Pemakai enggau ai irup maya Gawai Dayak

KOTA SAMARAHAN : Gaya pendiau pengidup ba Lorong 8 Desa Ilmu, Kota Samarahan, ke beplan ba 30 kilometer ari Bandar Kuching, dipeda baka ke nadai bida engau genturung pendiau ke bukai.
   
Taja baka nya, tebal agi sida ke diau dia ending bansa Iban lalu ngembuan penyelai ke diri empu laban ke landik ngaga ai tuak.
   
Seiku ari sida ke diau dia iya nya Cecilia Adam, 44, diatu 10 taun iya udah landik ngaga tuak lalu iya madahka pemuas ati ngirup ai gaga diri empu ari ke dibeli sebelah kedai.
   
Iya suah gaga ai tuak maya nitihka laki iya, Malin Kaya,seiku ex soldadu ba Kluang, Johor, Cecilia diatu ngaga ai tuak ungkup sida sebilik, taja pia iya enda nulak nyema bisi orang minta digagaka tauk tauka meli tuak ari iya.

   
    TUAK ENGGAU GAWAI DAYAK
   
   
Iya belajarka penemu ngaga ai tuak nya ari indai enggau inik iya empu. Cecilia datai ari Sri Aman madah, ai tuak ending nyadi ai ke meseti diirup tiap kali datai pengerami Gawai Dayak.
   
Gawai Dayak ending sebenglah pengerami ke besngkut paut enggau [engawa ngetau padi bagi raban bansa Dayak dikena nandaka terima kasih ketegal jereki ke udah diulih sepemanjai taun.
   
Ungkup pengerami Gawai Dayak taunt u ke disambut kena 1 enggau 2 Jun, iya udah ngembuan stok tuak kenyau ari sebulan ke udah.
   
"Kebendar iya tuak digaga ari berau pulut ke diperam. Tuak ke nyamai balat bepanggai ba pengelandik seiku-seiku ke ngaga iya.
   
"Ngaga tuak meseti tumu, kadang-kadang du bulan sebedau pengerami. Meram tuak endang pengawa ke terubah laban tuak ke nyamai begunaka timpuh ke chukup,” ku iya.
   
Tuak digaga ari berau pulut, gula enggau chiping ke diperam dalam timpuh ke lama, pengawa ngaga tuak tebal agi digaga sida ke indu lalu meseti nitihka adat enggau penti pemali nyema deka ngaga ai tuak ke nyamai.

   
Taja baka nya, Cecilia ngembuan resia ke diri empu dalam ngaga ai tuak ke nyamai.
   
"Simpan tuak ke udah tembu digaga dalam botol arak ke udah dikena, tuak nya deka nyamai sereta nyelai ari ai bukai,” ku iya.
   
   
PENTI PEMALI
   
   
Taja pan udah lama sereta teleba ngaga ai tuak,
Cecilia ngaku tuak ke digaga iya kala enda nyadi sereta kala asai masam.
   
"Bisi penti pemali maya ngaga tuak. Antara penti pemali ngaga tuak iya nya orang indu ke benung datai kain enda tau ngaga tuak, enti digaga maya nya tuak ke digaga nya tau jelungan,” ku iya.
   
Cecilia madah, seiti agi penti pemali maya deka ngaga tuak iya nya enda tau nyimpan tuak dalam benda ke udah kala endur nyimpan garam tauka barang pemakai ke masin laban tuak ke digaga tau masam.

"Orang ke benung ngaga tuak mega enda tau negu pemakai enggau utai irup ke masam,” ku iya.
   
   
   
PENGANAN JALA
   
   
Ba sebuah rumah bukai ba urung ke sebaka, Dilam Segili, 54, ngembuan peneleba enggau pengandik ngaga penganan jala lalu suah mega dikanggauka orang ngajar chara ngaga penganan nya.

Maya penulis datai ngelawa iya, Dilam benung ngajar lima iku pangan iya ngaga penganan jala tauka dikumbai kuih karas ba Semenanjung.
   
Dilam madah, penganan jala endang sebengkah pemakai tradisional bansa Iban lalu nyadi pemakai ke meseti dibantai maya pengerami Gawai Dayak.
   
"Penganan jala enda jauh bida enggau kuih laras ba Semenanjung, semina ba
Sarawak bisi gula apong ke digaga ari mulung,” ku iya.

Kelimpah ari asai iya ke nyamai, chara ngaga penganan jala mega chukup nyelai.
   
Tepung ke tembi dilumai diengkah dalam tachu ke ngembuan mayuh lubang mit, tachu tu ditancang ba sebatang kayu panjai ke ngembuan pemegai, udah nya kayu tu digantung ngena yali panjai ba perabung rumah dikena ngurangka jari penat maya deka ngoreng penganan.

Setipak enggau gaya rumah pengabang ke sebaka enggau konsep 1Malaysia, pengawa mantaika pemakai tradisi baka tuak enggau penganan jala endang antara pemakai ke pemadu manah dibantai ngagai temuai ke bisi datai ngabang Gawai Dayak.

BN malas pemanah rayat

"Taun baru nyin ila, perintah deka nambahka penyampau agih belanja RM30 juta dikena ngemujurka pengawa nyukat kelinggi tanah NCR."
 Datuk Patinggi Mohd. Najib Tun Abdul Razak
Menteri Besai

ALVESTER BIGOL SULANG

BUKIT SABAN : Menteri Besai Datuk Patinggi Mohd. Najib Tun Abdul Razak madahka pengaga ati meda sukung ari semua pupu raban bansa ke bisi ngulu Rumah Panjai Wilson ak Bekir, Penom Ulu Paku, Betong.
Iya madah, tuju penemuai ke rumah panjai laban deka meri Selamat Gawai Dayak ngagai semua raban bansa Iban ke diau ba kandang menua nya.

"Aku ulih datai ba pengerami ke besai-besai ba menua Kuching aja tang enda chukup enti aku enda datai ngagai rumah panjai," ku iya.

Najib madah munyi nya rambau Pengerami Ngabang Gawai Dayak ke diatur ba Rumah Panjai Wilson ak Bekir, Penom Ulu Paku ba ditu kemari (Hari Minggu).

Nangkan ke nya, Ku Najib rumah panjai endang nyadi chermin pesaka bansa, sejarah menua kitai sereta mandangka adat asal bansa Iban ke nyadika tiang pemun pengering Barisan Nasional (BN).
"Pekara tu nadai bida enggau tiang belian ke mengkang bediri tegap ba rumah panjai tu kenyau ari taun 1926," ku iya.

Najib mega bisi ngelansa senentang pemujur BN ke udah menang dalam Pengawa Bepilih Besai Ke-13 (PRU13) apin lama ke udah.

Pemutus undi majoriti ke udah ulih perintah BN, ambika chunto ungkup Parlimen Betong ku iya endang terang mandangka pengarap rayat ngagai BN awakka terus megai perintah menua tu.

"Endang patut aku ke nyadi tuai BN datai ngabas rayat ba menua pesisir, pia mega kami (BN) sigi enda nempayaka sukung rayat ari menua pesisir. Udah nyadi tanggungjawap kami endur ngemansangka pengidup enggau pendiau rayat," ku Najib.

Nangkan ke nya, ku Najib taun tu Sarawak deka nyambut pengerami 50 taun udah merdeka dalam Malaysia lalu iya melabaka Sarawak enda nyepi pengelantang ke baka tu enti sema enda enggau numbuhka Malaysia.

"Semua penguntung dibagi bela-bela, pekara ke kurang deka ditambah, pekara ke nadai deka diberi, " Ku iya ti lalu madahka semua pekara ke deka diberi nya bisi dalam aku janji BN ungkup tempoh lima taun ke deka datai tu.

Pekara keterubah digaga iya nya maduka mayuh pengari ari Sarawak dalam kabinet perintah besai.
"Tu siti rikod baru laban tujuh iku pengari ari Sarawak udah dipilih nyadi menteri enggau penulung menteri ba kabinet perintah besai.

"Udah tu menua Sarawak deka majak tampak rita laban ke nerima sukung ke chukup manah ari mensia mayuh ngagai perintah BN.

Dikena malas pemanah rayat nya aku deka terus meri bantu iya nya meri utai ke dikinginka rayat.

Ngelama tu, perintah besai udah ngungkupka RM 60 juta dikena ngemujurka projek nyukat kelinggi tanah temuda asal Bumiputera (NCR) awakka tanah ngembuan surat pala lalu nadai ulih dikachau orang bukai.

Taun baru nyin ila, perintah deka nambahka penyampau agih belanja RM30 juta dikena ngemujurka pengawa nyukat kelinggi tanah NCR, ku iya.

Bela bisi datai ba pengerami tu iya nya bini Menteri Besai Datuk Amar Datin Sri Rosmah Mansur, Sapit Kepala Menteri Datuk Patinggi Tan Sri Alfred Jabu Numpang enggau bini iya, Menteri Pemansang Industri enggau Rampa Menua Kedua Datuk Amar Awang Tengah Ali Hasan, Menteri Pengawa Ladang Enggau Komoditi Datuk Sri Dauglas Uggah Embas, Menteri Kereja Raya Datuk Haji Fadillah Yusof, Menteri ba Opis Menteri Besai Hajah Nancy Shukri, Kaban Kunsil Negeri (ADUN) Bukit Saban Robert Lawson Chuat, ADUN Saribas Razi Sitam, Kaban Parlimen Lubok Antu William Nyalau Badak, Tuai Rumah Wilson Bekir, tuai-tuai opis perintah, tuai-tuai raban bansa enggau mensia mayuh ke semak menua nya.

Pengidup senang berekat pemansang

"Sepemanjai nyadi Kepala Menteri dalam pengelama 32 taun, aku berasai puas laban meda pengidup rayat enti suba mayuh seranta tang diatu nyau majak senang berekat ari pemansang ke udah dijapai."
Pehin Sri Haji Abdul Taib Mahmud
Kepala Menteri


KUCHING : Tanggung pengawa ngemansangka pengidup rayat ba negeri tu ukai pekara ke muntang laban pemesai kandang menua Sarawak iya bisi 125, 000 kilometer persegi, taja baka nya sehari tu kitai mujur ngangkatka penatai pemisi rayat, lalu semina tinggal lima peratus aja rayat agi dikumbai kelalu seranta, ku Kepala Menteri Pehin Sri Haji Abdul Taib Mahmud.

Taib madah munyi nya lebuh dirandau terus dalam pengelama sejam nengah Radio Televisyen Malaysia (RTM) nyerumba Program Bicara Rayat : Sarawak Melangkah Gagah ke diatur ba Opis Dewan Undangan Negeri (DUN) baru ba ditu malam Hari Lima tu tadi.

"Sepemanjai nyadi Kepala Menteri dalam pengelama 32 taun, aku berasai puas laban meda pengidup rayat enti suba mayuh seranta tang diatu nyau majak senang berekat ari pemansang ke udah dijapai," ku iya.

 Diatu, ku iya penyampau penatai pemisi rayat setaun (perkapita) nyau nambah ngagai lebih RM40,000 enti dibanding enggau suba semian RM680 aja, kelimpah ari nya penyampau pelajar ke mujur nyambung belajar ngagai universiti mega majak mayuh.

"Semua tu berindik ari pemujur bala anembiak kitai besekula," ku iya.

Nangkan ke nya mega, Taib meransang mensia mayuh kelebih agi bala raban nembiak ngambika terus nyikap diri nempuh gelumbang kedua pemansang berebak enggau pengerembai Koridor Renewable Energy Sarawak tauka SCORE ti nyediaka mayuh pengawa puang dalam ngasilka sumber kuasa karan.

"Ubah penyampau bayar gaji jemah ila deka berubah, tebal agi sida ke ngembuan pengelandik teknikal tu ila deka nerima gaji ke nyau deka sebaka pemesai enggau orang ke udah pansut ari universiti," ku iya.

Udah nya, lebuh ditanya bekaul enggau prngawa Menteri Besai Datuk Seri Mohd Najib Tun Razak ke udah nyadi tuai merintah menua tu, iya madah Najib endang seiku ketuai ke patut dipuji laban mujur ngaduka menua enggau chukup badas sereta seruran nitihka peneka orang ke biak.

"Genap iku ketuai ngembuan chara ke diri empu dalam ngatur menua, Datuk Seri Najib dipeda seruran nemu peneka rayat.

"Kitai beterima kasih ngagai semua rayat laban ke seruran meri sukung ngagai genap iti pekara diperambuka perintah lalu penguntung iya pulai ngagai rayat empu," ku iya.

Taib mega madahka, siti penguji besai ditapi ke maya hari tu iya nya penemu ke bepun ari internet ngujungka rayat kelebih agi sida ke nembiak mudah terunda-runda enggau penemu ari luar.

Taja baka nya, pekara ke baka nya enda mudah ngeruga penyerakup ba negeri Sarawak laban rayat ditu seruran ngembuan penemu ke tebuka, ku iya.

