MPS majak nyulut

TERIMA KASIH...Soon Koh nerima tepa tanda basa ari Daniel (tengah) rambau Pengerami Makai Malam MPS ba sebengkah hotel tebilang ba Sibu.

"Sepemanjai 31 taun udah ditumbuh, MPS dipeda chukup bebendar nulung perintah ngemansangka menua Sibu. Aku ngarapka MPS ulih ngereja manah agi pengawa ungkup mensia mayuh udah tu."
Dato Sri Wong Soon Koh
Menteri Wang Kedua

SIBU : Majlis Perbandaran Sibu (MPS) udah mandangka penyulut pengawa ba sepemanjai taun 2012 pengudah ke nerima Empat Bintang Anugerah Penilaian Majlis Tempatan ulih Opis Menteri Pengawa Berumah enggau Perintah Pelilih Menua.

Menteri Wang Kedua, Dato Sri Wong Soon Koh madah, pemujur enggau penyulut nya berindik ari kerejasama enggau pemanah pengawa bala staf MPS ke deka ngemansangka menua Sibu.

"Sepemanjai 31 taun udah ditumbuh, MPS dipeda chukup bebendar nulung perintah ngemansangka menua Sibu.

 "Aku ngarapka MPS ulih ngereja manah agi pengawa ungkup mensia mayuh udah tu," ku iya.

 Iya madah munyi nya rambau Pengerami Makai Malam MPS ke diatur ba sebengkah hotel tebilang ba ditu malam Hari Empat tu tadi.

Soon Koh ti mega nyadi Menteri Perintah Pelilh Menua enggau Pemansang Mensia Mayuh ngarapka semua Kunsilor MPS bebendar agi ngereja pengawa sereta berunding panjai lebuh ngaga pemutus mutarka sebarang penanggul ke bisi nuntung mensia mayuh.

"Kunsilor patut besedia ngereja pengawa enggau ati ke lurus ngambik aulih nyadi teladan ke chukup manah ngagai mensia mayuh," ku iya.

Iya mega madahka bandar Sibu nyadi pusat hub wilayah tengah negeri Sarawak lalu sedia napi mayuh projek besai kelebih agi pemansang ungkup menua Sibu.

"Ambika chunto, pemansang jalai ari Sibu ngagai Tanjung Manis udah digagaka jematan awakka meri pengelantang ngagai mensia mayuh ke semak sereta nyungkak pemansang ekonomi ditanngkan enggau projek ngemesaika Padang Bilun Sibu.

"Kelimpah ari nya, Sibu mega ngasaika penguntung asil ari projek pemansang Koridor Renewable Energy Sarawak (SCORE) ke nyediaka mayuh pengawa puang, dagang enggau pemansang bukai ngagai menua  Sibu enggau negeri Sarawak,"ku iya.

Sama bisi datai maya tu iya nya Sapit Chairman MPS, Daniel Ngieng Kiong Ann, Seketeri MPS, Hii Chang Kee, semua kunsilor MPS enggau staf MPS.

Tanggungjawap pengajar majak besai

KUCHING : Pemansang infrastruktur baka jalai raya ba kandang menua pesisir ulih ngemuntangka pejalai kelebih agi dalam bidang pelajar sekula.

Kaban Parlimen Batang Sadong, Nancy Shukri madah, mensia mayuh seruran beguna ubah pemansang dikena ngemuntangka sistem pelajar sekula bejalai enggau mujur.

"Kami seruran ngemanahka perengka infrastruktur baka sekula enggau bekal elektrik ba menua Batang Sadong ngambika pengidup rayat lantang agi baka ba menua bandar,"ku iya.

Iya madah munyi nya mya bejadi pengerami alumni orang ke kala belajar ba Sekula Primari (SK) Abang Man enggau Sekula Sekondari (SMK) Simunjan No. 1 begulai enggau bala pengajar ba sebengkah program ke diatur ba hotel tebilang ba ditu, malam Hari Lima tu tadi.

"Tanggungjawap pengajar jam ke diatu besai amat laban betapi enggau pemansang teknologi pemadah enggau penyambung. Nya alai, bala pengajar meseti bebendar ngelalau pelajar ngambika enda terunda-runda enggau pemansang dunya siber," ku iya.

Nancy madah, jaku ajar bala pengajar dulu kelia chukup dipebasaka apai indai laban nulung ngajar bala anak nyadi orang ke menyana, enti diatu apai indai kelalu ngasika bala anak sida.

"Nya alai, aku meransang Gerempung Apai Indai enggau Pengajar (PIBG) meseti ngemataka sereta besaup ngajar bala nembiak sekula," ku iya.

Dulu ari nya, seiku orang ke kala nyadi Prinsipal SMK Simunjan No.1, Ahmad Majarie madah, tanggung pengawa penjar jam ke diatu endang berat agi enti dibanding enggau jeman sida kelia.

"SMK Simunjan No.1 suba balat dikerinduka bala pelajar ba menua Batang Sadong sebedau SMK Semera ditumbuh. Maya nya, tanggungjawap kami ke nyadi pengajar enda kala ditanggang lebuh ngelunsin ba pelajar," ku iya.

Udah nya, orang ke ngatur program, Awla Deris madah, raban nembiak rebak diatu patut beterima kasih laban gaya sekula diatu jauh lebih manah enti dibanding enggau dulu suba.

"Tuju program tu diatur dikena mulaika pengingat lama sereta ngerapitka kaul entara pengajar enggau bala nembiak sekula," ku iya.

Koperasi Belia Sibu Berhad nguji bedagang sayur

TANDA BASA… Abu Seman Jahwie (tengah) nerima tepa ari Chairman Gerempung Raban Nembiak Sibu (PPS), Bunsu Junaidi pengudah bejadi aum besai Koperasi Belia Sibu Bhd ba Sibu lalu dikemataka Mohd. Zaidi (kanan) enggau Morshidi Federick (Kiba).

SIBU : Pengawa ke bisi penau dikemansangka Koperasi Belia Sibu Berhad iya nya ngudar bemacham sayur ngagai Matu enggau Daro sereta kandang menua pesisir baka Pulau Bruit enggau Tanjung Manis.

Seketeri Politik Kepala Menteri ti mega nyadi Kaban Kunsil Nengeri Jemoreng, Abu Seman Jahwie madahka, kenyau ari mya aiya besekula menya nyentuk ke diatu iya nemu sayur ke dijual ba Matu enggau Daro endang diudar ari Sibu.

“Nya alai, koperasi tu patut berunding panjai ngambika sayur sida ulih diudar ngagai Matu enggau Daro sereta ngagai menua pesisir,” ku iya rambau bejadi aum besai Koperasi Belia Sibu Berhad ke diatur Gerempung Raban Nembiak Sibu (PPS) ba ditu kena malam Hari Lima tu tadi.

Abu Seman madah, koperasi tau berengkah nguji bedagang mimit-mimit baka muka kedai ba kampung-kampung ke diadang ulih beretan lama.

Iya mega ngelalau bala kaban gerempung nya ngambika ulih milih ketuai ke lurus penemu, ngambika koperasi sida mansang maju sereta mujur.

