambi belajar ba Politeknik Mukah (PMU).
"Nyema mujur jemah, sida (pelajar) mega bepeluang napi pengawa ke bisi disedia ba industri-industri ke dikuasa Koridor Energi Sarawak (SCORE) baka Aluminum Smelting Plant ba Mukah enggau Bintulu, Tekat Hidro Elektrik, Eco Dagang Temuai enggau industri-industri ke bekaul enggau servis," ku iya.

Iya madah munyi nya beserimbai enggau Pengerami Konvokesyen Ke-5 Politeknik Mukah ba Hari Kedua ke diatur ba Dewan Serbaguna, PMU pagi, kemari.

Nangkan ke nya, Fatimah madah Opis Menteri Pelajar Menua udah ngaga pemutus deka berengkah ngaga sekeda ubah bepun taun 2013 endur ngemujurka pelin tranformasyen tu.

Entara pekara ke deka diadu tauka digaga baru tu iya nya ngatur baru ubah ke engkeman, miki rumah sekula sereta nempa pengajar ke ngajar kus PAV.

Udah nya, PAV mega deka ditambahka mayuh agi ngagai 150 buah sekula di serata menua lalu ba nengeri tu deka dikemujurka ba 10 buah sekula.

Berebak enggau nya, Fatimah ti mega nyadi Kaban Kunsil Nengeri (ADUN) Dalat madahka, sebuah sekula Vokasional SMV Batu Lintang deka diangkat nyadi Kolej Vokasional.

Nya alai, bala pelajar ke belajar ba kolej tu jemah deka bulih setipikit Vokasional enggau Diploma maya umur ke agi biak.

Diatu  langgur penemu bekaul enggau endur engkah bala pelajar pengudah sida bulih Setipikit Pelajar Malaysia Vokasional agi benung diperunding begulai enggau palan pelajar MARA enggau Institut Latihan Perindustrian (ILP).

Ba pengerami konvokesyen Ke-5 Politeknik Mukah tu, bisi 324 iku graduan peringkat Diploma enggau 324 graduan peringkat setipikit ari  lima buah jabatan udah nerima setipikit graduan sida.

Entara jabatan kus pelajar ke bisi disedia ba PMU baka Jabatan Kejuruteraan Mekanikal, Jabatan Kejuruteraan Elektrik, Jabatan Kejuruteraan Awam, Jabatan Perdagangan enggau Jabatan Tekonologi Maklumat enggau Komunikasi.

Sama bisi datai iya nya Pengarah PMU Wan Muhammad Afifi bin Wan Abdullah, Sapit Residen Mukah Philip Peter Salam, Tuai-tuai opis perintah, ketuai-ketuai jabatan PMU, bala pengelicha, bala tuai raban bansa enggau bala apai indai pelajar.

SFCSB nyaga utai idup ba tasik

"Chara nya beguna amat dalam ngulihka timbal ari raban orang ke besangkut paut sereta sekeda ari orang berikan ke nguan menua nya ditambah enggau utai idup ba tasik ke majak punas baka  dugong, ikan lumbi-lumbi enggau lelabi tasik."
Datu Haji Ali Yusop
Kepala Pegawai Eksekutif SFCSB


KUCHING : Opis Babas Sarawak Sdn Bhd (SFCSB) merambu ngaduka gazet kandang menua tasik Lawas nyadi Taman Negara Sarawak awakka utai idup ba dalam ai nya seruran dijaga manah.

Pengarah Pengatur Pengawa ti mega nyadi Kepala Pegawai Eksekutif SFCSB, Datu Haji Ali Yusop madah, bala sida deka ngenataika surat perambu ngagai perintah negeri pengudah ngaga pansik enggau silik bekaul enggau utai idup ba kandang menua tasik nya.

Iya madah, naka ke diatu, pansik ngaduka gazet ba kandang menua tasik Lawas benung diperati sereta diperunding enggau agensi ke besangkut paut.

“Chara nya beguna amat dalam ngulihka timbal ari raban orang ke besangkut paut sereta sekeda ari orang berikan ke nguan menua nya ditambah enggau utai idup ba tasik ke majak punas baka  dugong, ikan lumbi-lumbi enggau lelabi tasik.

