Tanglung lambang pengerami TBC

KUCHING : Berserimbai enggau Pengerami Taun Baru China (TBC) 2014 ke deka datai, Dewan Bandaraya Kuching Utara (DBKU) mujur masang 2,500 igi Tanglung mit enggau 50 igi Tanglung besai berengkah malam 14 Januari tu tadi.

Semua Tanglung ke dipasang tu asil ari pemeri Kaban Dewan DBKU, Datuk Wee Hong Seng lalu disua ngagai pengereja pengawa DBKU ngambika ulih dipasang ba beberapa palan ke engkeman di Bandaraya Kuching.

Entara palan-palan ke alai DBKU masang Tanglung tu iya nya ba Esplanade Kuching enggau penyampau Tanglung 1,000 igi, ba Jalai Tun Openg (500 igi), Jalai Pearl (500 igi), Lebuh India (400 igi), Khai Joo Lane (100 igi), enggau ba Padang Merdeka (50 igi).

Pengawa bejadi lalu ngidupka lampung Tanglung malam nya dipenyadi Datuk Bandar Kuching Utara, Datuk Haji Abang Abdul Wahap Abang Julai bepalan ba mua Plaza Merdeka, ditu.
Sama bisi datai iya nya iya nya Pengarah DBKU, Dr. Saadiah Abdul Samat enggau bala pegawai kanan DBKU.

Lebuh ke dirandau media pengudah tembu pengawa, Abdul Wahap madah ngarapka ba taun 2014 tu, DBKU deka neruska mayuh pemujur ari taun-taun ke udah.

"Nambahka ke nya, aku ngarapka rayat menua Kuching terus bekerejasama nyukung pengawa ke dikereja DBKU dalam neruska pengawa sereta nyediaka pemanah servis bekualiti.

"Pia mega aku ngarapka pemansang ke digaga di menua Kuching setipak enggau konsep Kuching Clean, Beutiful, and Safe (CBS) Enchancement Plan 2013 -2017 baka ke udah dipenyadi Kepala Menteri Pehin Sri Haji Abdul Taib Mahmud pun taun siti ke udah," ku iya.

Anang leju ngelatih anak nyadi tuai

KUCHING : Nembiak sekula endang nyadi aset ke beguna ngagai menua jemah lalu apai indai, bala pengajar enggau bala tuai-tuai raban bansa patut bekerejasama ngelatih nembiak nyadi ketuai.

Menteri Kereja Raya Datuk Fadillah Yusof madah, nembiak sekula ke ngembuan pemereti ati deka ulih besemekih enggau orang bukai napi pemayuh pemar ke deka datai.

"Nya alai, aku ngarapka bala apai indai, bala pengajar sereta bala ketuai anang leju meri peransang ngagai bala anak ngambika sida majak landik ngereja pengawa sereta ulih dikarap nyambung pemansang menua dudi hari," ku iya.

Fadillah ti mega nyadi Kaban Parlimen Petra Jaya madah munyi nya rambau Nyuaka Bantu Besekula Ngagai Nembiak Sekula Primari (SK) Tan Sri Datuk Haji Mohamed, ditu kemari (Hari Dua).

Nangkan ke nya, Fadillah ngelalau semua apai indai nembiak enggau bala pengajar ngambika terus ngajar bala anak ngetanka penyerakup enggau pengelantang ba menua tu.

"Laban ke diau ba menua diuan mayuh pupu raban bansa, kitai meseti bebasaka pangan diri ngambika terus ngasaika pengelantang enggau penyenang ba menua tu," ku iya.

Rambau pengerami tu, bisi 1080 iku nembiak nerima bantu besekula. Penyampau staf ke gawa ba sekula nya bisi 80 iku nyengkaum raban pengereja pengawa dalam opis.

SK Tan Sri Datuk Haji Mohamed betuaika Kepala Pengajar Hasbi Shamat sereta bisi ngembuan tiga buah kelas pra sekula enggau empat buah kelas pelajar khas.

Sama bisi datai ba pengerami tu, pengari Kepala Pengajar Harun Ismail, bala pengajar enggau bala apai indai nembiak.

Rega barang di Sarawak enda tau ditiki sengapa

KUCHING : Operasyen ngemataka rega barang ari ke ditikika orang dagang sepeneka ati deka dipejalai nyentuk ngagai ujung taun tu, ku Kepala Direktor Opis Dagang Dalam Negeri Enggau Pekara Bebeli Barang (PPDNKK) Sarawak Stanley Tan.

"Ops Harga udah dilanchar Menteri Dagang Dalam Negeri Enggau Pekara Bebeli Barang Dato Sri Hasan Malek kena 6 Julai 2013 lalu pengawa tu deka dikemeratka agi taun tu.

"Tu endang atur dikena mutarla isu rega barang ari ke ditiki orang dagang rambau musim pengerami," ku iya seraya madahka naka ke diatu agi nadai orang dagang ditemu nikika rega barang ba Sarawak.
Stanley ti mega dipadu nyadi direktor baru PPDNKK Sarawak madah munyi nya ngagai pemberita pengudah bejalaika pengawa Ops Harga ba Medan Niaga Satok ditu kemari (Hari Satu).

Stanley madah, operasyen Ops Harga dipejalaika serentak  141 iku raban opis bekuasa pagi nya (Hari Satu) ba semua lapan pampang endur di Negeri Sarawak.

"Palan-palan ke diperesa baka tamu, kedai runchit, pasar besai, restauran enggau kedai makai.   
"Semua orang dagang dipinta mandangka rega barang enggau terang sereta enda ngasuh pemeli berasai saru maya meda genap barang ke bisi dijual.

Berebak enggau nya, Stanley ngelalau mensia mayuh ngaga ripot enggau lengkas ngagai opis KPDNKK nyema bisi tepedaka orang dagang nikika rega barang beserimbai enggau Pengerami Taun Baru China ke deka datai.

Barang sapa orang dagang ke nadai betanggungjawap ditemu ngelanggar atur Seksyen 21, Akta Kawalan Harga dan Antipencatuan 2011 ulih kena ukum undang-undang.

Ngagai orang dagang ke nadai mandangka rega barang ulih diukum duit nyentuk ngagai RM50,000 tauka dijil enda ngelui dua taun. Udah nya kompeni ke ditemu besalah ulih diukum nyentukngagai RM100,000.

