Rega sebaka manah ungkup rayat di menua pesisir

KUALA LUMPUR : Program Rega Sebaka (PPH) dikemujurka Opis Menteri Dagang Dalam Negeri, Koperasi enggau Pengguna dipeda badas bendar sereta mai penguntung ngagai rayat kelebih agi sida ke diau ba menua pesisir di Sarawak enggau Sabah. Sapit Menteri Dagang Dalam Negeri, Koperasi enggau Pengguna Datuk Tan Lian Hoe madah, beduduk ari program tu, rayat ke diau ba menua pesisir di Sabah enggau Sarawak ulih ngasaika sereta barang subsidi ti sebeka enggau orang di Semenanjung. "Nyentuk ke diatu, perintah agi benung bejalaika program tu, awakka semua rega barang ke dijaga sebaka magang ba serata menua," ku iya madah lebuh ke nyaut tanya ari Senator Yunus Kurus lebuh sidang Dewan Negara, empai lama. Tan madah, chunto iya ngelama tu di Bario, Sarawak, rega petrol RON95 enggau diesel semak RM5 seliter, udah nya gas petroleum belaie (LPG) semak RM110 setong (14 kilogram) tang pengudah program tu dikemujur, orang di Bario semina meli petrol RON95 berega RM1.90 seliter enggau LPG ke berega RM26.60 setong. Iya madah, enti sebedau tu rega semua utai tu endang mar amat ketegal gaya menua ke bebukit ngujungka kos pejelai nyau tinggi tang meh pengudh program tu mujur mensia mayuh ulih bebelika barang tu enggau rega ke mudah. Iya mega madah, nengah program ke bansa tu, perintah udah maduka bala pengudar barang ulih mai barang baka berau, gula, tepung gandum, minyak makai, LPG, petrol enggau diesel ngagai menua pesisir. "Kelimpah ari barang subsidi tu, perintah mega udah neteapka barang bukai nitihka peminta mensia mayuh ba endur ke dianjung barang," ku iya. Tan madahka, opis menteri udah seruran meresa sereta ngasuh bala pengudar mesti mai 60 peratus barangan subdisi enggau 40 peratus barang Coop 1Malaysia ngagai menua pesisir di Sabah enggau Sarawak. "Produk Coop 1Malaysia udah dijual ba Sabah enggau Sarawak ngena rega ke sebaka enggau ba Semenanjung lalu tau mega dikumbai 1Malaysia 1Harga," ku iya. Semina barang subsidi aja ke sebaka rega ba serata menua Malaysia, tang meh rega barang servis agi mengkang baka selama, ku Tan.

Beserakup mai pemujur

KUCHING : Tuai parti-parti komponen Barisan Nasional (BN) Sarawak mesti beserakup lebuh nentuka chalon ke tau mai pemujur ngagai parti rambau Pengawa Bepilih Besai Ke-13 (PRU13). Menteri Besai Datuk Patinggi Najib Tun Razak madahka, sebarang penemu ke betingka tauka enda sebaka pasal chalon patut diiar ke tisi laban utai ke pemadu beguna iya nya parti ulih menang. "Aku enggaika chalon ti dikerinduka seiku-seiku tuai aja tang meh mesti chalon ti dikerindu sereta bisi sukung ari mensia mayuh, laban chalon ke bansa tu ulih mai pemujur ngagai BN." ku iya bejaku rambau Pengerami Makai Malam begulai enggau Kepala Menteri Pehin Sri Haji Abdul Taib Mahmud ba Demak Jaya malam ensana. Kelimpah Taib ti mega Chairman BN Sarawak enggau Presiden Parti Pesaka Bumiputera Bersatu (PBB), pengerami tu mega bisi digulu Presiden Parti Rayat Bersatu Sarawak (SUPP) Datuk Seri Peter Chin, Presiden Parti Demokratik Progresif Sarawak (SPDP) Tan Sri William Mawan ak Ikom enggau Presiden Parti Rayat Sarawak (PRS) Tan Sri Dr James Masing. Najib madah, penemu ke enda sebaka endang enda ulih diseliah nyadi dalam sejarah parti tang meh pengerindu kitai ke pangan diri baka diri sebilik tau bendar diguna ngambika nama-nama aja penyarut ke bisi nyadi ulih diputarka enggau manah. "Utai ke pemadu beguna iya nya BN mesti menang baru maya PRU13 ngambika kitai (kerajaan) terus megai menua. Iya ke nyengala amat diasaika aku diatu, BN Sarawak tetap nerima sukung ke penuh ari rakyat," ku iya ke ngumbai pengerami makai malam nya baka makai enggau diri sebilik. Najib mega ngelalau tuai-tuai parti seruran bejalai ngabas pengundi ngambika rayat ngasaika pemanah perintah BN ukai semina maya semak pengawa bepilih aja. "Pemujur BN ke digiga kitai diatu ukai ungkup aku tang meh ungkup negeri, menua enggau rayat ti dikesayau ke kitai,' ku iya. Kelimpah ari nya, Taib andal bendar rayat di negeri tu enda mudah alah umbuk penyakal ke suah bejai perintah, utai ke bansa nya ku iya semina ngujungka BN menang maya PRU13. "Aku andal bendar rayat deka terus nyukung BN laban nadai siti parti penyakal ke ulih ngaga atur ke manah lebih ari perintah BN," ku iya.

NAMA BERITA ...Menteri Besai Datuk Seri Najib Tun Razak enggau Kepala Menteri Pehin Sri Haji Abdul Taib Mahmud benung nabi orang indu ke ngena pekayan tradisional Bidayuh lebuh ke ngelawa program Jelajah Janji Ditepati bepalan ba Wisma Bapa Malaysia.

Perintah bebendar nempa modal mensia tikas dunya

SIBU: Perintah terus bebendar deka nentuka sistem pelajar menua nempa modal mensia tikas dunya ke disikap enggau pengelandik serete penemu dikena nangkup pengawa enggau ekonomi global ke nyau majak dinamik. Menteri Besai, Datuk Patinggi Najib Tun Razak madahka, ba Bajet 2012 perintah udah ngemendarka agih penyampau RM100 juta dikena ngemansangka semua sekula di menua tu nyengkaum Sekula Kebansa, Sekula Agama, Sekula China, Sekula Mission enggau Sekula Tamil. "Pengawa ke baka nya digaga ngambika semua rayat ari semua raban bansa enggau agama di menua tu sama bisi ngasaika pemansang pelajra setipak enggau Gagasan 1Malaysia," ku iya. Ku iya, perintah terus deka meri komitmen ba pengawa nyediaka agih ke mayuh agi dikena ngemansangka pelajar ke nyengkaum semua aspek pemansang infrastruktur sekula ngambika bidang pelakar ulih nyulut. Najib mansutka jaku munyi nya lebuh bejadi RumaH Baru SJK (C) Thai Kwang di Sibu kena Hari Lima ke udah. Ku Menteri Besai, Malaysia sebuah menua ke nyelai amat laban bisi sekula China, nadai menua bukai di Asia Tenggara sebaka enggau menua Malaysia. "Rayat kitai ulih milih lebuh deka nganjung anak sida seklika ngagai Sekula Kebangsaan, Sekula China tauka Sekula Mission. "Orang China amat temegah enggau chara pengidup, nya alai perintah ngemendarka Sekula China nyadika sebengkah ke pemadu beguna ba sistem pelajar di menua tu," ku iya. Najib meransang rayat di menua tu ngambika ngetanka penyerakup rayat ari semua raban bansa enggau agama. Pengawa ke baka tu beguna amat dikena ngetanka penyerakup enggau pengelantang sereta penyenang ke bisi diasaika ngelama tu. Penyerakup ke tegap ba mensia mayuh nya nyadi kunchi pemujur menua," ku iya. Ku Najib, perintah Barisan Nasional (BN) seruran ngamatka danji ngagai rayat di Sibu sereta neruska pengawa ngemujurka projek pemansang di Bandar Sibu. "Perintah BN deka terus ngemujurka Projek Nyekat Ampuh (PTB) Renggat II ke nelan belanja RM50 juta. Pengawa ngemujurka PTB Renggat II deka berengkah diatur bulan Mei tu," ku iya. Ba pengerami nya Najib madahka agih penyampau RM1.5 juta dikena ngemansangka SJK (C) Thai Kwang, Sibu. Pengawa ngaga SJK C Thai Kwang nya projek ngaga sekula nya baru ke nelan belanja RM12 juta. Sama bisi enggau ba pengerami nya mega Kepala Menteri Pehin Sri Haji Abdul Taib Mahmud, Sapit Kepala Menteri, Datuk Patinggi Tan Sri Alfred Jabu Anak Numpang, Menteri Pemaju Menua Pesisir enggau Wilayah, Dato Seri Shafie Apdal, Sapit Menteri Penerang, Komunikasyen enggau Main Asal, Dato' Joseph Salang Gandum, Menteri Pegeraja Asal enggau Rampa Menua, Datuk Sri Douglas Uggah Embas. Menteri Peritah Menua Pesisir enggau Pemaju Mensia Mayuh, Dato Sri Wong Soon Koh, Menteri Pengelantang Mensia Mayuh, Indu enggau Pemansang Ruang Bilik, Datuk Fatimah Abdullah, Chairman Majlis Perbandaran Sibu ti mega Chairman Pengatur Pengawa Sekula SJK Kwang, Datuk Tiong Thai King, Residen Bagi Menua Sibu, Simon Kok Kee enggau semua menteri kabinet perintah besai sereta kabinet perintah nengeri.

TERIMA KASIH ... Najib nerima pemeri ari Tiong pengudah bejadi Rumah Baru SJK (C) Tahi Kawang. Sama bisi dipeda mega Taib (dua kanan), Salang (kanan) enggau Soon Koh (kiba).

Penerebai bilun MASWINGS patut dipansik baru

KUCHING : Perintah deka mansik baru atur MASwings, pampang kompeni ke dipegai Malaysia Airlines, dikena berundingka bala pelabur perintah negeri Sabah enggau Sarawak. Menteri Besai Datuk Seri Najib Tun Razak madah, tuju pansik tu digaga ngambi pulai ke pemanah pengawa MASwings sereta penerebai bilun ba Sarawak enggau Sabah. "Beduduk ari peminta perintah negeri Sarawak enggau perintah negeri Sabah, atur MASwings deka dipansik baru ngambika sekeda orang sama bulih penguntung (saham) ari MASwings," ku iya. Iya madah munyi nya rambau bejadi Program Jelajah Janji Ditepati bepalan ba Wisma Bapa Malaysia di Petra Jaya kemari. MASwings udah berengkah beroperasyen kena 1 Oktober 2007 lalu bejalaika servis terebai ba dalam menua (Rural Air Service or RAS) ba negeri Sarawak enggau Sabah.

Pekit main daun tau nyadi produk dagang temuai - Gramong

KUCHING : Sapit Menteri Dagang Temuai Sarawak Datuk Gramong Juna nyukung sebengkah pekit main ke diatur Kelab Jematan Kuching iya nya bemain daun laban nya tau nyadi siti ari produk dagang temuai di negeri tu. Datuk Gramong Juna madah munyi nya lebuh ke bejaku ngarika Menteri Dagang Datuk Amar Abang Johari Tun Abang Openg bejadi Kongres Ke - 4 Pekit Main Daun Entarabansa ke bepalan ba Restauran Hornbill, Sarawak Kelab pagi, kemari. Iya madah diatu pekit main tu balat bendar dikerinduka beratus ribu iku mensia di sereta dunya. Kebuah main tu dikerindu, ku iya laban tau nguji pengelandik runding siku-siku orang sereta ulih dikena ngisi maya lepa. Pekit Main daun ke diatur Kelab Jematan Kuching tu berengkah ari pukul 10.00 pagi sehari tu 28 ngagai 30 April, 2012 bepalan ba Bilik Operasyen kelab Sarawak. Perais deka terus disua ngagai bala pemenang ba hari kepenudi pekit iya nya Hari Satu minggu baru. Bisi 64 iku orang ke enggau main daun tu nyengkaum pemain ari menua luar iya Australia, United Kingdom, Indonesia enggau Brunei. Udah nya, rayat di menua tu empu nyengkaum sida ari Kuala Lumpur enggau Pulau Pinang. Main tu dibagi ngagai dua bengkah iya nya beraban tauka kediri aja. Sebedau ke berengkah bemain bala pengari ari menua luar enggau menua tu diberi penerang ke silik pasal atur bemain ari Pengarah Pekit Encik Gerald Tan ari Singapura. Rambau pengawa bejadi kongress tu, bala temuai ke bisi datai diperindang bala nembiak ari Sekula Sekondari Batu Lintang enggau dua buah lagu bebala mayuh. Chairman kongres tu iya nya Puan Lesley Putih madahka, mensia mayuh ke deka nemu enggau silik pasal main tu ulih peda ba laman web www.mcba.com.my tauka betelefon nuju lumur telefon iya empu 016-8534562. Sama bisi datai iya nya Tuai Pengatur Pengawa Tan Sri dr Wong Soon kai, Pengari ari Opis Menteri Dagang Temuai Sarawak Rickson ak Jauk, Presiden Kelab Jematan Kuching Puan Jean Sebastian, bala pengajar enggau pemain.