“Taja baka nya, kami agi bedau nemu penyauh garis antara menua ke patut digazet ba kandang menua tasik Lawas lalu nya alai, kami meseti beratika dulu utai idup ke bisi ba tasik nya," ku iya.

Berebak enggau nya, iya madah bala sida benung nganti pemutus ari perintah negeri bekaul enggau peminta ngaduka gazet kandang menua tasik Taman Negara Similajau, Bintulu enggau kandang menua tasik Pulau Bruit, Mukah.

Iya madah munyi nya lebuh dirandau pemberita pengudah tembu pengawa Nyain Sempekat Pemereti Ati (MoU) enggau Universiti Malaysia Terengganu (UMT) ba Opis Pekara Korporat SFCSB ditu kemari (Hari Lima).

Nya alai, Ali madah, SFCSB endang meransang kerejasama ari perintah menua Brunei dalam ngamatka perambu nya laban kandang menua tasik Lawas ba antara garis menua dua bengkah menua.

Iya madah, kerejasama ke baka nya deka meri penguntung ngagai dua bengkah menua tu dalam ngemansangka sektor dagang temuai sereta maritim ba negeri Sarawak enggau ba menua Asia.

“Kelimpah ari nya, perambu tu mega deka nulung nempa Sarawak nyadi palan ke ngembuan penau endur dugong besai idup," ku iya.

Udah nya, lebuh ngenang sempekat nya, Ali madahka kerejasama nya ulih nulung raban sida ngulihka penerang enggau mansik utai idup ba tasik menua Sarawak.

Dulu ari nya, Penulung Chanselor UMT, Dato Dr.Ibrahim Komoo madah, UMT bebendar meri sukung, bantu pakar enggau latih teknikal ngagai SFCSB enggau perintah negeri tu dalam bejalaika pengawa pansik enggau nyaga utai idup ba tasik.

“Nya alai, aku ngarapka UMT ulih nyadi kaban kerejasama dalam berundingka perambu isu-isu ke nyengkaum polisi undang-undang enggau atur pengawa nyaga utai idup ke majak punas ba Sarawak dudi hari,” ku iya.

Rayat patut terus pechaya ngagai BN

JAKU LALAU...Dr Johnnical Rayong benung ngenataika jaku lalau maya Pengerami Ngabas Rayat ba Nanga Mejong, Skrang apin lama ke udah.

SRI AMAN : Rayat ba kandang menua Engkilili deka ngasaika penyamai pengidup seagi sida terus nyukung sereta pechaya ngagai Barisan Nasional (BN) megai perintah udah tu.

Kebuah pia laban BN endang ngembuan mayuh peneleba dalam ngatur semua program pemansang ngagai rayat kenyau ari suba nyentuk ke diatu, ku Kaban Kunsil Negeri (ADUN) Engkilili, Dr Johnnical Rayong Ngipa.

“Aku ngarapka rayat ditu nemua semina perintah BN ulih nyaup pengidup rayat enda ngira ari ni penatai enggau pengarap sida," ku iya.

Rayong madah munyi nya rambau  Pengerami Ngabas Rayat ba Nanga Mejong, Skrang ba menua Engkilili, apin lama ke udah.

Kelimpah ari nya, penatai parti penyakal ke ngelawa rayat kebendar iya semina deka nempa jaku petenah ngambika rayat begedi ngagai bala tuai BN.

“Raban penyakal tu deka betalatka mayuh bengkah isu ngambika rayat tekuing runding lalu nyukung sida.

"Tu ngujungka perambu pemansang ke udah dilanggur BN ba menua sida nyau tejanggal. Nya alai anang kelalu pechaya ngagai penyakal laban sida semina dipeda mua maya pengawa bepilih besai aja," ku iya.

Rayong mega madah, nasip pengidup rayat ba negeri tu deka terus berubah seagi sida ngembuan kaul ke terit enggau bala tuai BN sepemanjai maya.

Kumang enggau Keling BDCF 2013

JELAN PEMAJIK...Debra Joseph (duduk), Jacinta Lenya (dua kiba) enggau Nathalie (kanan) begambar ke pengingat ba Panggau Dayak BDCF 2013 malam ensana. Bela bisi dipeda  Sim (bediri, kiba) enggau Andrew (bediri, dua kanan).

SIBU : Paras mua ke jelan pemajik ditambah enggau raras tubuh ke manah dipeda ngujungka Debra Joseph Ajan mujur dipilih akim nyadi Kumang Pengerami Main Asal Dayak Borneo (BDCF) 2013.