Penemu ke lurus sereta ngembuan tanggungjawap nyadi pekara ke patut dikembuan orang ke nyadi tuai ngambika orang bukai enda lari ninggalka koperasi.

Iya mega madahka mayuh penguntung, diulih enti masuk kopersi nya lalu iya madahka koperasi nya meseti chukup puku sereta bejalaika pengawa enggau naka pemanah.

“Entti atur pengawa udah meruan, ditambah enggau kaban dalam gerempung sepenemu sereta enda alah tipu orang bukai, tentu koperasi tu ulih mujur jemah," ku iya.

Enti ulih, gaga meh koperasi tu nyadi kedai ke pemadu maju ba endur tu. Naka ke diatu lebih 800 koperasi bisi ba nengeri tu, ku iya.

Maya aum nya, Mohd. Zaidi Haji Abdul Rahman dipilih nyadi Chairman Koperasi Belia Sibu Berhad, udah nya Morshidi Federick naydi Sapit Chairman. Orang ke nyadi Seketeri iya nya Mohd. Nazim Haji Masni lalu iya dibantu  Jamaludin Taha. Orang ke nyadi Tukang Wang iya nya Mariam Talib lalu disaup Shahmie Jamali.

Chairman Gerempung Raban Nembiak Sibu (PPS), Bunsu Junaidi sama bisi datai maya aum tu.

PBT dipinta nyaup ngerapitka kaul

ULANG TAUN KE-60… Dato Sri Wong Soon Koh (tengah) begulai enggau Datu Dr. Penguang Manggil, James Laju Ambok, Justani Joni, Datuk Tiong Thai King melah kek beserimbai enggau pengerami makai malam Majlis Daerah Luar Bandar Sibu (SRDC) ba Sibu. Bela bisi dipeda Temenggong Datuk Haji Wan Hamid Edruce.

SIBU : Semua staf Opis Pelilih Menua (PBT) ba serata nengeri tu di seluruh negeri tu diangkan ngambika bela besaup ngerapitka kaul entara pupu raban bansa setipak enggau pelin baru PBT Sarawak.

Menteri Rampa Menua enggau Pemansang Mensia Mayuh, Dato Sri Wong Soon Koh madah, genap iku pupu raban bansa di negeri tu meseti begempung beserakup enggau pangan diri lalu anang semina berunding ngati ke diri.

Kepala Menteri, Pehin Sri Haji Abdul Taib Mahmud, sebedau tu udah ngatur baru pelin PBT laban iya enggai meda pengawa orang ti nadai ibuh ke orang bukai, ku iya.

Iya madah munyi nya maya pengerami makai malam beserimbai enggau pengerami ngintu ulang taun ke-60 Majlis Daerah Luar Bandar Sibu (SRDC) ba ditu, kena Hari Lima tu tadi.

Sama bisi datai ba pengerami tu iya nya Seketeri Tetap Opis Menteri Rampa Menua enggau Pemansang Mensia Mayuh, Datu Dr. Penguang Manggil, Chairman SRDC, James Laju Ambok, kaban Parlimen Lanang, Datuk Tiong Thai King enggau Seketeri SRDC, Justani Joni.

Soon Koh ti mega nyadi Menteri Wang Kedua madahka, dikena napi pemansang ekonomi ke maya hari, mensia mayuh patut patut besukung betulung enggau pangan diri.

Nya alai, endang udah nyadi tanggungjawap semua staf Majlis meransang mensia mayuh nitihka konsep 1 Malaysia ke ditempa Menteri Besai, ku iya.

Iya mega madahka, perintah udah mutus ati nginsur servis semua staf Majlis PBT ba serata nengeri ngagai enam bulan agi laban pengawa bepilih besai ke-13 deka diatur taun baru.

"Aku ngarapka semua staf Majlis PBT ulih bebendar agi nulung perintah nempa pemanah kaul enggau pengelikun menua ba nengeri tu," ku iya.

PBT diatu nyadi kepala perintah, meri servis ke pemadu manah ngagai genap iku rayat ba nengeri tu, ku iya lalu minta semua staf PBT beratika pengawa ke udah dikereja sepemanjai taun tu ngambi nyadika teladan pengawa ba taun 2013.

“Kitai meda udah mayuh pemansang enggau pemujur ulih SRDC sepanjai taun tu. Taja baka nya agi mayuh pekara ke patut digaga lebih manah.

"Anang beguai berasai puas ati enggau pengulih ke udah dijapai. Ngarapka bala staf  SRDC terus manah ngereja pengawa ungkup mensia mayuh," ku iya.

Ba pengerami nya, Soon Koh diuluka Dr. Penguang sereta bala ke bukai baka James Laju, Justani Joni, Datuk Tiong Thai King, Temenggong Datuk Haji Wang Hamid Edruce enggau staf Majlis SRDC melah kek dikena nyambut ulang taun ke-60 SRDC.

MNS, Kubah Ria nyadi pasar besai

TERIMA KASIH … Penganti Direktor pengeluar Program Sarawak, Fee Lin Chew nyuaka tepa ngagai Datuk Amar Abang Johari  Tun  Abang Haji Openg maya Pengerami Bejadi Satok Fest 2012, ba Kuching.

"Nengah pemansang pasar nya jemah, pendiau nengeri Sarawak diadang berubah laban palan nya nyau nyadi pasar besai ke lalu nyungkak penatai pemisi rayat ke diau semak nya."
Datuk Amar Abang Johari Tun Abang Haji Openg
Menteri Pengawa Berumah enggau Dagang Temuai


KUCHING : Medan Niaga Satok (MNS), Kubah Ria deka digaga nyadi sebagi ari pelin pemansang awakka nyadi Palan Pasar Besai ke baru ba Petra Jaya.

Menteri Pengawa Berumah, Datuk Amar Abang Johari Tun Abang Haji Openg madah, pelin pemansang ba endur nya deka digaga berenggat-renggat.

Iya madah, naka ke diatu perintah udah nembuka projek pemansang ungkup rengat keterubah iya nya ngaga MNS enggau Medan Kubah Ria (MKR) ke diadang tau narit ati temuai raun ngagai nengeri tu.

"Kelimpah ari nya, sekeda pasar besai digaga berimbai enggau palan nya dikena nyungkak pemansang ekonomi rayat ke nguan endur nya.

"Nengah pemansang pasar nya jemah, pendiau nengeri Sarawak diadang berubah laban palan nya nyau nyadi pasar besai ke lalu nyungkak penatai pemisi rayat ke diau semak nya," ku iya.

Iya madah munyi nya rambau bejadi Satok Fest 2012 ke diatur Palan Gerempung Pendiau Dagang Temuai Satok (PKPS), Opis Penabur Program Sarawak (RTM) sereta sekeda agensi perintah ba MNS, Kubah Ria, ba ditu malam Hari Lima tu tadi.

Sama bisi datai ba pengerami tu iya nya Datuk Bandar Dewan Bandar Raya Kuching Utara, Datuk Abang Abdul Wahap Abang Julai, Chairman Pengatur Pengerami Satok Fest 2012, Shah Iszhan Haji Isnin enggau Penganti Direktor RTM, Sarawak, Fee Lin Chew.