Bela bisi datai mending sereta ngemataka program tu iya nya bala menteri kabinet negeri, tuai-tuai opis perintah enggau bala tuai-tuai raban bansa.

Bot Karam : Nyadika lalau ngagai perintah

Penusah bot karam nyadika lalau ngaduka
sistem pengangkut lebih manah
   
SIBU : Enti nitihka adat lama bansa Iban, orang ke sebilik enggau Roslin Jati udah ngatur pengawa Ngerapoh iya nya pengawa ngelumbong dikena nandaka penyulai indu nya. Tang pekara nya enda digaga.
   
Roslin, 34, ti benung ribat lima bulan, lenyau ba penusah bot ekspres karam ba Sungai Rajang kena 28 Mei, lalu nyentuk ke diatu alu apin temu.
   
Pengawa Ngerapoh patut dipejalai enggau chara ngena gari tauka baya orang ke mati nya, laban bangkai iya nadai temu tauka dikubur ba endur ke jauh (ukai ba menua asal iya), nyengkaum ba ditepu dalam Tajau udah nya digagaka langkau ba tanah pendam.
   
Tu meh ke tanda nguburka orang ke udah nadai nya ari sida iya sebilik dikena nandaka penyinu ati enggau bebasaka semengat niang.
   
Bot ekspres 'Kawan Mas' karam kena 8.45 pagi semak Giam Bungan, lebih kurang sejam pejalai ngena bit ari pasar Belaga, pengudah ngelantak kayu balak.
   
Ekspres nya semina ulih ngundan 64 penumpang taja baka nya iya ngundan lebih 200 iku orang, tebal agi sida ke nepan dia bala pekereja ari kem balak enggau ladang sereta orang ke sebilik enggau sida, maya nya sida berumban pulai ke menua laban ke deka nyambut pengerami Gawai Dayak.
   
Kira 213 penumpang selamat ba penusah nya, dua agi lenyau lalu seiku ditemu parai.

Juluk ati tetemuka Roslin pun pengudah perintah Sarawak ngemaduka operasi ngiga iya enggau melepungka bot ke udah karam nya kena 21 Jun tu tadi.

Sapit Kepala Menteri Tan Sri Alfred Jabu, ti mega nyadi chairman komiti bantu tasah ba negeri, madahka perintah negeri enda sanggup entaruh nyawa sida ti bejalaika operasi negiga nya.
   
"Kami pecaya bot nya udah jauh tengelam, nya alai pekara nya ngenusahka bala penyelam. Kami enda sanggup entaruhka nyawa sida," ku iya madah ngagai
pemberita.
   
Iya madah, ulak sungai ke chukup deras balat ngeruga ati bala penyelam Polis Marin.
       
Raban ari opis pengerai negeri madahka pengudah 24 hari, sebarang bangkai ke ditemu endang deka but lalu pedis deka dikelala.
   
Taja baka nya, iya madah, perintah deka berunding sereta ngangauka kaban belayan sereta orang ke sbilik enggau mansa awakka ulih ngatur pengawa sembiang ba palan penusah nyadi.
   
"Enti bisi peminta ari sida, kami sedia nanggung belanja kelimpah ngaga tugu pengingat ba endur nya," ku iya.

Therra Horizon Sdn Bhd, anak kompeni Petronas udah diberi tanggungjawap ari perintah negeri nulung bejalaika operasi ngelama tu, udah nya sida ngeripot tetemuka bot
udah tengelam 18 meter nya kira-kira 350 meter ari endur keterubah iya karam.

Kompeni nya merambu deka mai perengka lebih manah beungkuslebih kurang RM2 juta dikena melepungka bot nya, pengawa nya terubah iya dikereja, tang udah nya perintah negeri ngemaduka operasi nya.
   
Laki Roslin, John Soon Hock Chiong, enggau Gerempung Kuasa Rayat Pribumi Sarawak (Scrips), ngasuh perintah nyambung baru operasi nya awakka mansa ulih dikuburka enggau chara ke patut.
   
Seiku ari penyelam peranak menua tu, Kajang Juloi, 49, ari genturung pendiau Sekapang Panjai semak Belaga, madah, menua Giam Bungan endang berantu laban mayuh orang udah bebadi ba endur nya kenyau ari kelia.
   
Bisi bala kaban penyelamat ditusika bala deriba traktor ke bemalam ba endur nya ninga munyi utai ke ngenakut datai ari tebing sungai.
   
"Utai ke bemunyi nya baka orang ke berami gaga ati...sida nebah perengka muzik lama bansa Iban," ku polis nya.
   
Iya madah sekeda orang ke bisi ngambi gambar ngena telefon binching bisi tepedaka ayas antu gerasi merap bot nya sebedau iya karam suba.
   
Traktor ari kompeni balak ke semak dianjung ngelawa palan nya tiga hari pengudah penusah nyadi tang meh enda ulih.
   
Orang ke bempu bot nya mega bisi minta saup bala sami Buddha ari Thailand ngaduka semengat sungai, udah rayat ke semak menua nya bisi ngaduka pengawa lama nitihka adat diri empu.

Taja baka nya, penusah ke udah nyadi nya tau nyadika tengau ke alai sistem jalai digaga manah agi ba kandang menua pesisir ba Sarawak.
   
Udah tu, Menija kem balak patut ngatur pelin ngaush orang pulai ke menua diri berenggat-rengga awakka penyampau sida ke nepan bot enda kelalu mayuh, tauka nyewa bot khas ungkup pekereja sida.
   
Raban bekuasa mega patut nyediaka mayuh bot maya semak musin pengerami baka Gawai Dayak enggau Taun Baru China, kelimpah maya pemisi sekula.Bernama

Bisi 1.3 juta pengawa puang ba SCORE

SARIKEI : Perintah enda leju ngelakuka bidang teknikal di menua tu ngambika mayuh agi raban nembiak teperansang belajarka penemu nya.

Penulung Menteri ba Opis Kepala Menteri ti mega nyadi Penulung Menteri Promosi Pelajar Teknikal,  Datu Haji Len Talif Salleh madah, perintah bebendar agi meransang nembiak ke udah tembu belajar pom lima kelebih agi nembiak ke diau ba menua pesisir.

Nya alai, ku iya, Tabung Ekonomi Gagasan Anak Sarawak (Tegas) deka tersu ngatur Program Neresa Sekula (PJS) lalu nguji ngiga 120,000 iku pelajar sekula sekondari ari Pom Tiga ngagai Pom Enam nyentuk ngagai ujung taun 2013.

“Tuju program tu diatur dikena meri peransang ngagai  nembiak Bumiputera nyambung pelajar dalam bidang Teknikal enggau Latih Vokasional (TEVT) awakka nyamai minta pengawa jemah," ku iya.

Iya madah munyi nya ngagai Utusan Sarawak penguda tembu Program Nyaga Pengelikun Ari Angus enggau Ngelaban Denggi ba Rumah David Kuning ba ditu, apin lama ke udah.

Len madah, pelajar teknikal enggau latih vokasional (PTLV) majak beguna ke maya hari tu dikena ngisi 1.3 juta  pengawa puang dalam projek SCORE maya taun 2030.

“Pengelandik penemu ngujungka ulih ngasilka teknologi. Ni-ni menua, rayat tauka seiku-seiku orang ke deka maju endang beguna penemu enggau pengelandik.

“Penemu ulih ngubah seiku-seiku orang nyadi orang pintar, panjai runding sereta ngembuan ulah ke manah," ku iya.

Len mega madahka Program Transformasi Perintah (GTP) digaga berebak enggau Transformasi Puku Mensia lalu ditempa nengah pelajar sekula.

“Nengah penemu, mensia landik ngaga ai ti ngasilka kuasa karan. Ngena penemu mega, ikan-ikan ke ditupi ulih betelu enggau jampat.

“Nangkan ke nya mega, kami benung ngaga pansik endur namabhka penyampau pengajar ke ulih ngajar ba palan latih," ku iya.

Program Integrasi mujur ngerapitka kaul 1Malaysia

KUCHING : Penyerakup ke dikembuan rayat ba menua Malaysia entara pekara ke pemadu beguna dalam arus ngemansangka menua. Kelimpah ari sukut ekonomi, politik, penyerakup entara sukut ke pemadu beguna awakka menua tu terus mansang maju.

Nya alai, bekau ari pengelikun ekonomi enggau politik ngujungka rayat ba menua tu bela ngasaika pengelantang enggau penyamai. Berindik ari nya mega, sekeda peserta Program Integrasi 1Malaysia begulai  Air Asia udah dirandau Utusan Sarawak maya program nya diatur berengkah 5 ngagai 7 Januari 2013 ba Kuala Lumpur, Putrajaya dan Kuantan, Pahang.

Asil ari randau nya, bala pesereta nyadaka penemu setuju enggau penyerakup ke udah diuji ditempa begulai enggau bala kaban ari Semenanjung.

Nitihka penerang Chairman Kelab Peminat Siaran Bahasa Sama (Bajau), Abdul Majad Halim, madah, program nya endang manah amat dikena ngerapitka penyerakup entara pesereta ari Sabah enggau Sarawak.

"Kelimpah ari nya, pesereta bepeluang mandang main asal ngagai orang semenanjung kelebih agi ngagai raban bansa Pulau Serai, Pekan, Pahang," ku iya madah ngagai pemberita bekaul enggau nya.

Iya madah, pekara ke seruran dikingat rambau nyereta program tu iya nya peluang nepan bilun begulai enggau Menteri Besai, Datuk Seri Mohd Najib Tun Razak.

"Tu meh dikumbai ketuai ti rindu begulai enggau rayat, maya nepan bilun nya iya segulai pemakai enggau kami. Pekara nya, nandaka iya endang amat gauk ke rayat," ku iya ti datai ari Kota Belud, Sabah.

Pengulu ba menua Boyan, Gersik enggau Sourabaya, Haji Sulaiman Haji Alem, madahka, program nya mayuh meri penemu ke beguna ngagai bala pesereta.

Ngenang pasal penemuai ngagai menua bansa Pulau Serai, Sulaiman madah, menua nya udah chukup perengka guna lalu benung balat mansang.

"Tu nandaka menteri besai kitai amat betanggungjawap, laban rayat bela ampit ngasaika pengelantang," ku iya. Sulaiman ngarapka program ke baka nya ulih digaga baru dudi hari dikena ngerapitka kaul rayat Malaysia.

Udah nya, Pengulu Ginsit Lepau, madahka diri berasai gaga laban bepeluang nyereta program nya. "Pengingat ke enda ulih dibuai iya nya lebuh kami dibai nembuai ngagai rumah Menteri Besai ba Sri Perdana, Putrajaya.

"Maya datai, kami diintu enggau naka penuh basa lalu diberi pemendar begambar ba endur nya taja pan ngelama tu orang bukai enda tau begambar dia," ku iya.

Nangkan ke nya, Pengulu Dato D'raja Pui Sing Min, madah, enti nadai program baka nya, tentu sida enda ulih betemu enggau pangan diri "Program tu endang manah amat dikena ngerapitka kaul entara pupu raban bansa.

"Aku ngarapka program tu ulih diatur baru, lalu kami ngasuh orang Semenanjung nemuai ngagai Sabah enggau Sarawak," ku iya.

Berebak enggau nya, Pengulu Sidu John ngarapka program nya ulih diatur baru dudi hari ngambika penyerakup entera raban bansa majak terit.

"Enti ulih sekali da ngaga program baka tu, udah nya kitai ngasuh orang Semenanjung datai ngagai Sabah enggau Sarawak awakka sida ulih belajar pekara ke bisi dikembuan pupu raban bansa ba ditu," ku iya.

Sidu madah, program nya dudi hari deka diawak ngagai sida ke nembiak awakka penemu nya diajar tumu.
Udah nya, Pemancha Tony Kulleh, madah, program ke baka nya endang lama udah dianti-anti dikena ngarpitka kaul entara raban bansa di menua Malaysia.

"Nengah konsep 1Malaysia semua kitai patut beserakup ngetanka pengelikun enggau penyerakup nya sepemanjai maya.

"Reti nya, orang Borneo udah nuruk nemuai Semenanjung, diatu orang Semenanjung meseti nemuai ngagai Sabah enggau Sarawak ," ku iya.

Tony madah, rayat ba Sabah enggau Sarawak endang udah lama idup dalam konsep 1Malaysia, nya alai rayat ba dua bengkah nengeri tu idup lantang senang nyentuk ke diatu.

Servis bot tambang agi laku ba Batang Rajang

SIBU : Jalai sungai agi laku ditengah rayat ke diau nebing sungai Batang Rajang enggau Batang Igan taja pan menua nya udah bisi jalai raya.

Ari tinjau pemberita, tepedaka agi mayuh orang ke ngena motosikal ngena bot tambang lebuh sida nurun bekereja. Kelimpah enda masau jam, ngena bot tambang jampat agi datai bebanding nengah jematang Batang Igan ngelawa bandar Sibu.

