Penyeranta tau nyadi peransang pengidup

ASAJAYA : Penyeranta ukai utai ke bepurih, tang kebendar iya nyadi ngagai seiku orang ngambika iya bisi peransang dikena ngubah pengidup diri ngagai tikas ke lebih manah.

Penulung Menteri Raban Nembiak enggau Pengawa Berumah, Haji Abdul Karim Rahman Hamzah madah, apai indai meseti bebendar meransang bala anak ngambika terus mujur dalam pelajar sekula.

"Ari pelajar sekula, kitai ulih ngubah nasib diri, nya alai apai indai meseti ngajar bala anak ngambika enda nyadika penyeranta penanggul endur sida ngemansangka diri," ku iya.

Iya madah, enti deka ngena pelajar ngubah pengidup diri, orang nya meseti bebendar belajar.

Iya madah munyi nya rambau Program Sejambak Kasih 2012 ke diatur Opis Pengintu Pendiau Mensia Mayuh (JKM) Samarahan ba Kampung Sambir, ba ditu, apin lama ke udah.

Ku iya, genap buah kampung endang bisi orang ke nadai nasip  lalu perintah enda kala ngemeluka pengidup sida ngambika sida ulih angkat mansang sebaka enggau orang bukai.

"Perintah mega udah numbuhka JKM dikena mantu raban sida ke baka nya, tang iya ke beguna amat sida empu meseti bebendar ngubah pengidup diri," ku iya.

Iya ti mega nyadi Kaban Kunsil Nengeri (ADUN) Asajaya madah, Asajaya ngembuan tanah ke ami alai betanam betupi sereta ngembuan asil tasik ke chukup mayuh.

"Kitai meseti landik ngena peluang ke bisi dipeda, kereja utai nya ngambika ulih ngenataika asil  lalu meri penguntung ke besai," ku iya.

Sama bisi datai maya nya, Menteri Pengintu Pendiau, Orang Indu enggau Pengelantang Mensia Mayuh, Datuk Hajah Fatimah Abdullah.

Pemujur tukuh mensia patut dikemerat - Dr. Hazland

LANDIK NYUMAI...Dr. Hazland Abang Hipni mandangka pengelandik iya nyumai bubur lambuk rambau Program Roadshow Bubur Pedas enggau Bubur Lambuk SABERKAS BERNAS ba Kampung Bako Seberang, Kuching.

BAKO : Kaban Kunsil Nengeri (ADUN) Demak Laut, Dr. Hazland Abang Hipni merambu deka bebendar agi ngemeratka pemansang pemanah perangai mensia kelebih agi ba kandang menua ke dijaga iya.

Taja pia, Hazland madah ba sukut perengka rama pan enda dileka ke iya berebak enggau juluk ati nya.

"Kenyau aku ke udah nyadi pengari rayat ba Demak Laut, dia aku meda pemansang pemanah perangai mensia patut bendar dipaju ba endur tu," ku iya.

Iya madah munyi nya rambau Program Roadshow Bubur Pedas enggau Bubur Lambuk SABERKAS BERNAS bepalan ba Padang Main Takraw, Kampung Bako Seberang ba ditu, apin lama ke udah.

Iya madah, pengawa nempa tukuh mensia ke bekualiti ukai pengawa ke muntang laban kandang menua Demak Laut enda baka endur bukai.

"Bisi sekeda kampung dipeda agi jauh tinggal pemansang ketegal agi tejanggal line komunikasyen," ku iya.

Ku iya, pekara nya kala dikenataika ngagai opis menteri enggau opis perintah ke betanggungjawap rambau aum kunsil nengeri ke udah lalu diatu benung nganti saut ari sida (perintah).

" Bisi sekeda projek nerima saut ke manah lalu bisi sekeda benung diperunding," ku iya lalu madahka bisi sekeda ari projek nya deka dirintaika dalam Langgur Pemansang Malaysia Lumpar -10.

Dulu ari nya, Kaban Pengatur Pengawa, Abang Abdul Aziz Datuk Abang Rauf madah, bisi 480 kilogram beras ditulung BERNAS dikena ngaga bubur pedas enggau bubur lambuk ba endur nya.

Udah nya, kira 50 kilogram bubur pedas ditulung sida ari Opis Betanam Betupi.

Media nulung ngelakuka UNIMAS

TERIMA KASIH…Prof Datuk Dr. Khairuddin Ab Hamid nyuaka pemeri ari UNIMAS ngagai seiku pengari media ti bisi datai rambau Program Iftar UNIMAS begulai enggau media, ba sebengkah hotel tebilang ba Kuching.

KUCHING : Ketegal media belambar enggau elektronik ba nengeri tu ngujungka Universiti Malaysia Sarawak (UNIMAS) majak dikelala mensia mayuh ba serata dunya.

Sapit Chansilor UNIMAS, Prof Datuk Dr. Khairuddin Ab Hamid madah, media endang ditemu meri besai guna lalu ukai semina ngagai UNIMAS aja tang mega ngagai universiti bukai ba menua Malaysia.

“Enti nadai media, pengawa ke dikereja kitai nadai ditemu orang bukai laban nengah perengka bacha enggau utai ke dipeda mensia mayuh ulih nemu pemansang sesebengkah universiti," ku iya.

“Enti 20 taun suba, UNIMAS agi nyadi universiti ke baru, enda tentu dikelala laban jauh ari bandar Kota Samarahan. Tang, pengudah bisi media, UNIMAS majak tampak rita di serata dunya.

Iya madah munyi nya rambau Program Iftar UNIMAS begulai enggau media ba sebengkah hotel tebilang ba ditu, apin lama ke udah. Ku iya, media mayuh amat mantu UNIMAS kelebih agi ba senentang pengawa ngajar enggau belajar  (P&P) ba universiti.

“Jaku ke dikena ba media mega tau dikena bala pelajar lalu tau dikena nyadi perengka dikena belajar laban jaku dalam media udah diseruri ngambika enda nguingka penemu rayat," ku iya lalu meransang bala pelajar macha surat kabar enggau meda berita ba televisyen.

Nengah medai mega, mensia mayuh ulih nemu penyulut program tauka aktiviti ke udah digaga UNIMAS. ya madah, media diatu chukup landik milih berita ke memanah iya ke tau nyadika lalau mensia mayuh.

“Media mujur ngerembaika jerita ke amat nyadi ba pengidup rayat ke maya hari," ku iya.

Nangkan ke nya, UNIMAS udah muka siti agi ruai siber ke baru lalu ulih dipeda nengah tiga jaku iya nya Melayu, Inggeris enggau Mandarin. Ruai Siber tu mandangka penerang pasal UNIMAS sereta mayuh galeri gambar tauka video program UNIMAS, nambahka nya disempulang enggau wayar sosial baka facebook, twitter enggau mayuh agi ke bukai.

Dr. Khairuddin mega madah, Dewan Tunku Abdul Rahman Putra deka dipenyadi kena 10 Oktober tu beserimbai enggau Pengerami konvokesyen ke-16 UNIMAS ke deka diatur kena  13 ngagai 14 Oktober tu.

Rayat dipinta nyukung projek pemansang

"Nama utai ke deka digaga kami (perintah) iya nya ngaduka pengidup rayat baka ngemanahka pendiau di kampung ngambika ulih nyungkak ekonomi rayat ke diau ba kampung."
Datuk Dr Haji Wan Junaidi Tuanku Jaafar
Sapit Speker Dewan Rayat

KUCHING : Sukung ari bala rayat beguna amat ngambika sesebengkah projek ke diberi perintah ulih digaga enggau mujur.

Sapit Speaker Dewan Rayat ti mega nyadi Kaban Parlimen Santubong, Datuk Dr Haji Wan Junaidi Tuanku Jaafar madah, rayat patut berunding enggau memanah ngambi ubah pemansang ulih mujur baka projek pembangunan Darul Hana ti deka digaga enda lama agi.

"Aku pechaya, bisi sekeda orang enda setuju laban sida enda arapka projek Darul Hana, tu nandaka sida enda nemu berunding panjai, " ku iya.

Nya alai, ku iya perintah seruran bejimat lebuh deka ngemujurka sesebengkah projek laban berundingka peneka rayat, penyampau belanja enggau nitihka peeka perintah empu.

"Pelin pengawa ke digaga perintah endang begunaka timpuh ti lama, entara kampung ke deka nyengala mansang berindik ari projek tu jemah iya nya kampung ba Boyan nyentuk ngagai Demak Baru," ku iya.

Iya madah, taja pan ubah tu enda ulih diseliah tang meh gaya pelin rumah nitihka chara tradisional Melayu nyangka deka diteju.

Iya madah munyi nya rambau Program Sungkei Perdana Zon Panglima Seman-Pulo ba Surau Darul Islah, Kampung Pulo Ulu, ba ditu lemai empai lama.

Sama bisi datai bini iya, Datin Fiona Abdullah enggau Kaban Kunsil Nengeri  (ADUN) Pantai Damai, Dr Haji Abdul Rahman Haji Junaidi enggau bini iya Hajah Siti Shorgayah Haji Ahmad Zaiden.

Ba program nya, Wan Junaidi bisi nyuaka bantu ngagai 150 orang iku raban orang ke timpang pendiau (OKU), anak patu balu, orang tuai enggau indai tunggal ari liam buah kampung ke semak nya.

Kelimpah ari nya,  Wan Junaidi ngemendarka agih belanja RM15, 000 ungkup Surau Darul Islah, Kampung Pulo Ulu.

Dulu ari nya, Dr Haji Abdul Rahman Haji Junaidi madahka, projek pemansang Darul Hana deka digaga lalu dipasukka dalam Langgur Malaysia Lumpar Ke-10 (RMK10) enggau RMK11 pengudah ke berunding enggau perintah nengeri enggau perintah besai.

"Nama utai ke deka digaga kami (perintah) iya nya ngaduka pengidup rayat baka ngemanahka pendiau di kampung ngambika ulih nyungkak ekonomi rayat ke diau ba kampung," ku iya.

Iya madah, Darul Hana sebengkah ari chara perintah nengeri ngubah pengidup rayat ke diau ba kampung ngambika pengidup sida dipeda berubah begembar enggau arus pemansang ke maya hari.

BADAS AMAT...Datuk Dr Haji Wan Junaidi Tuanku Jaafar nyuaka pemeri ngagai seiku orang rambau Program Sungkei Perdana Zon Panglima Seman-Pulo.  Sama bisi dipeda Datin Fiona Abdullah enggau Dr Haji Abdul Rahman Haji Junaidi.

Rayat anang tekuing ninga jaku penyakal

PENGGI NUAN...Howard Tambon nyuaka chek ngagai  Tuai Rumah Brayan lalu dikemataka Kaban Parlimen Sri Aman, Masir Kujat rambau pengerami makai malam ti berebak enggau pengerami bejadi JKKK Panggil.

SRI AMAN : Rayat ke diau ba menua pesisir anang sesekali alah umbuk raban penyakal, ku Kaban Parlimen Sri Aman, Masir Kujat.

