Sarawak untung laban agi mayuh pesaka rampa menua

LUNDU : Sarawak ngembuan pengelebih laban bisi reta pemansang di negeri tu, ukai semina bisi ba menua bandar, tang mega bisi ba menua pesisir lalu pekara tu nyukung projek pemansang ke udah diperambu perintah.

Sapit Menteri Besai, Datuk Patinggi Tan Sri Muhyiddin Yasin madah, mayuh endur ba sitak menua pesisir di negeri tu ngembuan pesaka rampa menua ke berega baka tanah enggau tanah ke bedau ditegu enggau diperimba.

"Penau pemansang sesebengkah negeri bepanggai ba kandang menua pesisir lalu menua Sarawak ngembuan semua penau nya laban ke agi mayuh sumber ke tau dikemansang sereta nulung nambahka penatai pemisi rayat," ku iya.

Iya madah munyi nya rambau Pengerami Tuai Begulai Enggau Rayat ba Sekula Sekondari (SMK) Lundu, ditu kena Hari Lima tu tadi.

Muhyiddin madah, penau pemansang baka sektor dagang temuai ke bisi ba menua Santubong patut terus dikemansang laban nya ulih nambahka penatai pemisi rayat.

"Genap rayat ba menua tu taja pan diau jauh ba menua ulu tang sida enda tau dilengka, utai tu meh nyadika pugu pengawa Barisan Nasional (BN) kenyau ari kelia," ku iya seraya madahka perintah endang enda putus meri bantu ngagai raban orang bumai, orang bekebun, orang berikan, enggau orang ke bekebun mit dikena nambahka rejeki sida.

Nangkan ke nya, iya madah raban penyakal sigi suah bekelikuhka pekara kelebih agi bekaul enggau isu rega barang ke niki, kebendar nya chara sida dikena nguingka penemu rayat awakka rayat ringat ngagai perintah.

Muhyiddin madah, sebedau isu rega barang niki, perintah udah ngatur mayuh bengkah program ngambika penatai pemisi rayat betambah.

"Bala penyakal semina landik bepolitik sereta bekelikuhka isu reha barang enggau chara nempa mayuh cherita tang kebendar iya menua Malaysia aja menua ba dunya tu ke agi nyaga rega barang laban kasihka rayat," ku iya.

Berebak enggau nya, dikena ngurangka penyuntuk rayat, perintah udah ngena sekeda ari kuasa undang-undang enggau chara ngemataka rega barang ba makit nengah Akta Kawalan Harga 1946.

"Anuar semina landik ngeleseyka pengawa perintah sereta landuk bejaku aja, laban utai ke bansa tu meseti bisi bukti, rayat nyangka enda nemu pekara tu.

"Rega ikan, sayur, kobis, undang, manuk, tepung, tusu enggau mayuh barang ke diguna ninting hari ke bukai dijaga rega," ku iya.

Nya alai, iya madah komiti kabinet bela udah setuju ngaga sekeda pemutus sereta ngiga sekeda atur baka ni deka nulung rayat nambahka penatai pemisi sida seraya mutarka penanggul suntuk belanja.

Sama bisi datai iya nya Sapit Kepala Menteri Datuk Patinggi Tan Sri Alfred Jabu Numpang; Menteri ba Opis Kepala Menteri (Pekara Khas)  Tan Sri Datuk Amar Haji Adenan Haji Satem enggau sekeda pemsai ari perintah besai enggau perintah negeri.

Taib puas ati meda pemansang menua Sarawak

KUCHING : "Aku chukup berasai gaga meda pemansang ke udah digaga ba menua Sarawak dalam timpuh pengudah 33 taun," ku Kepala Menteri Sarawak Pehin Sri Haji Abdul Taib Mahmud.

Kelimpah ari pemansang, aku mega berasai gaga meda rayat di negeri tu chukup balat ngemratka penyerakup enggau pangan diri. Bukti iya, malam tu kitai meda beribu-ribu iku mensia datai nyengkaum Melayu, China, Iban sereta bansa bukai sama enggau ngerami Chap Goh Mei," ku tandu Taib.

"Utai ke bansa tu chukup manah dipeda mandangka kitai di menua tu ulih segulai sejalai entara pupu raban bansa. Rayat kitai ditu mega begulai enggau pangan diri enggau nadai penangi ati.

"Pekara tu ngujungka tiap-tiap kali datai musin pengerami semua orang ulih ngenataika diri sama enggau nyambut pengerami," ku Taib seraya muji penyerakup ke sebaka bisi dipeda ba kandang menua pesisir baka ba kampung-kampung.

Iya madah munyi nya rambau ngulu Pengerami 'Ramah Tamah Taun Baru China 2014 ke diatur Kunsil Bandar Kuching Selatan (MBKS) ba mua Dewan Masyarakat Jalai padungan ditu malam Hari Lima tu tadi.

Nangkan ke nya, Taib muji pengawa ke udah dikereja MBKS ti betuaika Datuk Bandar MBKS empu iya nya Dato James Chan Khay Syn laban udah bebendar ngemansangka sitak menua Kuching.

Sama bisi datai ba pengerami tu iya nya bini Kepala Menteri Puan Sri Ragard Kurdi Taib, Menteri Pemansang Infrastruktur enggau Penyambung Datuk Seri Micheal Manyin Jawong, Menteri Pengintu Pendiau, Orang Indu enggau Pemansang Ruang Bilik Datuk Hajah Fatimah Abdullah, Datuk Bandar Kunsil Bandaraya Kuching Selatan Dato James Chan Khay Syn, Datuk Bandar Dewan Bandaraya Kuching Utara Datuk Haji Abang Wahap Abang Julai, Penulung Menteri Dagang Temuai Datuk talip Zulphilip enggau Chairman pengatur program Dato Hajah Hanifah Taib-Alsree.

Lebih 10, 000 iku temuai bisi datai ngulu pengerami ke diatur MBKS malam nya. Entara aktiviti ke chukup narit ati bala temuai iya nya mandangka tanda Singa enggau meletupka merechun bungai api.

Berebak enggau pengerami nya, Taib nyadaka tulung geran RM100, 000 ngagai MBKS dikena sida nyalin bup ke baru tembu dichelak ke dikumbai 'A Liveable City- Kuching South Perspective" ngagai Jaku Melayu.

Bisi 53 palan eksibisyen bisi dibuka rambau pengerami tu nyengkaum ari opis-opis perintah, kompeni-kompeni enggau gerempung ke bisi ba menua tu baka KTS Group, Celcom Axiata Sdn Bhd, Sarawak Energy Berhad, ASTRO, Ibraco Berhad, The Banquet, Bank Simpanan Nasional, Padungan Community Association, Magnum 4D (E.M) Sdn. Bhd, Opis Pengelikun Raban Bansa Sitak Simpang Tiga, Li Garden, 360 Hotel, PETRONAS, The Federal of Kuching & Samarahan Divisions Chinese Association, Usaha Cendera Sdn Bhd, Normah Medical Specialist Centre enggau mayuh agi ke bukai.

Udah nya, bisi 29 bengkah kompeni ke melanja pengerami nya baka Naim Cendera Holding Berhad, Cahya Mata Sarawak, Harwood Timber Sdn Bhd, Solid Hartabina Sdn Bhd, Kenbest Sdn Bhd, Waja Merdeka Sdn. Bhd, Edaran Tan Chong Motor (Sarawak) Sdn Bhd, I-Properties JTL Sdn Bhd, Silverdrum Corporation Sdn Bhd, R.H Vision Sdn Bhd, Hock Seng Lee Berhad, Trienekens (Sarawak) Sdn Bhd, CIMB Bank, Ta Ann Holding Bhd, Bodco Engineering & Contruction Sdn Bhd, Titanium Project Management Sdn Bhd enggau mayuh agi ke bukai.