Johari ti mega nyadi Menteri Dagang Temuai madahka, ba renggat kedua ila, sebuah panggung teater ke beungkus RM5 juta enggau sebuah skrin elektronik besai deka digaga dikena narit temuai ngelawa endur nya.

Iya madah, panggung nya ila deka digaga berimbai enggau MNS, udah nya skrin elektronik deka digaga semak Jematan Tunku Abdul Rahman.

"Reti nya, mensia mayuh nyengkaum temuai ari menua luar ulih nemu mayuh penerang bekaul enggau program sereta barang ke bisi dijual ba endur nya," ku iya.

Berebak enggau nya, iya madah, perintah diatu benung merambu deka ngaga pengkalan ke ngena teknologi ari menua Australia dikena ba Sungai Sarawak.

"Udah nya, dua iti agi pengkalan ke digaga ba Sungai Lazim enggau Sungai Bintangor awakka dua bengkah palan nya nyadi palan penyangkai temuai ke raun semak menua nya," ku iya.

Ba pemansang ke sebaka mega, Kaban Kunsil Nengeri Satok nya madahka, eprintah nengeri udah sedia ngaga baru Jematan Gantung Satok ke udah runtuh taun 2004.

Taja baka nya, ku iya perambu ngagai jematan kira 130 meter pemanjai nya agi benung diperunding lalu ungkus dikena ngaga jematan nya dipelabaka RM5 juta.

Ba pengerami nya, Johari madahka orang ti menang dalam pekit Satok Fest 2012 deka dipelanja tiket bilun raun ke menua Semenanjung Malaysia kena bulan April taun tu.

"Sida (pemenang) tu deka diasuh raun ngagai nengeri Melaka ngambika meda pengerami ke bisi diatur ba endur nya lalu sida deka diasuh mandangka main asal ari negeri Sarawak," ku iya.

Ibun pesaka bansa ungkup nembiak rebak dudi

KUCHING : Iventori ke bisi dipandangka ba muzium entara pesaka bansa ke chukup berega, ku Seketeri Tetap Opis Menteri Pemansang Sosial Nengeri Sarawak, Datu Affandi Keli.

Iya madah, inventori ke baka nya patut dijaga enggau meruan awakka bisi dipeda raban nembiak rebak dudi.

PENGARI SARAWAK...Datu Affandi Keli (Kanan) nyuaka menira Sarawak ngagai Direktor Muzium Sarawak, Ipoi Datan (Kiba) ti nyadi Tuai Kontijen Muzium Sarawak rambau Hari Muzium Peringkat Nasional 2012. Pengawa nyuaka ke menira nya diatur ba Opis Baitulmakmur, Kuching.

"Enti barang pesaka bansa tu enda dijaga enggau manah, kitai deka punas barang-barang lama, nya alai iya patut diibun enggau meruan," ku iya.

Iya madah munyi nya ngagai pemberita rambau pengawa nyuaka menira Sarawak ngagai Tuai Kontijen Muzium Sarawak iya nya Direktor Muzium Nengeri Sarawak Ipoi Datan beserimbai enggau Hari Muzium Entarabansa 2012, ke diatur ba Opis Baitulmakmur apin lama ke udah.

Nitihka penerang Affandi, muzium chukup beguna laban endur nyimpan barang-barang pesaka lama.
"Berindik ari nya, kitai deka nemu sejarah ke kala nyadi ba menua tu lalu nya meh kebuah barang-barang nya patut diibun enggau meruan," ku iya.

Ngenang pasal rintai barang ke bisi dipandangka ba muzium Sarawak, iya madah entara  barang nya baka barang arkeolologikal, zoologikal, etnografik enggau arkib.

“Naka ke diatu, penyampau inventori ke bisi dipandang bedau mayuh lalu kami deka naka ulih nambahka penyampau nya dalam timpuh dua taun ke deka datai.

“Enti kitai meda pemasang muzium ba menua luar, chukup bebida enggau ba menua tu. Nya alai kami deka berundingka chara berunding enggau opis muzium ari menu luar,” ku iya.

Berebak enggau nya, iya nyuaka menira Sarawak ngagai Tuai Kontijen Muzium Sarawak ke deka ngarika negeri tu rambau Pengerami Hari Muzium Entarabansa 2012 ke deka diatur ba pasar Pekan, Pahang kena 17 ngagai 21 Oktober tu.

Mayuh bengkah aktiviti deka diatur beserimbai enggau pengerami nya baka main enggau lumba, aum besai ungkup bala staf muzium ba serata menua enggau mayuh agi ke bukai.

Affandi madah, nengah program ke baka tu bala staf muzium ulih neritka kaul sereta bekunsi penemu enggau bala orang ke bisi nyereta program.

Kira 40 iku staf ke deka ngarika kontijen muzium Sarawak rambau pengerami tu ila.

Iya madah, program nya diatur beserimbai enggau Pengerami Meri Nama Muzium Sultan Abu Bakar ba Pekan, Pahang lalu Sarawak deka nyadi palan endur ngatur program ke sebaka taun baru nyin ila.

PNMB udah sedia nyelak keretas undi

KUCHING : Opis Penyelak Nasional Malaysia Berhad (PNMB)  udah nyediaka diri nyelak keretas-keretas undi ke deka dikena maya pengawa bepilih besai ke deka datai.

Direktor Pengatur Pengawa PNMB Izham Yusoff madah, sida udah udah nyediaka diri enggau pekara nya kira enam bulan ke udah ngambika ulih dikena bala pengundi ba serata menua.

"Kami deka nyelak keretas undi besai agi ari ke udah awakka bala pengundi nyamai agi ngena iya jemah," ku iya.

Iya madah munyi nya rambau randau begulai enggau pemberita pengudah pengawa Nyuaka Zakat Dagang Opis Penyelak Percetakan Nasional Malaysia  Berhad (PNMB) ba opis Baitulmakmur kena Hari Empat tu tadi.

Iya madah, pengawa nyelak keretas undi nya udah diatur sida enggau manah lalu nganti maya ke dikena aja.

Izham madah, PNMB semina bejalaika tanggung pengawa nyelak keretas undi baka ke dipinta Komisioner Pengawa Bepilih Besai (SPR).

"Kami semina nyelak kereta ungkup pengawa ke besai-besai, kami enda nyelak poster ungkup bala chalon ke deka bediri," ku iya.

Iya madah, pengawa nyelak poster chalon ke deka bediri diatur chalon empu ba sebelah kompeni swasta tauka ba endur bukai.

Kami semina nganti jaku gerah endur nyelak aja, laban semua utai udah sedia magang, ku iya.

"Kami enda nemu kemaya haribulan pengawa bepilih besai diatur, tang kami udah nyediaka diri ngambika ulih ngemujurka tanggungjawap kami," ku iya.

Pemujur pelajar balat bepanggai ba apai indai

BERI PUJI... Penerima Gelar Pro-Chanselor, Sultana Parvin Habeebur Rahman ke ngambi kus bioteknologi disium indai iya Jehabar Nachiyar pengudah tembu pengerami konvokesyen ke-16 UNIMAS.

Thong Chia Chia

KOTA SAMARAHAN : Pemujur seiku-seiku pelajar balat bepanggai ba peransang apai indai, bala kaban, nitihka teladan bala menyadi, juluk pengidup enggau pengeransing diri empu.

