Mayuh enda nemu nembiak pra sekula swasta bisi bantu duit

Agi mayuh orang enda nemu perintah bisi nyediaka bantu duit ungkup subsidi yuran nembiak pra sekula swasta ngagai apai indai ke ngembuan penatai pemisi enda ngelui RM500 sebulan, ku Menteri Pengitu Pengelantang, Orang Indu enggau Pemansang Ruang Bilik Datuk Fatimah Abdullah.
   
Iya madah, bantu yuran pra sekula nya dipejalaika berengkah taun 2010.
   
Iya madah, nembiak ke patut nerima bantu nya meseti beumur empat ngagai lima taun sereta belajar ba pra sekula swasta ke bisi dirijista ba Opis Menteri Pelajar Malaysia.
   
Iya madah, penyampau bantu nya bepanggai ngagai penatai pemisi apai indai iya nya RM150 ungkup ruang bilik ke ngembuan penatai pemisi enda ngelui RM300 sebulan, RM112.50 (RM400) enggau RM75 (RM500) sebulan.
   
Udah nya, bantu ungkup nembiak timpang pendiau (OKU) iya nya RM500 ungkup penatai pemisi ke enda ngelui RM300 sebulan, RM400 (RM400) enggau RM300 (RM500), ku iya.

"Nadai bantu diberi ngagai nembiak ke ngembuan penatai pemisi apai indai lebih RM500 sebulan," ku Fatimah lebuh dirandau pengarang berita di Kuching.
   
Nembiak Nadai Nasip (MBK) tauka tachat ke belajar ba prasekula swasta sereta bisi ngembuan kad OKU tauka surat penerang ari doktor, ulih nerima bantu.
   
Apai indai ulih minta bantu nya nengah sekula lalu duit bantu nya deka dibayar terus nengah nengah ke alai anak sida belajar," ku tandu Fatimah. Bernama.

Taman Rekreasi Kampung Skuduk-Chupak peluang endur rayat bedagang

Opis Majlis Perbandaran Padawan (MPP) udah mujur ngemansangka sebengkah palan endur ngelantang ati ke dikumbai 'Taman Rekreasi Kampung Skuduk-Chupak' nengah agih belanja RM300,000 ari Opis Menteri Dagang Temuai Malaysia.

Sapit Speaker Kunsil Negeri Sarawak, Datuk Roland Sagah Wee Inn madah langgur penemu ke deka ngaduka pemansang nya endang udah lama iya nya kira 15 taun ke udah tang baru diatu pengawa nya mujur nyadi nyata.

"Aku deka meri terima kasih ngagai semua orang ke udah besaup ngemujurka projek tu laban palan tu endang ulih dikena narit penatai temuai ari dalam enggau luar menua tu.

"Tu meh asil langgur penemu ke chukup manah dikena ngubah tikas pengidup rayat mayuh ke diau ba menua pesisir," ku iya.

Iya ti mega nyadi Kaban Kunsil Negeri (ADUN) Tarat, madah munyi nya beserimbai enggau Pengawa Nyuaka Projek Pemansang Dagang Temuai Taman Rekreasi Kampung Skuduk-Chupak Ngagai Komiti Pengatur Pengawa Gua Raya Kampung Skuduk/Chupak/Palman Payang Siburan, Padawan di Kuching.

Nangkan ke nya, Chairman MPP Lo Khere Chiang madahka diri chukup berasai gaga meda pemujur projek nya asil ari sukung Opis Menteri Dagang Temuai enggau pemeri belanja ari Datuk Roland Sagah empu.

"Penyauh ngelawa Gua nya ke semina 20 minit pejalai ari Kuching dipelabaka ngembuan penau ke chukup besai dikena narit penatai bala temuai. Ditambah mega enggau pemanah orang kampung ke chukup rindu berandau enggau bala temuai endang nyadi siti utai ke nyelai ba palan tu," ku iya.

Berebak enggau nya, Lo meransang komiti ke nyaga palan nya ngambika nagtur mayuh bengkah progam awakka ulih ngelaku sereta meri penguntung rayat mayuh ke nguna menua nya.

Udah nya, Lo madah naka ke diatu sida (MPP) agi nganti pansik ke dipejalaika Universiti Teknologi MARA (UiTM) bekaul enggau produk palan nya laban sebedau tu universiti nya kala nerima agih belanja ari Perintah Negeri endur bejalaika pansik pelajar.

Bela bisi bejaku iya nya Chairman Komiti Pengatur Pengawa Gua Raya Kampung Skuduk/Chupak/Palman Payang, Awat Rinjik madahka sida deka ngatur siti agi aum dikena berundingka penyampau bayar ungkup bala temuai ke datai ngulu palan nya ila.

"Naka ke diatu kami bedau muka palan tu laban agi mayuh pekara ke deka diatu. Taja baka nya kami udah bisi ngembuan mayuh perambu dikena narit penatai bala temuai baka 'Jungle Tracking', nginti, niki bukit enggau mayuh agi ke bukai.

"Enti udah dibuka ila palan tu tentu nguntungka rayat mayuh laban sida ulih bejualka asil pengelandik jari enggau barang-barang ke bukai," ku iya.

Projek Pemansang Dagang Temuai Taman Rekreasi Kampung Skuduk-Chupak Ngagai Komiti Pengatur Pengawa Gua Raya Kampung Skuduk/Chupak/Palman Payang Siburan, Padawan sebedau tu dipejalaika MPP lalu pengawa ke dikereja sida baka ngaga urung jalai nengah tebelian kira 300 meter ba dalam enggau ba luar Gua Raya nya.

Sama bisi datai Pemangku Seketeri MPP Elizabeth Loh, Residen Kunselor Kampung Skuduk/Kampung Chupak enggau Kampung Plaman Payang enggau bala kaban Komiti Pengatur Pengawa Gua Raya Kampung Skuduk/Chupak/Palman Payang. 

DBKU meri tanda basa ngagai pekereja nengah Hari Inovasi

Dewan Bandaraya Kuching Utara (DBKU) udah diberi tanda basa ngagai raban pekereja sida nengah program Hari Inovasi ke diatur ba Tanah Laman Indu Opis DBKU, Bukit Siol di Kuching.

Datuk Bandar Kuching Utara, Datuk Haji Abang Abdul Wahab Abang Julai madah, tuju program Hari Inovasi nya diatur dikena ngingatka pemanah pengawa sereta meri peransang ngagai sida awakka bebendar agi gawa udah tu.

"DBKU ngarapka nengah program ke bansa tu, bala pekereja ulih bebendar agi gawa ngangkatka pemanah rita DBKU ba tikas menua enggau dunya.

"Anang sesekali mudah berasai puas enggau utai ke udah ulih diatu laban agi mayuh pekara ke patut digaga manah agi awakka pengawa kitai dipeda orang majak bekualiti.

"Kitai patut pintar mutarka penanggul laban semua pengawa ke dikereja kitai deka diperatika orang bukai. Nya alai, kitai patut ngereja pengawa enggau naka pemanah ngambi nyadi teladan ngagai opis bekuasa pelilih menua ke bukai,"ku Abdul Wahab.

Sepemanjai taun 2013 tu, DBKU mujur tulihka mayuh bengkah pemujur enggau anugerah baka dirikodka dalam The Malaysia Book Of Records nyadi Opis Bekuasa Pelilih Menua keterubah ba Malaysia bulih Setipikit Tiga Sistem Atur Pengawa (ISO 9001 Quality Management System, ISO 14001 Environmental Management System enggau Oshas 18001 Occupational Health and Safety Management System) kena 12 Jan 2013;

Menang Belaban Nyadi Palan Ngatur Asia Pacific Cenference (APOC) ke-13 ungkup taun 2019; Taman Budaya Kuching mujur nerima anugerah ILAM Landscape Heritage beserimbai enggau World Landscape Architecture Month;

Dichiri nyadi Opis Bekuasa Pelilih Menua keterubah di Malaysia nyain Ikrar Intergriti Koporat kena 17 Mei 2013; Nerima setipikit kena bejalaika Insiatif pendiau gadung nengah pengawa nyediaka urung pejalai ngena Ensikal berserimbai enggau Hari Perambu Bandar Sedunya kena 12 Nov 2013; enggau

Menang Anugerah Engkeraju Kepala Menteri Sarawak 2013 (Ketegori Negeri), Anugerah Kualiti Servis Opis Perintah Negeri Sarawak kena 10 Dis 2013.

