DUN Sarawak udah nganjung surat ngagai SPR

Kunsil Negeri (DUN) Sarawak udah nganjung surat ngagai Suruhanjaya Pengawa Bepilih Besai (SPR) pagi kemari madahka sentang kerusi N.51 Balingian deka puang berindik ari surat ke diterima sida ari surat ke diterima ari Pehin Sri Taib kena Hari Tiga tu tadi madahka iya ninggalka penuduk DUN Balingian.

Speaker iya, Datuk Mohammad Asfia Awang Nassar lebuh ke ngatur Aum Pengarang Berita ba Opis DUN kemari mega ngenukuka pekara nya ti madahka sida amat udah nerima surat ari Pehin Sri Taib lalu udah nganjung surat ngagai SPR.

"Udah tu tepulai ngagai SPR endur berunding netapka haribulan kemaya Pengawa Bepilih Besai Mit ulih diatur ungkup kerusi DUN Balingian," ku iya.

Asfia madah, enti pengawa bepilih besai mit tu diatur ila, tepulai meh ngagai Kepala Menteri baru iya nya Tan Sri Datuk Amar Adenan Satem endur milih sapa pengari ke patut bediri ngarika penuduk Barisan Nasional (BN).

Pemutus pengari rayat ADUN Balingian, Pehin Sri Abdul Taib Mahmud ninggalka penuduk nya laban ti deka ngemaduka diri nyadi Kepala Menteri berengkah sehari tu (28 Febuari) .

Rambau Pengawa Bepilih Besai Negeri ke-10 suba, Pehin Sri Taib ti ngarika BN ngena tiket Parti Pesaka Bumiputera Bersatu (PBB) menang majoriti 5,726 iti undi ngalahka chalon Parti Keadilan Rayat (PKR) Suriati Abdullah enggau chalon Bibas, Datuk Salleh Jafaruddin.

Sama bisi datai iya nya Sapit Speaker DUN Sarawak Datuk Roland Sagah Wee Inn.

Projek nanam sawit enggau getah patut digaga ba tanah puang

Kaban Kunsil Negeri (ADUN) Tamin, Datuk Joseph Mauh Ikeh minta perintah ngemendarka peminta nguna tanah puang ba Kampung Sibintek endur ngemujurka pengawa betanam betupi.

Iya madah, peminta ke deka nguna tanah puang ba Kampung Sibintek dipeda besai retu ngagai rayat ba kampung nya laban ulih endur bejalaika projek nanam sawit enggau getah.

"Aku ngarapka perintah ulih ngemendarka peminta nguna tanah puang tu awakka orang kampung ulih betanamka sawit enggau getah, udah nya ulih nulung ngangkatka pengidup rayat ke diau ba Kampung Sibintek,"ku iya.

Iya madah munyi nya rambau Pengerami Bejadi Projek Barisan Nasional (BN) ke diatur ba Kampung Sibintek, ditu kena Hari Dua tu tadi.

Pengerami nya nyengkaum bejadi Projek Balai Raya ke beungkus RM145,000 enggau Projek Jematan Kayu ke beungkus RM100,000. lalu dipenyadi Penulung Menteri Betanam Betupi, Datuk Mong Dagang.

Joseph Mauh ngarapka semua penyukung enggau kaban Parti Rayat Bersatu (PRS) ari menua Sibintek, Pasai, Sekuau, Tamin enggau Stapang terus meri sukung ke penuh ngagai BN.

"Aku ngarapka semua rayat ba menua tu nadai agi bebagi ati nyukung chalon BN ba N52 Tamin ke deka dipilih ketuai parti maya Pengawa Bepilih Besai Negeri ke deka datai," ku iya.

Ba pengerami nya, Joseph Mauh Ikeh bisi nyadaka pemeri geran Projek Mit Menua Pesisir (MRP) RM10,000 ngagai Komiti Pemansang enggau Pengelikun Kampung (JKKK) Kampug Sibintek sereta geran MRP RM25,000 ungkup JKKK Rumah Panjang Anggom.

Kelimpah ari nya, rambau pengerami nya mega Chairman Pengatur Pengerami, Muda Prinching bisi nyuaka pom pengundi baru enggau pom nyadi kaban parti PRS ngagai Datuk Mong Dagang.

Bela bisi datai iya nya Pemancha Robert Nanta, Penghulu Michael Jelani, Kaban Opis Kunsil Menua Pesisir Sibu (MDLBS), Kaunselor Dr Ali Puji sereta bala ke bukai.

Adenan angkat sumpah nyadi Kepala Menteri 28 Feb

Tan Sri Datuk Amar Adenan Satem

Menteri ba Opis Kepala Menteri (Pekara Khas) Tan Sri Datuk Amar Adenan Satem deka ngangkat sumpah ba mua Tuai Pemegai Menua (TYT) Negeri Sarawak Tun Datuk Patinggi Abang Haji Muhammad Salahuddin pagila (Hari Lima).

Berindik ari nya, sebengkah pengawa belatih ngatur pengawa angkat sumpah nyadi Kepala Menteri ke baru udah digaga kemari ba Astana Negeri.

Tuju ke ngatur latih nya ngambika pejalai pengawa angkat sumpah ke amat-amat bejalai enggau mujur kena pagila.

Pengawa rasmi angkat sumpah nyadi kepala menteri pagila diperambuka berengkah pukul 10.00 pagi. Pengawa beradat nya, dipelabaka deka tembu dalam timpuh setengah jam.

Adenan deka nyadi kepala menteri Sarawak ti kelima berengkah 28 Febuari tu nangkan empat iku kepala menteri ke sebedau tu iya nya Tan Sri Datuk Amar Stephen Kalong Ningkan (1963-1966) , Dato' Penghulu Tawi Sli (1966-1970) , Tun Abdul Rahman bin Ya'kub (1970-1981), Pehin Sri Abdul Taib Mahmud (1981-2014).
 
Berebak enggau nya, kemari mega bisi diatur pengawa latih ngintu pengawa angkat sumpah nyadi TYT ba Dewan Undangan Negeri Baru dikena nyediaka diri ba atur pengawa beradat kena pagi Hari Enam tu ila.

