NYAMBUT TAUN BARU

Keranjai Jari : LEMAMBANG SADA SARAWAK

TENGAH malam tu lagi, urung iya udah lepas pukul dua belas tengah malam kitai deka nyambut taun baru. Nyambut penatai taun 2012. Kitai patut dulu meri besai terima kasih ngagai Tuhan kitai ti udah ngasuh kitai idup nyepi sereta ngasaika taun baru tu. Kitai mega beterima kasih laban kitai udah bepeluang ngasaika taun 2011 ti baru ditinggalka kitai. Semua kitai bela bisi peneleba ba taun nya, peneleba ti manis, manah sereta ngagaka ati, tentu bisi mega kitai ngasaika peneleba ti enda manah, ngemedis tauka negenyinuka ati. Ke manah nya ambi nyadi buah kenang lalu ke jai nya ambi nyadi teladan dikena nyeliah ke pekara ti bansa nya nyadi baru jemah ila.

Kitai nemu kitai udah nambahka umur diri setaun agi. Enti umur kitai nya dua puluh taun reti nya kitai udah bisi dua puluh kali nyambut taun baru baka ti deka disambut kitai malam tu lagi. Enti umur kitai nya lima puluh taun, lima pulih kali ga, lalu enti nyau manggai lapan puluh taun, nyau lapan puluh kali ga kitai nyambut taun baru baka ti malam tu lagi. Uji perundingka peringkat umur nya tadi, enti kitai baru dua puluh taun reti nya kitai benung bujang tauka dara, tiga puluh lima kitai dikumbai benung orang, lalu ke nyau manggai lima puluh, lapan puluh enggau ke lebih nya kitai dikumbai nyau tuai. Nya alai besampika diri gerai nyamai, gayu guru sereta panjai umur mih lebih agi lebuh nyambut taun baru baka tu.

Kitai mega ngajihka diri, diri sebala diri sekaban enggau bala pangan kitai sama gayu guru gerai nyamai lebuh nyambut taun baru baka tu. Ba orang ti kur agi, iya lalu ngajihka taun baru tu tau mai pengelantang penyenaang, pengaya pengeraja. Ngajihka taun tu bulih mudah bulih gerah. Bulih padi, bulih puli, bulih duit bulih ringgit. Orang ke bedagang besampika diri maya tu, menang bebeli. Orang ke bumai besampika diri bulih padi bulih puli. Sida ke benung besekula besampika diri pandai teulihka degree. Nya mih sampi kitai, nya meh ke ditelah kitai. Kitai ngarapka diri sama teulihka pengeran ati nya, azam, tauka resolution kenu ku orang.

Malam tu lagi tentu kitai udah besedia ngena chara kitai empu nyambut taun baru 2012. Selalu iya kitai nyambut taun baru, makai beserumpu, makai berama, tauka makai begulai, barbikuq, ngirup segulai enggau diri sebilik enggau diri sekaban. Lebuh jam udah mangkung pukul dua belas tengah malam kitai bela nantai gelas, nyeradakka ai bisa nyambut taun baru. Kekadang suah iya disempulang degum senapang ditimbak ke langit, lalu suah mega nyau maya ke diatu diserumba enggau letup perechun, ke nyau bekedegum kiba kanan.

Bisi mega orang, nyambut taun baru ke bansa tu ngena chara makai enggau diri sebilik ba restoran, pajak makai enggau palan ti bisi nyediaka pemakai baka nya. Suah mega orang nyambut taun baru baka tu, ngirup enggau belagu ba palan pemerindang ati, lalu nyeradakka ai bisi lebuh jam mangkung tengah malam.
Bisi mega ke kala didinga sekeda orang terejunka ai mandi tengah malam ke tanda nyambut taun baru. Mayuh mih chara mensia nyambut taun baru, ernda ulih kenang kitai magang nya. Kekadang perintah, sereta NGO mega kala ngatur maya nyambut taun baru, ngena chara begelumu ba tengah padang ba nengeri ke bebesai. Suah mega pengawa nya disempulang enggau konsert, tauka penyanyi tebilang diasuh belagu dia. Lebuh jam mangkung pukul dua belas tengah malam, orang bela beterauh nyambut taun baru baka taun 2012 malam tu lagi. Kitai suah meda pengerami ti bansa tu dipandangka ba televisyen. Kekadang kitai sama enggau mih beterauh nitihka itung orang dia.