LIGA SUPER 2014

15 FEBUARI 2014

Sarawak nyatup Perak (Bisi ba TV1)
Stadium Negeri, 8.45 malam

ATM nyatup Lions XII
Stadium MP Selayang, 8.45 malam

Terengganu nyatup Pahang
Stadium Sultan Ismail, 8.45 malam

Johor DT 1 nyatup Selangor
Stadium Larkin, 8.45 malam

Kelantan ngatup T-Team
Stadium Sultan Muhammad IV, 8.45 malam

Guli Felda United FC Mohd Farizal Harun (belakang) berebut enggau pemain Sarawak Rashid Aya rambau main Mangkuk FA ba Stadium Majlis Perbandaran Selayang. Bernama.

 

 

 

Menua pesisir bela ampit pemansang, ku Muhyiddin

Perintah nadai bechiping meri pemansang
   
LUNDU : Sapit Menteri Besai Datuk Patinggi Tan Sri Muhyiddin Yassin madah perintah enda kala ninggalka pendiau pengidup rayat ba menua pesisir laban polisi ke dikena perintah ngelama tu deka meda rayat ke diau ba menua bandar enggau ba menua pesisir sama ngasaika pemansang.
   
Iya madah rayat ke diau ba menua pesisir nadai ditinggal ari arus pemansang ke digaga perintah.

"Perintah Barisan Nasional (BN) bebasaka sukung ari rayat menua pesisir ngagai perintah. Nya alai, ambika chunto lebuh aku nemuai ngagai negeri tu aku deka ngabas rayat ba menua pesisir laban aku deka nemu penusah sida," ku iya rambau Pengerami Tuai Begulai Enggau Rayat ke diatur ba Dewan Sekula Sekondari Lundu, ditu sehari tu.

Sama bisi datai Sapit Kepala Menteri Sarawak Datu Patinggi Tan Sri Alfred Jabu Numpang, Sapit Menteri Dalam Negeri Datuk Dr Wan Junaidi Tuanku Jaafar enggau Menteri ba Opis Kepala Menteri (Pekara Khas) Tan Sri Datuk Amar Adenan Satem.
   
Nengah pemansang ke digaga perintah, Muhyiddin ngasuh rayat ba menua pesisir beambi ulih ari pemisis pengeraja asal ke bisi ba menua sida dikena ngangkatka penatai pemisi diri empu.
   
"Pengeraja asal tu baka utai tumbuh, utai tanam, utai idup ba tasik ke ngembuan penau meri penatai pemisi ngagai rayat ba menua pesisir.
   
"Tambah mega bisi bantu diberi perintah ngagai orang bumai, orang berikan enggau orang bekebun mit dikena nambahka penatai pemisi soda ba menua pesisir ungkup timpuh 20 ngagai 30 taun ke deka datai awakka pengidup sida terus maju," ku  Muhyiddin.
   
Rambau pengerami nya, Muhyiddin ti mega nyadi Menteri Pelajar setuju meri nama balai sekula nya disebut nitihka nama bungai Pakma tauka Rafflesia iya nya 'Dewan Pakma' laban nyadika lambang Taman Negara Gunung Gading ke bisi ditu.
   
Berebak enggau nya mega, iya bisi nyadaka pemeri agih belanja RM1 juta dikena miki Sekula Primari (SK) Bumiputera Lundu ditu.
   

SELAMAT DATAI...Sapit Menteri Besai Tan Sri Muhyiddin Yassin dilaluka enggau ajat tradisional bansa Iban rambau datai ba SMK Lundu kemari. Bela bisi dipeda Jabu Numpang. Bernama.

Dulu ari nya, sama bisi bejaku iya nya Adenan ti mega nyadi Kaban Kunsil Negeri (Adun) Tanjung Datu madahkapelilih menua Lundu ditasau kena  22 Jun 1877 berasai betuah amat laban dilawa Muhyiddin.
   
Iya madah, Menteri Besai kedua iya nya Tun Abdul Razak Hussein kala datai ke menua Lundu lebuh bejadi Jalai Biawak kelia.
   
"30-40 taun dulu suba menua Lundu jauh bebida, enti deka datai kitu tepasa berantika feri, kadang-kadang ati berasai ringgat laban nganti kelalu lama, tang perintah BN udah ngaga jematan dikena ngemuntangka pejalai.

Kelimpah ari nya,  98 peratus sitak menua di Lundu, sereta 99 rumah-rumah udah ulih lawa nengah jalai alun," ku iya.

Adenan madah, kelimpah ari nya menua Lundu diuan 35,000 rayat sereta ngembuan mayuh produk ekodagang temuai baka menua ke bemunggu, enggau pulau-pulai ke manah.
   
"Kelimpah ari nya, Kompleks Kastam, Imigresen enggau Kuarantin (CIQ) ba Biawak deka narit mayuh temuai ke menua Lundu," ku Adenan deka nukar penuduk Pehin Sri Abdul Taib Mahmud nyadi Kepala Menteri Sarawak ke baru berengkah 1 March tu ila enti Taib udah badu kena 28 Febuari tu.Bernama.

Rayat Sarawak nyukung perambu perintah besai

LUNDU : Rayat Sarawak meri sukung ke penuh ngagai perintah ke deka bebendar ngemansangka menua Malaysia enggau negeri tu.

Sapit Kepala Menteri Datuk Patinggi Tan Sri  Alfred Jabu anak Numpang madah, sukung ke penuh ari mayuh bengkah program ke udah diperambu perintah besai nya deka meri penguntung ngagai semua orang.

"Perintah besai deka majak enda putus meri bantu ngagai negeri tu nyengkaum ngagai menua Sabah,” ku iya.

Jabu ti mega nyadi Menteri Pemansang Menua Pesisir madah munyi nya rambau Sapit Menteri Besai Datuk Patinggi Tan Sri Muhyiddin Yassin Pengerami bejadi Dewan Serbaguna Sekula Sekondari (SMK) Lundu ditu sehari tu.

Iya madah tuju agih belanja ke diberi nya dikena ngemansangka sitak menua pesisir ba Sabah enggau Sarawak.

Iya mega meri terimakasih ngagai perintah besai laban ke udah beratika pemansang ba kandang menua pesisir.

Iya madah ngelama tu perintah besai enggau negeri semina ngemeratka pemansang ba menua bandar.

Tambah mega ku iya, diatu datai ba maya iya rayat ba menua pesisir ngasaika pemansang ke datai ari perintah.

Iya madah, pekara nya siti utai ke pemadu manah digaga perintah dalam ngemansangka menua pesisir sereta meri peluang ngagai rayat mayuh ngasaika pangka pemansang ari perintah.

Nya alai, iya bedanji deka nyukung semua pengawa pemansang ke digaga ba kandang menua pesisir.

“Baka nya mega, kami deka meri sukung ke penuh ngagai parti kompenan laban ke udah bebendar nyukung perintah," ku tandu Jabu.

Jabu madah, bala kaban komponen parti udah bedanji neruska semua pengawa ke udah dipejalaika Kepala Menteri Pehin Sri Haji Abdul Taib Mahmud.

Iya madah, Kepala Menteri Pehin Sri Taib udah mayuh ngaga pemansang enggau ubah ba menua tu sekumbang iya nyadi Kepala Menteri.

Nangkan ke nya, iya madah, nengah pengawa ke di digaga  Taib, rayat diatu ngasaika pengelantang enggau penyenang, iku likun enggau nadai pennyarut dalam politik.

Iya mega ngemeratka pekara pelajar bala nembiak ba negeri tu laban deka meda bala nembiak di menua tu nyadi mensia ke menyana jemah ila.