Raban penyakal ku iya benung nguji beteleba enggau rayat laban deka ngulih sukung politik kelebih agi pengawa bepilih besai Ke-13 (PRU-13) nyau majak semak.

“Rayat ulih meda bida pemansang ba sesebengkah kandang menua ti diberi perintah Barisan Nasional (BN) enti dibanding enggau raban penyakal. Ngarapka rayat ulih berunding panjai sebedau ke nyunting undi maya pengawa bepilih besai ila.

"Nya alai, enti deka terus nerima projek pembangunan, rayat patut terus nyukung perintah BN lalu anang malik ngagai penyakal ti semina landik nguingka penemu rayat," ku iya.

Iya madah munyi nya rambau pengerami makai malam ti berebak enggau pengerami bejadi JKKK Rumah Brayan Tala, Panggil ke diatur ba sebengkah restaurant ba ditu, apin lama ke udah.

Nangkan ke nya, ku Masir, enti nyukung penyakal nadai mai sebarang penguntung ngagai kita (rayat) laban semina perintah BN aja ke ngembuan balanja ke chukup dikena ngemansangka pengidup rayat.

“Aku pechaya rayat ba nengeri tu udah chukup pintar beratika pemeri ari perintah BN enti dibanding enggau raban penyakal," ku iya.

Sama bisi datai ba pengerami tu, Howard Tambon iya nya pengari Penulung Menteri Betanam Betupi Datuk Mong Dagang, Staf JASA Kunsil  Nengeri Bukit Begunan, Jessy Bintoh, Kunsilor Selimin Kering enggau Tuai Rumah ba endur nya.

Ba pengerami nya, Masir bisi meri RM8,000 ngagai JKKK Rumah Brayan, udah nya, Howard nyuaka chek ari Mong,  RM15,000 mega ungkup JKKK Panggil.

Perintah besai nyukung projek betanam getah

TANDA GAGA...Datuk Patinggi Tan Sri Alfred Jabu tuchum meda ulah seiku orang ke nyium paung getah tanda gagaka pemeri nya beserimbai enggau Pengerami Tuai Begulai enggau Rayat ba Long Banga, Ulu Baram Miri. Sama bisi dipeda ari kiba, Dennis Ngau, Datuk Stephen Rundi Utom (tiga kiba) enggau Datu Ose Murang.

"Tu meh pemansang dibai perintah Barisan Nasional, enti penyakal datai, kita pinta meh utai bukai ti lebih ari tu, tang aku meda sida enda tegagaka utai ti lebih ari tu."
Datuk Patinggi Tan Sri Alfred Jabu anak Numpang
Menteri Betanam Betupi Moden enggau Pemansang Menua Pesisir


ULU BARAM : Perintah nengeri udah nerima sukung ari perintah besai ngemansangka tanah 25,000 ngagai 30,000 hektar pemesai dalam setahun dikena nanam getah awakka ulih meri asil ke mayuh dudi hari.

Sapit Kepala Menteri, Datuk Patinggi Tan Sri Alfred Jabu anak Numpang madah, enti juluk ati nya ulih nyadi nyata ninting taun, maya taun 2020 ila dipelabaka lebih 250,000 hektar asil getah ulih dikemansang lalu meri penguntung ke besai ngagai nengeri tu.

"Projek tu beguna amat lalu nyengala ulih ngubah pengidup rayat baka sida ba  Betong, Sri Aman enggau Sarikei.

"Tu mega nyadi sebagi ari pengawa perintah Barisan Nasional (BN) dikena ngubah pengidup rayat ba menua pesisir, enti iya mujur digaga ba Long Banga, rayat ba endur tu deka bulih penatai pemisi enda kurang ari RM2,500 sebulan," ku iya.

Iya ti mega nyadi Menteri Betanam Betupi Moden enggau Menteri Pemansang Menua Pesisir madah munyi nya beserimbai enggau Pengerami Tuai Begulai enggau Rayat ba Long Banga, Ulu Baram Miri.

Jabu madah, naka ke diatu Long Banga udah bulih agih 580 hektar tanah endur nanam getah lalu penyampau nya deka ditambah mayuh agi ba maya dudi ngagai 1,300 hektar.

"Paung (getah) tu meseti disayauka rayat ba ditu laban tu tau ngelantangka pengidupka kita ke diau ba menua pesisir.

"Tu (getah) meh dikarapka perintah ngagai kita, lalu baka kita ti ngarapka perintah, beserimbai enggau juluk ati menua deka meda rayat ngembuan penatai pemisi ke besai maya taun  2020," ku iya.

Jabu madah, pekara ke beguna iya nya pengawa tu meseti disukung semua orang, besaup ngemujurka Program Transformasyen Menua Pesisir  (RTP) tu laban iya tau munaska penyeranta ba menua pesisir.

Iya mega meri terima kasih ngagai bala staf perintah kelebih ngagai bala ari Opis Betanam Betupi laban ke udah nulung ngemujurka program nya, lalu iya (Jabu) ngarapka rayat bela nyukung perambu nya.

"Tu meh pemansang dibai perintah Barisan Nasional, enti penyakal datai, kita pinta meh utai bukai ti lebih ari tu, tang aku meda sida enda tegagaka utai ti lebih ari tu.

"Enti sida enda ulih meri (pemansang) lebih ari perintah, kita patut nagang sida datai ngelawa kita, awakka anak uchu kita dudi hari enda ngining orang," ku iya.

Dulu ari nya, Kaban Kunsil Nengeri (ADUN) Telang Usan, Dennis Ngau ngelalau rayat ba Ulu Baram enggau ba Telang Usan meseti berunding panjai senentang pengawa pemansang.

"Runding ke positif enggau pemagas gawa ngidup ke diri ulih ulih ngujingka kita kering besemekih enggau orang bukai napi ubah pengidup ti majak pemar.

"Tang ngagai sida ke semina pandai mut-mut sereta enggai nyukung perintah, pengidup sida deka terus tinggal ari orang bukai," ku iya.

Sama bisi datai maya nya, Penulung Menteri Rengka Rama Datuk Dr Stephen Rundi Utom, Senator Lihan Jok, Sapit Seketeri Perintah Nengeri
Datu Ose Murang enggau Tuai-tuai Raban Bansa ba Ulu Baram.

Kaban BN ngelaban chalon BN deka ditunggu

KUCHING : Barisan Nasional (BN) nengeri nadai kakang ati nunggu barang sapa kaban dalam parti enti ditemu ngelanggar atur dalam parti sereta orang ke mai penyarut dalam menua ke dipedai sida.

Seketeri Jeneral BN nenger,i Datuk Dr Stephen Rundi Utom madah atur nya nuju barang sapa kaban BN ti deka bediri ba pengawa bepilih besai ngelaban kaling sama dalam BN, laban sida (kaban BN) endang udah dipilih chairman BN.

Iya ti mega nyadi Penulung Menteri Rengka Rama (Elektrik enggau telekomunikasyen) enggau Penulung Menteri Pemansang Raban Nembiak (Bandar) madah munyi nya, lebuh ditanya pemberita senentang  penerang dipansutka ADUN Meluan Wong Judat (SPDP- BN) ti deka bediri ba Julau maya pengawa bepilih besai tu ngelaban Kaban Parlimen Julau Datuk Jospeh Salang Gandum (ari Parti PRS - BN) ba sebengkah randau begulai enggau media pengudah tembu nyuaka chek ngagai dua buah gerija ba Opis Sapit Kepala Menteri,  Datuk Patinggi Tan Sri Alfred Jabu ba  Wisma Bapa Malaysia, ditu hari Satu tu tadi.

Lebuh ditanya senentang tunggu ngagai Wong, iya madah naka ke diatu agi nadai sebarang tunggu taja pan Wong terang-terang madahka diri deka bediri ngelaban kaling sama dalam BN ba pengawa bepilih besai ke deka datai, tambah mega Wong bedau nyengala pansut ari  parti.

"Ari penemu aku empu, laya entara Wong enggau Salang endang ba sedua aja tang kitai ngemeratka pemujur BN ba pengawa bepelilih besai nengeri ti deka datai," ku iya.

Kena 21 Julai tu tadi, Wong madah ngagai pemberita iya deka berunding enggau Presiden Parti Demokratik Progresif Sarawak (SPDP) Tan Sri William Mawan Ikom enggau Sapit Presiden Dato Seri Tiong King Sing kena 30 Julai lalu iya deka pansut ari parti ba hari siti ngambika iya ulih bediri ngelaban Joseph Salang ba Julau.

Taja pia, Wong agi mangku pengawa dalam SPDP pengudah aum nya, lalu pia mega agi mengkang nyadi kaban SPDP enggau BN nyentuk ke sehari tu.

Atur baru digaga kena mutarka sebun

NGABAS ANGUS...Datuk Seri Douglas Uggah (tengah) lebuh ke ngabas babas ke angus ba taba endur berumah baru ba Tudan, Miri.

MIRI : Sebengkah Atur Operasyen Standard (SOP) ke manah agi digaga sehari tu (Hari Dua) dikena nyeliahka penusah sebun beduduk ari penusah babas angus ke udah nyadi.

Tuju iya dikena ngurangka penusah sebun majak nyadi ba menua tu.
   
Menteri Pengeraja Asal enggau Rampa Menua, Datuk Seri Douglas Uggah madah, sebengkah aum komiti sebun diatur Hari Dua tu ba Putrajaya begulai enggau opis-opis perintah nengeri ke besangkut paut ngambi bela berundingka chara ngaduka SOP lebuh penusah angus bisi nyadi.
   
"SOP tu digaga ngambika penusah angus ulih dipadam enggau lengkas, ku iya madah ngagai pemberita pengudah ngabas taba endur berumah barui ba Tudan ke udah angus.

Iya madah, aum nya diatur dikena nyediaka diri napi musin kemarau ti dipelabaka nuntung menua bepun ari bulan tu nyentuk ngagai bulan siti nyin ila.

Klinik 1Malaysia nulung mutarka penyekut Poliklinik Sarikei

KLINIK 1MALAYSIA ... Ding begambar begulai enggau bala iya lebuh ke ngabas Klinik 1 Malaysia ba Pasar Jakar, Sarikei.

SARIKEI : Lebih kurang 5000 iku rayat ke diau semak pasar Jakar deka ngasaika penyamai endur berubat laban sebuah Klinik 1Malaysia udah bepun dibuka ba pasar nya.

Klinik 1Malaysia ti keterubah digaga ba Sarikei nya deka meri penguntung ngagai mensia mayuh ke diau ba Bayong, Sare, Merudu, Sungai Paoh, sebangkoi enggau genturung pendiau bukai ke semak nya.

Kaban Parlimen Sarikei, Ding Koung Hiing madah, tuju Klinik 1 Malaysia digaga ba endur nya ngambika ulih nyediaka servis berubat ti manah agi ngagai rayat.

"Tuju penumbah klinik tu mega laban penatai mensia mayuh ke berubat ngagai Poliklinik Sarikei nyau majak nambah lalu pemisi klinik tu diadang ulih ngurangka penyampau mensia berubat ngagai Poliklinik.

