BR1M muai penyuntuk enda lama

Bala penerima duit Bantu Rayat 1Malaysia (BR1M) dilalu ngambika nguna duit nya enggau manah-manah awakka meri penguntung ngagai sida.

Menteri Sumber Mensia, Dato Seri Richard Riot Jaem madah, tuju pengawa meri bantu nya dikena ngelempungka penyuntuk rayat. “Nya alai, kena duit nya enggau manah-manah lalu beri barang ke diguna diri sebilik," ku iya.

Iya madah munyi nya rambau Pengawa Nyuaka Bantu Rayat 1Malaysia (BR1M) 3.0 ungkup sitak Parlimen Serian ke diatur ba Dewan Masyarakat di Serian.

Iya madah bantu nya nandaka penyinu perintah ngagai rayat. Riot mega madah, bisi sekeda orang ngumbai pengawa meri bantu nya dikena ngambiska duit rayat.

“Endang amat nya duit rayat tang enti ketuai nadai poenyinu ati tentu rayat nadai ulih makai duit nya," ku iya. Nya alai, iya madah rayat patut meri terima kasih ngagai perintah Barisan Nasional (BN) berindik ari pekara nya.

Richard madah, taja pan penyampau ke diterima nya enda mayuh tang kebendar iya utai nya berega amat. Iya madah, ngagai sida ke begaji mit bantu ke bansa nya ulih ngelempungka penyuntuk sida.

Ku iya, perintah udah nyediaka agih belanja kira RM3.339 juta ungkup penerima BR1M ba sitak parlimen Serian. Nangkan ke nya, ku iya bisi 6,309 ruang bilik ke layak udah nerima bantu nya nengah akaun bank enggau diberi ngena baucher.

"Tu nyengkaum penerima ari sitak Kunsil Negeri Negeri (DUN) Kedup enggau Tebedu,” ku iya. Iya madah, nyadung bantu nya disuaka pengari rayat diri empu ba maya hari bulan ke dipadah ila.

Richard ngelalau rayat Serian terus nyukung perintah BN kelebih agi ba maya pengawa bepilih besai negeri ke deka datai.

Kebuah pia, ku iya laban perintah BN udah mayuh meri bantu ngagai rayat sereta ngelempungka penyuntuk sida. Nya alai, ku iya dikena manlas pemanah nya, rayat patut terus meri sukung penuh ngagai perintah.

Bisi 840 penerima ari 84 buah kampung ba sitak parlimen Serian datai ngambi baucher diri empu. Penyampau nya enda nyengkaum semua penerima laban deka diberi berenggat-renggat nyentuk ngagai bulan March tu ila.

Sama bisi datai iya nya Menteri Pemansang Infrastruktur enggau Penyambung, Dato Sri Michael Manyin Jawong, ADUN Kedup, Martin Ben, Pemesai Pelilih Menua Serian, Sinde Muling enggau Temenggung Robert Sulis Ridu.

TAIB BERASAI PUAS

Rayat udah tegap, politik likun sereta enda kelalu ekstrim

Pehin Sri Haji Abdul Taib Mahmud madahka diri berasai puas sebedau ke nyurutka diri mangku pengawa nyadi Kepala Menteri Sarawak pengudah meda pengidup rayat majak tegap.

Pengudah semak 33 taun megai negeri tu iya meda rayat Sarawak majak serius ba pengawa diri empu ngidupka diri," ku iya lebuh Aum Pengarang Berita ba Wisma Bapa Malaysia di Petra Jaya apin lama ke udah.

Pengelama iya ke udah nyadi Kepala Menteri, iya berasai puas meda gaya politik di Sarawak enda kelalu ekstrim.

“Tu mandangka pemintar rayat Sarawak laban nadai nyimpan ati dengki enggau pangan diri taja pan bebida pengarap enggau bansa.

"Sida dipeda beserakup enggau pangan diri, begulai mutarka sebarang penanggul lalu udah nya nyeliahka pekara bukai nyadi," ku iya.

Iya pechaya udah tu ila, rayat Sarawak deka terus bebendar ngulihka pemujur diri ari utai ke udah dijapai diatu.

Koridor Kuasa Ulih Dikena Baru Sarawak (SCORE) dikarapka ulih narit mayuh orang datai ngagai puak negeri tu.

“Asil iya, kandang menua peisisr deka dikemansang lalu dua tauka tiga buah bandar baru deka ayan baka menua Baram, Baleh enggau iya ke dampih entara menua Bahagian Keterubah enggau Kedua,” ku iya.

Gaya ke bansa tu deka ngujungka rayat majak idup ngachir belubah-lubah dalam timpuh 20 taun ke deka datai, ku iya.

Pehin Sri Taib madah, iya nadai agi masuk pekara politik berengkah 1 March 2014 laban maya udah chukup lalu ngelakka orang bukai bekuasa.

Iya pechaya tim ke ditinggalka iya ulih ngelatih orang ke biak-biak dalam pengawa politik ke bekualiti.

"Aku deka pinchin ujung bulan tu enggau ati ke chukup gaga lalu pechaya Sarawak deka dipegai enggau manah-manah sereta terus dikemansang enggau meruan," ku iya.

 Enti udah mangku pengawa nyadi Tuai Pemegai Menua Negeri tu ila iya nadai agi masuk champur pekara ngatur negeri Sarawak  laban “negeri tu semina begunaka siku bos iya nya Kepala Menteri.

Nyema iya ilap ngereja pengawa iya meh betanggungjawap, nyema iya ngereja pengawa enggau manah iya endang patut dipuji."

Bantu deka diberi ngagai mansa ampuh di Tabuan Hilir

Lebih 100 iku rayat ke nguan menua Tabuan Hilir ditu kena tuntung penusah ampuh ngenyit ke nyadi tumu pagi Hari Lima tu tadi.

Kaban Kunsil Negeri (ADUN) Demak Laut, Dr. Hazland Abang Hipni ke bisi datai ngabas mansa madah, ampuh ngenyit nya nyadi ketegal ujan bangat ke nyadi kenyau ari malam tadi.

"Ampuh ngenyit nya ngampuhka 22 buah rumah ba kandang menua Tabuan Hilir, kami deka nguji minta bantu ari orang ke patut nulung mansa," ku iya lebuh ke dirandau pemberita ditu kemari.

Sama bisi datai ngabas mansa ke dituntung penusah iya nya pemesai ari opis Residen Kuching, Opis Pengibtu Pengelantang Raban Bansa (JKM) Sarawak, Kunsil Pengelikun Menua (MKN).

Nitihka penerang siku orang ke dituntung penusah nya, iya nemu ai bepun tama ke rumah urung pukul 3.30 pagi sebedau ke berumban ngerak sida sebilik ngasuh nanggung jemari ngagai endur ke lebih selamat.

"Ai ke udah tama dalam bilik nyau ninggi patung," ku iya seraya madahka nadai penusah bukai nyadi.

Taja baka nya, iya madahka sekeda jemari ke enggau perengka ba rumah nya rusak ketegal penusah ampuh ngenyit.

AADK nguji nyapai menua beresi nadai dadah 2015

Mayuh bengkah pengawa enggau atur digaga dikena ngemunaska penyalah gian dadah di menua tu sebedau taun  2015.