Kena Hari Enam tu mega, Taib diperambuka deka ngangkat sumpah nyadi TYT Negeri Sarawak ketujuh berengkah 1 March tu nangkan enam TYT ke sebedau tu iya nya Tun Datuk Abang Haji Openg bin Abang Sapiee (1963-1969), Tun Datuk Patinggi Tuanku Haji Bujang bin Tuanku Osman (1969-1977), Tun Datuk Patinggi Abang Haji Muhammad Salahuddin bin Abang Barieng (1977-1981), Tun Abdul Rahman bin Ya'kub (1981-1985), Tuan Yang Terutama Tun Datuk Patinggi (Dr.) Haji Ahmad Zaidi Adruce bin Muhammed Noor (1985-2000), Tun Datuk Patinggi Abang Haji Muhammad Salahuddin bin Abang Barieng (2000-2014).

Mukah deka bisi sekula teknikal

Pehin Sri Haji Abdul Taib Mahmud bisi ngaga pejalai kepenudi nyadi kepala menteri sereta nyadi Kaban Kunsil Negeri (ADUN) N51Balingian kitu kemari lalu ngulu sebengkah pengerami ke diatur ditu.
Engkeman enggau nama pengerami nya ke dikumbai meri terima kasih diatur dikena meri tanda basa ngagai Taib laban ke udah mujur nyadi ketuai megai negeri enggau Parti Pesaka Bumiputera Bersatu (PBB) sereta nyadi ADUN Balingian.

Taib ti deka pinchin nyadi kepala menteri kena Hari Lima tu (28 Februari) dipelabaka deka dipadu nyadi Tuai Pemegai Menua (TYT) ke baru ba hari ke sebaka.

“Tu meh pengawa ke penudi aku datai kitu nyadi kepala menteri. Taja baka nya, Mukah enda ulih diseraraka ari aku laban penatai asal aku endang ari menua Mukah," ku iya bejaku ba pengerami ke digulu lebih 2,000 iku temuai.

Iya nandu jaku bekaul enggau pemesai guna nyaga penyerakup kaul entara raban bansa di negeri tu ngambika pengawa politik muntang disambung.

"Terus tanka penyerakup entara raban bansa ke bisi diatu lalu tumpuka pengawa pelajar bala anak nyengkaum nganjung anak belajar sampai ngagai universiti, ” ku iya.

Iya madah, Sarawak diatu ulih ngelatih mayuh pekereja landik laban udah ngembuan enam buah universiti lalu ngengkahka menua tu nyadi negeri “second to none”.

Iya madah, pengawa nya deka disambung dikena nambahka pemansang ke udah dijapai diatu enggau iya ke ditempa perintah orang putih kelia.

“Nengah penau ke bisi dikembuan diatu, Sarawak deka nyadi menua pemadu kaya ba Malaysia,” ku iya seraya diri ukai lawa-lawa bejaku munyi nya.

Iya besai pengandal ati deka meda menua Sarawak nyadi lebih maju enti iya udah badu ila.
Lebuh ngenang pemansang ditu, Taib begenera menua Mukah deka nyadi lebih maju dalam timpuh entara enam ngagai tujuh taun ke deka datai.

Nya alai, iya madahka siti ari palan empat buah sekula teknikal ke baru deka digaga ba Sarawak iya nya ba Mukah kelimpah sebuah deka digaga ba Santubong.

Kaban Parlimen (MP) Mukah Dato Sri Dr Muhammad Leo Toyad, Residen Menua Mukah Haji Mohd Supaih Hamdan enggau Temenggong Hendi Suhai ti bela bisi bejaku meri terima kasih ngagai Taib berindik ari pemujur pengawa ke digaga iya ngagai negeri tu sekumbang ke nyadi kepala meneteri pengelama 33 taun.
Dr Leo ti ngarika PBB Balingian, Mohd Supaih (ngarika pekereja opis perintah menua Mukah), pemancha Mohamad Jali Kawi (ngarika bansa Melanau), Penghulu Ijok (ngarika bansa Iban) enggau penghulu Ting Kee Kuan (ngarika bansa Cina) bela bisi nyuaka tepa ngagai Taib.

Sama bisi datai iya nya bini kepala menteri Puan Sri Ragad Kurdi Taib, Menteri Pengintu Pengelantang Orang Indu enggau Pemansang Ruang Bilik Datuk Hajah Fatimah Andullah, , MP Igan Datuk Haji Abdul Wahab Haji Dolah, ADUN Semop enggau kepala seketeri politik kepala menteri Abdullah Saidol, ADUN Jemoreng Abu Seman Jahwie, ADUN Daro Dr Murni Suhaili, enggau bala tuai opis perintah.

Siti lot kedai gari ba Terminal Sentral angus

Siti lot kedai gari ba Terminal Sentral Kuching angus ba sebengkah penusah ke nyadi pukul 6.20 pagi tadi.

Penusah nyadi nuntung siti lot kedai ke bepalan ba ringkat satu pasar besai nya.

Nitihka penerang Kepala Balai Bomba Zon Kuching, Tiong Ling Hii, bala sida bisi nerima kanggau urung pukul 6.20 pagi ari orang periman ke betelefon ngagai balai.

Operasi nya dipejalaika lapan iku staf ari Balai Bomba enggau Penyelamat Batu Lintang betuaika PBKII Awang Saiful (Scania) sereta dibantu BBP Kuching enggau semilan iku kaban betuaika PBKII Abdullah sereta unit Rim bisi tiga iku.

Tang taja pia, sida enda sempat ngerara apu laban api udah mujur dirara ngena sistem pengerara api (Sprinkler) pasar besai nya.

Tiong madah, raban bomba semina ngemataka asap pansut ari palan ke angus nya.

Nadai orang bebadi diripotka nyadi, lalu kebuah penusah angus nyadi agi benung dipansik.

Perumpak mujur dirakam ngena kamera lalai

Siku ama rumah peranak menua Indonesia besabung nyawa maya ke diamangka perumpak ti bekarung mua ngena pisau sayur ba rekung ba sebengkah penusah ke nyadi ba Taman Desa Indah, Permyjaya, di Miri.

Ba penusah ke nyadi pukul 3.20 lemai nya, mansa ke benama Ayulida Jalani,39, semina tekenyit meda saspek udah ba dapur megai pisau sayur enda ngasuh iya ragak.

Nitihka penerang, saspek dipelabala niki dinding batu ba mua rumah sebedau ke tama nengah pintu dapur ti nadai bekunchi.

Lebuh nusika cherita nya, Ayulida madah, saspek ngelawa iya lalu ngamangka pisau ngagai rekung iya baka ke deka nyerang, ulah saspek nya balat ngesalka ati iya.

“Aku dipinta muka sumpin ke dikena aku sebedau saspek ngambi kantung sandik ke dipenggi pengaji aku ti dipanggai atas meja bilik besai.