Beduduk ari peransang ke baka nya meh ngujungka tujuh iku pelajar Universiti Malaysia Sarawak (UNIMAS) bela tejapaika juluk ati sida sereta mujur bulih gelar ke pemadu besai akademik beserimbai enggau Pengerami Konvokesyen ke-16 UNIMAS 2012 ke diatur ba DeTAR PUTRA, UNIMAS.

Lebuh ke dirandau pemberita, seiku penerima Gelar Pelajar Diraja iya nya Noryafikah Asyilla Bt. Nordin, 22, madah, berindik ari peransang bala pengelicha ke nadai nemu leju ngujungka iya bulih Gelar Dipuji dekan enam kali bejurut-jurut.

"Segenteran leka jaku ke seruran dikingat nyadika peransang sekumbang aku belajar UNIMAS tu iya nya 'Jika Kejayaan Yang Diinginka Berusahalah Ke Arah Itu'," ku iya sambil tuchum merening apai iya ke balat peransang sepanjai iya nembuka pelajar.

Noryafikah ngambi kus Kimia Sumber lalu madahka diri deka terus nyambung pelajar ba UNIMAS ngagai tikas ke lebih tinggi.

Nangkan ke nya, Sultana Parvin Habelur Rahman, 23, madah, pengeransing diri empu ke deka nulung pengidup sida sebilik ngujungka iya bulih Gelar Dipuji Dekan tiga kali sepanjai belajar ba UNIMAS.

"Pemujur aku tu deka dikunsi aku enggau indai, niang apai, bala menyadi enggau bala pengelicha," ku Sultana.

Sultana endang orang Kuching lalu kus ke diambi iya ba UNIMAS iya nya Bioteknologi Sumber. Dalam pengerami konvokesyen ke sekali tu iya mujur bulih Gelar Pro-Chanselor lalu madahka diri deka mupuk ngiga pengawa nyema bisi peluang gawa ba palan pelajar tinggi di menua tu.

Udah nya, seiku agi pelajar ke bela bisi nerima Gelar Khas Senat, Thong Chia Chia, 24, ke ngambi kus Enjinir Sivil sereta endang peranak menua Sarawak ari Kota Samaraham madah, orang ke udu meransang iya mujur ba pelajar iya nya indai iya empu.

"Gelar ke diterima aku sehari tu ukai ungkup aku aja tang ungkup orang ke udah kelalu mayuh meransang aku iya nya indai aku empu.

"Enti nadai peransang ari indai aku melabaka engka pedis mimit aku deka ngulihka Gelar Dipuji Dekan lapan kali bejurut sepanjai belajar ditu," ku Thong.

Udah nya, indai Thong iya nya Tan Sai Ngo, 45 ke semina bedagang ngaga gari madah, pemujur Thong ukai semina ari peransang iya aja tang mega berindik ari pengeransing iya empu.

"Kenyau ari mit Thong dipeda endang orang ke pintar sereta rajin ngereja pengawa lalu aku melabaka iya bisi neladan bala menyadi tuai iya ke bukai ke bela mujur nyadi graduan ba universiti.

"Aku berasai gaga amat meda semua anak aku tiga iku nyengkaum Thong ke pemadu biak mujur nyadi graduan univsersiti, ngarapka iya ulih mujur ba peringkat master degree dalam bidang enjinir ke disambung iya udah tu," ku Tan enggau naka pengaga.

RM300j diberi perintah besai dikena miki jalai batang

BEKENU : Perintah Besai ngungkupka agih belanja RM300 juta dikena miki jalai batang ke udah rusak awakka ulih dikena rayat ke diau ba menua pesisir di serata negeri tu.

Sapit Menteri Besai, Tan Sri Muhyiddin Yassin madah, bala iya deka ngasuh Opis Menteri  Menua Pesisir berunding enggau Perintah Nengeri Sarawak ngerintaika jalai-jalai ke patut dimiki.

"Agih belanja tu dikemendar endang dikena miki jalai-jalai batang ke udah maju awakka ulih ditengah dikena ngelawa rumah panjai tauka kampung-kampung ba menua pesisir.

"Kami (perintah) ngarapka tu pekera keterubah dikena miki jalai batang," ku iya.

Iya madah munyi nya nya lebuh ke dirandau pemberita pengudah Pengerami Begulai Enggau Orang Melayu ISlam ba Kampung Pantai Bungai Bekenu, apin lama ke udah.

Muhyiddin madah, agih belanja nya mega sebagi ari pengawa perintah dikena nlung rayat ba Sarawak kelebih agi berebak enggau Bajet 2013 ke udah dipadah.

"Semua utai tu digaga nitihka langgur pemansang ke udah diperambu dalam NKRA menua pesisir ke deka meda semua rengka rama baka jalai raya manah ditengah," ku iya.

Muhyiddin ngarapka semua jalai ulih dimiki enggau mujur nengah agih belanja ke udah ditambah mayuh agi ari ke udah.

"Kami deka minta rintai projek-projek ba kamoung, bekal ai enggau elektrik ngambika ulih diperunding enggau Opis Menteri Menua Pesisir," ku iya madah nyemetak bendar.

Meseti ngemeranka pelajar sekula

NYUAKA GELAR... Tuai Pemegai Menua  Tun Datuk Patinggi Abang Haji Muhammad Salahuddin nyuaka Gelar Ijazah Kehormat Doktor Falsafah (Pansik Pemansang) ngagai Kepala  Menteri Pehin Sri Haji Abdul Taib Mahmud (kiba) beserimbai enggau Pengerami Konvokesyen ke-16 UNIMAS.

“Pengawa ngaga mayuh agi sekula sekalika di bandar tauka di menua pesisir udah meri mayuh agi peluang ngagai pelajar nampung pelajar sida ngagai sekula sekondari lalu nya mandangka komitmen perintah ke deka nentuka menua tu ulih ngeluarka pengereja pengawa ke landik asil ari pelajar."  
PEHIN SRI HAJI ABDUL TAIB MAHMUD
Kepala Menteri Sarawak

KOTA SAMARAHAN:  Semina nengah pelajar kitai ulih mansutka modal mensia ke ulih mantu perintah dalam ngemujurka juluk ati ke deka ngatur semua program pemansang dalam menua tu. 

Kepala Menteri Pehin Sri Haji Abdul Taib Mahmud madahka, pemesai guna pelajar nulung perintah ngemujurka program pemansang selepas merdeka ari pegai British, ke alai kitai mujur ngapuska peresa Common Entrance ke diatur perintah Koloni ke alai semina meri peluang ngagai 30 peratus pelajar menua tu ulih neruska pelajar ngagai peringkat sekula sekondari. 

Iya madahka, asil ari polisi nya, mayuh pelajar nadai ulih neruska pelajar sida ngagai peringkat ke lebih tinggi agi. Ketegal nya menua kita kurang pengereja pengawa ke ngembuan pengelandik. 

“Pelajar nya siti ari batu pemun dalam pengawa nempa modal mensia. Sepemanjai aku udah ngemeranka pengawa dalam politik aku udah meda penyeranta ke tekelalu ngasuh kitai nyabak dalam ati lebuh beratika pemerinsa pendiau enggau penyuntuk rayat di menua pesisir ke selalu nganti pemansang dibai ngagai tempat sida. 