Enti nengah jematan Batang Igan, orang ke ngena motosikal nyau meling jalai Sungai Bidut, udah nengah Jalai Ding Lik Kong enggau pasar Sungai Merah baru datai ba bandar.

“Pejalai nya chukup jauh, lebih lapan kilometer bebanding ngena bot tambang ke semina 10 minit aja,” ku seiku orang ke diau ba Engkilo ke dikanggau Injan.

Injan madah, ari rumah iya pengelama pejalai semina 10 minit enti ngena perau tambang lalu ungkus semina 80 sen.

Taja baka nya, ku iya enti nengah jematan Batang Igan lalu nepan motosikal, timpuh pejalai nyau ngelui setengah jam lalu iya madah agi nadai kereban pengangkut baka bas tauka van ari bandar besai ngelawa rumah iya.

Injan ke diau ba lus palan orang ngaga kapal ba Engkilo nitihka laki iya gawa dia, lalu madahka ngena perau tambang nyamai agi nadai ibuh berumban.

“Orang ke ngambi ngena bot tambang bepun bejalai berengkah pukul 6.30 pagi lalau badu gawa pukul 5.00 lemai.

Aku semina ngena teksi tauka van nyema laun pulai ari pasar. Udah nya, caj tambang endang chuku mar," ku iya ti madahka menua asal ari Song.

Injan madah, maya pagi enggau lemai endang mayuh agi orang ke nepan bot tambang. Entara palan ke agi nyediaka servis bot tambang tu iya dermaga Tua Pek Kong, dermaga semak Pengkalan Rajang, dermaga Kong Ming enggau dermaga Simpang Tiga.

Rayat meseti pechaya ngagai semua chalon BN

SIMUNJAN : Rayat dilalau ngambika terus pechaya ngagai chalon Barisan Nasional (BN) ke deka bediri ba genap sitak parlimen maya Pengawa Bepilih Besai Ke-13 (PRU-13) tu ila.

Kebuah pia, laban semua chalon BN ke deka bediri ba 222 buah kerusi Parlimen ba menua tu endang orang ke dikandal sereta nadai kala makai suap, ku Kaban Parlimen Sri Aman, Masir Kujat.

“Pekara tu kala disebut aku ba Banting Ili, Lingga. Tuju iya dikena meri pengandal ngagai rayat senentang semua chalon BN endang lurus lalu ukai baka ke suah didawa raban penyakal ngelama tu.

“Nya alai, enti raban penyakal bisi datai ngagai menua kita lalu ngumbai chalon BN ngembuan penanggul anang sesekali arap laban nya sebagi chara dikena sida minta sukung kita," ku iya.

Masir madah munyi nya rambau bejadi Pengerami Tuai Begulai Enggau Rayat ba Rumah Edwin Padang, Sungai Indai Atas Baru ba pelilih menua Simunjan kena Hari Satu tu tadi.

Kelimpah ari nya, Masir ngelalau rayat ngambika enda milih penyakal, anang ketegal enda puas ati meda pemansang lubah digaga ba genturung pendiau sida ngelama tu.

“Ni-ni perintah enda ulih ngaga projek pemansang tekala nya magang laban semua pemansang meseti dipelin dulu sebedau digaga.

“Perintah ngemeratka projek ke ulih meri penguntung ngagai semua rayat. Nya alai, rayat meseti besabar nganti, sereta ngenataika peminta nengah jalai ke betul nuju perintah udah tu," ku iya.

Dulu ari nya, Masir madahka agih belanja Projek Mit Menua Pesisir RM3,000 ungkup JKKK enggau RM4,000 ungkup gerempung indu Kampung Sungai Indai Atas Baru.

Berebak enggau nya iya madahka agih belanja (Touch Point) RM74,600 ungkup sekeda rumah panjai ba kandang menua Simunjan.

Sama bisi datai ba pengerami tu iya nya Chairman Gerempung Tuai Rumah Balai Ringin, Kunselor Peter Mooney, Kepala Operasyen Raban Nembiak Parti Rayat Sarawak Balai Ringin, bala kunselor enggau Tuai Rumah ba endur nya.

Orang ke baru jadi meseti ngaga surat kahwin

SIBU : Raban nembiak ke maya hari tu majak nemu pemesai reti guna ngembuan Surat Kahwin tauka Surat Tikah.

Temenggung Sir Adrian Ringgau madah, penyampau orang ke baru belaki enggau bebini ngembuan surat nya diatu nyau majak nambah.

"Sida udah nemu pemesai reti guna surat kahwin. Nyema nadai ngambuan surat kahwin, sida tentu pedis deka ngambi duit ba Kumpulan Wang Simpanan Pekerja (KWSP) enggau pengawa ke bukai.

"Nya alai, dikena nandaka sida endang amat udah sah jadi mekali bini, sida endang patut ngaga surat kahwin," ku iya madah ngagai pemberita apin lama ke udah.

Iya madah, nyema orang ke udah jadi tu nadai agi sepenemu, laki tauka bini ulih minta sarak ngena surat nya.

"Nyema agi bedau ngaga surat kahwin, pedis deka ngamatka seduai udah jadi," ku iya.

Andrian Ringgau mega madahka , barang sapa orang ke baru jadi diatu mesetingaga surat kahwin.

"Kebuah pia, laban semua atur pengawa ti bekaul enggau opis perintah endang begunaka surat tikah.

"Kelimpah ari nya, nyema bini deka beperesa ba klinik tauka deka beranak, orang ba klinik tauka hospital deka meda surat kahwin dulu<" ku iya.

Iya madah, ngelama tu mayuh penanggul nyadi berindik ari orang ke udah jadi melaki bini tang nadai ngembuan surat kahwin.

"Ambika chunto, Border Scout nadai ngembuan surat kahwin laban iya kahwin ngena adat Iban. Enti Border enggau bini iya deka ngaga sebarang peminta sigi bisi penanggul nyadi laban seduai empai temu amat jadi.

"Nya alai, bepun ari taun 1993, Majlis Adat Istiadat Iban udah ngeletak genap iku orang ke jadi melaki bini meseti ngembuan surat tikah," ku iya.

Adrian mega ngelalau nembiak raban bansa Dayak ngmbika ngerijista surat kahwin sida ba Opis Pengerijista Bansa (JPN) maya deka ngaga surat kahwin.

"Ngena chara kahwin undang-undang, orang ke jadi deka dijaga nitihka undang-undang enti dibanding kahwin ngena Adat Iban.

"Taja baka nya, enti deka ngerista ba Opis Daerah endur ngaga surat tikah lalu ngena Adat Iban pan nadai salah," ku iya lalu madah barang sapa orang ke jadi melaki bini tang nadai ngembuan surat kahwin tau dikumbai kahwin koboi.

Kaban SUPP diperansang terus beserakup

SARIKEI : Kaban Parlimen Sarikei, Ding Koung Hiing ngelalau kaban Parti Bersatu Rayat Sarawak (SUPP) terus beserakup lalu anang sesekali belaya enggau pangan diri.

Iya madah, pemisi SUPP dalam komponen BN ukai semina nandaka pengering parti nya tang mega nulung ngaga pemansang ngagai rayat.

Nya alai, SUPP ukai semina nyadi sebuah parti tang mega ngeringka BN bukai baka, Parti Pesaka Bumiputera Bersatu (PBB), Parti Rayat Sarawak (PRS)  enggau Parti Demokratik Rayat Sarawak (SPDP).

“Ngambika BN terus kering, kitai meseti beserakup. Semina nengah chara baka nya, kitai ulih terus ngemansangka pengidup rayat.

Kita meseti nemu, taja baka ni pan penanggul bisi nuntung rayat meseti diperati dulu," ku iya.

Iya madah munyi nya rambau aum betambit pintu SUPP Sarikei beserimbai enggau penemuai presiden parti nya, Datuk Seri Peter Chin Fah Kui, kena Hari Satu tu tadi.

Ding ngarapka rayat terus nyukung BN megai perintah ngambika agenda pemansang menua terus ditampung. Iya madah, endang nadai kebuah rayat enda nyukung polisi pemansang ke udah digaga BN.

“Pemujur BN ngemansangka menua tu asil ari sukung rayat," ku iya.

Nya alai, iya ngelalau rayat anang pambar ari perintah ngambika pengelantang diatu terus diasai sepanjai maya.

“Semina BN ulih ngubah pengidup rayat, semina BN ulih meri perengka guna, nempa puku mensia ke menyana laban BN udah teleba merintah menua," ku iya.

Berindik ari nya, polisi pemansang BN meseti ditemu semua rayat ba menua tu ngambika rayat enda salah penemu senentang juluk polisi perintah.

“BN ngena atur ke lurus sereta ngemujurka agenda pemansang ti betul-betul meri pengelantang ngagai semua rayat.

Tambah mega, ku iya BN seruran magi pemansang ke bela ungkup semua pupu raban bansa di negeri tu lalu meri penguntung ngagai semua orang.

Latih nyemerai ba PLKN bepun taun baru

BAU : Kira 140,000 nembiak lepas pom lima dipilih nyereta Program Latih Ke Menua Enggau Bansa (PLKN) ungkup renggat taun baru tu ila.

Chairman Opis Latih Ke Menua Enggau Bansa , Datuk Dr Tiki Lafe madah, dipelabaka 42,000 iku pelatih deka dipilih ngulu latih tu ungkup genap sesi ba sereta menua bepun  bulan Januari 2013.

“Taja baka nya, ukai semua sida ke udah kena pilih ulih nurun laban sida bisi penanggul ke enda ulih diseliah," ku iya madah ngagai pemberita pengudah bejadi Kembara Bumi Kenyalang beserimbai enggau Promosi Mega PLKN Zon J ba Kem PLKN Puncak Permai ba ditu, kemari (Hari Empat).

Iya madah, entara kebuah ke selalu dikenatai raban nembiak ke enda ulih ngulu latih baka nyambung belajar, laun nerima surat, enda pengerai enggau mayuh agi ke bukai.

"Ngagai sida ke nadai datai ngulu latih, raban kami deka ngaga pansik. Enti sema sida enda nurun nadai kebuah ke berat kami deka ngeletak ukum.

“Taja baka nya, ukai semua sida ke enda nurun nerima ukum laban tebal agi sida ke nadai ulih datai meri kebuah ke enda ulih diseliah," ku iya lalu madahka penyampau nembiak ke dipilih ngulu sesi latih udah tu ila deka ditambah ngagai 500 iku ba genap bengkah kem latih.

Iya madah, bepun taun 2013, program latih nyemerai deka berengkah bari ba genap bengkah kem latih ke kala diketu sebedau tu.

“Taja baka nya, latih nyemerai tu enda digaga ba kem latih tang ba palan pegung nyemerai ke endang udah dipilih," ku iya.

Datuk Dr Tiki mega nyadaka timbal bekaul enggau program PLKN naka ke diatu majak disukung mensia mayuh.

“Kelimpah ari nya, bisi sekeda nembiak deka minta diri masuk PLKN taja pan nama sida nadai kena pilih.

“Pekara tu nandaka mensia mayuh majak nemu pemesai reti nganjung anak belatih tauka nyereta program PLKN,” ku iya.

Ngenang pasal program Kembara Bumi Kenyalang nya, iya madah, tuju iya dikena ngelakuka PLKN sereta meri penerang senentang PLKN ngagai mensia mayuh ke diau ba menua pesisir.

“Program ngelakuka PLKN tu berengkah pun bulan Disember tu tadi lalu disaup 55 iku pematih, staf pengatur pengawa enggau kaban Briged Sukarelawan Khidmat Negara (BSKN) ari 81 buah kem PLKN ba serata menua,” ku iya.

Ba negeri Sarawak program ngelakuka PLKN tu bepun ari Rumah Panjai Kampung Mongkos, Serian lalu deka tembu diatur ba semak Gua Niah, Miri kena 17 Disember.

Badu bejai perintah ngagai menua luar

SANTUBONG :  "Enda ibuh bejai perintah kitai ba menua luar, kitai peda aja nama utai ke nyadi ba menua Iraq.

"Menua nya charut laban tuai politik sida empu ke nyadung penusah diri ngagai menua orang. Tu meh pekara ke patut diperati lalu diperundingka semua kitai," ku Datuk Wan Junaidi Tuanku Jaafar lebuh ke ngenang sekeda raban penyakal ke majak bejai perintah menua Malaysia ngagai orang menua luar.

Iya ti mega nyadi Kaban Parlimen Santubong madah, pemandak runding orang ke baka nya semina nguruga pengelikun ba menua tu.

Orang ke baka nya 'nyau baka nusi pengurang diri.'

"Aku chukup enggai meda raban politik nusi penanggul ngagai orang menua luar. tambah mega bedau kekari pengawa bepilih tang rita kitai udah didinga ba menua Australia enggau Amerika.