Ba Pekit Kumang BDCF 2013 ke diatur ba Panggau Dayak malam ensana (Hari Empat) Debra mujur ngalahka 10 iku pesereta ke bukai.

Nengah pemujur nya, Debra mujur nerima perais duit RM1,000 besereta enggau tropi, jumpang, selampai enggau hamper.

Pia mega Jacinta Lenya ke enda kurang pemajik mujur bulih lumur dua. Iya nerima perais duit RM800 besereta tropi, selampai enggau hamper.

Lumur tiga dipenggi Nathalie Kumang Peter Basil ke bela nerima perais duit RM600 besereta tropi, selampai enggau hamper.

Nangkan ke nya, pesereta ke bulih lumur empat enggau lumur lima bela nerima perais duit RM200.

Udah nya, pesereta ke bulih lumur enma ngagai lumur 10 bela nerima perais duit  RM150.

Ungkup pemenang Pekit Keling BDCF 2013, Hillary Beti mujur dipilih nyadi Keling BDCF 2013.

Ba pekit ke bela diatur malam nya, Hillary mujur ngalahka lima iku pesereta ke bukai.

Beduduk ari pemujur nya, Hillary nerima perais duit RM2,000 enggau tropi.

Lumur dua dipenggi Chrisyule Hayward ke nerima perais duit RM1,000 enggau tropi.

Udah nya, lumur tiga dipenggi Latip David Sait ke nerima perais duit RM500 enggau tropi.

Udah nya, pesereta ke bulih lumur empat enggau lumur lima bela nerima perais duit RM200.

Pengawa nyuaka perais ngagai bala pemenang dipenyadi Residen Bahagian Sibu, Sim Kok Kee ti mega nyadi pengari Sapit kepala Menteri, Datuk Patinggi Tan Sri Alfred Jabu Anak Numpang.

Bela bisi datai iya nya, Chairman komiti BDCF 2013, Kunselor Sempurai Petrus, Chairman Majlis Daerah Luar Bandar Sibu (MDLBS), Kunselor James Laju Ambok, Seketeri Politik Kepala Menteri, Andrew Shiling Banggit.

Chairman Serakup Bansa Dayak Sarawak (SDNU) Pampang Sibu, Kunselor Tengku Gruna, Chairman SDNU Pampang Rajang, Mejar Moses Ripai, Chairman SDNU Pampang Sibu Jaya, Steven Rom, Chairman Serakup Indu Dayak Sarawak (SIDS) Sibu, Ir Alice Jawan.

Chairman Gerempung Bansa Dayak Bidayuh (DBNA) Sibu, Mejun Abang enggau Gerempung Bansa Orang Ulu (OUNA) Sibu, Lade Kulong.

Program ngiga kereja diatur ba Dataran Marudi 13 Julai

KUCHING : Opis Tenaga Kereja Marudi deka ngatur "Program Penempatan Pekerjaan" (3P) Tahun 2013 bepalan ba Dataran Marudi kena 13 Julai tu.

Penulung Kanan Pengarah Tenaga Kereja Marudi, Anthony Lawai Lutang madah, program ke diatur sehari nya deka bepun pukul 8.00 pagi ngagai 5.00 lemai.

"Program tu ila nyediaka peluang ngagai orang ke deka bepinta pengawa puang ba menua tu betemu terus enggau sekeda kompeni swasta (pengaji) ke bisi ba menua Marudi enggau Miri nyengkaum ba luar menua Miri.

"Berebak enggau nya ila, orang ke deka minta pengawa ulih minta pengawa ti setipak enggau pemandai sereta peneleba sida empu," ku iya ba sebengkah surat penerang ke dianjung ngagai Utusan Sarawak ensana (Hari Empat).

Anthony madah, mayuh bengkah pengawa puang ari tikas ke pemadu baruh nyentuk ngagai tikas professional bisi nganti bala orang ke benung begigaka kereja.

Nangkan ke nya, iya madah, sekeda agensi perintah nyengkaum sekeda institusi pematih bisi datai nyerumba program nya ila.

"Barang sapa orang ti begunaka penerang bekaul agensi ke besangkut paut dipinta anang muai peluang ngenataika diri nyerumba program tu ila," ku iya.