Kelimpah ari nya, raban bekuasa mega ulih nangkap orang dagang ke besalah nitihka Akta Timbang dan Sukat 1972, Akta Prihal Dagangan 1972 enggau Akta Perlindungan Pengguna 1999 bekaul enggau isu rega barang enggau barang ke ditimbang.

Sepemanjai Ops Harga udah dipejalai ungkup negeri Sarawak semina ngerikod 14 iti kes iya nya 12 kes ditemu nyadi ba Kuching, siti kes di Miri enggau siti kes di Sri Aman, ku Stanley.
Sama bisi datai nyereta operasyen tu bala staf KPDNKK enggau bala staf opis bekuasa bukai ke besangkut paut.

Dini penepan lima pengari rayat SUPP?

KUCHING : Kini penepan lima iku Kaban Kunsil Negeri (ADUN)  Parti Rayat Seati Sarawak (SUPP) deka sangkai nyema parti sida nya dikinsil Opis Pengerijista Gerempung (ROS).
   
Dua pampang parti nya, Piasau enggau Bekenu, nadai agi dibuka pengudah ROS nemu sida tu bisi besibil pengawa lebuh ke ngundi ba pampang diri empu maya taun 2011.
   
SUPP dipeda kitang-kitang pengudah ke nerima surat nunjukka kebuah, kena 6 haribulan Jan taun tu, ari ROS ba Kuala Lumpur, ke ngaush
parti politik ke pemadu lama ba negertu tu nya madahka kebuah parti sida nya enda patut dikinsil.
   
Taja baka nya, berebak enggau penyarut parti, kaban Parlimen Serian Datuk Seri
Richard Riot enggau empat iku agi pengari rayat bansa Dayak iya nya, Datuk Dr Jerip
Susil (Bengoh), Datuk Francis Hardin Hollis (Simanggang), Ranum Mina (Opar) enggau
Dr Jonical Rayong Ngipa (Engkilili) tetap nadai penanggul.   
   
Riot, ti mega ukai China keterubah mangku tanggung pengawa nyadi sapit presiden parti, madah, chara ke pemadu manah iya nya sida enda masuk champur ba penyarut nya tang nyerahka pekara nya ngagai ketuai parti lalu sida semina bekerejasama nguji nyelamatka parti nya.
   
"Semina nya aja utai ke disebut aku naka ke diatu," ku iya madah ngagai Bernama lalu iya agi bedau berunding pengawa ke deka digaga udah tu nyema parti nya dikinsil.
   
Ranum, ti dikaitka enggau raban betuaika chairman SUPP Pampang Sibu, Datuk Seri Wong Soon Koh ke udah dikemadu madahka, kaban parti endang berasai tusah ati nyema partu nya dikinsil.

Iya ti mega nyadi Chairman SUPP pampang Opar madahka ketuai enggau kaban pampang agi mengkang angkun ngagai parti sereta nyeliahka diri ngaga perambu beguai-guai pansut ari parti.
   
"Chara ke pemadu manah diatu nyerahka pekara nya ngagai ROS ngambi mutuska nasib parti, lalu kami deka terus bekereja ungkup pengundi enggau naka pemanah," ku iya.
   
Perunding sosio-politik Datuk Peter Minos madah, peklara ke pemadu manah pengari bansa parti Dayak nya masuk ni-ni parti parti komponen Barisan Nasional (BN) negeri - Parti Pesaka Bumiputera Bersatu (PBB), Parti Rayat Sarawak (PRS) enggau Parti Progresif Demokratik Sarawak (SPDP) nyema SUPP udah dikinsil.

"Nadai agi utai ke ulih dikejaku pengudah dua pampang parti dikinsil lalu komiti besai majak charut," ku ex Sapit Kepala Publisiti PBB nya.
   
Iya madah, diatu utai nya semina nyadi pekara pelajar nandu utai ke udah disebut dua taun ke udah ngambika tuai komiti besai SUPP berunding enggau manah-manah, bela nendurka pengangat asai ati sereta nyeliahka diri ngemansutka pekara ke nyadi dalam parti.
   
Minos ti ngasaika pekara nya agi ulih diputar madahka, utai ke nyadi ngagai SUPP patut nyadika chuan teladan ngagai semua parti komponen BN.
   
Nangkan ke nya, ex Sapit Presiden SUPP Datuk Yong Khoon Seng madahka diri chukup irau meda penanggul ke benung nuntung parti nya.
   
Yong madahka diri besedia ngajar dua bengkah raban ke benung belaya dalam parti nya nyema sida minta penemu ari iya bekaul enggau chara ngiga jalai nyelamatka parti.
   
Taja baka nya, iya nulak penemu bekaul enggau siti pekara nyema iya dikumbai nulung sida numbuhka parti baru nukar SUPP, seraya madahka iya udah pinchin ari pengawa politik.
   
Pengawa ke nginsil  dua pampang parti nya nadai ngeruga penuduk presiden parti Tan Sri Peter Chin enggau seketeri publisiti Datuk
Sebastian Ting.
   
Chin sebedau tu nyadi chairman pampang Piasau lalu Ting nyadi chairman pampang Bekenu. Bernama.

Saspek penchuri barang udah dipelawikka polis

KUCHING : Siku lelaki China beumur 54 taun enggau siku pekereja iya bisi ngabas sebuah setor sida ba Batu Tiga Jalai Rock lalu ngujungka seduai bisi tepedaka sebuah van burak ngerimbai setor nya.

Pekara tu nyadi urung pukul 1.30 lemai kena 15 Januari tu tadi. Lelaki China enggau anak kuli iya tadi terus ngempang van nya sereta mujur nangkap siku deriba van bebansa Melayu beumur 34 taun. Taja baka nya, siku agi saspek mujur ngelarika diri.

Seraban polis ke benung segau-segau bejalaika pengawa nagang kes jenayah ngerimbai endur nya berumban ngesah palan penusah pengudah neruma ripot.

Pengudah van nya diperesa, dia sida bisi tetemuka barang-barang ke dipenggi lelaki China enggau mayuh bengkah barang-barang ke bukai.