Enti dipansik pengawa ke baka nya enda kala meri penguntung. Tang ke mayuh agi meri penanggul ngagai ekonomi, sosial enggau pekara bukai," ku iya.

Iya madah munyi nya ngagai media maya ngabas taba projek tekat tebing tasik ba Kampung Buntal ba ditu kemari (Hari Empat).

Sama bisi datai iya nya Sapit Direktor Dewan Bandaraya Kuching Utara (DBKU) Haji Mohamed Khaider Abang, Direktor Pengatur RASSHIN Sdn Bhd, Rusla Bujang sereta Enjinir Radisa Principal, Saiful Bahri Eddie.

Nitihka penerang Sapit Speaker Dewan Rayat nya, bepolitik endang mayuh chara tang anang sampai bejai perintah menua Malaysia ngagai menua bukai.

"Kitai peda aja menua Amerika. Taja pan sida bebendar bepolitik tang sida enda kala sampai bejai pangan diri ba menua luar.

Pekara ke baka nya semina ditemu ba dalam menua aja, tang enda ibuh ditusi ngagai orang bukai.

Tang ba menua kitai, penemu orang ke pandak runding dalam politik chukup nyengala dipeda. Sida rindu agi meda orang menua luar bela enggau dalam ngereja pengawa," ku iya.

Iya mega madah, ambi ke chunto ba Sarawak, pengawa orang ke nyengala udah dipeda iya nya madahka Kompeni Hydro Tasmania bisi enggau dalam projek dam ba Bakun, apin lama ke udah.

"Kebendar iya, pekara nya enda nyadi enti sema nadai orang nusi jerita mayuh macham ngagai tu NGO-NGO ( gerempung ukai perintah) menua luar.

Mayuh duit berankkka puku udah deka diberi ba projek nya tang enda nyadi.

Pekara ke baka semina meri pengerugi lalu pengidup ekonomi rayat sigi pedis deka mansang kelebih agi ba senentang bepintaka pengawa enggau pekara bukai," ku iya.

Kek lapis UNIMAS nyadi rikod

KOTA SAMARAHAN : Universiti Malaysia Sarawak (Unimas) deka nempa rikod ketiga dalam Malaysian Book of Record iya nya ngaga kes lapis Sarawak ke pemadu besai.

Pengawa ngaga kek lapis nya dikumbai Program Lapis_88@Kenyalang.UNIMAS.my lalu nyadi siti pengawa ke digaga raban mahasiswa enggau mahasiswi UNIMAS ke berambaika jaku “Raikan 20 Tahun Riangkan Serumpun” ti mega bekerejasama enggau Rabiah Amit Cake House.

Kek Lapis Sarawak ke pemadu besai nya kira 5 meter pemesai tisi lalu 10 meter pemanjai lalu tembu digaga dalam timpuh tujuh hari, enti dibanding enggau pengawa ngaga kes lapis ke kala digaga Unimas ke dulu suba.

Kelimpah ari nyadi rikod, tuju program tu diatur mega dikena ngelakuka Unimas sereta ngeritka kaul enggau bala tauke kek lapis enggau bala orang ke udah melanja program.

Nangkan ke nya, tuju program tu mega dikena mandangka main asal di nengeri tu lalu asil kek lapis ke dijual nya deka diberi ngagai gerempung-gerempung pengintu pendiau ke udah dipilih ba nengeri tu.

Pemujur program tu nyadi siti sejarah ke pamadu besai reti beserimbai enggau ulang taun UNIMAS ke 20 taun, udah nya program bukai dikena meri bantu ngagai raban pelajar Unimas kelebih agi ngagai sida ke kurang penatai pemisi tauka enda bidik lansik.

Pengerami tu dipenyadi Tuai Pemegai Menua (TYT) Negeri Sarawak Tun Datuk Patinggi Abang Haji Muhammad Salahuddin ti mega nyadi Chanselor UNIMAS.

Udah nya, sama bisi datai iya nya Kepala Menteri ti mega nyadi Pro-Chanselor Pehin Sri Haji Abdul Taib Mahmud, bini iya  Puan Sri Ragad Kurdi Taib, bini TYT Toh Puan Hajah Norkiah enggau Sapit Menteri Pemadah, Komunikasyen enggau Main Asal Dato Joseph Salang Gandum.



 

Orang indu dilalau beperesa Pap Smear enggau Mammogram

JULAU : Orang indu ke diau ba menua pesisir ba nengeri tu dilalau ngambika enda nejuka pengawa beperesa pengerai baka pap smear enggau mammogram.
  
Sapit Menteri Pemadah, Penyambung enggau Main Asal, Datuk Joseph Salang madah, pengawa beperesa pengerai beguna amat ngambika orang indu nemu baka ni tanda-tanda kena penyakit, laban enti udah raya pedis amat deka diperubat.
  
Kelimpah ari nya, genap iku orang diatu patut meresa pengerai diri dikena nyeliahka penyakit enda berambit baka kemi manis enggau darah tinggi, enti penyakit tu ditemu tumu nyamai diperubat, ku iya rambau bejadi dua bengkah program senentang pengerai ke diatur ba dua buah rumah panjai ba sitak Parlimen Julau ba ditu, kena Hari Lima tu tadi.
  
Program keterubah iya nya karnival pengerai mindah ke diatur Opis Pengerai Sarikei bepalan ba rumah panjai Ansi anak Ugat ba Sungai Rian, Ulu Sarikei maya tengah hari.

Udah nya, program kedua pengawa beperesa pengerai mata enggau kimpin macha bup ke diatur segulai entara Sibu Seduan Lion Club, Opis Pelilih Julau, Opis Pengerai Julau, Opis Pekara Khas, Majlis Daerah Luar Bandar Meradaong/Julau ba rumah panjai Ansi, Nanga Lioh ba ditu malam Hari Lima tu tadi.
  
Maya nya, Salang ngelalau mensia mayuh ngambika seruran makai pemakai ti beresi, pia mega selalu besenam dikena nyeliah penyakit kemi manis enggau darah tinggi.
  
"Enti enda likun enggau pengerai, diri sebilik deka pedis ngintu kita lebuh kita sakit," ku lalu meri puji ngagai orang rumah panjai laban ke dipeda nyau majak nemu nyaga pengerai diri.

Iya mega muji opis pengatuir program laban nengah proogram ke baka nya mensia mayuh kelebih agi ba kandang menua Julau majak nemu nyeliahka penyakit enda berampit baka kemi manis

Pemujur industri kreatif

"Pengulih nya meh nyadi kelai pemadu besai reti mandangka industri kreatif meri pemujur dalam nyungkak penatai pemisi ba menua tu setipak enggau langgur pemansang ke udah diperambu."
Pehin Sri Haji Abdul Taib Mahmud
Kepala Menteri Sarawak

KUCHING : Industri kreatif ngembuan penau diadang tau nyungkak ekonomi menua kelimpah ulih nyadi produk dalam menua (GDP).

Kepala Menteri Pehin Sri Haji Abdul Taib Mahmud madah, industri kreatif udah ngasilka RM9.4 bilion ngagai GDP menua ba taun 2008.

"Pengulih nya meh nyadi kelai pemadu besai reti mandangka industri kreatif meri pemujur dalam nyungkak penatai pemisi ba menua tu setipak enggau langgur pemansang ke udah diperambu," ku iya.

Jaku iya nya dibacha Penulung Menteri Perambu Sumber, Datuk Haji Naroden Haji Majais rambau bejadi Festival Mutiara Seni 2012, Sekula Seni Malaysia bepalan ba Kompleks Dewan Undangan Negeri (DUN) Lama, ba ditu malam Hari Lima tu tadi.

Pehin Sri Taib madah, nengah pemansang nya meh ngujungka perintah numbuhka Pemun Industri Kreatif Nasional dikena ngepunka pemansang industri kreatif ba menua tu.

Iya mega madahka, prinsip pemun nyad dikena ngemansangka produktiviti industri kreatif nengah sukung ari opis swasta enggau perintah.

"Nengah pemun nya mega, mayuh peluang disedia ngagai raban artis, raban nembiak rebak dudi endur nyadaka langgur penemu, mandangka penau enggau pengelandik ngambika ulih dikerembai ngagai tikas ke lebih tinggi," ku iya.

Nya alai, ku Pehin Sri Taib, Festival Mutiara Seni meri bekau ke chukup manah ngagai nembiak seni lalu pemansang sekula seni patut disukung ngambika raban nembiak ke belajara dia ransing agi ngulihka penemu.

Berebak enggau nya, Festival Mutiara Seni nyadi pantar alai bala nembiak seni mandangka pengulih diri empu sebedau ke pansut besemekih enggau orang ke lebih agi teleba ba bidang seni.

"Penumbuh Sekula Seni ku sebagi ari chara perintah dikena ngetanka adat lama sereta meri penemu ke nadai nemu badu ngagai bala nembiak," ku iya.

Bisi dua bengkah endur sekula seni digaga ba menua tu iya nya ba Sekula Seni Kuching enggau Sekula Seni Johor ke bela bisi mandangka pengelandik ba pengerami nya.

Sekula Seni Kuching mandangka teater muzikal Santubong : "Kasih Tidak Kesampaian", udah nya Sekula Seni Johor mandangka sebuah teakter ke dikumbai "Legasi".

Festival Mutiara Seni 2012 diatur bepun 10 ngagai 16 Disember lalu bekerejasama enggau Opis Pelajar Negeri Sarawak.

AES enda patut dibalut enggau politik

KUCHING : Pengawa nyediaka Sistem Neritka Kuasa Automatik (AES) ba semua jalai raya ba menua tu enda patut dibalut enggau pengawa politik.

Sapit Speakar Dewan Rayat, Datuk Dr. Wan Junaidi Tuanku Jaafar madah, penusah bebadi jalai raya entara pekara ke balat dirundingka perintah besai lalu berindik ari nya perintah bebendar ngiga chara ngurang penyampau penusah bebadi ba jalai raya.

Iya madah, ari 617,000 penyampau kes bebadi jalai raya ke bisi dirikod ba menua tu, bisi 6,349 ari sida nya bebadi ba taun taun 2011.

Penusah bebadi jalai raya tau ngujungka pengerugi sampai bebilion ringgit ngagai menua, pia mega ngeruga sistem sosial rayat.

Iya madah munyi nya rambau Pengerami Makai Malam Ulang Taun ke-11 Institut Belajar Deriba WJ Wego Sdn. Bhd., ba sebengkah hotel tebilang ba ditu, bela bisi datai iya nya bini iya Datin Fiona Junaidi.

Junaidi madah, ba Sarawak bisi 402 iku orang mati ba penusah bebadi jalai raya ba taun 2011, lalu ditangkanka 300 iku mati ba taun tu ba penusah ke sebaka.

"Perangai ke eksen tauka ngemamaka diri entara kebuah penusah bebadi jalai raya balat nyadi ngujungka nyawa lesi bebadi," ku iya.

Junaidi mega ngelalau, pengguna jalai raya patut bejimat-jimat maya deriba sereta nitihka undang-undang jalai raya.

Berebak enggau nya, iya beamat-amat nyukung Sistem Neritka Kusas Automatik (AES) ba semua jalai raya ba serata menua tu.

"Tuju AES tu ditumbuh dikena ngelala pengguna jalai raya ke ngelanggar undang-undang sereta ngambika sida bejimat-jimat maya deriba lalu enda ngenusah pengguna bukai,"ku iya.

Junaidi madah, penyalah trafik bekaul amat enggau perangai pengguna jalai raya laban enti sida bejimat deriba tentu enda ngelanggar undang-undang jalai raya.

"Aku berasai nyima meda sistem tu nyau dibalut enggau pengawa politik sekeda orang ke ngumbai sistem tu baka panjuk tang kebendar iya dikena ngajar semua kitai," ku iya lalu madahka bisi 78 buah menua ba dunya ngena sistem nya.

Taja baka nya, aku nyadaka langgur penemu ngambika bala pengguna jalai raya diberi timpoh tiga bulan dikena nelebaka diri ngena sistem nya.

"AES tu atur ke pemadu baru ba menua Malaysia lalu pengguna udah teleba ngena undang-undang lama.

"Nya alai, aku ngarapka perintah ulih meri timpuh ke chukup dikena nelebaka pengguna ngena sistem baru tu," ku iya.

Nangkan ke nya, Direktor Pengatur Institut Deriba WJ Wego Sdn. Bhd., Eric C.L Chai madah, sigi agi pampang institut belajar deriba tu deka dibuka ba Santubong taun baru.

"Kami diatu benung nguji muka palan baru, enti nadai penanggul kami deka bepun ngaga iya ba taun 2013," ku iya.

Rayat Sarawak diperansang nyereta Pekit Hari Medeka

KUCHING : Rayat peranak menua Sarawak diperansang masuk pekit ngaga rambai jaku tauka tema, logo enggau lagu beserimbai enggau ulang tahun ke-50 Sarawak medeka pengudah enggau numbuhka menua Malaysia.
   