“Maya nya mega, aku dikenakutka saspek iya madah deka munuh aku nyema enda nitihka jaku,' ku iya lebuh dirandau ba palan penusah nyadi.

Ayulida madah, siku agi ama benung dalam bilik bukai, udah nya dua iku anak indu pengaji iya ke beumur dua enggau 26 taun benung tindu dalam bilik diri empu.

“Maya nya saspek nguji ngiga barang berega dalam rumah, aku sempat tama ke bilik tinduk madahka pengaji sentang pekara nya.

“Saspek udah nya ngelarika diri pengudah ninga randau kami," ku iya.

Berindik ari penusah nya, iya madah pengaji iya rugi lebih kurang RM500 nyengkaum duit Brunei.

Nangkan ke nya, pengari polis ngamatka sida bisi nerima ripot bekaul enggau kes nya.

Tuai Raban Bansa China Menua Kuching udah dipilih

Bisi 10 iku Tuai Raban Bansa China udah dipaduka Opis Residen Menua Kuching nyadi ketuai raban bansa China ke baru ungkup pelilih menua Kuching berengkah ari kemari (Hari Dua) ba sebengkah pengawa ke diatur ba Opis Baitulmakur ditu.

Entara sida ke udah dipilih tu iya nya Pemancha Ko Wai Neng megai menua Kuching, Pemancha Lo Sin Li (Lundu), Penghulu Lim Eng Huat (Siburan), Penghulu Ten Shin Fong (Batu Kawa), Penghulu Pui Sing Ming (Tabuan Jaya), Penghulu Voon Min Sen (Siburan), Penghulu Tsai Khiun Khian (Sungai Tengah, Matang), Penghulu Thian Sing Hwa (Batu 3-6.5, Jalai Kuching), Penghulu Pui Wen Mei (Jalai Stampin/Penrisen/Stakan/Batu Kitang/ Datuk Stephen Yong) enggau Kapitan Bong Sai Jin @ Sai Ing (Teng Bukap, Pengkalan Kuud, Pengkalan Ampat, Padawan).

Pengawa nyuaka surat rasmi nyadi ketuai tu disuaka Pemangku Residen Menua Kuching lalu dikemataka Menteri Wang Kedua enggau Menteri Perintah Pelilih Menua enggau Pemansang Raban Bansa Dato Sri Wong Sooh Koh.

Rambau nyuaka surat tanggung pengawa nya, Sapit Residen Menua Kuching, Zamhari Haji Said madah ari penyampau sida nya, tujuh iku endang ketuai lama ke disambung baru udah nya tiga iku ke bukai orang baru ke dipilih berengkah taun tu.

Zamhari madah udah tu ila, sida deka ngatur sebengkah kus ungkup semua tuai raban bansa ke udah dipilih ngambika sida nemu agi batang pengawa ke patut dikereja kelebih agi bekaul enggau chara ngemataka rayat ba kandang menua Kuching.

Berebak enggau nya, Zamhari madah pengawa bala tuai raban bansa tu deka diperati sepemanjai maya sereta deka diasuh nyapai Ikas Pemanah Pengawa (KPI) ke udah diletak.

Naka ke diatu, penyampau tuai raban bansa ungkup menua Kuching aja bisi 350 iku, ku Zamhari.
Sama bisi datai, Temenggong Lu Kim Yong.

Sapa-sapa bepeluang nyadi presiden SUPP

"Terima kasih ngagai Sapit Presiden parti iya nya Dato Sri Richard Riot Jaem laban ke bisi pengirau ati deka nyelamatka parti enggau chara betanding nyadi presiden," ku Chairman Parti Sa'ati Rayat Sarawak (SUPP) Pampang Sibu Dato Sri Wong Soon Koh.

Taja pia, Soon Koh madah, udah laun iya ngaga pemutus ke bansa nya laban sebedau tu Opis Pengerijista Gerempung (ROS) udah meri timpuh ke chukup lama iya nya dua taun endur mutarka penanggul ke bisi nyadi dalam parti.

"Batang pekara ke patut nyadi isu iya nya dua bengkah pampang SUPP ke udah dikinsil ROS iya nya Piasau enggau Bekenu lalu ukai laya ke nyadi entara aku enggau Chin (Tan Sri Peter Chin Fah Kui).

"Aku belaya enggau Chin ukai ketegal berebut nyadi ketuai tang ketegal pekara ke besibil nyadi maya pengawa bepilih tikas pampang lalu ngujungka digaga aum pengari ba taun 2011.

"Diatu semina nganti aja pemutus ke penudi ROS laban parti SUPP enda ulih agi diselamat. Udah suah aku madah ngagai Chin, pia mega Menteri Besai (Dato Sri Najib) enggau Kepala Menteri (Pehin Sri Taib) ngemansutka pekara ke sebaka ngasuh mutarka penanggul parti. Tang alu nadai pengujung," ku iya lebuh nimbal jaku Riot ke bisi dipansutka ba surat kabar ti madahka diri besedia nyadi presiden nyema nadai jalai bukai dikena nyelamatka parti SUPP.

Iya madah munyi nya pengudah tembu ngemataka Pengawa Nyuaka Surat Rasmi Nyadi Ketuai Raban Bansa China ke diatur ba opis iya di Baitulmakmur di Kuching.

Chukup manah meh penemu iya (Riot) ti deka nyadi ketuai megai parti dikena nyelamatka parti ari kena kinsil.

Tang taja pia, penuduk nyadi presiden parti ulih dipekitka sapa-sapa aja laban SUPP dipasuk mayuh bengkah bansa lalu bejalaika konsep demokrasi.

Nya alai, sapa-sapa ke deka tauka bisi ati deka mangku pengawa nyadi presiden, pengawa nya endang nadai salah, ku Soon Koh.

BR1M muai penyuntuk enda lama

Bala penerima duit Bantu Rayat 1Malaysia (BR1M) dilalu ngambika nguna duit nya enggau manah-manah awakka meri penguntung ngagai sida.

Menteri Sumber Mensia, Dato Seri Richard Riot Jaem madah, tuju pengawa meri bantu nya dikena ngelempungka penyuntuk rayat. “Nya alai, kena duit nya enggau manah-manah lalu beri barang ke diguna diri sebilik," ku iya.

Iya madah munyi nya rambau Pengawa Nyuaka Bantu Rayat 1Malaysia (BR1M) 3.0 ungkup sitak Parlimen Serian ke diatur ba Dewan Masyarakat di Serian.