Kelimpah ari nya, van nya ditemu ngena lumur plat palsu. Entara barang-barang ke mujur dirampas iya nya sebuah van liteace, mayuh bengkah perengka dikena nyerungkai rumah, 40 kepin musik batu, lapan iti pala lampu, dua iti perengka kena nunu roti, siti drill, siti vakum enggau siti injin pam.

Penyampau rega barang ke dirampas lebih kurang RM50,000. Identiti saspek ke lari udah dikelala polis. Saspek udah diriman pengelama empat hari berengkah 16 ngagai 20 Januari tu.

Berebak enggau kes tu, Kepala Polis Pelilih Kuching, Asisten Komisioner Roslan Bek Ahmad lebuh ke dirandau media ba Indu Opis Pelilih Menua Kuching kemari (Hari Lima) madahka, kes dipansik nitihka Seksyen 457 Kanun Keseksaan lalu enti nyengala besalah ulih dijil enda ngelui 14 taun.

Nangkan ke nya, pengudah diperesa ai kemik saspek ditemu positih dadah bansa syabu (methapethamine).
Sama bisi datai ba Kepala Bahagian Pemansik Jenayah IPD Kuching, DSP Lim Bak Phai enggau Pemansik Operasyen, ASP Abdul Rahim Abdullah.

Pekereja perintah dipinta beintergriti maya kereja

KUCHING : Semua pekereja opis perintah patut ngembuan ulah intergriti ke tinggi dalam bejalaika tanggung pengawa awakka terus nyadi agen pengubah menua.

Seketeri Perintah Besai Sarawak, Datuk Yahaya Basimin madah, pemujur enggau penyulut dalam servis opis perintah ukai nyadika adan tang sebengkah pekara ke terus dipejalaika.

"Pemujur ke bansa tu, semina ulih dijapai nengah kerejasama enggau runding ke sepenemu entara servis opis perintah negeri enggau perintah besai sereta disaup pekereja pengatur pengawa dalam negeri.

"Utai ke patut iya nya kitai patut gawa bebendar, ngembuan penemu ti kreatif sereta ngurang ulah birokrasi," ku iya seraya madahka orang ke gawa perintah endang ulih ngangkatka nasip rayat enggau pendiau menua dudi hari sebaka enggau menua maju ke bukai.

Iya madah munyi nya rambau Pengerami Hari Servis Pekereja Opis Perintah 2013 ke diatur ba Palan Aum Borneo Kuching (BCCK) ditu kemari (Hari Dua).

Nangkan ke nya, Yahaya madah menua jam ke diatu begunaka pekereja opis perintah ke ulih ntihka peneka mensia mayuh nengah servis ke betul, lanchat, enggau beintergriti dalam mutarka penanggul, serebana enggau peminta rayat.

"Enggau chara tu, aku pechaya ba luar din mensia mayuh udah nemu enggau ngasaika semua penanggul tauka pengawa mutarka iya ukai agi diteju ngagai orang ke gawa perintah aja tang meseti nyadi tanggungjawap ke sama ditapi.

Nengah pengeransing pengawa raban pekereja opis perintah pengudah 50 taun merdeka dalam Malaysia, menua Sarawak dipeda nyengala mansang nengah asil penatai pemisi rayat entara ke pemadu besai ba menua Malaysia.

"Sarawak mega dipeda nyadi negeri chunto ari sukut pengelantang, pengelikun enggau penyerakup raban bansa asil ari polisi politik pemansang ke ditempa Pehin Sri Kepala Menteri (Abdul Taib Mahmud)," ku iya.

Yahaya mega madahka, Pelan Tranformasi ke manah ulih nambahka pemanah servis opis perintah nyengkaum ngubah ulah sekeda pekereja opis perintah ke pedis nerima ubah.

"Enti pekara tu mujur, iya tentu ulih ngadaka pekereja opis perintah ke reliable enggau fleksible nitihka peneka ke maya hari sebaka enggau jaku sempama 'enti tingg untung nyadi bintang, enti baruh agi tetap nyadi tekang intan.

"Berindik ari nya, kitai anang nyadi liabiliti tang nyadi pesaka ke beguna ngagai pengawa diri. Orang ke ngelanggar undang-undang enggau enda betul nguna kuasa endang patut diukum.

"Ngambika sida enda mudah silap ngereja pengawa, sida nya patut diberi latih ke chukup awakka ulih ngereja pengawa enggau meruan dudi hari," ku iya.

Taja pan, perintah ngembuan mayuh prioriti ke ngansak tang iya seruran ngemeratka peminta enggau pengelantang orang ke gawa perintah.

Nya alai, perintah setuju ngaduka mayuh bengkah skim pengawa, nyengkaum ari sukut gaji sereta peluang niki pangkat, lalu ngarapka orang ke gawa perintah bulih peransang maya bejalaika tanggung pengawa, ku Yahaya.

Dulu ari nya, tuju pengerami nya diatur dikena meri tanda ba ngagai sida ke udah mujur bejalaika tanggungpengawa enggau manah kelimpah ngingatka pemujur ke udah dijapai sepemanjai taun tu.

Sarawak alah nyatup Kelantan di Kuching

KUCHING : Tim main bol menua Sarawak puntan ngulihka sebarang poin pengudah ke alah besatup enggau tim Kelantan ba sebengkah pekit main bol ke diatur ba Stadium Negeri Kuching kena 25 Januari tu tadi.

Sarawak alah 0-1 ngagai tim Kelantan ba pengujung pekit main bol nya asil ari gol ke dipasukka pemain import Kelantan ari Liberia  iya nya Francis Forkey Doe ba minit ke-90.

Berindik ari nya, tim Sarawak diatu ba penuduk ke pemadu baruh dalam rintai pemutus Liga Super 2014, lalu tim Kelantan mangku penuduk pemadu atas enggau penyampau poin enam leka.

Rambau main nya diatu, tim Sarawak nyau deka tulihka sigi poin enti nyema seri 0-0 tang ari penyilap sekeda pemain ngujungka Sarawak puntan menggi sigi poin.

Udah nya ba main ke bukai tim kelab ari Terengganu iya nya T-Team mujur ngalahka tim Johor Darul Ta'zim (JDT) 1-0 ba Stadium Sultan Ismail Nasiruddin Shah, Kuala Terengganu nengah gol ti dipasukka pemain import ari Indonesia, Patrich Wanggai ba minit ke-71.
   