"Penyampau ke baka nya ngujungka palan berubat nya nyau sekut. Nya alai kitai ngarapka pengudah bisi Klinik 1 Malaysia tu penanggul palan ke sekut endur berubat nya ulih nadai agi.

"Klinik tu deka berengkah dibuka ari 10.00 pagi ngagai 10.00 malam lalu diandang ulih meresa pengerai mensia mayuh," ku Ding.

Iya madah munyi nya lebuh dirandau pemberita pengudah ngabas Klinik 1 Malaysia ba pasar Jakar.

Sama enggau nguluka Ding ngabasa Klinik 1Malaysia iya nya bala staf ari Opis Pengerai Nengeri Sarawak, Poliklinik Sarikei enggau Hospital Sarikei.

"Klinik 1Malaysia ba pasar Jakar keterubah iya ditumbuh ba sitak Parlimen Sarikei, lalu bisi mega perambu dipinta ngagai opis meneteri ke besangkut paut ngasuh Klinik 1Malaysia digaga mayuh agi ba endur bukai ngambika bisi endur mensia mayuh berubat," ku Ding.

Klinik 1Malaysia Jakar ngembuan 4 iku staf iya nya pemesai opis pengerai, misi, enggau dua iku staf farmasi ke gawa nitihka shif.

Bela nyempulang pejalai Ding ngabas klinik iya nya Superviser Penulung Pemesai Opis Pengerai Nengeri Sarawak, Haji Abdulhan Mohd, Superviser Penulung Pemesai Perubat Nengeri sarawak Haji Haderi Tras, Pemesai Opis Pengerai Klinik  Sarikei, Dr. Edie Tiong, Kunsilor Teng Ung Woo sereta bala tuai raban bansa ke semak.

Pengelikun mensia mayuh agi ulih jaga

KUCHING : Polis ngarapka mensia mayuh enda nyebut nengeri Sarawak tu menua gangster taja pan mensia mayuh bela nemu udah tiga kali penusah betimbak nyadi ba  Sibu, Kuching enggau Miri sejak ba taun 2012.

Nitihka penerang Komisioner Polis, Dato Acryl Sani Abdullah Sani, pengelikun ba dalam nengeri tu agi ulih jaga lalu enda bangat kelalu sigau rita baka ke disebut sekeda orang.

"Enti amat Sibu enda likun, nama meh kebuah minggu siti ke udah aku agi ga bisi tepedaka orang mai bini anak enggau chukup rindang ati.

"Baka nya mega ba bandar bukai, enda bangat ngirauka ati baka ke disangka sekeda orang," ku iya madah ngagai Utusan Sarawak pengudah bejadi Pengerami Makai Segulai Pengudah Bepuasa begulai enggau bala pemesai sereta Kaban ba Indu Opis Polis Daerah Serian ba ditu, empai lama.

Sama bisi datai iya nya Sapit Komisioner Polis Negeri Dato Law Hong Soon, Kepala Opis Penasat Jenayah Narkotik Sarawak, Supritendan Moses Agat sereta Kepala Polis Daerah Serian, DSP Mohd Jamali Umi.

Acryl madah, kitai enda ulih nyeliahka jaku ke munyi nya sereta pengirau ati sida berindik ari kes betimbak ke udah nyadi.

"Taja pia, aku agi ngumbai nya semina jaku aja laban mensia mayuh endang jampat kekutap bejaku ke pekara ti enda manah,"ku iya.

Nitihka penerang penusah betimbak keterubah nyadi ba Sibu, pun bulan Januari pengudah kes bunuh ke nyadi ngagai empat iku diri sebilik iya nya Ling Tong Hock, Leong Nyuk Lan enggau dua iku anak iya, David Ling Chei Qi enggau Amy Ling Zi Jiun.

Maya nya, mansa ke benama Lau Leh Hing, 42, ditimbak benung iya baru deka tama sebuah kedai nyual kereban pengelikun. Enda lama udah nya, iya lalu mati maya ke dianjung berubat ngagai hospital.

Ba Green Height, Kuching seiku lelaki parai pengudah ditimbak ba pala kena 12 Julai tu tadi.

Lelaki nya beumur  31 taun, benung ngirup pagi begulai enggau tiga iku agi kaban iya ke bukaiu ba sebuah kedai kopi, lalu penusah nyadi urung pukul  11.05 pagi.

Maya ke ditasat, sigi agi seterum ditimbakka ngena senapang 'short gun' lalu dipelabaka dituju ngagai mansa kira 18 meter penyauh, tang leka seterum nya tekena ke orang bukai iya nya seiku lelaki ke beumur 69 taun.

Taja pia, mansa bukai ti kena timbak nya kira agi selamat laban semina kena timbak ba jari kiba enggau perut sepiak kiba aja.

Ba Miri, kes timbak nuntung seiku orang dagang ke endang iya dikelala mensia mayuh, penusah nya ngujungka pemarai iya laban ditimbak kelalu semak. Orang ke nimbak nadai dikelala lalu dipelabaka orang ke udah diupah. Penusah nyadi semak lampu trafik ba Jalai Bendahara, 30 Julai tu tadi.

Mansa ke beumur 48 taun nya benung deriba kediri-diri, iya mati ba penusah ke nyadi laban kena timbak dua kali ba rekung enggau ba pala sepiak kanan.

Penusah nyadi urung pukul 5.45 lemai benung mensia mayuh kisuk mulaika diri ari palan endur kereja.

Lebuh ke ditanya sekalika kes nya besangkut paut, Acryl madah kes nya agi dipansik lalu begunaka timpuh ke lama endur nemu kebuah iya.

"Kelalu tumu enti ngaga sebarang pemutus diatu, manah agi bala polis ngaga pansik enggau lebih silik," ku iya.

Juluk ati Sarawak

CHAMPION... Tan Sri Dato Sri Dr. James Jemut Masing nyuaka perais ngagai seiku pemenang Pekit Dota 2012 ke diatur ba Auditorium Majlis Bandar Raya Kuching Selatan (MBKS), Kuching. Sama bisi dipeda Datuk Bandar, James Chan Khay Syn.

"Perintah diatu ngiga rayat ke pemadu pintar, kreatif enggau bepenemu setipak enggau juluk ati sida (perintah) iya nya nempa tukuh mensia ke bekualiti dudi hari."
Tan Sri Dato Sri Dr. James Jemut Masing
Menteri  Pemansang Tanah

KUCHING : Sarawak ngembuan juluk ati meda rayat ba nengeri tu kaya enggau penemu ekonomi lalu ukai semina pandai macha, nulis enggau ngira aja.

Menteri  Pemansang Tanah, Tan Sri Dato Sri Dr. James Jemut Masing madah, perintah diatu enda baka suba laban nyau bebendar agi ngemansangka rayat ngembuan tikas pengelandik ke tinggi nyengkaum pengulih ngena perengka teknologi pemadah (IT).

"Kelimpah ari nya, kitai ngembuan juluk ati nempa rayat ngembuan runding kreatif ngambika ulih besemekih dalam ubah dunya ke maya hari ti majak pemar," ku iya.

Iya madah munyi nya rambau Pengerami Nyuaka Perais Pekit Dota 2012 ke diatur ba Auditorium Majlis Bandar Raya Kuching Selatan (MBKS) ba ditu, ,malam Hari Minggu tu tadi.

Masing madah, pengelandik 3R baka macha, nulis enggau ngira ke suah dipelajar maya jeman sekula enda chukup dikena besemekih enggau orang bukai ba dunya teknologi.

"Kebuah pia laban perintah diatu ngiga rayat ke pemadu pintar, kreatif enggau bepenemu setipak enggau juluk ati perintah iya nya nempa tukuh mensia ke bekualiti dudi hari," ku iya.

Kelimpah ari nya, Masing madah, Kepala Menteri  Pehin Sri Haji Abdul Taib Mahmud, pan bisi ngemeratka pemesai reti guna IT dalam sistem pelajar ba nengeri tu.

"Ngena juluk ati ke baka nya, perintah naka ulih nyediaka peluang endur bala nembiak ngayanka pengelandik sida," ku iya.

Iya mega madah, laban jeman ke maya hari tu bekaul amat enggau perengka teknologi, nya alai kitai patut ngemeratka pekara nya.

"Ambi ke banding perengka teknologi baka komputer ulih nulung rayat bekuntik enggau orang bukai kelebih agi ngena nengah internet, emel enggau ngena sistem pesan pandak," ku iya.

Dulu ari nya, bisi 80 tim ari Sabah, Limbang, Sibu enggau Miri bela enggau nyereta Pekit Dota  2012 ke diatur MBKS.

Besaup ngetanka pengelikun menua

BEKENU : Anang sesekali alah ayu laban penemu ke bisi dipansutka ari media sosial tauka jaku selebubu ngapa laban nya tau ngemuntanka pengelantang pengidup rayat enggau pemansang menua dudi hari.

Pengelikun sesebengkah menua ngujungka rayat senang lantang lalu idup nadai pengirau ati, ku Kaban Parlimen Sibuti Ahmad Lai Bujang ba sebengkah Program Pejalai Medeka Ramadan 2012 bepalan ba Kampung Masjid Tiris kemari (Hari Enam).

Iya madah, Malaysia udah 55 taun medeka lalu diatu nyadi menua lumur satu pemadu likun ba Asia Tenggara, enti dibanding enggau menua bukai ke semak menua tu.

"Penerang tu ukai sengapa, laban penerang tu berindik ari pansik ke bisi digaga sebengkah organisasyen entarabansa ke dikumbai Global Peace Index ke bepengkalan ba Sydney, Australia.

“Lebuh dipasukka dalam rintai menua likun 2007, menua kitai Malasyia ba penuduk ke-37, udah labuh ngagai tangga ke-38 maya taun 2008 lalu diatu niki ngagai tangga ke-19, penuduk tu patut ditikika manah agi," ku iya.

Ku iya, ngarapka mensia mayuh ulih beratika hari medeka ke taun tu nyadi pantar ke pemadu madah endur muka runding diri, meri terima kasih ngagai utai ke udah digaga bala tuai-tuai ke udah bebendar ngetanka menua dulu menya.

“Pengawa ke udah digaga sida chukup besai reti lalu patut dikenang kitai sampai ke anak uchu. Nadai seiku kitai ulih malas pemanah budi ke digaga sida tu rambau menua siga.

“Nama utai ke ulih digaga kitai iya nya semina ngenang lalu naka ulih ngetanka pengelikun, penyerakup ke bisi dikembuan kitai jam ke diatu. Pekara tu engkeman amat enggau sada 1Malaysia ke udah terit dipegai genap iku pupu raban bansa di Malaysia,” ku iya.

MEDEKA… Ahmad Lai Bujang nerima tambai Jalur Gemilang ari Pengajar Khashim tanda bejadi program lalu dikemataka Pemesai Opis Pemadah Miri, Wahed Mohamad.

Sama bisi datai maya program tu iya nya Pemesai Opis Pemadah Miri Wahed Mohamad, Chairman Pengatur Program Pengajar Kashim, Kunsilor Jamali Basri, Pengulu Liman enggau bala Tuai Raban Bansa ke semak endur nya.

