Beserakup mai pemujur

KUCHING : Tuai parti-parti komponen Barisan Nasional (BN) Sarawak mesti beserakup lebuh nentuka chalon ke tau mai pemujur ngagai parti rambau Pengawa Bepilih Besai Ke-13 (PRU13). Menteri Besai Datuk Patinggi Najib Tun Razak madahka, sebarang penemu ke betingka tauka enda sebaka pasal chalon patut diiar ke tisi laban utai ke pemadu beguna iya nya parti ulih menang. "Aku enggaika chalon ti dikerinduka seiku-seiku tuai aja tang meh mesti chalon ti dikerindu sereta bisi sukung ari mensia mayuh, laban chalon ke bansa tu ulih mai pemujur ngagai BN." ku iya bejaku rambau Pengerami Makai Malam begulai enggau Kepala Menteri Pehin Sri Haji Abdul Taib Mahmud ba Demak Jaya malam ensana. Kelimpah Taib ti mega Chairman BN Sarawak enggau Presiden Parti Pesaka Bumiputera Bersatu (PBB), pengerami tu mega bisi digulu Presiden Parti Rayat Bersatu Sarawak (SUPP) Datuk Seri Peter Chin, Presiden Parti Demokratik Progresif Sarawak (SPDP) Tan Sri William Mawan ak Ikom enggau Presiden Parti Rayat Sarawak (PRS) Tan Sri Dr James Masing. Najib madah, penemu ke enda sebaka endang enda ulih diseliah nyadi dalam sejarah parti tang meh pengerindu kitai ke pangan diri baka diri sebilik tau bendar diguna ngambika nama-nama aja penyarut ke bisi nyadi ulih diputarka enggau manah. "Utai ke pemadu beguna iya nya BN mesti menang baru maya PRU13 ngambika kitai (kerajaan) terus megai menua. Iya ke nyengala amat diasaika aku diatu, BN Sarawak tetap nerima sukung ke penuh ari rakyat," ku iya ke ngumbai pengerami makai malam nya baka makai enggau diri sebilik. Najib mega ngelalau tuai-tuai parti seruran bejalai ngabas pengundi ngambika rayat ngasaika pemanah perintah BN ukai semina maya semak pengawa bepilih aja. "Pemujur BN ke digiga kitai diatu ukai ungkup aku tang meh ungkup negeri, menua enggau rayat ti dikesayau ke kitai,' ku iya. Kelimpah ari nya, Taib andal bendar rayat di negeri tu enda mudah alah umbuk penyakal ke suah bejai perintah, utai ke bansa nya ku iya semina ngujungka BN menang maya PRU13. "Aku andal bendar rayat deka terus nyukung BN laban nadai siti parti penyakal ke ulih ngaga atur ke manah lebih ari perintah BN," ku iya.

NAMA BERITA ...Menteri Besai Datuk Seri Najib Tun Razak enggau Kepala Menteri Pehin Sri Haji Abdul Taib Mahmud benung nabi orang indu ke ngena pekayan tradisional Bidayuh lebuh ke ngelawa program Jelajah Janji Ditepati bepalan ba Wisma Bapa Malaysia.