Direktor Agensi Antidadah Menua (AADK) Sarawak, Wan Madihi Wan Salleh madah, entara pengawa ke dipejalai nya kenyau ari 1983 iya nya nyebut dadah munsuh lumur satu menua.

"Pengerami Hari Antidadah Menua (HADAK) ke disambut kena 19 Februari ninting taun dikena ngingatka hari Polis Dadah Menua dikena nyaup perintah ngadaka rayat ti beresi ari dadah sereta nyukung penuh Deklarasi ASEAN Beresi Nadai Dadah Taun 2015," ku iya dalam Jaku Penerang ke dipansutka Direktor  ADDK Sarawak beserimbai enggau HADAK.

Wan madah, pengerami HADAK ti mega nyadi tanggung pengawa AADK ke nyadi 'Lead Agency' munaska dadah dikena nulung perintah ngurang kes jenayah ke besangkut paut enggau sida ke gina dadah.

"Sebaka enggau penerang jaku ke dipansutka Menteri Besai beserimbai enggau Pengerami HADAK 19 Februari 2014, pengawa salah nguna dadah ulih nyadi dalam rumah diri empu.

"Nya alai, genap iku apai indau enggau diri sebili patut ngemeranka ulah pendiau ba anak diri empu ari kena tuntung penyalah gian dadah.

"Gaga awak begulai enggau bala anak, jaga manah ati sida lalu anang ngajar sida enggau utai ke enda menuku," ku iya.

Nya alai, Wan madah, mayuh bengkah aktiviti ke udah diperambu beserimbai enggau Hari Antidadah berambaika jaku AADK Ngemeratka Pengelantang Pengidup Rayat (AADK PRIHATIN RAKYAT SEJAHTERA) dikena ngajar mensia mayuh sentang penyai gila dadah lalu besaup ngelaban iya.

Entara aktiviti ke bisi digaga iya nya begelumu HADAK renggat Negeri Sarawak kena18 Mac 2014 ba ringkat 17 Wisma Persekutuan Simpang Tiga, Aum Pengawa Ngurangka Dadah, kimpin renggat sekula, IPT, Palan Endur Gawa, Rayat Mayuh enggau Program Skuad 1 Malaysia.

"Aku ngarapka semua rayat ba negeri tu terus ngetanka sukung begulai enggau perintah munasak penyalah gian dadah," ku iya.

Batalion PGA enggau Polis Tasik deka diengkah ba Taman Industri Samalaju

Perintah merambu deka ngengkahka siti batalion khas Pasukan Gerakan Am (PGA) enggau Polis Tasik ba Taman Industri Samalaju, Bintulu sereta deka dipejalaika enda lama agi.

Kepala Polis Menua, Tan Sri Khalid Abu Bakar madah, atur nya digaga dikena nambahka pengelikun ba kandang menua ke benung angkat mansang, tambah mega penyampau rayat ke majak mayuh ba nya berebak enggau Projek Koridor Kuasa Ulih Dikena Baru Sarawak (SCORE).

Iya madah, pekara ke beguna amat iya nya nambahka pengawa bejaga nyengkaum ba menua darat enggau tasik ba kandang kilang besai nya dikena meri pengarap ngagai orang ke deka beranakka puku sekalika ari menua tu empu tauka ari menua luar.

Puku ke udah ditanam ba endur nya naka ke diatu lebih ari RM37.4 bilion.

"Jam ke diatu kami udah ngelala sebuah palan ba Samalaju ke deka digaga balai polis enda lama lalu enti semua semua perengka udah chukup, bala kaban PGA deka dianjung gawa ba endur nya.

"Kami mega benung berunding enggau perintah negeri Sarawak deka ngiga palan ke engkeman endur ngaga semua perengka sereta endur numbuhka siti batalion PGA ba endur nya (Samalaju)," ku iya.

Iya madah munyi nya ngagai pemberita pengudah bejadi Kompleks Batalion 12 PGA Miri enggau Balai Trafik Miri di Miri apin lama ke udah.

Taun siti ke udah, Sapit Menteri Dalam Negeri Datuk Wan Junaidi Tuanku Jaafar bisi ngemansutka penemu ngagai perintah besai ngasuh ngaga sebuah balai polis ke dikumbai Kelas A ba Samalaju lalu beungkus RM14 juta chukup enggau mayuh perengka guna baka rumah enggau dewan.

Nangkan ke nya, ba bandarraya Miri, Khalid madah, polis deka nyewa palan ba Desa Senadin digaga nyadi balai polis enda lama.

Iya madah, tuju pekara nya dikena ngenyuahka pengawa polis matau menua ke benung mansang kelimpah ngena Unit Nginau Ngena Motosikal (URB).

populasi pendudu"Aku bisi dipadahka Penulung Menteri Penyambung, Datuk Lee Kim Shin penyampau rayat ke nguan Desa Senadin bisi lebih ari 100,000 iku orang tang nadai ngembuan balai polis," ku iya.

Lee ti gaga ningga peminta iya udah dikemendar bedanji deka ngiga palan ke engkeman ba Desa Sendin awakka balai polis enda lama nya ulih dibuka enda lama agi.

Bekaul enggau pengawa dikena napi pengawa bepilih besai Kunsil Negeri (Dun) Sarawak Khalid madah, Sarawak deka minta bantu raban pengelikun ari menua Sabah enda enda ulih dikereja kediri.

"Kitai endang udah sedia napi pekara ke bansa tu nyengkaum ba pengawa bepilih besia mit ba Kajang, Selangor," ku iya.

Rambau pengerami nya mega, Khalid bisi nyuaka tanda pangkat Midul Pengelantang Menua ngagai 23 iku kaban PGA ke bisi nyereta pengawa ngetanka pengelikun ba menua Sabah maya dikachau bansa Sulu taun siti ke udah.

Sama bisi datai ba pengawa tu iya nya Pesuruhjaya Polis Sarawak, Datuk Wira Mohammad Sabtu Osman enggau Penulung Menteri Penyambung, Datuk Lee Kim Shin enggau Residen Bahagian Miri, Antonio Khati Galis.

Kerita ditepan orang tuai techabut tayar

Siku indai tuai orang parai pengudah kerita Kelisa ke ditepan iya ensayar ba siti selikuh sebedau ke ngelantak tiang sebuah rumah ba KM 10 Jalai Pasir Akar-Jerteh ngerimbai Kampung Padang Baloh, ba Jerteh, kena Hari Lima tu tadi.
   
Kepala Polis Pelilih Menua Besut Supt Kamaruddin Mohd Zakaria madah, ba penusah ke nyadi urung pukul 10.00 pagi nya, Wan Meriam Wan Ahmad, 71, ari Kampung Alor Keladi benung mulaika diri ngagai rumah iya.

Mansa begulai enggau anak iya, Badihah Aqilah Daud, 26, enggau siku agi uchu iya benama Muhammad Iqmal Huzaifah Mohammad Ikhwan, 2 taun pulai ari Langkau Ubai Dah, Pasir Akar ditu.
   
"Maya datai ba siti selikuh, siti tayar belakang kerita techabut laban jalai lichin pengudah ujan bangat sebedau kerita ke ditepan iya ensyar," ku iya madah ngagai pemberita ensana.