Iya madah bala nembiak nya patut diberi peluang nguluhka pemandai sekula nyentuk ngagai tikas ke pemadu tinggi ngambika tau nyadi rayat
Malaysia ke bepenemu dudi hari ila.

Iya mega ngarapka Kepala Menteri baru udah tu iya nya Tan Sri Datuk Amar Adenan Satemulih neruska pemujur ba menua Sarawak.

Kompeni Wilmar badu meli minyak sawit Sarawak

KUCHING (14 Feb 2014): Sebengkah kompeni besai penapis minyak sawit Sarawak udah ngemansutka penerang badu meli minyak sawit ari kebun sawit enggau tanah kerapa ke udah diperesi berengkah taun 2015 tu ila laban ke disebut ngeruga rampa menua.

Menteri Pemansang Tanah Tan Sri Datuk Amar James Temut Masing madah, kompeni Wilmar International Limited ke bepengkalan ba Singapura nya udah ngemansutka pemutus nya ngagai negeri tu kena pun bulan Disember tu tadi.

"Nya alai, laban tebal agi kelapa sawit di negeri tu ke ditanam ba tanah kerapa ke udah dperesi, reti nya sida enggai agi meli ari kitai.

"Sida tau ngiga sawit ke ditanam ba padang pasir Sahara enti bangat enda tau meli sawit ke ditanam ba tanah kerapa, " ku Masing seraya ke betundi.

Masing madah munyi nya rambau Aum Pengarang Berita ke diatur ba opis iya di Tingkat 5, Baitulmal ditu sehari tu.

Ba sebengkah agi surat ke diterima sehari tu,  Wilmar madah berengkah taun siti nyin ila, sida deka badu meli minyak sawit mata ari kebun sawit ke ditanam ba "kandang menua ke ngundan mayuh karbon" enggau ari kebun sawit ke ditanam ba tanah kampung sebedau taun 2005.

Masing madah, Wilmar ke ngempu sebuah kilang pemantis minyak sawit ba Bintulu lalu beoperasi kenyau lebih 10 taun ke udah diatu meli 45% ari minyak sawit mata Sarawak (MSM) enggau iya ke udah dipantis.

Masing madah, iya ulih ngasaika pemutus Wilmar nya digaga nyangka berindik ari Kimpin Nyekat Minyak Sawit - Malaysia nengah chara besemekih enggau produk bungai matahari sereta pengeluar kachang soya ba Eropah enggau Amerika Syarikat.

"Aku enggau nimbal penemu sida (ti chukup nanggika pengelikun rampa menua). Amerika Syarikat empu menua ke pemadu balat ngamahka menua. Sida mega betebangka tanah kampung dikena betanamka bungai matahari kachang soya.

"Diatu sida benung nguna produk bungai matahari enggau kachang soya dalam ngemansangka ekonomi menua dikena ngeleseyka Sarawak. Perintah negeri enggai alah laban sida bekaul enggau pekara tu," ku Masing.

Laban kompeni Wilmar nyadi sebengkah pembeli minyak sawit mata Sarawak ke pemadu besai, ditarit pansut ari negeri tu, kitai tentu deka rugi besai iya nya lebih kurang 1.4 juta tan minyak sawit tauka dipulai ngagai mata duit lebih kurang RM3.5 bilion.

Masing madah, enti utai nya amat nyadi sida deka ngiga orang bukai meli minyak sawit ari negeri tu baka pemeli ari menua China enggau India.

Kompeni ke sama bisi ngembuan puku ba kompeni Wilmar iya nya kompeni Perlis Plantations Bhd , HSBC , Citibank enggau Morgan Stanley Asia.

Masing madah, taja baka nya pemutus Wilmar nya deka meri pangka ke besai ngagai Sarawak laban deka meri bekai ngagai program munaska penyeranta ba negeri tu kelebih agi ba kandang menua pesisir.

Kira 17,578 iku orang bekebun mit bisi masuk program munaska penyeranta lalu dipelabaka penguntung sida setaun asil ari pengawa bekebun nanam sawit iya nya RM3, 328 setaun tauka RM227 sebulan.

Lebih kurang 41 buah kilang ke nyual MSM ngagai Wilmar, mega bisi ngasaika bekau ari pemutus tu.

"Nya alai, kami ngasaika pekara tu chukup serius. Pendiau pengidup rayat ke diau ba menua pesisir endang patut diperunding lalu nadai siku orang ulih nagang pengawa betanamka sawit ba negeri tu," ku Masing.

Naka ke diatu, penyampau tanah di menua Sarawak ke udah kena lamun dikena nanam sawit iya nya 90,607.30 hektar.

KUCHING MARATHON 2014 diatur 17 Ogos 2014

KUCHING : Dikena ngisi awak kalendar Taun Nemuai Ke Malaysia 2014 enggau Taun Nemuai Ke Sarawak, dia Dewan Bandaraya Kuching Utara (DBKU) deka ngatur mayuh bengkah program dikena ngerinduka ati rayat mayuh ke nguan bandar besai tu.

Nitihka penerang media ke dianjung ngagai Utusan Sarawak kemari (Hari Minggu) madahka, nengah kerjasama Kuching Marathon Association (KMA), enggau DBKU terubah iya deka ngatur lumba Kuching Marathon 2014 kena 17 Ogos 2014 (Hari Minggu) ila berengkah pukul 6:00 pagi, ba Padang Merdeka, Kuching.

Entara kategori lumba ke bisi dipelabanka iya nya Katergori A : Belanja Penyauh 42.195 kilometer (km) ungkup Lelaki/Indu Tebuka, Lekaki/Indu Veteran (45 Taun Ke Atas) enggau Lelaki/Indu Nasional ; Katergori B : Belanja Penyauh 21 km ungkup Lelaki/Indu Tebuka, enggau Lekaki/Indu Veteran (45 Taun Ke Atas) ; Katergori C : Belanja Penyauh 10 km ungkup Lekaki/Indu (15 Taun Ke Atas) ; enggau Katergori D : Belanja Penyauh 5 km ungkup Lekaki/Indu Tebuka (12 Taun Ke Atas).

Orang ke ngerijista diri tumu dibuka berengkah 21 Januari 2014 nyentuk 28 Februari 2014 deka diberi diskaun. Udah nya, 300 iku peserta keterubah ngerijits diri mega kena 21 Januari 2013 (Hari Dua), ba Plaza Merdeka ungkup kategori Belanja Penyauh 42 km enggau 21 km deka diberi baju pandak  Kuching Marathon 2014 pechuma ke dipelanja Trinity Hub.

Barang sapa ke deka nyereta pengawa lumba tu datai meh ngagai Plaza Merdeka kena 21 Januari 2014 (Hari Dua) lalu ngerijista diri. Kelimpah ari nya laman web Kuching Marathon 2014, www.marathonkuching.com deka dilancharka maya Hari Dua nya ila.

Penerang ke silik ulih betanya terus nuju Puan Noraini Karim Abdillah, ke megai tanggung pengawa nyadi Penyambung enggau Pemansang Raban Bansa (CRD), DBKU ngena lumur 082-446688 sambung 131 tauka 132.

Tanglung lambang pengerami TBC

KUCHING : Berserimbai enggau Pengerami Taun Baru China (TBC) 2014 ke deka datai, Dewan Bandaraya Kuching Utara (DBKU) mujur masang 2,500 igi Tanglung mit enggau 50 igi Tanglung besai berengkah malam 14 Januari tu tadi.

Semua Tanglung ke dipasang tu asil ari pemeri Kaban Dewan DBKU, Datuk Wee Hong Seng lalu disua ngagai pengereja pengawa DBKU ngambika ulih dipasang ba beberapa palan ke engkeman di Bandaraya Kuching.