600 Kampung di s'wak bulih Wifi taun 2013

PAKAN : Pun taun baru taun siti nyin ila, 600 kampung di Sarawak deka ngasaika rengka rama wayarles (Wifi) asil ari pengeransing perintah ngemansangka rayat ti diau ba menua pesisir. Sapit Menteri Pemadah Komuniksyen enggau Main Asal Datuk Joseph Salang madah, naka ke diatu bisi 210 endur rengka rama tu udah beroperasyen ba serata negeri tu. Iya madah munyi nya rambau pengawa nyuaka lebih 300 buah komputer pangku 1Malaysia ngagai nembiak enggau tuai raban bansa ba sitak Parlimen Julau bepalan ba Nyalak Ladong, Pakan. Nangkan ke nya mega iya madahka diatu kira 116 genturung endur benung dalam proses digaga. Ba Julau aja, ku iya 12 genturung endur udah ulih dikena lalu 13 buah agi deka ulih dikena enda lama agi. Salang madah, pekara ke bansa tu endang dikemeratka perintah laban deka meda rayat nemu ngena perengka teknologi komunikasyen pemadah. Tuju iya ngambika rayat enda tinggal ari arus pemansang jeman moden. Diatu ku iya, bisi 295 buah menara komunikasyen udah beroperasyen ba serata negeri, tiga buah ba Julau, enggau 10 buah agi benung digaga. Ngenang pasal komputer pangku 1Malaysia, iya madahka ba Sarawak aja bisi 150,000 buah udah disadung enggau chara berenggat-renggat. Bejaku ba pekara politik, Salang ngelalau rayat mesti bejimat ngambika enda alah umbuk orang ngena duit rambau pengawa bepilih besai ke deka datai. "Pemesai Suruhanjaya Penagang Makai Suap Menua deka nyaru diri maya kimpin dikena nyeliahka pekara tu nyadi," ku iya. Salang berasai enda liat ati sereta asa meda perangai seiku kaban politik menua tu ke nguji deka ngaruk nama iya ba mua mensia mayuh. Iya madah, kaban politik nya bekempit enggau tuai penyakal lalu deka bediri ngelaban iya rambau pengawa bepilih besai ke deka datai ila.

Perintah ngemendarka NCR nyadi tanah Rizab Gunasama Bumiputera

BAU : Perintah negeri tu seruran deka ngemendarka tanah hak adat bumiputera (NCR) sereta gazet nyadika tanah Rizab Gunasama Bumiputera nitihka atur Seksyen 6 Kanun Tanah Negeri. Kaban Kunsil Negeri (ADUN) Opar, Ranum Mina madahka, enggau pemendar nya, kandang NCR tulin diempu raban bansa ba endur nya enggau terang agi. "Tu udah meri penyenang ngagai raban bansa ba endur nya nemu antara tanah sida, baka antara tanah sida enggau tanah perintah ke patut disukat sereta diempu . "Nya alai, nadai bisi penemu ti nuduh perintah deka ngerampas tanah NCR ari rayat pribumi ba negeri tu. Sama mega ngagai rayat diau ba Kampung Stenggang tu, laban perintah sigi ngemendarka tanah NCR ngelama tu ," ku iya. Iya mansutka jaku munyi nya ba pengerami ngelancharka pengawa nyukat tanah nitihka atur inisiatif baru NCR ngagai genturung pendiau Kampung Stenggang Bau, apin lama ti udah. Bisi pengeluas 3,599 hektar kandang tanah NCR ba Kampung Stenggang deka dikemendarka disukat kelinggi ( perimeter) ba endur nya. Ranum madahka, pengudah pengawa nyukat kelilinggi diatur ulih nyeliahka penyarut antara menua ba endur nya ila. Pia mega , pengawa ti deka nyukat tanah NCR nya tau alai ngatur pengawa dagang betanan enggau betupi ti besai tauka dimansangka begulaia enggau agensi perintah, baka nyereta SALCRA enggau RISDA. "Perintah ukai simina ngemendarka tanah NCR, tang mega deka ngemansangka tanah NCR nya nitihka Konsep Pemansang Tanah NCR tauka ladang rayat ti deka nyendiaka pemanah ekonomi rayat," ku iya. Ranum ngelalau rayat Kampung Stenggang berandau terus enggau staf Opis Tanah enggau Survei (JTS) enti sema bisi napi penanggul bekaul enggau pengawa ti nyukat kelinggi tanah NCR ba kandang menua nya ila. Iya mega ngelalau rayat ba kampung nya bekerejasama enggau staf JTS ti gawa sepemanjai timpuh pengawa nyukat tanah NCR ti deka diempu sida ila. "Ari bantu sereta kerejasama ari orang ti bempu tanah, pengawa nyukat ulih diatur nitihka atur ti udah ditaga," ku iya. Iya madahka, inisiatif nya mega deka diatur dikena nyukat lot-lot tanah diri empu awakka aulih disediaka geran nitihka atur tanah Seksyen 18 Kanun Tanah Negeri. Sama bisi datai enggau ngulu pengerami ngelancharka pengawa nyukat tanah nya, Tuan DO Pelilih Bau, Simon Jiput Tiok, Pemesai Tanah enggau Survei Bagi menua Kuching, Mohd Izzidin Haji Basri, Temenggung Datu Stephen Jussem, Pemancha Daniel Teho, Penghulu Jinep Jiheng enggau Tuai Raban Bansa, Motion Sodiap.

NGELANCHARKA ... Ranum Mina ngelancharka pengerami dikena nanda pengawa ti deka nyukat tanah nitihka atur inisiatif baru NCR ba genturung pendiau Kampung Stenggang, Bau.

Mawan nyerakupka urang baru enggau lama nyadi kaban MT SPDP

KUCHING : Parti Demokratik Progresif Sarawak (SPDP) ensanus (Hari Enam) udah milih 14 iku kaban Majlis Pemadu Besai (MT) parti iya ke baru, beduduk ari nya Nelson Balang Rining agi mengkang nyadi Seketeri Besai dalam parti. Lebuh ke berandau enggau raban media pengudah tembu nyadi chairman Aum MT SPDP, Presiden iya, Tan Sri William Mawan Ikon madahka, beduduk ari penyerakup dua bengkah kaban baru enggau lama tu, iya andal bendar musin 2012-2015 ulih mai ubah pemansang ke chukup manah ngagai parti SPDP. Ku iya, penyerakup dalam MT SPDP ke sekali tu dipeda ulih mai pemanah ketegal peneleba enggau pemintar bala sida dalam pengawa nyadi tuai lalu meri penguntung ngagai parti enggau rayat. "Ba runding aku, bala kaban baru iya ke dipilih tu ulih mai ubah ke pemadu manah ngagai parti sema sida udah mangku pengawa nyadi MT. Taja pia, kitai agi bepanggai ba peneleba kaban lama laban tegal sukung ari bala sida meh atur pengawa dalam parti ulih mujur," ku iya. Maya Aum Besai Tiga Taun Sekali (TGA) SPDP ke diatur kena 18 haribulan March suba, Mawan udah ngenanka penuduk iya nyadi Presiden SPDP, udah nya Datuk Seri Tiong King Sing nyadi Sapit Presiden Parti ke baru ungkup musin 2012-2015. Sebedau tu, Tiong nyadi Tuai Akaun Pemesai parti ti nganti Datuk Peter Nyarok Entri ti dipadu nyadi Presiden Dipebasa seumur idup. Nganti iya (Tiong) nyadi Tuai Akaun Pemesai iya nya Senator Pau Chiong Ing. Sapit Menteri Dalam Negeri Jelaing Mersat enggau Sapit Menteri Dagang Entarabangsa enggau Industri Datuk Jacob Dungau Sagan dipilih nyadi Sapit Presiden Senior parti. Pengawa nyadi Sapit Presiden parti ke dipilih iya nya Kaban Kunsil Negeri (ADUN) Meluan Wong Judat, Dr Roland Dom Matu enggau Kapten Zainuddin Tan Sri Hamdan. Rambau Aum Besai nya mega, Kepala Indu SPDP Chiew Yen Chew, Kepala Raban Nembiak Robert Ayu enggau Kepala Puteri, Barbara William Mawan agi mekang ngenanka penuduk pengawa sida. Udah nya, nyau ngenang Aum MT SPDP ti diatur ensanus Paul Igai dipadu nyadi Sapit Seketeri Besai lalu Prof Mohd Shafiq Abdullah enggau Rayan narong dipadu nyadi Sapit Presiden parti. Kapten Tiong Kuong Ching dipadu nyadi Sapit Tuai Akaun Besai, udah nya Kepala Pemadah enggau Sapit Kepala Pemadah parti iya nya Jacky Chan Jet hui enggau Churchill Edward. Tong Chen dipadu nyadi Kepala Raban Putera SPDP, udah nya Josephine Tuah, Kunsilor Wan lah, Micheal Siten, Kunsilor Lawas, Gines Ruwah enggau Wendy Trang dipadu nyadi kaban diri MT. Iya ke bukai, Maslinda enggau Haji udin Ali dipadu nyadi pengari parti ba pengawa ti besangkut paut enggau komuniti.

Deriba teksi patut ngemeranka pengelikun penumpang

SIBU : Chairman Majlis Bandar Sibu (MPS), Datuk Tiong Thai King ngelalau semua urang ke deriba teksi ngemeranka pengelikun enggau pengelantang bala penumpang. Iya madah, tuju pekara tu dikemerat awakka nyamin pengelikun penumpang datai ba endur ti dituju sida. "Penyampau urang ti bebadi nyawa ba jalai alun entara 4,000 ngagai 5,000 setaun, begunaka tanggungjawap sereta kerejasama ari bala urang ke deriba teksi. Jaku tu dipansutka iya rambau bejadi Pengerami Makai Malam Begulai Enggau Bala Deriba Teksi Sarawak, empai lama. Tiong ti mega Kaban Parlimen Lanang madahka, bala deriba teksi patut betanggungjawap nulung ngangkatka dagang temuai di negeri tu. "Urang ke deriba teksi tu entara urang keterubah ti betemu enggau bala temuai menua luar nyema temuai bisi nemuai ngagai menua kitai. Nya alai, perangai sida (deriba teksi) mandangka semua ulah pendiau rayat di menua tu ngagai temuai menua luar," ku iya. Ku iya, perangai ti pejaku sereta servis ke manah bala deriba teksi tau bendar narit ati bala temuai luar deka nemuai baru ngagai menua tu dudi hari. "Aku ngelalau semua kita ke deriba teksi anang sesekali beambi ulih baka ngechas tambang mar ngagai temuai. Kebuah pia, laban pekara ke bansa tu tau bendar ngayanka runding ti enda manah bala deriba teksi ngagai temuai menua luar," ku iya. Pengerami tu bisi digulu Chariman Gerempung Deriba Teksi Sarawak, Jong Choon Fah, Chairman Gerempung Deriba Teksi Sibu, Robert Angkah enggau bala ke bukai.

SDNU nambahka tiga iku penulung sapit presiden

KUCHING: Sarawak Dayak National Union (SDNU) deka nambahka tiga kerusi penuduk penulung sapit presiden sereta enam kerusi penuduk raban esekutif. Presiden SDNU, Tan Sri William Mawan Ikom madahka, peminta ke deka nambahka dua penuduk nya udah dipejuraika sereta udah disetuju sebedau direjista ba Opis Pengerijista Gerempung (ROS). “Kitai patut berubah sereta nyingkang ke mua ngatur pengawa ke baru laban enti enda baka nya kita agi bejalaika pengawa ke sama ke tau ngasuh mensia mayuh enggai nyereta kita agi,” ku iya. Ku iya, semua kaban gerempung tau bepekit berebutka penuduk nya laban nadai undang-undang udah ditetapka nyekat sida ke deka baka nya. Nya alai iya enda setuju enggau penemu ke ngumbai gerempung nya semina dibuka ngagai raban bansa Iban aja. “Gerempung tu dibuka ngagai semua orang enda ngira raban bansa baka Orang Ulu tauka Bidayuh,” ku lalu madahka tebal agi kaban gerempung nya ari raban bansa Iban. "Mawan ti mega Menteri Pemansang Sosial madahka, pengerindu ati ulih berunding enggau pangan diri sereta bekerejasama patut ditanam ba genap iku kaban gerempung nya. Dulu agi ari nya Mawan nyuaka geran ngagai tiga buah gerempung iya nya Kuching Divison Journalist Association, Kota Samarahan Wholesaler and Retailer sereta Tabika KEMAS Sugai ba siti pengerami ke diatur ba opis iya empai lama ke udah.

