Kumang enggau Keling BDCF 2013

JELAN PEMAJIK...Debra Joseph (duduk), Jacinta Lenya (dua kiba) enggau Nathalie (kanan) begambar ke pengingat ba Panggau Dayak BDCF 2013 malam ensana. Bela bisi dipeda  Sim (bediri, kiba) enggau Andrew (bediri, dua kanan).

SIBU : Paras mua ke jelan pemajik ditambah enggau raras tubuh ke manah dipeda ngujungka Debra Joseph Ajan mujur dipilih akim nyadi Kumang Pengerami Main Asal Dayak Borneo (BDCF) 2013.

Ba Pekit Kumang BDCF 2013 ke diatur ba Panggau Dayak malam ensana (Hari Empat) Debra mujur ngalahka 10 iku pesereta ke bukai.

Nengah pemujur nya, Debra mujur nerima perais duit RM1,000 besereta enggau tropi, jumpang, selampai enggau hamper.

Pia mega Jacinta Lenya ke enda kurang pemajik mujur bulih lumur dua. Iya nerima perais duit RM800 besereta tropi, selampai enggau hamper.

Lumur tiga dipenggi Nathalie Kumang Peter Basil ke bela nerima perais duit RM600 besereta tropi, selampai enggau hamper.

Nangkan ke nya, pesereta ke bulih lumur empat enggau lumur lima bela nerima perais duit RM200.

Udah nya, pesereta ke bulih lumur enma ngagai lumur 10 bela nerima perais duit  RM150.

Ungkup pemenang Pekit Keling BDCF 2013, Hillary Beti mujur dipilih nyadi Keling BDCF 2013.

Ba pekit ke bela diatur malam nya, Hillary mujur ngalahka lima iku pesereta ke bukai.

Beduduk ari pemujur nya, Hillary nerima perais duit RM2,000 enggau tropi.

Lumur dua dipenggi Chrisyule Hayward ke nerima perais duit RM1,000 enggau tropi.

Udah nya, lumur tiga dipenggi Latip David Sait ke nerima perais duit RM500 enggau tropi.

Udah nya, pesereta ke bulih lumur empat enggau lumur lima bela nerima perais duit RM200.

Pengawa nyuaka perais ngagai bala pemenang dipenyadi Residen Bahagian Sibu, Sim Kok Kee ti mega nyadi pengari Sapit kepala Menteri, Datuk Patinggi Tan Sri Alfred Jabu Anak Numpang.

Bela bisi datai iya nya, Chairman komiti BDCF 2013, Kunselor Sempurai Petrus, Chairman Majlis Daerah Luar Bandar Sibu (MDLBS), Kunselor James Laju Ambok, Seketeri Politik Kepala Menteri, Andrew Shiling Banggit.

Chairman Serakup Bansa Dayak Sarawak (SDNU) Pampang Sibu, Kunselor Tengku Gruna, Chairman SDNU Pampang Rajang, Mejar Moses Ripai, Chairman SDNU Pampang Sibu Jaya, Steven Rom, Chairman Serakup Indu Dayak Sarawak (SIDS) Sibu, Ir Alice Jawan.

Chairman Gerempung Bansa Dayak Bidayuh (DBNA) Sibu, Mejun Abang enggau Gerempung Bansa Orang Ulu (OUNA) Sibu, Lade Kulong.

Program ngiga kereja diatur ba Dataran Marudi 13 Julai

KUCHING : Opis Tenaga Kereja Marudi deka ngatur "Program Penempatan Pekerjaan" (3P) Tahun 2013 bepalan ba Dataran Marudi kena 13 Julai tu.

Penulung Kanan Pengarah Tenaga Kereja Marudi, Anthony Lawai Lutang madah, program ke diatur sehari nya deka bepun pukul 8.00 pagi ngagai 5.00 lemai.

"Program tu ila nyediaka peluang ngagai orang ke deka bepinta pengawa puang ba menua tu betemu terus enggau sekeda kompeni swasta (pengaji) ke bisi ba menua Marudi enggau Miri nyengkaum ba luar menua Miri.

"Berebak enggau nya ila, orang ke deka minta pengawa ulih minta pengawa ti setipak enggau pemandai sereta peneleba sida empu," ku iya ba sebengkah surat penerang ke dianjung ngagai Utusan Sarawak ensana (Hari Empat).

Anthony madah, mayuh bengkah pengawa puang ari tikas ke pemadu baruh nyentuk ngagai tikas professional bisi nganti bala orang ke benung begigaka kereja.

Nangkan ke nya, iya madah, sekeda agensi perintah nyengkaum sekeda institusi pematih bisi datai nyerumba program nya ila.

"Barang sapa orang ti begunaka penerang bekaul agensi ke besangkut paut dipinta anang muai peluang ngenataika diri nyerumba program tu ila," ku iya.

Nya alai, iya nesau semua orang ke benung begigaka pengawa, tauka sida ke udah lepas sekula datai aja ngelawa program tu.

"Ngagai sida ke deka datai maya tu ila, sida dipinta mai dokumen-dokumen ke besangkut paut nyengkaum salin dokumen nya, pia mega patut nyediaka diri diinterbiu raban pengaji," ku iya.

AJARR 6 ditentuka malam tu

Raban Taju Reamong benung belatih belagu

Malaysia nyadi menua maju 2018

KE PENGINGAT...Datuk Seri Najib Tun Razak (tengah) begambar ke pengingat enggau bala pelajar nyerumba "Majlis Bersama Pelajar Felda-Universiti Lim Kok Wing" ba  Universiti Lim Kok Wing London ditu kena Hari Tiga tu tadi. Bela bisi dipeda Pesuruhjaya Tinggi Malaysia ngagai United Kingdom, Datuk Seri Zakaria Sulong.

"Bank Dunya ngengkah penuduk kitai ba lumur 12 enti nitihka ripot 'Doing Business Report 2013' lalu asil tinjau apin lama ke udah mandangka Malaysia berindik ba jalai ke ngena dalam nyapai status menua maju bepenatai pemisi ke besai ba taun 2018."
Datuk Seri Najib Tun Razak
Menteri Besai Malaysia


LONDON : Malaysia disadang nyadi menua maju ke ngembuan penatai pemisi ke besai maya taun 2018, iya nya dua taun tumu ari ke diperambu taun 2020, "Datuk Seri Najib Tun Razak.

Menteri Besai madah, Malaysia berindik ba jalai ke betul dalam nyapai perambu nya setipak enggau Program Transformasi Perintah enggau Program Transformasi
Ekonomi ke udah bepun mandangka asil enggau chukup terang.

"Penuduk Malaysia ba tikas dunya mega majak niki. Bank Dunya ngengkah penuduk kitai ba lumur 12 enti nitihka ripot 'Doing Business Report 2013' lalu asil tinjau apin lama ke udah mandangka Malaysia berindik ba jalai ke ngena dalam nyapai status menua maju bepenatai pemisi ke besai ba taun 2018," ku iya.

Iya madah munyi nya rambau bejaku ba pengerami 'Sepetang Bersama Perdana Menteri' ke bela digulu rayat Malaysia ba London, Intercontinental Hotel ditu kena Hari Tiga tu tadi.