Iya madah bantu nya nandaka penyinu perintah ngagai rayat. Riot mega madah, bisi sekeda orang ngumbai pengawa meri bantu nya dikena ngambiska duit rayat.

“Endang amat nya duit rayat tang enti ketuai nadai poenyinu ati tentu rayat nadai ulih makai duit nya," ku iya. Nya alai, iya madah rayat patut meri terima kasih ngagai perintah Barisan Nasional (BN) berindik ari pekara nya.

Richard madah, taja pan penyampau ke diterima nya enda mayuh tang kebendar iya utai nya berega amat. Iya madah, ngagai sida ke begaji mit bantu ke bansa nya ulih ngelempungka penyuntuk sida.

Ku iya, perintah udah nyediaka agih belanja kira RM3.339 juta ungkup penerima BR1M ba sitak parlimen Serian. Nangkan ke nya, ku iya bisi 6,309 ruang bilik ke layak udah nerima bantu nya nengah akaun bank enggau diberi ngena baucher.

"Tu nyengkaum penerima ari sitak Kunsil Negeri Negeri (DUN) Kedup enggau Tebedu,” ku iya. Iya madah, nyadung bantu nya disuaka pengari rayat diri empu ba maya hari bulan ke dipadah ila.

Richard ngelalau rayat Serian terus nyukung perintah BN kelebih agi ba maya pengawa bepilih besai negeri ke deka datai.

Kebuah pia, ku iya laban perintah BN udah mayuh meri bantu ngagai rayat sereta ngelempungka penyuntuk sida. Nya alai, ku iya dikena manlas pemanah nya, rayat patut terus meri sukung penuh ngagai perintah.

Bisi 840 penerima ari 84 buah kampung ba sitak parlimen Serian datai ngambi baucher diri empu. Penyampau nya enda nyengkaum semua penerima laban deka diberi berenggat-renggat nyentuk ngagai bulan March tu ila.

Sama bisi datai iya nya Menteri Pemansang Infrastruktur enggau Penyambung, Dato Sri Michael Manyin Jawong, ADUN Kedup, Martin Ben, Pemesai Pelilih Menua Serian, Sinde Muling enggau Temenggung Robert Sulis Ridu.

TAIB BERASAI PUAS

Rayat udah tegap, politik likun sereta enda kelalu ekstrim

Pehin Sri Haji Abdul Taib Mahmud madahka diri berasai puas sebedau ke nyurutka diri mangku pengawa nyadi Kepala Menteri Sarawak pengudah meda pengidup rayat majak tegap.

Pengudah semak 33 taun megai negeri tu iya meda rayat Sarawak majak serius ba pengawa diri empu ngidupka diri," ku iya lebuh Aum Pengarang Berita ba Wisma Bapa Malaysia di Petra Jaya apin lama ke udah.

Pengelama iya ke udah nyadi Kepala Menteri, iya berasai puas meda gaya politik di Sarawak enda kelalu ekstrim.

“Tu mandangka pemintar rayat Sarawak laban nadai nyimpan ati dengki enggau pangan diri taja pan bebida pengarap enggau bansa.

"Sida dipeda beserakup enggau pangan diri, begulai mutarka sebarang penanggul lalu udah nya nyeliahka pekara bukai nyadi," ku iya.

Iya pechaya udah tu ila, rayat Sarawak deka terus bebendar ngulihka pemujur diri ari utai ke udah dijapai diatu.

Koridor Kuasa Ulih Dikena Baru Sarawak (SCORE) dikarapka ulih narit mayuh orang datai ngagai puak negeri tu.

“Asil iya, kandang menua peisisr deka dikemansang lalu dua tauka tiga buah bandar baru deka ayan baka menua Baram, Baleh enggau iya ke dampih entara menua Bahagian Keterubah enggau Kedua,” ku iya.

Gaya ke bansa tu deka ngujungka rayat majak idup ngachir belubah-lubah dalam timpuh 20 taun ke deka datai, ku iya.

Pehin Sri Taib madah, iya nadai agi masuk pekara politik berengkah 1 March 2014 laban maya udah chukup lalu ngelakka orang bukai bekuasa.

Iya pechaya tim ke ditinggalka iya ulih ngelatih orang ke biak-biak dalam pengawa politik ke bekualiti.

"Aku deka pinchin ujung bulan tu enggau ati ke chukup gaga lalu pechaya Sarawak deka dipegai enggau manah-manah sereta terus dikemansang enggau meruan," ku iya.

 Enti udah mangku pengawa nyadi Tuai Pemegai Menua Negeri tu ila iya nadai agi masuk champur pekara ngatur negeri Sarawak  laban “negeri tu semina begunaka siku bos iya nya Kepala Menteri.

Nyema iya ilap ngereja pengawa iya meh betanggungjawap, nyema iya ngereja pengawa enggau manah iya endang patut dipuji."

Bantu deka diberi ngagai mansa ampuh di Tabuan Hilir

Lebih 100 iku rayat ke nguan menua Tabuan Hilir ditu kena tuntung penusah ampuh ngenyit ke nyadi tumu pagi Hari Lima tu tadi.

Kaban Kunsil Negeri (ADUN) Demak Laut, Dr. Hazland Abang Hipni ke bisi datai ngabas mansa madah, ampuh ngenyit nya nyadi ketegal ujan bangat ke nyadi kenyau ari malam tadi.

"Ampuh ngenyit nya ngampuhka 22 buah rumah ba kandang menua Tabuan Hilir, kami deka nguji minta bantu ari orang ke patut nulung mansa," ku iya lebuh ke dirandau pemberita ditu kemari.

Sama bisi datai ngabas mansa ke dituntung penusah iya nya pemesai ari opis Residen Kuching, Opis Pengibtu Pengelantang Raban Bansa (JKM) Sarawak, Kunsil Pengelikun Menua (MKN).

Nitihka penerang siku orang ke dituntung penusah nya, iya nemu ai bepun tama ke rumah urung pukul 3.30 pagi sebedau ke berumban ngerak sida sebilik ngasuh nanggung jemari ngagai endur ke lebih selamat.

"Ai ke udah tama dalam bilik nyau ninggi patung," ku iya seraya madahka nadai penusah bukai nyadi.

Taja baka nya, iya madahka sekeda jemari ke enggau perengka ba rumah nya rusak ketegal penusah ampuh ngenyit.