Pesta Lawas : Tim menua luar nyereta pekit lumba perau

LAWAS : Pesta Lawas ke deka diatur bepalan ba Sungai Batang Lawas taun tu dipelabaka chukup rami laban bisi diseretai bala pelumba perau ari menua luar. Nitihka penerang Chairman Pesta Lawas enggau Regatta Lawas, Haji Mohd Supaih Haji Hamdan ti mega Tuan DO Lawas, bisi tujuh buah tim ari menua Brunei enggau dua buah tim ari negeri Sabah udah ngerijista diri nyereta Regatta Lawas taun tu. Kelimpah ari nya mega, pekit tu bisi disereta tim ari raban bansa China Lawas enggau sekeda tim ari luar Lawas baka Landas (Opis Tanah enggau Sukat), PUSAKA ari Kuching sereta tim ke kala bulih gelar Raja Sungai Lawas regatta taun siti nyin kemari iya nya tim ari Saratok ke dikumbai Citra Alti. Utai ke pemadu ngerinduka ati taun tu iya nya tim ari menua Brunei bisi nambahka penyampau perau ti dikena sida nyereta pekit. pekaran ke bansa tu manah amat laban ulih ngerami agi Regatta Lawas 2012. Kitai anang enda nemu tim ari negeri Sabah, sebengkah tim ke enda disadang kitai pengering. Tim tu dipelabaka ulih besemekih enggau tim ke kala nyadi champion tauka bulih gelar Raja Batang Baram iya nya Tedung Melanchar ari Marudi. Main bukai ke sama diatur dikena ngerami Pesta Lawas kena 25 ngagai 27 Mei tu iya nya eksibisyen pemansang, kedai bejual barang lebih kurang 300 buah. Komiti pengatur Pesta Lawas enggau Regatta udah dipenyadi lalu genap bengkah opis perintah udah dipadu nyaup ngemujurka pengerami tu. Nya alai, iya nesau mensia mayuh kelebih agi sida ke diau ba menua Lawas ulih sama sampal datai enggau ngerami Pesta Lawas 2012.

Meri pemansang ngagai menua

Menua begunaka rebak baru ti bepenemu sereta pintar SPAOH : Mission menua tu deka nyadi sebengkah menua ti nguan besai penatai pemisi deka tejanggal enti sema rebak baru nadai ngembuan pengelandik, pemintar enggau penemu ke tinggi. Nya alai, ba pengawa nempa rebak baru ti pbepenmu sereta pintar begunaka sukung ari bala apai indai enggau bala pengajar di sekula. Kaban Kunsil Negeri (ADUN) Saribas, Mohammad Razi Sitam madahka, apai indai enggau bala pengajar patut nemu pengulih bala anak ba tikas sekula. "Ba jeman moden tu, urang ke bepenemu sempama baka reta tengkira ti pemadu berega ngagai menua. Nembiak rebak baru entara reta ke pemadu beguna ngagai menua. Nya alai, sida patut diiri enggau penemu ke manah ngambika sida tau mai pemansang ngagai menua tu dudi hari," ku iya. Iya madah munyi nya lebuh bejaku ngarika Menteri Muda Pengintu Pendiau Mensia Mayuh, Robert Lawson Chuat lalu bejadi Program Gutung- Ruyung Perdana enggau Pengerami Ngelancharka Jogathon ke diatur Gerempung Apai Indai enggau Pengajar (PIBG) SMK Spaoh. Razi madah, kaul ke terit entara staf sekula enggau bala apai indai begunaka amat ngambika tau besaup nempa pemansang pelajar bala anak. "Laban aku pan kala nyadi pengajar, nya alai aku ngemeratka pengawa pelajar laban semian ari pelajar sekula pengidup kitai ulih maju jemah. Diatu, kitai sama nemu menua endang ngiga urang ke landik ngereja pengawa ngambika ulih napi pengawa ba SCORE sereta ulih ngemansangka menua menua Malaysia enggau Sarawak," ku iya. Udah nya, YDP PIBG SMK Spaoh, Othman Matzain madahka, tuju program tu diatur ngambika bala apai indai ulih meda sereta nemu nama utai ke diguna bala anak sida ba SMK Spaoh. "Nengah program tu, apai indai ulih nemu baka ni gaya sekula endur anak sida belajar sereta meda prestasi pelajar bala anak diri empu. Pekara tu ulih meri peransang ngagai bala apai indai awakka meransang anak bebendar agi belajar udah tu,"ku iya. Apai indai mega ulih neritka kaul begulai enggau sida sama sida sereta bekerejsama mantu sekula. Maya nya mega, Prinsipal SMK Spaoh, Hajemi Jahan madahka, tuju pengerami Ngelancharka Jogathon diatur awak nambahka belanja PIBG dikena ngemujurka aktiviti sekula ba maya bukai. Nyerumba pengerami tu, bisi diatur iya nya pengawa nyuaka Komputer Pangku 1Malaysia ngagai 450 iku pelajar ungkup Fasa kedua. Ba maya pengerami tu, Razi bisi nyuaka bantu RM5,000 dikena SMK Spaoh ngatur aktiviti. Sama bisi datai maya tu iya nya Residen Mukah, Saudi Narani, Pemesai Kunsil Sarawak Daerah Spaoh, Bujang Ladi, Tuai-tuai opis perintah, bala Tuai Raban Bansa enggau bala apai indai nembiak.

1MALAYSIA...Mohammad Razi Sitam begambar begulai enggau bala nembiak enggau apai indai nembiak ti bisi datai rambau Program Gutung-Ruyung Perdana enggau Pengerami Ngelancharka Jogathon ke diatur Gerempung Apai Indai enggau Pengajar di SMK Spaoh.

Papan tanda salah endur engkah?

PANTU : Urang ke diau ba Pantu minta Perintah Pelilih Menua (PBT) ngaduka baru papan tanda ti diengkah semak simpang jalai masuk nuju ngagai Pasar Pantu udah tu. Seiku rayat menua nya ke benama Brandon Uno lebuh ke dirandau madahka, papan tanda ‘Pantu’ dilindung papan tanda bukai ti diengkah berimbai enggau iya. Ku iya, papan tanda tu enda terang dipeda pengguna jalai raya enti sema sida enda ngetu dulu ba simpang jalai nya. “Nya alai, aku ngarapka PBT ulih ngaduka baru palan endur engkah papan tanda tu ngambika nyamai agi dipeda ngagai sapa-sapa urang ti deka ngelawa Pasar pantu udah tu," ku iya. Wilson Embah mega madahka, ngasuh PBT ngaduka papan tanda nya enggau lengkas sebedau pengerami Pesta Ikan Tapah Pantu berengkah ujung bulan tu. Ku iya, pekara tu patut diadu enggau lengkas ngambika bala temuai nyamai ngiga endur Pasar Pantu nyema sida deka datai meda Pesta Ikan Tapah ti berengkah 28 April 2012. Iya mega mesan, mensia mayuh ti deka ngiga Pasar Pantu, tau tama terus nyema sida bisi tepedaka tugu Ikan Tapah ba simpang jalai.

LINDUNG...Papan tanda nunjukka tunga Pasar Pantu dipeda lindung lalu patut diadu baru.

Jematan Batang Strap tau ditengah pengudah bulan Jun tu

SRI AMAN : Jematan Batang Strap ke enda jauh ari Pasar Pantu, dipelabaka ulih ditengah mensia mayuh enda sema iya udah beroperasyen belabuh ari bulan Jun taun tu. Kaban Kunsil Negeri (ADUN) Balai Ringin, Snowdan Donald Lawan madahka, Jematan Batang Strap, Pantu kira 182.4 meter pemanjai udah tembu kena bulan Februari tu tadi. Ungkus ngaga jematan tu semak RM20.4 juta, lalu bala Opis Kereja Raya (JKR) deka meresa pengelikun jematan tu dulu sebedau iya ulih ditengah mensia mayuh udah tu. “Naka ke diatu, kami agi nganti kontraktor nyuaka dokumen projek ngagai JKR ngambika pengelikun jematan tu ulih diperesa nitihka atur sukat ti udah ditetap," ku madah lebuh ke dirandau pengarang berita. Iya melabaka Jematan Batang Strap, Pantu udah berengkah ditengah mensia mayuh pengudah iya ti tembu bulan Februari tu tadi. “Tang enti bisi nama-nama nyadi anang nyalahka urang," ku iya. Nambahka nya iya madah, penyampau urang ti deka betengahka jematan tu semak 4,000 iku nyengkaum sida ke diau semak Sungai Batang Strap enti deka ngelawa Pasar Pantu. Jematan tu digaga suba, asil ari langgur penemu Snowdan enggau apai iya Donald Lawan lalu seduai maduka sebuah kompeni perunding swasta ngaga pansik awakka jematan Sungai Batang Strap di Pantu ulih digaga. Udah nya, pansik nya dianjung ngagai Kepala Menteri, Pehin Sri Haji Abdul Taib Mahmud sebedau pengawa pechah tanah dipenyadi ba taba projek nya kena 19 Januari 2010.

Pesta Matu kena 5 Mei tu

MATU : Kaban Kunsil Negeri (ADUN) Jemoreng Abu Seman Jahwie nesau mensia mayuh ke diau di menua Mukah datai sampal ngagai Matu kena 5 haribulan Mei 2012 awakka sama enggau ngerami Pesta Matu. Urang di Matu ngintu pengerami kena 5 Mei, 2012, beserimbai enggau Hari Daerah Matu ti dipelabaka deka dipenyadi Menteri Perambu Sumber enggau Rampa Menua II, Datuk Amar Awang Tengah Ali Hassan. Abu Seman ti mega nyadi Penyanding Penemu pengerami Hari Daerah Matu, madahka, entara program ti bisi diatur maya tu ila iya nya eksibisyen ari opis-opis perintah. kelimpah ari nya, komiti pengtur pengawa ti mega Tuan DO Matu , Habari Bakar udah ngerintaika mayuh program bukai. Entara program ti ulih narit mensia mayuh rambau pengrami tu ila iya nya lumba nembiak, lumba tradisional, panggau rayat, pekit karaoke, bemukun, kedia bejual barang, kraf enggau mayuh agi ke bukai. Iya nesau urang di Matu, Igan, Oya, Mukah awakka sampal datai ngulu pengerami tu. “Tuju pengerami tu diatur dikena ngenang Matu ti diangkatka nyadi sebengkah Daerah kena 5 Mac 1991, pia mega dikena ngerapitka kaul entara pupu raban bansa di Matu,’ ku iya. kenyau 21 taun ke udah, iya madah Matu diatu ukai agi nyadi pasar mit, tang Matu nyau majak maju. Tanda iya, Matu udah bisi jalai raya Sibu-Tanjung Manis, tu ngujungka pejalai ari Matu ngelawa Sibu nyau majak dampih. Abu Seman ngarapka Matu ulih dipasukka dalam langgur pemansang Koridor Sarawak Energy (SCORE) ngambi nambahka pemansang ba Matu dalm timpuh 10 taun ti deka datai. Tanjung Manisudah dipilih nyadi hub pemakai halal lalu enda jauh ari Matu, pekara tu ku iya ulih ngerampit Matu nyadi mansang jemah. Menteri Muda Perambu Sumber enggau Rampa Menua, Datuk Haji Mohd. Naroden Majais dipelabaka sama datai ngemataka pengerami bejadi Hari Daerah Matu ila.

1,400 Rela mantu polis ba serata negeri

Sama betulung munaska jenayah SIBU : Kira 1,400 iku Kaban Ikatan Relawan Rayat Malaysia (Rela) mantu bala polis bejalaika pengawa nyidi orang ke ngereja penyalah ba serata negeri tu. Pengarah RELA Negeri, Brig. Jen. Rini Tupong madahka, kelimpah mantu polis nyidi orang ke ngereja penyalah, 380 iku agi kaban RELA mantu ba pengawa nyaga pengelikun ba enam bengkah padang bilun ba serata negeri tu. Pengawa raban RELA ke dikereja raban rela tu nandaka perintah endang bisi bendar pengarap ngagai sida iya bejalaika pengawa. Iya madah munyi nya lebuh pengerami makai malam beserimbai enggau pengawa angkat sumpah nyadi kaban komiti Pusat Operasyen RELA Apollo Sibu, empai lama. Chairman Pusat Operasyen RELA Apollo Sibu, Wong Ling Tong nguluka bala kaban komiti ke bukai ngaga angkat sumpah nerima pengawa nya. Pengerami tu bisi digulu Pemesai RELA Daerah Sibu, Moses Sipang engggau Temenggong Vincent Lau Lee Ming. Rini madahka, RELA meh endur rayat mandang tanda pengasih ngagai menua," Kitai ke nyadi Rela kebendar iya mandangka pengasih kitai ngagai menua". Kelimpah ari nya, iya madah rayat ti enda sebaka bansa ulih bekaul manah nengah Rela laban sida seruran begulai sereta besaup enggau pangan diri ngereja pengawa. Bala RELA mesti nunjuka perangai ti manah ngagai mensia mayuh ngambika orang majak rindu meda bala Rela, kelimpah ari nya iya madah Rela diatu udah besedia nulung mensia mayuh sereta nyadi ejen perintah. Wong Ling Tong lebuh ke bajaku madahka, pengawa betulung enggau pangan diri beguna amat ngambika operasyen RELA Apollo mujur ba maya ti deka datai. Sama enggau ngangkat sumpah nerima pengawa tu iya nya Sapit Chairman iya, Ching Leong Hook, Seketeri– Ting Duang Chiang enggau Penulung-penulung Seketeri – Waili Haji Suhaili enggau Ling Eng Chuo, Tuai Akaun – Kiu Lien Yung, Pemesai Hal Ehwal – Yu Siong Sing, Kepala Penyambung – Rita Ling enggau 32 iku kaban komiti ke bukai.

SAIN JARI… Brig. Jen. Rini Tupong (duduk tengah) berimbai enggau Temenggong Vincent Lau Lee Ming (kanan) lalu dikemataka Wong Ling Tong ngaga sain jari tanda nerima pengawa nyadi Chairman Pusat Operasyen RELA Apollo maya pengerami makan malam di Sibu.