Bela bisi enggau maya tu iya nya bini Najib, Datin Seri Rosmah Mansor, Menteri Luar Datuk Seri Anifah Aman, Pesuruhjaya Tinggi Malaysia ngagai United Kingdom Datuk Seri Zakaria Sulong enggau Duta Tourism Malaysia Datuk Jimmy Choo.

Najib madah, juluk ati nya endang pedis deka dijapai enti nadai sukung ari semua rayat Malaysia, sekalika nya saup ari sida ke diau ba menua tauka ba luar menua.

"Diaspora (orang ke gawa jauh) Malaysia endang nyadi keresa kitai laban sida bela enggau nulung ngemansangka menua," ku iya.
   
Najib mega nesau semua rayat Malaysia, kelebih agi ke diay ba luar menua tu ngambika terus nyaup Malaysia muai ripot ke bula bekaul enggau menua tu ngambika mayuh agi orang rindu beranakka puku sereta nemuai ngagai menua Malaysia.
   
"Leka jaku ke manah ari kita bekaul enggau Malaysia endang utai ke diasuh. Aku pechaya kita kala meda utai ke baka nya, maya kaban ke sama enggau kita gawa ngemansutka komen enda manah bekaul enggau Malaysia. Nyadi tanggung pengawa kita ke nyadi rayat Malaysia, patut ngerara pekara nya awakka nema Malaysia enda jai.

"Jaku rara ke manah ari kaban kita ulih meri bekau perati ke manah senentang pengulih menua tu.   
   
"Nadai utai bukai ke ulih napat ripot ke manah kelimpah ari 70,000 rayat Malaysia ke diau ba  United Kingdom, besebutka pemanah menua sida."

Najib ngarapka rayat Malaysia ke diau ba luar menua tu berundingka pekara ke ulih digaga dalam nulung ngemansangka sosio-ekonomi
menua tu enggau rayat.

Iya madah perintah endang bebendar dalam ngamatka juluk menua tu baka ke dikarapka rayat enggau raban nembiak.
   
"Kami pechaya tiang pemun tiap bengkah menua endang bepanggai ngagai tikas pelajar raban nembiak sida," ku iya.

Iya madah, perintah meda tebuka ngagai proses demokrasi nuju sistme ke lebih liberal, ngambika penemu raban nembiak ulih dipending.

"Perintah mega deka terus berunding ngagai raban nembiak ngambika sida ulih terus nyadi sebagi ari orang ke nulung ngemansangka menua. Pekara tu beguna amat ngagai raban nembiak ke maya hari tu laban sida deka nyadi tuai ke megai menua tu jemah ila," ku iya.

Besaup nempa anak pandai sekula

"Kitai meseti nulung pangan diri, sekalika ari staf sekula tauka Gerempung Apai Indai Enggau Pengajar  (PIBG) ngambika juluk ngadaka anak bansa ke nyulut ulih nyadi nyata."
Sharifah Hasidah Sayeed Aman Ghazli
Seketeri Politik Kepala Menteri


KUCHING : Apai indai dilalau ngambika bebendar nyereta pengawa ke diatur sekula laban nya sebagi ari chara endur sida nemu pemansang akademik bala anak diri empu.

Seketeri Politik Kepala Menteri, Sharifah Hasidah Sayeed Aman Ghazli madah, sukung ari bala apai indai beguna amat laban nyaup ngemansangka pelajar bala anak sida ninting maya.

"Kitai meseti nulung pangan diri, sekalika ari staf sekula tauka Gerempung Apai Indai Enggau Pengajar  (PIBG) ngambika juluk ngadaka anak bansa ke nyulut ulih nyadi nyata," ku iya.

Iya madah munyi nya rambau ngabang Pengerami Gawai Ngiling Bidai ke diatur ba  Dewan Budiman Sekolah Kebangsaan (SK) Astana ba ditu kemari (Hari Enam).

Hasidah madah, kaul antara kedua-dua piak (apai indai enggau pengajar) endang beguna lalu patut seruran ditempa.

"Aku ngarapka rambai jaku 'segulai sejalai ngiling bidai ke dikena ba pengerami tu ulih nyadika tengau sereta dikingatka genap iku kitai dalam bejalaika tanggung pengawa ninting hari," ku iya.

Nya alai, Kaban Kunsil Negeri (ADUN) madahka, sema apai indai dituntung sesebangkah penanggul bekaul enggau bala anak sida dilalau ngambi ngenataika pekara nya ngagai PIBG, awakka isu nya ulih diputar begulai enggau bala staf sekula.

"Aram meh kitai ngetanka pengelantang enggau penemu ke seruran bebasaka pengan diri laban kitai endang idup begulai enggau mayuh bansa sereta agama," ku iya.

Nangkan ke nya, Tuai Projek Pengerami Nutup Gawai, Donald Raymond Suke madah, tu meh keterubah pengerami nutup Gawai diatur ba sekula nya begulai enggau bala apai indai nembiak.

"Taun siti nyin kemari, aku bisi ngatur pengerami tu tang enda besai iya nya semina ba 'kelas pendidikan khas', tang lebuh bala apai indai nemua aku bisi ngatur nya, sida madahka perambu ngagai komiti PIBG awakka ngatur pengerami nya besai-besai," ku iya.

Pengajar Pendidikan Khas nya madahka, timbal ari bala apai indai nembiak endang chukup manah lebuh program tu diatur.

"Program nya digulu semua staf sekula sereta nadai sekat ngagai barang sapa orang," ku iya seraya madah, ngarapka program nya ulih diatur baru ba taun-taun ke deka datai.

SK Astana ngembuan 656 iku nembiak sekula lalu 60 peratus ari pemnyampau nembiak ke belajar ba sekula nya endang bansa Dayak. Lalu nitihka Tuai Komiti Gawai, Donald Raymond Suke.tu ke terubah pengerami nutup Gawai diatur ba sekula nya begulai enggau semua pengajar sereta enggau apai-indai nembiak dia.

Sama bisi datai iya nya Kepala PengajarSK Astana, Zainal Abidin Selamat enggau Chairman PIBG SK Astana, Ustaz Busman Rambli.

Nulung Rayat

TULUNG ARI YB… Kunselor Jefferson Jamit Unyat ngarika Datuk Alexander Nanta Linggi nyuaka pemeri ngagai Tuai Rumah Agan sereta sida ti dituntung penusah angus ba Rh. Agan seraya dikemata kaban JKKK enggau staf opis perintah ba sebengkah pengawa ke diatur ba Kapit kena Hari Lima tu tadi.

Penyinu Datuk Alexander nulung mansa angus patut dichunto
   
KAPIT : Sapit Menteri Pemansang Menua Pesisir enggau Wilayah ti mega nyadi Kaban Parlimen Kapit, Datuk Alexander Nanta Linggi ensana (Hari Lima) nyuaka tulung 360 kampit beras (sekampit 5kg) ngagai 30 ruang bilik ke dituntung penusah angus ba Rumah Agan, KM3 Jalai Bukit Goram ditu.

Pengawa nyuaka barang tulung nya diatur ba sebengkah gudang ke diempu Sia Shui Poh ba Jalai Bleteh. Tuai Rumah Agan Minggat nyadi tuai ngarika bala sida serumah nerima barang tulung nya.

Sapit Walikota Majlis Daerah Kapit ti mega nyadi Sapitb Kepala Parti Pesaka Bumiputera Bersatu (PBB) Pampang Pelagus, Kunselor Jefferson Jamit Unyat ngarika Alexander Nanta nyuaka tulung barang pemakai nya ngagai sida ke dituntung penusah.