Meseti likun enggau pengerai diri

BINTULU : Mensia mayuh dilalau ngambika likun enggau pengerai diri baka anang enda kelalu ngirup ai chelap sereta pemakai ke udah kelalu lama dibantai ba Bazar Ramadan dikena nyeliahka diri ari dirampit penyakit muang ai tauka kolera.

Iya ke patut mensia mayuh diperansang ngirup ai pansuk tauka ngirup ai dalam botol laban penyakit muang ai ulih berampit nengah ai enggau utai kamah, pesan nya dipansutka Kepala Direktor Pengerai Opis Pngerai Menua, Dato’ Sri  Dr Hasan Abdul Rahman.

Iya madah, penyakit muang ai nyamai berampit enti mensia mayuh enda ngemeratka pemeresi baka suah ngambi pemakai ti kelalu lama dibantai enggau kamah lalu iya madah kuman muang ai ulih idup dalam tubuh mensia lalu pansut ari tubuh lebuh mensia bira.

Ngenang pasal penyampau orang ke udah kena rampit penyakit muang ai, iya madah nyentuk ke diatu bisi 624 kes diripot enggau110 kes ditemu positif bepun ari penyakit nya ditemu nyadi ba Bintulutengah bulan Julai tu tadi.

Pengudah ke dipansik sida ari opis pengerai, kebuah penyakit nya tau nyadi bepun ari ai kamah maya regata ba Sungai Kemena. Sekeda pesereta nadai ngemeratka pemeresi baka bira ba sungai nya.

Nya alai, Dr Hasan ngelalau mensia mayuh kelebih agi sida ke bisi sakit pedis perut bira, mutah-mutah, enggau tabin enggai badu meseti ngajung diri berubat ngagai klinik tauka hospital.

Program pengerai patut diatur ba sekula

JAGA MANAH PENGERAI…Datuk Peter Nansian dirimbai Dato’  Sri Dr Hasan Abdul Rahman (tengah) enggau Dr Zulkifli nyuaka  ‘dentures’ ngagai seiku penerima beserimbai enggau Karnival Pengereai Hospital Bintulu.

BINTULU : Opis Menteri Pengerai Menua dipinta ngatur mayuh program bekaul enggau pengerai ba sekula dikena ngajar bala pelajar senentang penemu ke besangkut paut enggau pengerai batang tubuh.

Langgur program ke baka nya beguna amat ngambika raban nembiak tu lebih agi bepenemu ba senentang pengerai batang tubuh, kelimpah ngemeratka pemeresi diri, ku Penulung Menteri Pemansang Industri enggau Penulung Menteri Pemansang Komuniti, Datuk Peter Nansian Ngusie.

Kelimpah ari nya, iya mega merambu bala perintag ngaga polisi baru bekaul enggau pengerai kelebih agi ba senentang cahar nyaga pengerai enggau baka ni deka nagang diri kelalau gemuk, rayat menua Jipun entara rayat ba dunya ti patut dichunto.

Nya alai, ku iya opis menteri ke besangkut paut patut ngaga pansik baru lalu berundingka chara ke pemadu manah dikena rayat di menua tu ngemanahka chara dikena nyaga pengerai batang tubuh.

Iya madah munyi nya ngagai pemberita pengudah bejadi Karnival Pengerai Hospital Bintulu bepalan ba balai parkir kerita Hospital Bintulu, Nansian mega muji pengawa KKM laban ke udah ngatur program ke baka nya dikena meri penemu ngagai mensia mayuh.

Nengah program ke baka nya ku iya, mensia mayuh ulih ngelimat belanja laban bisi disediaka servis pechuma ngagais sida ke deka beperesa bepengerai.

Kelimpah ari nya, iya ngarapka program ke baka nya ulih suah agi digaga dikena ngempit kaul begulai enggau rayat, pia mega ulih ngajar mensia mayuh bekaul enggau pengerai tubuh.

Sama bisi datai rambau program tu iya nya Kepala Direktor Pengerai KKM, Dato’  Sri Dr Hasan Abdul Rahman, Direktor Pengerai Nengeri Sarawak, Dr Zulkifli Jantan, Chairman Kaban Lembaga Direktor Hospital Bintulu, Senator Datuk Pau Chiong Ung, ex Direktor Hospital Bintulu enggau Dr Azlee Ayub.

SIDS meransang nembiak pintar sekula

PELAJAR PINTAR... Alexander Nanta Linggi nyuaka setipikit penyulut 2011 ngagai Agatha Oliver Local beserimbai enggau Program Cheramah Motivasyen enggau Gelar Peransang ngagai bala anak kaban Serakup Indu Dayak Sarawak (SIDS) ke udah nyulut. Program nya diatur SIDS ba sebengkah hotel tebilang di Kuching. Bela bisi dipeda iya nya Dato Empiang Jabu (kiba).

KUCHING : Raban nembiak sekula meseti bebendar belajar ngambika ulih nyadi seiku orang ke ulih nyaup ngemansangka menua enggau bansa dudi hari.

Presiden Serakup Indu Dayak Sarawak (SIDS), Datuk Alexander Nanta Linggi madah, juluk ati ke nyengala ulih mantu seiku-seiku orang mujur dalam pengidup.

"Kita (nembiak sekula) patut negransing diri belajar laban ukai semua orang diadaka terus pintar," ku iya.

Iya madah munyi nya rambau Program Cheramah Motivasyen enggau Gelar Peransang ngagai bala anak kaban Serakup Indu Dayak Sarawak (SIDU) ke diatur ba sebengkah hotel tebilang ba ditu, kemari (Hari Minggu).

Alexander madah, pengelandik enggau peransang penemu beguna amat laban nya disemaka baka ilang dikena ngerintis pemujur.

"Diatu sistem pelajar ngena sistem liberlisasi lalu segaris bendar enggau peneka mensia mayuh.

"Nya alai, diatu kitai meda mayuh amat universiti enggau  kolej ba menua luar enggau ba Sarawak" ku iya.

Alexander ti mega nyadi Kaban Parlimen Kapit madah, tikas pelajar ukai semina nulung seiku orang mantu orang bukai, tang kebendar iya nulung sida ngulihka pengidup nyamai agi.

"Bala apai indai, meseti pintar ngiga peluang ngambika bala anak kita bulih pelajar ke ngena," ku iya.

Kelimpah ari nya Chairman SIDS, Dato Sri Empiang Jabu madah, genap iku pelajar meseti ngembuan juluk ati, laban juluk ati nya meh ke mai sida bebendar agi belajar nyadi orang ke menyana.

"Ambi ke banding, nyema sida bisi ati deka nyadi pengajar, doktor enggau utai bukai, sida deka nemu ni bagi mata pelajar ke patut dikemerat," ku iya.

Iya madah, nembiak ke maya hari untung amat laban berebak enggau pemansang teknologi lalu tu ngemuntangka sida ngulihka mayuh agi penemu.

Bisi 30 bala anak kaban SIDS nerima gelar enggau perais insentif rambau program nya.

Perintah nguji nulung semua rayat

TERIMA KASIH YB... Dato Sri Douglas Uggah Embas nyuaka duit tulung hari raya beserimbai enggau Pengerami Nyuaka Bantu Duit Raya ngagai Orang Tuai, Indai Tunggal enggau OKU bagi DUN Saribas ba Debak. Bela bisi dipeda Mohammad Razi Sitam.

DEBAK : Perintah naka ulih mantu semua rayat di negeri tu ngambika bela idup lantang senang sepanjai maya.

Menteri Pengeraja Asal enggau Rampa Menua, Dato Sri Douglas Uggah Embas madah, perintah Barisan Nasional (BN) naka ulih nguji genap iku rayat nyengkaum anak patu balu enggau indai tunggal sama ampit nerima bantu.

"Kami (perintah) semampai berunding ngiga dikena mantu semua orang. Barang sapa ke patut dibantu endang tetap diberi bantu lalu enggai meda sida dikemelu," ku iya.

Iya madah munyi nya rambau Pengerami Nyuaka Bantu Duit Raya ngagai Orang Tuai, Indai Tunggal enggau OKU bagi DUN Saribas sereta Pengerami Segulai Pengudah Bepuasa ba  Masjid Darul Solihin ba ditu, empai lama.

Iya ti mega nyadi Kaban Parlimen P.204 Betong madah, mayuh bengkah bantu udah diberi perintah dikena ngelempungka belanja rayat ba serata menua tu.

Nangkan ke nya, ku iya perintah enda kala bechiping ngagai ni-ni bansa laban semua rayat bela ampit nerima bantu ke bisi disediaka perintah.

"Pekara tu nyengala bendar enggau juluk ati perintah iya nya nitihka chuan 1Malaysia ‘Rakyat Didahulukan, Pencapaian Diutamakan'.

"Nya alai, mensia mayuh kelebih agi bala ketuai ke pemadu semak pengidup enggau rayat baka tuai kampung tauka tuai rumah meseti ngelala ni bagi rayat ke pemadu begunaka bantu lalu kenataika penanggul sida ngagai raban orang ke betanggungjawap," ku iya.

Iya madah, program bantu ke baka nya nyengkaum raban orang ke timpang pendiau, orang tuai, indai tunggal enggau bala anak patu balu, tuju iya ngambika sida bela ngasaika pengerindu ngintu pengerami hari raya ke enda lama agi.

Kira 121 orang tuai,  79 iku indai tunggal enggau 40 iku raban OKU nyengkaum sida ba Kampung Melayu Dit, Kampung Lalang, Kampung Bungey, Kampung Babu enggau Kampung Debak Laut bela nerima bantu nya.

Kelimpah ari nya, iya mega ngemendarka bantu ari Perintah Besai ungkup masjid enggau surau bejalaika aktiviti pengarap sida, RM90,000 ungkup Masjid Darul Solihin, RM80,000 ungkup masjid ba Debak Laut, RM40,000 ungkup masjid ba Kampung Dit sereta RM20,000 uungkup surau Kampung Lalang enggau Kampung Babu.

Bela dipadahka Uggah, iya nya bantu RM100 ribu dikena ngaduka dewan badminton ba Debak, RM210 ribu dikena ngaga arung jalai ba kampung ba Debak enggau RM200 ribu dikena ngaga tekat ampuh ba Debak.

Mensia mayuh ba endur nya meri terima kasih sereta nyadaka pengaga ati laban pemanah perintah ke udah meri sida bantu ngemayuh nya dikena ngemujurka program pengarap.

Sama bisi datai ba pengerami nya Kaban Kunsil Nengeri (ADUN) Saribas Mohammad Razi Sitam, Pemesai daerah Betong, Friday Belik, Bala ketuai opis perintah, bala tuai raban bansa enggau bala penerima bantu.

Projek kerita kabel deka digaga ke gunung Santubong

KUCHING : Menteri Dagang Temuai Sarawak Datuk Amar Haji Abang  Johari Tun Openg nyukung pelin projek kerita kabel ti deka digaga ari  Pasir Panjang ngagai Gunung Santubong jemah.
   