PBB Baleh tetap nyukung chalon BN ari PRS

KAPIT : Parti Pesaka Bumiputera Bersatu (PBB) pampang Baleh deka terus nyukung chalon Barisan Nasional ari Parti Rayat Sarawak (PRS) ke bediri rambau pengawa bepilih besai ke deka datai. Kepala iya, Kr. Tapah Ata madahka, ba pengawa politik bala kaban parti komponen BN patut begempung ati ngambika chalon BN menang sereta PBB pampang Baleh arap bendar chalon BN ke sekali ulih nyadi seiku pengari ti ulih ngawa ke rayat. Taja pia, orang ke megai pengawa nyadi kepala parti mesti ulih ninga langgur penemu ari bala penyukung nyengkaum ari bala kaban parti komponen BN, ku iya ti bejaku rambau pengerami ke diatur PBB Ranting Hulu Baleh ba rumah Encik Rantai di Nanga Spaku, Baleh. Ku iya, bala tuai parti patut mendingka langgur penemu bala penyukung kelebih agi ari bala kaban BN ke bukai ba senentang pekara ke besangkut paut enggau pengari sida. “Kebuah pia, ngambika chalon BN ulih menang besai ba pengawa bepilih besai ke deka datai," ku iya. Kaban Parlimen Kapit, Datuk Alexandeer Nanta Linggi, Kaban Parlimen Hulu Rajang, Datuk Billy Abit Joo, Sapit Walikota MKD, Jefferson Jamit Unyat, Kepala Pengajar SK Sungai Amang, John Lang Likong enggau Supervisor Senior Kemas, Ambrose Abong Bugek entara temuai ke sama bisi datai.

KE PENGINGAT… Encik Rantai nyuaka tepa ngagai Tapah Ata (kanan) ba sebengkah pengerami ke diatur PBB Ranting Hulu Baleh ba Nanga Spaku, Kapit.

PMS ngatur AGM kena 29 April tu

SIBU : Gerempung Melanau Sibu (PMS) deka ngatur Aum Besai Niting Taun (AGM) bepalan ba Indu Opis Gerempung Melanau, Lot 25, Jalan Awang Ramli Amit, Sibu kena 29 haribulan April tu. Aum tu berengkah diatur urung pukul 2.00 lemai lalu deka dipenyadi Kaban Kunsil Negeri (ADUN) Nangka, Dr Annuar Rapa'ee. Beduduk ari nya, Chairman PMS, Felix Bohari nesau semua kaban gerempung ngambika sama datai ngulu aum tu. Ngagai bala kaban gerempung ke bisi ati deka mangku pengawa nyadi komiti musin 2012/2014, kita dipinta ngambi pom nyadi chalon ari Encik Drahman Jabar nengah lumur 019-8153129, Michael Akam (010-9672011) enggau Encik Michael Bujang (012-8923162). Pom ke udah tembu diisi tau disuaka ngagai orang ke disebut nama tadi, anang laun ari 22 haribulan April 2012 (Hari Minggu) pukul 5.00 lemai.

Orang indu anang malu beperesa pengerai

SELANGAU : Pencheramah pengerai Dr Ali Puji ngelalau raban orang indu ke diau ba menua pesisir ngambika anang malu beperesa pap smear dikena nagang penyakit riman sarang anak. Iya madah, agi mayuh amat irang indu enda ngemeratka pasal pemedis riman sarang anak taja pan nemu pemedis tu entara pemedis ti pemadu disenakutka orang indu nangkan pemedis riman tusu. "Taja pan pemedis tu ulih ditemu tumu, tang mayuh amat orang indu enggau beperesa. Sida tebal agi ngelawa doktor enti pemedis udah raya," ku iya madah rambau ke nyadi pencheramah beserimbai enggau Program Tuai Begulai enggau Rayat di Rumah Jelai, Sungai Tamin, Selangau, empai lama. Ku iya, pansik ba senentang orang indu ke bisi beperesa pasal pemedis riman sarang anak tu agi kurang bendar. "Tebal agi orang indu madahka sida kelau kiruh gawa ngujungka nadai hari deka beperesa pengerai," ku iya. Dr Ali madah, tanda deka nemu pemedis penyakit riman ba sarang anak tu iya nya pengudah orang indu beperesa pap smear. “Riman tu ulih ditemu baka ngasaika pemedis tauka bedarah lebuh ti beleman. kelimpah ari nya mega, enti bedarah dalam utai orang indu entara timpuh iya ke datai bulan, pansut darah ari utai sereta bau, tauka pansut darah ba orang indu ti udah chukup umur (menopaus) nya meh entara tanda-tanda orang indu ngembuan penyakit riman,”ku iya. Iya madah, nadai kebuah orang indu enggai beperesa pengerai laban diatu perengka sepital udah jauh amat manah sereta chukup nyengkaum ba menua pesisir. "Nya alai, patut bendar orang indu nyeliahka diri ari pemedis tu nengah perubat betuchuk vaksin ditangka beperesa pap smear betakah," ku iya. Tuju beresa pap smear ngambika doktor ulih nemu tnada pemedis tu bisi nyadi nengah chara kolposkopi iya nye nerupung ngena perengka mikroskop meda tisi sarang anak orang indu. Sama datai rambau program ceramah tu iya nya Kepala Operasyen Indu Parti Rayat Sarawak (PRS) N.52 Tamin, Liah Umal.

Hajijah Bohari dipilih nyadi Chairman PPWS Sibu

SIBU : Hajijah Bohari udah dipilih nyadi Chairman Gerempung Orang Indu Negeri Sarawak (PPWS) pelilih Sibu ba rengat 2012/2015 rambau Aum Besai ninting taun diatur ba Sibu , apin lama ti udah. Orang ke nyadi tuai ba Aum Besai nya Chairman PPWS Kawasan Sibu, Sarikei enggau Kapit ke alai Hajah Ta’siah Ibrahim dipilih nyadi Sapit Chairman enggau Lucy Lau Pick Kiong nyadi Penulung Chairman. Sekereteri PPWS dipangku Hashimah Rashid lalu Sharifah Rabiah Wan Hadion dipadu nyadi Tukang Wang. Lima iku agi dipilih nyadi kaban komiti, nyengkaum Hajah Salemah Chali, Latipah Putit, Hajah Sakinah Haji Bujang, Halimah Udin enggau Tang Hie Chai. Salasri Dairi enggau Shahibah Abu Bakar dilantik nyadi kaban komiti baru nya.

NYADI CHAIRMAN … Hajijah Bohari (duduk tiga ari kiba ) begambar begulai enggau kaban komiti PPWS Pelilih Sibu ti udah dipilih ba Aum Besai diatur ba Sibu.

ARMADA PBB Sarawak datai ba Lawas 5 Mei

LAWAS : Operasyen ARMADA Raban Nembiak Parti Pesaka Bumiputera Bersatu (PBB) Sarawak deka ngelawa Lawas kena 5 haribulan Mei lalu dipelaba bisi perambu baru ba ubah baru raban nembiak Pemuda PBB Sarawak di Lawas udah tu. Aum kepenudi nyambut penatai ARMADA Raban Nembiak PBB Sarawak di Lawas udah diatur ba Opis PBB Bukit Sari ti bela digulu sayap Indu enggau bala kaban ari agensi perintah ngambika program tu ila mujur. Mayuh main deka dibantai rambau penatai sida tu ila, baka pengawa mandangka motor, pekit bot controller, kugiran, pekit nyura enggau mayuh agi main ke bukai. Penatai ARMADA tu betuaika Kepala Raban Nembiak PBB Sarawak ti mega Sapit Menteri Sains Teknologi enggau Inovasi Malaysia, Datuk Haji Fadillah Yusof. Pengawa nutup pengerami tu deka diatur muak ke malam bepalan ba Dewan Stadium Tetutup Lawas. Dipelabaka 1000 iku orang deka datai lalu pengerami tu deka dipenyadi Menteri Perambu Sumber enggau Rampa Menua II, Menteri Rengka Rama enggau Menteri Pemnasang Industri Sarawak, Datuk Amar Haji Awang Tengah Ali Hasan. Nitihka Kepala Raban Nembiak PBB Zon 8, Kr. Awangku Jinal Abedin Pengiran Haji Jawa, ba Lawas ila, Raban Nembiak PBB deka ngaga rikot baru iya nya ngatur Kimpin Meri Darah ke pemadu mayuh ba menua Malayisa kena 5 Mei ari pagi nyentuk ke lemai tegal deka ngulihka lebih 1000 pain darah. Program Armada Raban Nembiak sebengkah ari program ti deka ngasuh tuai Raban nembiak tikas negeri betemu enggau bala kaban operasyen raban nembiak PBB pampang Ranting bepun ari Kuching ti deka dipenyadi Kepala Menteri Sarawak ti mega Presiden PBB Sarawak, Pehin Sri Haji Abdul Taib Mahmud, lalu ba ila pengawa nutup dipenyadi Awang Tengah. Raban Armada dipelabaka datai ba Mengkalab lemai 5 haribulan Mei lalu deka diambat Kaban Parlimen Lawas, Dato Henry Sum Agong. Ba pengawa ke diatur sida sebedau tu, sama bisi datai iya nya Kaban Parlimen Lawas, Dato Henry Sum Agong dan Kr. Awangku Jinal Abedin chairman pengatur pengawa, Walikota Majlis daerah Limbang ti mega kepala Raban Nembiak PBB Bukit Kota enggau Kepala Raban Nembiak PBB Bukit Sari, Kr. Semie Haji Nasip sereta bala Kepala Indu PBB Bukit Sari, Hajah Aisah Bahar.

KE PENGINGAT...Kepala Raban Nembiak PBB Zon 8, Kr. Awangku Jinal Abedin Pengiran Haji Jawa enggau Kaban PArlimen Lawas, Henry Sum begambar ngambika pengingat begulai enggau raban nembiak PBB ba Lawas.

Perintah nyediaka program tranformasyen sains teknologi

SIBU : Perintah nyediaka program transformasyen ngambika nembiak rebak baru ulih belajar kelebih agi ba senentang pemansang dalam bidang sains enggau teknologi. Pengarah Pelajar Negeri Sarawak, Abdillah Adam madah, semua pengajar di sekula dipinta bebendar nempa bala nembiak sekula di serata menua Malaysia. "Opis Menteri Pelajar Malaysia udah digerah ngambika nempa nembiak bepun ari pra sekula ngambika setipak enggau juluk ati perintah ti deka nyadi menua maju rambau taun 2020,"ku iya. Nengah program LINUS bala pengajar dipinta ngajar nembiak pasal penemu literasi enggau numerasi pengudah tiga taun bala nembiak tu belajar ba sekula primari. "Kelimpah ari nya mega, kitai digerah ngambika ngemayuhka agi sekula ke beprestasi tinggi (SBT), pia mega, ngadaka mayuh agi prinsipal enggau kepala pengajar ke landik mangku pengawa," ku iya. Iya madah munyi nya lebuh bejadi pengerami nyuaka 'Anugerah Perkhidmatan Cemerlang' (APC) 2011 Ungkup Bala Ke Gawa Ba Opis Pelajar Tikas Sibu. Abdullah madah, pemujur organisasyen pelajar bepanggai ba kualiti servis bala pengajar. "Nya alai, kitai mesti bebendar gawa sereta nambahka penemu enggau pengelandik ngambika ulih ngangkatka pemanah pendiau enggau profesion staf ba Opis Pelajar," ku iya. Iya madah, tanggungjawap bala pengajar makin besai laban diatu udah mayuh amat ubah ke diatur ba sekula. "Pengajar ukai semina ngajar ba senentang bidang ke dipelajarka sida, tang mega mayuh agi pengelandik bukai ti tau diajar ngagai bala nembiak. Udah nya, bala penulung staf patut nulung bala pengajar nyapai juluk ati nya ba semua tikas dalam Opis Pelajar," ku iya. Abdullah nesau semua pengajar kelebih agi sida ke ngajar di Sibu ngambika semampai ngemanahka agi prestasi sida. "Opis pelajar udah nyediaka program Operasyen Ngemajuka Sarawak (GeMS). Udah nya mega, kitai bisi Program Pemansang Sekula SIP) ti nulung menua ngurangla penyampau sekula ba tikas Band 6 enggau Band7. "Seninjik enggau nya, sada 'HIGH SPEED-HIGH IMPACT' aku mai genap iku kitai ke ditu mesti gawa bebendar udah tu," ku iya. Ba pengerami tu bisi 480 iku staf ba Opis Pelajar Daerah Sibu, Kanowit enggau Selangau nerima APC. Entara pemesai ke bisi datai maya tu iya nya, Pemesai Pelajar Daerah Sibu, Wong Chong Kung sereta bala ke bukai.

TABI PUJI...Pengarah Pelajar Negeri Sarawak, Abdillah Adam nyuaka APC ngagai seiku orang ba sebengkah pengerami ke diatur ba hotel Kingwood.