Ba pengawa nya, Jefferson Jamit madah, genap ruang bilik diberi 12 kampit berau tauka 60 kg dikena nulung ngelempungka peyuntuk sida lalu bantu endang kala disemayaka Alexander Nanta maya iya ngabas sida ke tasah angus nya suba.

Alexander Nanta maya ngabas sida rambau penusah angus suba bisi nyuaka tulung duit RM1,000 ngagai genap sepintu ruang bilik.

Bela bisi datai ba pengawa nyuaka barang tulung tu iya nya Kunselor Tapah Ata ti mega nyadi Tuai PBB Pampang Baleh, seiku pegawai Opis Tanah enggau Survei Kapit, Watson Awan, Pegawai Pemadah Daerah Kapit, Garai Entili, Chairman SADIA Kapit, Edward Manggah Kendawang enggau bala komiti JKKK Rh. Agan.

Rh. Agan angus lengis ba penusah ke nyadi pagi hari kena 10 Mei, 2013, ke ngujungka 30 pintu ruang bilik semina tinggal gari ba batang tubuh.

Nguna chara ke lebih dalam pengawa polis

  
TAWAU : Sapit Menteri Dalam Negeri Datuk Dr Wan Junaidi Tuanku Jaafar minta raban polis nguna chara ke lebih manah dikena ngubah pelaba penemu mensia mayuh ti enda manah ngagai raban sida.
  
Iya madah, ngena Prosedur Operasi Standard (SOP) bedau tentu ulih mutarka pekara nya nyengkaum ngena media alternatif enggau media arus perdana dikena madahka ngagai mensia mayuh bekaul enggau tanggungpengawa sereta enggau pemujur tim nya.

"Padahka tanggung pengawa polis, terus bepun enti udah pansut ari palan latih lalu kitai patut madah semina orang ke beamat-amat nya ulih kena pilih masuk nyadi polis," ku iya rambau pengerami makai malam ngerami iya ba ditu malam Hari Lima tu tadi.
  
Dr Wan Junaidi madah, taja pan seribu pekara manah digaga enggau mujur dikereja raban polis tang enti sekali sida ngereja pengawa jai semua utai ke manah nya deka padam magang.
  
"Kes jenayah baka ngeruntun enggau enchuri ke nyadi endang disebar taja pan penyampau kes nya majak kurang, udah nya pemarai bala polis ke udah ngetanka menua enda dipeduli," ku iya.
  
Mensia mayuh, ku iya patut madah enggau lengkaa bekaul enggau nama-nama penusah ke nyadi ukai semian ulih dikena nulung mensia mayuh tang mega ulih nulung nulak sagam penemu ke enda manah orang ngagai raban polis.
  
Iya mega muji penau raban polis bejalaika operasi Op Daulat ngena chara dalam ngenataika berita pemansang ngagai mensia mayuh. Bernama.

Terus beserakup nengah aktiviti gerija

SELAMAT ULANG TAUN…Dennis Ngau begulai enggau Steven Lun anak Langidai sereta bala kaban gerija begulai melah kek Ulang Taun Ke-47 Anglican Chapel Epiphany Marudi.

MARUDI : Pengawa gerija endang nyadi palan endur nempa pemereti ati sereta alai begulai baka diri sebilik antara mensia mayuh, ku Kaban Kunsil Negeri Telang Usan Dennis Ngau.

Kitai ke nyadi orang Kristian, ku Dennis patut terus bebendar nyukung ngemansangka pengawa gerija laban dunya diatu chukup mayuh penguji.

Iya madah perintah udah meri kitai peluang iya nya pemilih diri endur bejalaika pengawa pengarap tang taja baka nya orang Kristian patut seruran bejimat laban mayuh penguji ke enda disadang nganti ba mua.

“Nengah media sosial mayuh utai ke tau ngeruga pengeliat ati kitai lalu aku ngarapka bala raban nembiak enda mudah tepejuh ketegal media sosial nya laban tau ngerusak pendiau diri," ku iya.

Dennis madah, siti ari chara dikena nyeliahka diri ari tepejuh enggau pengawa ke baka nya, iya nya negapka pemereti ati semina merening ngajai jalai Tuhan laban daya pengidup iya meh tau nyadi ke tengau sereta lalau dalam pengidup kitai.

Dennis madah munyi nya rambau Pengerami Makai Malam ke diatur Anglican Chapel Of  The Epiphany Marudi bepalan ba sebengkah restauran ba ditu malam Hari Minggu tu tadi.

Pengerami malam nya berambaika jaku Malam Serumpu Makai, Dennis nesau bala kaban gerija enggau bala nembiak terus nempa pemanah ulah awakka terus nyadi orang ke menyana lalu iya madahka diri ke nyadi pengari rayat endang tetap nyukung sebarang pengawa ke diatur kaban gerija.

Berebak enggau nya, Dennis madah, rayat ba Menua tu kelebih agi ba Baram patut meri terima kasih ngagai Tuhan laban sida ke ari mayuh pupu raban bansa ulih segulai sejalai enggau pangan diri taja pan bebida bansa enggau jalai pengarap lalu enda baka utai ke nyadi ba menua luar.

“Aku ngarapak mensia mayuh ari pupu raban bansa ditu ulih ngerapitka kaul laban pengawa gerija endang dikena nempa penyerakup," ku Dennis.

Berindik ari nya, Dennis minta mensia mayuh ari pupu raban bansa terus nyukung bala ketuai ba menua tu ngambika menua terus lantang endur diau.

Ba pengerami nya, Dennis nyadak agih belanja ungkup Projek Mit Menua Pesisir (MRP ) RM5,000 ngagai gerija nya. Bela bisi meri jaku lalau ba pengerami tu iya nya Chairman Anglican Chapel Epiphany Marudi ti mega nyadi Chairman Pengatur Pengerami Steven Lun anak Langidai.

Bela bisi datai iya nya Pegawai Daerah Baram Joseph Belayong, Pegawai Opis Pemadah Marudi Joseph James, Rev. Father Gerija Lutong Fr. Donald, Chairman Opis Peladang Menua Baram Blalang anak Atom enggau bala tuai-tuai raban bansa.

Raban OKU beterima kasih ke tulung ari Dennis Ngau

MARUDI : Bisi enam iku Orang Timpang Pendiau (OKU) ari Rh. Mendiang Silat anak Beriak di Sg. Pasir nerima bantuan barang pemakai enggau tulung kerusi roda ari Opis Sosial enggau Pengelantang Pendiau Kunsil Negeri (DUN) Telang Usan.

Pengawa nyuaka barang bantu nya dipenyadi Chairman iya ti mega nyadi Kaban Kunsil Negeri Telang Usan Dennis Ngau lebuh iya nemuai ngabas rumah panjai nya ensana (Hari Minggu).

Antara sida OKU ke bisi nerima bantu tu iya nya Matius Louis, adik Olivia Seruji, Roselind Muli, Simdang anak Sanyah, adik Bawit enggau adik Bernard.

Nya alai, ba penemu Roselind Muli, 38 ke udah kejung kenyau lebih 10 taun ke udah, pemeri kerusi roda nya endang manah amat lalu iya meri besai terima kasih ngagai Opis Sosial enggau Pengelantang Pendiau Kunsil Negeri (DUN) Telang Usan laban udah mandangka penyinu ati ngagai sida.