Kelimpah ari T-team, sigi agi tim kelab ke mujur menang iya nya tim Sime Darby FC mujur ngalahka Champion Mangkuk Sumbangsih 2014, Pahang 1-0, ba Stadium Majlis Perbandaran Selayang.
   
Asil ari pemujur nya Sime Darby bulih tiga poin berega ari gol ke dipasukka Fahrul Razi Kamaruddin ba minit ke-50.
   
Champion liga super taun siti ke udah nya nya tim Lions XII ari Singapura mega mujur ngalalahka tim Selangor 2-1 ba Stadium
Jalai Besai, Singapura.
   
Khairul Amri meri pengaga ari ngagai peminat main bol tim Singapura pengudah ke mujur ngemasukka gol ba minit ke-93 pengudah kedua-dua piak tim bela bekunsika sigi gol.
   
Tim Singapura endang dulu tepasukka gol nengah Shakir Hamzah ba minit ke-44 sebedau Selangor ke mujur ngemasukka gol nengah Fitri Shazwan Raduwan ba minit ke-57.
   
Ba Stadium Perak, Ipoh, tim Perak mega menang bulih tiga poin berega pengudah ke mujur ngalahka tim Terengganu 1-0, asil ari bol ke ditanduk pemain import ari Brazil, Eliel Da Cruz Guardiano ba minit ke-90.

Udah tu ila, ba main ti ketiga kena 28 Febuari tu tim Sarawak deka besatup enggau tim Sime Darby ba Stadium Negeri di Kuching. Ngarapka tim Sarawak kelebih pemain penyerang ulih bebendar agi bemain dikena ngubah penuduk ke diatu ari ti pemadu baruh ngagai penuduk ke lebih manah.

Badu kunselor lama diganti kunselor baru

KUCHING : Majlis Bandaraya Kuching Selatan (MBKS) udah ngemanduka tanggung pengawa lapan iku kunselor lama lalu maduka 14 iku kunselor baru nyadi kaban opis sida, apin lama ke udah.

Datuk Bandar MBKS, Datuk James Chan Khay Syn madah, ngagai bala kaban ex kunselor ke udah diketuka pengawa, ngarapka sida terus mujur dalam sebarang pengawa ke dikereja udah tu ila.

"Pemanah pengawa ke udah dikereja bala kita seruran dikenang lalu enggau peluang tu aku meri besai terima kasih.

"Aku mega deka meri tanda puji ngagai kaban baru kunselor ke udah dipilih lalu ngarapka kita ulih ngereja pengawa enggau manah-manah dalam meri servis ngagai mensia mayuh," ku iya.

Iya madah munyi nya rambau Pengerami Makai Malam Ungkup Kunselor Ke Badu diatur ba sebengkah hotel tebilang di Kuching.

Nyerumba pengerami nya, lapan iku ex Kunselor ke dirami lalu diketu nyadi kaban kunselor MBKS iya nya Johnson Tan, Barbara William Mawan, Kho Lee Leng,  Stephen Ngui, Ujang Himang, Kilat Beriak, David Toh, enggau Bong Lian Huan.

Johnson ke kala mangku pengawa nyadi Komiti Rampa Menua, Dagang Temuai, Trafik enggau Kereja Komiti Tetap ;

Barbara William Mawan ti kala mangku pengawa nyadi Sapit Chairman ungkup pengawa undang-undang enggau nyadi Kepala Komiti Tetap.

Johson enggau Barbara bela semilan taun udah nyadi kunselor lalu sereta dipadu berengkah 1 Febuari 2004 lalu ambis kena 31 Disember 2013.

Kho Lee Leng kala mangku pengawa nyadi Komiti Tetap Ranpa Menua, Dagang Temuai, Makit enggau Komiti Tetap Pengawa Dagang.

Stephen Ngui, siku kaban kunselor ke kala mangku pengawa nyadi Sapit Chairman ungkup Pengerai Rama enggau Lesen Komiti Tetap sereta nyadi Komiti Tetap Rumah Besai.

Ujang Himang kala diberi tanggung pengawa nyadi Sapit Chairman pengawa dagang enggau Komiti Tetap Kereja sereta mangku pengawa nyadi kaban pengerai mensia mayuh enggau komiti lesen.

Kilat Beriak , ahli ex- jawatankuasa untuk Pasaran & Petty Jawatankuasa Tetap Peniaga dan ahli ex- jawatankuasa untuk Perundangan & General Tujuan Jawatankuasa Tetap .

Semua sida empat iku tu bela udah gawa lima taun iya nya berengkah 1 Januari 2009 lalu ambis kena 31 Disemberi 2013.

David Toh, kala mangku pengawa nyadi Sapit Chairman pengawa undang-undang enggau nyadi komiti tetap mayuh bengkah pengawa (pekara wang enggau pasal kereja).

Kepenudi iya nya Bong Lian Huan ti kala mangku pengawa nyadi Komiti Pengatur Pengawa Besai enggau Komiti Tetap Rampa Menua sereta Dagang Temuai.

Bong dipadu nyadi kunselor berengkah 1 Januari 2010 lalu ambis kena 31 Disemberi 2013.

Badu ngalau antu dadah

KUCHING : Mensia mayuh dilalau ngambika terus besaup enggau raban polis ngemunaska antu makai dadah di negeri tu kelebih agi ba bandar besai ditu.

Kebuah pia laban tebal agi saspek ke ditemu ngereja penyalah ba kandang menua Kuching endang raban orang ke gian dadah bansa syabu, ku Kepala Polis Pelilih Kuching, Asisten Komisioner Roslan Bek Ahmad.

Iya madah munyi nya rambau dirandau media ba Indu Opis Pelilih Menua Kuching kemari (Hari Lima).

Taja baka nya, Roslan ngelalau mensia mayuh end aibuh berasai irau ati tang patut ngadang sereta nyaga reta tengkira diri empu.

"Sapa-sapa orang ulih nyadi orang jai nyema bisi peluang, nya alai kitai patut nutup peluang kelebih agi nyeliahka dipeda raban orang ke endang suah ngereja penyalah jai," ku iya.

