AJARR 6 ditentuka malam tu

Raban Taju Reamong benung belatih belagu

Logo AJARR 6

Penyampai CATS FM ti mega nyadi emcee AJARR 6 iya nya Anne enggau Fuz

KUCHING : Raban artis industri kreatif lagu Iban deka ditentuka malam tu (6 Julai) nengah Anugerah Juara Rentak Ruai tauka AJARR 6 ke diatur ba Dewan Suarah Sibu.

Nitihka penerang berita ke dianjung ngagai Utusan Sarawak kemari (Hari Lima) madahka, malam tu legi deka ditentuka ni bagi lagu ke pemadu dikerinduka bala peminat enggau penyukung lagu Iban sepemanjai taun siti nyin kemari.

Bisi 12 buah lagu ke pemadu dikerindu deka diakim raban juri profesional nyerumba AJARR 6 tu. 

Nangkan ke nya, mensia mayuh mega ngembuan kuasa ngundi lagu ke pemadi dikerindu sida nengah jaku pesan pandak tauka SMS ke deka ditutup pengudah 12 finalis AJARR merindang atas panggau.

Dipelabak lebih 2,000 penonton deka datai malam legi lalu chara sida ke deka ngundi bala finalis AJARR tu iya nya taip AJ enggau Nama Artis lalu anjung nuju lumur 33080. 

Ba AJARR 6 ke sekali tu, mayuh bengkah genre muzik deka dipandangka 12 artis baru enggau iya ke udah lama. 

Tang tebal agi ari finalis ke betanding malam tu legi endang penyanyi baru baka Lyssa, Leena Ranez, Gabriel Fairuz Louise enggau rock band Taju Remaong. 

Penatai artis-artis baru tu ke mandangka penyelai muzik nandaka lagu-lagu rentak baru enggau moden majak diterima raban peminat lagu-lagu Iban.

Sepemanjai AJARR udah diatur pengelama enam musim ke udah, muzik Iban terus ngerembai enggau chukup jampat setipak enggau juluk AJARR iya nya deka ngangkatka lagu-lagu Iban ngagai tikas ke lebih tinggi awakka terus dikerindu ukai semina ba raban bansa Iban tang mega diterima bansa bukai.

Bala penyukung enggau peminat lagu-lagu Iban ba serata Sarawak ke end aulih datai ngagai Dewan Suarah Sibu malam tu ulih mendingka program tu terus nengah CATS FM lalu ngagai peminta ba luar menua, sida ulih mendingka program tu enggau chara online ngena  live streaming ba laman web  www.catsfm.my.

Raban artis ke udah menang dulu suba, Hevance deka dulu merindang 12 finalis ke bepekit malam tu enggau lagu ke dikumbai Bajik, udah nya baru ditangkanka lagu-lagu finalis AJARR 6 iya nya Urai enggau lagu Ngarapka Bisi Tedai Pengerindu, Louis Benet (Tua Sama Enggai Beserara), Donny Lang (Enggai Ditimbal Beserara), Hailey (Kumang), Leena Ranez (Bedarah di Dalam Ati), Lyssa (Cherita Pengerindu Tua), Gabriel Fairuz Louis (Genggam Jariku), Stevenson (Telih di Ati di Pangka Janji), Ranee Pat (Aus Pengerindu Ketegal Nuan), Taju Remaong (Enda Sanggup) enggau Pelima Matthew (Nuan Nyadika Penawar). 

Kelimpah bulih anugerah Lagu Pemadu Manah enggau Lagu Pemadu Dikerindu, para finalis mega deka berebutka gelar Pemerindang Pemadu Manah enggau Vokal Pemadu Manah. 

Program malam tu mega deka meri gelar ngagai dua artis nengah Anugerah Penyanyi Ukai Iban enggau Anugerah Khas Juri. 

Nangkan ke nya, tiga penyanyi tebilang Iban, nyengkaum dua pemenang ke dulu suba Winnie Albert enggau Melissa Francis, sereta Stanley AF deka dikanggau merindang bala ke bisi datai. 

Siti raban indie menau tu ari  projek CATS Xposed, The Crew, mega bisi dikanggau merindang raban mensia mayuh.

AJARR endang program ninting taun ke diatur stesyen radio swasta iya nya, CATS FM dikena meri basa ngagai asil pengawa pemuzik Iban bepelasarka lagu-lagu sida ke bisi dirintaika dalam penuduk carta ninting minggu dalam program jaku Iban, ke dikumbai Lagu Terbilang CATS.  

Berambaika jaku Pengerindu Dalam Musik, AJARR 6 mega disukung Opis Menteri Dagang Temuai Sarawak lalu udah dipasuk dalam kalendar dagang temuai negeri.