“Aku enda ulih tebelika kerusi roda ke chukup beguna ngagai aku nya alai aku minta tulung Opis Sosial enggau Pengelantang Pendiau Kunsil Negeri (DUN) Telang Usan ” ku Roslind.

Nitihka penerang Roslind kerusi roda ke dikena iya ngelama tu udah rusak lalu iya meri besai terima kasih ngagai pengari rayat Telang Usan Dennis Ngau ke udah nyaut peminta iya senentang kerusi roda.

Lebuh dirandau Utusan Sarawak, sebedau kejung, Roslind kala gawa ba Menua Brunei kenyau ari ebumur 18 taun, maya nya iya agi dapat bejalai.

Taja baka nya, Roslind madah, udah umur iya 18 taun enda mukai-mukai kaki iya pedis lalu ngujungka iya enda ulih engkebut nyentuk ke kejung.

Beri peluang baru ngagai orang ke kala ngereja penyalah

SIMBOLIK...Datuk Francis Harden (dua kiba) begulai enggau temuai ke bukai bejadi pengawa Ngiling Bidai beserimbai enggau Pengerami Hari Gawai Tikas Penjara Negeri Sarawak ba Dewan Suarah Sri Aman, apin lama ke udah.

SRI AMAN : Semua orang patut ngembuan tanggungjawap ke sebaka iya nya besaup mulaika pemanah ulah ngagai orang ke kala ngelanggar undang – undang ba menua tu, ku Penulung Menteri Pemansang Menua Pesisir enggau Pengawa Berumah, Datuk Francis Harden Hollis.

Iya madah pengawa ke baka nya endang patut digaga gerempung ukai perintah (NGO) enggau mensia mayuh awakka ulih nerima baru raban orang ke kala ngereja penyalah awakka menua tu terus lantang sereta likun.

"Tanggung pengawa tu selalu digaga opis rumah jil. Taja baka nya tanggung pengawa opis rumah jil ke deka mulaika penyalah raban orang tu puntan enti sema mensia mayuh enggai nerima penatai sida.

“Nya alai, aku minta semua raban bansa enggau NGO bejalaika aktiviti dikena meri peransang ngagai orang ke kala ngelanggar undang-undang dalam nempuh pengidup ke lebih menuku udah tu," ku iya.

Iya ti mega nyadi Kaban Kunsil Negeri (ADUN) Simanggang madah munyi nya rambau bejadi Pengerami Hari Hawai Tikas Rumah Jil Negeri Sarawak ba Dewan Suarah Sri Aman apin lama ke udah.

Nangkan ke nya, Harden mega ngelalau mensia mayuh ngambika terus nyukung oengawa perintah dalam ngelakuka penyelai adat lama ke bisi dikembuan pupu raban bansa ba negeri tu.

"Batang tuju iya dikena ngangkatka tikas sosioekonomi sida. Nengah promosi ke baka tu ngujungka tebuka peluang ekonomi ngagai mensia mayuh baka dagang temuai inap desa enggau Industri Mit Enggau Jelan Pemesai (IKS) ba menua sida.

“Kami ngarapka pengawa ke baka tu ulih terus nyukung genap iku rayat nyengkaum ba Sri Aman dalam ngangkatka tikas pengidup sida,' ku iya.

Dulu ari nya, pengerami ke bisi digulu Pengarah Opis Rumah Jil Sarawak Abdul Karim Rais dirami enggau aktiviti Pekit Kumang, Pekit Keling, pengawa Ngetas Ranyai enggau belagu karaoke.

YKN nulung anak bujang berani

NULUNG KITA...Datuk Hajah Rohani Abdul Karim nyuaka replika cek YKN RM20,000 ngagai Leftenan Kolonel Zamsari Abu Hassan rambau "Majlis Permuafakatan Ibubapa Guru Dan Sarana Ibubapa" ba  Dewan Perkasa SK Kem Pakit Sri Aman sehari tu.

"Tulung ke diberi nengah Skim Prihatin nya kebendar iya dikena meransang bala apai indai enggau mensia mayuh nempa penyulut bala anak dalam pelajar sekula enggau aktiviti kokurikulum kelebih agi ngagai bala anak bujang berani ke gawa ba Lahad Datu, Sabah."
Datuk Hajah Rohani Abdul Karim
Menteri Pemansang Orang Indu, Ruang Bilik enggau Raban Bansa


SRI AMAN : Pengelantang pendiau raban anak bujang berani diperundingka Yayasan Kebajikan Negara (YKN) pengudah ke meri tulung RM20,000 ngagai Gerempung Apai Indai enggau Pengajar (PIBG) Sekula Primari (SK) Kem Pakit Sri Aman.

Tulung ke diberi nengah Skim Prihatin nya kebendar iya dikena meransang bala apai indai enggau mensia mayuh nempa penyulut bala anak dalam pelajar sekula enggau aktiviti kokurikulum kelebih agi ngagai bala anak bujang berani ke gawa ba Lahad Datu, Sabah.

Pemeri nya disuaka Menteri Pemansang Orang Indu, Ruang Bilik enggau Raban Bansa, Datuk Hajah Rohani Abdul Karim ngagai Pegawai Memerintah 13 RAMD Kem Pakit Sri Aman, Leftenan Kolonel Zamzari Abu Hassan ba sekula nya tadi.


Dulu ari nya, Rohani diberi basa bejadi "Majlis Permuafakatan Ibubapa Guru Dan Sarana Ibubapa" ba Dewan Perkasa sekula nya lalu iya madahka pendiau ruang bilik ke manah tau nulung ngemansangka menua tu maju agi.

Antara pengawa ke digaga perintah nengah Opis Menteri Pemansang Orang Indu, Ruang Bilik enggau Raban Bansa dikena nyapai juluk nya ku
iya baka "Program Ilmu Keluarga" enggau "Program Parenting".

“Tu nyengala dipeda pengudah 9,084 buah Program Ilmu Keluarga dipejalai kenyau ari taun 2006 nyentuk ngagai bulan March taun 2013 dikena nambahka pengelandik bala apai indai, pengawa ngemanahka institusi ruang bilik sereta ngemansangka raban nembiak dikemerat awakka nambahka pengeliat ati sida.

"Udah nya, kira 553 buah Program Parenting udah dipejalai kenyau ari taun taun 2006 nyentuk ngagai bulan March taun tu dikena nambahka pengelandik bala apai indai enggau ngaduka penanggul ke bisi nuntung bala anak maya ba rumah," ku iya.

Kelimpah ari nya, iya ngelalau bala kaban Gerempung Apai Indai enggau Pengajar  (PIBG) bejalaika tanggung pengawa dalam ngetaika penemu ngagai perintah udah tu.

"Ambika banding enda semua orang nemu bisi subsidi dikena sida beperesa momogram (beperesa tumu riman tusu) ke disediaka raban Opis Rayat Enggau Pemansang Ruang Bilik Menua (LPPKN).

“Ditu raban PIBG tau dikena meri peransang ngagai bala indai nembiak ke nyadi kaban PIBG awakka datai ngagai klinik LPPKN ke semak awakka tau bulih servis nya udah tu," ku iya.