"Pemujur tu balat ngasuh ati gaga, lalu pemujur tu endang dipenggi semua kitai. Terima kasih ngagai semua staf DBKU...laban asil ari pemendar pengawa kitai semua pemujur ulih dijapai baka ke sehari tu," ku Abdul Wahab.

Kelimpah ari nya sepemanjai taun tu mega, DBKU mujur ngatur mayuh bengka aktiviti betikas entarabansa baka The 5th International Cat Show kena 27 ngagai 28 April 2013 di Dewan Belia dan Sukan, Kuching;

Aum Entarabansa City With A Soul kena 26 ngagai 27 Ogos 2013 bepalan ba Hotel Pullman, Kuching; 2nd International Orchird Show 2013 kena 5 ngagai 8 Sept 2013 ba Orchird Park, Kuching;

Borneo Shell Traffic Games kena 6 Okt 2013 di Taman Lalulintas, Kenyalang Park Kuching enggau Pengerami Malu Gendang Etnik Nusantara kena 22 ngagai 23 Nov bepalan ba Godown Amphitheater, Waterfront Kuching.

Entara anugerah enggau pemeri tanda basa ke bisi disuaka Datuk Bandar nyerumba Hari Inovasi 2013 tu iya nya Ngelancharka Lagu Inovasi DBKU; Nyuaka Tanda Pangkat; Nyuaka Anugerah Inovasi, Nyuaka Trofi Champion Main Futsal, Nyuaka Trofi Menang Baris Champion Pengawa Baris Hari Pengada TYT Ke-92 enggau Lumur Dua Pengawa Baris Hari Malaysia Ke-50 Taun; Nyuaka Tanda Basa Ngagai Staf Ke Pinchen enggau Nyuaka Tanda Basa Ngagai Staf Ke Udah Gawa 25 Taun.

RM443,000 geran diberi ngagai 32 PSK serata negeri

Perintah menua deka terus nyediaka diri napi pemar dudi hari bekaul enggau pengawa ngibun orang tuai awakka raban sida tu seruran dipeda aktif sereta terus dipebasa.

Menteri Pengelantang Pendiau, Orang Indu enggau Pemansang Ruang Bilik, Datuk Hajah Fatimah Abdullah madah, bepelasarka pansik menua Malaysia dijangka nyapai status menua mayuh orang tuai maya taun 2030 iya nya 15 peratus ari penyampau rayat endang tebal agi sida ke tuai.

"Diatu orang tuai iya nya sida ke beumur 60 taun ke atas 2.2 juta iku tauka 7.7 peratus ari 28.3 juta iku rayat Malaysia," ku iya.

Iya madah munyi nya rambau Pengerami Hari Orang Tuai enggau Hari Orang Timpang Pendiau (OKU) Tikas Negeri ke dipenyadi Toh Puan Datuk Patinggi Hajah Norkiah di Kuching.

Fatimah madah, pengayu orang indu betambah iya nya ari 58 taun ba taun 1957 ngagai 77 taun ba taun 2010, udah nya pengayu sida ke lelaki betambah ari 56 taun maya taun 1957 ngagai 71  taun maya taun 2010.

"Endang enda ulih dipetenah pengelantang pengidup enggau pemansang ke disepi semua kitai jam ke diatu endang asil pengawa sida ke dulu suba lalu diatu nya nyadi orang tuai di menua tu," ku iya.

Kebuah pia, Fatimah madah, orang tuai endang nyadi reta ke beguna ngagai menua laban sida ngembuan penemu, peneleba enggau pengelandik ke tusah deka ditukar.

"Umur ke udah tuai tauka pinchin ukai nyadika pemadu ngagai sida endur badu gawa tang kitai meseti begunaka pengelandik orang tuai tu," ku iya.

Entara pengawa ke diatur perintah nikihka umur pinchin ngagai orang ke gawa perintah ari 58 ngagai 60 taun berengkah taun tu, nempa Akta Umur Persaraan Minimum 2020 ti netapka umur pinchin ungkup pekereja swasta; ngaduka polisi Peraturan Kerja (Pekereja Kontrak) berengkah 15 Oktober 2010 dikena nyaga pengelantang sida ke gawa kontrak.

Kelimpah ari nya, mayuh bengkah bantu, rebat tauka isentif ungkup orang tuai dikena nulung sida nyadi orang ke bulih pengelantang sebaka enggau rayat mayuh ke bukai di menua tu.

Berebak enggau nya, Fatimah madahka sebengkah perengka guna ke patut diperati iya nya numbuhka sebengkah palan ungkup orang tuai ngatur program.

Iya madah, palan ke bansa nya beguna amat ungkup orang tuai ke diau nadai orang ngibun, awakka sida ulih bekaul tauka bekelala enggau orang bukai ke serambau.

"Endang patut amat kitai nyediaka palan-palan endur ngatur program ungkup orang tuai sebaka enggau rumah taska enggau tadika," ku iya.

Nya alai, Fatimah madah, opis menteri iya merambu deka nguna balai-balai nengah opis menteri iya nyadika palan endur orang tuai ngatur program.

"Bisi 45 bengkah balai dibaruh kuasa opis menteri ulih dikena ngemujurka program ungkup orang taui," ku Fatimah.

Nyerumba pengerami nya mega, Toh Puan Norkiah bisi nyuaka geran Gerempung Pengintu Enda Begaji (PSK) Taun 2013 ngagai 32 PSK ba serata negeri penyampau RM443,000 kelimpah nyuaka Anugerah Orang Tuai enggau Anugerah OKU.

Sama bisi datai iya nya Pengarah Opis Pengelantang Pendiau Raban Bansa Sarawak (JKMS) Noriah Ahmad; Datuk Bandar Dewan Bandaraya Kuching Utara (DBKU) Datuk Haji Abang Wahap Abang Haji Julai; Pengarah Komiti Servis Pelajar Pekara Islam, Datu Dr Haji Adi Badiozaman Tuah enggau Kepala Majlis Adat Istiadat, Datu Nillie Tangai.

Bansa Bidayuh majak landik bedagang

Raban bansa Bidayuh kelebih agi kaban Koperasi Bidayuh Kuching Berhad (KOBIB) diperansang ngambika terus ngemajuka diri enggau pengawa bedagang.

Menteri Pemansang Infrastruktur enggau Penyambung, Dato Sri Michael Manyin Jawong, madah ngereja pengawa bedagang besai ukai utai ke muntang taja baka nya ukai nyadika penanggul endur bansa Bidayuh ulih maju sebaka enggau bansa bukai.

"Nya alai, anang enda ngereja pengawa enggau bebendar ngambika kitai (Bidayuh) tau tulihka pemujur neladan pemujur bansa China.

"Sida ke maju dalam pengawa dagang nya ketegal ari pengeransing runding sereta enda mudah alah penemu lebuh meda pengurang diri," ku iya seraya ngelalau mensia mayuh ke bisi datai ngambika anang nguna adat lama ti kelalu nadai meri penguntung.

Iya madah munyi nya rambau ngulu Pengerami Makai Malam Koperasi Bidayuh Kuching Berhad ke diatur ba Dewan Gerempung Bansa Dayak Bidayuh (DBNA) di Kuching.