Mansa parai ba palan penusah nyadi laban raya bakal ba pala, udah nya anak engagu uchu iya benung diperubat ba Hospital
Besut. Bernama.

Rega rumah kelalu mar deka dipansik baru

Opis Menteri Pengawa Berumah Sarawak benung mansik baru rega rumah ke majak mar ba kandang menua bandar di negeri tu.

Menteri iya, Datuk Amar Abang Haji Johari Tun Abang Haji Openg madah, dikena mutarka penanggul nya bala sida deka ngaga mayuh agi rumah ba kandang menua bandar laban orang ke minta meli rumah majak mayuh lalu tu ulih ngujungka rega enda kelalau mar.

Iya madah, kerejasama nya deka dipejalai begulai enggau Opis Ngaga Rumah Menua, Pengawa Ngaga Rumah Rayat 1 Malaysia(PRIMA) enggau Kompeni Ngaga Rumah Menua Berhad (SPNB).

"Kami deka mansik baru bekaul enggau rega rumah awakka mensia mayuh enda kelalu tusah bebayarka rega rumah ti kelalu mar," ku iya.

Iya madah munyi lebuh dirandau pemberita Pengudah Pengerami Gongxi Fa Chai 2014 Opis Menteri Pengawa Berumah Sarawak (MOH), Opis Pemansang Pengawa Berumah (HDC) enggau Daya Builders Sdn Bhd (DBSB) ba Wisma Perumahan, Jalai Sultan Tengah di Kuching apin lama ke udah.

Iya madah, kebuah rega rumah niki laban kontraktor ngumbai ungkus dikena ngaga rumah udah niki.

"Pekara nya ngujungka rayat mayuh ke ngembuan penatai pemisi ke mit balat suntuk," ku iya.

Iya madah, bisi mega komplin ke diterima ari sida ke ngembuan penatai pemisi lebih RM 3,000 tang enda ulih meli rumah laban rega rumah kelalu mar.

Iya madah rega rumah malai jam ke diatu dijual enggau rega lebih RM 300,000 lalu rumah begembar lebih RM 500,000.

"Enti utai tu udah dipejalai dalam timpuh tiga taun ke deka datai rega rumah malai deka diturun ngagai 200,000 lalu rumah begembar deka dijual enggau rega RM 300,000,"ku iya.

"Kami mega deka ngubah Rang Undang-Undang Rumah dikena ngaduka baru makit rega rumah," ku iya.

Kaban Kunsil Negeri (ADUN) Satok nya mega madah, entara utai ke deka diubah dalam polisi baru nya ila iya nya ngaga mayuh agi rumah, ngena chara IBS, kelimpah baratika rega tanah.

"Kami deka ngaga mayuh rumah flat enggau rumah malai ke ulih dibeli rayat jelan iya penatai pemisi," ku iya.

Ku iya mega, nyema rega rumah agi mengkang baka diatu, orang ke mit gaji tentu enda ulih meli rumah, lalu tu ulih ngenataika penanggul sosial.

Pengakap Sarawak Nyambut Tanda Pengingat 100 Taun kemari

Kira 31 iku kaban Pengakap nerima Midul Emas lalu lima iku nerima Midul Perak beserimbai enggau Pengerami Nyuaka Tanda Pangkat 100 Taun Tim Pengakap Di Sarawak ke diatur ba Palan Pematih Pengajar (IPG) Batu Lintang di Kcuhing, kemari.

Menteri Pemansang Sosial Tan Sri William Mawan anak Ikom nyadi penerima keterubah Midul Emas lalu ditangkan bala penerima ke bukai iya nya Niang Tan Sri Datuk Amar Dr Haji Sulaiman Haji Daud, Tan Sri Datuk Sri Jahi Safri Awang Zaidel, Datuk Haji Abdul Kader mohd Nor,

Sudaryo Haji Osman, Datuk Awang Zaini haji Suntim, Datuk Haji Matnor Daim, Awang Badar Awang Ali, Bapak Suriyadi, Bapak Sadeli, Drs Dailami Abdul Manaf, Datu Abdillah Adam, Dato Hajah Dayang Morliah, Datu Putit Matzen, Datu Dr Haji Julaihi Bujang, Geoffrey Teo long Yuan,

Abang Naim Abang Suai, Vincent Kiew Fah San, Dato Haji Khir Busrah, Said Bolhassan, Kapten Zainuddin Tan Sri Hamdan, John Lim Boon Beng, James Liew Pun Hock, Sabeli Bakri, Charles Yeo Hui Chuan, Kho Ik Teck, David U Duang Ung, Peter Lim Thiam Seng, Mohd Zaki Nurud Din, Felix Thang Meng Kee, enggau Joseph Chong Yun Khin.

Udah nya, orang ke nerima Midul Perak iya nya Mejar Baharuddin, Bapak Eddy Firman, Ellen @ Manium anak Enggang, Patrikl Law Yong Ban, enggau Tuan Haji Awang Hambali Awang Hamdan.

Lebuh bejaku ke lalu bejadi pengerami nya, Mawan ti mega nyadi Tuai Dipebasa Kunsil Pengakap Sarawak madahka,  pengawa nyadi kaban pengakap endang chukup manah laban ulih nempa raban nembiak nyadi orang ke beguna ngagai bansa enggau menua.

"Aku berasai gaga meda ulah nembiak ke chukup sayau ke menua kelebih agi ba sida ke nyadi ketuai enggau bala nembiak.

"Nya alai, aku nesau bala kaban pengakap terus nguna pengelandik ke diambi ari aktiviti tu dikena ngemajuka diri ba sekula enggau ba palan endur gawa," ku iya.

Nangkan ke nya, Sapit Pesuruhjaya Pengakap Negeri Sarawak Sudaryo Haji Osman madah, pemanah nyereta tim pengakap ulih nyeliahka bala nembiak tepejuh enggau bemacham kes ke nadai menuku sereta nempa pengasai ati sayau ke menua, kelimpah ngelatih bala nembiak nyadi ketuai.

"Enggau tu aku ngelalau bala kaban pengakap enda ibuh ngarapka pemeri ari gerempung (pengakap) tang berundingka diri empu nama utai ke ulih dikereja kitai ngagai gerempung," ku iya.

Naka ke diatu bisi 62,000 iku penyampau kaban pengakap ke bisi ba menua Sarawak nyengkaum kaban pengakap ba sekula enggau ba luar sekula.

Sama bisi datai ba pengerami tu iya nya bala penerima ari menua Indonesia enggau Brunei, Sapit Pesuruhjaya pengakap Menua Datuk Haji Abdul Kader Mohd Nor,  Direktor IPG Batu Lintang Awang Hambali bin Awang Hamdan enggau Direktor Opis Pelajar Negeri Sarawak Datu Abdillah Adam.

BR1M majak diberi seagi ekonomi manah

KUALA LUMPUR : Datuk Seri Najib Tun Razak kemari ngemansutka jaku jamin perintah deka terus meri Bantu Rayat  1Malaysia (BR1M) ngagai rayat seagi politik meruan enggau gaya ekonomi menua manah sereta ulih beretan baka diatu.

Menteri Besai madah, ari gaya ekonomi ke manah ngujungka perintah ulih bejalaika program pemansang enggau meri bantu ngagai rayat.
  