Penyampat bomba nyelamatka Balai Polis Sentral Miri

MIRI: Penyampat enggau penau raban bomba mujur madamka api sereta nyelamatka Balai Polis Sentral Miri ari angus ba penusah angus ke bisi nyadi kena Hari Lima ke udah. Raban bomba nerima kangau urung pukul 8.16 malam lalu datai ba endur nya enggau naka pengelengkas ngena sebuah kerita bomba enggau tujuh raban bomba madamka api ba sebuah bilik endur dua iku pemesai nasat ba balai nya. Nitihka jerita, ba penusah angus ke nyadi urung pukul 8.15 malam nya, raban polis ke benung gawa tesiumka bau asap sebedau meresa lalu tepedaka asap tebal berengkah pansut ari bilik nya sebedau sida ngangauka bomba. Tuai Polis Pelilih Miri, Asisten Komisioner, Mun Kock Keong madahka, ba maya ke diatu sida benung nasat nama kebuah penusah nya nyadi lalu iya setuju pekara nya nyadi dipelabaka ketegal penanggul 'short circuit'. Ku iya, penusah angus nya mujur ditemu raban polis ke benung gawa lebih tumu agi sebedau sida ngagauka raban bomba madahka penusah ke bisi nyadi. "Kami enggau naka ulih deka ngemetulka pekara ke udah nyadi nyengkaum deka nganti wayar baru tauka pengawa bukai ke patut. Tang semua nya bepanggai ari asil tasat raban bomba," ku iya. Balai Polis Srentral Miri nya rumah lama ke digaga ba taun 1950an lalu sekeda endur nya digaga ngena kayu.

Kunsilor madahka diri nadai muai kad kaban SPDP

LUNDU: Raban kunsilor di Mas Gading enda setuju enggau repot ke madahka sida udah muai kad kaban Parti Demokratik Progresif Sarawak (SPDP), tang madahka kad nya deka diberi pulai ngena chara ke berenggat. Pengari raban nya, Kunsilor Rosadi Ugit nanya nama kebuah sekeda orang sanggup nuduh pekara ke baka nya laban iya nadai bisi nyadi. "Nya siti pengawa ke bejai bala kami enti sida nuduh kami ngetan sereta muai kad raban SPDP di Mas Gading. Iya ke enda betul amat nya nama kebuah kami ngambi kad kaban sereta nyaga iya ngambika enda abis timpuh, enti nitihka atur parti pekara nya endang sigi nadai. . "Nya alai, kami deka nyuaka kad nya pulai baru terus ngagai Indu Opis SPDP enda lama agi ... sekalika kami mulaika iya kediri empu tauka nitihka pampang SPDP di Mas Gading," ku iya madahka Utusan Sarawak. Sebedau tu iya madahka senentang repot surat berita ke bisi nyebut Penulung Sapit Presiden SPDP, Rayan Narong bisi nyebut pengawa muai kad kaban SPDP di Mas Gading ngagai Geng 5 (G5) nyadika tanda nyukung Kelab Barisan Nasional empai lama ke udah ukai reti nya sida udah pansut ari parti ke udah dikemendarka. Nitihka Penulung Sapit Presiden SPDP Rayan Narong, pengawa ke ngumpul kad nya ari kaban parti lebih agi sida ke baruh agi diatur seiku orang diasuh bejalaika pengawa ngambika kad nya dilindung sereta enda abis timpuh, tang lebuh sida deka ngidupka timpuh nya baru iya enda diberi pulai ngagai orang ke ngempu. "Nya kebuah sida iya bisi ngembuan mayuh kad lalu kami bisi tepedaka nya lebuh nemuai ngagai kampung lalu mayuh agi kad nya diberi ngagai sida ke indu sereta datai ke sehari tu bisi sekeda deka ngambi laban deka ngidupka timpuh kad nya, tang orang ke nyimpan kad nya enggai meri iya pulai baru," ku iya. Nya alai ku Rayan, pengawa ke baka nya sigi nadai etika sereta enda patut nyadi. "Enti sida betul-betul deka pansut ari parti, sida datai ngagai indu opis sereta nyuaka kad nya ditu ... nya pekara ke patut digaga," ku iya. Rosadi madahka, dipelabaka urung 6,000 iku kaban ari 14 pampang SPDP di sitak Parlimen Mas Gading deka nyuaka kad nya pulai baru enda lama agi. "Enti sida setuju, kami deka nyuaka kad nya pulai baru ngena chara ke betul, ukai muai iya," ku Rosadi.

Eksport sarang burung walet mai untung

KUALA LUMPUR: Sida ke bejalaika pengawa enggau kompeni sarang burung walet menua tu bisi peluang ke besai amat deka ekspot asil sida ngagai menua China, ku Menteri Betanam Betupi enggau Industri Ngena Asil Betanam Betupi Datuk Seri Noh Omar. Taja pia, sida patut nitihka tiga atur ke patut iya nya ngembuan setipikit 'Veterinary Health Mark' (VHM) ari Opis Servis Veterinar, Setipikit Pengerai Jelu ari Opis Menteri Pengerai Malaysia (KKM) sereta Diperesa Ngambika Ditemu Ngena Frekuensi Radio (RFID) iya nya sistem dikena nentuka endur asla sarang burung walet nya. Perintah netapka atur ngena chara proaktif dikena nentuka asil ke diskspot ngagai menua China iya ke pemadu manah sereta bekualiti, ku iya madahka pemberita pengudah bejadi Eksibisyen Entarabansa Discus Malaysia Ke-6 2012 kena Hari Empat ke udah. Noh enda setuju enggau dawa 200 iku sida ke bejalaika pengawa dagang ke bisi dipansutka ba sebuah surat berita jaku China ke ngumbai pengawa ekspot sarang burung walet dimonopoli sekeda kompeni aja. “Aku ngasuh sida ke bisi mansutka jaku baka nya datai betemu enggau aku sereta meri penerang nitihka baka utai ke udah disebut sida. “Ba maya ke diatu lapan kompeni ke dikemendarka bejalaika pengawa nya nitihka atur ke udad ditetapka,” ku iya. Presiden Gerempung Discus Malaysia, Foo Pin Khooi madahka, eksibisyen Discus nya patut diatur di Duisburg, Jerman taun tu nya pekit ikan ngias Discus tikas entarabansa. “Bisi Sembilan kategori ba pengawa ngias ikan Discus ke deka dipekitka lalu champion ba tetiap kategori deka nerima mata duit penyampau RM1,000 enggau trofi, lumur dua nerima mata duit RM500 enggau trofi sereta lumur tiga nerima RM300 enggau trofi. “Sida ke menang ba tetiap kategori deka nyereta pekit ngerebut perais mata duit penyampau RM15,000 enggau trofi disembur enggau emas rega RM7,000,” ku iya. Pekit entarabansa nya iya ke pemadu besai kala diatur ba maya ke diatu. Bisi 290 penyereta udah diterima ari 18 buah menua di serata dunya nyengkaum Amerika Syarikat, Jepun, Jerman enggau Malaysia.

Parti baru tau nyereta BN enti nya nitihka peneka rayat - Taib

KUCHING: Barisan Nasional (BN) Sarawak sedia deka nerima sebuah agi parti komponen ke baru, taja pia iya nitihka peneka enggau utai ke dipilih rayat di nengeri tu. Chairman BN Sarawak, Pehin Sri Haji Abdul Taib Mahmud madahka, iya empu tebuka senentang pekara tu seagi parti baru nya tau meri pemanah ngagai BN. Ku iya, parti politik baru ke udah direjista nya sekeda ari senerio politik di nengeri Sarawak. “Nama kebuah enda enti parti baru nya deka masuk BN. Enda ke kitai nitihka chara system demokrasi di menua tu? “Enti deka nya iya bepanggai ba rayat nengeri tu empu laban sida bibas tau milih,” ku iya lebuh ditanya pemberita pengudah bejadi Konvensyen Kelab Lions Multiple District 308 Ke-50 di sebuah hotel ke tebilang kena Hari Lima ke udah. Iya mansutka jaku munyi nya lebuh meri penerang sekalika BN Sarawak deka nerima Parti Pengereja Sarawak (SWP) nyadi parti komponen BN baru pengudah peminta sida ngerijista diri udah dikemendarka Opis Pengerijista Gerempung (ROS) tiga hari ke udah. Ngenang senentang BN Sarawak sekalika deka meri pemendar ngagai SWP ke deka ngasuh chalon sida iya bediri maya bepilih besai ke deka datai, Kepala Menteri madahka parti nya bibas ngaga pemutus sida iya empu. “Nya bepanggai ba sida iya empu,” ku iya nyaut. Nitihka penerang ari Presiden Pengatur Pengawa Dr Ong Lark Sai sida bedau agi ngaga pemutus sekalika nyereta perintah tau ka penyakal.

SUPP ngetanka Riot enggau Ding sereta seiku orang baru

KUCHING : Parti Rayat Besatu Sarawak (SUPP) udah ngemendarka tiga iku nama chalon parti nya ti deka betanding maya pengawa bepilih besai ke -13 (PRU-13) ti deka datai. Presiden SUPP, Datuk Seri Peter Chin Fah Kui ti mega Menteri Tenaga, Teknologi Gadung enggau Ai madahka, tiga iku chalon ke udah dikemendarka tu iya nya, Kaban Parlimen Serian ti mega Sapit Presiden Parti nya, Datuk Richard Riot ak Jaem, Kaban Parlimen Sarikei Ding Koung Hiing enggau seiku orang baru ba Parlimen Bandar Kuching iya nya Tan Kai ti mega Chairman Gerempung Nembiak Parti SUPP. Nama tiga iku chalon tu dipansutka Chin rambau iya ti nyadi chairman Aum Komiti Pusat (CWC) ke diatur bepalan ba Indu Opis Parti SUPP, lemai kemari (22 April 2012). Chin madah, iya besai bendar pengandal ati ngagai chalon baru ke udah dikemendar dalam CWC iya nya Tan Kai ulih ngerampas pulai baru kerusi Parlimen Bandar Kuching ke dipegai Parti Tindakan Demokratik (DAP). Lebuh ke ditanya pengarang berita senentang penuduk ba kerusi Parlimen bukai, Chin madahka chalon ba sitak Parlimen Sibu enggau Parlimen Lanang agi benung diperunding sereta nganti pemutus ari Liason Komiti YB Dato Wong Soon Koh enggau YB Datuk Tiong Khai Ting. Pia mega, ba sitak Parlimen Stampin bisi enam iku rintai nama, lalu nganti pemutus penemu ari Liason Komiti ba sitak nya empu. Ba sitak Parlimen Miri, Chin ti mega Chairman Parti SUPP deka ngatur aum dikena milih pengari ba endur tu ila. Rambau ke dirandau raban media Chin madahka, iya enda belembut ati ngagai sapa-sapa, enti sema tuai parti tauka bala kaban parti bisi nguji deka ngachau chalon ti deka bediri. "Nadai guna kitai bekachau ke penuduk pangan diri ti deka bediri, manah agi kitai begempung ati, besaup sereta bekerejasama ngambi pulaika pemujur enggau pemenang ngagai parti Barisan Nasional (BN)", ku iya. Iya mega madahaka, semua rintai nama chalon parti SUPP deka dibantaika enda laun ari 30 haribulan April tu.

UDAH SEDIA...Entara chalon parti SUPP ti udah bulih pemendar betanding rambau PRU-13, Tan Kai (kiba), Datuk Richard Riot ak Jaem (tengah) enggau Ding Koung Hiing (kanan).

Rayat anang ngembuan runding ngati ke diri

MATU : Rayat dilalau ngambika enda ngembuan runding semina deka ngati kediri empu aja laban penemu ke bansa nya tau bendar muntanka pemansang perintah sereta ngerugika orang bukai. Jaku tangkan tu dipansutka Kaban Kunsil Negeri (ADUN) Jemoreng, Abu Seman Jahwie ba sebengkah pengerami ke diatur begulai enggau rayat di Kampung Kuala Matu, Hulu, empai lama. Iya madah, penemu ke bansa nya semina ngenusahka orang bukai sereta ulih ngelabuhka pemansang ti benung diperambu perintah. “Aku meri chunto. Perintah enda ulih ngaga nama-nama nyema seiku orang nagang pemansang ketegal enda ngasuh pun sibau iya ditebang," ku iya. Iya madah, endang udah juluk ati perintah deka meri pengelantang ngagai rayat lalu kami niat ati kami deka meda pengidup sida diteju. Nya alai, rayat mesti terus meri sukung ngagai perintah ngambi ke pemansang ulih terus digaga. "Kerejasama entara kami (perintah enggau rayat) mesti tegut. Kita terus nyukung kami, lalu kami perintah mesti terus mendingka serebana rayat," ku iya. Ku iya, kaul ke tegut entara mensia mayuh ti bisi ba menua tu entara pekara ke pemadu beguna dikena ngemujurka pemansang. Seretai enggau nya, iya madahka endang udah tanggungjawap perintah Barisan Nasional (BN) nyaga ngemataka pengidup rayat. Perintah “BN seruran ngemeratka serebana rayat," ku iya.