Nangkan ke nya, Manyin ngasuh raban Bidayuh ti bisi masuk pengawa dagang anang enda nguji nempa kaul enggau bansa bukai ke udah mujur ngambika sida ulih ngerembaika pengawa dagang diri.

"Enti kitai deka ngerembaika pengawa dagang diri, kitai anang enda nguji nempa kaul sereta ngenyemakka diri enggau orang bukai ke udah mujur ngambika kitai tau bulih penemu ke baru ari peneleba sida bedagang," ku iya.

Dulu ari nya, Chairman KOBIB Ambrose Dango nesau raban bansa Bidayuh ke bisi pengerindu ba pengawa bedagang ngerijista diri masuk nyadi kaban KOBIB ngambika ulih besukung betulung ngemansangka pangan diri ba pengawa dagang.

Berebak enggau nya, Ambrose meri puji ngagai bala kaban KOBIB laban ke udah meri sukung ngemujurka program ke diatur KOBIB sepemanjai hari nya baka ngatur Hari Tebuka KOBIB enggau program seminar ungkup bala orang dagang.

"Program ke baka endang amat manah kenyau 30 taun KOBIB udah ditumbuh laban ulih meri penemu ngagai bala pesereta senentang chara
nyadi seiku orang dagang ke nyulut," ku iya.

Sama bisi datai iya nya Seketeri Tetap Opis Menteri Dagang Temuai Sarawak Datu Ik Pahon Joyik sereta bala kaban gerempung DBNA enggau KOBIB.

Raban Nembiak Meseti Regas

Penulung Menteri Pemansang Raban Nembiak (Menua Pesisir) enggau Penulung Menteri Rengka Rama (Elektrik enggau Telekomunikasi) Datuk Dr. Stephen Rundi Utom ngelalau bala raban nembiak di negeri tu ngambika terus ngenyulutka diri nyadi nembiak ke tampak rita.

Iya madah, diatu kitai di menua chukup berasai temegah laban bisi ngembuan seiku ikon raban nembiak ke chukup pengari nama ba lumba olimpik iya nya Pandelela Rinong.

"Nya alai, aku ngarapka kitai ulih ngadaka mayuh agi ikon-ikon tauka model ke ulih nyadika teladan ngagai bala raban nembiak ke bukai.

"Bala raban nembiak endang orang ke dikarap nyadi ketuai ke ulih merintah menua jemah ila," ku iya.

Rundi  madah munyi nya rambau ngelancharka program I Heart Sarawak on Hitz.Fm ke diatur Opis Menteri Pemansang Sosial (KPS) bepalan ba Le Park, Dewan Suarah di Kuching.

Nangkan ke nya, Rundi madahka diri endang tetap nyukung program ke diatur KPS begulai enggau radio, Hits.FM nya.
"Program I Heart Sarawak endang chukup manah diatur dikena nempa pengasai ati sayau ngagai Bumi Kenyalang," ku iya.

Entara aktiviti ke bisi diatur nyerumba program tu iya nya enchabut tiket benasit, pengawa mandangka pisin pekayan, enggau mandangka kerita remote control.

Sama bisi datai iya nya Menija Besai Astro Radio Sabah enggau Sarawak Hafiz Nizamuddin sereta lebih 100 iku bala raban nembiak.

Kapal Arca Transline ngerembaika servis ngagai Sabah enggau S'wak

Arca Transline (Sarawak) Sdn Bhd sebengkah kapal dagang ke deka ngerembaika pengawa dagang berangkutka barang berengkah ari Pengkalan Klang, Kota Kinabalu (Sabah), Kuchhing (Sarawak), Indonesia enggau Thailand.

Chairman Eksekutif iya, Datuk Che Azizuddin Che Ismail madah, kapal Arca Transline tu deka bejalai ninting minggu lalu deka sangkai di menua Sabah enggau Sarawak dua kali dalam sebulan.

"Kenyau beoperasi berengkah bulan Oktober taun tu tadi, kapal Arca Transline ke ngembuan pemerat 38 ribu tan enggau 175 meter pemanjai tu udah sangkai di Kuching bisi enam kali.

"Kapal tu ulih ngundan kira 4000 buah kerita pengangkut sekali bejalai ba tasik lalu tu siti servis ke chukup manah ngagai industri automotif ba menua tu," ku iya.

Iya madah munyi ngagai pemberita pengudah tembu Pengerami Makai Malam Ngelancharka Pejalai Kapal Arca Transline (Sarawak) Sdn Bhd ke diatur ba Hotel Margherita di Kuching.

Nangkan ke nya, Che Azizuddin madah berindik ari pemanah gawa ekonomi menua enggau pemansang menua ngujungka penyampau kerita ke patut dianjung ngagai menua Sabah enggau Sarawak nambah ngagai enam ngagai tujuh ribu dalam sebulan.

Timpuh pejalai kapal tu ari pengkalan Klang ke Kota Kinabalu ngambi awak empat hari lalu pejalai kapal ari Kota Kinabalu ngagai Kuching enggau Kuching ngagai Klang semina begunaka awak bela dua hari, ku Che Azizuddin.

"Nya alai, servis kapal ke bansa tu beguna amat nitihka peneka mensia mayuh ke deka meda barang dikeka sida ulih datai enggau jampat," ku iya seraya madahka naka ke diatu industri ngangkut barang (kerita) di Malaysia semina dimonopoli tiga bengkah kompeni aja.

Berebak enggau nya, Che Azizuddin madah, sida merambu deka nempa kaul enggau Pengkalan Bintulu dalam ngerembaika pengawa dagang servis berangkutka kerita.

"Enti udah bisi kaul enggau Pengkalan Bintulu dia kapal tu meseti mai 500 buah kerita sekali sangkai ba Pengkalan Bintulu, lalu pemadu mimit pan meseti mai 50 buah," ku iya.

Arca Transline ditumbuhka kena 28 Ogos 2001lalu nyediaka servis logistik beanjungka barang ungkup mayuh bengkah industri nyengkaum automotif.

Kompeni ti bepengkalan ba Shah Alam, Selangor tu ngembuan kaul ke terit enggau kompeni-kompeni besai ba Malaysia.

Udah anak ada terus gaga surat peranak

"Enti enda dirijista jampat anak sida nya tentu deka dituntung mayuh penanggul nyema udah besai jemah baka maya deka besekula, minta kereja tauka utai bukai ketegal nadai tingki enggau dokumen ke bukai."
Datuk Hajah Fatimah Abdullah
Menteri Pengintu Pendiau, Orang Indu enggau Pemansang Ruang Bilik

Raban orang indu ke baru udah beranak dilalau ngambika terus ngerijista pengada anak diri ngagai klinik tauka hospital ke semak awakka anak sida nya muntang bulih surat pengada.

Menteri Pengintu Pendiau, Orang Indu enggau Pemansang Ruang Bilik, Datuk Hajah Fatimah Abdullah madah, pekara ke pemadu beguna sekalika indu ke beranak nya meseti ngerijsta pengada anak sida enda ngira sekalika sida (indu) nya udah kahwin tauka bedau.

"Enti enda dirijista jampat anak sida nya tentu deka dituntung mayuh penanggul nyema udah besai jemah baka maya deka besekula, minta kereja tauka utai bukai ketegal nadai tingki enggau dokumen ke bukai.

"Nyema laki sida gawa ba endur bukai, bini meseti minta saup Pengulu ngaduka pengawa ngerijista anak ke baru ada," ku iya.

Fatimah madah munyi nya rambau dirandau pengarang berita ba Opis Baitulmakmur pengudah tembu Aum Komiti Isu Anak Mit Enggau Orang Ke Nadai Ngembuan Dokumen Surat Peranak sereta Status Peranak Menua, di Kuching.