Bela bisi datai iya nya Kepala Pengarah LPPKN, Dr. Siti Norlasiah Ismail, Kepala Pengarah, Opis Pemansang Orang Indu, Datin Munirah Abdullah Bajanuddin enggau Kepala Pengajar SK Kem Pakit, Sri Aman, Nassir Nerawi.

PDRM bebendar munaska penyalah judi siber

ALVESTER BIGOL SULANG

KUCHING : Polis Diraja Malaysia (PDRM) Sarawak kala nyerebu 370 palan siber ba serata negeri tu ba taun siti ke udah, ku Menteri Ba Opis Kepala Menteri (Menteri Pengawa Khas), Datuk Amar Haji Adenan Satem.

Berindik ari nya mega, kira 674 pengempu palan-palan siber udah mujur ditangkap sereta 2,435 buah komputer bela dirampas nyengkaum penyampau duit RM79,715.90.

Udah nya, naka bulan April taun tu polis udah nyerebu 155 palan lalu 273 pengempu palan siber mujur ditangkap.

Polis mega mujur ngerampas 1,153 buah komputer nyengkaum penyampau duit RM28,500.

Adnan madah munyi nya lebuh nyaut isu judi siber tauka "cyber gamping" ke kala dikenataika sekeda YB (Yang Berhormat) rambau Aum Besai Kunsil Negeri (DUN) Ke-17 Renggat Ketiga ti diatur ba Opis DUN Baru ditu kemari (Hari Dua).

Nangkan ke nya, ku Adnan antara atur pengawa  ke dikereja raban PDRM Sarawak dikena munaska penyalah judi siber iya nya; nawa pengempu tauka pekereja premis sereta pengguna premis ke ditangkap lebuh bejudi online nitihka ARJT (Akta Rumah Judi Terbuka).

Udah nya, bekerejasama enggau Opis Perintah Pelilih Menua (PBT) segulai nyerebu aktiviti bejudi online.

Polis mega bekerejasam enggau opis bukai baka SESCO enggau Lembaga Ai nyerebu lalu nutup terus premis enggau chara motong bekal elektrik enggau ai.

Ngatur kimpin besai-besai nyebar media massa enggau chelak pangka enda manah aktiviti bejudi.

Nawa pengempu premis nitihka Ordinan Hiburan iya nya bejalaika dagang enda ngena lisen.
 Seruran matau premis-premis mesin judi, ku Adnan.

250 tanah NCR udah tembu disukat

ALVESTER BIGOL SULANG
KUCHING : Kira 250 kandang endur tanah Temuda Asal Bumiputera (NCR) ke mungkur 334,144 hektar udah tembu disukat kelinggi perintah nengah Opis Tanah enggau Survei, ku Menteri Ba Opis Kepala Menteri (Menteri Pengawa Khas), Datuk Amar Haji Adenan Satem.

Adnan madah, ari penyampau nya bisi 134 kandang endur ke mungkur 167,945 hektar tanah udah digazet nyadi Rizab Gunasama Bumiputera (Pengawa Betanam Betupi) nitihka atur Seksyen 6 Kanun Tanah Negeri.

"Inisiatif tu udah meri penguntung ngagai semua raban bansa Bumiputera ba Sarawak. Ari penyampau nya mega, 95 kandang endur ke udah digazet udah disua ngagai tuai raban bansa Bumiputera.  Udah nya, 39 agi deka disua enda lama agi," ku iya.

Iya madah munyi nya rambau Aum Besai Ke-17 Renggat Ketiga bepalan ba Opis Kunsil Negeri Baru (DUN), Petra Jaya ba ditu kemari (Hari Dua).

Adnan madah, naka bulan April 2013 Opis Tanah enggau Survei bisi nerima 575 peminta ngasuh tanah disukat. Ari penyampau nya, bisi 377 peminta ke mungkur kandang endur 616,091 hektar udah bulih pemendar ngambika disukat lalu 198 peminta agi benung diadu.

Taja baka nya, ku iya pengawa ke dikereja perintah nya dipusinka raban orang ke nadai betanggungjawap ke ngumbai perintah deka ngerampas tanah NCR ungkup rayat.

Pekara ke baka nya ngujungka pengawa ke deka digaga perintah nyau tejanggal, ku Adnan.

"Berindik ari nya, perintah nengah Opis Tanah enggau Survei deka terus meri penerang ke terang bekaul enggau pemanah inisitif tu," ku iya seraya ngasuh semua YB (Yang Berhormat) bela bebendar meri penerang senentang juluk perintah ngagai rayat.

Sebedau tu, NCR ditumbuh laban nitihka peminta rayat ke ngasuh tanah NCR sida disukat.

Udah nya, nyadika tanda dikena perintah ngangkatka status NCR dipenggi rayat Bumiputera Sarawak sereta dikena nyamin tanah (security of tenure) ngagai pengempu-pengempu tanah NCR.

Kes ngeruntun enggau enchuri seruran dikemeratka polis

ALVESTER BIGOL SULANG

KUCHING :  Kes ngeruntun enggau enchuri kereban pengangkut ba negeri endang seruran dikemeratka raban Polis Diraja Malaysia Sarawak, ku Menteri Ba Opis Kepala Menteri (Menteri Pengawa Khas), Datuk Amar Haji Adenan Satem.

Iya ngemansutka penerang nya ungkup Kaban Kunsil Negeri (ADUN) Repok enggau Kidurong beserimbai enggau Aum Besai Kunsil Negeri (DUN) Ke-17 Renggat Ketiga ti diatur ba Opis DUN Baru ditu kemari (Hari Dua).

"Antara pengawa ke digaga raban PDRM dikena mutarka penanggul tu iya nya ngemayuhka pengawa matau MPV sereta nambahka "police omini-presence" enggau bejalaika pengawa nyubuk.

"Kelimpah ari nya, PDRM Sarawak mega deka terus bebendar nyubuk pengawa jenayah begulai enggai agensi bukai setipak enggau Chara Tasik Biru tauka "Blue Ocean Strategy", ku iya.

Adnan madah, PDRM Sarawak mega bung bebendar bekimpin nagang penyalah enggau 'anti-crime patrol ba  kandang endur ke suah nyadi kes jenayah.

Ngenang isu polis 'One Stop Centre ke dikenataika ADUN Pending, raban PDRM Sarawak bisi nerima penerang senentang pekara nya lalu deka ngaga atur dikena mutarka iya.
"Tu nyengkaum nyediaka perengka guna ke engkeman sereta diadang meri pemuntang ngagai mensia mayuh betemu enggau polis," ku iya.

Adnan mega madahka, naka ke diatu bedau bisi perambu ngaga langkau polis ba Pasar Lapok, Tinjar.
Iya ngemansutka pekara nya bekaul enggau peminta ADUN Telang Usan ke ngasuh langkau polis digaga ba Pasar lapok Tinjar.

"Taja baka nya, enti sema bisi begunaka polis, chara ke dikena iya nya nganjung polis ke gawa ba Long Lama tauka Beluru ngagai endur nya," ku iya.

Opis imigresen Bario enggau Ba'Kelalan udah dikemendar

ALVESTER BIGOL SULANG

KUCHING : Opis Penyaga Antara Menua, Bario udah bulih pemendar sereta diangkat nyadi Opis Mikro Opis Menteri Dalam Negeri (KDN) ba sebuah taba baru ke ngembuan 1.2141 hektar pemesai, ku Menteri Ba Opis Kepala Menteri (Menteri Pengawa Khas), Datuk Amar Haji Adenan Satem.