Haribulan ke penudi endur masuk pekit ke diatur perintah negeri tu iya nya 31 Januari tu lalu pekit tu tebuka ngagai semua peranak menua Malaysia ke diau mendam ba nengeri tu.
   
"Orang ke menang dalam pekit tu ila deka diberi setipikit enggau perais duit, iya nya RM30,000 ungkup pemenang kategori lagu, RM10,000 kategori tema enggau RM10,000 ba kategori ngaga logo," ku seiku komiti pekit, Yayasan Sarawak ba surat berita ke dianjung kitu kemari (Hari Satu).
   
Iya madah, bala pesereta ulih milih sekalika nyereta pekit dalam siti kategori tauka lebih lalu semua asil pengawa ke digaga meseti dianjung ngagai Komiti Pekit Ngaga Logo, Tema enggau Lagu ba Pusat Pembangunan Pendidikan Yayasan Sarawak, Jalai Sultan Tengah ba ditu.

Pom dikena nyereta pekit enggau atur pekit ulih diambi ari ruai internet Yayasan Sarawak www.yayasansarawak.org.my

56 peratus pelajar KKMS udah bulih kereja

BAU : Lebih kurang 56 peratus pelajar ke udah tembu belajar ba Kolej Komuniti Mas Gading (KKMS) mujur bulih kereja ke meruan ba opis perintah enggau swasta.

Nitihka penerang Direktor iya, Chow Tio Kiong, tebal agi bala pelajar tu bulih pengawa ba opis swasta pengudah tiga bulan sida tembu belajar.

"Ripot tu ditemu nitihka pansik ari 'Laporan Graduan' ke digaga ninting taun laban deka nemu penyampau nembiak ke bulih pengawa," ku iya madah ngagai media pengudah bejadi Aum Ungkup Pelajar Baru ba ditu kemari (Hari Satu).

Chow madah, naka ke diatu lebih kurang 700 pelajar udah ditempa ba Kolej Komuniti lalu sida udah mujur bulih pengawa, penyampau nya mega ngujungka chow berasai gaga ati.

"Reti iya semua kus ti dipelajarka nembiak ba endur tu manah magang lalu nadai ngasuh nembiak rugi belajar.

"Tambah mega gaji ke diberi ngagai sida ke bulih pengawa chukup manah engkeman enggau pendiau pengidup ke maya hari tu," ku iya.

Kolej Komuniti ditumbuh berengkah ari taun 2012 lalu dikuasa Opis Menteri Pelajar Tinggi, nyediaka 22 iti kus ungkup bala pelajar.

Kus tu nyengkaum kus grafik enggau multimedia, nyediaka pemakai tauka katering, bakeri enggau pastri, bedagang enggau seni ngaga rumah.

Ari penyampau nya, mayuh agi pelajar milih komputer teknologi pemadah.

BELAJAR BARU... Chow Tio Kiong benung meri penerang ngagai sekeda pelajar rambau Aum Ungkup Pelajar Baru Kolej Komuniti Mas Gading ba Bau.

Penyampau jenayah ba Daerah Bintulu majak kurang

BINTULU : Penyampau jenayah ba Daerah Bintulu ari bulan Januari ngagai Disember taun 2012 nurun 21.67 peratus tauka 259 kes  ngagai 936 kes enti dibanding 1,195 kes  dalam timpuh ke sebaka ba taun 2011.

Kepala Polis Daerah Bintulu Superintenden Madang Usat madah, penyampau nya dipeda nurun berindik ari pemendar pengawa ke udah dikereja raban polis ke disaup mensia mayuh.

Berindik ari penyampau nya mega, iya ngelalau semua polis ngambika bebendar agi ngurangka penyampau jenayah setipak enggau juluk Petunjuk Prestasi Utama(KPI) enggau Bidang Keberhasilan Utama Negara(NKRA) ulih tejapai.

Ari penyampau nya mega, Madang ngarapka jenayah ab endur nya majak kurang nyentuk ngagai ujung taun tu.

Iya madahka pekara nya ngagai pemberita lebuh ke dirandau media pengudah tembu aum begulai enggau bala polis ba Indu Opis Polis Daerah Bintulu ba ditu, kemari (Hari Satu).

Iya mega madahka, raban polis udah tu deka bebendar agi munaska kes jenayah sereta bekerejasama enggau mensia. Entara kes jenayah ke balat diperati iya nya kes enchuri kerita enggau enchuri dalam rumah orang.

Madang pechaya pengawa jenayah ba endur nya deka kurang agi udah tu laban polis baru bisi ditambah 15 iku.

Dalam pekara ke sebaka mgea, Madang udah ngerag dua iku polis trafik polis gawa ba jalai raya ke suah sekut.

Dua bengkah jalai ke suah sekut tu iya nya ba jalai bepusin semak lampu trafik Jalai Tun Hussein Onn nuju ngagai pasar besai enggau jalai bepusin semak lampu trafik RPR Kidurong, Tanjung Kidurong enggau Jalan Nyabau ba ditu.

Penyekut jalai tu nyadi ketegal penyampau kerita ke mayuh nengah jalai bepusin ba dua bengkah endur tu iya nya urung pukul 7.00 ngagai 8.00 pagi enggau ari pukul 5.00 ngagai 6.00 lemai.

Sama bisi datai dirandau media iya nya Sapit Kepala Polis Daerah Bintulu DSP Mohd Said Ibrahim enggau Kepala Opis Jabatan Siasatan Jenayah Bintulu ASP Awang Zamain Awang Jabai.

Rayat ditangkan terus beretan nyukung BN

TERIMA KASIH...Tuai Rumah Melina nyuaka pemeri ngagai Masir lalu dikemataka Maclina, Pengulu Tinggie enggau Kunsilor Jubit maya Pengerami Tuai Begulai Rayat ba Rawan Ili, Tanjung Bijat.

SRI AMAN : Rayat dilalau ngambika enda alah umbuk raban penyakal ke nguji ngeruga pengelikun politik ba negeri tu, ku jaku tangkan Kaban Parlimen Sri Aman, Masir Kujat.

Iya madah, isu ke dibai raban penyakal tebal agi pekara ke enda manah senentang perintah dikena sida ngulihka sukung ari rayat.

“Tuju pengawa raban penyakal baka nya ngambika rayat enggai meda perintah Barisan Nasional (BN).

“Enti pengawa sida mujur, tentu pengelikun politik tejanggal. Pekara nya mega tau ngujungka menua charut lalu rayat pambar ari pangan diri," ku iya.

Masir madah munyi nya rambau bejadi Pengerami Tuai Begulai Enggau Rayat ke diatur ba Rumah Gilbert Melina, Rawan Ili ba menua Tanjung Bijat Sri Aman kena Hari Minggu tu tadi.

Pengelikun politik ke dikachau raban penyakal nya tau medis pelin pemansang ke udah digaga perintah BN ngelama tu, Ku Masir.

“Nya alai, aku ngarapka rayat terus beretan nyukung BN laban semina parti nya ulih megai menua pengudah Pengawa Bepilih Besai (PRU-13) tu ila," ku iya.

Sama bisi datai ba pengerami tu iya nya Pengulu Tinggie Nyandang, Kunsilor Jubit, Chairman Gerempung Indu Rawan Ili, Maclina Gilbert enggau  48 iku Tuai Rumah ba menua Tanjung Bijat.

Ba pengerami nya, Masir bisi nyuaka (Touch Point) RM162,300 ngagai 52 buah kampung ba kandang menua Tanjung Bijat.

Iya mega meri agih belanja RM4,100 ungkup JKKK Rumah Gilbert Melina enggau agih belanja ungkup Projek Mit Menua Pesisir RM3,000 ngagai gerempung indu ba rumah panjai nya.

Penyelai pemakai narit ati temuai luar

SIBU : Penyelai chara nyumai enggau pemakai ke dikembuan pupu raban bansa ulih narit ati temuai kelimpah ti nyadi dinah ngagai mensia mayuh ke makai sebelah kedai ba ditu.

Menteri Perintah Pelilih Menua Enggau Pemansang Mensia Mayuh, Dato Sri Wong Soon Koh madah, chara nyumai enggau pemakai nandaka daya pengidup sebengkah-sebengkah bansa lalu patut dipandang ngagai temuai ke datai ngagai menua Sibu.

Selalu iya, bala temuai rindu nemuai ngagai sesebengkah menua rindu nyepi penyelai pemakai enggau utai sumai siti-siti bansa, ku iya rambau nutup Pengerami Pemakai 1 Malaysia bepalan ba Dataran Bandar Sibu ba ditu kena Hari Minggu tu tadi.

Pengerami Pemakai nya diatur pengelama 21 hari diatur Opis Menteri Dagang Temuai Malaysia bekerejasama enggau Gerempung Orang Bedaja Malaysia, Gerempung Orang Bedaja Sarawak, Majlis Perbandaran Sibu, Dewan Dagang enggau Industri Cina Sibu, Gerempung Tujuh Klan enggau Gerempung Orang Bedaja Sibu enggau Daerah Meradong.

Iya madah, bisi 120 kedai makai dibuka ngambika bela dipandang ngagai bala temuai ke datai.

Berindik ari nya, Soon Koh madah, pupu raban bansa ba ke diau ba menua tu chukup betuah laban ulih ngasaika pengelantang nyerumba pengerami pemakai setipak enggau konsep 1 Malaysia ke ditempa Menteri Besai, Datuk Seri Najib Tun Razak.

“Ari saup sereta kaul ke manah entara semua orang ngujungka pengerami tu mujur diatur," ku iya lalu madahka menua Sibu deka majak mansang enti sema menua Sungai Bidut, Salim enggau Sibu Jaya udah mansang jemah.

Taja pan pengerami pemakai tu bela bisi diatur ba menua Kuching, Bintulu enggau Miri ngelama tu tang pengerami pemakai ke diatur ditu chukup nyelai ari ke udah-udah, ku iya.

Pekit Dara Bajik Cheongsam, betanda Sibu Style enggau bekaraoke entara aktiviti ke bisi diatur nyerumba pengerami tu. Bala orang ke menang betanda Sibu Style enggau bekaraoke bela nerima perais ba pengujung pengerami nya.

Sama bisi datai ba pengerami tu iya nya Kaban Parlimen Lanang, Datuk Tiong Thai King, Temenggong Vincent Lau Lee Ming, Chairman Gerempung Bedaja Sibu enggau Meradong, Chieng Siong Nguong, Chairman Dewan Dagang enggau Industri Cina Sibu, Yu Hu Siong enggau Chairman Gerempung Melanau Sibu, Drahman Jabar.

Pemanah Sibu dipandang ngagai temuai Korea

SIBU : Empat raban pengari Majlis Daerah Guro, Soul, Korea Selatan dibai nemuai ngagai Rumah Panjai Adin Jawa semak Sungai Engkala, lemai Hari Empat tu tadi.

Penatai raban pengari tu diuluka Menteri Wang Kedua, Dato Sri Wong Soon Koh, Penulung Chairman Majlis Daerah Guro, Park Jong Hyeon, Seketeri Politik Kepala Menteri, Andrew Shilling Bangit, Pemancha Stanley Geramong sereta bala ke bukai.

Dulu ari nya, raban sida dibai raun meling bandar Sibu lalu diuluka Datuk Bandar Majlis Bandaraya Kuching Selatan (MBKS), Datuk James Chan, pengudah dua bengkah pengari tu nyain sempekat bambu kaban, apin lama ke udah.

Mua ke pagi, raban sida tu dibai raun ngabas Pasar Sentral Sibu lalu nguji nyepi pemakai ke bisi dijual ba endur nya.

James Chan madah, tuju pengawa raun entara raban pengari nya diatur dikena ngerapitka kaul.

"Ba penemu aku ti nyadi Datuk Bandar Kuching Selatan, tu meh sebagi ari pengawa ke chukup manah diatur dikena ngepunka taun 2013.

"Kami ukai semina beratika menua Kuching, tang selampur menua Sarawak. Aku chukup berasai gaga laban penatai kami chukup dipebasaka rayat ba endur tu," ku iya.

Iya mega ngarapka pengawa ke baka nya ulih suah agi diatur dikena betukar betemu enggau rayat menua luar ba senentang sukut dagang temuai.

"Aku chukup berasai gaga ati laban ulih mai sida raun meda menua Sibu laban Sibu entara menua ke pemadu manah ba Sarawak.

"Ba ditu kami ngembuan pasar ke pemadu besai lalu deka dipandangka ngagai bala kaban ari menua Korea,"ku iya.

Raban Nembiak SUPP Bekenu ngatur program meri darah 13 Jan

SIBUTI : Raban Nembiak Parti Bersatu Rakyat Sarawak (SUPP) Pampang Bekenu deka ngatur ProgramMeri Darah bepalan ba Dewan Masyarakat Bekenu kena 13 Januari tu.