AADK nguji nyapai menua beresi nadai dadah 2015

Mayuh bengkah pengawa enggau atur digaga dikena ngemunaska penyalah gian dadah di menua tu sebedau taun  2015.

Direktor Agensi Antidadah Menua (AADK) Sarawak, Wan Madihi Wan Salleh madah, entara pengawa ke dipejalai nya kenyau ari 1983 iya nya nyebut dadah munsuh lumur satu menua.

"Pengerami Hari Antidadah Menua (HADAK) ke disambut kena 19 Februari ninting taun dikena ngingatka hari Polis Dadah Menua dikena nyaup perintah ngadaka rayat ti beresi ari dadah sereta nyukung penuh Deklarasi ASEAN Beresi Nadai Dadah Taun 2015," ku iya dalam Jaku Penerang ke dipansutka Direktor  ADDK Sarawak beserimbai enggau HADAK.

Wan madah, pengerami HADAK ti mega nyadi tanggung pengawa AADK ke nyadi 'Lead Agency' munaska dadah dikena nulung perintah ngurang kes jenayah ke besangkut paut enggau sida ke gina dadah.

"Sebaka enggau penerang jaku ke dipansutka Menteri Besai beserimbai enggau Pengerami HADAK 19 Februari 2014, pengawa salah nguna dadah ulih nyadi dalam rumah diri empu.

"Nya alai, genap iku apai indau enggau diri sebili patut ngemeranka ulah pendiau ba anak diri empu ari kena tuntung penyalah gian dadah.

"Gaga awak begulai enggau bala anak, jaga manah ati sida lalu anang ngajar sida enggau utai ke enda menuku," ku iya.

Nya alai, Wan madah, mayuh bengkah aktiviti ke udah diperambu beserimbai enggau Hari Antidadah berambaika jaku AADK Ngemeratka Pengelantang Pengidup Rayat (AADK PRIHATIN RAKYAT SEJAHTERA) dikena ngajar mensia mayuh sentang penyai gila dadah lalu besaup ngelaban iya.

Entara aktiviti ke bisi digaga iya nya begelumu HADAK renggat Negeri Sarawak kena18 Mac 2014 ba ringkat 17 Wisma Persekutuan Simpang Tiga, Aum Pengawa Ngurangka Dadah, kimpin renggat sekula, IPT, Palan Endur Gawa, Rayat Mayuh enggau Program Skuad 1 Malaysia.

"Aku ngarapka semua rayat ba negeri tu terus ngetanka sukung begulai enggau perintah munasak penyalah gian dadah," ku iya.

Batalion PGA enggau Polis Tasik deka diengkah ba Taman Industri Samalaju

Perintah merambu deka ngengkahka siti batalion khas Pasukan Gerakan Am (PGA) enggau Polis Tasik ba Taman Industri Samalaju, Bintulu sereta deka dipejalaika enda lama agi.

Kepala Polis Menua, Tan Sri Khalid Abu Bakar madah, atur nya digaga dikena nambahka pengelikun ba kandang menua ke benung angkat mansang, tambah mega penyampau rayat ke majak mayuh ba nya berebak enggau Projek Koridor Kuasa Ulih Dikena Baru Sarawak (SCORE).

Iya madah, pekara ke beguna amat iya nya nambahka pengawa bejaga nyengkaum ba menua darat enggau tasik ba kandang kilang besai nya dikena meri pengarap ngagai orang ke deka beranakka puku sekalika ari menua tu empu tauka ari menua luar.

Puku ke udah ditanam ba endur nya naka ke diatu lebih ari RM37.4 bilion.

"Jam ke diatu kami udah ngelala sebuah palan ba Samalaju ke deka digaga balai polis enda lama lalu enti semua semua perengka udah chukup, bala kaban PGA deka dianjung gawa ba endur nya.

"Kami mega benung berunding enggau perintah negeri Sarawak deka ngiga palan ke engkeman endur ngaga semua perengka sereta endur numbuhka siti batalion PGA ba endur nya (Samalaju)," ku iya.

Iya madah munyi nya ngagai pemberita pengudah bejadi Kompleks Batalion 12 PGA Miri enggau Balai Trafik Miri di Miri apin lama ke udah.

Taun siti ke udah, Sapit Menteri Dalam Negeri Datuk Wan Junaidi Tuanku Jaafar bisi ngemansutka penemu ngagai perintah besai ngasuh ngaga sebuah balai polis ke dikumbai Kelas A ba Samalaju lalu beungkus RM14 juta chukup enggau mayuh perengka guna baka rumah enggau dewan.

Nangkan ke nya, ba bandarraya Miri, Khalid madah, polis deka nyewa palan ba Desa Senadin digaga nyadi balai polis enda lama.

Iya madah, tuju pekara nya dikena ngenyuahka pengawa polis matau menua ke benung mansang kelimpah ngena Unit Nginau Ngena Motosikal (URB).

populasi pendudu"Aku bisi dipadahka Penulung Menteri Penyambung, Datuk Lee Kim Shin penyampau rayat ke nguan Desa Senadin bisi lebih ari 100,000 iku orang tang nadai ngembuan balai polis," ku iya.

Lee ti gaga ningga peminta iya udah dikemendar bedanji deka ngiga palan ke engkeman ba Desa Sendin awakka balai polis enda lama nya ulih dibuka enda lama agi.

Bekaul enggau pengawa dikena napi pengawa bepilih besai Kunsil Negeri (Dun) Sarawak Khalid madah, Sarawak deka minta bantu raban pengelikun ari menua Sabah enda enda ulih dikereja kediri.

"Kitai endang udah sedia napi pekara ke bansa tu nyengkaum ba pengawa bepilih besia mit ba Kajang, Selangor," ku iya.

Rambau pengerami nya mega, Khalid bisi nyuaka tanda pangkat Midul Pengelantang Menua ngagai 23 iku kaban PGA ke bisi nyereta pengawa ngetanka pengelikun ba menua Sabah maya dikachau bansa Sulu taun siti ke udah.

Sama bisi datai ba pengawa tu iya nya Pesuruhjaya Polis Sarawak, Datuk Wira Mohammad Sabtu Osman enggau Penulung Menteri Penyambung, Datuk Lee Kim Shin enggau Residen Bahagian Miri, Antonio Khati Galis.

Kerita ditepan orang tuai techabut tayar

Siku indai tuai orang parai pengudah kerita Kelisa ke ditepan iya ensayar ba siti selikuh sebedau ke ngelantak tiang sebuah rumah ba KM 10 Jalai Pasir Akar-Jerteh ngerimbai Kampung Padang Baloh, ba Jerteh, kena Hari Lima tu tadi.
   