K1M negapka kaul mensia mayuh

MARUDI : Kaban Kunsil Negeri Telang Usan Dennis Ngau madahka, Komuniti 1Malaysia sebengkah dikena ngemansangka program transfomasyen rayat di negeri tu. Beduduk ari nya, Dennis muji pengawa ke udah digaga Komuniti 1 Malaysia Kampung Pemindahan laban ke udah mujur ngatur sebengkah aktiviti ti chukup manah ngagai mensia mayuh ke diau ba kandang menua nya. “Taja pan nadai mayuh belanja ke dikena tang meh aku berasai gaga meda K1M kampung Pemindahan ti udah mujur bejalaika tanggungjawap sida," ku iya. Dennis madah munyi nya, lebuh bejadi Program Penghayatan 1Malaysia K1M Kampung Pemindahan, ba Marudi empai lama. Taja pia, ku iya program tu enda ulih mujur enti nadai sukung ari bala mayuh. “Tabi puji ngagai Pemesai Pemadah, Joseph James laban ke udah bendar ngatur pengawa beserakup enggau kaban K1M," ku iya. Maya nya mega, Dennis Ngau ngasuh K1M Kampung Pemindahan bejalai ngagai endur bukai kelebih agi ngagai menua ke jauh ngelawa raban bansa Penan. "Aku arap bendar Komuniti 1Malaysia kampung Pemindahan ulih nulung raban bansa Penan, sereta bansa ke bukai baka Kenyah enggau Kayan ngambika sama ulih maju nyepi arus pemansang," ku iya. Iya madah, raban bansa Penan patut diajar ngambika sida ulih majak maju kelebih agi ba senentang pengawa sekula. “Pekara ke pemadu beguna diatu iya nya, raban nembiak bansa Penan kelebih agi sida ke indu mesti diajar ngambika sida enda tebelengga tauka telunga alah umbuk orang ngereja pengawa ke enda manah," ku iya. Dennis meransang Komuniti 1 Malaysia ngambika meri penerang ngagai raban sida tu ba senentang kuing pengidup ke maya hari tu. Ku Dennis, raban bansa Penan kelau nyamai ditundi orang bukai, nya alai K1M patut ngajar sida penemu ke bguna ngambika sida nemu program tranformasyen perintah. “Aku meri puji ngagai semua kaban K1M kampung Pemindahan laban udah ngemujurka aktiviti K1M dikena kita neritka kaul enggau pangan diri", ku iya. Ba pengerami tu, Dennis Ngau bisi madahka geran MRP iya penyampau RM5,000 ngagai komiti K1M kampung Pemindahan dikena sida ngatur aktiviti. Sama bisi bejaku ba pengerami tu iya nya Chairman K1M Kampung Pemindahan Anyi Ngau@ Mohd Adi Abdullah. udah nya bala temuai ke bisi datai Pemesai Penerang Marudi Joseph James, Pengulu Ayub Haji Hassan, KK Izhar Haji Tahar, Kapitan Jimmy Kiu Boon Fatt, bala kepala opis perintah enggau bala tuai raban bansa.

BEBATAK TALI... Kaban Kunsil Negeri Telang Usan Dennis Ngau bejadi pekit bebatak tali ba sebengkah Program Penghayatan 1 Malaysia K1M Kampung Pemindahan Marudi.

Orang Lawas asa ati servis jalur lebar kurang manah

LAWAS : Pengguna servis Jalur Lebar di Lawas, kelebih agi sida ke diau enda jauh ari bandar berasai asa ati ketegal kualiti servis jalur lebar kurang manah. Enti dibanding ba endur bukai baka di Sipitang, Sabah servis sida lebih manah agi ari ba Lawas. Nya alai, bala pengguna ngarapka perintah kelebih agi Suruhanjaya Komunimasyen enggau Multimedia Malaysia(SKMM) ngambi beratika pekara tu. Kebuah pia, mayuh amat pekara ti diadu beguna online magang baka pasal bank, tauka deka nemu pasal penerang sebelah opis perintah. Taja pia, naka ke diatu servis jalau lebar tu kurang manah, nya alai mayuh amat pekara ti deka diadu begunaka servis online tu puntan magang. Rayat di Lawas sigi rinduka servis jalur lebar laban nya sida enda ulih ngaga servis ke diri empu, tambah mega sida enda entap pendiau baka diau ba ruma sewa. Nya alai, servis jalur lebar entara servis ke dipilih sereta dikerindu laban sida nemu perintah endang benung ngelakuka servis tu. Naka ke diatu, servis tu kurang manah lalu patut diaduka baru. Naka ke diatu servis tu makin pedis dikena, lalu kami ngasaika pengerugi laban pengudar tetap ngasuh kami mayar taja servis enda bangat manah.

ENDA MANAH SERVIS...Servis lebar ba daerah Lawas chukup ngasaka ati bala pengguna ke diau ba satu ngagai tiga kilometer ari bandar.

Program ngena ensikal 1Malaysia

KABONG : Sebengkah Program Ngena Ensikal 1Malaysia Begulai enggau bala Tuai deka diatur kena 27 April beserimbai enggai penemuai Menteri Besai (PM) Datuk Patinggi Najib. Chairman Pengatur Program, John Jemat madah, program nya deka diatur berengkah pukul 10.00 pagi lalu temuai dipebasa ke sama bisi datai rambau tu ila iya nya Sapit Menteri Pengangkut Menua Malaysia Jelaing Mersat. Ku John, bala orang ke nyereta pengawa ngayuhka ensikal tu deka bepun ari pasar Kabong, lalu penyauh pejalai sida iya nya kira 20 kilometer. “Orang ke ngena ensikal tu deka nikal pulai baru ngelawa Rumah Panjai Empayang kira 10 kilometer penyauh ari pasar Kabong. “Program tu mega dipelabaka bela digulu bala pemesai opis perintah sereta sekeda artis," ku iya. Barang sapa ke bisi ati deka nyereta program tu, kita dipinta mayar yuran RM30, lalu kita deka diberi selambar baju-T. Hari bulan kepenudi endur ngerijista diri iya nya kena 24 April, pukul 3.00 lemai. Nya alai, barang sapa ke bisi ati deka enggau kita tau betelefon ngagai John Jemat ngena lumur 013 8947176 tauka 083-411267 (opis).

Kelab doktor nembiak mesti ditumbuh ba sekula

SEREMBAN : Opis Pengerai benung nganti Surat Pekeliling Ikhtisas ari Opis Menteri Pelajar, ngambika Kelab Doktor Nembiak ulih ditumbuhka ba semua sekula primari. Sapit Menteri Pengerai Datuk Rosnah Abdul Rashid Shirlin madahka, opis menteri udah ngaga perambu deka ngerembaika program tu ngagai sekula sekondari lalu pekara tu udah diperundingka enggau Kepala Pengarah Pelajar ngambika bisi pemutus. Lebuh bejaku ba pengerami nya, Rosnah madahka naka ke diatu18 peratus tauka 1,392 buah sekula primari ba serata menua tu udah numbuhka Kelab Doktor Nembiak lalu penyampau nembiak ke bisi nyereta 36,000 iku iya nembiak primari 4 ngagai 6. Program Doktor Nembiak tu sebengkah program 'health promoting school' sebaka enggau pengelalau kaban serambau bekaul enggau pengerai. Bepun ari taun 2006, Opis Menteri Pelajar ngangkatka program awakka nyadi sebengkah program kokurikulum lalu diatu dikumbai Kelab Doktor Nembiak. Lebuh ke dirandau pemberita, Rosnah madahka, Opis Pengerai ba genap buah negeri di serata menua tu dipinta ngemataka pasal penyakit jari, kaki enggau nyawa (HFMD), enti sema tanda-tanda penyakit tu bisi dipeda anang lalau ngaga ripot ngambika ulih diperubat enggau lengkas. Iya madah, chara ke bansa tu endang patut laban penyakit tu balat bendar nyadi ba Johor, Sabah enggau Sarawak. "Ngelama tu enti HFMD bisi diripot, kami deka beratika penyampau kes tu dulu, nyema iya balat nyadi ka pan enda Palan Penyaga Nembiak (Tadika) enggau Palan Ngajar Nembiak (Tabika)tepasa ditutup. "Selalu iya timpuh Tadika enggau Tabika ditutup seminggu aja nganti kes ke dipansik baru. Nya alai, aku ngelalau bala apai indai ke bisi nganjung anak ngagai Tadika tauka Tabika mesti beratika simpton HFMD. Enti sema nyengala ngembuan tanda bisi pemedis tu anang laun datai berubat ngagai hospital," ku iya.

MANAH AMAT... Tuai Pemegai Negeri Tun Juhar Mahiruddin bepeluang nepan lepa ti pemadu manah beserimbai enggau Regatta Lepa Semporna. Sama bisi dipeda Menteri ba Opis Kepala Menteri, Datuk Nasir Tun Sakaran enggau Menteri Pemansang Menua Pesisir enggau Wilayah, Datuk Seri Mohd Shafie Apdal (duduk, kanan).

Program Info K1M patut nitihka atur

LAWAS : Program Info Komuniti 1 Malaysia patut dititihka mayuh bengkah agensi enggau opis perintah ke besangkut paut, program ke bansa tu patut dikemesai lalu ukai ngereja pengawa ke mit-mit sereta enda nitihka atur baka ti udah bisi dalam polisi Opis Pemadah. Pemesai Pemadah Daerah Lawas, Syahrulizan Madian madah, program info bestari patut diatur nitihka atur ti betul lalu bepanggai ba polisi Opis Pemadah Menua Malaysia ngambika enda ngerua belanja. Kelimpah ari nya mega, program tu endang dikarap endur nempa kaul entara mensia mayuh enggau perintah. Iya madah munyi nya, lebuh bejaku ba Program Mesra Rakyat enggau Program Info Komuniti 1Malaysia ke diatur ba Kampung Long Sebangang, Lawas empai lama. Iya ngarapka program ke diatur unit Opis Pemadah Lawas ulih segaris enggau polisi opis menteri laban nama-nama aja penerang mesti betul enda tau bula. Ba pengerami nya, iya bisi ngenang pasal sekeda isu nyengkaum isu PTPTN, sereta jaku petenah orang nuju Kaban Parlimen Lawas, Dato Henry Sum Agong. Iya madah, Henry endang siku pengari rayat ke chukup manah, bendar gawa sereta seruran datai ngabas rayat di Lawas nadai bekira bansa enggau jalai pengarap. “Enti enda pemendar iya, kada tembu kini jalai ke Ba’Kelalan, jematan Trusan, jematan Pengalih, Hotel Sri Malaysia, Hospital Baru Lawas, jalai-jalai kampung engau bantu ke bukai ari perintah besai baka program bantu rumah enggau bantu ngagai orang berikan," ku iya.

RINDU ENGGAU RAYAT… Kaban Parlimen Lawas, Dato Henry Sum Agong lebuh ke datai ngabas rayat Parlimen Lawas.

Nyukat perimeter dikena nentuka pemesai NCR

KAPIT : Pengawa nyukat perimeter tanah nengah inisiatif baru entara chara dikena nentuka pemesai tanah Hak Adat Bumiputera (NCR) ke amat diempu rayat di negeri tu, ku Menteri PemansangTanah, Tan Sri Dr. James Jemut Masing. Iya madah, 1.5 juta hektar tanah NCR rayat di negeri tu deka bulih pemendar sah diempu rayat pengudah pengawa nyukat tanah tu tembu. Pengawa nyukat tanah NCR tu sebengkah ari chara ke diatur dalam program Bidang Keberhasilan Utama Negara ngambika rayat nyamai ngelala garis entara menua di negeri tu, ku iya madah lebuh ke bejadi pengawa nyukat perimeter tanah NCR ba Rumah Lugat, Sungai Majau, Mujong, empai lama. Iya madah, pengawa nyukat tanah tu deka diatur dua renggat. “Renggat keterubah nyengkaum nyukat perimeter tanah entara NCR enggau tanah negeri lalu renggat kedua nyukat tanah rayat siku-siku lalu mansutka surat pala tanah". "Aku ngarapka semua rayat ke bisi tanah disukat tu ulih bekerejasama enggau Opis Tanah enggau Sukat (JTS) ngambika nadai nyadi penyarut," ku James Masing. James Masing madahka, perintah Barisan Nasional bebendar ngamatka danji deka nyukat tanah NCR laban tu meh reta pesaka ke pemadu beguna dikena rayat ngidupka diri. Iya meri puji ngagai Perintah Besai enggau Perintah Negeri laban ke udah ngaduka inisiatif baru tu, pengawa nyukat tanah tu entara pengawa ke [emadu manah diatur perintah ngambika rayat enda tinggal ari arus pemansang. Pekereja JTS Kapit, Norlina Ra’ee ti sama bisi bejaku rambau tu madahka, JTS endang nesau sapa-sapa aja rayat ke deka ngaga peminta ngasuh tanah sida disukat. “Naka ke diatu, JTS udah ngemendarka 15 buah endur NCR nyengkaum di Majau ngambika disukat", ku iya ti madahka di Majau bisi 16 buah rumah panjai nyengkaum 9,793 ekar pemesai tanah. kelimpah ari nya mega, iya ngelalau mensia mayuh ti disukat tanah tu anang belaya ngambika pengawa tu mujur dikereja. Enti sema nadai penanggul JTS ulih tembu ngereja pengawa tu enda laun ari timpuh sebulan, tang enti bisi penyarut pangawa deka dileka pia aja, lalu JTS deka mindah nyukat ba endur bukai. Pengawa nyukat perimeter NCR renggat keterubah nengah Fasa Satu inisiatif baru NCR Daerah Kapit digaga ba Melukun nyengkaum Rumah Achan kena 25 September. 2010, ti udah nyukat tanah 125 ekar pemesai. Residen Kapit, Dahim Nadot, Tuan DO Kapit, Elvis Didit, Walikota MDK, Philimon Nuing, Pemancha David Dian, Pemancha Tan Kian Ho, Pengulu Steward Sawing enggau Pengulu Salang, Wilson Ugak Kumbong, entara temuai ke sama bisi datai maya nya.