Pengari pengatur program madahkam nya meh program keterubah deka diatur ba taun 2013, lalu mensia mayuh ke bisi ati meri darah ditesau sampal datai ngambika bela besaup meri darah.

Tuju program tu diatur dikena nulung nambahka penyampau darah ba Pusat Darah Negara sereta nulung orang ti begunaka darah.

Kelimpah ari nya, tu meh sebagi ari program ke digaga raban nembiak SUPP Pampang Bekenu dikena mantu mensia mayuh, ditangkan enggau pengawa meri penemu ke beguna ba sukut pengerai.

Program tu deka berengkah pukul 9.00 nyentuk ngagai 12.00 tengah hari, program tu kala diatur ba ditu empu ngelama tu lalu nerima sukung ke chukup manah ari mensia mayuh.

Nembiak sekula sekodari sereta mensia mayuh ke datai ari luar menua Sibuti mega diperansang datai bela nyukung ngemujurka program meri darah laban pengawa tu chukup manah dikena nulung orang ti begunaka darah sebarang maya.

PRU-13 : Raban bansa Iban tetap nyukung BN

Blalang anak Atom

Tr. Randie anak Bundan

MARUDI : Penemuai Tuai PKR Datuk Seri Anwar Ibrahim ngagai Marudi sehari tu (Hari Minggu) nadai ngeruga sukung rayat ngagai Barisan Nasional (BN).

Tuai Rumah Randie anak Bundan,57, ari Sg. Brit Kawasan Poyut /Lubok Nibong madahka, rayat ba rumah panjai ke dijaga iya endang mengkang kering nyukung chalon BN maya PRU-13 tu ila.

“Penemuai Tuai Penyakal Pakatan Rayat Datuk Seri Anwar Ibrahim ke dipadah pagila (Hari Minggu) endang nadai ngeruga kami serumah laban kami endang tetap tegap nyukung BN," ku Randie.

Nangkan ke nya, Randie nyadaka langgur penemu minta perintah BN tauka tuai BN ngatur sebengkah program ungkup raban nembiak bekaul enggau pengawa beperindang sereta ngangauka artis ba menua tu empu.

Randie madah, nengah chara ke baka nya raban nembiak deka terus meri sukung ngagai BN sereta ngerapitka kaul enggau tuai BN laban bala nembiak rindu enggau pengawa beperindang.

Kelimpah ari nya, iya madah. kebuah rayat majak nyukung BN laban BN udah mayuh nulung raban bansa Iban ba sukut infrastuktur enggau bantu ke bukai kelebih agi ungkup sida ke diau ba rumah panjai.

“Nadai kebuah kami nulak BN laban ngelama tu BN udah bebendar ngemansangka pengidup kami Iban," ku Randie.

Mandal Kunselor Blalang anak Atom,52, ari Sengkabang madahka jaku jamin raban bansa Iban ke dijaga iya endang tetap terus nitihka BN.

Iya madah, penemuai Tuai Penyakal Pakatan Rayat Datuk Seri Anwar ngagai Marudi sigi enda ngeruga sukung raban bansa Iban ari rumah panjai.

Iya madah, nyema bisi pan nyangka sekeda aha ke nyukung PKR laban ke tebal agi rayat ba endur tu rindu agi milih BN.

TR. Anthony Jelma anak Teby,60, ari Logan Tungga mega madahka penatai Tuai PKR Datuk Seri Anwar ke Marudi nya endang enda ulih ngubah runding bansa Iban ba endur nya.

“Nama reti kitai nyukung Parti Penyakal laban parti tu bedau temu meri pengelantang baka ke udah digaga perintah BN," ku iya.

Anthony Jelma madah, sekumbang BN udah megai menua mayuh amat projek pemansang udah disepi sida ba menua nya.

“Nya alai, nadai kebuah kami nukar tuai BN ke bisi diatu laban kami nemu pemanah BN udah mayuh ngaga ubah pemansang ba ditu," ku iya.

Berebak enggau nya, aku ngarapka bansa Iban ke diau ba rumah panjai kelebih agi ke nguan menua Poyut ./Lubok Nibong anang seseklai alah umbuk raban penyakal maya PRU-13 laban nangika projek pemansang ke udah diperambu tejanggal.

Pengelikun sosial patut dikemerat

BASA KEPENUDI...Kepala Menteri Pehin Sri Haji Abdul Taib Mahmud enggau bini iya, Puan Sri Ragad Kurdi Taib ngabas tubuh niang Kanang ba Dewan Suarah Kuching, kemari. Bela bisi dipeda enggau ngabas iya nya Sapit Kepala Menteri, Datuk Patinggi Tan Sri Alfred Jabu.

"Taja pan diatu menua kitai nadai beperang, tang sukut pengelikun sosial patut diperati, enti enda iya ulih ngeruga pengelikun menua."
Pehin Sri Haji Abdul Taib Mahmud
Kepala Menteri Sarawak


KUCHING : Dikena ngenegapka pengelikun, sukut sosial entara sukut pengawa ke patut dikemeran ngambika penyerakup ba menua tu enda pambar.

Kepala Menteri Pehin Sri Haji Abdul Taib Mahmud madah, pemerani Pahlawan Negara, Datuk Temenggong Kanang anak Langkau ulih ditunda enggau bemacham chara ngambika pengelikun ba menua tu terus beretan.

"Taja pan diatu menua kitai nadai beperang, tang sukut pengelikun sosial patut diperati, enti enda iya ulih ngeruga pengelikun menua," ku iya.

Iya madah munyi nya ngagai raban pemberita pengudah ngabas tubuh niang ke diengkah ba Dewan Suarah Kuching. Pejalai Kepala Menteri disempulang bini iya, Puan Sri Ragad Kurdi Taib urung pukul 11.00 pagi kemari (Hari Enam).

Pehin Sri Taib madah, penyerakup sebengkah ari pekara ke nyadi terabai menua napi mayuh macham penguji.

"Penyerakup ulih nyeliahka menua dituntung mayuh penguji ke tau ngeruga pengelikun nengeri," ku iya.

Nya alai, ku iya, pengelelang niang Kanang endang balat ngenyinuka ati semua kitai laban iya seiku ari bujang berani ke udah bebendar berambunka nyawa ngetanka menua rambau menua tu diserang munsuh.

"Sehari tu, kitai ngasaika pengelantang enggau penyenang asil ari pemanah ati enggau pemerani raban bujang berani dulu keli," ku iya lalu nyadaka penyinu ari ngagai sida niang sebilik.

Pehin Sri Taib madah, maya niang Kanang agi idup iya sempat meda negeri tu nyapai taun ke ke-50 pengudah menua Malaysia ditumbuh.

"Pengelantang ke disepi sehari tu asil ari pemerani enggau pengeri raban bujang berani menua dulu kelia," ku iya.

Nya alai, ku iya, pengelantang, pengelikun enggau penyerakup ke disepi sehari tu meseti dijaga ngambika enda mudah berubah.

Ngenang pemeri bantu ke deka diberi ngagai sida niang sebilik, Pehin Sri Taib madah, perintah nengeri deka berundingka dulu bekaul enggau pekara nya.

Pengawa nguburka niang Kanang deka diatur nitihka adat soldadu lalu niang dikuburka kena 6 Januari (Hari Minggu) pukul 3.00 lemai ba  Pendam Pahlawan, Taman Budaya ba ditu.

TYT ngabas niang Datuk Kanang ba Dewan Suarah

KUCHING : Tuai Pemegai Menua (TYT) Nengeri Sarawak, Tun Datuk Patinggi Abang Haji Muhammad Salahuddin enggau Toh Puan Datuk Patinggi Hajah Norkiah datai ngabas tubuh niang Pahlawan Negara, Datuk Temenggong Kanang anak Langkau bepalan ba Dewan Suarah Kuching ba ditu, kemari (Hari Minggu).

Penatai bala pemesai tu betuaika Sapit Kepala Menteri Datuk Patinggi Tan Sri Alfred Jabu Numpang urung pukul 10.15 pagi beretai enggau sekeda menteri kabinet enggau pengari rayat ke bukai.

Sebedau nya, urung pukul 8.30 pagi tadi, tubuh niang dibai ari ari Kem Penrissen, Batu Lapan, Jalai Kuching-Serian. Bela enggau berangkat ari kem tu iya nya sida niang sebilik enggau kaban belayan iya.

Entara bala pemesai ke bisi datai meri basa ke penudi ngagai niang iya nya Sapit Menteri Dagang Dalam Negeri, Enggau Pekara Bebeli Barang (KPDNKK), Datuk Rohani Abdul Karim enggau Sapit Menteri Sains, Teknologi enggau Inovasi (MOSTI), Datuk Haji Fadillah Haji Yusof.

Komisioner Polis Negeri, Datuk Acryl Sani Abdullah Sani enggau raban iya bela bisi datai meri basa ngagai niang urung pukul 10.45 pagi.

Mensia mayuh mega enda tinggal ngabas meri basa kepenudi ngagai niang ti diengkah ba tengah-tengah dewan. Kelimpah ari nya raban media mega meri basa kepenudi ngagai niang Kanang.

Pengawa meri basa ke penudi nya berengkah pukul 10.00 pagi nyentuk ngagai 12.00 tengah hari, udah nya disambung baru ari pukul 2.00 lemai ngagai pukul 5.00 lemai, kemari.

Dipelabaka lebih kurang 1,000 iku temuai datai ngabas niang ba pengawa meri basa ke penudi nya.

Mensia mayuh agi bepeluang datai meri basa ke penudi sehari tu Hari Minggu (6 Januari) ari pukul 9 pagi ngagai 12.00 tengah hari ba palan ke sebaka.

Sebedau dikuburka ba Pendam Pahlawan pukul 3.00 lemai 6 Januari, tubuh niang disembiangka dulu ba Gerija St. Thomas Kuching pukul 1.00 lemai.

PRU-13 : BN tetap malas pemanah rayat

KENA MERUAN...Rayong nyuaka insentif ngagai seiku penerima lalu dikemataka Nyalau rambau Pengerami Tuai Begulai Enggau Rayat ba Rumah Tambi, Nanga Tisak, Lidong Skrang, Engkilili.

ENGKILILI : Barisan Nasional (BN) deka terus malas pemanah rayat ke diau ba menua sitak Parlimen Lubok Antu seagi sida nulak penatai parti ke ukai BN maya Pengawa Bepilih Besai Ke-13 (PRU-13) tu ila.

Tanda iya, sekumbang BN udah menang ba Lubok Antu maya PRU-12, perintah malas enggau chara meri mayuh projek pemansang ungkup rayat udah nya.

Kaban Kunsil Negeri (ADUN) Engkilili, Dr Johnnical Rayong Ngipa madah munyi nya rambau bejadi Pengerami Tuai Begulai Enggau Rayat ba  Rumah Tambi, Nanga Tisak, Lidong Skrang, Engkilili apin lama ke udah.

“Kenyau ari taun  2008, rayat ba sitak Parlimen Lubok Antu nerima mayuh projek baka jalai raya, bekal kuasa karan, ai beresi, lalu semua tu perais ari perintah BN.

“Nya alai, rayat endang patut nulak chalon ke ukai BN maya PRU-13 ila, laban aku arap bendar perintah deka meri mayuh agi projek pemansang dalam kandang lima taun ke deka datai," ku iya.

Rayong mega ngelalau rayat ba menua Lubok Antu anang sesekali alah ninga jaku manah ari parti penyakal ke ngumbai sida kaling BN ngelama tu.

Iya madah, parti nya nyediaka insuran enggau duit dikena ngumpan rayat taja pan penyampau nya jauh mimit enti dibanding enggau projek ke udah diberi BN ba ditu ngelama tu.

“Nya semina chara dikena parti penyakal, Parti Pekerja Sarawak (SWP) diatu. Tambah mega sida nguji nganjung chalon ke ukai peranak asal Lubok Antu bediri ngelaban chalon BN ba ditu.

“Aku ngarapka rayat Lubok Antu ulih berunding panjai sebedau ke ngaga pemutus ngundi orang ke ukai chalon BN, anang sesekali ngundi orang ke ukai bansa Dayak tauka ukai orang asal ba menua tu maya PRU-13 ila," ku iya.

Ba pengerami nya mega, Kaban Parlimen Lubok Antu, William Nyalau Badak madahka penyampau agih belanja dikena nulung rayat ba rumah panjai Tambi nukar atap enggau RM3,000 ungkup gerempung indu ba rumah panjai nya.

Niang Datuk Kanang diintu penuh beradat

BASA ARI RABAN SOLDADU...Raban soldadu bepangkat Pegawai Waran 1 ari servis darat, laut enggau udara ngesan sentubong niang Datuk Temenggong Kanang Langkau sebedau niang disembiangka ba Gerija St Thomas Cathedral, Kuching.