Nya alai, iya nesau semua orang ke benung begigaka pengawa, tauka sida ke udah lepas sekula datai aja ngelawa program tu.

"Ngagai sida ke deka datai maya tu ila, sida dipinta mai dokumen-dokumen ke besangkut paut nyengkaum salin dokumen nya, pia mega patut nyediaka diri diinterbiu raban pengaji," ku iya.

AJARR 6 ditentuka malam tu

Raban Taju Reamong benung belatih belagu

Malaysia nyadi menua maju 2018

KE PENGINGAT...Datuk Seri Najib Tun Razak (tengah) begambar ke pengingat enggau bala pelajar nyerumba "Majlis Bersama Pelajar Felda-Universiti Lim Kok Wing" ba  Universiti Lim Kok Wing London ditu kena Hari Tiga tu tadi. Bela bisi dipeda Pesuruhjaya Tinggi Malaysia ngagai United Kingdom, Datuk Seri Zakaria Sulong.

"Bank Dunya ngengkah penuduk kitai ba lumur 12 enti nitihka ripot 'Doing Business Report 2013' lalu asil tinjau apin lama ke udah mandangka Malaysia berindik ba jalai ke ngena dalam nyapai status menua maju bepenatai pemisi ke besai ba taun 2018."
Datuk Seri Najib Tun Razak
Menteri Besai Malaysia


LONDON : Malaysia disadang nyadi menua maju ke ngembuan penatai pemisi ke besai maya taun 2018, iya nya dua taun tumu ari ke diperambu taun 2020, "Datuk Seri Najib Tun Razak.

Menteri Besai madah, Malaysia berindik ba jalai ke betul dalam nyapai perambu nya setipak enggau Program Transformasi Perintah enggau Program Transformasi
Ekonomi ke udah bepun mandangka asil enggau chukup terang.

"Penuduk Malaysia ba tikas dunya mega majak niki. Bank Dunya ngengkah penuduk kitai ba lumur 12 enti nitihka ripot 'Doing Business Report 2013' lalu asil tinjau apin lama ke udah mandangka Malaysia berindik ba jalai ke ngena dalam nyapai status menua maju bepenatai pemisi ke besai ba taun 2018," ku iya.

Iya madah munyi nya rambau bejaku ba pengerami 'Sepetang Bersama Perdana Menteri' ke bela digulu rayat Malaysia ba London, Intercontinental Hotel ditu kena Hari Tiga tu tadi.

Bela bisi enggau maya tu iya nya bini Najib, Datin Seri Rosmah Mansor, Menteri Luar Datuk Seri Anifah Aman, Pesuruhjaya Tinggi Malaysia ngagai United Kingdom Datuk Seri Zakaria Sulong enggau Duta Tourism Malaysia Datuk Jimmy Choo.

Najib madah, juluk ati nya endang pedis deka dijapai enti nadai sukung ari semua rayat Malaysia, sekalika nya saup ari sida ke diau ba menua tauka ba luar menua.

"Diaspora (orang ke gawa jauh) Malaysia endang nyadi keresa kitai laban sida bela enggau nulung ngemansangka menua," ku iya.
   
Najib mega nesau semua rayat Malaysia, kelebih agi ke diay ba luar menua tu ngambika terus nyaup Malaysia muai ripot ke bula bekaul enggau menua tu ngambika mayuh agi orang rindu beranakka puku sereta nemuai ngagai menua Malaysia.
   
"Leka jaku ke manah ari kita bekaul enggau Malaysia endang utai ke diasuh. Aku pechaya kita kala meda utai ke baka nya, maya kaban ke sama enggau kita gawa ngemansutka komen enda manah bekaul enggau Malaysia. Nyadi tanggung pengawa kita ke nyadi rayat Malaysia, patut ngerara pekara nya awakka nema Malaysia enda jai.

"Jaku rara ke manah ari kaban kita ulih meri bekau perati ke manah senentang pengulih menua tu.   
   
"Nadai utai bukai ke ulih napat ripot ke manah kelimpah ari 70,000 rayat Malaysia ke diau ba  United Kingdom, besebutka pemanah menua sida."

Najib ngarapka rayat Malaysia ke diau ba luar menua tu berundingka pekara ke ulih digaga dalam nulung ngemansangka sosio-ekonomi
menua tu enggau rayat.