Udah nya, Roslan bisi madah, kena 15 Januari tu tadi urung pukul 11.45 pagi seraban polis ke benung bejalaika pengawa segau-segau munaska penyalah jenayah ba kandang menua Stampin, Kuching bisi ngetan sebuah kerita Toyota Ipsum laban ke dipeda nyelai.

"Dua iku lelaki bansa China ke beumur 33 enggau 37 taun ke bisi dalam kerita nya ditangkap laban deka dipansik.

"Asil ari pengawa pansik, dua iku saspek nya dibai polis ngelawa sebuah rumah ba Taman Daya, BDC Kuching.

"Pengudah rumah nya diperesa, raban polis bisi tetemuka mayuh bengkah banrang ke dipelabaka barang churi asil ari pengawa nyerungkai rumah," ku iya.

Entara barang churi ke ditemu iya nya 10 iti jam, empat iti roadtax, tujuh bup pala tanah, koleksi duit syiling, dua hard disk, siti kamera, siti sony handycam, sebatang pen betulis nama Susan Grace Ben, duit keretas Malaysia enggau sebuah laptop.

Penyampau rega barang ke dirampas tu lebih kurang RM50,000.

Dua iku saspek ke udah ditangkap nya diriman pengelama empat hari berengkah 16 ngagai 20 Januari tu. Kes deka dipansik nitihka Seksyen 457 Kanun Keseksaan lalu enti ditemu besalah ulih dijil enda ngelui 14 taun.

Pengudah ke diperesa, dua iku saspek tu positif dadah bansa syabu.

Berebak enggau nya, Roslan ngelalau mansa ke bisi kala ngaga ripot lenyau barang ulih ngenataika diri ngagai balai polis Indu Opis Pelilih Kuching endur ngelala sereta ngambi barang sida ke udah temu.

Ba sebengkah agi kes ke nyadi ba endur bukai, Roslan madah kena 14 Januari tu tadi urung pukul 3.15 lemai maya siku pelajar indu beumur 14 taun enggau menyadi iya ke beumur 12 taun bedarat ba Jalai Bayor Bukit, dua iku nembiak tu dilawa dua iku lelaki ke nadai dikelala ngena motosikal.

"Siku saspek ngacukka pisu ngagai rekung nembiak indu ke tuai nya. Udah nya, indu nya ngiarka pisu nya lalu ngujungka lengan iya telih. Menyadi iya ke biak nyerauh minta tulung.

"Siku ari saspek nguji lari tang diempang sebuah kerita orang periman ti ngujungka saspek mujur ditangkap.

Roslan madah, kaban saspek ke lari mujur ditangkap polis ba menua Tabuan. Dua iku saspek nya beumur 20 enggau 29 taun. Udah nya, polis ngerampas sebuah motosikal  enggau senjata ke deka dikena saspek ngerumpak orang.

"Nadai pengerugi diripotka ba kes tu lalu kes deka dipansik nitihka Seksyen 394 Kanun Keseksaan laban nguji ngerumpak lalu ulih dijil enda ngelui 20 taun nyema ditemu besalah. Dua iku saspek tu benung diriman.

"Asil peresa ai kemik dua iku saspek tu positif dadah bansa syabu," ku Roslan.

Jaga manah pengelikun anak

KUCHING : Menteri Pemansang Orang Indu, Ruang Bilik enggau Raban Bansa Datuk Seri Rohani Abdul Karim madah lebih kurang 70 peratus isi  Undang-Undang Nembiak 2001 (Akta Kanak-kanak 2001) deka diubah ngambika ukum ke lebih berat deka diberi ngagai apai indai ke ilap dalam kes nyaga pengelikun anak diri empu.
   
Iya madah, perambu nya udah dianjung ngagai Luyar Menua ngambika diperati sebedau dibantai ba aum Parlimen.
   
"Perambu ubah tu udah disua ngagai Luyar Menua, Tepulai ngagai sida sekalika undang-undang nya diberi nama baru tauka dikumbai ubah laban mayuh pekara ke diubah iya nya lebih kurang 70 peratus.
   
"Kami melabaka nyema iya ulih diputar, undang-undang nya deka dibantai rambau aum Parlimen taun tu," ku iya.

Iya madah munyi nya ngagai pemberita rambau ngulu Pengerami Meri Basa Ngagai Media ke diatur Gerempung Pemberita Menua Kuching (KDJA) begulai enggau opis menteri ba sebengkah hotel tebilang di Kuching.

Nangkan ke nya, Rohani madah bekaul enggau pekara ubah nya sekeda ukum tambah deka diberi ngagai apai indai ke ilap baka bejera sida enggau chara ngereja pengawa ungkup mensia mayuh, kus apai indai enggau mendingka jaku ajar.
   
"Tuju kitai ngeletak ukum ukai medis sida tang dikena kitai bejera ngambika bala anak sida dijaga enggau meruan nitihka pematut," ku iya.

Berebak enggau pengerami nya, Rohani ngarapka program ke bansa nya ulih ngerapitka agi kaul entara raban pemberita enggau pangan diri.
   
Dulu ari nya, Presiden KDJA Sulok Tawie madah, raban media meseti mantaika penerang ke positif sereta betanggungjawap enggau utai ke dikarang sida.

"Anang sesekali mansutka isu-isu ke sensitif laban pekara nya ulih ngeruga pengelantang enggau pengelikun menua," ku iya seraya madahka taun 2014 tu deka nyadi siti taun ke pemadu kisuk ngagai bala raban media.

Entara aktiviti ke bisi diatur nyerumba pengerami tu iya nya bekaroake, enchabut tiket benasit sereta beperindang enggau dua iku artis di menua tu iya nya Urai enggau Stanley AF.

Sama bisi datai iya nya Kaban Kunsil Negeri (ADUN) Balai Ringin Snowdan Lawan, Sapit Direktor Pengeluar Program Negeri Fee Lin Chew, sereta bala raban media.

Kes nyerungkai rumah dikereja bala belacan

KUCHING : Sebuah kedai perengka lektrik ba Hakka Avenue Estate Penrissen ditu udah kena serungkai raban orang ke nadai dikelala (bala belacan) kena 10 Januari 2014 urung pukul 8.00 pagi.