Iya madah projek nya agi dipansik lalu sebagi ari perambu Organisasyen Pemansang Ekonomi Sarawak (SEDC) nyungkka palan dagang temuai ba Damai enggau ba Santubong.
   
"Projek nya benung dipansik. Kepala Menteri deka madah dudi hari laban nya ulih narit temuai datai ke Sarawak," ku iya madah ngagai pemberita pengudah bejadi program segulai ennggau Pintu Gerbang Lebuh Carpenter ba ditu, empai lama.
   
Johari madah, opis menetri iya mega deka ngaga perambu ke baru dikena nngangkatka produk pelancongan ke bisi ba Main Bazar enggau ba Carpenter Street kelebih agi baka rumah lama digaga bala perintah British kelia chukup manah sereta nyelai.

Iya madah, jematan ungkup orang ke bejalai kaki enggau orang ke ngena ensikal mega deka digaga meraka Sungai Sarawak, rengka rama tu deka digagaka kedai endur bejualka barang ba tengah-tengah sungai lalu dipelabaka tembu taun siti nyin ila.

Beri peluang ngagai orang biak nyadi chalon BN- Khairy

KUALA LUMPUR : Chairman Raban Nembiak Barisan Nasional (BN) Khairy Jamaluddin merambu ngasuh bala presiden parti komponen BN meri peluang ngagai chalon ke biak ngarika parti sida ba pengawa bepilih besai ke-13 (PRU-13) ila.
Atur baka nya ngambika mai ubah ke baru dalam parti pia mega sida ke nembiak endang bisi pengulih ke diri empu, ku iya.

"Aku semina ulih ngenataika penemu ngagai Umno lalu nganjung rintai nama chalon nya ngagai presiden (Datuk Seri Najib Tun Razak), tang kaban komponen ke bukai aku ngarapka presiden sida ulih ngenataika rintai nya ngagai chairman BN iya nya Menteri Besai," ku kepala Raban Nembiak Umno nya.

Iya madah munyi nya rambau aum enggau media pengudah baum enggau Kaban Pemesai Operasayen Raban Nembiak MIC ba Opis Dagang Dunia Putra (PWTC) ba ditu (hari Empat).
Sama bisi dtai iya nya Chairman Raban Nembiak MIC T Mohan enggau sapit iya  V Mugil.

Ngenang pasal aum nya, Khairy madah tuju iya berundingka pasal napi PRU-13 kelebih agi chara ngulihka sukung ari raban bansa India.

Perambu perintah nengeri

NULUNG RAYAT ... Datuk Patinggi Tan Sri Alfred Jabu anak Numpang (empat kanan) nyuaka paung getah ngagai Tuai Kampung Lio Mato, Peter Idam Imang rambau Pengerami Tuai Begulai enggau Rayat lalu berebak enggau penemuai iya ngagai Lio Mato, genturung pendiau Kedaya Telang Usan, ba Ulu Baram.

ULU BARAM : Perintah nengeri merambu deka ngemansangka tanah kira 250,000 hektar pemesai ba serata nengeri tu dikena nyapai asil ke mayuh bepanggai ba getah berebak enggau tinjau pemansang taun 2020.

Sapit Kepala Menteri, Datuk Patinggi Tan Sri Alfred Jabu anak Numpang madah, projek tu berindik ari Program Transformasyen Menua Pesisir lalu enti nyema iya mujur jemah, iya dipelabaka ulih mantu lebih kurang 70,000 ruang bilik pansut ari tikas penyeranta.

"Enti sema projek tu mujur digaga 65 peratus, iya dipelabaka ulih mansutka asil RM30 bilion dalam setahun.

"Kitai ngarapka rayat ke diau ba menua pesisir kelebih agi sida di  Lio Mato, Long Peluan enggau Long Beruang nyukung projek tu laban atur ke baka tu dipeda manah amat dikena ngangkatka pengidup rayat ba menua pesisir sebaka enggau pengidup rayat ke diau ba bandar," ku iya.

Jabu ti mega nyadi Menteri Betanam Betupi Moden enggau Menteri Pemansang Menua Pesisir madah munyi nya rambau Pengerami Tuai Begulai enggau Rayat sereta berebak enggau penemuai iya ke  Lio Mato, genturung pendiau Kedaya Telang Usan, Ulu Baram, ba ditu, empai lama.

Nangkan ke nya, iya madah, perintah meransang bala pesereta enggau rayat ke udah bulih projek nya, ngeransing diri ngemansangka projek ba taba ti udah disedia lalu numbuh mayuh paung anak getah awakka ulih diberi ngagai orang bukai.

Kelimpah ari nya, Jabu ngajar rayat ngambika enda alah umbuk raban penyakal ti baka enggai meda perintah Barisan Nasional (BN) ngubah pengidup rayat ke seranta ba nengeri tu, penemu ke baka nya, ku iya semina mai pengerugi sereta ngemuntanka pemansang menua.

"Tu kayu BN tauka pulut malaya ti ulih ngubah pengidup rayat menua pesisir ba nengeri tu ari seiku orang ke enda besai gaji nyadi orang ke bulih penatai pemisi nyentuk ngagai RM2,500 sebulan.

"Pengawa ke baka tu meh ke suah dilaban penyakal. Nya alai, munsuh kitai diatu iya nya penyakal ti enggai meda pengidup rayat senang sereta sereta sida ke ngelaban pemansang ke dibai ngagai rayat ke diau ba menua pesisir," ku iya.

Tanah ba Lio Mato kira 332 hektar pemesai deka dikemansangka enggau chara bedandang besai iya nya betanamka paung getah. Kira 166 ruang bilik bela ampit diberi projek tu ba Lio Matu, udah nya ba Long Peluan bisi 20 hektar enggau 10 hektar ba Long Beruang.

Genap pintu ruang bilik deka bulih empat hektar tanah endur nanam paung getah lalu penguntung asil iya jemah diadang RM2,500 ngagai RM4,000 sebulan.

Dulu ari nya, bela bisi bejaku iya nya Sapit Menteri Dagang Entarabansa Datuk Jacob Dunggau Sagan ti bisi meri geran
RM30,000 dikena ngaga rumah dapur Dewan Serbaguna ba kampung Lio Mato, udah nya RM6,000 dikena ngaduka gerija enggau 
RM5,000 ungkup Projek Kaban Rampa Menua Sekula Primari (SK) Lio Mato.

Sama bisi datai iya nya Penulung Menteri Rengka Rama, Datuk Dr Stephen Rundi Utom, Kaban Kunsil Nengeri (ADUN) Telang Usan, Dennis
Ngau, Senator Lihan Jok, Sapit Seketeri Perintah Nengeri Datu Ose Murang enggau bala Tuai Raban Bansa ba Ulu Baram.

Orang ke dibantu meseti meri kerejasama

PEMERI... Emilda Piar benung nyuaka pemeri awak nyadika pengingat ngagai Robert Lawson Chuat Vincent Entering lalu dikemataka Mohammad Razi Sitam rambau Program Sejambak Kasih 2012 ba Betong.

BETONG : Polisi ke diatur perintah dikena munaska penyeranta deka tejanggal enti sema sida ke diberi bantu nadai meri kerejasama.

Kaban Kunsil Nengeri (ADUN) Saribas, Mohammad Razi Sitam madah, sida ke seranta patut nguji naka ulih ngangkatka pengidup diri empu berindik ari sekeda bantu ke udah diberi perintah.

Iya madah, raban sida tu mega meseti ngeransing diri sereta ngemagaska diri gawa ngiga belanja, anang semina ngarapka bantu ti diberi perintah aja.

"Perintah endang amat sinu sereta betatika pengidup rayat kelebih agi sida ke seranta.

"Taja pia, nyema kitai empu enggai gawa semina ngarapka bantu perintah, ila-ila pan pengidup kitai tetap baka nya.

"Nya alai, kitai deka orang ke seranta tu nemu berunding panjai, ngiga chara dikena mai bala anak pansut ari tikas penyeranta," ku iya.

Iya madah munyi nya rambau Program Sejambak Kasih 2012 lalu nyauka pemeri beserimbai enggau Hari Raya Aidilfitri ari Opis Pengintu Pendiau Mensia Mayuh Negeri Sarawak (JKMNS) ba ditu, empai lama.

Iya mega madah, atur ke baka nya beguna amat laban perintah ngembuan tanggung pengawa ke bukai kelebih agi bekaul enggau agenda pemansang nengeri tu.
Nitihka penerang iya, mayuh bengkah pengawa ke udah digaga perintah dikena nulung orang ke seranta, ambi ke banding bantu sekula, e-Kasih, latih pengelandik, bantu rumah enggau mayuh agi ke bukai.

Ukai nya aja, tanda perintah sinuka rayat iya nya meri Bantu Rayat 1Malaysia (BR1M) ngagai rayat ke enda ngelui ari RM3,000 penatai pemisi.

"Beduduk ari nya, kitai meda, perintah BN endang bebendar ngaduka pengidup rayat," ku iya.

Nangkan ke nya, iya ngelalau rayat ba endur nya ngambika terus nyukung perintah awakka pemansang ulih terus digaga.

Razi meri besai terima kasih ngagai JKMNS laban ke udha datai meri bantu ngagai rayat ke udah kena tuntung penusah, ukai semina sida ba DUN Saribas aja tang mega semua rayat di tetapi di Betong.

Sama bisi datai ba pengerami tu iya nya Penulung Menteri Pengintu Pendiau, Robert Lawson Chuat Vincent Entering ti mega nyadi Kaban ADUN Bukit Saban, Tuan D.O Betong Friday Belik, Penulung Direktor JKM Betong Emilda Piar Kunchui Uli, Kepala Polis Daerah Betong DSP Sarifuddin Mustaffa, bala tuai opis perintah, bala tuai raban bansa enggau bala orang ke bisi nerima pemeri.

JASA ngenang budi bala staf

KENA MEMANAH... Direktor JASA Nengeri Sarawak, Hassan Busu (kanan) nyuaka bantu ngagai ex Staf JASA DUN Engkilili Intal Rentap lalu dikemataka bala pemesai, supervisor enggau bala staf ke bukai.

SRI AMAN : Dua iku ex staf Opis Pekara Khas (JASA) bela nerima bantu RM3,000 seiku dikena JASA ngenang budi tauka pemanah pengawa ke udah digaga bala staf sida ba sebengkah awak ke diatur enda lama ba bilik aum JASA Sri Aman lemai, empai lama.


Orang keterubah diberi bantu iya nya Intal anak Rentap, 48, ari Jelukong Engkilili, bepun gawa taun 1991 nyadi Pembantu Luar Kanan JASA DUN (Kunsil Nengeri) Engkilili nyentuk ngagai taun 2004.

Intal diatu ngereja pengawa bumai pengudah ke pinchin lalu iya diau ba Taman Siang, Sri Aman, pengawa iya diganti Edwin Ancheh iya nya seiku Pembantu Luar Kanan JASA DUN Engkilili ke baru.