Taun 2012 tu kitai munyi ku randau ari pun tadi, sama ngajihka utai ke badas-badas nyadi ba kitai.
Baka kitai ke bumai, bekebun, besawit, kitai ngarapka rega barang tauka komoditi ti diasilka kitai tu agi nempusung, agi semampai tinggi baka taun 2011.Ke manah agi nya kitai ngarapka iya tau tinggi agi ari taun bukai ke udah-udah.

Ba orang ti gawa perintah dalam taun2012 tu, sida deka ngasaika penguntung teulihka struktur gaji baru, ti endang jauh manah sereta tinggi agi ari ke udah diasaika sida. Sida tentu dalam struktur gaji baru nya deka teulihka mayuh pemanah bukai baka elaun, peluang niki pangkat enggai ti bukai, ti endang nyadi juluk ati sida.
Kitai bukai, taun 2012 tu deka mai mayuh penguntung. Orang ke ngembuan penatai pemisi ke diri sebilik ti kurang ari RM 3000.00 diberi perintah RM500.00. Orang ke bisi anak sekula ba primari tauka ba sekondari deka diberi RM100.00, ke siku anak ke besekula, lalu sida ke belajar ba palan pelajar tinggi mega deka diberi baucer RM 200.00. Mayuh bendar pemanah ti deka diasaika kitai dalam taun 2012 tu.

Perintah dalam 2012 tu nyangka deka ngatur pengawa bepilih, ni maya nya, kitai bela nadai nemu diatu. Orang ke megai perintah aja nemu laban sida ke netapka hari bulan. Nya alai enti pengawa bepilih nya diatur taun 2012 tu tentu mega, perintah ke baru menang bepilh deka ngatur mayuh agi pemanah ke menua enggau bansa kitai, ngasuh menua kitai senang lantang.

SELAMAT NYAMBUT TAUN BARU, 2012.

JERPEN : CELAP ANGAT JEMAN MODEN

 Panchar matapanas benung ensilup puchuk engkabang. Nya ke ngasuh senawah nyau enda bisa semina ke chukup ngenyilauka mata sida ti agi bekedunga duduk di pantar. Nambahka nya ribut agi mega betiup ari ujung tanju, nya ke ngenyelapka tubuh bala sida ti baru datai gawa ari tanah ari babas.

Jam SEIKO digital ba dinding bilik sida Andit baru pukul lima lemai. Jauh tunga setak ili bisi didinga siti dua injin api udah disetat. Reti nya, pama karan elektrik udah bisi, rumah panjai richah baru. HI-FI chap Aiwa sida Olivia Suma ba puting setak ili udah ulih dipasang. Ari nya meh gemung sada nyawa rabau Peter John Jaban ari raban Anak Apai Sali mai lagu “BEBINI” nyau tetaing nerejah ruai. Jauh di setak ulu lain mimit. Sida ke belaya berekak, seretai enda senutuk baka ti bedanji, didinga ari ruai enda bebadu nyau merentum-merentum munyi bepalu betuku. Bisi ke bebukut, bekarate. Bisi mega ke bepantap. Bisi terejun ari bilun. Bisi mega ke betimbak enda ngengetu. Sesekejap dinga tetaing ga nyawa Shah Rukh Khan meradak ngangau ke Kajol belalai sebelah madang bungai. Jackie Chan baka ke enda nemu parai, merejuk kin-kia mantaika bungai kuntau, nya ke suah ditunda sida Chending, sida Akun sida Unjay ba ruai, ba tanju enggau ba tengah laman. Sesekali bisi didinga siren polis ngagai sida ke jai.

“Amat haya jamah sida ke nembiak bepeda ke tibi enda pia ku di wai? Iya aku, sekumbang sa Anggat udah meli seteho nya, tak jehita jelu nya aja ke ka peda aku. Jehita bukai tau enda,” ku ini Empalang bejaku madahka diri rindu meda Astro channel 51 Animal Planet lebuh ini Ajik mansa ruai sida iya.
“Nya mih wai, engkami sa uchu, pama jerita katun nya, enda nginsit meh sida ari tibi, nama agi enti katun Derimun ku sida nya.” Sangking ini Akui ke baru pulai muat gari ari tanju.

Tak baru sesingkang kaki ini Akui udah nyingkang tama ke ruai dinga tak meretum utai ba pala setak, mua ari ulu pendai sida iya. “aih deh indai.., nama meh kita bangat deka amat  masang jerita bangat ngenyai nya deh jelu.” Ko ini Akui mutap kediri empu. Laban ka pedis ati tekenyit ninga utai ka meretum inggar nya tadi nyau asai ka deka luput deh tudah tuai laban ke bisi bebuya sakit lemi tungkul atau. Dinga tak meretum baru ga munyi atap sing, munyi ka deka tebabak.