“Rayat amat arapka bala tuai kena nebus nasip sida sereta mantu ngeluarka pengidup sida ari penyeranta.

Nya alai peneleba bakatu ngasilka ati diri bekereja enggau naka ulih kena mantu sereta ngubah nasip rayat ke kenyau ari suba auska pemansang," ku iya.  

Iya bejaku munyi nya dalam pengerami meri terima kasih serimbai enggau pemeri Anugerah Ijazah Kehormat Doktor Falsafah (Kajian Pembangunan) ngagai Kepala Menteri ba pengerami Konvokesyen Ke-16 Universiti Malaysia Sarawak (UNIMAS) di DeTAR PUTRA UNIMAS ditu hari tu. 

Ku iya, penemu ke begantung enggau tulung ari expatriate ke kering lebuh era pengudah medeka taja pan perintah udah mupuk ngatur program pemansang ke alai mayuh agi sekula udah digaga kena nampung peminta rayat sereta penyampau pelajar ke betambah selepas sistem peresa common entrance diapuska.

Pehin Sri Taib madahka, pengawa ke ngaga mayuh agi sekula dibandar enggau di menua pesisir udah ngujungka lebih mayuh agi pelajar bepeluang nampung pelajar sida ngagai peringkat sekula sekondari.

Tiu mandangka pengeras komitmen perintah deka meda menua tu ulih ngeluarka pengereja pengawa ke ngembuan pengelandik nengah sistem pelajar. 

“Penumbuh universiti perintah ari luar Kuala Lumpur  enggau Lembah Klang mega nyadi manifestasi pengeras perintah ngemeranka pelajar sekula ngagai rayat kena nentuka modal mensia ke ulih mantu perintah ngemujurka program pemansang menua. 

“Penumbuh UNIMAS dalam taun 1992 nya siti ari pengawa perintah kena ningkatka pengeluar modal mensia di Sarawak kena nampung peminta pasar pengereja pengawa kemaya hari.

Aku temegah ati meda pemanah pengawa  UNIMAS ke udah mujur ngeluarka graduan ke bekualiti setimpal enggau juluk ati ke numbuhka institusyen tu 20 taun ke udah lalu," ku iya.

Ku iya, raban nembiak kemaya hari tu amat betuah laban diadaka maya menua tu udah merdeka lalu benung ngasaika arus pemansang ke majak nambah.

Pemansang kemaya hari tu patut diguna enggau penuh ulih raban nembiak baru kena nentuka mayuh agi pemansang dudi hari ila.

“Sida mega patut mereti ke juluk ati perintah ke deka nyapai status menau maju perintah begunaka lebih mayuh agi modal mensia ke landik dalam mayuh macham bidang kena mantu program pemansang ke lebih efektif," ku iya. 
Iya mega madahka, raban nembiak kemaya hari patut nyikapdiri enggau penemu ke lebih tinggi kena ngerebut peluang ke bisi disediak, lebbih agi dalam bidang pengelandik kena nangkup chabar baru dalam era realiti kemaya hari. 

Nitihka iya mega, dalam era realiti baru, dia raban nembiak patut besedia nangkup chabar C.O.M.E (Change,Opportunity, Mobility and Equality) ke minta raban nembiak siap sedia napi ubah dalam arus pemansang menua. 

“Sida mesti berani ngaga ubah sereta pandai ngerebut peluang ke disediaka ulih perintah laban potensi dudi hari amat manah.

Lebuh kita nemu pemayuh peluang ke disediaka ulih perintah, raban nembiak tu mega patut sedia nerima konsep mobiliti dalam milih kereja. 

“Lebuh betukar ngagai tunga 'industrial society' raban nembiak patut nemu pengawa dudi hari ila ukai semina bekereja dalam opis aja, tang nyengkaum bekereja di luar opis.

Tu realiti ke deka diterima raban nembiak dudi hari, lalu semua tu ulih nyadi nyata enti sida sedia nyaut chabar C.O.M.E, “ ku iya.

Iya mega arapka  UNIMAS ulih ngeluarka raban nembiak ke ulih nyaut pemar C.O.M.E laban universiti nya tempat bala nembiak belajar berunding sereta alai ngulihka pemandai. 

Ketuai patut meri penerang penuh MRP ngagai nembiak

KE PENGINGAT...Harden (tengah) begambar enggau bala tuai raban bansa enggau bala penerima MRP rambau pengawa Nyuaka MRP ke diatur ba Opis SUPP Simanggang.

SRI AMAN : Genap iku pengari tauka orang ke bisi nerima agih belanja Projek Mit Menua Pesisir (MRP) ari perintah dipinta meri penerang ke penuh ngagai gerempung, serakup tauka rumah panjai sida.

Penulung Menteri Pemansang Menua Pesisir Enggau Pengawa Berumah, Datuk Francis Harden Hollis madah, pengawa ke baka nya beguma amat ngambika enda charut tauak saru penemu entara rayat enggau ketuai sida udah tu.

"Gerempung mega patut ngatur aum enggau bala kaban dalam gerempung tauka entara Komiti Pemansang enggau Pengelikun Kampung (JKKK) enggau tuai rumah sida pengudah nerima MRP.

"Rayat enggau baka kaban deka nemu kini penungga agih belanja nya. Iya ke beguma amat dikena nyeliahka saru penemu ari bala kaban bekaul enggau bala ketuai ke bekaul enggau agih belanja nya," ku iya.

Iya ti mega nyadi Kaban Kunsil Negeri (ADUN) Simanggang madah munyi nya rambau pengawa Nyuaka MRP ke diatur ba Opis Parti Rakyat Bersatu Sarawak (SUPP) pampang Simanggang kemari (Hari Empat).

Kelimpah ari nya, Harden mega ngarapka MRP ke diberi perintah nya ulih dikena enggau meruan baka dikena ngatur pogram ke udah diperambu gerempung tauka JKKK udah tu.

“Iya ke beguna amat, MRP nya ulih dikena ngemujurka program ti diatur gerempung tauka JKKK lalu pengujung iya meri penguntung ngagai mensia mayuh," ku iya.

Dulu ari nya, Harden bisi nyuaka chek agih belanja MRP kira RM63,000 ungkup semila buah JKKK, siti gerempung enggau Opis Pelajar Daerah Sri Aman.

Orang indu dilalau beperesa tusu

KUCHING : Orang Indu ba nengeri tu dilalau meresa pengerai tusu diri ba klinik tauka hospital ke semak awakka ulih nemu sekalika sida bisi ngembuan penyakit riman tusu tauka enda.

Kebuah pia laban penyampau orang indu ke ditemu ngembuan penyakit riman diatu nyau majak nambah sereta balat ngirauka ati.

Tuai Opis Bebuntasti mega nyadi Chairman Raban Penyukung Riman Tusu (BCSG), Nik Azim Nik Abdullah madah, ba taun  2005, penyampau orang ke diperubat bisi 834 enti dibanding enggau 750 iku dalam taun 1996 ngagai 2000.

"Riman tusu dirintai pemadu mayuh iya nya bisi ngerikod 17.5 peratus enti dibanding enggau riman sarang anak 12.7 peratus.