KUCHING : Niang Pegawai Waran 1 (B) Datuk Temenggong Kanang anak Langkau terus diberi basa ke penudi ari semua pupu raban bansa nyengkaum bala pemesai perintah, orang ke ngelala, kaban belayan enggau sida sebilik

Entara pemesai perintah ke enda tinggal datai ngabas niang ba Dewan Suarah iya nya Panglima Angkatan Tentera Jen Tan
Sri Zulkifeli Mohd Zin.
   
Iya datai urung pukul 11.50 pagi, ngaga awak 25 minit meri basa ke penudi ngagao niang, pia mega berandau enggau sida niang sebilik sebedau ke nyain bup endur ngenataika jaku penyinu ati.

Sama bisi datai iya nya Panglima Tentera Darat Jen Tan Sri Zulkifli Zainal Abidin ; Panglima Tentera Udara Jen Tan Sri Rodzali Daud; enggau Sapit Panglima Tentera Laut Laksamana Madya, Datuk Mohammed Noordin Ali.
   
Kelimpah ari nya, niang mega nerima basa ari 78 iku veteran soldadu ari raban1 enggau 8 Renjer, udah nya ari raban Rejimen Askar Melayu Diraja ke datai ngena bilun Charlie C-130 Hercules, ari Pangkalan Tentera Udara Diraja Malaysia Subang.
   
Pahlawan negara, Kanang Langkau diberi basa enggau penuh beradat ngena chara soldadu berengkah pukul 1 tengah hari ari Dewan Suarah dibai ngagai Gerija St Thomas Cathedral, lalu disembiang sebedau ke dikubur ba Pendam Pahlawan, Jalai Taman Budaya urung pukul 3.00 lemai (Hari Minggu).

Jalai raya digaga besai

PASAR MINGGU...Datuk Amar Abang Johari Tun Abang Openg (tiga kanan) benung nanyaka rega daun jabang rambau ngabas Pasar Minggu Satok ba ditu, kemari. Bela bisi dipeda Datuk Haji Fadillah Haji Yusof (empat kiba).

KUCHING : Projek ngemesaika jalai dikena meri pengelantang ngagai pengguna jalai raya ke pansut ari pasar Medan Niaga Satok nuju ngagai Satok deka digaga taun tu.

Menteri Dagang Temuai, Datuk Amar Abang Johari Tun Abang Openg madah, jalai raya ke besambung ari pasar Medan Niaga Satok nuju ngagai baruh jematan Satok ngelawa Jalai Satok deka digaga empat lurung begembar.

"Kami udah ngatur perambu projek tu lalu nadai tetemu sebarang penanggul, projek nya deka digaga taun tu," ku iya madah ngagai pemberita maya pejalai ngabas Pasar Minggu Satok begulai enggau Sapit  Menteri Sains, Teknologi enggau Inovasi (MOSTI) Datuk Haji Fadillah Haji Yusof, ba ditu pagi kemari (Hari Minggu).

Johari madah, enti jalai raya nya udah tembu jemah, bala pengguna enda ibuh nengah Jalai Gita agi.

"Projek tu dipelaba beungkus RM5 juta," ku iya lalu madahka nadai agi penanggul jalai sekut udah tu.

Kaban Kunsil Negeri (ADUN) Satok nya mega madahka, palan endur paking ba pasar Medan Niaga Satok deka digaga besai dudi hari.

"Medan Niaga Satok dibuka dua minggu ke udah, lalu pejalai trafik dipeda sekut laban mensia mayuh kiruh beambika barang kulu kili, gaya ke baka nya deka ngetu enda lama agi," ku iya.

Iya madah, sebidang tanah ke semak endur nya diperambu deka digaga nyadika palan paking kereban pengangkut.

Beduduk ari nya, Johari madah, pemeresi bilik mandi enggau agu baMedan Niaga Satok deka seruran diabas ngambika meri pengelantang ngagai bala pengguna.

"Pengguna deka dicaj RM0.20 sen genap kali ngena agu ba endur nya," ku iya.

Kelimpah ari nya, iya madah jalai nuju ngagai kedai-kedai makai /Benteng (Blok D) deka digaga manah agi.

Johari madah, dua iti lampu besai deka digaga bapasar Medan Niaga Satok awakka palan nya semampai tampak dipeda maya malam hari.

"Naka ke diatu, aku berasai puas ati meda pemujur ke udah digaga ba pasar Medan Niaga Satok lalu tebal agi orang ke datai enggau orang dagang chukup berasai gaga meda palan baru tu.

"Kebuah pia, laban sekeda ari sida datai ari jauh iya nya ari Bau, Serian enggau ari Limbang," ku iya.

Medan Niaga Satok beungkus RM46.6 juta lalu ngembuan 2,241 palan endur bedaja, kira lima hektar pemesai lalu dibagi ngagai Zon Basah, Zon Kering, Benteng, Pasar Minggu enggau Pasar Borong.

Sama bisi datai rambau pengawa tu iya nya Direktor Lembaga Makit Betanam Betupi (FAMA) Sarawak, Paza Dan.

Eva Atong champion Pekit Puteri Mukah 2013

DARA BAJIK...Raban pemenang Pekit Puteri Mukah Ambang 2013 iya nya Eva Atong (tengah), Mimi (kanan) enggau Connilia (kiba).

MUKAH : Eva Atong, 25, mujur nyadi champion Pekit Puteri Mukah Ambang 2013 beserimbai enggau Pengerami Nyambut Taun Baru 2013 ke diatur Gerempung Raban Nembiak Parlimen Mukah bepalan ba Dewan Suarah Mesra Mukah kena 1 hari bulan Januari tu tadi.

Indu dara penakan China Iban ke ngarika pelilih Mukah ngembuan peninggi 156 cm  ngena gaun bechura mansau mujur narit ati bala akim sereta ngalahka 12 pengari ke bukai.

Udah nya, Mimi Sofea Han,18, ari Dalat bulih lumur dua, Connilia Tu, 22 ari Sibu, bulih lumur tiga ditangkanka Christina Andrea Tiuh,27, ngarika Miri, enggau Hasiah Hanisah Hasmi, 18, ari Sarikei bela bulih perais pengaga ati.

Pemenang penuduk lumur satu nerima perais Jumpang pala, Duit, Selampai, Segupung Bungai, Gaun Malam Dipelanja Latip Collections, udah nya, pemenang lumur dua enggau tiga bela nerima Jumpang pala, duit, selampai enggau gupung bungai.

Pengari bukai ke semina bulih perais tepa (ke pengingat) ari orang ke melanja program iya nya Noremiza Mohd.. Shamsul, Jeslyn Carlisa Katlen, Nurazian Arbi, Maryanne Paul, Rasyidah Hassan, Elvynna Hailari, Felicia Ong Linn Yeoh,  enggau Nur Malawati Jamal.

Pemenang pekit, Eva Aton , madah, pemujur nya meri pengandal ngagai iya ngambika ransing agi nyereta dini-dni pekit pemajik ke bisi diatur ba endur bukai udah tu.

"Indai melika aku perais baju gaun mansau tu maya hari pengada aku kena  25 Disember tu tadi. Iya madah, kebuah iya meri perais laban aku bagas gawa, sayauka iya, pia mega indai madah aku seiku indu ke landik betanda nitihka main ke dikembuan pupu raban bansa di nengeri tu.

Perais ungkup bala pemenang disuaka Walikota Majlis Daerah Dalat enggau Mukah (MDDM), Ali Suhaili.

Sama bisi datai iya nya Seketeri Politik Kepala Menteri Sarawak, Kenil Jerai’ie, Walikota MDDM Mukah, Ali Suhaili,  Presiden Gerempung Raban Nembiak Parlimen Mukah, Fauziah Adeni, Chairman Pengatur Program, Royston Valentine sereta digulu lebih 300 iku temuai ke bukai.

Pekit Betanda Baka Santa mujur

KUCHING: Kira 18 tim nyengkaum nembiak ke beumur biak ari 15 taun nyereta Pekit Betanda Baka Santa ke diatur Absolute Cool Event (ACE) bepalan ba Kuching Sentral, apin lama ke udah.

Chairman Parti Rayat Bersatu Sarawak (SUPP) ke ngarika Menteri Kereja Raya, Sih Hua Tong madah, aktiviti ke baka nya endang manah diatur dikena meransang bala nembiak landik betanda sereta nempa kaul enggau pangan diri.

"Aku ngarapka mayuh bela nyukung pengawa ngatur aktiviti ke baka tu laban nya entara program ke ulih ngerapitka kaul enggau pangan diri," ku iya.

Berindik ari sukung ke chukup manah ari mensia mayuh, ngujungka komiti pengatur pengawa bisi nambahka penyampau perais iya nya ari lapan iti ngagai 12 iti nyengkaum lumur satu, ngagai lumur tiga sereta mayuh perais ke bukai baka Pemenang Pekayan Pemadu Manah, Pemadu Tebilang, Pemadu Landik Betanda, Pemadu Manah Begulai enggau tiga bengkah perais rindu ati.

Kelimpah ari nya bala pemenang mega diberi perais trofi enggau baucher RM2000 enggau RM1000.

Pekit nya disponser Grand Supermarket, H & L Supermarket, Hon Lee, Facelook enggau Nestle Bliss, Treasure Land, Sugarbun, Singapore Chicken Rice (SCR) , Kentucky Fried Chicken (KFC) sereta disukung Majlis Perbandaran Padawan.

Sama bisi datai rambau pekit tu Pengatur Pengawa, Lim Sin Ying, pengari Grand Supermarket, Liew Gah Lim, Menija Kompleks Kuching Sentral, Jerry Tai, Pengajar Seni Tari, Bernard Kho enggau pengari H&L supermarket, Betty Chia.

Taman Tema patut digaga kena ngumpan temuai Arab

KUCHING : Sarawak patut berundingka sebengkah pemansang ngaga palan awakka nyadi ikon tauka "Taman Tema' dikena ngumpan temuai kelebih agi ari menua Arab datai ngagai nengeri tu, ku Sapit Menteri Dagang Temuai, Datuk James Dawos Mamit.

Taja pan ba nengeri kitai tu udah ngembuan rumah muzium ke chukup manah sereta sekeda perengka lama orang Islam, tang Sarawak meseti bebendar agi ngemanahka palan nya dikena ngumpan temuai ari menua Arab.

Tebal agi orang Arab ke raun ngagai menua tu bebelika barang sampai RM7, 000 seiku enti dikira pupu rata.

"Tu entara penyampau belanja ke pemadu mayuh dikena seiku temuai ari menua luar lebuh ke bebelika barang ba menua Malaysia," ku iya.

Dawos madah munyi nya ngagai pemberita pengudah bejadi Pengerami Dagang Temuai Betanda Pemisi 1Malaysia 2012 ba ditu, kemari (Hari Minggu).

Nangkan ke nya. Dawos madah penyampau temuai menua luar majak mayuh datai ngagai menua tu iya nya bisi 3.2 juta iku dirikod bepun ari bulan Januari ngagai Oktober taun tu. Taja baka nya penyampau temuai ari menua Arab dipeda pemadu mimit enti dibanding enggau menua bukai.

Iya madah, menua Melaka, Johor, Pulau Pinang enggau Langkawi entara palan ke pemadu dikerinduka temuai ari menua Arab, ke ngujungka menua tu ngerikod penyampau temuai  400,000 iku taun siti ke udah.

Menua likun laban nitihka ajar pengarap - Nyalau

KENA MANAH - MANAH...Nyalau (empat kanan) nyuaka insentif ngagai seiku pelajar lalu dikemataka bala temuai ke bukai maya Pengerami Merarau Saint Benedick Chapel ba Skrang, Engkilili.

ENGKILILI : Sukut pengarap tauka agama beguna amat dikena nentuka pengelikun enggau pengelantang pengidup pupu raban bansa di nengeri tu.

Kebuah pia, laban nengah pengarap meh ti ngajar mayuh orang ti pechaya nemu bebasaka ke pangan diri, ku Kaban Parlimen Lubok Antu, William Nyalau Badak.

“Nadai siti pan jalai pengarap ti ngajar orang jai enggau orang bukai, ku iya rambau bejadi Pengarami Merarau Saint Benedick Chapel, Skrang ba Balai Raya Skim Skrang, Engkilili apin lama ke udah.

Iya madah, sukut pengarap sebagi ari pemun ti ngujungka kaul pupu raban bansa di nengeri nyadi terit.

Kelai ti nyengala dipeda mandangka sukut pengarap ulih ngerapitka kaul pupu raban bansa di negeri tu iya nya nengah pengerami besai ke diintu segulai enggau pangan diri niniting taun, ku Nyalau.

“Aku deka nesau semua kita ngambika terus nyukung perintah ke megai menua kitai jam ke diatu ngambika pengelantang pengidup rayat di menua terus tejamin.