Entara palan-palan ke alai DBKU masang Tanglung tu iya nya ba Esplanade Kuching enggau penyampau Tanglung 1,000 igi, ba Jalai Tun Openg (500 igi), Jalai Pearl (500 igi), Lebuh India (400 igi), Khai Joo Lane (100 igi), enggau ba Padang Merdeka (50 igi).

Pengawa bejadi lalu ngidupka lampung Tanglung malam nya dipenyadi Datuk Bandar Kuching Utara, Datuk Haji Abang Abdul Wahap Abang Julai bepalan ba mua Plaza Merdeka, ditu.
Sama bisi datai iya nya iya nya Pengarah DBKU, Dr. Saadiah Abdul Samat enggau bala pegawai kanan DBKU.

Lebuh ke dirandau media pengudah tembu pengawa, Abdul Wahap madah ngarapka ba taun 2014 tu, DBKU deka neruska mayuh pemujur ari taun-taun ke udah.

"Nambahka ke nya, aku ngarapka rayat menua Kuching terus bekerejasama nyukung pengawa ke dikereja DBKU dalam neruska pengawa sereta nyediaka pemanah servis bekualiti.

"Pia mega aku ngarapka pemansang ke digaga di menua Kuching setipak enggau konsep Kuching Clean, Beutiful, and Safe (CBS) Enchancement Plan 2013 -2017 baka ke udah dipenyadi Kepala Menteri Pehin Sri Haji Abdul Taib Mahmud pun taun siti ke udah," ku iya.

Anang leju ngelatih anak nyadi tuai

KUCHING : Nembiak sekula endang nyadi aset ke beguna ngagai menua jemah lalu apai indai, bala pengajar enggau bala tuai-tuai raban bansa patut bekerejasama ngelatih nembiak nyadi ketuai.

Menteri Kereja Raya Datuk Fadillah Yusof madah, nembiak sekula ke ngembuan pemereti ati deka ulih besemekih enggau orang bukai napi pemayuh pemar ke deka datai.

"Nya alai, aku ngarapka bala apai indai, bala pengajar sereta bala ketuai anang leju meri peransang ngagai bala anak ngambika sida majak landik ngereja pengawa sereta ulih dikarap nyambung pemansang menua dudi hari," ku iya.

Fadillah ti mega nyadi Kaban Parlimen Petra Jaya madah munyi nya rambau Nyuaka Bantu Besekula Ngagai Nembiak Sekula Primari (SK) Tan Sri Datuk Haji Mohamed, ditu kemari (Hari Dua).

Nangkan ke nya, Fadillah ngelalau semua apai indai nembiak enggau bala pengajar ngambika terus ngajar bala anak ngetanka penyerakup enggau pengelantang ba menua tu.

"Laban ke diau ba menua diuan mayuh pupu raban bansa, kitai meseti bebasaka pangan diri ngambika terus ngasaika pengelantang enggau penyenang ba menua tu," ku iya.

Rambau pengerami tu, bisi 1080 iku nembiak nerima bantu besekula. Penyampau staf ke gawa ba sekula nya bisi 80 iku nyengkaum raban pengereja pengawa dalam opis.

SK Tan Sri Datuk Haji Mohamed betuaika Kepala Pengajar Hasbi Shamat sereta bisi ngembuan tiga buah kelas pra sekula enggau empat buah kelas pelajar khas.

Sama bisi datai ba pengerami tu, pengari Kepala Pengajar Harun Ismail, bala pengajar enggau bala apai indai nembiak.

Rega barang di Sarawak enda tau ditiki sengapa

KUCHING : Operasyen ngemataka rega barang ari ke ditikika orang dagang sepeneka ati deka dipejalai nyentuk ngagai ujung taun tu, ku Kepala Direktor Opis Dagang Dalam Negeri Enggau Pekara Bebeli Barang (PPDNKK) Sarawak Stanley Tan.

"Ops Harga udah dilanchar Menteri Dagang Dalam Negeri Enggau Pekara Bebeli Barang Dato Sri Hasan Malek kena 6 Julai 2013 lalu pengawa tu deka dikemeratka agi taun tu.

"Tu endang atur dikena mutarla isu rega barang ari ke ditiki orang dagang rambau musim pengerami," ku iya seraya madahka naka ke diatu agi nadai orang dagang ditemu nikika rega barang ba Sarawak.
Stanley ti mega dipadu nyadi direktor baru PPDNKK Sarawak madah munyi nya ngagai pemberita pengudah bejalaika pengawa Ops Harga ba Medan Niaga Satok ditu kemari (Hari Satu).

Stanley madah, operasyen Ops Harga dipejalaika serentak  141 iku raban opis bekuasa pagi nya (Hari Satu) ba semua lapan pampang endur di Negeri Sarawak.

"Palan-palan ke diperesa baka tamu, kedai runchit, pasar besai, restauran enggau kedai makai.   
"Semua orang dagang dipinta mandangka rega barang enggau terang sereta enda ngasuh pemeli berasai saru maya meda genap barang ke bisi dijual.

Berebak enggau nya, Stanley ngelalau mensia mayuh ngaga ripot enggau lengkas ngagai opis KPDNKK nyema bisi tepedaka orang dagang nikika rega barang beserimbai enggau Pengerami Taun Baru China ke deka datai.

Barang sapa orang dagang ke nadai betanggungjawap ditemu ngelanggar atur Seksyen 21, Akta Kawalan Harga dan Antipencatuan 2011 ulih kena ukum undang-undang.

Ngagai orang dagang ke nadai mandangka rega barang ulih diukum duit nyentuk ngagai RM50,000 tauka dijil enda ngelui dua taun. Udah nya kompeni ke ditemu besalah ulih diukum nyentukngagai RM100,000.

Kelimpah ari nya, raban bekuasa mega ulih nangkap orang dagang ke besalah nitihka Akta Timbang dan Sukat 1972, Akta Prihal Dagangan 1972 enggau Akta Perlindungan Pengguna 1999 bekaul enggau isu rega barang enggau barang ke ditimbang.

Sepemanjai Ops Harga udah dipejalai ungkup negeri Sarawak semina ngerikod 14 iti kes iya nya 12 kes ditemu nyadi ba Kuching, siti kes di Miri enggau siti kes di Sri Aman, ku Stanley.
Sama bisi datai nyereta operasyen tu bala staf KPDNKK enggau bala staf opis bekuasa bukai ke besangkut paut.

Dini penepan lima pengari rayat SUPP?

KUCHING : Kini penepan lima iku Kaban Kunsil Negeri (ADUN)  Parti Rayat Seati Sarawak (SUPP) deka sangkai nyema parti sida nya dikinsil Opis Pengerijista Gerempung (ROS).
   
Dua pampang parti nya, Piasau enggau Bekenu, nadai agi dibuka pengudah ROS nemu sida tu bisi besibil pengawa lebuh ke ngundi ba pampang diri empu maya taun 2011.
   
SUPP dipeda kitang-kitang pengudah ke nerima surat nunjukka kebuah, kena 6 haribulan Jan taun tu, ari ROS ba Kuala Lumpur, ke ngaush
parti politik ke pemadu lama ba negertu tu nya madahka kebuah parti sida nya enda patut dikinsil.
   
Taja baka nya, berebak enggau penyarut parti, kaban Parlimen Serian Datuk Seri
Richard Riot enggau empat iku agi pengari rayat bansa Dayak iya nya, Datuk Dr Jerip
Susil (Bengoh), Datuk Francis Hardin Hollis (Simanggang), Ranum Mina (Opar) enggau
Dr Jonical Rayong Ngipa (Engkilili) tetap nadai penanggul.   
   