Iya madah, endang udah nyadi tanggungjawap perintah Barisan Nasional (BN) ngaga pengawa enggau manah dalam ngatur menua kelebih agi bekaul enggau ekonomi.

"Jam ke diatu, BN ulih ngatur menua enggau manah, taja pan menua bukai mayuh dituntung penusah, nengah polisi ke manah dikena ngatur ekonomi ngujungka ekonomi menua tu likun enti dibanding enggau gaya ekonomi menua ke nadai tentu manah.

"Tang ba Malaysia, kitai ulih teatur ekonomi menua kitai sereta ekonomi dipeda chukup manah amat, pia mega penatai pemisi menua betambah, kitai magai pengaya nya ngagai rayat," ku iya rambau ngelancharka BR1M 2014 Renggat Menua ke diatur ba Sekula Sekondari Aminuddin Baki ditu kemari (Hari Enam).

Dikena ngemujurka BR1M 2014, Najib madah perintah nyediaka agih belanja RM4.6 bilion lalu meri penguntung ngagai 7.9 juta penerima.
  
Iya ngarapka nengah pengawa nambahka penyampau BR1M ke sekali tu ulih ngelempungka penyuntuk rayat kelebih agi ngagai orang ke diau ba menua bandar.
  
Pengawa meri BR1M 2014 ngagai orang ke ngembuan penatai pemisi kurang RM3,000 niki ari RM500 ngagai RM700 tu nyengkaum Insurans
Takaful Beraban Rayat 1Malaysia (i-BR1M) iya nya RM50.
  
Ngagai orang ke agi rumpas beumur 21 taun ke atas ke ngembuan penatai pemisi enda ngelui RM2,000 sebulan, penyampau bantu niki ari RM250 ngagai RM300.
  
Dikena nambahka penyampau nya, keterubah iya BR1M diberi ngagai orang ke ngembuan penatai pemisi entara RM3,000 ngagai RM4,000 enggau penyampau bantu
RM450.
  
i-BR1M bisi nyediaka bantu RM1,000 ngagai orang ke parai biasa lalu RM30,000 nyema parai exsiden tauka tachat ketegal penusah bebadi ba dini-dini endur.

Najib ti mega nyadi Menteri Wang madah, laban ke nyadi perintah ke betanggungjawap kitai patut ngetanka pemanah ekonomi awakka meri penyamai ngagai rayat.
  
Berebak enggau nya, Najib madah perintah udah ngamatka danji ke bisi disebut dalam manifesto BN maya pengawa bepilih besai ke udah, entara utai nya deka nambahka penyampau BR1M berenggat-renggat.

Najib madah, perintah BN seruran nguji ngamatka danji ke udah disemaya dalam manifesto pengawa bepilih besai ke-13
(PRU13) nyengkaum nambahka pemeri BR1M nyentuk ngagai RM1,200 dalam timpuh lima taun.

"Mayuh orang enda nemu sereta enda macha ambis, Kami madah dalam timouh lima taun. Perintah BN bisi tanggungjawap ngagai rayat.
Manifesto PRU13 endang danji perintah ngagai rayat. Kami meri berenggat-renggat. Reti nya taun siti nyin ila, ditambah agi.
  
"Pemendar perintah meri RM1,200 dalam timpuh lima tuan endang Danji Ke Amat." ku iya. Bernama.

Tuai parti patut meri peluang ngagai orang biak

Tegapka ubah dalam Sarawak Progressive Demokratic Party (SPDP) enggau Sarawak United Peoples' Party (SUPP) enti sema deka meda BN mujur megai Sarawak maya PRU  ke-11 ila, ku Seketeri Gerempung Penulis Utara Sarawak (PUTERA) Jaya Ramba lebuh dirandau Utusan Sarawak ditu apin lama ke udah.

Iya madah, ukai agi berita selebubu ngapa bekaul parti SPDP enggau SUPP ke deka sebilik tang agi nadai pekara ke nyengala dipeda ba dua bengkah parti komponen BN nya, tambah mega agenda dua bengkah parti tu enda sebaka.

Ba penemu Ramba, perambu ke deka meda dua bengkah parti tu sebilik endang manah amat laban dua bengkah parti tu sama bisi penanggul. Ngarapka enti udah beserakkup ulih nerima sukung ke teguh ari kaban parti enggau rayat.

“Tang pekara ke nyengala enti udah beserakup, juluk dua bengkah parti tu meseti sebaka," ku iya.

Ramba ti mega nyadi Duta Barisan Nasional Sarawak, madahka BN Sarawak begunaka dua bengkah parti tu endur ngulihka pemujur laban sebedau tu SPDP enggau SUPP bisi pembar kaban pengudah kaban parti ke nyadi menteri bisi kena buai.

“Ba penemu aku, penayrut ke nyadi dalam SPDP enggau SUPP chukup tusah dikena napi PRU-11 ila laban tuai ba peringkat pun udah pambar.

Ke tanda iya, SPDP pambar laban Kelab BN lalu SUPP pambar laban bisi dua bengkah tim ke tusah deka beserakup.

Nya alai, manah agi SUPP sebilik enggau SPDP ngambika nyadi siti parti ke besai sereta kering".

“Ajar aku ngagai tuai dua bengkah parti tu iarka dulu kuasa lalu kemanahka baru nama parti, awakka rayat rindu nyukung. Ngagai semua kaban parti, buai ati ringat lalu beserakup enggau kaban partu BN ke bukai. Badu meh nempa spekulasi ke udah mambarka parti enggau buai ati kepapas enggau pangan diri enggau ngagai tuai parti kitai," ku Ramba.

Terang amat ajar Ramba, seagi penyarut dalam parti SUPP enggau SPDP enda enda diputar, BN tusah deka menang di Sarawak. Kitai deka rugi enti perintah ke meruan ngelama tu ditukar enggau perintah ke baru sereta tusah deka dikarap.

Ramba ngarapka BN beratika orang ke lurus dalam parti. Buai orang ke bisi penanggul lalu beri peluang ngagai orang ke biak sereta landik nyadi ketuai. Ba pekara tu tuai ke bekuasa ngelama tu patut pintar milih orang ke biak ke bisi penau.

Program MeetUpKch diatur 29 - 30 March

Beserimbai enggau Earth Hour 2014, Hands Above Crown (H.A.C) deka ngatur Pengerami Raban Nembiak tauka dikumbai MeetUpKch kena 29 enggau 30 March ba Le Park, Dewan Suarah Kuching.

Direktor ouryouth.my, Dato’ Patrick Liew madah, program nya tebuka ngagai mensia mayuh kelebih agi raban nembiak ari mayuh bengkah agensi enggau sekula.

"Entara aktiviti ke deka digaga iya nya meri darah, pekit futsal, MeetUpKch Sarawak X-Games (lumba kasar), besenam, eksibisyen, seni kuntau ari Gerempung Taekwando, Battle of The Bands, lumba ai, bejualka utai pakai enggau mayuh agi ke bukai," ku iya.

Iya madah munyi nya rambau aum pengarang berita MeetUpKch di Kuching.

Patrick madah, bisi 70 peratus perengka lumba bisi disedia ba Dewan Suarah Kuching ungkup mensia mayuh ke diau semak nya seraya ke nyadi palan dagang temuai.