Iya ngemansutka penerang nya ungkup Kaban Kunsil Negeri (PKR- Ba'Kelalan) Baru Bian rambau Aum Besai Kunsil Negeri (DUN) Ke-17 Renggat Ketiga ti diatur ba Opis DUN Baru ditu kemari (Hari Dua).

Adnan madah, opis imigresen nya berengkah digaga kena 1 Ogos 2012 lalu beungkus RM18.4 juta.

"Timpuh projek tu dipejalai 30 bulan lalu dipelabaka tembu bulan Januari 2015. Opis tu ila deka ngengkahka bala staf ari Opis Imigresen sereta staf opis bukai dalam KDN baka Opis Kastam enggau Pos Malaysia," ku iya.

Udah nya, Adnan madah ungkup Opis  Penyaga Antara Menua Ba'Kelalan, Opis Imigresen udah tetemuka taba 3.16 ekar ba Punang Kelalan.

Projek tu deka diperambuka baru ngambika digaga nengah Rolling Plan Ke-4 dalam Langgur Pemansang Malaysia Lumpar Ke-10.

"Naka tu, bisi tiga iku kaban Opis Imigresen udah berengkah bejalaikaka pengawa bepun 3 Januari 2012  nguna palan endur bemalam enggau "army check point", ku iya.

Nangkan ke nya, Adnan madah antara atur pengawa ke digaga dikena nyamin pengelikun ba semua pintu penama ba antara menua di negeri tu iya nya; Polis Diraja Malaysia (PDRM) enggau Raban Soldadu Menua (ATM) neritka atur pengelikun enggau matau semua pintu penama ba antara menua.

Naka ulih ngumpul penerang pansik, nambahka penyampau PDRM enggau ATM nyaga antara menua.
Nambahka pengawa betukar penerang pansk pengelikun antara PDRM, Polis Brunei, kalimantan Timur enggau Kalimantan Barat sereta ngaga pansik baru senentang tanggung pengawa raban pengelikun ke nyaga antara menua.

SPNB nulung ngemujurka projek rumah ba Sarawak

ALVESTER BIGOL

KUCHING : Kompeni Pengawa Berumah Menua Berhad (SPNB) udah ngatur Pengerami Mantar Bejadi Projek Berumah Vista Perdana Fasa 2, Miri bepalan ba sebuah hotel tebilang ba ditu malam ensana (Hari Minggu).

Menteri Pengawa Berumah enggau Menteri Dagang Temuai, Datuk Amar Abang Johari Tun Openg diberi basa bejadi pengerami sereta lalu nyuaka replika kunchi ngagai pengari Serakup Pengajar-Pengajar Bumiputera Sarawak.

Sama bisi datai ba pengerami tu iya nya Sapit Menteri Sains, Teknologi enggau Inovasyen Datuk Haji Fadillah Yusof, Penulung Menteri Pengawa Berumah Datuk Francis Harden Holis enggau Datuk Abdul Karim Rahman Hamzah, Chairman SPNB Datuk Wira Ir. Idris bin Haji Haron, Pengarah Pengatur Pengwa SPNB Dato' Dr Sr Kamarul Rashdan Salleh, bala Kaban Lembaga Pengarah SPNB, raban staf SPNB enggau bala pengari Serakup Pengajar-Pengajar Bumiputera Sarawak.

Nitihka surat penerang ngagai media, SPNB deka berengkah nyual 789 unit rumah ba Vista Perdana Fasa 2 di Miri enggau chara berenggat-renggat.

Projek Vista Perdana tu nyediaka rumah ti digaga bechampur dalam sebuah genturung pendiau kira 296 ekar pemesai.

Entara bansa rumah enggau penyampau rumah ke bisi digaga SPNB ba genturung pendiau Vista Perdana tu iya nya 322 unit Rumah Teres Selesa Setingkat ; 750 kaki pemesai, Teres Idaman Setingkat ; 850 kaki pemesai (309 unit), Idaman Berkembar Setingkat ; 1177 kaki pemesai (144 unit), enggau Banglo Idaman Setingkat ; 1276 kaki pemesai (14 unit).

Ba pemansang ke sebaka, SPNB udah mujur mutarka penanggul ke nuntung Projek Taman Desa Guru Sarawak (TDGS)  ke bepalan ba Lot 2493, Blok 14, Jalai Sultan Tengah, Petra Jaya ba ditu.
Projek TDGS tu berengkah digaga Koperasi Perumahan Pegawai Perkhidmatan Pelajaran Bumiputera Sarawak Berhad (KPPPPPBSB) ba taun 1995 tang tejanggal maya taun 1996.
Penyampau rumah ke digaga dalam projek TDGS iya nya lapan unit Rumah Banglo Setingkat Baiduri, 24 unit Rumah Begembar Setingkat Mutiara, 10 unit Rumah Banglo Setingkat Nilam, 11 unit Rumah Banglo Setingkat Delima.

Lebuh bejaku ba pengerami tu, Datuk Wira madah asil kerejasama SPNB enggau perintah negeri Sarawak kira 43 ari 53 unit rumah ba TDGS udah mujur digaga sampai tembu.

Pengawa nyambung projek berumah tu bepun 9 June 2009 pengudah ke bulih "Occupational Permit " ari Dewan Bandaraya Kuching Utara.

SPNB sebuah kompeni ke diempu Opis Menteri Wang (MOF. Inc.) ti bebendar nyediaka rumah ke ulih dibeli rayat Malaysia nengah mayuh bengkah program iya nya Program Rumah Mampu Milik (RMM), Program Rumah Mesra Rayat (RMR) enggau Program Pemulihan Perumahan Tebengkalai (PPPT).
Dalam program RMM, SPNB bebendar nembuka 29 buah projek berumah ke mungkur 15, 239 unit rumah ba serata menua tu.

Mensia mayuh ke deka nemu penerang ke silik bekaul enggau SPNB tau peda ba laman web www.spnb.com.my tauka betanya ngagai pengatur pengawa ngena lumur 03-2618 5448/5855/5879 tauka nengah email pr@spnb.com.my.

Beri peluang ngagai orang jil berubah

ALVESTER BIGOL  SULANG

MAMBONG : Kira 10 iku orang jil ke ditan ba Kompleks Penjara Puncak Boneo udah dipilih betemu  enggau sebilik berami ngintu Gawai Dayak beserimbai enggau  'Program Jalinan Kasih Gawai Dayak Zon Sarawak 2013'.

Sapit Menteri Pengeraja Asal Enggau Rampa Menua Datuk Dr James Dawos Mamit madah, taja pan awak diberi enda lama ungkup sida (orang jil) betemu enggau diri sebilik tang program ke baka nya meri reti ke chukup besai.

"Nengah program ke baka tu kaul orang jil enggau diri sebilik ulih diterit sereta meri peransang ngagai sida ngereja pengawa ke manah pengudah lepau ari rumah pasung jemah," ku iya.

Dawos madah munyi nya ba jaku iya ti dibacha TKPJ Abdul Kadir Rais lebuh ti bejadi 'Program Jalinan Kasih Gawai Dayak Zon Sarawak 2013' bepalan ba Kompleks Penjara Puncak Boneo ba ditu, kemari (Hari Dua).