Riot, ti mega ukai China keterubah mangku tanggung pengawa nyadi sapit presiden parti, madah, chara ke pemadu manah iya nya sida enda masuk champur ba penyarut nya tang nyerahka pekara nya ngagai ketuai parti lalu sida semina bekerejasama nguji nyelamatka parti nya.
   
"Semina nya aja utai ke disebut aku naka ke diatu," ku iya madah ngagai Bernama lalu iya agi bedau berunding pengawa ke deka digaga udah tu nyema parti nya dikinsil.
   
Ranum, ti dikaitka enggau raban betuaika chairman SUPP Pampang Sibu, Datuk Seri Wong Soon Koh ke udah dikemadu madahka, kaban parti endang berasai tusah ati nyema partu nya dikinsil.

Iya ti mega nyadi Chairman SUPP pampang Opar madahka ketuai enggau kaban pampang agi mengkang angkun ngagai parti sereta nyeliahka diri ngaga perambu beguai-guai pansut ari parti.
   
"Chara ke pemadu manah diatu nyerahka pekara nya ngagai ROS ngambi mutuska nasib parti, lalu kami deka terus bekereja ungkup pengundi enggau naka pemanah," ku iya.
   
Perunding sosio-politik Datuk Peter Minos madah, peklara ke pemadu manah pengari bansa parti Dayak nya masuk ni-ni parti parti komponen Barisan Nasional (BN) negeri - Parti Pesaka Bumiputera Bersatu (PBB), Parti Rayat Sarawak (PRS) enggau Parti Progresif Demokratik Sarawak (SPDP) nyema SUPP udah dikinsil.

"Nadai agi utai ke ulih dikejaku pengudah dua pampang parti dikinsil lalu komiti besai majak charut," ku ex Sapit Kepala Publisiti PBB nya.
   
Iya madah, diatu utai nya semina nyadi pekara pelajar nandu utai ke udah disebut dua taun ke udah ngambika tuai komiti besai SUPP berunding enggau manah-manah, bela nendurka pengangat asai ati sereta nyeliahka diri ngemansutka pekara ke nyadi dalam parti.
   
Minos ti ngasaika pekara nya agi ulih diputar madahka, utai ke nyadi ngagai SUPP patut nyadika chuan teladan ngagai semua parti komponen BN.
   
Nangkan ke nya, ex Sapit Presiden SUPP Datuk Yong Khoon Seng madahka diri chukup irau meda penanggul ke benung nuntung parti nya.
   
Yong madahka diri besedia ngajar dua bengkah raban ke benung belaya dalam parti nya nyema sida minta penemu ari iya bekaul enggau chara ngiga jalai nyelamatka parti.
   
Taja baka nya, iya nulak penemu bekaul enggau siti pekara nyema iya dikumbai nulung sida numbuhka parti baru nukar SUPP, seraya madahka iya udah pinchin ari pengawa politik.
   
Pengawa ke nginsil  dua pampang parti nya nadai ngeruga penuduk presiden parti Tan Sri Peter Chin enggau seketeri publisiti Datuk
Sebastian Ting.
   
Chin sebedau tu nyadi chairman pampang Piasau lalu Ting nyadi chairman pampang Bekenu. Bernama.

Saspek penchuri barang udah dipelawikka polis

KUCHING : Siku lelaki China beumur 54 taun enggau siku pekereja iya bisi ngabas sebuah setor sida ba Batu Tiga Jalai Rock lalu ngujungka seduai bisi tepedaka sebuah van burak ngerimbai setor nya.

Pekara tu nyadi urung pukul 1.30 lemai kena 15 Januari tu tadi. Lelaki China enggau anak kuli iya tadi terus ngempang van nya sereta mujur nangkap siku deriba van bebansa Melayu beumur 34 taun. Taja baka nya, siku agi saspek mujur ngelarika diri.

Seraban polis ke benung segau-segau bejalaika pengawa nagang kes jenayah ngerimbai endur nya berumban ngesah palan penusah pengudah neruma ripot.

Pengudah van nya diperesa, dia sida bisi tetemuka barang-barang ke dipenggi lelaki China enggau mayuh bengkah barang-barang ke bukai.

Kelimpah ari nya, van nya ditemu ngena lumur plat palsu. Entara barang-barang ke mujur dirampas iya nya sebuah van liteace, mayuh bengkah perengka dikena nyerungkai rumah, 40 kepin musik batu, lapan iti pala lampu, dua iti perengka kena nunu roti, siti drill, siti vakum enggau siti injin pam.

Penyampau rega barang ke dirampas lebih kurang RM50,000. Identiti saspek ke lari udah dikelala polis. Saspek udah diriman pengelama empat hari berengkah 16 ngagai 20 Januari tu.

Berebak enggau kes tu, Kepala Polis Pelilih Kuching, Asisten Komisioner Roslan Bek Ahmad lebuh ke dirandau media ba Indu Opis Pelilih Menua Kuching kemari (Hari Lima) madahka, kes dipansik nitihka Seksyen 457 Kanun Keseksaan lalu enti nyengala besalah ulih dijil enda ngelui 14 taun.

Nangkan ke nya, pengudah diperesa ai kemik saspek ditemu positih dadah bansa syabu (methapethamine).
Sama bisi datai ba Kepala Bahagian Pemansik Jenayah IPD Kuching, DSP Lim Bak Phai enggau Pemansik Operasyen, ASP Abdul Rahim Abdullah.

Pekereja perintah dipinta beintergriti maya kereja

KUCHING : Semua pekereja opis perintah patut ngembuan ulah intergriti ke tinggi dalam bejalaika tanggung pengawa awakka terus nyadi agen pengubah menua.

Seketeri Perintah Besai Sarawak, Datuk Yahaya Basimin madah, pemujur enggau penyulut dalam servis opis perintah ukai nyadika adan tang sebengkah pekara ke terus dipejalaika.

"Pemujur ke bansa tu, semina ulih dijapai nengah kerejasama enggau runding ke sepenemu entara servis opis perintah negeri enggau perintah besai sereta disaup pekereja pengatur pengawa dalam negeri.

"Utai ke patut iya nya kitai patut gawa bebendar, ngembuan penemu ti kreatif sereta ngurang ulah birokrasi," ku iya seraya madahka orang ke gawa perintah endang ulih ngangkatka nasip rayat enggau pendiau menua dudi hari sebaka enggau menua maju ke bukai.

Iya madah munyi nya rambau Pengerami Hari Servis Pekereja Opis Perintah 2013 ke diatur ba Palan Aum Borneo Kuching (BCCK) ditu kemari (Hari Dua).

Nangkan ke nya, Yahaya madah menua jam ke diatu begunaka pekereja opis perintah ke ulih ntihka peneka mensia mayuh nengah servis ke betul, lanchat, enggau beintergriti dalam mutarka penanggul, serebana enggau peminta rayat.

"Enggau chara tu, aku pechaya ba luar din mensia mayuh udah nemu enggau ngasaika semua penanggul tauka pengawa mutarka iya ukai agi diteju ngagai orang ke gawa perintah aja tang meseti nyadi tanggungjawap ke sama ditapi.

Nengah pengeransing pengawa raban pekereja opis perintah pengudah 50 taun merdeka dalam Malaysia, menua Sarawak dipeda nyengala mansang nengah asil penatai pemisi rayat entara ke pemadu besai ba menua Malaysia.

"Sarawak mega dipeda nyadi negeri chunto ari sukut pengelantang, pengelikun enggau penyerakup raban bansa asil ari polisi politik pemansang ke ditempa Pehin Sri Kepala Menteri (Abdul Taib Mahmud)," ku iya.