"Tengan taun siti ke udah, kamu udah ngelancharka urung endur bejoging bisi perabung pemanjai 2.5 kilometer (km). Kami mega udah berunding enggau Datuk Bandar Kunsil Bandaraya Kuching Selatan (MBKS), Dato' James Chan deka ngatur siti konsert beserimbai enggau Hari Bandaraya tang agi bedau bisi pemutus," ku iya.

Ngelansang sentang pengerami MeetUpKch, pengari H.A.C, Okie Tajang-Bato madah, pekit futsal ditatak ngagai 40 tim lelaki enggau indu udah nya yuran diletak RM150 ungkup siti tim.

"Kami deka meri perais duit RM1,000 (lumur satu), kedua RM800 enggau lumur tiga RM500 ngagai bala pemenang pekit futsal.

Udah nya ungkup pasar belangkau siti langkau dicaj RM100 ungkup timpuh dua hari nya," ku iya.

Ku iya mega, entara tuju program nya dikena ngelakuka kandang endur ti likun sereta nyamai alai berandau kelimpah endur ngatur aktiviti ke bukai.

"Nya alai, kami melabaka kira 30 ngagai 50 buah langkau bejual deka dibuka maya nya ila," ku iya.

Sebarang tanya ke silik, ulih betelefon terus nuju Hanne ngena lumur 013-5650651 tauka emel ngagai saran.hanne@yahoo.com, pia mega ulih peda ba laman sosial https://www.facebook.com/meetupkch.

Sama bisi datai iya nya Menija Pengatur Pengawa ouryouth.my, Patsda Liew, Menija H.A.C, Cashley Mantador, Steffina Stephen enggau Hanney Saran.

Padang Bilun Lawas deka digaga

Perintah deka terus ngemajuka menua Lawas ngambika ulih nyapai status nyadi bahagian baru udah tu, ku Kaban Parlimen Lawas Dato Henry Sum Agong.

Iya madah, asil ari pengawa Opis Menteri Pengangkut ke deka ngaga siti padang bilun baru ba Lawas deka ditangkan enggau pengawa ngaga siti agi jematan ba Kuala Lawas.

Semua tu nyengkaum pakej dikena ngaga padang bilun baru Lawas ke dijangka begunaka mayuh belanja.

Henry Sum madah munyi nya ngagai media rambau nguluka penemuai Sapit Menteri Pengangkut Malaysia, Datuk Abdul Aziz Kaprawi.

Udah nya, Henry Sum bisi nyebut pasal projek besai ke bukai nyengkaum hospital baru Lawas benung digaga, tu ditangkan enggau sekeda projek ke bukai ke deka dipinta baka sebuah pengkalan mit ba Pulau Sari, Kuala Lawas.

“Kelimpah projek mit baka jematan enggau jalai raya, bala kami mega deka mai sekeda menteri datai ke Lawas lalu kami nerima timbal ke chukup manah laban sida setuju datai ke Lawas meda utai ke patut digaga.

“Pekara tu laban kami ngembuan kaul ke chukup manah enggau perintah besai sekalika ba tikas Ini parlimen enggau perintah negeri Sarawak empu," ku iya.

Henry Sum mega ngarapka pansik ngaga padang bilun ke baru di Lawas ulih digaga lengkas laban tau ngerembaika pengawa dagang temuai enggau ngemuntangka pejalai rayat ngagai menua Lawas.

Maya tu mega, Lawas ngembuan mayuh palan dagang temuai ke bisi penau baka kebun Apple di Ba’kelalan, pegung ai angat ba Merarap, menua semak pantai kampung orang berikan ari Kuala Lawas nyentuk ngagai Awat-Awat enggau mayuh agi ke benung dikemansang dikena ngelakuka menua Lawas.

“Utai ke beguna diatu, kerejasama ari semua orang beguna amat. Kebuah pia laban siku-siku ketuai enda ulih ngereja pengawa kediri kelimpah bisi sukung ari raban orang bukai, pia mega sukung ari rayat beguna amat," ku iya.

Mayuh enda nemu nembiak pra sekula swasta bisi bantu duit

Agi mayuh orang enda nemu perintah bisi nyediaka bantu duit ungkup subsidi yuran nembiak pra sekula swasta ngagai apai indai ke ngembuan penatai pemisi enda ngelui RM500 sebulan, ku Menteri Pengitu Pengelantang, Orang Indu enggau Pemansang Ruang Bilik Datuk Fatimah Abdullah.
   
Iya madah, bantu yuran pra sekula nya dipejalaika berengkah taun 2010.
   
Iya madah, nembiak ke patut nerima bantu nya meseti beumur empat ngagai lima taun sereta belajar ba pra sekula swasta ke bisi dirijista ba Opis Menteri Pelajar Malaysia.
   
Iya madah, penyampau bantu nya bepanggai ngagai penatai pemisi apai indai iya nya RM150 ungkup ruang bilik ke ngembuan penatai pemisi enda ngelui RM300 sebulan, RM112.50 (RM400) enggau RM75 (RM500) sebulan.
   
Udah nya, bantu ungkup nembiak timpang pendiau (OKU) iya nya RM500 ungkup penatai pemisi ke enda ngelui RM300 sebulan, RM400 (RM400) enggau RM300 (RM500), ku iya.

"Nadai bantu diberi ngagai nembiak ke ngembuan penatai pemisi apai indai lebih RM500 sebulan," ku Fatimah lebuh dirandau pengarang berita di Kuching.
   
Nembiak Nadai Nasip (MBK) tauka tachat ke belajar ba prasekula swasta sereta bisi ngembuan kad OKU tauka surat penerang ari doktor, ulih nerima bantu.
   
Apai indai ulih minta bantu nya nengah sekula lalu duit bantu nya deka dibayar terus nengah nengah ke alai anak sida belajar," ku tandu Fatimah. Bernama.

Taman Rekreasi Kampung Skuduk-Chupak peluang endur rayat bedagang

Opis Majlis Perbandaran Padawan (MPP) udah mujur ngemansangka sebengkah palan endur ngelantang ati ke dikumbai 'Taman Rekreasi Kampung Skuduk-Chupak' nengah agih belanja RM300,000 ari Opis Menteri Dagang Temuai Malaysia.

Sapit Speaker Kunsil Negeri Sarawak, Datuk Roland Sagah Wee Inn madah langgur penemu ke deka ngaduka pemansang nya endang udah lama iya nya kira 15 taun ke udah tang baru diatu pengawa nya mujur nyadi nyata.

"Aku deka meri terima kasih ngagai semua orang ke udah besaup ngemujurka projek tu laban palan tu endang ulih dikena narit penatai temuai ari dalam enggau luar menua tu.

"Tu meh asil langgur penemu ke chukup manah dikena ngubah tikas pengidup rayat mayuh ke diau ba menua pesisir," ku iya.

Iya ti mega nyadi Kaban Kunsil Negeri (ADUN) Tarat, madah munyi nya beserimbai enggau Pengawa Nyuaka Projek Pemansang Dagang Temuai Taman Rekreasi Kampung Skuduk-Chupak Ngagai Komiti Pengatur Pengawa Gua Raya Kampung Skuduk/Chupak/Palman Payang Siburan, Padawan di Kuching.