Udah nya, seiku agi penerima bantu, Thomas Engkamat, 65, ari Temudok Nasau, Sri Aman bepun gawa nyadi Pembantu Luar Kanan JASA DUN Batang Ai ari taun 1982 nyentuk ngagai taun 2005.

Iya diatu diau ba Temudok Nasau, Sri Aman lalu ngereja pengawa baka orang bukai, iya meri besai terima kasih ngagai JASA laban ke udah meri bantu RM3,000 nya.

Direktor JASA Nengeri Sarawak, Hassan Busu nyuaka bantu nya lalu dikemataka Kepala Penulung Direktor JASA Sarawak, Annuar Hanafi, Pemesai JASA Parlimen Sri Aman, Whelton Lumpoi enggau bala staf JASA ke bukai.

JASA diatu benung ngiga dua iku agi ex staf JASA iya nya Patrick Mangka enggau Ahmad Anis Shafie tauka kaban diri sebilik ngambika bantu ke sebaka ulih diberi.

Bela diatur pengudah tembu pengawa nyuaka bantu iya nya Aum Atur Pengawa JASA ti betuaika Hassan Busu.

300,000 rayat ba nengeri tu bedau rejista pengundi

MANAH AMAT... Kira  550 iku pelajar enggau 80 pengajar  SMK Agama Saratok bela ngitauka menira jalur gemilang ba mua menira besai beserimbai enggau Hari Medeka ti deka disambut 31 ogos tu.

KUCHING : Komisioner Bepilih Besai (SPR) melabaka 300,000 iku rayat ba nengeri ti ke udah chukup umur bedau ngerijista diri nyadi pengundi.

Sapit Chairman SPR, Datuk Wira Haji Ahmad Wan Omar madah, ari penyampau 12,912,045 iku pengundi ba serata menua ke udah ngerijista diri nyentuk ngagai  7 June, Sarawak diatu semina ngembuan 1,051,190 iku pengundi.

"Kitai enda nemu dini endur sida tu, sekali sida diau ba luar nengeri Sarawak tauka ba endur bukai," ku iya rambau Aum Tuai Parti Politik enggau Media ba ditu, empai lama.

Iya madah, ari penyampau nya kira 1,031,031 iku pengundi baka selama, 12,063 iku pengundi soldadu enggai bini sida, udah nya, 8,029 iku raban polis enggau bini sida, lalu 67 iku pengundi PTH menua luar.

"Nengeri Selangor ngerikod penyamoau pengundi pemadu mayuh iya bisi 1,977,332 iku, lalu menua ke pemadu mimit pengundi iya nya Wilayah Persekutuan Putrajaya, 14,305 iku," ku iya.

Kelimpah ari nya, iya madah, SPR nadai nyediaka langkau arau maya nganjung nama chalon beserimbai enggau pengawa Bepilih Besai Ke-13 (PRU13) tu ila.

"Ngelama tu kitai bisi ngaga langkau arau, tang diatu pengawa nya enda digaga agi laban kitai udah bisi atur ke baru iya nya bala penyukung chalon enda ibuh nyempulang chalon maya hari nganjung chalon," ku iya.

Iya madah, parti mega enda tau nyediaka langkau parti sereta bekimpin maya hari ngajung chalon, enti bisi parti ngaga pengawa baka nya, reti nya sida ngelanggar polisi dalam Akta Kesalahan Pilihan Raya lalu sida tau kena tinggang adat.

"Enti siti parti politik udah ngaga langkau baka nya, parti politik bukai tentu deka nunda, pekara ke baka nya tau ngasuh charut," ku iya.

Ahmad Wan mega madah, undi semina dikemendar dikira baru ba palan ngundi tauka ba palan undi pos, pia mega ba palan endur ngira bebala mayuh.

"Kitai enggai meda pekara ke kala nyadi ba Miri sebedai tu nyadi baru ba PRU ke-13 ila," ku iya lalu madah pengawa ngira undi baru mina ulih sekali aja.

Pengawa SPR betemu Begulai enggau Tuai Parti Politik enggau Media mega deka diatur ba Sabah kena 8 Ogos tu.

Pengguna meseti nemu hak diri

TABI BASA... Dr. Valentine Laiseh nyua tepa sebatang baur sumpit ngagai Jelaing Mersat lalu dikemataka  Zaidil Jawawi enggau  Royston Francis rambau Program Hari Pengguna Pintar bagi Betong ba Saratok.

SARATOK : Tuju Hari Pengguna Pintar diatur ngambika mensia mayuh bela nemu hak sida lalu ulih bekenaka penemu nya sepanjai maya.

Sapit Menteri Pengangkut, Jelaing Mersat madah, ari penemu ke baka nya, juluk ati menua deka meda rayat pintar ba mayuh bengkah sukut ulih nyadi nyata, pia mega nempa orang dagang ke mereti.

Iya madah, beduduk ari pekara nya rayat ulih idup lantang senang ba menua tu.

"Pelajar bekaul enggau pengguna kebendar iya baka 'idup bekunsi' laban iya nyengkaum penguntung sebela entara pengguna enggau orang dagang.

"Nya alai, pengguna meseti ngeleda diatu, bejimat seberang maya lalu meseti nemu hak diri," ku iya.

Iya madah munyi nya rambau Program Hari Pengguna Pintar bagi Betong ke diatur segulai entara Komiti Operasyen Pengguna Bagi Betong enggau Opis Menteri Dagang Dalam Menua, Koperasi enggau Pengguna (KPDNKK) ba Dewan Mensia Mayuh Sri Krian ba ditu, apin lama ke udah.

Iya ti mega nyadi Kaban Parlimen P.205 Saratok madah, pelajar bekaul enggau pengguna beguna amat awak nyadika peransang ngagai bala pengguna landik ngaga pemutus ninting hari.

Nangkan ke nya mega, rayat deka nemu lalu enda agi ngumbai perintah nikika rega barang peneka ati.
"Perintah nengah  KPDNKK udah berundingka bekau rega barang ke niki," ku iya.

Ba pemamsang bukai, iya ngarapka KPDNKK ulih numbuhka sebuah gerempung ti ulih nyaga hak pengguna ba Saratok.

Iya madah, nengah gerempung nya, pengguna deka pintar agi bebelanja kelebih agi nyau semak pengerami Hari Raya Aidilfitri.

"Ngarapka raban KPDNKK ulih suah datai sereta matau kedai ngambika rega barang enda ditiki peneka ati," ku iya.

Dulu ari nya, Tuai Pampang KPDNKK Sarikei, Zaidil Jawawi madah, tuju Hari Pengguna Pintar diatur dikena ngajar bala pengguna ba menua pesisir.

Iya mega madah, objektif pengawa nya diatur dikena mandangka tanggungjawap perintah enggau opis menetri senentang program pelajar enggau hak pengguna.

Ngenang pasal program nya, entara aktiviti ke bisi diatur iya nya seminar ngemujurka GST chukai enam peratus (6%) ari perintah, seminar pengguna pintar enggau pekit nyura ungkup Nembiak Tabika Perpaduan Saratok.

Sama bisi datai ba pengerami tu iya nya Sapit Residen Bagi Betong Dr. Valentine Laiseh, Pengari Tuan D.O  Saratok, Royston Francis enggau bala temuai dipebasa ke bukai.

Projek tangki ai semak Jalai Sare/Merudu tembu bulan tu

NGABAS PROJEK...Kaban Parlimen Sarikei, Ding Koung Hiing benung beratika keretas projek rambau iya ngabas taba projek tangki ai ke digaga ba simpang Jalai Sare, Merudu.

SARIKEI : Berekat ari pemanah enggau pemendar perintah ti deka ngemansangka pengidup rayat ba menua pesisir, kira 5000 iku rayat ba semak Jalai Sare/Merudu deka ngasaika penyamai enti sema projek tangki ai ke beungkus RM3,295,000 udah tembu kena bulan Ogos tu.

Kaban Parlimen Sarikei, Ding Koung Hiing berkata, Pembinaan tangki air tersebut merupakan usaha pihak kerajaan untuk menggantikan tangki air lama dan uzur yang tidak mampu untuk menampung keperluan pengguna.

“Diatu, pengawa nirika tangki ai nya tembu 95 peratus, berengkah digaga bepun bulan Julai taun siti ke udah, enti iya udah tembu ila penyampau ai ti dipansut lebih kurang  1000 meterpadu (m3) tauka 840 m3 dalam sehari.

"Entara menua ti kena bungkur projek ai iya nya Sare, Merudu, Meruton enggau Jakar.

"Kitai mega ngarapka ai tu chukup dikena rayat ke majak nambah ba endur tu," ku iya.

Iya madah munyi nya ngagai pemberita lebuh ngabas taba endur nirika tangki ai ke bepalan ba simpang Jalai Sare, hari tiga tu tadi.

Iya mega ngarapka perintah ulih nukar batang paip ke lama enggau paip baru.

"Rengka rama tu ila deka ngelantangka pengidup rayat ba endur nya sebaka enggau rayat ba endur bukai.

"Tu mandangka pemanah perintah Barisan Nasional (BN) lalu perintah seruran beratika pengidup rayat," ku Ding.

Sama bisi datai nyempulang Ding iya nya Enjinir Opis Kereja Raya (JKR), Ahmad Selihin, Kunsilor Teng Ung Woo, pengari kontraktor ke ngaga projek enggau sekeda pengari JKR.

9 NGO dipadu SPR ngemataka PRU13

KUCHING : Komisioner Bepilih Besai Malaysia (SPR) deka ngamaduka nyemetak semiilan gerempung ukai perintah (NGO) Sarawak awak ulih ngemataka Bepilih Besai Ke-13 (PRU-13) udah hari raya tu ila.

Sapit Chairman SPR, Datuk Wira Haji Wan Ahmad Wan Omar madah, SPR udah berunding enggau semilan NGO ke udah dipilih lalu sida bela udah setujuka tanggungjawap ti diberi SPR iya nya ngemataka PRU ke-13 ti deka datai.

"NGO tu dipilih laban sida nadai mua ngagai ni-ni parti politik," ku iya madah ngagai pemberita pengudah Aum Ungkup Tuai  Parti Politik enggau Media senentang PRU Ke-13 ba ditu, hari Tiga tu tadi.

Wan Ahmad madah, entara NGO ke udah dipilih iya nya Gerempung Bansa Melayu Sarawak (PKMS), Gerempung Melanau, Gerempung China Sarawak, Dewan Dagang China, Gerempung Orang Ulu Sarawak Malaysia (FORUM) enggau sekeda agi ke bukai.

"Genap iti NGO ke udah dipilih tu deka nganjung dua iku pengari enda begaji ngagai sitak parlimen ba nengeri tu, lalu pengudah tembu PRU sida dipinta nganjung ripot ngagai SPR," ku iya.

Taja pia, iya madah, pengari NGO nya enda tau meri penerang atuka meri komen ngagai media sepanjai proses PRU diatur.

"Penerang ke dipansutka sida (NGO) ba menua tau ngeruga penemu mensia mayuh, nya alai sida enda tau mua ngagai sapa-sapa tauka ni-ni  parti politik," ku iya lalu madah sida semina ulih berandau enggau media nganti udah tembu proses PRU.