Yahaya mega madahka, Pelan Tranformasi ke manah ulih nambahka pemanah servis opis perintah nyengkaum ngubah ulah sekeda pekereja opis perintah ke pedis nerima ubah.

"Enti pekara tu mujur, iya tentu ulih ngadaka pekereja opis perintah ke reliable enggau fleksible nitihka peneka ke maya hari sebaka enggau jaku sempama 'enti tingg untung nyadi bintang, enti baruh agi tetap nyadi tekang intan.

"Berindik ari nya, kitai anang nyadi liabiliti tang nyadi pesaka ke beguna ngagai pengawa diri. Orang ke ngelanggar undang-undang enggau enda betul nguna kuasa endang patut diukum.

"Ngambika sida enda mudah silap ngereja pengawa, sida nya patut diberi latih ke chukup awakka ulih ngereja pengawa enggau meruan dudi hari," ku iya.

Taja pan, perintah ngembuan mayuh prioriti ke ngansak tang iya seruran ngemeratka peminta enggau pengelantang orang ke gawa perintah.

Nya alai, perintah setuju ngaduka mayuh bengkah skim pengawa, nyengkaum ari sukut gaji sereta peluang niki pangkat, lalu ngarapka orang ke gawa perintah bulih peransang maya bejalaika tanggung pengawa, ku Yahaya.

Dulu ari nya, tuju pengerami nya diatur dikena meri tanda ba ngagai sida ke udah mujur bejalaika tanggungpengawa enggau manah kelimpah ngingatka pemujur ke udah dijapai sepemanjai taun tu.

Sarawak alah nyatup Kelantan di Kuching

KUCHING : Tim main bol menua Sarawak puntan ngulihka sebarang poin pengudah ke alah besatup enggau tim Kelantan ba sebengkah pekit main bol ke diatur ba Stadium Negeri Kuching kena 25 Januari tu tadi.

Sarawak alah 0-1 ngagai tim Kelantan ba pengujung pekit main bol nya asil ari gol ke dipasukka pemain import Kelantan ari Liberia  iya nya Francis Forkey Doe ba minit ke-90.

Berindik ari nya, tim Sarawak diatu ba penuduk ke pemadu baruh dalam rintai pemutus Liga Super 2014, lalu tim Kelantan mangku penuduk pemadu atas enggau penyampau poin enam leka.

Rambau main nya diatu, tim Sarawak nyau deka tulihka sigi poin enti nyema seri 0-0 tang ari penyilap sekeda pemain ngujungka Sarawak puntan menggi sigi poin.

Udah nya ba main ke bukai tim kelab ari Terengganu iya nya T-Team mujur ngalahka tim Johor Darul Ta'zim (JDT) 1-0 ba Stadium Sultan Ismail Nasiruddin Shah, Kuala Terengganu nengah gol ti dipasukka pemain import ari Indonesia, Patrich Wanggai ba minit ke-71.
   
Kelimpah ari T-team, sigi agi tim kelab ke mujur menang iya nya tim Sime Darby FC mujur ngalahka Champion Mangkuk Sumbangsih 2014, Pahang 1-0, ba Stadium Majlis Perbandaran Selayang.
   
Asil ari pemujur nya Sime Darby bulih tiga poin berega ari gol ke dipasukka Fahrul Razi Kamaruddin ba minit ke-50.
   
Champion liga super taun siti ke udah nya nya tim Lions XII ari Singapura mega mujur ngalalahka tim Selangor 2-1 ba Stadium
Jalai Besai, Singapura.
   
Khairul Amri meri pengaga ari ngagai peminat main bol tim Singapura pengudah ke mujur ngemasukka gol ba minit ke-93 pengudah kedua-dua piak tim bela bekunsika sigi gol.
   
Tim Singapura endang dulu tepasukka gol nengah Shakir Hamzah ba minit ke-44 sebedau Selangor ke mujur ngemasukka gol nengah Fitri Shazwan Raduwan ba minit ke-57.
   
Ba Stadium Perak, Ipoh, tim Perak mega menang bulih tiga poin berega pengudah ke mujur ngalahka tim Terengganu 1-0, asil ari bol ke ditanduk pemain import ari Brazil, Eliel Da Cruz Guardiano ba minit ke-90.

Udah tu ila, ba main ti ketiga kena 28 Febuari tu tim Sarawak deka besatup enggau tim Sime Darby ba Stadium Negeri di Kuching. Ngarapka tim Sarawak kelebih pemain penyerang ulih bebendar agi bemain dikena ngubah penuduk ke diatu ari ti pemadu baruh ngagai penuduk ke lebih manah.

Badu kunselor lama diganti kunselor baru

KUCHING : Majlis Bandaraya Kuching Selatan (MBKS) udah ngemanduka tanggung pengawa lapan iku kunselor lama lalu maduka 14 iku kunselor baru nyadi kaban opis sida, apin lama ke udah.

Datuk Bandar MBKS, Datuk James Chan Khay Syn madah, ngagai bala kaban ex kunselor ke udah diketuka pengawa, ngarapka sida terus mujur dalam sebarang pengawa ke dikereja udah tu ila.

"Pemanah pengawa ke udah dikereja bala kita seruran dikenang lalu enggau peluang tu aku meri besai terima kasih.

"Aku mega deka meri tanda puji ngagai kaban baru kunselor ke udah dipilih lalu ngarapka kita ulih ngereja pengawa enggau manah-manah dalam meri servis ngagai mensia mayuh," ku iya.

Iya madah munyi nya rambau Pengerami Makai Malam Ungkup Kunselor Ke Badu diatur ba sebengkah hotel tebilang di Kuching.

Nyerumba pengerami nya, lapan iku ex Kunselor ke dirami lalu diketu nyadi kaban kunselor MBKS iya nya Johnson Tan, Barbara William Mawan, Kho Lee Leng,  Stephen Ngui, Ujang Himang, Kilat Beriak, David Toh, enggau Bong Lian Huan.

Johnson ke kala mangku pengawa nyadi Komiti Rampa Menua, Dagang Temuai, Trafik enggau Kereja Komiti Tetap ;

Barbara William Mawan ti kala mangku pengawa nyadi Sapit Chairman ungkup pengawa undang-undang enggau nyadi Kepala Komiti Tetap.

Johson enggau Barbara bela semilan taun udah nyadi kunselor lalu sereta dipadu berengkah 1 Febuari 2004 lalu ambis kena 31 Disember 2013.

Kho Lee Leng kala mangku pengawa nyadi Komiti Tetap Ranpa Menua, Dagang Temuai, Makit enggau Komiti Tetap Pengawa Dagang.

Stephen Ngui, siku kaban kunselor ke kala mangku pengawa nyadi Sapit Chairman ungkup Pengerai Rama enggau Lesen Komiti Tetap sereta nyadi Komiti Tetap Rumah Besai.

Ujang Himang kala diberi tanggung pengawa nyadi Sapit Chairman pengawa dagang enggau Komiti Tetap Kereja sereta mangku pengawa nyadi kaban pengerai mensia mayuh enggau komiti lesen.

Kilat Beriak , ahli ex- jawatankuasa untuk Pasaran & Petty Jawatankuasa Tetap Peniaga dan ahli ex- jawatankuasa untuk Perundangan & General Tujuan Jawatankuasa Tetap .

Semua sida empat iku tu bela udah gawa lima taun iya nya berengkah 1 Januari 2009 lalu ambis kena 31 Disemberi 2013.

David Toh, kala mangku pengawa nyadi Sapit Chairman pengawa undang-undang enggau nyadi komiti tetap mayuh bengkah pengawa (pekara wang enggau pasal kereja).