“Kitai ke diau ba menua Malaysia patut berasai temegah ati laban naka ke diatu menua tu dipeda udah jauh mujur bendar pengudah ke dipegai lima iku Menteri Besai,” ku iya.

Nya alai, aku ngarapka rayat pupu raban bansa enggau jalai pengarap di nengeri tu ulih ngetanka penyerakup ngambika pengelantang enggau penyenang terus disepi sampai ke jemah ila.

Giat Mara nulung ngemujurka program munaska penyeranta

TABI PUJI… Datuk Aaron Ago Dagang nyuaka setipikit ngagai seiku pelatih maya pengerami GiatMara Zon Tengah ll ba Sibu kemari (Hari Lima). Sama bisi dipeda Irwan Abdullah (tengah).

SIBU : Kelimpah ari meri latih pengelandik, GIATMARA (GM) mega nulung perintah nempa orang landik ba pengawa dagang lalu ngemujurka mayuh program munaska penyeranta.

Supervisor GiatMara Zon Tengah ll ti mega nyadi Menija GiatMara Selangau, Irwan Abdullah madah, nengah program munaska penyeranta taun tu, GiatMara enggau ngemujurka projek PBR, program incubator, program latih 1Malaysia, program latih pengelandik enggau batang kereja, program latih 1Azam, enggau program kelab teknologi.

Nitihka projek PBR, GiatMara bisi enggau ngemujurka ngaga 16 buah GM ba Parlimen Kanowit, 19 buah GM sereta miki sebuah GM ba Parlimen Sibu enggau 22 buah GM dimiki bari ba Parlimen Selangau, ku iya rambau pengerami graduasi GiatMara Zon Tengah ll ba ditu kemari (Hari Lima).

Kaban Parlimen Kanowit, Datuk Aaron Ago Dagang diberi basa nyuaka setipikit ngagai 135 iku pelatih ke mujur nembuka latih sida ungkup  Sesi Julai 2012.

Bala pelatih tu datai ari GM Julau, GM Kanowit, GM Lanang, GM Sibu, GM Selangau enggau GM Tanjung Manis.

Iya madah, GM Kanowit deka muka siti agi kus iya nya Kus Teknologi Ngaga Tekang Ais enggau Aircon taun baru lalu palan nya deka mindah ari sebuah kedai ba Taman Muhibbah ngagai kedai tiga tingkat semak BSN Kanowit.

Berindik ari nya, ku iya ngarapka mensia mayuh ke diau ba Parlimen Kanowit ulih nemu pemisi GM ke ditumbuh ba endur nya dikena nempa nembiak bepenemu dalam bidang pengelandik.

“Chukup senang masuk GM. Pekara ke patut bisi dikembuan iya nya 3M, pandai nulis, pandai macha enggau ngembuan pengerindu ba bidang ke dipilih sereta beumur lebih 15 taun.

Ba GM Lanang mega deka dibuka siti agi kus iya nya Kus Teknologi Automotif ba taun baru. GM Lanang mega deka mindah ari sebuah ba Sibu Jaya ngagai palan ke lebih besai ba industri Sibu Jaya,” ku iya.

Naka ke diatu, GM ba serata menua nyedika 24 buah kus lalu timpuh belajar ba endur pengelama enam bulan ngagai setaun, ku iya lalu madahka GM benung berunding deka nambahka timpuh belajar dalam kus kursus Fashion & Dressmaking (bejait gari) enggau teknologi welding enggau fabrikasi besi ari enam bulan ngagai setaun.

Ngagai bala pelatih, iya madah setipikit ke diterima sida nya ukai nyadika tanda sida badu belajar tang nya dikena sida ngepunka diri napi pemar pengidup dudi hari.

Curtin Sarawak majak nyulut

MIRI : Tim Curtin Universiti, Sarawak Malaysia (Curtin Sarawak) chukup gaga ati pengudah mujur bulih lumur tiga dalam dua kategori beserimbai enggau Simposium Enjinir Kimia Negara (NACES) ke diatur kena 14 ngagai 16 Disember tu tadi ba Kedah.

Simposium tiga hari enggau aktiviti ninting taun ke diatur ba Universiti Kebangsaan Malaysia ba Bangi nyadi palan endur bala pelajar enjinir kimia ari institusi-institusi pelajar tinggi perintah enggau swasta mandangkan pengelandik enggau penemu diri bekaul enggau chara mutarka isu rampa menua.

Bala pesereta nyengkaum pelajar ari serata menua enggau menua-menua bukai ke semak baka Indonesia, Thailand enggau Singapura.

Simposium ninting taun nya berambaika jaku, ‘Climate Revolution : The Rise of the Earth' lalu digulu lebih 300 pesereta ari 17 institusi pelajar  tinggi.

Curtin Sarawak diarika pelajar taun ketiga kus Enjinir kimia iya nya Hwang Zi Zin, Muniandi Sarven Shan, Yong Choon Ping, Chin Wan Ching, Ling Jing Hong enggau Goh Wui Seng.

Nitihka penerang Pengelicha Kus Enjinir Kimia, Lau Shiew Wei, bala pelajar bepun nyereta pekit kena bulan bulan Ogos lalu sida udah  mayuh ngena jam enggau hari dikena nyediaka diri nyereta pekit nya.

Iya madah, Sekula Enjinir enggau Sains seruran nyukung tim sida nyengkaum meri jaku ajar ba penmu teknikal enggau ba nulung ba guna belanja.

Tuai Jabatan Enjinir Kimia, Profesor Madya Dr Chua Han Bing madah, pemujur tim sida nandaka siti ari penyulut ke pemadu beguna ngagai bala pelajar ari kus kimia Curtin Sarawak.

"Bulan Oktober tu tadi, lima iku ari pelajar taun keempat kus enjinir kimia udah bulih perais lumur dua ba Honeywell UniSIM Design Challenge 2012.

“Penyulut nya chukup besai reti nandaka penau enggau pengelebih bala pelajar ke belajar ba endur tu," ku iya.

Perkeso beguna sukung ari raban media

John Riba Marin

KUCHING : Gerempung Pengelikun Sosial (Perkeso) begunka sukung ari raban media enggau gerempung ukai perintah (NGO) ngambika bela nesau mensia mayuh bekaul enggau tanggaung pengawa sereta sukut pengelikun ke dijaga gerempung nya, ku Direktor Perkeso Sarawak John Riba Marin.
   
Iya madah, kelebih agi raban pekereja enggau pengaji patut nemu hak enggau pekara ke patut dipinta sida nitihka skim Perkeso dalam Skim
Pinchin Ilat enggau Skim Insurans Penusah Maya Kereja, nyema penusah nyadi enda disadang baka ngujungka lenyau nyawa, bebadi tauka sakit ketegal ari pengawa ke suah dikereja.
   
"Ambi ke banding ba opis Kuching aja, taun tu bisi 82 notis kompaun tauka ukum udah diberi ngagai pengaji sepanjai Ops Kesan laban sida ditemu enda ngerijista dagang enggau orang ke gawa enggau sida," ku iya rambau bejadi pengawa makai malam Perkeso Begulai enggau Media sereta NGO ba sebengkah hotel tebilang ba ditu malam Hari Empat tu tadi.
   
Iya madah, raban pengaji patut nemu tanggung pengawa sida nitihka Akta Keselamatan Sosial Pekerja iya nya meseti ngerijista pekereja sida taja pan ngembuan seiku pekereja lalu pekereja tau dirijista tu ngembuan gaji enda kurang ari RM3,000.
   
Ngenang pasal program beperesa pengerai enda bebayar ngagai orang ke ngembuan insurans Perkeso iya nya pekereja ke beumur 40 ke atas bepun bulan Januari 2013, iya madah, baucher deka diberi ngagai orang ke patut kelebih agi sida ke diau ba menua pesisir enggau entigis sungai di nengeri tu.

120 iku nerima bantu insuran Agro Kasih-i 1Azam

MERI BANTU... Julaihi Kadir diperatika Zakaria Mohamad enggau Sahari Gani nyuaka bantu insuran Agro Kasih-i 1Azam ngagai seiku penerima ba Saratok.

SARATOK : Kira 120 iku penerima nyengkaum orang bumai, orang berikan, orang bekebun enggau orang dagang ngati ke diri nerima bantu  insuran Agro Kasih-i 1Azam kemari (Hari Enam).

Pemesai Agro Bank Pampang Saratok, Zakaria Mohamad madah, nengah insuran nya bala sida ke nerima bantu ulih dijaga nitihka skim penyaga khas ari bank.

Iya madah, raban orang ke nerima tu nyadi renggat orang keterubah nerima insuran ke dipelanja Lembaga Penyerakup enggau Pengibun Tanah Persekutuan (FELCRA), Opis Betanam Betupi Malayisa, Lembaga Pemansang Ikan Malaysia (LKIM) enggau Lembaga Industri Kayu  Malaysia (MTIB).

"Semua sida ke nerima insuran keterubah tu endang dipilih perintah lalu sida dijaga bank nyema dituntung penusah ke enda disadang tauka pemati.

"Taja pan rega insuran ke diberi nya semina RM50 setaun tang mayuh meri penguntung ngagai orang ke nerima iya," ku iya.

Iya madah munyi nya ngagai pemberita pengudah nyuaka insuran ngagai bala penerima ramabu Pengerami Bejadi Regata Saratok 2012 bepalan ba Tebing Sungai Krian ba ditu kemari.

Iya mega madahka, penyampau bayar endang dipelanja penuh opis-opis perintah ke besangkut paut lalu dalam  program 1Azam di sini, Agro Bank udah dipilih.

Berebak enggau nya Pemesai Pelilih Menua Saratok, Julaihi Kadir diberi basa bejadi tanda nyuaka insuran ngagai lima iku peserta renggat keterubah meri insuran Agro Kasih-1 1Azam nya.

Perkeso nyedia ripot servis ngena SMS

KUCHING : Raban orang ke bisi ngerijista diri ba Gerempung Pengelikun Sosial (Perkeso), kelebih agi iya ke diau ba nengeri tu diatu ulih ngenataika ripot ngena chara jaku pesan pandak (SMS), ku Menija Pampang Opis Servis iya, Chan Hood Cheng.
  
Iya madah, kelimpah ari media sosial ke bukai, servis SMS dipeda ulih nulung ngemanahka servis ke bisi diatu.
  
Chara ngenataika ripot ngena SMS tu iya nya taip PERKESO ADUANNo KPPNRipot
anjung ngagai 15888.
  
"Servis tu chukup nyamai dikena, kelebih agi ngagai orang ke diau ba menua pesisir ba Sarawak," ku iya rambau program seminar Perkeso begulaui enggau media ke diatur ba sebengkah hotel tebilang ba ditu, apin lama ke udah.
  
Tuju seminar nya diatur dikena meri penemu ngagai raban pekereja enggau pengaji ngambi nitihka undang-undang ke udah diletak dalam Akta Keselamatan Sosial Pekerja.

RELA diperansang nulung nyukung BN

SRI AMAN : Kaban Tim Orang Ke Gawa Enda Begaji Malaysia tauka RELA diperansang bela nulung rayat nyukung pengari Barisan Nasional (BN) maya pengawa bepilih besai ke deka datai.

Kaban Parlimen Sri Aman, Masir Kujat madah munyi nya rambau bejadi Pengerami Tuai Begulai Enggau RELA ke diatur ba Rumah Raden, Lachau Ulu, kira 50 kilometer ari pasar Sri Aman kena Hari Lima tu tadi.

Iya madah, RELA patut nulung perintah ngulihka pemujur maya pengawa bepilih besai ke deka datai tu ngambika semua pemansang ke udah dilanggur ungkup rayat ulih ditampung.

“Tanggung pengawa RELA iya nya nulung polis nyaga pengelikun pengidup rayat. Taja baka nya, RELA mega ulih nulung perintah ngemansangka pengidup rayat ba genturung pendiau sida.

“Chara sida iya nya terus nyukung chalon BN ba pengawa bepilih besai ke deka datai. Nya alai, aku ngarapka RELA ulih bebendar nyukung perintah ngambika BN menang baru ba Parlimen Sri Aman ila,” ku iya.

Beserimbai enggau pengerami nya, Masir madahka penyampau tulung ungkup Projek Mit Menua Pesisir (MRP) ba taun 2013 iya nya RM5,000 ungkup RELA ba pelilih menua Sri Aman.

Sama bisi datai ba pengerami tu iya Sapit Direktor Operasyen RELA Negeri Sarawak, Kolonel (RELA) Walen anak Gujak, Pemesai RELA Pelilih Sri Aman, Bajuri Haji Adon enggau bala tuai raban bansa ke semak menua nya.

Pengerami nya digulu 350 iku kaban RELA enggau sida Rumah Raden serumah. Berebak enggau pengerami nya mega diatur pengawa nyuaka pangkat ungkup kaban RELA, nyuaka kad RELA enggau nyuaka gari RELA ngagai Platun RELA Keranggas.