"Tu nandaka agi mayuh orang indu ba nengeri tu bedau mereti sereta enda nangika penyakit riman tusu," ku iya rambau bejadi Kimpin Bulan Mereti Pasal Riman Tusu ba Hospital Umum Sarawak (HUS) ba ditu, apin lama ke udah.

Iya madah, mayuh bengkah atur udah digaga dikena meri penerang ngagai mensia mayuh bekaul enggau penyakit riman laban nya tau dikumbai penyakit pemadu dikenangika sereta tau munuh orang indu.

"Riman tusu ulih gerai nyema iya ditemu tumu sereta diperubat enggau lengkas, tebal agi mayuh orang datai berubat lebuh penyakit udah raya.

"Pansil tumu udah digaga nengah Beperesa Ke Diri Empu (PSP) ungkup bala orang indu ke beumur lebih 20 taun.

"Nyema selalu diperesa orang indu ulih nemu enggau tumu nyema bisi penyelai ba tusu sida lalu anang laun datai ngelawa doktor," ku iya.

Taja pia, Nik Azim madah, mayuh orang indu enda ngemeratka penykait nya lalu bisi mega sekeda langsung enda nguji meresa iya.

"Sida mega enggau betemu enggau doktor nyema bisi penyelai nyadi ba tusu sida kelebih agi nyema orang ke ngubat pemedis sida nya doktor lelaki.

"Enti udah raya, nya baru sida datai betemu enggau doktor tang maya nya nama-nama chara enda ulih digaga agi.

"Kebuah pia laban semua sel-sel dalam tusu udah kembai lalu ngerampit ngagai lempuang, jantung, ati enggau tulang.

"Bisi mega sekeda terus nadai bedau sempat berubat ba hospital laban penyakit udah kelalu raya," ku iya.

Nya alai, mensia mayuh patut diberi penerang enggau mayuh bekaul enggau penyakit riman tusa ngambika penyampau orang ke ngembuan penyakit tu ulih mimit agi, ku iya.

Peluang anak Sarawak mantaika pengelandik

MERI PENERANG... Fee Lin Chew (dua kiba) benung meri penerang ngagai bala pemberita bekaul enggau Karnival Bakat "My Gempak" ke deka diatur ba RTM Kuching berengkah 15 ngagai 20 Oktober 2012.

KUCHING : Mensia mayuh ke ngembuan pengelandik enggau penau diperansang nyereta sesi nguji pengelandik beserimbai enggau Karnival Bakat "My Gempak" ke diatur ba RTM Kuching berengkah 15 ngagai 20 Oktober tu.

Lebuh randau begulai enggau pemberita ba RTM kemari (Hari Empat), Sapit Direktor Penabur Berita RTM Sarawak, Fee Lin Chew madah, sesi nguji pengelandik tu tebuka ngagai barang sapa orang enda ngira peringkat umur asal ngembuan pengelandik dalam bidang seni awakka ulih diangkat ngagai tikas ke lebih tinggai.

Karnival nya, ku iya diatur kerejasama Opis Main Asal enggau Pengawa Rama Menua (JKKN) enggau Radio Televisyen Malaysia (RTM) dikena ngamyuhka asil program seni awakka ulih diayanka nengah Program TV.

Bisi empat bagi program nguji pengelandik ke deka diatur beserimbai enggau karnival tu iya nya Sri Pantun, My Ekspressi, Lantai Cilik enggau Mimpi Ke Bintang (Pengelandik 1Malaysia).

Program Sri Pantun endang ngiga orang ke landik bepantun lalu diatur bepalan ba Gelanggang Badminton RTM. Program tu deka dipansutka ba TV2 berengkah 16 Oktober ninting Hari Dua bepun pukul 8.30 malam.

Udah nya program My Ekspressi baka konsep realitit TV dikena ngiga raban orang ke landik dalam bidang seni muzik enggau mayuh bengkah tarian pupu raban bansa di Malaysia. Program tu diatur bepalan ba Panggau Ulih Mindah JKKN / Balai RTM lalu dipelabaka ulih dipansut ba TV bulan Januari taun baru.

Program Lantai Cilik (PLC) diatur enggau chara pekit ungkup bala nembiak beumur biak ari 12 taun. Tuju iya dikena ngiga raban nembiak ke landik betanda tradisonal ari pupu raban bansa tauka beraban-raban. PLC dipelaba ulih dipansutka ba TV bepun November ngagai Disember 2012 kena Hari Enam enggau Hari Minggu.

Program Mimpi Ke Bintang (MKB) entara program baru dikena ngiga pengelandik nyengkaum mayuh kategori baka bejenaka, akrobatik, silap mata, main pekakas muzik enggau chara nyelai, pengelandik ngaga utai, pengelanchat ke enda kala dipeda, pengelandik ari batang tubuh tau penemu runding, formasi kretaif, pengulih nunda munyi/ sada nyawa, mandangka pemerani enggau mayuh agi ke bukai.

Program nguji pengelandik MKB berengkah 15 ngagai 18 oktober bepalan ba Panggau Ulih Mindah JKKN / Balai RTM lalu program tu deka dipansutka ba TV1 berengkah 20 Oktober ninting Hari Enam.

Berebak enggau karnival tu mayuh bengkah aktiviti bukai ke bela diatur baka aktivitivi Interaktif, eksibisyen, bedagangka barang, bengkel main asal, panggau main asal, DJ begulai enggau peminat sereta mayuh agi ke bukai.

Nangkan ke nya, beserimbai enggau karnival mega mensia mayuh bepeluang betemu enggau sekeda bala artis tebilang menua tu baka Dayang Nurfaizah, Noraniza Idris, Jimmy Palikat, Fizo Omar, Azreen Azhar, Kina Mentor, Dely Ahli Fikir, Bob AF, Anding, Iwan Hj Dasri enggau Adi Putra.

Bela bisi datai maya randau tu Pemangku Direktor JKKN Tuan Haji Saini bin Lihi, Tuai Penulung Direktor Seksyen TV RTM Kuching Abg Sulaiman Hj Abg Joh, Penulung Direktor TV Rauyah Hj Marzuki, Direktor Filem Menua Yahya Sulaiman enggau Penulung Penerit Adat Finas Saslinda binti Ahmad.

Kaban GCC, menua Asia ditesau nyereta SCORE

DOHA : Bala kaban Majlis Kerjasama Teluk (GCC) enggau menua-menua bukai ba Asia udah ditesau perintah negeri Sarawak beranakka puku ba industri Koridor Renewable Energy Sarawak (SCORE).
   
Menteri Perambu enggau Pengatur Sumber Kedua, Datuk Amar Awang Tengah Ali Hassan madah, naka ke diatu peranak puku asil ari industri tu empu bisi US$9.2 bilion lalu ba kandang menua Samalaju bisi 12,912 pengawa puang.
   
"Industri-industri tu udah dilakuka nengah SCORE lalu entara industri tu baka aluminium, kaca/gelas, industri minyak enggau besi.
   
"Tuju iya dikena ngemansangka agi 10 batang pun industri," ku iya rambau randau ba Forum Inside Invest Forum Asia 2012 bepalan ba St Regis Hotel, di Doha, Qatar, apin lama ke udah.