Wan Ahmad mega madah, SPR nadai agi ngasuh Organisayen Ngemata Bepilih Besai Bibas enggau Adil Malaysia (MAFREL) laban organisasyen NGO nya ditemu mayu ngelanggar polisi ke udah digaga SPR.

"MAFREL mayur ngelanggar polisi sepanjai pengawa bepilih besao ke udah iya nya nadai ngajung ripot ngagai SPR sereta sida betemu enggau media nusika penerang," ku iya.

Nya alai, ku iya, sapa-sapa aja ulih ngemataka PRU ke-13, tang sida ukai orang ke dipilih SPR.

Semilan NGO ke udah dipilih nya, tiga ba Kuching, Sibu (dua) enggau Miri (empat).

"Naka ke diatu kitai lebih ngemeratka pengemata ari menua tu empu laban sida landik agi pasal polisi ke bisi ba menua kitai enti dibanding enggau pengemata ari menua luar," iya madah pengemata ari menua luar deka dipadahka dudi hari.

Penemu enggai kiruh ngujungka rayat lalu enda ngerijista nyadi pengundi

KUCHING : Ketegal penemu ke enggai kiruh ngujungka penyampau pengundi ke nadai ngerijista diri ba nengeri tu mayuh.

Chairman Komisioner Bepilih Besai Malaysia (SPR) Tan Sri Dato' Seri Haji Abdul Mohd Aziz madah, SPR udah ngaga atur ke pemadu manah iya nya nyebar penerang nengah parti politik enggau gerempung ukai perintah (NGO).

"Ba Sarawak tu, nyangka ketegal menua ke jauh ari opis tauka pedis datai ngujungka sida lalu enda ngerijsta diri, pia mega engka laban sida enggai kiruh sereta kiruh ke pengawa diri aja," ku iya.

Iya madah munyi nya ngagai pemberita pengudah tembu Aum SPR Begulai enggau Tuai Parti Politik enggau Media ba sebengkah hotel tebilang ba ditu, hari Tiga tu tadi.

Dulu ari nya, Sapit Chairman SPR Datuk Wira Haji Wan Ahmad bin Wan Omar, ba aum nya iya madah lebih 300,000 rayat Sarawak ke udah chukup umur lalu empai ngerijista diri.

Penyampau pengundi ke udah ngerijista diri ba Sarawak nitihka rikod kena 7 June 2012 iya nya 1,051,190. Penyampau tu mandangka nengeri tu ba penuduk lumur empat pemayubpengudni ke udah ngerijista diri nangkan nengeri Selangor (1,977,332), Johor (1,558,368) enggau Perak (1,383,980).

Aziz madah, asil ari pansik sebedau tu, SPR meda penyampau pengundi ke udah chukup umur nadai ngerijista diri tebal agi diau ba bandar besai bala ba Kuala Lumpur.

"Kitai deka bejalaika pansik baru, deka nemu nama kebuah rayat ba nengeri tu lalu enda ngerijista diri nyadi  pengundi," ku iya.

Nangkan ke nya, iya madah nadai kebuah rayat enda ngerijista diri nyadi pengundi sekalika sida diau ba Sarawak tauka ba menua bukai.

"Tu ukai utai ti nyadika penanggul, nyema sida enda diau ba Sarawak tang alamat sida ditu, sida tau pulai maya jam ngundi," ku iya.

Kelimpah ari nya, ku iya, orang ke gawa ba tasik ba serata menua terus ngundi nitihka chara lama enti sema pengawa bepilih diatur ila.

"Komiti Kabinet Nyaup Ngemujurka Proses Bepilih besai udah ditumbuh enam bulan ke udah, tiga bengkah raban ke udah diperambu tu iya nya doktor, misi enggau raban media.

"Asil ari aum, dua bengkah raban iya nya doktor enggau misi deka terus ngundi baka mensia mayuh lalu semina pekereja media aja dikemendar ngena undi pos," ku iya lalu madah nadai orang meri perambu ngasuh sida ke gawa ke tasik ngundi ngena chara pos.

Taja pia, SPR, ku iya deka nguji ngasuh sida ke gawa di tasik ngundi chara pos baka ke digaga ungkup raban polis enggau soldadu ke gawa jauh ba menua bukai.

Atur perintah BN munaska penyeranta

NULUNG RAYAT… Datuk Billy Abit Joo meri enjin padi enggau enjin getah ngagai Maren Uma Padan Bisau lalu dikemataka bala ke bukai ba sebengkah pengerami ke diatur ba Uma Bakah, Belaga.

Program 1Azam, skim betanam baru RISDA enggau meri paung ari MPOB

SIBU : Program 1 Azam, skim betanam baru RISDA eNULUNG RAYAT… Datuk Billy Abit Joo meri enjin padi enggau enjin getah ngagai Maren Uma Padan Bisau lalu dikemataka bala ke bukai ba sebengkah pengerami ke diatur ba Uma Bakah, Belaga.nggau meri paung ari MPOB deka dikemujurka perintah Barisan Nasional (BN) laban nya disadang ulih ngubah pengidup rayat pansut ari tikas seranta kelebih agi ungkup rayat ke diau ba Sungai Asap enggau Belaga.

Kaban Parlimen Ulu Rajang, Datuk Billy Abit Joo madah, ngambika program nya dipeda mujur sereta amat nulung rayat, rayat ba Uma Bakah enggau Belaga patut terus nyukung chalon BN Ulu Rajang ba pengawa bepilih besai (PRU13) ti deka datai.

Perintah BN sigi manah amat enggau rayat, ku iya rambau pengerami ke diatur ba Uma Bakah, Sungai Asap, Belaga, ba ditu apin lama ke udah. Uma Bakah sebengkah ari rumah panjai ke diuan Orang Ulu bansa Kenyah.

Ba pengerami nya, Billy Abit nyuaka enjin padi, enjin getah, bejadi palan parkir kerita enggau bekal ai beresi sereta nyuaka Bantu Rayat 1Malaysia (BR1M) ngagai orang ke bisi minta nengah 'Pemendar Peminta khas Pribumi Sarawak’.

Billy Abit mega bisi meri geran ngagai Komiti Pemansang enggau Pengelikun Kampung (JKKK) Uma Bakah enggau Uma Kulit ke udah didanji rambau pengerami Pelepek Uman ba Uma Kulit kena 2 Mei suba.

Sama bisi datai ba pengerami tu iya nya SAO Sungai Asap, Kuba Lusat, Pemancha Tony Kulleh, Tuai Raban Nembiak PRS Belaga, Kennedy Chuk Pai Ugon, Tuai Orang Indu PRS Belaga, Eda Ibon enggau Seketeri Raban Nembiak PRS Belaga enggau Hemang Yu Abit.

Bela dipeda ngulu pengerami tu iya nya Pemancha Umek Jeno, Pengulu Saging Bit, Pengulu Katan Lawai, Maren Uma tauka (Tuai Rumah) Padan Bisau (Uma Bakah), Maren Uma Ding Ajang (Uma Belor), Maren Uma Gun Imang (Uma Kulit), Maren Uma Tingang Jati (Uma Penan Lusong Laku) enggau Maren Uma Osman Jau (Uma Long Nanyan).

Billy Abit madah, diatu iya suah nemuai ke Baleh enggau Belaga laban deka nemu penanggul ke ditapi rayat ba endur nya.

Ngenang pasal tanah ke diberi ungkup sida di Sungai Asap, iya madah, Opis Tanah enggau Survei benung begigaka palan endur ti engkeman lalu meri jamin perintah deka meri atur ke pemadu manah endur mutarka penanggul nya.

Ba pengerami nya, Billy Abit meri geran RM15,000 ungkup JKKK Uma Bakah dikena ngaduka paip ai, RM3,000 ungkup raban pemerindang Uma Bakah meli perengka muzik, udah nya RM5,000 ungkup JKKK Uma Bakah ngatur sebarang aktiviti sepanjai taun 2012.

Kelimpah ari nya, iya mega meri geran Projek Mit Menua Pesisir (MRP) RM45,000 ngagai Maren Uma Gun Imang ti ngarika JKKK Uma Kulit dikena ngaduka gerija.

Maren Uma Bakah, Padan Bisau lebuh ke bejaku madah rayat Uma Bakah enggau rayat ba Sungai Asap agi deka ngasuh Billy Abit nyadi pengari rayat ba endur nya lalu ngarapka Billy Abit ulih dipilih baru nyadi chalon ngetanka kerusi Parlimen Ulu Rajang maya PRU13 tu ila.

Iya madah, rayat Uma Bakah bebasaka pengawa ke udah digaga perintah BN ngelama tu lalu sida ngaku BN udah mayuh nulung ngubah pengidup rayat ba Sungai Asap, pia mega iya madah Billy Abit seiku pengari rayat ti chukup mentas sereta ngemeratka peneka rayat ba endur nya.

PERKESO meri pampas ngagai mansa terempas

KUCHING : Organisayen Pengelikun Sosial (PERKESO) nyuaka Tulung Ngaduka Bangkai RM1,500 ngagai genap iku mansa ke udah nadai ketegal bilun terempas apin lama, pengawa nya diatur ba ditu.

Sapit Tuai Eksekutif (Operasyen) PERKESO Dato Dr Mohammed Azman Aziz Mohammed madah, tuju duit tulung nya diberi dikena nulung ruang bilik tauka sebarang orang ke bisi ke tuntung penusah maya bejalaika tanggung pengawa.

"Tu endang udah nyadi tanggungjawap PERKESO nulung orang ke bebadi nitihka Skim Penusah Maya Kereja, nadai nganti ruang bilik orang ke tusah minta tulung.

"Kami empu dtai nulung orang nya nitihka ripot ti bisi dipansut dalam media tauka ripot ari pengaji.

"Udah tu, PERKESO deka mayar gaji pinchin niting bulan ngagai kaban diri sebilik mansa.

"Kaban diri sebilik mansa ke udah nadai tu deka nerima 90 peratus ari gaji bulan mansa tauka bayar nya enda ngelui RM3,000 ngagai mansa ke begaji lebih RM3,000 sebulan.

"Bayar pinchin nya deka dibayar sepanjai maya nyentukka ngagai kaban diri sebilik udah nadai tauka sampai bala anak iya udah besai tuai sereta udah bulih kereja," ku iya rambau nyuka chek ngagai kaban diri sebilik mansa bilin terempas ba Nanga Sungai Lingga - Sungai Triso kena 20 Julai tu tadi.

Dr Mohammed Azman mega ngelalau semua opis Perkeso ba serata menua meseti bejalaika tanggung pengawa enggau sikar ngambika ulih nulung orang enggau lengkas.

Sama bisi datai ba pengawa nya, apai indai Niang Siti Khuzaimah, Annuar Musaddad Razali enggau Hashimah Fadzil, balu niang Henry Loh, Leo Chin Nee enggau balu niang Peter Ato, Agens Batang anak Rangun sereta Direktor Perkeso Sarawak, John Riba Marin.