Berebak enggau nya, Fatimah madah, pekara bukai ke bisi diperundingka dalam aum nya baka berundingka pengawa ngiru anak mit ke udah dibuai indai (anak ke dileka sengapa).

"Anak ke udah dibuai tu ulih diiru lebuh sida agi mit, taja baka nya anak mit nya meseti udah digagaka dokumen (surat peranak),"ku iya.

Naka ke diatu, penyampau anak mit ke udah mujur digagaka dokumen bisi 13 iku, lalu 13 iku agi bedau tembu diadu, ku Fatimah.

Nitihka penerang ari Penulung Pegawau Pengerijista Bansa (JPN) Kuching, Salmi Kiprawi madah, ungkup anak mit ke ditemu sebarang endur JPN deka ngerijista dokumen anak mit nya nitihka nama palan iya ditemu enggau maya hari bulan iya ditemu.

"Ngagai anak mit ke ditemu lalu dirijista ulih Opis Pengelantang Pendiau (JKM), dia JPN deka ngaduka dokumen anak mit nya nitihka nama palan iya ditemu enggau maya hari bulan iya ditemu tang status peranak menua iya enda dipasukka maya nya laban deka ditentuka dulu," ku Salmi.

Sama bisi datai ngulu pengawa baum ke diatur Opis Menteri Pengintu Pendiau, Orang Indu enggau Pemansang Ruang Bilik tu iya nya pengari Imigresen, Pengulu, Kunsil, Society for Kuching Urban Poor (SKUP) enggau JPN.

Opis baru DAP bisi di Simunjan

Penumbuh Opis Servis DAP ke baru apin lama ke udah ba Simunjan langsung nadai ngeruga sukung rayat ngagai perintah kelebih agi ngagai Parti Pesaka Bumiputera Bersatu (PBB ) enggau Barisan Nasional ( BN) .

Kaban Kunsil Negeri (ADUN) Simunjan Datuk Haji Mohd Naroden Majais madah, dalam sistem demokrasi kita enda ulih nagang sapa-sapa ke udah bulih pemendar ari perintah endur numbuhka opis pampang sida.

"Nyema DAP deka muka pampang, kitai enda ulih nagang tang ba penemu aku, pekara nya nadai meri nama-nama bekau ngagai aku laban aku pechaya sida (DAP) sigi tusah deka bulih penyukung."

Naroden ti mega nyadi Penulung Menteri ba Opis Kepala Menteri (Pemansag Dagang) ngemansutka penemu nya pengudah ke ditanya pemberita bekaul enggau penumbuh Opis Servis DAP ke baru ba Simunjan .

Iya madah munyi nya rambau bejadi seminar 'Peluang-Peluang Bumiputera Dalam Peruntukan Saham Khas MITI enggau Analisis Pelaburan Dalam Syarikat-Syarikat Berhad' ke diatur pengelama sehari (12 Disember 2013) ba sebengkah hotel tebilang di Kuching.

"Tu (DAP tusah deka bulih penyukung), aku nemu laban menua Simunjan endang menua aku," ku iya seraya madahka nyangka bisi sekeda orang asa lalu nya alai sida masuk DAP tang nya semina sekeda tauka mimit aja ke deka masuk parti penyakal.

"Utai ke baka tu, biasa aja lalu nyadi ba dini-dini endur...sapa asa tauka nadai bulih penuduk dalam PBB tauka BN, nya alai sida nyukung ni-ni raban orang ke datai ngagai Simunjan . "

"Ba penemu aku, BN Simunjan agi tegap sereta keringa, lalu iya kebendar kami agi mengkang bulih sukung ke manah ari raban nembiak rebak baru, ku iya.

Nangkan ke nya, Naroden madahka diri deka gawa bebendar agi laban nya utai ke pemadu beguna kelimpah nyaga pelilih menua enggau manah-manah.

"Trend pengundi aku ba taun 1991 maya Pengawa Bepilih Besai Negeri enggau Pengawa Bepilih Besai Parlimen, penyampau pemayuh undi dipeda niki lalu aku pechaya menua Simunjan deka terus nyadi kubu BN. "

"Bepelasarka trend pengawa bepilih besai parlimen sukung ngagai kami (BN) dipeda niki, aku pechaya taja pan opis baru DAP udah ditumbuh, pekara nya nadai meri bekau ngagai Simunjan ," ku iya.

Ba pengawa bepilih besai negeri ke udah, Naroden bulih 5,465 undi menang majoriti 4,048 mujur ngalahka Mashor Hussen (PKR) ke bulih 1,417 undi, Zaini bin Le (Bibas) 179 undi enggau Mac Palima anak Nyambil (PCM) 237 undi dalam sitak ti diperebutka empat iku pengari.

Simunjan nyadi sitak menua kedua nangkan DUN Tupong bisi ditumbuhka Opis Servis DAP ba taun tu.

Raban Bumiputera dipinta ngambi peluang bempu ekuiti enggau saham

Perintah negeri seruran meri peransang ngambika mayuh rayat Sarawak kelebih agi raban Bumiputera ngasurka diri nyereta program beranakka puku ke bisi dipejalaika perintah.

Penulung Menteri Ba Opis Kepala Menteri (Pemansang Dagang) enggau Penulung Menteri Perambu Sumber, Datuk Haji Mohd Naroden Majais madah, seminar ke diatur Opis Menteri Dagang Entarabansa Enggau Industri (MITI) tu endang beguna amat dikena meri penemu ngagai bala pedagang Bumiputera senentang peluang-peluang enggau saham-saham ke diberi perintah nengah agensi-agensi ke besangkut paut.

"Tuju program ke bansa tu ngambika mayuh agi raban Bumiputera ngembuan ekuiti enggau saham dalam agih belanja ke bisi disediaka perintah. Tu setipak amat enggau juluk Menteri Besai (Dato Sri Najib) ke bisi nyadaka pekara tu dua bulan ke udah ke deka meda mayuh agi raban Bumiputera ngembuan ekuiti dalam ekonomi menua.

"Nya alai kitai nadai pilih ke bukai iya nya bebendar agi ngeringka raban Bumiputera ngambika ulih meda semua peluang ke bisi ayan lalu enggau orang beribitka peluang nya dikena ngemansangka ekonomi menua.

"Enggau jaku simpul, takah bida ari sukut penatai pemisi, orang ke ngempu ekuiti dalam hartanah, reta rumah besai dalam pemansang ekonomi deka ulih dikurangka agi," ku iya.

Iya madah munyi nya rambau bejadi seminar 'Peluang-Peluang Bumiputera Dalam Peruntukan Saham Khas MITI enggau Analisis Pelaburan Dalam Syarikat-Syarikat Berhad' ke diatur pengelama sehari (12 Disember 2013) ba sebengkah hotel tebilang ditu, kemari (Hari Empat).

Naroden madah, enti kitai beratika penyampau rayat 28 juta ke nguan menua tu nitihka raban bansa, 60 peratus endang bansa Bumiputera lalu 40 peratus bansa ukai Bumiputera. Ba Sarawak iya nya bisi 2.8 juta iku rayat, 70 peratus bansa Bumiputera lalu 30 peratus bansa ukai Bumiputera.

"Ari 70 peratus (tauka 1.96 juta) bansa Bumiputera tu semak 100,000 orang tauka semina 5 peratus ke bisi masuk pengawa bedagang mit enggau MIKRO (PKM) lalu semina 45,000 iku (tauka 2.3 peratus) benung ngeransing diri ba pengawa dagang kategori Mit Enggau Jelan Pemesai (PKS).

"Berebak enggau ba sukut Ekonomi Sarawak, bansa Bumiputera agi jauh tinggal enti dibanding enggau bansa ukai Bumiputera.