Ba sebengkah berita ke bukai, Opis Pemadah Sarawak madahka Awang Tengah bisi nyebut pasal projek-projek nya diadang ulih narit orang dagang ari menua luar laban penyulut iya ungkup pemansang dudi hari SCORE.
   
Iya madah, Sarawak endang ngelaluka penatai orang dagang ari menua luar beranakka puku dalam industri nya sereta bidang bukai ke besangkut paut enggau SCORE baka minyak sawit, berikan, betanam betupi, pengawa kereja batang, enjinir tasik enggau dagang temuai.

PBT dipinta ngaduka jalai rusak

ADU LENGKAS...Ramli nunjukka jalai rusak ba jalai raya Kampung Muhibbah ke patut ditar PBT udah tu.

SRI AMAN : Rayat ke diau ba Kampung Muhibbah Sri Aman minta tulung raban Pemesai Pelilih Menua (PBT) ngetar jalai ke belubang ba genturung pendiau sida.

Seiku orang ke diau ba genturung pendiau nya, Ramli Abu Sera madah, berita bekaul enggau jalai rusak ba genturung pendiau sida nya udah dua kali dipansut ba surat kabar tang nyentuk ke sehari tu jalai raya ke rusak lalu mengkang baka nya belama.

“Jalai raya ke rusak nya majak nambah. Lubang jalai raya ke rusak pan majak dalam enda baka sebedau tu laban ke suah ditengah prengka pengangkut ke berat-berat.

“Nya alai, aku ngarika mensia mayuh ba Kampung Muhibbah minta tulung PBT ngetar jalai raya ke rusak awakka nyamin pengelikun menisa mayuh ke bela betengahka jalai nya udah tu," ku iya.

Kelimpah ari nya, musin pengujan ke nyadi diatu mega ngujungka penguna pedis deka nyeliahka jalai rusak nya.

Lebuh ai ujan menuhka lubang jalai ke rusak pengguna pedis deka milih ni bagi jalai ke manaah ditengah, ku Ramli.

"Aku chukup irauka orangti ngena motosikal. Enti jalai tu alu enda ditar, penusah bebadi endang ulih nyadi sebarang maya kelebih agi ngagai sida ke ngena motosikal," ku iya.

Chalon BN semina ngena lambang dachin - Masir

PANTU : Orang ke nyadi chalon komponen parti Barisan Nasional (BN) ulih dikelala nengah lambang dachin ke dikena sida bekimpin.

Nya alai, chalon ke ngumbai diri ngarika BN meseti ngembuan lambang dachin dikena sida meri pengarap ngangai rayat maya pengawa bepilih besai tu ila.

Kaban Parlimen Sri Aman, Masir Kujat ngemansutka pekara ya rambau bejadi Pengerami Tuai Begulai Enggau Rayat ke diatur JASA Sri Aman bepalan ba Rumah Yokubus, Munggu Ridan ba pelilih menua Pantu ensana (Hari Empat).

TANDA BASA...Masir nerima tepa ari bini Tuai Rumah Yokubus iya nya Miah ba sebengkah pengerami ke diatur ba Munggu Ridan, Pantu.

"Bisi chalon BIbas maya bekimpin ngumbai diri ngarika BN. Pekara ke nyadi penanggul diatu iya nya raban orang nya langsung nadai mai lambang menira dachin lebuh bekimpin ba rumah panjai.

"Lambang dachin kebendar iya 'lesen' madahka sida endang amat ari BN. Reti nya enti sida nadai mai menira lambang daachin sida endang ukai pengari BN...rayat patut nemu berundingka senentang pekara tu maya pengawa bepilih besai tu ila," ku iya.

Chara ke baka nya, ku iya benung dikena bala chalon Parti Pekereja Sarawak (SWP) ke ngumbai diri kaling BN dikena sida ngulihka sukung rayat maya pengawa bepilih besai Ke-13 (PRU-13) tu ila.

Nya alai, Masir ngarapka rayat anang mudah pechaya ngagai chalon bibas enggau raban penyakal ke ngumbai diri ngarika BN, semua nya dikena sida ngemulaka rayat.

“Pekara ke pemadu beguna rayat ba sitak Parlimen Sri Aman anang sesekali alah penemu ninga danji bula ke disebut penyakal udah tu," ku iya.

Raban Dayak anang ngadai politik ketegal duit - Nyalau

WILLIAM NYALAU BADAK

SRI AMAN : Raban bansa Dayak kelebih agi ke diau ba kandang menua Lubok Antu anang sesekali begadai politik ketegal alah suap orang ngena duit, ku Kaban Parlimen Lubok Antu, William Nyalau Badak.

Iya madah, mensia mayuh meseti berunding panjai ngambika enda nyadi perengka orang ke semina deka nguna sida dikena bepolitik aja.

“Ulah ke baka nya benung nyadi ba sitak parlimen ke dijaga aku, iya nya Parti Pekerja Sarawak (SWP) benung nguji ngulihka sukung bala pengundi Dayak ngena duit laban deka meda Larry Sng bediri maya pengawa bepilih besai.

“Enti pengundi Dayak alah ketegal diberi orang duit, nyadi orang bukai ulih nemu bansa kitai chukup nyamai dialah ngena duit dalam politik dudi hari," ku iya lebuh ke dirandau media kemari (Hari Lima).

Kelimpah ari nya, aku nangkan semua pengundi ba sitak Parlimen Lubok Antu enda ngundi orang bukai ke ukai peranak asal di menua tu nyadi pengari rayat ditu.

Kebendar iya, Parlimen Lubok Antu ku Nyalau meseti dipegai pengari rayat  Barisan Nasional (BN) ke endang rayat peranak asal Lubok Antu empu sereta endang peturun Bumiputera Dayak.

“Tambah mega tuju parti politik dikena ngemansangka pengidup rayat lalu ukai ngereja pengawa nyual insuran ngagai rayat baka ke digaga SWP ngelama tu.

“Insuran tu semina pemanah danji politik SWP. Pendiau ke baka tu nyengala bendar mandangka parti politiknya nadai ngembuan pengelurus dalam ngemansangka pengidup rayat enti udah pengawa bepilih besai tu," ku iya.

Enti diperati ba sukut pemansang sitak Parlimen Lubok Antu benung mansang kenyau Nyalau nyadi pengari rayat ba menua nya berengkah ari taun 2008 suba.

Projek kerita kabel agi diperunding

Datuk Amar Abang Johari

KUCHING : Projek kerita kabel nuju ngagai tuchung Gunung Santubong lalu bedau bisi pemutus ari perintah.

Menteri Dagang Temuai, Datuk Amar Abang Johari Tun Abang Openg madah, langgur penemu deka ngaga projek nya agi diperunding lalu perintah nengeri mega bedau ngerah sebarang pengawa meresi kandang menua ke dibungkur projek nya.

"Projek nya meseti ngembuan penemu ke sama deka setuju ngambika iya ulih mujur.

"Iya ke temu aku, naka ke diatu, agi bedau gerah endur ngemujurka projek laban pansik agi dipejalai," ku iya madah ngagai pemberita pengudah Nyuaka Gelar Pelajar Nyulut Gerempung Pengajar Bumiputera Sarawak (KGBS) ba sebengkah hotel tebilang ba ditu, apin lama ke udah.