Iya madah perintah endang bebendar dalam ngamatka juluk menua tu baka ke dikarapka rayat enggau raban nembiak.
   
"Kami pechaya tiang pemun tiap bengkah menua endang bepanggai ngagai tikas pelajar raban nembiak sida," ku iya.

Iya madah, perintah meda tebuka ngagai proses demokrasi nuju sistme ke lebih liberal, ngambika penemu raban nembiak ulih dipending.

"Perintah mega deka terus berunding ngagai raban nembiak ngambika sida ulih terus nyadi sebagi ari orang ke nulung ngemansangka menua. Pekara tu beguna amat ngagai raban nembiak ke maya hari tu laban sida deka nyadi tuai ke megai menua tu jemah ila," ku iya.

Besaup nempa anak pandai sekula

"Kitai meseti nulung pangan diri, sekalika ari staf sekula tauka Gerempung Apai Indai Enggau Pengajar  (PIBG) ngambika juluk ngadaka anak bansa ke nyulut ulih nyadi nyata."
Sharifah Hasidah Sayeed Aman Ghazli
Seketeri Politik Kepala Menteri


KUCHING : Apai indai dilalau ngambika bebendar nyereta pengawa ke diatur sekula laban nya sebagi ari chara endur sida nemu pemansang akademik bala anak diri empu.

Seketeri Politik Kepala Menteri, Sharifah Hasidah Sayeed Aman Ghazli madah, sukung ari bala apai indai beguna amat laban nyaup ngemansangka pelajar bala anak sida ninting maya.

"Kitai meseti nulung pangan diri, sekalika ari staf sekula tauka Gerempung Apai Indai Enggau Pengajar  (PIBG) ngambika juluk ngadaka anak bansa ke nyulut ulih nyadi nyata," ku iya.

Iya madah munyi nya rambau ngabang Pengerami Gawai Ngiling Bidai ke diatur ba  Dewan Budiman Sekolah Kebangsaan (SK) Astana ba ditu kemari (Hari Enam).

Hasidah madah, kaul antara kedua-dua piak (apai indai enggau pengajar) endang beguna lalu patut seruran ditempa.

"Aku ngarapka rambai jaku 'segulai sejalai ngiling bidai ke dikena ba pengerami tu ulih nyadika tengau sereta dikingatka genap iku kitai dalam bejalaika tanggung pengawa ninting hari," ku iya.

Nya alai, Kaban Kunsil Negeri (ADUN) madahka, sema apai indai dituntung sesebangkah penanggul bekaul enggau bala anak sida dilalau ngambi ngenataika pekara nya ngagai PIBG, awakka isu nya ulih diputar begulai enggau bala staf sekula.

"Aram meh kitai ngetanka pengelantang enggau penemu ke seruran bebasaka pengan diri laban kitai endang idup begulai enggau mayuh bansa sereta agama," ku iya.

Nangkan ke nya, Tuai Projek Pengerami Nutup Gawai, Donald Raymond Suke madah, tu meh keterubah pengerami nutup Gawai diatur ba sekula nya begulai enggau bala apai indai nembiak.

"Taun siti nyin kemari, aku bisi ngatur pengerami tu tang enda besai iya nya semina ba 'kelas pendidikan khas', tang lebuh bala apai indai nemua aku bisi ngatur nya, sida madahka perambu ngagai komiti PIBG awakka ngatur pengerami nya besai-besai," ku iya.

Pengajar Pendidikan Khas nya madahka, timbal ari bala apai indai nembiak endang chukup manah lebuh program tu diatur.

"Program nya digulu semua staf sekula sereta nadai sekat ngagai barang sapa orang," ku iya seraya madah, ngarapka program nya ulih diatur baru ba taun-taun ke deka datai.

SK Astana ngembuan 656 iku nembiak sekula lalu 60 peratus ari pemnyampau nembiak ke belajar ba sekula nya endang bansa Dayak. Lalu nitihka Tuai Komiti Gawai, Donald Raymond Suke.tu ke terubah pengerami nutup Gawai diatur ba sekula nya begulai enggau semua pengajar sereta enggau apai-indai nembiak dia.

Sama bisi datai iya nya Kepala PengajarSK Astana, Zainal Abidin Selamat enggau Chairman PIBG SK Astana, Ustaz Busman Rambli.