BAGI BELA… Tan Sri Dr. James Jemut Masing bejadi pengawa nyukat perimeter tanah NCR ba Rumah Lugat, Sungai Majau, Mujong, Kapit.

Budi veteran rambau menua siga besai reti

KAPIT : Budi bala ex soldadu enggau veteran rambau menua siga chukup besai bendar reti ngagai menua tu. Seketeri Politik Kepala Menteri, Wilson Nyabong Ijang madah, nya alai perintah enda kala nejuka pemanah budi raban sida tu. Dikena malas pemanah budi sida tu, Opis Hal Ehwal Veteran ke dipegai Opis Menteri Penyaga Menua bisi nyedia sereta meri bantu ngagai ex soldadu, ku iya rambau bejadi aum besai ninting taun Gerempung Ex Soldadu Menua Malaysia (PBTM) pampang Kapit ke digulu lebih 300 iku veteran sereta enggau ruang bilik sida empu. Wilson Nyabong madah, sebedau Malaysia ditumbuh, mayuh bala Sarawak Renjer dianjung gawa ba menua Malaya disabung ngelaban komunis ti deka ngerusak menua tu. Ngenang peminta PBTM Kapit ngagai perintah ti deka minta bagika sebidang tanah ba km 8, Jalai Bukit Goram ke diulih gerempung tu 11 taun ke udah ungkup bala kaban ngaga rumah, iya madah, pekara nya agi benung diperunding. " Pemutus senentang pekara tu deka ditemu nganti pemendar ari perintah". Ba pengerami tu, Wilson Nyabong madahka deka meri geran RM5,000 ari Kaban Parlimen Kapit, Datuk Alexander Nanta Linggi. Pemancha Tan Kian Hoo mega bisi nyuaka tulung penyampau RM1,000 ngagai geremoung nya. Chairman PBTM pampang Kapit, Wilfred Billy Panyau lebuh ke bejaku madah, maya aum ti diatur kena 21 Mac, 2012, gerempung tu udah berunding pasal tanah ba km 8, Jalai Bukit Goram ti deka endur ngaga rumah kaban gerempung. “Randau enggau Residen Kapit sereta enggau Datuk Alexander manah endar. pengudah ti lama nganti, juluk ati deka bulih sebidang tanah diatu udah nyadi nyata. Bala kaban ulih meh nguji minta bantu belanja dikena ngaga rumah udah tu," ku iya. Chairman PBTM Negeri, Spencer Birai madahaka, geremoung tu diatu ngembuan 21 buah pamapng di Sarawak lalu bisi 7,200 iku kaban. Sama bisi datai rambau pengerami tu iya nya, Pemesai RELA Kapit, Anthony Lugad, Pemancha Tan Tian Hood enggau Pengulu Stewart Sawing.

NYUAKA TULUNG… Wilson Nyabong (kiba) nyuaka tulung ngagai seiku veteran, John Rima lalu dikemataka Wilfred Billym (lima kiba), Usa Dana (kiri amat) enggau bala ke bukai pengudah bejadi aum besai ninting taun PBTM pampang Kapit di Kapit.

Pejalai promosyen AJARR mujur

SRI AMAN : Pejalai promosyen “Anugerah Juara Rentak Ruai’ (AJARR) ke diatur ba Taman Panorama Benak semak Kubu Alice, Sri Aman berengkah pukul 10.00 pagi empai lama mujur bendar laban mayuh amat mensia ti datai ngulu. Maya nya pengawa tu diatur Taman Panorama Benak nyau penuh laban bala mensia ke deka betemu mua sereta berandau enggau bala finalis AJARR, pia mega enggau bala penyampai radio tebilang ari stesyen radio Cats FM. Entara finalis AJJR 2011 ke sama bisi enggau pejalai promosyen AJARR tu iya Lucy M enggau raban Hevance, pia mega bala penyampai radio Cats FM iya nya DJ Freddy. Lucy M enggau Hevance disempulang sekeda artis ke bukai baka Along Lupeng, Maxwel Franklin Saran, Gondon John, Ivy enggau Sima. Semua sida sama bisi merindang bala peminat enggau lagu-lagu tebilang sida empu. Mayuh bengkah main bisi diatur nyerumba program pejalai promosyen AJARR 2011 ke bepalan ba Taman Panorama Benak baka kuiz, tanda Poco-Poco sereta betanda begulai enggau artis. kelimpah ari nya mega, bala peminat bepeluang meli produk khas beserimbai enggau program pejalai AJARR 2011 baka baju T Shirt AJRR, Heavent enggau VCD Lucy M. Enda tinggal mega, pengawa tu dirami enggau konvoi Cats FM ngena kerita bansa Perodua.

RAMI AMAT...Bala peminat beluang betanda begulai enggau raban penyampai radio Cats FM ba sebengkah program AJARR ke diatur ba Sri Aman.

500 IPTS deka puntan enti nadai PTPTN

PONTIAN : Operasyen kira-kira 500 buah palan Pelajar Tinggi Swasta (IPTS) di menua tu deka puntan enti sema Perbadanan Tabung Pengajian Tinggi Nasional (PTPTN) diketu baka ke dipinta penyakal. Sapit Menteri ba Opis Menteri Besai Datuk Ahmad Maslan madahka, tebal agi pelajar ke benung belajar ba IPTS di menua tu benung ngelon duit ari PTPTN. "Institusyen Pelajar Tinggi Swasta di menua tu beridup ketegal bisi PTPTN. Tabung PTPTN entera bantu ke manah amat mayuh nulung bala pelajar ulih nyambung belajar ba IPTS," ku iya madah ngagai Bernama pengudah tembu aum Gerempung Apai Indai enggau Pengajar ba Sekula Agama Bantu Perintah An-Nur di Benut, empai lama. Kepala Pemadah Umno madahka, enti PTPTN nyadi diketu, pekara tu tau ngeruga pemansang pelajar ba pelan pelajar tinggi di menua tu. Ahmad madah, IPTS menua tu dipelabaka deka ditutup enti sema bala pelajar nadai penatai pemisi ke bukai endur ngulih ka belanja dikena sida belajar, tambah mega ungkus dikena belajar ukai mimit. Ku iya, 20 buah Institusyen Palan Pelajar Tinggi Awam (IPTA) di menua tu enda ulih nepu semua pelajar, enti sema IPTS ke bepanggai ba PTPTN nadai ulih beoperasyen. Iya madah, perintah ke dipegai Barisan Nasional (BN) udah meri pelajar sekula primari enggau sekondari ti pechuma, udah nya perintah melanja 90 peratus ungkus dikena pelajar belajar ba palann pelajar tinggi. "Enti pelajar ke ngambi kus perubat ba IPTA ungkus sida belajar iya nya RM200,000, sida semina mayar RM12,000 ari semua penyampau ungkus nya lalu lauh iya dipelanja perintah," ku iya. Beduduk ari nya, Ahmad ti mega kaban Parlimen Pontian minta penyakal ti deka PTPTN diketu, berunding panjai ngambika bemabi ulih ngena isu tu dalam politik. "Sida ke deka PTPTN diketu nadai berunding panjai. Anang kelalu berunding ngati ke diri empu aja," ku iya.

Sarawak bebendar ngaduka kampung jerung - Jabu

KUCHING : Sarawak enda kala ngereja pengawa belalai ti deka ngerusak kampung jerung di negeri tu baka ke kala dipetenahka sekeda Gerempung Ke Ukai Dikuasa Perintah (NGO) menua luar. Sapit Kepala Menteri Datuk Patinggi Tan Sri Alfred Jabu Numpang madah, beduduk ari runding ke enda sepenemu sereta penerang ke enda chukup, berita selebubu ngapa ba senentang kereja ba kampung jerung di nengeri tu suah amat pansut. "Nya alai, kitai deka amat ngasuh bala media menua luar enggau NGO nya datai kitu, ngambika kami ulih meri penerang ke silik ba senentang pengawa ke bansa tu lalu kitai enda belalaika sebarang pekara," ku iya. Iya madah munyi nya rambau pengawa Dialog Begulai enggau Lapan Iku Pemansik enggau Pengarang Ari Menua Luar ba sebengkah hotel tebilang di Kuching, empai lama. Jabu madah, Kampung jerung di nengeri Sarawak endang seruran dijaga sereta dikemataka, nya alai kitai enda nemu nama kebuah bisi rita ke enda manah didingga ba senentang pekara tu ba menua luar. "Enti kita deka nemu, Sarawak diatu dikelala bendar ketegal penyulut pemanah pengawa ngaduka babas kampung enggau meruan ba tikas dunya, tanda iya diatu 70 peratus kampung di menua kitai dikumbai kampung asal ke enda tau diregu sapa-sapa," ku iya. Jabu ti mega Menteri Moden Betanam Betupi madahka, dalam kandang 10 taun ti deka datai, perintah negeri deka bebendar agi ngemansang pengawa betanamka getah enggau besawit. "Kami enda nebang kayu peneka ati, pemadu mimit pan kami deka ninggalka 20 peratus ari utai ke bisi ba babas asal ditanam getah enggau sawit. "Nya alai, dalam timpuh lapan ngagai 10 taun, proses ngetau deka digaga enggau berenggat lalu nadai ngeruga nama -nama utai tumbuh enggau idup ke bisi ba endur nya," ku iya. Kelimpah ari nya, Sarawak mega seruran bekunsi penemu teknologi enggau menua luar, ngambika sama bela bulih penguntung. "Kami enda amu bekunsika penemu laban kami nemu pengulih ke bansa tu endang patut dipekunsika entara kitai," ku iya. Dulu ari nya. bala temuai ke datai dibai bejalai ngabas ladang sawit ke diempu Lembaga Penyerakup enggau Pengintu Tanah Sarawak (SALCRA) iya nya Ladang Sawit Stenggang, Bau (SOPE) enggau Kilang Sawit Bau.

PENGAWA DIALOG ... Datuk Patinggi Tan Sri Alfred Jabu Numpang nyadi chairman pengawa Dialog Begulai enggau Lapan Iku Pemansik enggau Pengarang Ari Menua Luar di Kuching.

16 buah ruang bilik dituntung penusah angus dibantu

SRI AMAN : Nasit 16 buah ruang bilik ke enda manah ari Rumah Jegai Jawa, Sungai Purai, Undop, Batu Lintang pengudah rumah panjai sida angus deka berubah pengudah tu. Nya laban perintah ngena Program Bantu Rumah (PBR) deka meri bantu penyampau RM50,000 ngagai genap buah ruang bilik ke besangkut paut enggau penusah angus. Menteri Muda Pemansang Menua Pesisir enggau Pengawa Berumah Datuk Francis Harden Hollis madahka pekara nya lebuh bejaku maya bejadi Pengerami Merekat Rumah Jegai Jawa, Sungai Purai, Undop di Batu Lintang, Sri Aman empai lama ke udah. “Enti dikira semua, perintah ke ngena PBR deka meri bantu penyampau RM800,000 ngambika ulih ngaga rumah panjai baru ke meri penyenang ngagai sida ke dituntung penusah angus. “Pengawa begagaka rumah deka berengkah sebarang maya lalu kami agi nganti pemutus ari Opis Residen Sri Aman ke deka maduka kuntrikta ke betanggungjawap dikena ngemujurka projek nya,” ku iya. Iya mega sama meri tulung penyamapu RM30,000 dikena mantu pengawa ngerataka palan baru endur ngaga rumah panjai nya mega nangkan mensia mayuh ngambika seruran teguh di belakang perintah Barisan Nasional (BN). Bantu nya ku Harden, ngayanka perintah BN sigi seruran merati sereta nyaga pengelantang pendiau pengidup rayat ke dituntung penusah ngelama tu. “Tu tanggungjawap BN ba pengawa nyaga pengelantang pendiau semua rayat. Nya alai, aku ngarapka rayat terus meri sukung ke enda bechiping ngagai kami ngambika pengelantang pendiau sida terus dijaga,” ku iya. Sama bisi enggau ba pengermi nya mega Kaban Parlimen Sri Aman, Masir Kujat, Residen Bagi Menua Sri Aman, Johnathan Lugoh, Enjinir Bagi Menua Opis Kerja Raya Bagi Menua Sri Aman, Cassidy Morris, bala pemesai perintah enggau bala tuai mensia mayuh.

TERIMA KASIH ... Tuai Rumah Jegai Jawa nyuaka pemeri ngagai Harden sereta diperati Masir (belakang), Jonatahan (kanan) enggau Cassidy (kiba) ba pengerami Merekat Rumah Jegai Jawa, Sungai Purai, Undop di Batu Lintang, Sri Aman.