Nangkan ke nya, Chairman MPP Lo Khere Chiang madahka diri chukup berasai gaga meda pemujur projek nya asil ari sukung Opis Menteri Dagang Temuai enggau pemeri belanja ari Datuk Roland Sagah empu.

"Penyauh ngelawa Gua nya ke semina 20 minit pejalai ari Kuching dipelabaka ngembuan penau ke chukup besai dikena narit penatai bala temuai. Ditambah mega enggau pemanah orang kampung ke chukup rindu berandau enggau bala temuai endang nyadi siti utai ke nyelai ba palan tu," ku iya.

Berebak enggau nya, Lo meransang komiti ke nyaga palan nya ngambika nagtur mayuh bengkah progam awakka ulih ngelaku sereta meri penguntung rayat mayuh ke nguna menua nya.

Udah nya, Lo madah naka ke diatu sida (MPP) agi nganti pansik ke dipejalaika Universiti Teknologi MARA (UiTM) bekaul enggau produk palan nya laban sebedau tu universiti nya kala nerima agih belanja ari Perintah Negeri endur bejalaika pansik pelajar.

Bela bisi bejaku iya nya Chairman Komiti Pengatur Pengawa Gua Raya Kampung Skuduk/Chupak/Palman Payang, Awat Rinjik madahka sida deka ngatur siti agi aum dikena berundingka penyampau bayar ungkup bala temuai ke datai ngulu palan nya ila.

"Naka ke diatu kami bedau muka palan tu laban agi mayuh pekara ke deka diatu. Taja baka nya kami udah bisi ngembuan mayuh perambu dikena narit penatai bala temuai baka 'Jungle Tracking', nginti, niki bukit enggau mayuh agi ke bukai.

"Enti udah dibuka ila palan tu tentu nguntungka rayat mayuh laban sida ulih bejualka asil pengelandik jari enggau barang-barang ke bukai," ku iya.

Projek Pemansang Dagang Temuai Taman Rekreasi Kampung Skuduk-Chupak Ngagai Komiti Pengatur Pengawa Gua Raya Kampung Skuduk/Chupak/Palman Payang Siburan, Padawan sebedau tu dipejalaika MPP lalu pengawa ke dikereja sida baka ngaga urung jalai nengah tebelian kira 300 meter ba dalam enggau ba luar Gua Raya nya.

Sama bisi datai Pemangku Seketeri MPP Elizabeth Loh, Residen Kunselor Kampung Skuduk/Kampung Chupak enggau Kampung Plaman Payang enggau bala kaban Komiti Pengatur Pengawa Gua Raya Kampung Skuduk/Chupak/Palman Payang. 

DBKU meri tanda basa ngagai pekereja nengah Hari Inovasi

Dewan Bandaraya Kuching Utara (DBKU) udah diberi tanda basa ngagai raban pekereja sida nengah program Hari Inovasi ke diatur ba Tanah Laman Indu Opis DBKU, Bukit Siol di Kuching.

Datuk Bandar Kuching Utara, Datuk Haji Abang Abdul Wahab Abang Julai madah, tuju program Hari Inovasi nya diatur dikena ngingatka pemanah pengawa sereta meri peransang ngagai sida awakka bebendar agi gawa udah tu.

"DBKU ngarapka nengah program ke bansa tu, bala pekereja ulih bebendar agi gawa ngangkatka pemanah rita DBKU ba tikas menua enggau dunya.

"Anang sesekali mudah berasai puas enggau utai ke udah ulih diatu laban agi mayuh pekara ke patut digaga manah agi awakka pengawa kitai dipeda orang majak bekualiti.

"Kitai patut pintar mutarka penanggul laban semua pengawa ke dikereja kitai deka diperatika orang bukai. Nya alai, kitai patut ngereja pengawa enggau naka pemanah ngambi nyadi teladan ngagai opis bekuasa pelilih menua ke bukai,"ku Abdul Wahab.

Sepemanjai taun 2013 tu, DBKU mujur tulihka mayuh bengkah pemujur enggau anugerah baka dirikodka dalam The Malaysia Book Of Records nyadi Opis Bekuasa Pelilih Menua keterubah ba Malaysia bulih Setipikit Tiga Sistem Atur Pengawa (ISO 9001 Quality Management System, ISO 14001 Environmental Management System enggau Oshas 18001 Occupational Health and Safety Management System) kena 12 Jan 2013;

Menang Belaban Nyadi Palan Ngatur Asia Pacific Cenference (APOC) ke-13 ungkup taun 2019; Taman Budaya Kuching mujur nerima anugerah ILAM Landscape Heritage beserimbai enggau World Landscape Architecture Month;

Dichiri nyadi Opis Bekuasa Pelilih Menua keterubah di Malaysia nyain Ikrar Intergriti Koporat kena 17 Mei 2013; Nerima setipikit kena bejalaika Insiatif pendiau gadung nengah pengawa nyediaka urung pejalai ngena Ensikal berserimbai enggau Hari Perambu Bandar Sedunya kena 12 Nov 2013; enggau

Menang Anugerah Engkeraju Kepala Menteri Sarawak 2013 (Ketegori Negeri), Anugerah Kualiti Servis Opis Perintah Negeri Sarawak kena 10 Dis 2013.

"Pemujur tu balat ngasuh ati gaga, lalu pemujur tu endang dipenggi semua kitai. Terima kasih ngagai semua staf DBKU...laban asil ari pemendar pengawa kitai semua pemujur ulih dijapai baka ke sehari tu," ku Abdul Wahab.

Kelimpah ari nya sepemanjai taun tu mega, DBKU mujur ngatur mayuh bengka aktiviti betikas entarabansa baka The 5th International Cat Show kena 27 ngagai 28 April 2013 di Dewan Belia dan Sukan, Kuching;

Aum Entarabansa City With A Soul kena 26 ngagai 27 Ogos 2013 bepalan ba Hotel Pullman, Kuching; 2nd International Orchird Show 2013 kena 5 ngagai 8 Sept 2013 ba Orchird Park, Kuching;

Borneo Shell Traffic Games kena 6 Okt 2013 di Taman Lalulintas, Kenyalang Park Kuching enggau Pengerami Malu Gendang Etnik Nusantara kena 22 ngagai 23 Nov bepalan ba Godown Amphitheater, Waterfront Kuching.

Entara anugerah enggau pemeri tanda basa ke bisi disuaka Datuk Bandar nyerumba Hari Inovasi 2013 tu iya nya Ngelancharka Lagu Inovasi DBKU; Nyuaka Tanda Pangkat; Nyuaka Anugerah Inovasi, Nyuaka Trofi Champion Main Futsal, Nyuaka Trofi Menang Baris Champion Pengawa Baris Hari Pengada TYT Ke-92 enggau Lumur Dua Pengawa Baris Hari Malaysia Ke-50 Taun; Nyuaka Tanda Basa Ngagai Staf Ke Pinchen enggau Nyuaka Tanda Basa Ngagai Staf Ke Udah Gawa 25 Taun.

RM443,000 geran diberi ngagai 32 PSK serata negeri

Perintah menua deka terus nyediaka diri napi pemar dudi hari bekaul enggau pengawa ngibun orang tuai awakka raban sida tu seruran dipeda aktif sereta terus dipebasa.