Dinga tak mutap baru ga ini Akui. “Nadai penyadi meh aku enti bakatu uchu, uchu...Nadai meh  kita nemu pemarai aku pegila lusa enti majak bakatu. Kelia cukup nyamai amai pengidup nadai ninga utai manyuh penumbuh. Kelalu ga mensia ke maya ari tok. Tak bangat bepekit ka pemisi diri” Ninga kutap ini iya tak enggai ngetu dia ati Akui pan berasai sinu lalu nyelow volume speaker tibi jenama Panasonic sida iya ka baru dibeli dua minggu nyin kemari.

“Nama utai ke meretum munyi guntur, nyau bekesetap munyi api ka makai para ngai ngetu-ngetu nya deh ini. Ukai nya jerita astro pelaba aku.” Ko Akui nanya ini iya ka agi kudi, agi ransi pedis ati laban ka enda tentu pengerai ninga utai nyau baka degum ngeyit, nyau baka ke mungkal deka munoh iya tadi. Enda lama udah ka merentum baru gak atap sing munyi ka dipalu orang.

“Dini meh aku tok nemu deh uchu, bala sida Anggat ka udu amat masang jerita ka enda entu menuku. Legi kitai ngerara, kumbai nganuk ga. Kitai disebut sida dadak, tambap, jai untak. Nadai dipeda bemua mata kitai dilaban sida Anggat, aku tok dilaban sida enti aku ngelara. Nemu nuan uchu. Enda sida iya belaba ka diri empu enda mereti, mimit pan nadai bebasa ka kitai ke udah tuai. Uji abas ke tanju baru neh alai uchu. Enti ukai jerita ka dipasang sida Anggat, nyangka deka biau balai ari tuk. Bisi ga dipeda aku remang nyau petang tadi, maya aku lelenggak nengkadah ka langit mikai pulai muat gari di tanju tadi”.

“Auk meh ini, legi meh aku pansut” ko saut tudah akui. Udah ngetu bejaku. Akui pan lalu ngangkat ka tubuh diri iya ke sigi umbas iya pengangam. Bejalai belubah ngelawa mua pintu bilik sida iya laban ke deka pansut ke tanju. Datai Akui ba mua tanju. Tak malik meh Akui ka setak, mua ari ulu rumah sida peda tak bedilar deh api pansut ari atap zing ka udah tebabak. Asap nyau begelembung celum ngelintum baka aruk umai menalan.
“ Endai deh indai. Parai kitai serumah enti bakatuk.” Pia ko Akui bejaku tekenyit. Sereta meda utai bangat enda disadang nyadi lemai nya. Peda deh api nyau makin balat nyadi baka ke disepu ngena peputan laban dirumba ngau ribut ka ngalun bebilun ari babas. Akui endang enda belebas lalu manjong kekaung baka uduk nyalak jelu babi ba babas repa nadai dipeda.

Tak belanda Akui agai ruai tuai rumah ka sepiak bilik sida iya. Akui pan lalu nyengkau tawak rayah pengesah penusah. Lalu dipangkong Akui nerantang tujuh kali enda disaup panjung madah ka rumah angus. “Rumah angus...rumah angus...rumah angus..ruamah angus...lari...lari..lari...”ku panjung Akui.

Pengudah Akui ngelengka ke tawak, peda bala mensia ba rumah panjai Titok pan lalu pansut ensugau begau sebelah ruai baka ke lari digagai antu bangkai. Ni ke betekalat, beketerauh ngangau ka bala anak, bala uchu, bala ipar, bala ikak, bala madi, bala aki, bala ini, bala kaban apai, kaban indai ka benung jenuh meda astro jerita derimun, jerita katun, meda jerita Jacke Chan enggau iya ke benung ninga lagu “Betaban Lari” ke dibai Natala ngau Erry Lang.

Adai temu leka agik terauh, leka panjung bala mensia. Ni ka nyau bekerudus ngangkut barang iya ka ulih japai, ulih tawis, dipansa, dirimbas jari lalu ditaban lari. Api pan majak nyadi enggai padam-padam diimbur ai ngena baldi. Nadai ulih dirarak bala sida aki manang agik. Lebu ngapa bala aki manang ka ngentung zing nyangka api tak ulih rarak, ngetu nyerarai agai bilik bukai. Dini nya ulih rarak jarak, bai kesuh ke ribut endang sigi umbas iya pemalat lapa deh, dalam sekelip mata aja peda rumah sida Akui ba Nanga Titok udah ambis lengis diempa api.