Kepenudi iya nya Bong Lian Huan ti kala mangku pengawa nyadi Komiti Pengatur Pengawa Besai enggau Komiti Tetap Rampa Menua sereta Dagang Temuai.

Bong dipadu nyadi kunselor berengkah 1 Januari 2010 lalu ambis kena 31 Disemberi 2013.

Badu ngalau antu dadah

KUCHING : Mensia mayuh dilalau ngambika terus besaup enggau raban polis ngemunaska antu makai dadah di negeri tu kelebih agi ba bandar besai ditu.

Kebuah pia laban tebal agi saspek ke ditemu ngereja penyalah ba kandang menua Kuching endang raban orang ke gian dadah bansa syabu, ku Kepala Polis Pelilih Kuching, Asisten Komisioner Roslan Bek Ahmad.

Iya madah munyi nya rambau dirandau media ba Indu Opis Pelilih Menua Kuching kemari (Hari Lima).

Taja baka nya, Roslan ngelalau mensia mayuh end aibuh berasai irau ati tang patut ngadang sereta nyaga reta tengkira diri empu.

"Sapa-sapa orang ulih nyadi orang jai nyema bisi peluang, nya alai kitai patut nutup peluang kelebih agi nyeliahka dipeda raban orang ke endang suah ngereja penyalah jai," ku iya.

Udah nya, Roslan bisi madah, kena 15 Januari tu tadi urung pukul 11.45 pagi seraban polis ke benung bejalaika pengawa segau-segau munaska penyalah jenayah ba kandang menua Stampin, Kuching bisi ngetan sebuah kerita Toyota Ipsum laban ke dipeda nyelai.

"Dua iku lelaki bansa China ke beumur 33 enggau 37 taun ke bisi dalam kerita nya ditangkap laban deka dipansik.

"Asil ari pengawa pansik, dua iku saspek nya dibai polis ngelawa sebuah rumah ba Taman Daya, BDC Kuching.

"Pengudah rumah nya diperesa, raban polis bisi tetemuka mayuh bengkah banrang ke dipelabaka barang churi asil ari pengawa nyerungkai rumah," ku iya.

Entara barang churi ke ditemu iya nya 10 iti jam, empat iti roadtax, tujuh bup pala tanah, koleksi duit syiling, dua hard disk, siti kamera, siti sony handycam, sebatang pen betulis nama Susan Grace Ben, duit keretas Malaysia enggau sebuah laptop.

Penyampau rega barang ke dirampas tu lebih kurang RM50,000.

Dua iku saspek ke udah ditangkap nya diriman pengelama empat hari berengkah 16 ngagai 20 Januari tu. Kes deka dipansik nitihka Seksyen 457 Kanun Keseksaan lalu enti ditemu besalah ulih dijil enda ngelui 14 taun.

Pengudah ke diperesa, dua iku saspek tu positif dadah bansa syabu.

Berebak enggau nya, Roslan ngelalau mansa ke bisi kala ngaga ripot lenyau barang ulih ngenataika diri ngagai balai polis Indu Opis Pelilih Kuching endur ngelala sereta ngambi barang sida ke udah temu.

Ba sebengkah agi kes ke nyadi ba endur bukai, Roslan madah kena 14 Januari tu tadi urung pukul 3.15 lemai maya siku pelajar indu beumur 14 taun enggau menyadi iya ke beumur 12 taun bedarat ba Jalai Bayor Bukit, dua iku nembiak tu dilawa dua iku lelaki ke nadai dikelala ngena motosikal.

"Siku saspek ngacukka pisu ngagai rekung nembiak indu ke tuai nya. Udah nya, indu nya ngiarka pisu nya lalu ngujungka lengan iya telih. Menyadi iya ke biak nyerauh minta tulung.

"Siku ari saspek nguji lari tang diempang sebuah kerita orang periman ti ngujungka saspek mujur ditangkap.

Roslan madah, kaban saspek ke lari mujur ditangkap polis ba menua Tabuan. Dua iku saspek nya beumur 20 enggau 29 taun. Udah nya, polis ngerampas sebuah motosikal  enggau senjata ke deka dikena saspek ngerumpak orang.

"Nadai pengerugi diripotka ba kes tu lalu kes deka dipansik nitihka Seksyen 394 Kanun Keseksaan laban nguji ngerumpak lalu ulih dijil enda ngelui 20 taun nyema ditemu besalah. Dua iku saspek tu benung diriman.

"Asil peresa ai kemik dua iku saspek tu positif dadah bansa syabu," ku Roslan.

Jaga manah pengelikun anak

KUCHING : Menteri Pemansang Orang Indu, Ruang Bilik enggau Raban Bansa Datuk Seri Rohani Abdul Karim madah lebih kurang 70 peratus isi  Undang-Undang Nembiak 2001 (Akta Kanak-kanak 2001) deka diubah ngambika ukum ke lebih berat deka diberi ngagai apai indai ke ilap dalam kes nyaga pengelikun anak diri empu.
   
Iya madah, perambu nya udah dianjung ngagai Luyar Menua ngambika diperati sebedau dibantai ba aum Parlimen.
   
"Perambu ubah tu udah disua ngagai Luyar Menua, Tepulai ngagai sida sekalika undang-undang nya diberi nama baru tauka dikumbai ubah laban mayuh pekara ke diubah iya nya lebih kurang 70 peratus.
   
"Kami melabaka nyema iya ulih diputar, undang-undang nya deka dibantai rambau aum Parlimen taun tu," ku iya.

Iya madah munyi nya ngagai pemberita rambau ngulu Pengerami Meri Basa Ngagai Media ke diatur Gerempung Pemberita Menua Kuching (KDJA) begulai enggau opis menteri ba sebengkah hotel tebilang di Kuching.

Nangkan ke nya, Rohani madah bekaul enggau pekara ubah nya sekeda ukum tambah deka diberi ngagai apai indai ke ilap baka bejera sida enggau chara ngereja pengawa ungkup mensia mayuh, kus apai indai enggau mendingka jaku ajar.
   
"Tuju kitai ngeletak ukum ukai medis sida tang dikena kitai bejera ngambika bala anak sida dijaga enggau meruan nitihka pematut," ku iya.

Berebak enggau pengerami nya, Rohani ngarapka program ke bansa nya ulih ngerapitka agi kaul entara raban pemberita enggau pangan diri.
   
Dulu ari nya, Presiden KDJA Sulok Tawie madah, raban media meseti mantaika penerang ke positif sereta betanggungjawap enggau utai ke dikarang sida.

"Anang sesekali mansutka isu-isu ke sensitif laban pekara nya ulih ngeruga pengelantang enggau pengelikun menua," ku iya seraya madahka taun 2014 tu deka nyadi siti taun ke pemadu kisuk ngagai bala raban media.

Entara aktiviti ke bisi diatur nyerumba pengerami tu iya nya bekaroake, enchabut tiket benasit sereta beperindang enggau dua iku artis di menua tu iya nya Urai enggau Stanley AF.

Sama bisi datai iya nya Kaban Kunsil Negeri (ADUN) Balai Ringin Snowdan Lawan, Sapit Direktor Pengeluar Program Negeri Fee Lin Chew, sereta bala raban media.

Kes nyerungkai rumah dikereja bala belacan

KUCHING : Sebuah kedai perengka lektrik ba Hakka Avenue Estate Penrissen ditu udah kena serungkai raban orang ke nadai dikelala (bala belacan) kena 10 Januari 2014 urung pukul 8.00 pagi.

Nitihka penerang tauke kedai nya, penusah tu nyadi pengudah ke meresa kedai, dia tauke tepedaka mayuh bengkah perengka lektrik lenyau nyengkaum duit.