"Nya alai, dikena ngurangka penyauh takah nya, mayuh program diatur dikena ngemajuka raban Bumiputera lalu raban Bumiputera patut bebendar agi berebutka peluang ti bisi disediaka perintah sekalika nya nengah pekara latih, bantu-bantu duit, program Groom-Big, promosi, makit tauka utai bukai.

"Semua program tu digaga labam deka meda raban Bumiputera angkat, muntang bulih penatai pemisi sereta nulung ngangkatka pemansang ekonomi menua enggau negeri," ku Naroden.

Seminar tu digulu kira 300 iku orang nyengkaum 50 iku sida ti bisi beranakka puku, 180 kaban germpung, Dewang Dagang, pengari gerempung ukai perintah (NGO), kaban koperasi sereta bala pengari agensi MITI enggau Opis Perintah Besai enggau Opis Negeri Sarawak.

Sama bisi datai iya nya Pengarah Kanan MITI, Dato Abdul Ghafar Musa.

Bank Rayat diperansang beambu menyadi enggau media

Mantan Ketuai Bank Rayat  Wilayah Sarawak Azman Abdul Aziz (dua kanan) begambar ke pengingat enggau raban media rambau Pengerami Ngingatka Pemanah Pengawa ke diatur ba  Kuching. Foto : SUZANNE EMPAM

Kereja enggau pemanah kaul entara Bank Rayat enggau raban media meseti terus dijaga ngambika pemanah nama palan nya terus dikelala semua.

Mantan Ketuai Bank Rayat Wilayah Sarawak, Azman Abdul Aziz madah, beduduk ari pemanah kaul enggau sukung ari raban media ke nadai putus ngelama tu ngujungka Bank Rayat bulih mayuh pemujur.
"Sekumbang tujuh taun aku udah gawa di Sarawak endang raban media meh ke balat ngangkatka nama Bank Rayat.

"Nya alai, aku ngelalau kaban ke nganti aku udah tu iya nya Khirudin Abg Jajol ulih terus nyaga pemanah kaul enggau raban media laban nadai pengerugi enti kitai mandangka pementas ngagai media," ku iya.
Iya madah munyi nya rambau Pengerami Ngingatka Pemanah Pengawa Azman Abdul Aziz ke diatur ba Hotel Hilton di Kuching.

Nangkan ke nya, ba jaku iya Azman meransang penganti iya (Khirudin), madah nadai chara bukai enti kitai deka nyapai pemujur iya nya meseti ngembuan penemu ba dua pekara.

"Ke satu kitai meseti berani nyadi ketuai sereta nemu nyaga nyaga ulah diri. Udah nya, kedua kitai patut meri basa ngagai orang bukai (temuai).

"Reti nya, kitai ke nyadi penyual barang meseti ngengkahka penyumbong diri ba ikas ke baruh ari pemeli, nya baru utai ke dijual kitai ulih laku sereta tulihka pemujur," ku iya.

Azman berengkah gawa di Sarawak kena 23 Januari 2007 lalu diatu iya dianjung gawa pulai ke Malaya nyadi Penulung Presiden Wilayah Melaka/ Johor.

Entara pengawa ke bisi diatur malam nya, pengawa nyuaka setipikit ngagai semua pampang Bank Rayat di Sarawak, pengawa meri tepa ari semua pampang Bank Rayat ngagai Azman enggau bekaroake.

Sama bisi datai iya nya Ketuai Bank Rayat Wilayah Sarawak, Khirudin Abg Jajol, Tuai-tuai enggau pengari menija pampang Bank Rayat Sarawak.

Jalai Pan Borneo meseti digaga manah

Datuk Haji Fadillah Yusof

Opis Menteri Kereja Raya (KKM) udah bulih agih belanja kira RM267 juta lalu ari penyampau nya nyengkaum RM50 juta deka dikena miki Jalai Pan Borneo.

Menteri iya, Datuk Haji Fadillah Yusof madah, nambahka nya dalam Bajet 2014 dibantaika Menteri Besai (Dato Seri Najib) taun siti ke udah bisi nyebut deka meri agih belanja tambah kira RM500 juta ungkup KKM.

"Berindik ari nya, entara projek ke deka dipejalaika Opis Menteri Kereja Raya ba taun tu (2014) iya nya; keterubah miki Jalai Sibu ke Bintulu kira 12 kilometer pemanjai ba Kilometer 18 ngagai 30 nyadi empat lurung, kedua ngaga 95 lurung begelih ba kandang endur ke suah nyadi penusah bebadi belabuh ari Simpang Lubok Antu ngagai Simpang Betong.

"Udah nya, projek ketiga miki Jalai Kuching/ Serian penyauh 8 kilometer berengkah ari Batu 10 ngagai Batu 13 nyadi empat lurung. Semua projek tiga bengkah tu deka digaga ba Jalai Pan Borneo," ku iya.

Iya ti mega nyadi Kaban Parlimen P.194 Petra Jaya madah munyi nya ngagai pemberita pengudah bejadi Program Karnival Kerjaya SPA (Suruhanjaya Perkhidmatan Awam) ke diatur ba Stadium Parpaduan Kuching.

Fadillah madah projek-projek bukai ke besangkut paut enggau jalai raya mega dijangka deka dipejalaika ba taun tu. Entara projek nya, ku iya baka miki Jalai Matang (E-mart) nuju ngagai Stapok nyadi empat lurung nyengkaum ngaga Jematan Ke-3 meraka Sungai Sarawak ke beungkus RM145 juta.

"Sebengkah agi projek ke deka digaga ba taun tu iya nya miki Jalai Tanjung Kidurong nuju ngagai Taman Perindustrian Samalaju penyauh 16 kilometer nyadi empat lurung. Ungkus belanja dikena ngemujurka projek tu iya nya kira RM120 juta," ku iya.

Nangkan ke nya mega, Fadillah bisi ngerintaika 8 buah projek ke dikuasa Opis Menteri iya udah mujur dipejalaika ba Sarawak ungkup taun siti ke udah.

Entara projek-projek ke udah mujur digaga tu iya nya; miki Jalai Tun Jugah/ Jalai Song Interchange, Kuching ke beungkus RM55 juta); miki Jalai Pujut 7- Tudan, Kuala Baram, Miri ke beungkus RM130 juta; ngaga jematan dikena meraka Sungai Pandaruan nyengkaum ngaga jalai pemanjai 0.65 kilometer ke beungkus RM46 juta;

ngaga Jematan Batu Kawa nyengkaum ngaga jalai pemanjai 5 kilometer ke beungkus RM50 juta; ngaga Jematan Sungai Tabuan ke beungkus RM60.2 juta nyengkaum miki Jalai Mambong - Sejingkat ari dua lurung ngagai empat lurung enggau ngaga siti agi jematan; miki Jalai Kuala Tatau/ Kuala Serupai/ Kuala Balingian Fasa 1 pemanjai 15 kilometer ke beungkus 40 juta;

miki jalai ari Rumah Kita/ Ugap nuju ngagai SK Rantau Panjai, Kapit pemanjai 6 kilometer ke beungkus RM60 juta enggau miki rumah Pekereja Opis Perintah Mukah ke beungkus RM4.93 juta.

Ngenang senentang Program Karnival Kerjaya SPA nya bisi 27 bengkah opis perintah bisi ngambi bagi lalu mayuh bengkah aktiviti bisi diatur baka ngerista minta kereja chara online, taklimat pasal kereja enggau pasal chara interbiu.

Nitihka rikod ba taun 2013, SPA udah ngambi pekereja kira 60,059 iku lalu ari penyampau nya 38,659 dipadu gawa tetap lalu 21,400 iku diberi gawa kontrak.

Nitihka rikod mega, statistik peranak menua Sarawak ke bisi minta gawa enggau SPA iya nya 196,478 iku. Ari penyampau nya semina 21,373 bisi dikanggau interbiu. Udah nya, sida ke dipadu bulih kereja sereta diberi latih semina 4,235 iku tauka 29 peratus aja.