Kepala Polis Pelilih Menua Besut Supt Kamaruddin Mohd Zakaria madah, ba penusah ke nyadi urung pukul 10.00 pagi nya, Wan Meriam Wan Ahmad, 71, ari Kampung Alor Keladi benung mulaika diri ngagai rumah iya.

Mansa begulai enggau anak iya, Badihah Aqilah Daud, 26, enggau siku agi uchu iya benama Muhammad Iqmal Huzaifah Mohammad Ikhwan, 2 taun pulai ari Langkau Ubai Dah, Pasir Akar ditu.
   
"Maya datai ba siti selikuh, siti tayar belakang kerita techabut laban jalai lichin pengudah ujan bangat sebedau kerita ke ditepan iya ensyar," ku iya madah ngagai pemberita ensana.

Mansa parai ba palan penusah nyadi laban raya bakal ba pala, udah nya anak engagu uchu iya benung diperubat ba Hospital
Besut. Bernama.

Rega rumah kelalu mar deka dipansik baru

Opis Menteri Pengawa Berumah Sarawak benung mansik baru rega rumah ke majak mar ba kandang menua bandar di negeri tu.

Menteri iya, Datuk Amar Abang Haji Johari Tun Abang Haji Openg madah, dikena mutarka penanggul nya bala sida deka ngaga mayuh agi rumah ba kandang menua bandar laban orang ke minta meli rumah majak mayuh lalu tu ulih ngujungka rega enda kelalau mar.

Iya madah, kerejasama nya deka dipejalai begulai enggau Opis Ngaga Rumah Menua, Pengawa Ngaga Rumah Rayat 1 Malaysia(PRIMA) enggau Kompeni Ngaga Rumah Menua Berhad (SPNB).

"Kami deka mansik baru bekaul enggau rega rumah awakka mensia mayuh enda kelalu tusah bebayarka rega rumah ti kelalu mar," ku iya.

Iya madah munyi lebuh dirandau pemberita Pengudah Pengerami Gongxi Fa Chai 2014 Opis Menteri Pengawa Berumah Sarawak (MOH), Opis Pemansang Pengawa Berumah (HDC) enggau Daya Builders Sdn Bhd (DBSB) ba Wisma Perumahan, Jalai Sultan Tengah di Kuching apin lama ke udah.

Iya madah, kebuah rega rumah niki laban kontraktor ngumbai ungkus dikena ngaga rumah udah niki.

"Pekara nya ngujungka rayat mayuh ke ngembuan penatai pemisi ke mit balat suntuk," ku iya.

Iya madah, bisi mega komplin ke diterima ari sida ke ngembuan penatai pemisi lebih RM 3,000 tang enda ulih meli rumah laban rega rumah kelalu mar.

Iya madah rega rumah malai jam ke diatu dijual enggau rega lebih RM 300,000 lalu rumah begembar lebih RM 500,000.

"Enti utai tu udah dipejalai dalam timpuh tiga taun ke deka datai rega rumah malai deka diturun ngagai 200,000 lalu rumah begembar deka dijual enggau rega RM 300,000,"ku iya.

"Kami mega deka ngubah Rang Undang-Undang Rumah dikena ngaduka baru makit rega rumah," ku iya.

Kaban Kunsil Negeri (ADUN) Satok nya mega madah, entara utai ke deka diubah dalam polisi baru nya ila iya nya ngaga mayuh agi rumah, ngena chara IBS, kelimpah baratika rega tanah.

"Kami deka ngaga mayuh rumah flat enggau rumah malai ke ulih dibeli rayat jelan iya penatai pemisi," ku iya.

Ku iya mega, nyema rega rumah agi mengkang baka diatu, orang ke mit gaji tentu enda ulih meli rumah, lalu tu ulih ngenataika penanggul sosial.

Pengakap Sarawak Nyambut Tanda Pengingat 100 Taun kemari

Kira 31 iku kaban Pengakap nerima Midul Emas lalu lima iku nerima Midul Perak beserimbai enggau Pengerami Nyuaka Tanda Pangkat 100 Taun Tim Pengakap Di Sarawak ke diatur ba Palan Pematih Pengajar (IPG) Batu Lintang di Kcuhing, kemari.

Menteri Pemansang Sosial Tan Sri William Mawan anak Ikom nyadi penerima keterubah Midul Emas lalu ditangkan bala penerima ke bukai iya nya Niang Tan Sri Datuk Amar Dr Haji Sulaiman Haji Daud, Tan Sri Datuk Sri Jahi Safri Awang Zaidel, Datuk Haji Abdul Kader mohd Nor,

Sudaryo Haji Osman, Datuk Awang Zaini haji Suntim, Datuk Haji Matnor Daim, Awang Badar Awang Ali, Bapak Suriyadi, Bapak Sadeli, Drs Dailami Abdul Manaf, Datu Abdillah Adam, Dato Hajah Dayang Morliah, Datu Putit Matzen, Datu Dr Haji Julaihi Bujang, Geoffrey Teo long Yuan,

Abang Naim Abang Suai, Vincent Kiew Fah San, Dato Haji Khir Busrah, Said Bolhassan, Kapten Zainuddin Tan Sri Hamdan, John Lim Boon Beng, James Liew Pun Hock, Sabeli Bakri, Charles Yeo Hui Chuan, Kho Ik Teck, David U Duang Ung, Peter Lim Thiam Seng, Mohd Zaki Nurud Din, Felix Thang Meng Kee, enggau Joseph Chong Yun Khin.

Udah nya, orang ke nerima Midul Perak iya nya Mejar Baharuddin, Bapak Eddy Firman, Ellen @ Manium anak Enggang, Patrikl Law Yong Ban, enggau Tuan Haji Awang Hambali Awang Hamdan.

Lebuh bejaku ke lalu bejadi pengerami nya, Mawan ti mega nyadi Tuai Dipebasa Kunsil Pengakap Sarawak madahka,  pengawa nyadi kaban pengakap endang chukup manah laban ulih nempa raban nembiak nyadi orang ke beguna ngagai bansa enggau menua.

"Aku berasai gaga meda ulah nembiak ke chukup sayau ke menua kelebih agi ba sida ke nyadi ketuai enggau bala nembiak.

"Nya alai, aku nesau bala kaban pengakap terus nguna pengelandik ke diambi ari aktiviti tu dikena ngemajuka diri ba sekula enggau ba palan endur gawa," ku iya.