Berindik ari penusah nya, penyampau pengerugi dipelabaka lebih kurang RM80,000.

Asil pansik enggau penerang sidi raban polis, dia polis mujur nangkap tujuh iku lelaki China ba mayuh bengkah endur beumur entara 20 ngagai 40 taun.

Semua saspek udah diriman pengelama tujuh hari berengkah 11 ngagai 17 Januari 2014.

Berebak enggau kes tu, Kepala Polis Pelilih Kuching, Asisten Komisioner Roslan Bek Ahmad lebuh ke dirandau media ba Indu Opis Pelilih Menua Kuching kemari (Hari Lima) madahka, asil pansik bala polis ngagai tujuh iku saspek raban polis mujur ngerampas barang kes iya nya tiga buah Televisyen LCD, siti kipas, sebuah van Ford chura burak, sebuah kerita kancil, sebuah kerita kenari, enggau mayuh bengkah barang ke dikena saspek nyerungkai rumah.

Penyampau rega barang ke mujur dirampas polis nya lebih kurang RM50,000.

Ba sebengkah agi penusah ke sebaka, asil ari penerang mensia mayuh dua iku lelaki China beumur 24 enggau 47 taun udah mujur ditangkap seraban polis kena 13 Januari 2014.

Dua iku saspek tu diriman pengelama empat hari berengkah 14 ngagai 18 Januari 2014.

Asil pansil polis raban saspek tu chukup aktif nyerungkai rumah kedai enggau opis ba kandang menua Kuching.

Saspek tu mega ditemu udah suah ngereja kes-kes jenayah lalu seduai deka dipansik nitihka Seksyen 457 Kanun Keseksaan ke ngundan ukum jil enda ngelui 14 taun.

Nangkan ke nya, asil peresa ai kemik semua semilan iku saspek tu endang positif dadah bansa Syabu (methapethamine).

Sama bisi datai ba Kepala Bahagian Pemansik Jenayah IPD Kuching, DSP Lim Bak Phai enggau Pemansik Operasyen, ASP Abdul Rahim Abdullah.

Pelantar Telaga Ai deka dimiki lengkas

KUCHING : Pelantar penyangkai perau ke rusak dipangka gelumbang besai di Telaga Ai deka dimiki lengkas nganti udah berandau enggau perunding kontraktor Majlis Perbandar Padawan (MPP), ku Kaban Kunsil Negeri (ADUN) Pantai Damai Dr. Abdul Rahman Junaidi.

Iya madah, pelantar ke tembu digaga ba taun 2001 nya berengkah singgit kenyau setaun ke udah lalu pengerusak ke balat nyadi lemai Hari Satu tu tadi pengudah pelepuk besai pelantar nya pechah.

"Aku minta orang kampung nguna pelantar ke bukai enti deka nurun ke pasar tauka singgah ba pantai dikena nyeliahka penusah ke enda disadang," ku iya.

Iya madah munyi nya ngagai pemberita pengudah tembu pengawa Nyuaka Laptop 1Malaysia ke diatur ba Dewan Seminar SIPEC ditu pagi kemari (Hari Dua).

Dulu ari nya, bisi 71 buah Laptop 1Malaysia mujur disua ngagai bala nembiak sekula enggau rayat mayuh ke diau ba kandang menua Pantai Damai.

Dr. Rahman Junaidi madah, tuju ke meri laptop nya ngambika rayat mayuh bulih mayuh penemu ke baru sereta penerang ke beguna nengah internet.

"KItai deka meda bansa kitai tu pintar IT (Teknologi Pemadah) sekalika nya laki, bini, anak tauka uchu semua patut landik bekenaka perengka IT. Dunyai ke maya hari tu majak berubah, kitai nuju pengidup ke lebih moden lalu dikumbai orang diatu dunya nadai bebinding.

"Tambah mega, rayat kitai (Pantai Damai) diau ba tengah-tengah bandar besai, nyadi kitai meseti nemu isu-isu ke nyadi ninting hari. Enggau nya, aku ngarapka bala penerima laptop 1Malaysia ulih bekenaka pemeri tu enggau manah-manah ngambika ulih meri penguntung ngagai kitai empu," ku iya.

Dr. Rahman Junaidi mega ngelalau rayat kelebih agi bala sida ke indu enggau bala nembiak ulih nguna pemeri nya dikena ngemujurka aktiviti dagang.

Sama bisi datai ba pengawa tu bala pengari ari Suruhanjaya Komunikasyen Multimedia Malaysia (SKMM), bala tuai raban bansa enggau bala penerima Laptop 1Malaysia.

KPDNKK seruran nyaga rega barang di Sarawak

KUCHING : Operasyen ngemataka rega barang ari ke ditikika orang dagang sepeneka ati deka dipejalai nyentuk ngagai ujung taun tu, ku Kepala Direktor Opis Dagang Dalam Negeri Enggau Pekara Bebeli Barang (PPDNKK) Sarawak Stanley Tan.

"Ops Harga (Operasyen 2.0) udah dilanchar Menteri Dagang Dalam Negeri Enggau Pekara Bebeli Barang Dato Sri Hasan Malek kena 6 Julai 2013 lalu pengawa tu deka dikemeratka agi taun tu.

"Tu endang atur dikena mutarla isu rega barang ari ke ditiki orang dagang rambau musim pengerami," ku iya seraya madahka naka ke diatu agi nadai orang dagang ditemu nikika rega barang ba Sarawak.

Stanley ti mega dipadu nyadi direktor baru PPDNKK Sarawak madah munyi nya ngagai pemberita pengudah bejalaika pengawa Ops Harga ba Medan Niaga Satok ditu kemari (Hari Satu).

Stanley madah, operasyen Ops Harga dipejalaika serentak  141 iku raban opis bekuasa pagi nya (Hari Satu) ba semua lapan pampang endur di Negeri Sarawak.

"Palan-palan ke diperesa baka tamu, kedai runchit, pasar besai, restauran enggau kedai makai.   
"Semua orang dagang dipinta mandangka rega barang enggau terang sereta enda ngasuh pemeli berasai saru maya meda genap barang ke bisi dijual.

Berebak enggau nya, Stanley ngelalau mensia mayuh ngaga ripot enggau lengkas ngagai opis KPDNKK nyema bisi tepedaka orang dagang nikika rega barang beserimbai enggau Pengerami Taun Baru China ke deka datai.

Barang sapa orang dagang ke nadai betanggungjawap ditemu ngelanggar atur Seksyen 21, Akta Kawalan Harga dan Antipencatuan 2011 ulih kena ukum undang-undang.

Ngagai orang dagang ke nadai mandangka rega barang ulih diukum duit nyentuk ngagai RM50,000 tauka dijil enda ngelui dua taun. Udah nya kompeni ke ditemu besalah ulih diukum nyentukngagai RM100,000.

Kelimpah ari nya, raban bekuasa mega ulih nangkap orang dagang ke besalah nitihka Akta Timbang dan Sukat 1972, Akta Prihal Dagangan 1972 enggau Akta Perlindungan Pengguna 1999 bekaul enggau isu rega barang enggau barang ke ditimbang.

Sepemanjai Ops Harga udah dipejalai ungkup negeri Sarawak semina ngerikod 14 iti kes iya nya 12 kes ditemu nyadi ba Kuching, siti kes di Miri enggau siti kes di Sri Aman, ku Stanley.

Sama bisi datai begulai enggau bala staf KPDNKK nyereta operasyen tu iya nya pengari ari Opis Betanam Betupi, FAMA, Opis Bekuasa Pelilih Menua (PBT), NGO, Operasyen Pengguna Negeri, Operasyen Pengguna Pelilih Menua, Gerempung Pengguna, Penghulu enggau Kaban Pengguna.