Udah tu ila, SPA bisi ngatur Seminar enggau Kus Chara Bulih Kereja Perintah kena 19 Januari 2014 bepalan ba Auditorium Opis Sultan Iskandar, Ringkat 17, Jalai Simpang Tiga, Kuching.

Penerang ke silik bekaul enggau kus ulih dipeda ba laman web SPA iya nya ba www.spa.gov.my.

Sama bisi datai ba pengerami tu iya nya Sapit Chairman SPA Malaysia, Dato' R. Segarajah ratnalingam, Sapit Seketeri (Milih Pekereja) Zainal Abidin Ahmad enggau Seketeri Pengatur Pampang Sarawak Abdul Halim Abang Naili.

Enam batang jalai di Kuching deka ditutup 23 Febuari tu

Enam batang jalai ba kandang menua Kuching deka ditutup kena 23 Febuari tu nyerumba 'Program 1st Car Free Day In Kuching City' enggau 'Kayuhan Warisan Malaysia 2014' tauka Bekayuh Ngena Ensikal ke diatur Dewan Bandaraya Kuching Utara (DBKU) begulai enggau Kelab Lumba Raban Bansa Satok (KSK).

Datuk Bandar DBKU, Datuk Haji Abang Abdul Wahab Abang Julai madah, entara jalai-jalai ke deka ditutup tu iya nya Jalai Haji Taha/ Jalai Satok/ Jalai Kulas, Jalai Datuk Datuk Ajibah Abol, Jalai Main Bazaar/ Lebuh Wayang, Jalai Wayang, Jalai Tabuan, Jalai Mc Dougall enggau Jalai Tun Abang Haji Openg.

"Jalai-jalai tu deka ditutup berengkah pukul 6.00 pagi nyentuk ngagai 11.00 pagi. Ngarapka mensia mayuh meri kerejasama sereta nemu ni bagi jalai ke ditutup dikena nyeliahka diri tepekul ba jalai ke sekut," ku iya.

Iya madah munyi nya rambau Aum Pengarang Berita ke diatur ba Opis Wisma Sultan Tengah di Kuching Saritu. Sama bisi datai iya nya Penulung Menteri Pemansang Nembiak (Bandar) Datuk Abdul Karim Rahman Hamzah, bala komiti program enggau sekeda staf DBKU.

Nangkan ke nya, Abdul Wahab madah tuju program tu dikena ngerami Taun Nemuai Ke Malaysia 2014 enggau Taun Nemuai Ke Sarawak.

Kelimpah ari nya, tuju program tu mega dikena meransang rayat di menua tu nyereta program ke manah ungkup pengerai sereta ngelakuka pengawa dagang temuai nengah aktiviti ngena ensikal.

"Rayat ari menua tu mega bepeluang nyadi pengari nusika jerita ngagai temuai menua luar bekaul enggau sejarah ke kala nyadi di menua tu. Penyauh endur ke alai bekayuh ngena ensikal tu kira 5 kilometer lalu ngelinggi kandang endur ke bisi ngembuan pengingat sejarah.

Penyampau pesereta ke deka nyereta program tu nadai ditatak tang dipelabaka bisi 1000 iku nyengkaum kaban kelab ensikal ba kandang menua Kuching. Pom ulih dipintah nengah gerempung ensikal diri empu.

Bala nembiak sekula primari, orang besai tuai enggau orang tuai bela diperansang nyereta program tu. Kelimpah ari nya, mensia mayuh ke deka nyereta program tu ulih mega ngerijista diri nengah emel ksksatok@gmail.com lalu anjung nama penuh, lumur tingki enggau lumur telefon.

500 pesereta ke pemadu tumu ngerijista diri deka diberi baju pechuma. Bulih tiket chabut betuah (perais topi kelidar ensikal), udah nya komiti program (YR1M) deka meri ensikal ngagai bala nembiak sekula ari sekula-sekula ke udah dipilih.

Sebengkah kandang endur ke meseti dipansa maya bekayuh ngena ensikal tu ila iya nya Darul maziah (Rumah Lama Melayu beumur 300 taun) Kampung No.6.

Adan endur bepun bekayuh deka berengkah enggau tembu ba Kuching Explande, Waterfront lalu deka dipenyadi Menteri Dagang Temuai enggau Pengawa Berumah Datuk Amar haji Abdul Rahman Johari Tun Openg.

Berebak enggau tu, mensia mayuh ditesau sampal datai ngulu program tu lalu penerang ke silik ulih betelefon nuju Peter Martin / Noraini Karim Abdillah ngena lumur 082-446688 (Sambung 131/132) tauka Komiti Peransang Dagang Temuai Malaysia ngena lumur 082-246576/ 246775.

Dulu ari nya, program tu asil ari kerejasama KSK, Komiti Raban Nembiak Parti Pesaka Bumiputera Bersatu (PBB) Pampang Satok, Komiti Peransang Dagang Temuai Malaysia, DBKU, Opis Menteri Dagang Temuai Sarawak, Opis Menteri Pemansang Raban Nembiak, Opis Pemadah, Opis Pengelikun Jalai Alun (JKJR), Yayasan Rayat 1Malaysia (YR1M), Gerempung Ensikal Negeri Sarawak, Polis Diraja Malaysia Pampang Trafik.

JULUK NYADI MAJLIS PERBANDARN KOTA SAMARAHAN NYADI NYATA 2014?

TANDA BASA...Seketeri Tetap Opis Menteri Perintah Pelilih Menua enggau Pemansang Raban Bansa, Datu Dr Penguang Manggil nyuaka tepa ngagai pengari media Utusan Sarawak, Alvester Bigol  rambau Pengerami Malam Apresiasi 2013 ke diatur Majlis Daerah Samarahan ba Kuching. Foto:Andre Oliveiro

Semua pekereja Majlis Daerah Samarahan dipinta gawa bebendar agi dikena nangkup juluk opis pelilih menua nya ke deka diangkat nyadi Majlis Perbandaran Kota Samarahan taun siti nyin ila.

Seketeri Tetap Opis Menteri Perintah Pelilih Menua enggau Pemansang Raban Bansa, Datu Dr Penguang Manggil madah, opis menteri sida endang seruran meri sukung ngagai Majlis Daerah Samarahan dalam nyapai juluk sida.

"Taun siti nyin ila Majlis Daerah Samarahan deka niki ngagai siti tikas iya nya Majlis Perbandaran Kota Samarahan.

"Nya alai, udah tu ila kitai di menua Sarawak deka bisi tiga bengkah opis Majlis Perbandaran iya nya di Majlis Perbandaran Sibu, Majlis Perbandaran Padawan enggau Majlis Perbandaran Kota Samarahan," ku iya.

Iya madah munyi nya rambau ngulu Pengerami Malam Apresiasi 2013 ke diatur Majlis Daerah Samarahan bepalan ba sebengkah hotel tebilang di Kuching.

Nangkan ke nya, Dr Penguang ngelalau raban pekereja Majlis Daerah Samarahan patut nyediaka diri berengkah ari diatu dikena nangkup tanggung pengawa ke deka nyadi Majlis Perbandaran Kota Samarahan.

Dulu ari nya, Kunselor Deli Jospeh madahka, tuju pengerami nya diatur dikena ngelumuka raban pekereja Majlis Daerah Samarahan, kaban-kaban komiti, tuai-tuai opis perintah dikena mandangka tanda basa ketegal pengawa kerejasama, pengeransing pegawa dalam ngemujurka mayuh bengkah program.

"Kelimpah ari nya, tuju pengerami nya diatur dikena nandaka pengujung program minggu integriti enggau inovasi ke diatur berengkah 2 ngagai 7 Disember tu tadi enggau bemacham program baka pengerami bejadi intergriti enggau inovasi, Eksibisyen inovasi KIK, Taklimat intergriti ari raban SPRM enggau taklimat inovasi ari INTAN Sarawak.