Nangkan ke nya, Sapit Pesuruhjaya Pengakap Negeri Sarawak Sudaryo Haji Osman madah, pemanah nyereta tim pengakap ulih nyeliahka bala nembiak tepejuh enggau bemacham kes ke nadai menuku sereta nempa pengasai ati sayau ke menua, kelimpah ngelatih bala nembiak nyadi ketuai.

"Enggau tu aku ngelalau bala kaban pengakap enda ibuh ngarapka pemeri ari gerempung (pengakap) tang berundingka diri empu nama utai ke ulih dikereja kitai ngagai gerempung," ku iya.

Naka ke diatu bisi 62,000 iku penyampau kaban pengakap ke bisi ba menua Sarawak nyengkaum kaban pengakap ba sekula enggau ba luar sekula.

Sama bisi datai ba pengerami tu iya nya bala penerima ari menua Indonesia enggau Brunei, Sapit Pesuruhjaya pengakap Menua Datuk Haji Abdul Kader Mohd Nor,  Direktor IPG Batu Lintang Awang Hambali bin Awang Hamdan enggau Direktor Opis Pelajar Negeri Sarawak Datu Abdillah Adam.

BR1M majak diberi seagi ekonomi manah

KUALA LUMPUR : Datuk Seri Najib Tun Razak kemari ngemansutka jaku jamin perintah deka terus meri Bantu Rayat  1Malaysia (BR1M) ngagai rayat seagi politik meruan enggau gaya ekonomi menua manah sereta ulih beretan baka diatu.

Menteri Besai madah, ari gaya ekonomi ke manah ngujungka perintah ulih bejalaika program pemansang enggau meri bantu ngagai rayat.
  
Iya madah, endang udah nyadi tanggungjawap perintah Barisan Nasional (BN) ngaga pengawa enggau manah dalam ngatur menua kelebih agi bekaul enggau ekonomi.

"Jam ke diatu, BN ulih ngatur menua enggau manah, taja pan menua bukai mayuh dituntung penusah, nengah polisi ke manah dikena ngatur ekonomi ngujungka ekonomi menua tu likun enti dibanding enggau gaya ekonomi menua ke nadai tentu manah.

"Tang ba Malaysia, kitai ulih teatur ekonomi menua kitai sereta ekonomi dipeda chukup manah amat, pia mega penatai pemisi menua betambah, kitai magai pengaya nya ngagai rayat," ku iya rambau ngelancharka BR1M 2014 Renggat Menua ke diatur ba Sekula Sekondari Aminuddin Baki ditu kemari (Hari Enam).

Dikena ngemujurka BR1M 2014, Najib madah perintah nyediaka agih belanja RM4.6 bilion lalu meri penguntung ngagai 7.9 juta penerima.
  
Iya ngarapka nengah pengawa nambahka penyampau BR1M ke sekali tu ulih ngelempungka penyuntuk rayat kelebih agi ngagai orang ke diau ba menua bandar.
  
Pengawa meri BR1M 2014 ngagai orang ke ngembuan penatai pemisi kurang RM3,000 niki ari RM500 ngagai RM700 tu nyengkaum Insurans
Takaful Beraban Rayat 1Malaysia (i-BR1M) iya nya RM50.
  
Ngagai orang ke agi rumpas beumur 21 taun ke atas ke ngembuan penatai pemisi enda ngelui RM2,000 sebulan, penyampau bantu niki ari RM250 ngagai RM300.
  
Dikena nambahka penyampau nya, keterubah iya BR1M diberi ngagai orang ke ngembuan penatai pemisi entara RM3,000 ngagai RM4,000 enggau penyampau bantu
RM450.
  
i-BR1M bisi nyediaka bantu RM1,000 ngagai orang ke parai biasa lalu RM30,000 nyema parai exsiden tauka tachat ketegal penusah bebadi ba dini-dini endur.

Najib ti mega nyadi Menteri Wang madah, laban ke nyadi perintah ke betanggungjawap kitai patut ngetanka pemanah ekonomi awakka meri penyamai ngagai rayat.
  
Berebak enggau nya, Najib madah perintah udah ngamatka danji ke bisi disebut dalam manifesto BN maya pengawa bepilih besai ke udah, entara utai nya deka nambahka penyampau BR1M berenggat-renggat.

Najib madah, perintah BN seruran nguji ngamatka danji ke udah disemaya dalam manifesto pengawa bepilih besai ke-13
(PRU13) nyengkaum nambahka pemeri BR1M nyentuk ngagai RM1,200 dalam timpuh lima taun.

"Mayuh orang enda nemu sereta enda macha ambis, Kami madah dalam timouh lima taun. Perintah BN bisi tanggungjawap ngagai rayat.
Manifesto PRU13 endang danji perintah ngagai rayat. Kami meri berenggat-renggat. Reti nya taun siti nyin ila, ditambah agi.
  
"Pemendar perintah meri RM1,200 dalam timpuh lima tuan endang Danji Ke Amat." ku iya. Bernama.

Tuai parti patut meri peluang ngagai orang biak

Tegapka ubah dalam Sarawak Progressive Demokratic Party (SPDP) enggau Sarawak United Peoples' Party (SUPP) enti sema deka meda BN mujur megai Sarawak maya PRU  ke-11 ila, ku Seketeri Gerempung Penulis Utara Sarawak (PUTERA) Jaya Ramba lebuh dirandau Utusan Sarawak ditu apin lama ke udah.

Iya madah, ukai agi berita selebubu ngapa bekaul parti SPDP enggau SUPP ke deka sebilik tang agi nadai pekara ke nyengala dipeda ba dua bengkah parti komponen BN nya, tambah mega agenda dua bengkah parti tu enda sebaka.

Ba penemu Ramba, perambu ke deka meda dua bengkah parti tu sebilik endang manah amat laban dua bengkah parti tu sama bisi penanggul. Ngarapka enti udah beserakkup ulih nerima sukung ke teguh ari kaban parti enggau rayat.

“Tang pekara ke nyengala enti udah beserakup, juluk dua bengkah parti tu meseti sebaka," ku iya.

Ramba ti mega nyadi Duta Barisan Nasional Sarawak, madahka BN Sarawak begunaka dua bengkah parti tu endur ngulihka pemujur laban sebedau tu SPDP enggau SUPP bisi pembar kaban pengudah kaban parti ke nyadi menteri bisi kena buai.