Kira nyau salah kelala meh jam manya nya. Baru api ulih dipadam ngau lenak. Tuai rumah sida di Nanga Titok meri terima kasih ngagai Tuhan. Taja semua reta tengkira abis angus tang meh Puji Tuhan laban sida serumah siku nadai meh bebadi lesi nyengai ari. Laban ka agi ngeleda reraya bedau tinduk magang. Tambah mega laban pengelengkas tudah Akui ka dulu nemu rumah agus lalu jampat mangkung tawak. Enti enda pia, sigi bisi dipelaba bala sida serumah ke benung jenuh meda asrto nya mati entajar enda sempat lari dempa api.
Ini Akui, endang ari tadi ngai badu kutap-kutap muchau ngutuk bala sida nembiak ke bepasang ke jerita astro ngai enda degum-degum ngapus ke rumah. Sampai penusah nyadi pan nyau deka enda temu. Anggat sigi tebal asai pending ningga jaku sindir ini Akui, sigi enda kekebut iya malu ke diri empu. Tambah mega tusah ati serta sinu ka bala anak serta bini ka benung dedugau nunga iya diak. Siti pan barang sida sebilik nadai ulih ditaban lari laban ka nyai kirat mai bala anak lari. Sigi jai nasib ga tudah Anggat sebilik, enda ulih tebai ke barang bukai laban bilik sida Anggat bangat kelalu dampih enggau bilik aki manang iya ke terubah diempa api maya nya.

Semua sida serumah pedis ati magang, singn ati sida deka ningkau ka aki manang agai tugung api maya api agi benung nyadi tadi. Tang meh ulih ditabar enggau pengasih ke pangan diri. Ati sida endang balat amat ringgat serta pedis ngenang reta tengkira ka abis lengis dempa api. “Aki manang meh tak ngasuh rumah kitai tuk angus. Nadai guna-guna manang ula nyak” ku Empaling bejaku pedis ati”

Sida serumah nemu magang aki manang sigi orang ka agu serta ka bebuya tuyu. Udu nunu rangas kayu enggau kerubung telu ba nisi kaki rumah iya. Laban enda nakal digigit bala kerengit ngelama tuk. “Minta ampun agai kitai serumah. Aku ukai ka nunu rumah kitai. Deka muru kerengit. Ko jaku. Enda nyangka bara api terebai puput ke ribut nyau makai puting dinding kajang ruai aku. Dientung aku sing ngicha ke api enda ngerampit agai bilik bukai enda ga alah laban ribut endang benung nyadi tadi.” pia ko Aki manang bejaku ngaku penyalah diri. Leka mata nyau nyau begelemang dikelingi ai mata minta kasih ke bala mayuh. Idung nyau sirut-sirut narit insak ke deka melurut dikendas ngena gari baju ke nyau bekechibai carik bai ngelarak api. Ngicha sida serumah ka ninga jaku iya enda tentu balat begedi ke iya.

Sekeda sida Akui serumah pan berasai ngesal ati laban ke terunda bepeda ka jerita tibi serta bepekit nebah speaker ninga lagu “Nesal Dudi Nadai Reti” ke dibai Jenorino Jeraki. Enti enda ketegal terunda empelenga meda tibi, ulih ga besaup ngau aki manang ngerara api serta betaban ke sekeda reta tengkira ke berega. Diatu nama meh penyadi. Nyau bekesai bulu gundai, nadai sehelai sepinggai. Ari pan nyau majak petang tegayam, bala sida serumah pengudah api padam endang dianti-anti ari ke deka tawas laban kasih ke bala anak, bala uchu sida nyau tinduk malai tanah laban semua tilam nyau nyadi abu diempa api.

Naka meh pengesal ati bala sida Akui serumah pengudah ari penusah ti nuntong sida nyak. Ka belaya utai udah nya. Mina ai mata aja meh ke labuh nanya sinu ngenang reta tengkira ke udah ulih bepuluh taun. Tak legis lis lesap nadai dipeda baka ke dilalai ke antu kamba. Sida Akui serumah cukup beterima kasih ngagai bala raban Iban ke sanggup nulong pia ngagai YB pengari ba ADUN N.007 E ti sanggup datai ngesah penusah sida Akui serumah ba Nanga Titok.