Pengawa ngaduka tanah jelai rita

KUCHING : Pengawa Perintah Negeri Sarawak ti mujur ngaduka tanah di Sarawak udah jelai endar rita ba tikas entarabansa, tanda iya negeri tu udah bulih perais Geospatial World Excellence Award ba sebengkah pengerami makai malam Forum Geospatial Sedunia ke diatur ba Pusat Eksibisyen enggau Konvensyen RAI di Amsterdam, Belanda. Penyulut tu ungkup Opis Tanah enggau Sukat (JTS) Sarawak enggau Sarawak Information Systems (SAINS). Sapit Menteri Tanah enggau Sukat Arab Saudi Muhammad Al-Rajhi nyuaka perais nya ngagai Menteri Perambu Sumber enggau Rampa Menua Datuk Amar Haji Awang Tengah Ali Hassan ti mega nyadi kepala delegasyen Sarawak rambau ke ngulu forum nya. Sama bisi datai ba pengawa nyuaka perais tu iya nya Presiden ke-11 Republik India Dr APJ Abdul Kalam enggau chairman Lembaga Eksekutif Netherland Drs TH A J Burmaje. Forum Geospatial Tikas Dunya tu diatur ba Amsterdam belabuh 23 April ngagai 27 April lalu dipenyadi Menteri Infrastruktur enggau Rampa Menua Netherland Melanie Schultz Van Haegen-Maas Geesteranus. Pengari ari nengeri Sarawak iya nya chairman SAINS Sdn Bhd Datuk Patinggi Tan Sri Dr George Chan Hong Nam, Menteri Muda Promosyen Pelajar enggau Teknikal Datu Len Talif Salleh, Seketari Opis Menteri Perambu Sumber enggau Rampa Menua Datu Sudarsono Osman, Kepala Pemesai Eksekutif ti mega Pengarah Pengatur Pengawa SAINS Dato Teo Tieng Hiong sereta Pengarah JTS Sajeli Kipli.

TEMEGAH ATI … Datuk Amar Awang Tengah (tengah) enggau raban delegasyen Sarawak temegah ati mandangka anugerah ke pemadu besai ba Amsterdam.

St. John Ambulance Sarawak begunaka sukung ari mensia mayuh

KUCHING : Sebengkah Gerempung Ke Ukai Dikuasa Perintah (NGO) iya nya St. John Ambulance ba nengeri tu beguna amat ke sukung ari mensia mayuh ba pengawa mupu pemeri ke deka diatur sida. Chairman enggau Komander gerempung tu, iya nya Dato Sri Ang Lai Soon madahka, meri besai puji ngagai media kelebih agi ngagai pengarang berita laban ke sama meri sukung beberitaka pasal pengawa ke dikereja gerempung St. John Ambulance ngelama tu. Iya madah munyi nya, lebuh randau begulai enggau bala pemberita pengudah pengawa ngelancharka Menira St. John Ambulance ke dipenyadi Kepala Menteri Pehin Sri Haji Abdul Taib Mahmud ba Ringkat 23, Menara Pelita, pagi kemari. Rambau pengawa tu, Pehin Sri bisi nyuaka tulung duit ngagai tabung St. John Ambulance tanda sukung iya ngagai gerempung tu. Udah tu, St. John Ambulance deka bejalai ba sebelah bandar besai, ngambika mensia mayuh ulih sama bela besukung nyuaka tulung ngagai tabung duit turu gerempung tu. "Pengawa bejalai mupu pemeri ari mensia mayuh tu deka berengkah dipejalaika sehari tu (26 April) nyentuk ngagai 29 April 2012" ku Ang. Ang ngarap bendar penyampau belanja ke ulih dipupu tu ila mayuh agi ari taun ke udah. Laban sebedau tu, orang ke pemadu mayuh meri bantu iya nya endang ari bala pemesai perintah nengeri empu. "Nya alai, aku ngarapka mensia mayuh ulih sama bela meri sukung ngagai kami laban tuju pengawa gerempung kami tu endang ungkup nulung sereta ngidupka seput seput sapa-sapa orang ti tasah enda ngira ba dini-dini endur", ku iya. Penyampau tulung agi belanja ari perintah ngagai gerempung tu ninting taun iya nya RM5,000.00. Udah nya, belanja ke bukai asil pupu pemeri ari mensia mayuh. Ba taun 2011, penyampau pupu pemeri ari mensia mayuh iya nya lebih kurang RM98,000.00 lalu sida ke nyuka pemeri tu bisi diberi menira tauka cap St. John Ambulance Sarawak siti seiku. Kelimpah arinya mega, Gerempung St. John Ambulance Sarawak ti betuaika Ang empu, ngelalau agensi perintah enggau nama-nama aja organisasyen di nengeri tu ngambi numbuhka sebengkah unit khas dikena meri bantu nyema nyadi sebarang penusah ke enda disadang ba opis sida. "Kami sedia meri latih nyema kita begunaka penemua ba senentang chara nulung orang bukai lebuh maya ke tasah. Pekara tu enda masau hari sereta enda ngerugika kita" ku iya. Sama bisi datai maya pengawa tu iya nya Joseph Kiu Chiong Kiet, Sekeretari Jeneral Gerempung St. John Ambulance Sarawak enggau bala raban nembiak St. John Ambulance.

PEMERI... Kepala Menteri, Pehin Sri Haji Abdul Taib Mahmud dikemataka Dato Sri Ang Lai Soon (tengah) lebuh ti nyuaka duit pemeri tanda bejadi Menira St. John Ambulance Sarawak ba Menara Pelita, Kuching, kemari.

Projek PR1MA nulung rayat ti jelan penatai pemisi

KUCHING : Projek berumag nengah Program Berumah 1Malaysia (PR1MA)deka dikemansangka ba nengeri tu dikena mantu rayat ke jelan iya penatai pemisi kelebih agi sida ke diau ba bandar. Menteri Pengawa Berumah, Datuk Amar Abang Haji Johari Tun Abang Haji Openg, madahka PR1MA tu datai ari langgur penemu Menteri Besai, Datuk Seri Najib Tun Razak ti deka nulung rayat kelebih orang biak ke baru bekereja tauka sida ti baru lepas graduate ari Institut Pelajar Tinggi Awam (IPTA) Institut Pelajar Tinggi Swasta (IPTS). "Bisi 111 buah rumah teres dua ringkat udah diperambu deka digaga ba Demak Laut Fasa 1 lalu deka dikemujurka Opis Pemansang Pengawa Berumah (HDC) enggau opis PR1MA," ku iya lebuh randau begulai enggau media bepalan ba taba eksibisyen rumah PR1MA bepalan ba tengah laman Wisma Bapa Malaysia beserimbai enggau 'Jelajah Janji Ditepati' sehari tu enggau pagi ila (28 enggau 29 April, 2012). Nambahka nya mega, iya madah sida iya diatu benung berunding enggau Perintah Negeri Sarawak terus ngemansangka rumah PR1MA tu di di Kuching, Miri, Bintulu enggau Sibu. Eksibisyen tu diatur HDC bekerejasama enggau konteriktor swasta ti deka mandangka pelin perambu projek PR1MA. Sama bisi datai kitu iya nya Menteri Besai, Datuk Seri Najib Tun Razak. Iya ti mega Menteri Dagang Temuai madahka, rumah PR1MA tu berega RM150,000 ngagai RM300,000 lalu ngarapka rega rumah tu ulih tangkup sida ke jelan iya penatai pemisi ari RM2,500 ngagai RM7,500 sebulan. "Pelin rumah tu diayanka enggau pelin kontemporari enggau moden iya nya bisi bilik 3+1, tiga buah bilik mandi lalu sebuah rumah nya deka dijual enggua rega ke mudah," ku iya. Iya madah, langgur penemu menetri besai tu manah amat dikena nulung rayat ke enda besai penatai pemisi, awakka sida ulih meli rumah ke diri empu ba bandar. "Pelin rumah tu sebaka enggau pelin rumah ke benung digaga ba Sungai Besi, Kuala Lumpur, " ku iya

MERESA PELIN PR1MA... Datuk Amar Abang Johari Tun Openg meresa pelin rumah ke benung digaga lalu iya diberi penerang ari Pengarah Urusan Dynaku Sdn Bhd, Hj Zamahari Hj Ahmad (kiba) lebuh ke nemuai ngabas taba eksibisyen beserimbai enggau "Jelajah Janji Ditepati". Sama bisi dipeda Seketeri Tetap Opis Menteri Pengawa Berumah Wan Liz Ozman Wan Omar (dua ari kiba).

Projek NKEA Padi Batang Lupar nguntungka rayat Sri Aman

SRI AMAN: Projek Bidang Ekonomi Utama Negara (NKEA) Padi Batang Lupar dipelabaka ulih ngubah gaya pemansang ba kandang menua Sri Aman, kelebih agi ba Batang Lupar. Sapit Menteri Dagang Dalam Negeri, Koperasi enggau Pengguna , Datuk Hajah Rohani Abdul Karim madahka, menua Batang Lupar deka nyendiaka asil beras keterubah ba Sarawak, enti sema projek tu udah beroperasyen. “Aku ngarapka projek tu ulih ngubah tikas pemanah ekonomi enggau perengka guna rayat diau ba kandang Batang Lupar, Sri Aman enti sema projek nya udah laku dijual. “Enti sema projek tu udah mujur, Projek NKEA Padi Batang Lupar ulih ngeluarka 12 tan padi ba sehektar sebaka enggau asil ba Sekincan, Selangor diatu,” ku iya. Rohani ti mega nyadi Kaban Parlimen Batang Lupar mansutka jaku nya ba pengawa Randau Projek NKEA Padi Batang Lupar ke disereta 200 iku orang ke diatur ba Dewan Suarah Sri Aman , apin lama ti udah. Kelimpah ari rayat kandang Batang Lupar, iya madahka diri deka meransang orang bukai sama enggau ngemujurka projek sebedau dikerembai ngagai menua bukai. “Rayat ke diau ba Batang Lupar, Sri Aman patut nemu perintah semina nginjau tanah sida pengeluas 5,000 hektar dikena ngemansangka projek perintis bedandang padi keterubah iya ba negeri tu. “Tanah nya sigi agi diempu kita. Enggau pengawa kerejasama rayat, aku melalabaka nya ulih nyendiaka peluang gawa ngagai kita dudi hari ila," ku iya. Sama bisi datai enggau ngulu pengawa nya, Menteri Muda Betanam Betupi Moden, Datuk Mong Dagang, Kaban Kunsil Negeri (ADUN) Lingga Hajah Simoi Haji Peri, Residen Sri Aman Johnathan Lugoh enggau pengari Pemesai Sekeretari Opis Menteri Betanam Betupi, Paul Vincent Ritom. Projek NKEA Padi Batang Lupar nyadika siti pemansang perintah diatur ex- Menteri Besai dulu suba , Datuk Seri Abdullah Ahmad Badawi dikena ngurangka krisis bekal pemakai menua tu ba taun 2008. Ex- Menteri Betanam Betupi Moden Sarawak Datuk Patinggi Tan Sri Dr George Chan udah milih 50,000 hekar tanah ba negeri tu sebedau ke milih kandang Batang Lupar alai ngatur projek nya.

GAGA ...Rohani (tengah) begulai enggau Simoi, Mong, Johnathan sereta pesereta ke bukai sebedau pengawa berandau pasal projek ti diterangka pengari Opis Betanam Betupi.

Rega sebaka manah ungkup rayat di menua pesisir

KUALA LUMPUR : Program Rega Sebaka (PPH) dikemujurka Opis Menteri Dagang Dalam Negeri, Koperasi enggau Pengguna dipeda badas bendar sereta mai penguntung ngagai rayat kelebih agi sida ke diau ba menua pesisir di Sarawak enggau Sabah. Sapit Menteri Dagang Dalam Negeri, Koperasi enggau Pengguna Datuk Tan Lian Hoe madah, beduduk ari program tu, rayat ke diau ba menua pesisir di Sabah enggau Sarawak ulih ngasaika sereta barang subsidi ti sebeka enggau orang di Semenanjung. "Nyentuk ke diatu, perintah agi benung bejalaika program tu, awakka semua rega barang ke dijaga sebaka magang ba serata menua," ku iya madah lebuh ke nyaut tanya ari Senator Yunus Kurus lebuh sidang Dewan Negara, empai lama. Tan madah, chunto iya ngelama tu di Bario, Sarawak, rega petrol RON95 enggau diesel semak RM5 seliter, udah nya gas petroleum belaie (LPG) semak RM110 setong (14 kilogram) tang pengudah program tu dikemujur, orang di Bario semina meli petrol RON95 berega RM1.90 seliter enggau LPG ke berega RM26.60 setong. Iya madah, enti sebedau tu rega semua utai tu endang mar amat ketegal gaya menua ke bebukit ngujungka kos pejelai nyau tinggi tang meh pengudh program tu mujur mensia mayuh ulih bebelika barang tu enggau rega ke mudah. Iya mega madah, nengah program ke bansa tu, perintah udah maduka bala pengudar barang ulih mai barang baka berau, gula, tepung gandum, minyak makai, LPG, petrol enggau diesel ngagai menua pesisir. "Kelimpah ari barang subsidi tu, perintah mega udah neteapka barang bukai nitihka peminta mensia mayuh ba endur ke dianjung barang," ku iya. Tan madahka, opis menteri udah seruran meresa sereta ngasuh bala pengudar mesti mai 60 peratus barangan subdisi enggau 40 peratus barang Coop 1Malaysia ngagai menua pesisir di Sabah enggau Sarawak. "Produk Coop 1Malaysia udah dijual ba Sabah enggau Sarawak ngena rega ke sebaka enggau ba Semenanjung lalu tau mega dikumbai 1Malaysia 1Harga," ku iya. Semina barang subsidi aja ke sebaka rega ba serata menua Malaysia, tang meh rega barang servis agi mengkang baka selama, ku Tan.