“Ba penemu aku, penayrut ke nyadi dalam SPDP enggau SUPP chukup tusah dikena napi PRU-11 ila laban tuai ba peringkat pun udah pambar.

Ke tanda iya, SPDP pambar laban Kelab BN lalu SUPP pambar laban bisi dua bengkah tim ke tusah deka beserakup.

Nya alai, manah agi SUPP sebilik enggau SPDP ngambika nyadi siti parti ke besai sereta kering".

“Ajar aku ngagai tuai dua bengkah parti tu iarka dulu kuasa lalu kemanahka baru nama parti, awakka rayat rindu nyukung. Ngagai semua kaban parti, buai ati ringat lalu beserakup enggau kaban partu BN ke bukai. Badu meh nempa spekulasi ke udah mambarka parti enggau buai ati kepapas enggau pangan diri enggau ngagai tuai parti kitai," ku Ramba.

Terang amat ajar Ramba, seagi penyarut dalam parti SUPP enggau SPDP enda enda diputar, BN tusah deka menang di Sarawak. Kitai deka rugi enti perintah ke meruan ngelama tu ditukar enggau perintah ke baru sereta tusah deka dikarap.

Ramba ngarapka BN beratika orang ke lurus dalam parti. Buai orang ke bisi penanggul lalu beri peluang ngagai orang ke biak sereta landik nyadi ketuai. Ba pekara tu tuai ke bekuasa ngelama tu patut pintar milih orang ke biak ke bisi penau.

Program MeetUpKch diatur 29 - 30 March

Beserimbai enggau Earth Hour 2014, Hands Above Crown (H.A.C) deka ngatur Pengerami Raban Nembiak tauka dikumbai MeetUpKch kena 29 enggau 30 March ba Le Park, Dewan Suarah Kuching.

Direktor ouryouth.my, Dato’ Patrick Liew madah, program nya tebuka ngagai mensia mayuh kelebih agi raban nembiak ari mayuh bengkah agensi enggau sekula.

"Entara aktiviti ke deka digaga iya nya meri darah, pekit futsal, MeetUpKch Sarawak X-Games (lumba kasar), besenam, eksibisyen, seni kuntau ari Gerempung Taekwando, Battle of The Bands, lumba ai, bejualka utai pakai enggau mayuh agi ke bukai," ku iya.

Iya madah munyi nya rambau aum pengarang berita MeetUpKch di Kuching.

Patrick madah, bisi 70 peratus perengka lumba bisi disedia ba Dewan Suarah Kuching ungkup mensia mayuh ke diau semak nya seraya ke nyadi palan dagang temuai.

"Tengan taun siti ke udah, kamu udah ngelancharka urung endur bejoging bisi perabung pemanjai 2.5 kilometer (km). Kami mega udah berunding enggau Datuk Bandar Kunsil Bandaraya Kuching Selatan (MBKS), Dato' James Chan deka ngatur siti konsert beserimbai enggau Hari Bandaraya tang agi bedau bisi pemutus," ku iya.

Ngelansang sentang pengerami MeetUpKch, pengari H.A.C, Okie Tajang-Bato madah, pekit futsal ditatak ngagai 40 tim lelaki enggau indu udah nya yuran diletak RM150 ungkup siti tim.

"Kami deka meri perais duit RM1,000 (lumur satu), kedua RM800 enggau lumur tiga RM500 ngagai bala pemenang pekit futsal.

Udah nya ungkup pasar belangkau siti langkau dicaj RM100 ungkup timpuh dua hari nya," ku iya.

Ku iya mega, entara tuju program nya dikena ngelakuka kandang endur ti likun sereta nyamai alai berandau kelimpah endur ngatur aktiviti ke bukai.

"Nya alai, kami melabaka kira 30 ngagai 50 buah langkau bejual deka dibuka maya nya ila," ku iya.

Sebarang tanya ke silik, ulih betelefon terus nuju Hanne ngena lumur 013-5650651 tauka emel ngagai saran.hanne@yahoo.com, pia mega ulih peda ba laman sosial https://www.facebook.com/meetupkch.

Sama bisi datai iya nya Menija Pengatur Pengawa ouryouth.my, Patsda Liew, Menija H.A.C, Cashley Mantador, Steffina Stephen enggau Hanney Saran.

Padang Bilun Lawas deka digaga

Perintah deka terus ngemajuka menua Lawas ngambika ulih nyapai status nyadi bahagian baru udah tu, ku Kaban Parlimen Lawas Dato Henry Sum Agong.

Iya madah, asil ari pengawa Opis Menteri Pengangkut ke deka ngaga siti padang bilun baru ba Lawas deka ditangkan enggau pengawa ngaga siti agi jematan ba Kuala Lawas.

Semua tu nyengkaum pakej dikena ngaga padang bilun baru Lawas ke dijangka begunaka mayuh belanja.

Henry Sum madah munyi nya ngagai media rambau nguluka penemuai Sapit Menteri Pengangkut Malaysia, Datuk Abdul Aziz Kaprawi.

Udah nya, Henry Sum bisi nyebut pasal projek besai ke bukai nyengkaum hospital baru Lawas benung digaga, tu ditangkan enggau sekeda projek ke bukai ke deka dipinta baka sebuah pengkalan mit ba Pulau Sari, Kuala Lawas.

“Kelimpah projek mit baka jematan enggau jalai raya, bala kami mega deka mai sekeda menteri datai ke Lawas lalu kami nerima timbal ke chukup manah laban sida setuju datai ke Lawas meda utai ke patut digaga.

“Pekara tu laban kami ngembuan kaul ke chukup manah enggau perintah besai sekalika ba tikas Ini parlimen enggau perintah negeri Sarawak empu," ku iya.

Henry Sum mega ngarapka pansik ngaga padang bilun ke baru di Lawas ulih digaga lengkas laban tau ngerembaika pengawa dagang temuai enggau ngemuntangka pejalai rayat ngagai menua Lawas.

Maya tu mega, Lawas ngembuan mayuh palan dagang temuai ke bisi penau baka kebun Apple di Ba’kelalan, pegung ai angat ba Merarap, menua semak pantai kampung orang berikan ari Kuala Lawas nyentuk ngagai Awat-Awat enggau mayuh agi ke benung dikemansang dikena ngelakuka menua Lawas.

“Utai ke beguna diatu, kerejasama ari semua orang beguna amat. Kebuah pia laban siku-siku ketuai enda ulih ngereja pengawa kediri kelimpah bisi sukung ari raban orang bukai, pia mega sukung ari rayat beguna amat," ku iya.