Menteri Pengelantang Pendiau, Orang Indu enggau Pemansang Ruang Bilik, Datuk Hajah Fatimah Abdullah madah, bepelasarka pansik menua Malaysia dijangka nyapai status menua mayuh orang tuai maya taun 2030 iya nya 15 peratus ari penyampau rayat endang tebal agi sida ke tuai.

"Diatu orang tuai iya nya sida ke beumur 60 taun ke atas 2.2 juta iku tauka 7.7 peratus ari 28.3 juta iku rayat Malaysia," ku iya.

Iya madah munyi nya rambau Pengerami Hari Orang Tuai enggau Hari Orang Timpang Pendiau (OKU) Tikas Negeri ke dipenyadi Toh Puan Datuk Patinggi Hajah Norkiah di Kuching.

Fatimah madah, pengayu orang indu betambah iya nya ari 58 taun ba taun 1957 ngagai 77 taun ba taun 2010, udah nya pengayu sida ke lelaki betambah ari 56 taun maya taun 1957 ngagai 71  taun maya taun 2010.

"Endang enda ulih dipetenah pengelantang pengidup enggau pemansang ke disepi semua kitai jam ke diatu endang asil pengawa sida ke dulu suba lalu diatu nya nyadi orang tuai di menua tu," ku iya.

Kebuah pia, Fatimah madah, orang tuai endang nyadi reta ke beguna ngagai menua laban sida ngembuan penemu, peneleba enggau pengelandik ke tusah deka ditukar.

"Umur ke udah tuai tauka pinchin ukai nyadika pemadu ngagai sida endur badu gawa tang kitai meseti begunaka pengelandik orang tuai tu," ku iya.

Entara pengawa ke diatur perintah nikihka umur pinchin ngagai orang ke gawa perintah ari 58 ngagai 60 taun berengkah taun tu, nempa Akta Umur Persaraan Minimum 2020 ti netapka umur pinchin ungkup pekereja swasta; ngaduka polisi Peraturan Kerja (Pekereja Kontrak) berengkah 15 Oktober 2010 dikena nyaga pengelantang sida ke gawa kontrak.

Kelimpah ari nya, mayuh bengkah bantu, rebat tauka isentif ungkup orang tuai dikena nulung sida nyadi orang ke bulih pengelantang sebaka enggau rayat mayuh ke bukai di menua tu.

Berebak enggau nya, Fatimah madahka sebengkah perengka guna ke patut diperati iya nya numbuhka sebengkah palan ungkup orang tuai ngatur program.

Iya madah, palan ke bansa nya beguna amat ungkup orang tuai ke diau nadai orang ngibun, awakka sida ulih bekaul tauka bekelala enggau orang bukai ke serambau.

"Endang patut amat kitai nyediaka palan-palan endur ngatur program ungkup orang tuai sebaka enggau rumah taska enggau tadika," ku iya.

Nya alai, Fatimah madah, opis menteri iya merambu deka nguna balai-balai nengah opis menteri iya nyadika palan endur orang tuai ngatur program.

"Bisi 45 bengkah balai dibaruh kuasa opis menteri ulih dikena ngemujurka program ungkup orang taui," ku Fatimah.

Nyerumba pengerami nya mega, Toh Puan Norkiah bisi nyuaka geran Gerempung Pengintu Enda Begaji (PSK) Taun 2013 ngagai 32 PSK ba serata negeri penyampau RM443,000 kelimpah nyuaka Anugerah Orang Tuai enggau Anugerah OKU.

Sama bisi datai iya nya Pengarah Opis Pengelantang Pendiau Raban Bansa Sarawak (JKMS) Noriah Ahmad; Datuk Bandar Dewan Bandaraya Kuching Utara (DBKU) Datuk Haji Abang Wahap Abang Haji Julai; Pengarah Komiti Servis Pelajar Pekara Islam, Datu Dr Haji Adi Badiozaman Tuah enggau Kepala Majlis Adat Istiadat, Datu Nillie Tangai.

Bansa Bidayuh majak landik bedagang

Raban bansa Bidayuh kelebih agi kaban Koperasi Bidayuh Kuching Berhad (KOBIB) diperansang ngambika terus ngemajuka diri enggau pengawa bedagang.

Menteri Pemansang Infrastruktur enggau Penyambung, Dato Sri Michael Manyin Jawong, madah ngereja pengawa bedagang besai ukai utai ke muntang taja baka nya ukai nyadika penanggul endur bansa Bidayuh ulih maju sebaka enggau bansa bukai.

"Nya alai, anang enda ngereja pengawa enggau bebendar ngambika kitai (Bidayuh) tau tulihka pemujur neladan pemujur bansa China.

"Sida ke maju dalam pengawa dagang nya ketegal ari pengeransing runding sereta enda mudah alah penemu lebuh meda pengurang diri," ku iya seraya ngelalau mensia mayuh ke bisi datai ngambika anang nguna adat lama ti kelalu nadai meri penguntung.

Iya madah munyi nya rambau ngulu Pengerami Makai Malam Koperasi Bidayuh Kuching Berhad ke diatur ba Dewan Gerempung Bansa Dayak Bidayuh (DBNA) di Kuching.

Nangkan ke nya, Manyin ngasuh raban Bidayuh ti bisi masuk pengawa dagang anang enda nguji nempa kaul enggau bansa bukai ke udah mujur ngambika sida ulih ngerembaika pengawa dagang diri.

"Enti kitai deka ngerembaika pengawa dagang diri, kitai anang enda nguji nempa kaul sereta ngenyemakka diri enggau orang bukai ke udah mujur ngambika kitai tau bulih penemu ke baru ari peneleba sida bedagang," ku iya.

Dulu ari nya, Chairman KOBIB Ambrose Dango nesau raban bansa Bidayuh ke bisi pengerindu ba pengawa bedagang ngerijista diri masuk nyadi kaban KOBIB ngambika ulih besukung betulung ngemansangka pangan diri ba pengawa dagang.

Berebak enggau nya, Ambrose meri puji ngagai bala kaban KOBIB laban ke udah meri sukung ngemujurka program ke diatur KOBIB sepemanjai hari nya baka ngatur Hari Tebuka KOBIB enggau program seminar ungkup bala orang dagang.

"Program ke baka endang amat manah kenyau 30 taun KOBIB udah ditumbuh laban ulih meri penemu ngagai bala pesereta senentang chara
nyadi seiku orang dagang ke nyulut," ku iya.

Sama bisi datai iya nya Seketeri Tetap Opis Menteri Dagang Temuai Sarawak Datu Ik Pahon Joyik sereta bala kaban gerempung DBNA enggau KOBIB.

Raban Nembiak Meseti Regas

Penulung Menteri Pemansang Raban Nembiak (Menua Pesisir) enggau Penulung Menteri Rengka Rama (Elektrik enggau Telekomunikasi) Datuk Dr. Stephen Rundi Utom ngelalau bala raban nembiak di negeri tu ngambika terus ngenyulutka diri nyadi nembiak ke tampak rita.

Iya madah, diatu kitai di menua chukup berasai temegah laban bisi ngembuan seiku ikon raban nembiak ke chukup pengari nama ba lumba olimpik iya nya Pandelela Rinong.