Nitihka penerang tauke kedai nya, penusah tu nyadi pengudah ke meresa kedai, dia tauke tepedaka mayuh bengkah perengka lektrik lenyau nyengkaum duit.

Berindik ari penusah nya, penyampau pengerugi dipelabaka lebih kurang RM80,000.

Asil pansik enggau penerang sidi raban polis, dia polis mujur nangkap tujuh iku lelaki China ba mayuh bengkah endur beumur entara 20 ngagai 40 taun.

Semua saspek udah diriman pengelama tujuh hari berengkah 11 ngagai 17 Januari 2014.

Berebak enggau kes tu, Kepala Polis Pelilih Kuching, Asisten Komisioner Roslan Bek Ahmad lebuh ke dirandau media ba Indu Opis Pelilih Menua Kuching kemari (Hari Lima) madahka, asil pansik bala polis ngagai tujuh iku saspek raban polis mujur ngerampas barang kes iya nya tiga buah Televisyen LCD, siti kipas, sebuah van Ford chura burak, sebuah kerita kancil, sebuah kerita kenari, enggau mayuh bengkah barang ke dikena saspek nyerungkai rumah.

Penyampau rega barang ke mujur dirampas polis nya lebih kurang RM50,000.

Ba sebengkah agi penusah ke sebaka, asil ari penerang mensia mayuh dua iku lelaki China beumur 24 enggau 47 taun udah mujur ditangkap seraban polis kena 13 Januari 2014.

Dua iku saspek tu diriman pengelama empat hari berengkah 14 ngagai 18 Januari 2014.

Asil pansil polis raban saspek tu chukup aktif nyerungkai rumah kedai enggau opis ba kandang menua Kuching.

Saspek tu mega ditemu udah suah ngereja kes-kes jenayah lalu seduai deka dipansik nitihka Seksyen 457 Kanun Keseksaan ke ngundan ukum jil enda ngelui 14 taun.

Nangkan ke nya, asil peresa ai kemik semua semilan iku saspek tu endang positif dadah bansa Syabu (methapethamine).

Sama bisi datai ba Kepala Bahagian Pemansik Jenayah IPD Kuching, DSP Lim Bak Phai enggau Pemansik Operasyen, ASP Abdul Rahim Abdullah.

Pelantar Telaga Ai deka dimiki lengkas

KUCHING : Pelantar penyangkai perau ke rusak dipangka gelumbang besai di Telaga Ai deka dimiki lengkas nganti udah berandau enggau perunding kontraktor Majlis Perbandar Padawan (MPP), ku Kaban Kunsil Negeri (ADUN) Pantai Damai Dr. Abdul Rahman Junaidi.

Iya madah, pelantar ke tembu digaga ba taun 2001 nya berengkah singgit kenyau setaun ke udah lalu pengerusak ke balat nyadi lemai Hari Satu tu tadi pengudah pelepuk besai pelantar nya pechah.

"Aku minta orang kampung nguna pelantar ke bukai enti deka nurun ke pasar tauka singgah ba pantai dikena nyeliahka penusah ke enda disadang," ku iya.

Iya madah munyi nya ngagai pemberita pengudah tembu pengawa Nyuaka Laptop 1Malaysia ke diatur ba Dewan Seminar SIPEC ditu pagi kemari (Hari Dua).

Dulu ari nya, bisi 71 buah Laptop 1Malaysia mujur disua ngagai bala nembiak sekula enggau rayat mayuh ke diau ba kandang menua Pantai Damai.

Dr. Rahman Junaidi madah, tuju ke meri laptop nya ngambika rayat mayuh bulih mayuh penemu ke baru sereta penerang ke beguna nengah internet.

"KItai deka meda bansa kitai tu pintar IT (Teknologi Pemadah) sekalika nya laki, bini, anak tauka uchu semua patut landik bekenaka perengka IT. Dunyai ke maya hari tu majak berubah, kitai nuju pengidup ke lebih moden lalu dikumbai orang diatu dunya nadai bebinding.

"Tambah mega, rayat kitai (Pantai Damai) diau ba tengah-tengah bandar besai, nyadi kitai meseti nemu isu-isu ke nyadi ninting hari. Enggau nya, aku ngarapka bala penerima laptop 1Malaysia ulih bekenaka pemeri tu enggau manah-manah ngambika ulih meri penguntung ngagai kitai empu," ku iya.

Dr. Rahman Junaidi mega ngelalau rayat kelebih agi bala sida ke indu enggau bala nembiak ulih nguna pemeri nya dikena ngemujurka aktiviti dagang.

Sama bisi datai ba pengawa tu bala pengari ari Suruhanjaya Komunikasyen Multimedia Malaysia (SKMM), bala tuai raban bansa enggau bala penerima Laptop 1Malaysia.

KPDNKK seruran nyaga rega barang di Sarawak

KUCHING : Operasyen ngemataka rega barang ari ke ditikika orang dagang sepeneka ati deka dipejalai nyentuk ngagai ujung taun tu, ku Kepala Direktor Opis Dagang Dalam Negeri Enggau Pekara Bebeli Barang (PPDNKK) Sarawak Stanley Tan.

"Ops Harga (Operasyen 2.0) udah dilanchar Menteri Dagang Dalam Negeri Enggau Pekara Bebeli Barang Dato Sri Hasan Malek kena 6 Julai 2013 lalu pengawa tu deka dikemeratka agi taun tu.

"Tu endang atur dikena mutarla isu rega barang ari ke ditiki orang dagang rambau musim pengerami," ku iya seraya madahka naka ke diatu agi nadai orang dagang ditemu nikika rega barang ba Sarawak.

Stanley ti mega dipadu nyadi direktor baru PPDNKK Sarawak madah munyi nya ngagai pemberita pengudah bejalaika pengawa Ops Harga ba Medan Niaga Satok ditu kemari (Hari Satu).

Stanley madah, operasyen Ops Harga dipejalaika serentak  141 iku raban opis bekuasa pagi nya (Hari Satu) ba semua lapan pampang endur di Negeri Sarawak.

"Palan-palan ke diperesa baka tamu, kedai runchit, pasar besai, restauran enggau kedai makai.   
"Semua orang dagang dipinta mandangka rega barang enggau terang sereta enda ngasuh pemeli berasai saru maya meda genap barang ke bisi dijual.