Iya madah, diatu enda ibuh meresi kandang endur nya seagi nadai gerah ari perintah.

"Kitai endang bela nemu Gunung Santubong entara palan ke balat narit ati temuai menua luar.

"Enti kerita kabel nya mujur digaga jemah diadang mayuh agi temuai datai tang diatu pansik bekaul enggau projek nya lalu empai tembu. Nya alai, anang guai meresi kandang endur nya," ku iya.

Projek dipadahka kena bulan Mei 2007 lalu beungkus RM50 juta diadang ulih nyungkak industri dagang temuai di Sarawak iya nya narit temuai ari  Sabah, Brunei enggau Kalimantan.

Enti projek nya mujur jemah, iya deka nyadi projek kereta kabel 2,385 meter pemanjai tauka lumur dua pemadu panjai nangkan kerita kabel ba Genting Highlands ke bisi 2.5 kilometer pemanjai.

Wira enggau Wirawati PLKN nyadi pemun pengelikun menua

NGIRUP TONGKAT ALI... Sapit Tuai Direktor Opis Latih Pengawa Ke Bansa  Enggau Menua (JLKN), Awang Alik Bin Jeman (dua kanan) diuluka bala pematih kem PLKN Similajau ngirup ai Tongkat Ali. Bela bisi dipeda Komandan Kem PLKN Similajau, Mejar Azahari.

BINTULU :  Wira enggau wirawati Kem Latih Pengawa Ke Bansa  Enggau Menua (PLKN) Samalaju dilalau terus ngetanka penyerakup entara raban bansa laban pekara ke baka nya nyadi tiang pemun pengelikun menua.

Sapit Tuai Direktor Opis Latih Pengawa Ke Bansa  Enggau Menua (JLKN), Awang Alik Bin Jeman madah, kitai patut bebasa sereta nempa kaul enggau pangan diri awakka ulih nemu adat asal bala kaban ke baru enggau bekelala.

"Ba Sarawak aja, bisi lebih ari 30 buah raban bansa bedau ke dichampur enggau bansa bukai ba serata menua Malaysia.

"Nya alai, kebuah PLKN ditumbuhka endang dikena nyerakupka semua pupu raban bansa di Malaysia awakka sida ulih belajarka adat asal bansa bukai," ku Awang.

Iya madah munyi nya rambau Penemuai Sapit Tuai Direktor JLKN ngagai Kem PLKN Similajau lemai ensana (Hari Dua).

Nangkan ke nya, Awang ngelalau bala pelatih PLKN awakka terus segulai sejalai bebai enggau pangan diri sepanjai nyereta program nya.

"Aku suah nitihka jaku apai aku ke ngajar aku munyi tu : Manah agi ngembuan seribu kaban ari ke ngembuan seiku munsuh.

"Nya alai, aku ngelalau bala wira enggau wirawati patut bekelala enggau mayuh kaban laban pengidup kitai baka tayar seruran beputar lalu bisi maya kitai deka tusah kaban meh palan endur ngenduh," ku iya.

Udah nya, Komandan Kem PLKN Samalaju, Mejar Azahari nyadaka pengaga ati nerima penatai Sapit Tuai Direktor JLKN ngagai kem nya lalu ba maya dudi sida ngarap bisi agi orang datai nemuai ngagai kem nya.

Mua ke lemai, Sapit Tuai Direktor JLKN ngabas Kem Ikhtiar Hidup ke ngundan mayuh utai tumbuh ke diambi ari babas sereta iya depeluang meda panjuk-panjuk ke ditan ba babas.


Nangkan ke nya tuju staf kem ngaga langkau arau ngambika bala pelatih bepeluang meda baka ni chara ngidupka diri ba dalam babas.

Pansik lengkas kebuah baya suah ayan ba Sungai Niah

MESETI DIBURU JAMPAT... Rosey Yunus diuluka Kunselor Sulaiman Ahmad maya ngabas Sungai Niah berindik ari ripot ke pansut ba surat berita senentang baya ke suah ayan (ke diengkelung dalam gambar) ba endur nya.

NIAH (Sepupok) : Orang ke bekuasa meseti mansik kebuah baya suah ayan ba Sungai Niah, sekalika ketegal aktiviti pemansang tauka ketegal pekara bukai.

Udah tu meseti suah matau Sungai Niah ngambika pengelikun mensia mayuh ba semak sungai tejamin, ku Penulung Menteri Pelajar Tumu Nembiak Enggau Pemansang Ruang Bilik Rosey Yunus lebuh ke dirandau pemberita, apin lama ke udah.

“Mensia mayuh ti agi bekenaka kereban pengangkut sungai sereta suah nginti tauka berikan meseti bejimat laban baya nya tau nganu sebarang maya.

“Nya alai, orang ke bekuasa patut mutarka pekara tu enggau lengkas, enti ulih baya tu patut diburu ngagai endur bukai tauka dianjung ngagai taman baya di Miri,” ku Rosey.

Nangkan ke nya, seiku nembiak Sekula Sekondari Nasional (SMK) Suai, Jolias Ugak, 17 lebuh ke dirandau pemberita madah, baya ke suah ayan nya endang ngenakutka mensia mayuh ba endur nya laban lebuh iya lapar diadang tau negam sebarang orang.

“Sebedau tu, aku kala meda baya negam seiku ukui China Kebun.

“Diatu perintah patut jampat mutarka penanggul baya mangah ngambika enda ngachau pengidup mensia mayuh ke suah betengah sungai," ku iya.

Utusan Sarawak dipadahka, baya nya seruran enggai ninggalka pengkalan ke diempu seiku China kebun ba endur nya.

Seiku China kebun ke enggai nama iya dipansut, madahka pasal baya ke suah ayan ba endur nya lalu iya ngarapka semua orang ngemeratka pengelikun  diri lebuh bejalaika sebarang aktiviti ba sungai nya.

“Baya nya dipeda enda nangika mensia ke suah beratika iya, nya alai bala apai indai patut ngajar anak diri empu awakka enda nurun kediri lebuh deka nginti ba sungai nya.

“Orang ke bekuasa patut mutarka pekara tu enggau lengkas, kala mega dipadah ngagai raban penguasa, pia mega pengari rayat nulung madah ngagai orang ke bekuasa ngambika penusah ke nuntung seiku nembiak ke kala ditagup baya ba sungai nya enda nyadi baru," ku iya.

Udah nya, Manin Jasin, beumur lebih kurang 50 taun ari Rumah Panjai Tr. Limbang Saeh madah, baya nya chukup mangah, sebedau sebarang penusah nyadi, manah orang ke bekuasa jampat mindahka baya nya.

Kena 17 Februari 2012 tu tadi, Millie Nueh, 35, ari Rumah PanjaiSigi Batu Niah kala kena tarit baya lebuh iya benung mandi tumu pagi hari.

Millie Nueh benasib amat laban mujur ngelepaska diri, maya iya ke belaban enggau baya kaki iya teindikka mata baya lalu ngujungka baya nya ngeluaka Millie. Beduduk ari penusah nya, indu tu putus tunjuk kaki ketegal kena ketup baya.