Kes timbak : Mensia mayuh anang kelalu irau

KUCHING : Mensia mayuh di nengeri tu dilalau ngambika enda kelalu irau ati bekaul kes orang betimbak laban sida nya enda nimbak peneka ati.

Sida ke nimbak semina nimbak orang ke bisi bekaul enggau sida aja.

Komisioner Polis Kontinjen Sarawak Dato Acryl Sani Haji Abdullah Sani madah, kes betimbak ke bisi nyadi selalu iya semina nuju orang ke bisi kaul enggau bala penimbak.

"Asil ari pansik polis beratika orang ti kena timbak ukai mensia mayuh tang lebih ngagai orang ke digiga sida.

"Nya alai, mensia mayuh enda ibuh kelalu irauka pengelikun sida taja pan orang ke nimbak nya empai ulih tangkap polis," ku iya madah ngagai pemberita pengudah tembu Pengerami Hari Bujang Berani Tikas Nengeri ke diatur ba Kompleks Kunsil Nengeri Lama ba Petra Jaya, ditu kena hari Dua tu tadi.

lebuh diasuh bejaku pasala kes betimbak ba Miri empai lama, Dato Acryl madah, polis agi benung bejalaika pansik dikena ngelala saspek sereta kebuah orang nya dibunuh.

"kami ngamatka bisi nerima ripot nya lalu kami udah numbuhka siti tim ngambika ulih nasat pekara nya enggau silik.

"Kami (polis) benung ngumpul penerang nyengkaum mansa sereta bekaul enggau dagang ke dikereja iya.

"Naka ke diatu, pansik nemu mansa mati ditimbak enda bangat jauh ngena senapang bansa revolver lalu iya mati ba endur nya empu.

"Berindik ari pansik mega, ngelala mansa asal ari Kuching, udah nya mindah ke Miri lalu muka sebuah palan pemerindang ba endur nya," ku iya.

Ku iya mega, polis deka terus mansik pasal dagang ke dikereja mansa, penanggul-penanggul ke bisi nyadi dalam dagang iya dipelabaka tau nyadi kebuah kes bunuh nya.

"Dipadahka mega, mansa kala kena serang lalu dijamah ba sebengkah penusah ti diripotka nyadi taun 2009.

"Taja pia, kami bedau ulih ngelala sekalika mansang enggau saspek ngembuan rikod jenayah tauka nadai.

"Kami mega minta saup mensia mayuh nyema bisi sebarang penerang bekaul enggau kes tu tau datai ngelawa polis," ku iya.

Seiku pelajar kus misi bakal kena jamah

KUCHING : Ringgat ketegal sulu ati mai mutus bepanggan, seiku lelaki diripot  ukai semina mukut pangan indu iya nya ba dada aja tang mega terus nendang perut pangan iya nya kena tumu pagi Hari Minggu tu tadi.

Penusah nya nyadi ba sebuah kondominium Lorong Wan Alwi 3 lalu mansa (indu nya) nya pelajar ari kolej misi ke kembai kening ketegal kena bukut suah amat.

"Sehari sebedau penusah nya, aku mai kami duai badu agi bepangan  laban aku nadai tan agi meda ulah iya ke tekelalu jampat ringgat.

"Tang enda nyangka  lebuh udah ninga jaku aku  munyi nya, iya terus ringgat lalu datai kitu urung pukul 7.00 malam.

"Keterubah, iya mukut dua iku kaban (aku) ke sama nyewa enggau aku suba, lebuh ke dirara jari iya lanchat amat terus mukut mua aku.

"Ukai semina nya aja, iya mega terus nendang perut aku suah amat," ku iya madah may dirandau ba Unit Emerjensi Hospital Besai Sarawak, malam empai lama.

Pelajar nya datai ari Saratok  lalu iya madahka diri benasit amat laban bisi pelajar bukai nulung lalu udah saspek mujur ngelarika diri.

"Ketegal nya, aku terus dianjung berubat kitu," ku iya.

Pengari polis lebuh ke dirandau madahka,  diatu saspek nya ti  mega datai ari Seratok benung disidi polis ngambika ditasat.

Karim ringgat ketegal tuduh penyakal

KUCHING : Aum ngatur palan endur ngundi enggau proses ngundi nyau tachuh ketegal Kaban Kunsil Nengeri (ADUN) Asajaya, Haji Abdul Karim Rahman Hamzah ringgat ninga jaku seiku tuai parti penyakal bebula pemanah pengawa ke digaga Suruhajaya Pengawa Bepilih (SPR) senentang undi pos.

Aum nya diatur beserimbai enggau Pengawa Betemu SPR Malaysia Begulai enggau Tuai Parti Politik sereta enggau Media ba sebengkah hotel tebilang ba ditu, kemari (hari Tiga).

Karim lebuh ke dirandau Utusan Sarawak madah, jaku Tuai PKR Miri nya nyebut peti undi pos diganti lebuh ke ditaruh Soldadu Menua Malaysia (ATM), nadai pengawa enda manah baka nya.

"Jaku selebubu ngapa, (peti undi pos diganti) baka mandangka SPR, ATM enggau Barisan Nasional (BN) enda betul lebuh ngatur proses bepilih besai," ku iya, lalu nyebut jaku penyakal nya ngelabuhka intigriti SPR enggau  ATM.

Pengudah aum nya chapuh, Karim dipeda pansut ari hotel lalu disempulang Kaban Parlimen Batang Sadong, Hajah Nancy Shukry enggau Tuai Seketeri Politik Kepala Menteri, Abdullah Saidol.

Bisi bejaku rambau ngelaluka aum SPR begulai enggau bala ketuai parti politik enggau media, iya nya Chairman SPR Malaysia, Tan Sri Dato' Seri Haji Abdul Aziz Mohd Yusof.

Sama bisi datai, iya nya Sapit Chairman SPR Malaysia, Datuk Wira Haji Wan Ahmad Wan Omar.

Enda ibuh bebanding pemansang - Mong

TERIMA KASIH... Penulung Menteri Betanam Betupi Moden, Datuk Mong nyuaka setipikit ngagai Tuai Rumah Beti lalu dikemataka Kaban Parlimen Sri Aman, Masir Kujat (tiga kiba) enggau bala temuai bukai rambau Program Kaban Rampa Menua ke diatur ba Jaong, Pantu.

PANTU : Raban pekereja tauka raban pelajar universiti menua tu ke benung ba menua luar enda patut ngemandingka pemansang menua Malaysia enggau menua ribai.

Penulung Menteri Betanam Betupi Moden, Datuk Mong Dagang madah, jaku ke baka nya tau ngasuh sukung rayat ngagai perintah tendur.

"Lebuh sida pulai ke menua, raban orang ke baka tu bejai pemansang menua diri lalu ngemandingka iya enggau menua luar ke alai sida gawa tauka belajar.

"Sida meseti nemu, menua ribai ke disebut sida maju nya kebendar iya endang udah lama medeka iya nya beratus-ratus taun ke udah enti dibanding enggau menua tu iya nya baru Ingatlah 55 tahun...nya alai, enda patut sida bejaku munyi nya udah tu," ku iya.

Iya madah munyi nya lebuh bejadi Program Kaban Rampa Menua enggau Nyuaka Laptop 1Malaysia ke diatur ba Rumah Beti, Jaong, Pantu, kira  75 kilometer penyauh ari Sri Aman.

Kelimpah ari nya, Kaban Kunsil Nengeri (ADUN) Bukit Begunan nya mega bebula jaku tuduh ni-ni parti politik ti madahka sida ulih ngemansangka menua enggau jampat nyema sida disukung rayat.

"Semua nya bula. Nadai siti perintah ba dunya tu ke amat-amat manah lalu ulih ngaga mayuh bengkah projek pemansang sekejap aja.

"Pemansang patut digaga enggau atur iya empu tauka berenggat-renggat lalu Barisan Nasional (BN) entara chunto parti ke pamadu manah megai tanggung pengawa tu ari suba nyentuk ke diatu," ku iya.

Ba pengerami nya Mong nyuaka pemeri Projek Mit Menua Pesisir (MRP) RM5,000 ungkup Komiti Pemansang enggau Pengelikun Kampung (JKKK) Rumah Beti, Jaong.

Sama bisi datai iya nya Kaban Parlimen Sri Aman, Masir Kujat, Sapit Controller Kualiti Rampa Menua Sarawak, Jiram Sidu, Pemesai JASA Parlimen Sri Aman, Whelton Lumpoi, Penulung Direktor Komisioner Komunikasyen enggau Multimedia Sarawak, Dinal Samuel.

Bela bisi diatur berebak enggau pengerami tu iya nya nyuaka chek Flagship sekula ngagai SMK Simanggang, SMK Melugu enggau SK Pantu sereta setipikit tanda basa ngagai Tuai Rumah Beti.

Ngayau lambang pungka lelaki Iban

Ngayau sebengkah ari pengawa lama ti dikereja raban Dayak Iban kelia lalu pengawa nya diatu semina nyadika buah kenang pengudah menua tu neritka adat ngasug bala Iban bepumpungka pala munsuh.

Rangkah pala ti ulih kayau nya enda tau enda ditungkunka bedilang. 

Tebal agi orang ngumbai rangkah pala munsuh tu antu pala.

Jam ke diatu mega, sekeda rumah panjai agi bisi begitangka rangkah pala, chunto iya ba Sibuti, rangkah pala tu ulih dipeda ba Rumah Panjai Pakut enggau Bakas.

Nitihka penerang orang rumah panjai, enti rangkah pala tu enda ditungkunka bedilang, iya deka bemunyi kediri. Nya alai iya meseti diangkat belama. 

Sida ke agi ngibun rangkah pala tu dikumbai peturun orang kering dulu kelia.

Bisi mega sumber lisan madahka, lelaki Iban ke mujur mai antu pala pulai ke rumah udah ngayau sida deka diperebutka orang indu, kebuah pia, laban sida endang beberita kering sereta berani. 

Pekara nya mega, ulih nyamin pengelikun barang sapa indu ke ulih jadi enggau pungka lelaki.

Taja pia, ukai semina lelaki ke bujang aja ulih dikumbai bujang berani, tang mega lelaki ke udah bebini laban sida mega bisi enggau ngayau nyerang munsuh.

Beduduk ari pekara nya, kitai bela nemu kebuah pengawa ngayau digaga menya dikena ngenampak rita tauka ngulih tanda puji basa. Tuju ngayau iya nya dikena ngangkatka rita pengering seiku-seiku.

Barang sapa lelaki ke npemadu mayuh mai pala pengudah pulai ngayau deka bulih gelar Bujang Berani.

Kelia raban bansa Iban nadai nyebut pengawa ngayau nya enda manah. 

Tang nitihka sumber lisan, pengawa ngayau semampai besangkut paut enggau pengawa ke manag. 

Ambi ke banding ulih nyadi lambang pemerani, pengering sereta ngangkatka rita sesebengkah menua tauka rumah panjai.

ULIH BEDENGAH … Rangkah pala ke agi mekang digitang ba ruai Rumah Panjai Bakas asil ari pengawa ngayau kelia.