"Nya alai, aku ngarapka kitai ulih ngadaka mayuh agi ikon-ikon tauka model ke ulih nyadika teladan ngagai bala raban nembiak ke bukai.

"Bala raban nembiak endang orang ke dikarap nyadi ketuai ke ulih merintah menua jemah ila," ku iya.

Rundi  madah munyi nya rambau ngelancharka program I Heart Sarawak on Hitz.Fm ke diatur Opis Menteri Pemansang Sosial (KPS) bepalan ba Le Park, Dewan Suarah di Kuching.

Nangkan ke nya, Rundi madahka diri endang tetap nyukung program ke diatur KPS begulai enggau radio, Hits.FM nya.
"Program I Heart Sarawak endang chukup manah diatur dikena nempa pengasai ati sayau ngagai Bumi Kenyalang," ku iya.

Entara aktiviti ke bisi diatur nyerumba program tu iya nya enchabut tiket benasit, pengawa mandangka pisin pekayan, enggau mandangka kerita remote control.

Sama bisi datai iya nya Menija Besai Astro Radio Sabah enggau Sarawak Hafiz Nizamuddin sereta lebih 100 iku bala raban nembiak.

Kapal Arca Transline ngerembaika servis ngagai Sabah enggau S'wak

Arca Transline (Sarawak) Sdn Bhd sebengkah kapal dagang ke deka ngerembaika pengawa dagang berangkutka barang berengkah ari Pengkalan Klang, Kota Kinabalu (Sabah), Kuchhing (Sarawak), Indonesia enggau Thailand.

Chairman Eksekutif iya, Datuk Che Azizuddin Che Ismail madah, kapal Arca Transline tu deka bejalai ninting minggu lalu deka sangkai di menua Sabah enggau Sarawak dua kali dalam sebulan.

"Kenyau beoperasi berengkah bulan Oktober taun tu tadi, kapal Arca Transline ke ngembuan pemerat 38 ribu tan enggau 175 meter pemanjai tu udah sangkai di Kuching bisi enam kali.

"Kapal tu ulih ngundan kira 4000 buah kerita pengangkut sekali bejalai ba tasik lalu tu siti servis ke chukup manah ngagai industri automotif ba menua tu," ku iya.

Iya madah munyi ngagai pemberita pengudah tembu Pengerami Makai Malam Ngelancharka Pejalai Kapal Arca Transline (Sarawak) Sdn Bhd ke diatur ba Hotel Margherita di Kuching.

Nangkan ke nya, Che Azizuddin madah berindik ari pemanah gawa ekonomi menua enggau pemansang menua ngujungka penyampau kerita ke patut dianjung ngagai menua Sabah enggau Sarawak nambah ngagai enam ngagai tujuh ribu dalam sebulan.

Timpuh pejalai kapal tu ari pengkalan Klang ke Kota Kinabalu ngambi awak empat hari lalu pejalai kapal ari Kota Kinabalu ngagai Kuching enggau Kuching ngagai Klang semina begunaka awak bela dua hari, ku Che Azizuddin.

"Nya alai, servis kapal ke bansa tu beguna amat nitihka peneka mensia mayuh ke deka meda barang dikeka sida ulih datai enggau jampat," ku iya seraya madahka naka ke diatu industri ngangkut barang (kerita) di Malaysia semina dimonopoli tiga bengkah kompeni aja.

Berebak enggau nya, Che Azizuddin madah, sida merambu deka nempa kaul enggau Pengkalan Bintulu dalam ngerembaika pengawa dagang servis berangkutka kerita.

"Enti udah bisi kaul enggau Pengkalan Bintulu dia kapal tu meseti mai 500 buah kerita sekali sangkai ba Pengkalan Bintulu, lalu pemadu mimit pan meseti mai 50 buah," ku iya.

Arca Transline ditumbuhka kena 28 Ogos 2001lalu nyediaka servis logistik beanjungka barang ungkup mayuh bengkah industri nyengkaum automotif.

Kompeni ti bepengkalan ba Shah Alam, Selangor tu ngembuan kaul ke terit enggau kompeni-kompeni besai ba Malaysia.

Udah anak ada terus gaga surat peranak

"Enti enda dirijista jampat anak sida nya tentu deka dituntung mayuh penanggul nyema udah besai jemah baka maya deka besekula, minta kereja tauka utai bukai ketegal nadai tingki enggau dokumen ke bukai."
Datuk Hajah Fatimah Abdullah
Menteri Pengintu Pendiau, Orang Indu enggau Pemansang Ruang Bilik

Raban orang indu ke baru udah beranak dilalau ngambika terus ngerijista pengada anak diri ngagai klinik tauka hospital ke semak awakka anak sida nya muntang bulih surat pengada.

Menteri Pengintu Pendiau, Orang Indu enggau Pemansang Ruang Bilik, Datuk Hajah Fatimah Abdullah madah, pekara ke pemadu beguna sekalika indu ke beranak nya meseti ngerijsta pengada anak sida enda ngira sekalika sida (indu) nya udah kahwin tauka bedau.

"Enti enda dirijista jampat anak sida nya tentu deka dituntung mayuh penanggul nyema udah besai jemah baka maya deka besekula, minta kereja tauka utai bukai ketegal nadai tingki enggau dokumen ke bukai.

"Nyema laki sida gawa ba endur bukai, bini meseti minta saup Pengulu ngaduka pengawa ngerijista anak ke baru ada," ku iya.

Fatimah madah munyi nya rambau dirandau pengarang berita ba Opis Baitulmakmur pengudah tembu Aum Komiti Isu Anak Mit Enggau Orang Ke Nadai Ngembuan Dokumen Surat Peranak sereta Status Peranak Menua, di Kuching.

Berebak enggau nya, Fatimah madah, pekara bukai ke bisi diperundingka dalam aum nya baka berundingka pengawa ngiru anak mit ke udah dibuai indai (anak ke dileka sengapa).

"Anak ke udah dibuai tu ulih diiru lebuh sida agi mit, taja baka nya anak mit nya meseti udah digagaka dokumen (surat peranak),"ku iya.

Naka ke diatu, penyampau anak mit ke udah mujur digagaka dokumen bisi 13 iku, lalu 13 iku agi bedau tembu diadu, ku Fatimah.

Nitihka penerang ari Penulung Pegawau Pengerijista Bansa (JPN) Kuching, Salmi Kiprawi madah, ungkup anak mit ke ditemu sebarang endur JPN deka ngerijista dokumen anak mit nya nitihka nama palan iya ditemu enggau maya hari bulan iya ditemu.

"Ngagai anak mit ke ditemu lalu dirijista ulih Opis Pengelantang Pendiau (JKM), dia JPN deka ngaduka dokumen anak mit nya nitihka nama palan iya ditemu enggau maya hari bulan iya ditemu tang status peranak menua iya enda dipasukka maya nya laban deka ditentuka dulu," ku Salmi.

Sama bisi datai ngulu pengawa baum ke diatur Opis Menteri Pengintu Pendiau, Orang Indu enggau Pemansang Ruang Bilik tu iya nya pengari Imigresen, Pengulu, Kunsil, Society for Kuching Urban Poor (SKUP) enggau JPN.