Nangkan ke nya, ku iya jai-jai baka ni pan anak, apai tauka indai sida tetap darah getah kitai. Nya alai, kitai patut meri jaku peransang sereta ngelalau sida ngereja ulah ke manah ngambika enda agi tepejuh ngagai ulah ke enda menuku.

 "Aku ngarapka ruang sida tu ulih nerima kaban belayan kita ke udah masuk jil enggau ati ke tebuka jemah.
"Kebuah penyampau residivis tauka ex orang jil tu tama baru ke rumah pasung laban orang ke sebilik enggaus ida enggai nerima sida.

"Anang ngiarka sida ketegal sida udah ngereja penyalah, tang saup sida endur nunjukka diri ulih berubah nyadi orang ke betanggungjawap," ku iya.

Kaban Parlimen Mambong tu mega ngarapka aktiviti-aktiviti ti digaga Opis Rumah Pasung Malaysia ulih disukung Gerempung-Gerempung Ukai Perintah (NGO), Opis Menteri tauka agensi perintah, ruang bilik, orang jil enggau mensia mayuh.

Bela bisi datai ba pengerami tu bala pegawai kaban opis rumah pasung, tuai-tuai raban bansa, pengulu-pengulu, ruang bilik orang ke dijil sereta bala orang ke dijil.

Pemakai enggau ai irup maya Gawai Dayak

KOTA SAMARAHAN : Gaya pendiau pengidup ba Lorong 8 Desa Ilmu, Kota Samarahan, ke beplan ba 30 kilometer ari Bandar Kuching, dipeda baka ke nadai bida engau genturung pendiau ke bukai.
   
Taja baka nya, tebal agi sida ke diau dia ending bansa Iban lalu ngembuan penyelai ke diri empu laban ke landik ngaga ai tuak.
   
Seiku ari sida ke diau dia iya nya Cecilia Adam, 44, diatu 10 taun iya udah landik ngaga tuak lalu iya madahka pemuas ati ngirup ai gaga diri empu ari ke dibeli sebelah kedai.
   
Iya suah gaga ai tuak maya nitihka laki iya, Malin Kaya,seiku ex soldadu ba Kluang, Johor, Cecilia diatu ngaga ai tuak ungkup sida sebilik, taja pia iya enda nulak nyema bisi orang minta digagaka tauk tauka meli tuak ari iya.

   
    TUAK ENGGAU GAWAI DAYAK
   
   
Iya belajarka penemu ngaga ai tuak nya ari indai enggau inik iya empu. Cecilia datai ari Sri Aman madah, ai tuak ending nyadi ai ke meseti diirup tiap kali datai pengerami Gawai Dayak.
   
Gawai Dayak ending sebenglah pengerami ke besngkut paut enggau [engawa ngetau padi bagi raban bansa Dayak dikena nandaka terima kasih ketegal jereki ke udah diulih sepemanjai taun.
   
Ungkup pengerami Gawai Dayak taunt u ke disambut kena 1 enggau 2 Jun, iya udah ngembuan stok tuak kenyau ari sebulan ke udah.
   
"Kebendar iya tuak digaga ari berau pulut ke diperam. Tuak ke nyamai balat bepanggai ba pengelandik seiku-seiku ke ngaga iya.
   
"Ngaga tuak meseti tumu, kadang-kadang du bulan sebedau pengerami. Meram tuak endang pengawa ke terubah laban tuak ke nyamai begunaka timpuh ke chukup,” ku iya.
   
Tuak digaga ari berau pulut, gula enggau chiping ke diperam dalam timpuh ke lama, pengawa ngaga tuak tebal agi digaga sida ke indu lalu meseti nitihka adat enggau penti pemali nyema deka ngaga ai tuak ke nyamai.

   
Taja baka nya, Cecilia ngembuan resia ke diri empu dalam ngaga ai tuak ke nyamai.
   
"Simpan tuak ke udah tembu digaga dalam botol arak ke udah dikena, tuak nya deka nyamai sereta nyelai ari ai bukai,” ku iya.
   
   
PENTI PEMALI
   
   
Taja pan udah lama sereta teleba ngaga ai tuak,
Cecilia ngaku tuak ke digaga iya kala enda nyadi sereta kala asai masam.
   
"Bisi penti pemali maya ngaga tuak. Antara penti pemali ngaga tuak iya nya orang indu ke benung datai kain enda tau ngaga tuak, enti digaga maya nya tuak ke digaga nya tau jelungan,” ku iya.
   
Cecilia madah, seiti agi penti pemali maya deka ngaga tuak iya nya enda tau nyimpan tuak dalam benda ke udah kala endur nyimpan garam tauka barang pemakai ke masin laban tuak ke digaga tau masam.

"Orang ke benung ngaga tuak mega enda tau negu pemakai enggau utai irup ke masam,” ku iya.
   
   
   
PENGANAN JALA
   
   
Ba sebuah rumah bukai ba urung ke sebaka, Dilam Segili, 54, ngembuan peneleba enggau pengandik ngaga penganan jala lalu suah mega dikanggauka orang ngajar chara ngaga penganan nya.

Maya penulis datai ngelawa iya, Dilam benung ngajar lima iku pangan iya ngaga penganan jala tauka dikumbai kuih karas ba Semenanjung.
   
Dilam madah, penganan jala endang sebengkah pemakai tradisional bansa Iban lalu nyadi pemakai ke meseti dibantai maya pengerami Gawai Dayak.
   
"Penganan jala enda jauh bida enggau kuih laras ba Semenanjung, semina ba
Sarawak bisi gula apong ke digaga ari mulung,” ku iya.

Kelimpah ari asai iya ke nyamai, chara ngaga penganan jala mega chukup nyelai.
   
Tepung ke tembi dilumai diengkah dalam tachu ke ngembuan mayuh lubang mit, tachu tu ditancang ba sebatang kayu panjai ke ngembuan pemegai, udah nya kayu tu digantung ngena yali panjai ba perabung rumah dikena ngurangka jari penat maya deka ngoreng penganan.

Setipak enggau gaya rumah pengabang ke sebaka enggau konsep 1Malaysia, pengawa mantaika pemakai tradisi baka tuak enggau penganan jala endang antara pemakai ke pemadu manah dibantai ngagai temuai ke bisi datai ngabang Gawai Dayak.

BN malas pemanah rayat

"Taun baru nyin ila, perintah deka nambahka penyampau agih belanja RM30 juta dikena ngemujurka pengawa nyukat kelinggi tanah NCR."
 Datuk Patinggi Mohd. Najib Tun Abdul Razak
Menteri Besai

ALVESTER BIGOL SULANG

BUKIT SABAN : Menteri Besai Datuk Patinggi Mohd. Najib Tun Abdul Razak madahka pengaga ati meda sukung ari semua pupu raban bansa ke bisi ngulu Rumah Panjai Wilson ak Bekir, Penom Ulu Paku, Betong.
Iya madah, tuju penemuai ke rumah panjai laban deka meri Selamat Gawai Dayak ngagai semua raban bansa Iban ke diau ba kandang menua nya.

"Aku ulih datai ba pengerami ke besai-besai ba menua Kuching aja tang enda chukup enti aku enda datai ngagai rumah panjai," ku iya.