"Nengah program ke bansa tu, dalam timpuh 29 taun penumbuh Majlis Daerah Samarahan ari taun 1984 nyentuk ke diatu mayuh amat pekara enggau pemujur ke udah ulih japai lalu diatu sesingkang agi deka manggai ngagai tikas Majlis Perbandaran Kota Samarahan,"ku iya.

Sama bisi diatur malam pengawa nyuaka Setipikit Tanda Basa Ngagai Opis, Setipikit SKT 85 peratus 2011-1012, Setipikit APC 2012 enggau mayuh agi aktiviti ke bukai nyengkaum pengawa bekaroake enggau enchabut tiket benasit.

BELA BESAUP NYAGA PEMERESI GENTURUNG PENDIAU

Pengawa ngemeratka pemeresi ba kandang genturung pendiau begunaka kerejasama semua orang lalu ukai semina nejuka tanggunjawap nya dikereja seiku orang aja, ku Penulung Menteri ba Opis Kepala Menteri (Pekara Islam) enggau Penulung Menteri Pemansang Infrastruktur Datuk Haji Daud Abdul Rahman.

"Jaga meh pemeresi genturung pendiau enggau chara betanamka kayu begulai enggau agensi opis perintah, enti kandang endur diau beresi tentu nadai penanggul ai betekat lalu orang ke diau ba endur nya empu ke ngasaika penyamai.

Daud ti mega nyadi Kaban Kunsil Negeri Tupong madah munyi nya rambau ngulu Program Betemu Enggau Bala Tuai Raban Bansa Kandang Menua Matang ke diatur Majlis Perbandaran Padawan (MPP) ba Dewan Serbaguna Taman Malihah, Matang di Kuching.
Kelimpah ari nya, Daud bisi ngelansa sentang ulah raban penyakal ke semina landik mantaika jaku bantah sereta mantaika pengurang orang bukai.

"Sida tu semina landik bejaku tang nadai tekerejaka nama-nama pengulih. Nadai siti perintah ba dunya tu ulih tekerejaka pengawa tekala nya tauka ulih tegagaka semua projek dalam timpuh setaun aja . Nya alai, ulah sida penyakal tu endang semina deka meda menua tu charut.

"Terima meh pekara ke nyengala, perintah diatu endang perintah ke pemadu manah laban ngembuan perambu ke setipak enggau peneka rayat," ku iya.

Udah nya, Chairman MPP Kunselor Lo Khere Chiang madah, MPP endang seruran nyediaka agih belanja ngagai komiti dikena ngemujurka sesebengkah program ti ulih meri penguntung ngagai rayat ke diau ba pelilih menua dikuasa opis sida.

Berebak enggau nya, Lo ngelalau bala tuai raban bansa ngambika terus nyadi penyambung perintah dikena besemak enggau rayat.

"Aku ngelalau semua raban tuai raban bansa ngembuan penemu ke tebuka dalam bejalaika tanggung pengawa nyadi ketuai awakka semua pengawa ke deka diatur dudi hari terus mujur baka ke diatur sehari tu," ku iya seraya nesau mensia mayuh anang ninggalka diri nyereta sebarang aktiviti ke bisi diatur MPP udah tu.

Entara aktiviti ke bisi diatur nyerumba Program Betemu Enggau Bala Tuai Raban Bansa Kandang Menua Matang  tu iya nya Cheramah, Pekit Karaoke, Poco-Poco, Nyumpit enggau Main Futsal.

Sama bisi datai iya nya Chairman Pengatur Program Kunselor Haji Kamaruddin Su'ut, Sapit Chairman MPP Kunselor Tuan Haji Mohd Hashim Yap, bala tuai raban bansa enggau mensia mayuh ke diau ba kandang menua Matang.

NGABAS RAYAT...Datuk Haji Daud Abdul Rahman datai ngulu Program Betemu Enggau Bala Tuai Raban Bansa Kandang Menua Matang ke diatur Majlis Perbandaran Padawan (MPP) ba Dewan Serbaguna Taman Malihah, Matang ditu kemari. Sama bisi dipeda Chairman MPP Kunselor Lo Khere Chiang. 

Foto : Alvester Bigol Sulang

URB kena polis matau pengawa jai

MIRI : Unit Penginau Ngena Motosikal (URB) deka ditumbuh ba lima bengkah bagi menua di pelilih negeri tu endur bejalaika pengawa nginau genturung pendiau, rumah kedai, kilang-kilang industri enggau palan ngelantang ati dikena ngurangka kes jenayah.

Sapit Komisioner Polis Sarawak Datuk Law Hong Soon madah, entara pelilih menua ke udah dipilih tu iya nya Miri, Bintulu, Sibu, Padawan enggau Kuching lalu sama ampit nerima 17 buah motosikal dikena bejalaika pengawa nginau.

Iya madah, bisi  88 buah motosikal dijangka deka datai ba negeri tu enda lama agi sebedau dianjung ngagai lima bengkah endur ke udah dipilih.
"Naka ke diatu, kami bisi ngembuan URB ba Kuching tang dikena ngeringka pengawa ngelaban jenayah kami meli baru 88 buah motosikal ungkup kandang menua bukai di negeri tu.

“Aku pechaya dalam timpuh dua ngagai tiga hari agi motosikal nya deka datai,' ku iya pengudah ngemataka pengawa nyuaka tanggung pengawa nyadi Kepala Polis Pelilih Menua Miri ke diatu ditu kemari (Hari Satu).
Iya madah, genap pelilih menua deka ngembuan 17 kaban URB nyengkaum siku pemesai enggau pengawa matau.

"Tanggung pengawa URB enda ditatak ngagai pengawa nginau aja tang mega dikena nelebaka diri enggau mensia mayuh awakka muntang mensia mayuh nulung sida.

"Aku pechata, udah tu rayat mayuh deka suah agi betemu enggau polis laban ke nyau dampih pangan diri," ku iya.

Ba pengerami nya, Kepala Polis Pelilih Miri Asisten Komisioner Mun Kock Keong bisi nyuaka surat tanggung pengawa ngagai orang ke nukar iya Asisten Komisioner  Gan Tian Kee ti sebedau tu mangku pengawa nyadi Kepala Palan Pemansik Pekara enggau Pansik Kokurikulum Maktab Polis Diraja Malaysia Bukit Aman.

Berebak enggau nya, Mun deka ngisi tanggung pengawa ke ditinggalka Gan.

CPL dipuji pengguna bas Kuching

KUCHING :  Pemanah enggau pemujur pengawa ke digaga raban staf kompeni City Public Link (CPL) Bus Service Sdn. Bhd.endang patut dipuji laban mayuh nerima komplin ke chukup manah ari bala penguna bas.

Sapit Speaker Kunsil Negeri (DUN) Sarawak Datuk Roland Sagah Wee Inn madah, naka ke diatu Opis Meri Lesen Kerita Darat Kena Bedagang (LPKP) bisi nyebut sida berasai lantang ati meda servis ke udah diberi kompeni CPL enti dibanding enggau kompeni bukai.

"Kebendar CPL ukai semina dipenggi orang ke bisi puku dalam kompeni tu tang dipenggi semua (staf sida), nya alai kita meseti bebendar gawa ungkup rayat mayuh sereta kompeni," ku iya.

Iya madah munyi nya rambau Pengerami 'Jasamu Dikenang CPL' ke diatur ba The Banquet ditu malam Hari Minggu tu tadi.

Udah nya, Direktor CPL Haji Sazali Haji Morshidi madahka, CPL ti bepun dibuka kena 4 September 2009 laban ti deka nulung rayat ke suah ningga serebana sebedau nya.