Berebak enggau nya, Stanley ngelalau mensia mayuh ngaga ripot enggau lengkas ngagai opis KPDNKK nyema bisi tepedaka orang dagang nikika rega barang beserimbai enggau Pengerami Taun Baru China ke deka datai.

Barang sapa orang dagang ke nadai betanggungjawap ditemu ngelanggar atur Seksyen 21, Akta Kawalan Harga dan Antipencatuan 2011 ulih kena ukum undang-undang.

Ngagai orang dagang ke nadai mandangka rega barang ulih diukum duit nyentuk ngagai RM50,000 tauka dijil enda ngelui dua taun. Udah nya kompeni ke ditemu besalah ulih diukum nyentukngagai RM100,000.

Kelimpah ari nya, raban bekuasa mega ulih nangkap orang dagang ke besalah nitihka Akta Timbang dan Sukat 1972, Akta Prihal Dagangan 1972 enggau Akta Perlindungan Pengguna 1999 bekaul enggau isu rega barang enggau barang ke ditimbang.

Sepemanjai Ops Harga udah dipejalai ungkup negeri Sarawak semina ngerikod 14 iti kes iya nya 12 kes ditemu nyadi ba Kuching, siti kes di Miri enggau siti kes di Sri Aman, ku Stanley.

Sama bisi datai begulai enggau bala staf KPDNKK nyereta operasyen tu iya nya pengari ari Opis Betanam Betupi, FAMA, Opis Bekuasa Pelilih Menua (PBT), NGO, Operasyen Pengguna Negeri, Operasyen Pengguna Pelilih Menua, Gerempung Pengguna, Penghulu enggau Kaban Pengguna.

Tekat Bengoh : Apai Indau dilalau nganjung anak besekula

KUCHING : Penulung Menteri Pengerai Rama Sarawak Datuk Dr Jerip Susil ngelalau bala apai indai nembiak ari empat buah kampung bisi kena pangka projek tekat Bengoh dipinta ngemeratka pelajar bala anak sida.
   
Iya madahka diri bisi ditusika senentang beberapa iku nembiak sekula ari Kampung Taba Sait, Kampung Rejoi, Kampung Pain/Bojong enggau Kampung Semban nadai nurun ke sekula berengkah hari keterubah besekula 2 Januari tu tadi laban Sekula Primari  (SK) Semban enggau Sk Taba Sait udah ditutup lalu dibuka ba Skim Berumah Baru Bengoh (BRS).
   
"Pelajar endang pekara ke chukup beguna ngagai pengidup bala anak lalu bala apai indai enda patut ngengaika peluang ngagai bala anak sida ngulihka pemandai.

Semina nengah penemu pelajar ke chukup nya baru pengidup bala anak sida dudi hari ulih tejamin," ku  Kaban Kunsil Negeri Bengoh nya.
   
Setengah ari 204 pintu ruang bilik ari empat buah kampung ke patut mindah ngagai BRS lalu bedau mindah lalu pekara nya ngujungka anak sida ke besekula ba SK Pangkalan Ampat tauka SK Bengoh tepasa bedarat sejam tauka dua jam ngagai sekula.

Mayuh bengkah pekara nyadika keserah rayat ke enggai pindah ngagai BRS nyengkaum madahka diri nadai duit dikena bepungkal baru.
   
Dr Jerip madah, ruang bilik ke kena pangka projek tekat Bengoh enti nitih udah pindah ngagai BRS sebedau pengerami Krismas tu tadi tang ketegal gaya hari ke nadai manah ngujungka agih belanja laun diberi lalu sida nyau laun mindah.
   
Iya madah, pengawa mindahka sidai tu dikereja ngena bilun Soldadu Langit Diraja Malaysia (TUDM) tang iya madahka haribulan nya agi bedau temu ketegal agih belanja kena sida nya pindah agi bedau diberi.
   
Iya madah, bala sida deka berunding enggau raban orang ke besangkut paut dikena ngelengkas pengawa meri agih belanja nya lalu ngarapka semuya sida ke besangkut paut setuju pindah ngagai rumah baru ke chukup disediaka perengka guna baka bekal ai enggau elektrik pechuma.
   
BRS dikemansangka ba tanah 130 hektar lalu beungkus RM129 juta bepalan ba Penrissen, ngerimbai Kampung Semadang, Jalai Puncak Borneo, lebih kurang 20 kilometer ari Tekat Bengoh.
   
Pengawa ngaga tekat Bengoh ngampuhka kandang menua kira 1,600 hektar lalu ungkus dikena ngaga pemansang tu kira RM310 juta bepun dikereja ari taun 2007 lalu tembu 2010 tang nyentuk ke diatu lalu bedau ulih dipenyadi laban pengawa mindahka rayat bisi penanggul.
   
Tekat tu ulih ngempang ai 144.1 juta meter padu air ke deka disambung ngagai loji ai beresi Batu Kitang dikena nambahka penyampau ai ke diatu  786 mega liter sehari (MLD) ngagai 2,047 MLD ungkup napi peminta guna ai rayat ke diau ba menua Kuching enggau Kota Samarahan. Bernama.

Taska patut ditumbuhka ba Opis Pengerai Menua Kuching

KUCHING : Menteri Pengintu Pengelantang, Orang Indu enggau Pemansang Ruang Bilik Datuk Hajah Fatimah Abdullah minta Kelab Lumba enggau Main (KSR) Opis Pengerai Menua Kuching numbuhka Palan Penyaga Anak Mit (Taska) ba opis sida.

Fatimah madah, pengawa numbuhka Taska ba palan endur gawa tu beguna amat dikena nulung bala orang indu ke beranak mit bekereja.

"Penyampau orang indu ke gawa ke maya hari tu nyau majak mayuh lalu sida dipeda nulung ngangkatka penatai pemisi menua. Nya alai, penumbuh Taska ba palan endur gawa dipeda siti konsep ke bela 'menang-menang'.