Najib madah munyi nya rambau Pengerami Ngabang Gawai Dayak ke diatur ba Rumah Panjai Wilson ak Bekir, Penom Ulu Paku ba ditu kemari (Hari Minggu).

Nangkan ke nya, Ku Najib rumah panjai endang nyadi chermin pesaka bansa, sejarah menua kitai sereta mandangka adat asal bansa Iban ke nyadika tiang pemun pengering Barisan Nasional (BN).
"Pekara tu nadai bida enggau tiang belian ke mengkang bediri tegap ba rumah panjai tu kenyau ari taun 1926," ku iya.

Najib mega bisi ngelansa senentang pemujur BN ke udah menang dalam Pengawa Bepilih Besai Ke-13 (PRU13) apin lama ke udah.

Pemutus undi majoriti ke udah ulih perintah BN, ambika chunto ungkup Parlimen Betong ku iya endang terang mandangka pengarap rayat ngagai BN awakka terus megai perintah menua tu.

"Endang patut aku ke nyadi tuai BN datai ngabas rayat ba menua pesisir, pia mega kami (BN) sigi enda nempayaka sukung rayat ari menua pesisir. Udah nyadi tanggungjawap kami endur ngemansangka pengidup enggau pendiau rayat," ku Najib.

Nangkan ke nya, ku Najib taun tu Sarawak deka nyambut pengerami 50 taun udah merdeka dalam Malaysia lalu iya melabaka Sarawak enda nyepi pengelantang ke baka tu enti sema enda enggau numbuhka Malaysia.

"Semua penguntung dibagi bela-bela, pekara ke kurang deka ditambah, pekara ke nadai deka diberi, " Ku iya ti lalu madahka semua pekara ke deka diberi nya bisi dalam aku janji BN ungkup tempoh lima taun ke deka datai tu.

Pekara keterubah digaga iya nya maduka mayuh pengari ari Sarawak dalam kabinet perintah besai.
"Tu siti rikod baru laban tujuh iku pengari ari Sarawak udah dipilih nyadi menteri enggau penulung menteri ba kabinet perintah besai.

"Udah tu menua Sarawak deka majak tampak rita laban ke nerima sukung ke chukup manah ari mensia mayuh ngagai perintah BN.

Dikena malas pemanah rayat nya aku deka terus meri bantu iya nya meri utai ke dikinginka rayat.

Ngelama tu, perintah besai udah ngungkupka RM 60 juta dikena ngemujurka projek nyukat kelinggi tanah temuda asal Bumiputera (NCR) awakka tanah ngembuan surat pala lalu nadai ulih dikachau orang bukai.

Taun baru nyin ila, perintah deka nambahka penyampau agih belanja RM30 juta dikena ngemujurka pengawa nyukat kelinggi tanah NCR, ku iya.

Bela bisi datai ba pengerami tu iya nya bini Menteri Besai Datuk Amar Datin Sri Rosmah Mansur, Sapit Kepala Menteri Datuk Patinggi Tan Sri Alfred Jabu Numpang enggau bini iya, Menteri Pemansang Industri enggau Rampa Menua Kedua Datuk Amar Awang Tengah Ali Hasan, Menteri Pengawa Ladang Enggau Komoditi Datuk Sri Dauglas Uggah Embas, Menteri Kereja Raya Datuk Haji Fadillah Yusof, Menteri ba Opis Menteri Besai Hajah Nancy Shukri, Kaban Kunsil Negeri (ADUN) Bukit Saban Robert Lawson Chuat, ADUN Saribas Razi Sitam, Kaban Parlimen Lubok Antu William Nyalau Badak, Tuai Rumah Wilson Bekir, tuai-tuai opis perintah, tuai-tuai raban bansa enggau mensia mayuh ke semak menua nya.

Pengidup senang berekat pemansang

"Sepemanjai nyadi Kepala Menteri dalam pengelama 32 taun, aku berasai puas laban meda pengidup rayat enti suba mayuh seranta tang diatu nyau majak senang berekat ari pemansang ke udah dijapai."
Pehin Sri Haji Abdul Taib Mahmud
Kepala Menteri


KUCHING : Tanggung pengawa ngemansangka pengidup rayat ba negeri tu ukai pekara ke muntang laban pemesai kandang menua Sarawak iya bisi 125, 000 kilometer persegi, taja baka nya sehari tu kitai mujur ngangkatka penatai pemisi rayat, lalu semina tinggal lima peratus aja rayat agi dikumbai kelalu seranta, ku Kepala Menteri Pehin Sri Haji Abdul Taib Mahmud.

Taib madah munyi nya lebuh dirandau terus dalam pengelama sejam nengah Radio Televisyen Malaysia (RTM) nyerumba Program Bicara Rayat : Sarawak Melangkah Gagah ke diatur ba Opis Dewan Undangan Negeri (DUN) baru ba ditu malam Hari Lima tu tadi.

"Sepemanjai nyadi Kepala Menteri dalam pengelama 32 taun, aku berasai puas laban meda pengidup rayat enti suba mayuh seranta tang diatu nyau majak senang berekat ari pemansang ke udah dijapai," ku iya.

 Diatu, ku iya penyampau penatai pemisi rayat setaun (perkapita) nyau nambah ngagai lebih RM40,000 enti dibanding enggau suba semian RM680 aja, kelimpah ari nya penyampau pelajar ke mujur nyambung belajar ngagai universiti mega majak mayuh.

"Semua tu berindik ari pemujur bala anembiak kitai besekula," ku iya.

Nangkan ke nya mega, Taib meransang mensia mayuh kelebih agi bala raban nembiak ngambika terus nyikap diri nempuh gelumbang kedua pemansang berebak enggau pengerembai Koridor Renewable Energy Sarawak tauka SCORE ti nyediaka mayuh pengawa puang dalam ngasilka sumber kuasa karan.

"Ubah penyampau bayar gaji jemah ila deka berubah, tebal agi sida ke ngembuan pengelandik teknikal tu ila deka nerima gaji ke nyau deka sebaka pemesai enggau orang ke udah pansut ari universiti," ku iya.

Udah nya, lebuh ditanya bekaul enggau prngawa Menteri Besai Datuk Seri Mohd Najib Tun Razak ke udah nyadi tuai merintah menua tu, iya madah Najib endang seiku ketuai ke patut dipuji laban mujur ngaduka menua enggau chukup badas sereta seruran nitihka peneka orang ke biak.

"Genap iku ketuai ngembuan chara ke diri empu dalam ngatur menua, Datuk Seri Najib dipeda seruran nemu peneka rayat.

"Kitai beterima kasih ngagai semua rayat laban ke seruran meri sukung ngagai genap iti pekara diperambuka perintah lalu penguntung iya pulai ngagai rayat empu," ku iya.

Taib mega madahka, siti penguji besai ditapi ke maya hari tu iya nya penemu ke bepun ari internet ngujungka rayat kelebih agi sida ke nembiak mudah terunda-runda enggau penemu ari luar.

Taja baka nya, pekara ke baka nya enda mudah ngeruga penyerakup ba negeri Sarawak laban rayat ditu seruran ngembuan penemu ke tebuka, ku iya.

Bela bisi datai mending sereta ngemataka program tu iya nya bala menteri kabinet negeri, tuai-tuai opis perintah enggau bala tuai-tuai raban bansa.