"Setipak enggau menua Kuching ke nyadi bandar besai, CPL ngepunka operasi ngena dua buah bas lalu pejalai nengah dua lurung iya nya K-7 nuju Taman Maliah, lalu K-8 nuju menua adap ke Utara enggau Selantan nyengkaum mansa Stutong. Raban staf ke gawa maya nya mega enda mayuh iya nya semina empat iku staf opis enggau lima iku deriba.

"Maya ba pun pengawa CPL enda ulih lari ari dituntung penguji tang asil ari pemintar bala direktor CPL ngatur pelin baru lalu ngujungka sehari tu CPL ngembuan 59 buah bas.

"Orang ke gawa enggau CPL mega majak betambah, kelimpah ti ngerembaika pejalai ngagai menua Serian, Sri Aman, Lundu, Bau enggau Sematan," ku Sazali.

Berebak enggau pengerami nya, CPL bisi nyuaka tanda basa ngagai bala staf opis nyengkaum bala deriba ke udah nunjukka pemanah pengawa sekumbang ke gawa enggau CPL.

Tuju ke meri tanda kenang nya dikena CPL meri tanda basa enggau meransang bala staf ke bukai ngambika bagas agi ngereja pengawa udah tu.

Sama bisi datai ba pengerami tu Menija Besai CPL Micheal Wong, enggau Sapit Direktor LPKP Datuk Peter Minos.

Belanja ungkup JKM 2014 : RM1.28 billion

KUCHING : Opis Menteri Pemansang Orang Indu, Ruang Bilik enggau Raban Bansa ngemendarka agih RM1.28 billion ngagai Opis Pengintu Pengelantang Raban Bansa (JKM) dikena mantu sida nya sepemanjai taun tu.

Menteri JKM, Datuk Seri Rohani Abdul Karim madahka, opis menteri iya benung enggau naka ulih nulung raban sida ke endang patut ditulung.

"Ba Sarawak bisi RM45.9 juta udah dikemendar lalu diberi ngagai raban sida ke endang patut dibantu.

"Tebal agi bantu ke baka tu diberi ngagai bala anak mit, orang timpang pendiau (OKU) tauka orang sakit raya, OKU  enda dapat gawa, bantu bukai enggau elaun pengereja pinchat.

Kami deka nyadung pemeri tu enggau manah ngagai semua orang ke endang patut dibantu ba serata menua," ku iya.

Iya madah munyi nya rambau aum pengarang berita pengudah nemuai ngagai Hospital Besai Sarawak (HUS) kena Hari Minggu tu tadi.

Berebak enggau nya iya mega ngelalau semua orang ke bisi ruang bilik ke bisi nerima ke bisi nerima bantu ari opis pengintu pengelantang madah ngagai JKM nyema orang ke nerima bantu nya udah parai ngambika nama sida dikinsil ari ripih nama nerima bantu.

"Opis Menteri mega seruran deka meratika rikod sida ke nerima bantu ari JKM seruran diperesa belama lalu kerejasama ari orang ke sebilik enggau orang nerima bantu beguna amat.

"Orang ke sebilik enggau orang ke nerima bantu meseti ngembuan lurus penemu madah ngagai JKM pekara ke nyadi lalu anang beambi ulih nguna duit bantu nya," ku iya.

Tambah mega nyema orang ke sebilik enggau penerima bantu enda madahka pekara nya, sida deka dipinta mayar baru duit bantu nya ngagai opis pengintu pengelantang, ku tandu Rohani.

Ketegal ini nyinuk sembiang ucu empa api

BUKIT MERTAJAM : Siku anak mit indu retung ba penusah angus ke nyadi ba sebuah rumah ba Jalai Rozhan, Cheruk Tok Kun ditu kemari (Hari Satu).

Nembiak ke parai tu benama Nurul Adryana Lateesya Mohammad Asyri, 2, ditemu parai dalam sebuah bilik ba ringkat baruh rumah nya.
   
Direktor Opis Bomba enggau Penyelamat Pulau Pinang Azmi Tamat madah, penusah angus nyadi urung pukul 11.00 pagi lalu ngujungka sebuah rumah ke diuan mansa enggau sida sebilik angus lengis.
   
"Ini enggau menyadi lelaki mansa ke sama dalam bilik maya penusah nyadi sempat nyelamatka diri," ku iya madah ngagai pemberita ba palan penusah nyadi.
   
Iya madah, tiga kereban pengangkut enggau 25 iku staf Balai Bomba enggau Penyelamat Perai, Bukit Mertajam enggau Perda datai ngesah palan nya lalu sida ngambi awak kira 20 minit endur ngerara api.

Kebuah penusah nyadi agi benung dipansik. Nangkan ke nya, Siti Zanyah Yaakob, 74, madah, maya penusah nyadi dua iku uchu iya ke benama Nurul Adryana Lateesya enggau Danial Mukhriz, 4, diuan iya dalam rumah nya lalu apai enggau indai anak mit nya bekereja.
   
"Kami tiga muchu endang nguan rumah maya penusah nyadi. Laki aku enggau dua iku agi uchu kami nyau nurun ke sekula.
   
"Maya nya, aku benung sembiang dalam bilik lalu Nurul Adryana enggau menyadi iya bemain ba bilik ke sebaka. Aku ngetu sembiang pengudah tesiumka bau asap enggau ngasaika kebu angat...maya aku pansut ari bilik aku meda api makai tangga kami lalu berumban pansut," ku Siti.
   
Siti Zanyah madah, iya semina ingatka Nurul Adryana Lateesya agi dalam rumah pengudah dipadahka menyadi lelaki iya.

"Kami bisi nguji nyelamatka iya tang api chukup mau," ku iya.
   
Berebak enggau nya, Chairman Zakat Pulau Pinang (ZPP) Datuk Mohd Salleh Man ke sama bisi datai ngabas mansa bisi nyuaka bantu duit ari ZPP.Bernama

Rayat ngarapka Kunselor baru pintar gawa

SERIAN : Rayat diatu manggaika penuh pengarap ngagai pengawa ke dikereja bala pekereja ba Opis Bekuasa Pelilih Menua (PBT) di negeri tu.

Menteri Pemansang Infrastruktur enggau Penyambung Dato Sri Michael Manyin Jawong ngasuh bala Kaban Kunsil mendingka serebana enggau naka ulih mutarka penanggul rayat.

Iya madah, endang beguna amat bala Kaban Kunsil meri penemu sereta gawa nyadi siti tim ngambika peminta rayat ulih dikereja.

"Kaban Kunsil meseti nimbal enggau jampat penanggul ke bisi dikenataika rayat awakka penanggul nya enda balat nyadi," ku iya.

Iya madah munyi nya rambau Pengawa Ngangkat Sumpah Nyadi Kaban Kunsil, Kunsil Pelilih Serian (MDS) 2014-2015 ba Dewan Masyarakat Serian kemari (Hari Satu).

Iya madah, laban ke nyadi orang ke pemadu dulu dilawa rayat nyadi bala kunsil meseti nyikap diri awakka ulih teputarka penanggul tauka isu-isu ke bisi dikenataika rayat.

"Kunsil ke manah iya nya ulih ngereja pengawa nitihka peneka rayat sereta nadai ngarapka upah, sida naka ulih ngereja pengawa enggau bebendar," ku iya.

Iya madah, pengeransing Kunsil dipeguna amat laban sida ukai semina nyadika mata enggau pending perintah, tang mega nyadi ejen pengubah.

"Aku pechaya, sida ke udah dipadu tu ukai semina nyadika tanda basa tang nyadi siti tanggung pengawa ke chukup berat, pengarap ke udah diberi nya patut dibalas enggau pemanah pengawa ngagai semua orang," ku iya.

Manyin madah, genap penanggul semina ulih diputar enti bisi kerejasama ari semua orang.