"Nangkan ke nya, perintah bisi nyediaka agih belanja ungkup opis kompeni tauka opis perintah ke deka numbuhka Taska ba palan bekereja. Entara pemeri ari perintah ngagai opis-opis ke deka numbuhka Taska ba palan endur gawa iya nya duit RM200,000, subsidi yuran RM180 sebulan ngagai genap iku anak ari apai indai ke gawa perintah ke ngembuan penatai pemisi kurang ari RM5,000 sebulan.

"Udah nya, perintah mega deka meri bantu yuran Taska RM250 sebulan ngagai apai indai ke ngembuan penatai pemisi enda ngelui RM920 sebulan enti sida nganjung anak ngagai Taska swasta ke udah dirijsta ba Opis Pengintu Pengelantang Raban Bansa (JKM) berengkah Januari 2014," ku iya.

Iya ti mega nyadi Penyanding Penemu KSR Opis Pengerai Menua Kuching madah munyi nya rambau Pengerami Makai Malam ke diatur kelab nya ba sebengkah hotel tebilang ditu kena Hari Enam tu tadi.

Fatimah madah, penumbuh KSR ba Opis Pengerai Menua Kuching chukup beguna laban ulih dikena ngerapitka kaul entara bala staf ke gawa ba opis nya. Kelimpah ari nya mega, ku iya ulih nyadi palan ke pemadu manah dikena nyaga pengelantang pendiau bala staf.

"Ari kelab tu bala staf ulih ngasaika pengaga ati ari ke tepejuh gawa nengah mayuh bengkah aktiviti main ke bisi diatur baka main futsal enggau badminton. Kelimpah ari nya mega, kitai ulih ngelala pengelandik siku-siku sereta dikena ngangkatka pemanah rita opis tu empu," ku iya.

Rambau pengerami nya, Fatimah bisi muji pengawa kerejasama ke udah kala diatur entara Opis Pengerai enggau Opis Menteri Pengintu Pengelantang, Orang Indu enggau Pemansang Ruang.

Entara program ke kala diatur nya baka Kimpin Meri Tusi Indai ungkup anak mit ke beumur kurang ari enam bulan, kimpin nyaga pemeresi agu enggau kandang opis, Healthy Athlete Program begulai enggau Special Olympic Sarawak enggau ngaduka servis ungkup mansa ampuh bah.

Berebak enggau pengerami, Kaban Kunsil Negeri (ADUN) Dalat tu mega bisi nyuaka pemeri chek ungkup Projek Mit Menua Pesisir (MRP) RM3,000 besereta Trofi Pekit Bowling enggau Badmintin ungkup KSR Opis Pengerai Menua Kuching.

Sama bisi datai iya nya Pemesai Opis Pengerai Menua Kuching Dr. Kamalrudin Lajim sereta lebih kurang 400 iku kaban KSR Opis Pengerai Menua Kuching.

DBKU dipinta ngetanka pesaka menua

KUCHING : Kepala Menteri Pehin Sri Haji Abdul Taib Mahmud muji mayuh bengkah program pemansang ke diatur Dewan Bandaraya Kuching Utara (DBKU) kenyau 25 taun ke udah laban dipeda meri mayuh penguntung ngagai bandar besai tu.

Iya madah, taja baka nya agi bisi pekara ke mit patut dinan laban nya mandangka identiti menua tu baka Jalai Gambier. Pengawa dagang ke dikereja ba sepemanjai jalai tu ukai semina mandangka Kuching nyadi bandar moden tang meh agi ulih dijaga nyadika pesaka menua.

"Kesatu kebuah bandar besai Kuching meseti dijaga laban ngembuan sejarah lama (pesaka menua) tauka pemansang ke mengkang besambung-sambung, udah nya kedua bandar besai Kuching diuan rayat mayuh ke chukup pengerah enggau sebarang orang lalu pekara tu nyau baka pendiau pengidup orang ke diau ba kampung," ku iya.

Iya madah munyi nya rambau bejadi Pengerami Agenda DBKU 2014 bepalan ba Esplanade Kuching, Jalai Gambier ditu, pagi kemari (Hari Lima).

Nangkan ke nya, Taib madah pemujur bandar Kuching berindik ari pengawa dagang, nya alai taja pan pengawa dagang majak dikemansang tang kitai anang seseklai ngelengkaka pengawa lama nyengkaum sejarah pesaka bansa.

" Ari pendiau pengidup rayat ke bechampur bansa tu, DBKU meseti bebendar agi ngereja pengawa ngatur pengawa enggau manah-manah. Sekali agi aku nyebut, jaga manah pesaka menua tauka sejarah lama ke udah disebut aku tadi," ku iya seraya ngelalau raban bansa Melayu enggau bansa China terus bekerejasama dalam ngemansangka menua Kuching.

Dulu ari nya, Datuk Bandar DBKU Datuk Haji Abang Abdul Wahap Abang Julai madah, program ke bansa nya diatur DBKU kenyau dua taun ke udah lalu tuju iya ngambika bisi endur rayat begelumu sereta bekunsika penemu begulai enggau perintah, pengari swasta, enggau pengari ari gerempung-gerempung ukai dikuasa perintah (NGO).

"Enggau tu kami ngarapka bandar besai Kuching ulih nyadi sebengkah menua ke tebilang rita ba taun 2017 iya nya deka nyadi bandar besai ke idup (A City with a Soul), baka nyadi Pelin Lima taun tu," ku iya.

Berebak enggau pengerami nya, DBKU bisi ngelancarka siti model pengelikun bandaraya asil ari kerejasama perintah, swasta enggau rayat mayuh tauka 3P (People, Private and Public) ke mungkur staf DBKU empu, Polis, Bomba raban pengari swasta enggau rayat mayuh.

Tuju program tu dikena nambahka pengelikun ba menua besai tu ukai semina ngagai rayat ditu empu tang mega ungkup bala temuai ke bisi datai ngagai Kuching.

Program Agenda DBKU  diatur berengkah 24 ngagai 26 Januari 2014 lalu entara aktiviti ke bisi diatur nyerumba pengarami tu iya nya eksibisyen, bejualka pemakai, street soccer, bowling nyiur, konsert agenda DBKU, meri darah, pekit main dart, bibat lengan, mandangka tanda tradisional enggau mayuh agi ke bukai.

Nya alai, rayat kelebih agi ke diau ba bandaraya Kuching dilalau sampal bebala mayuh ngalawa Esplanade Kuching jam ke diatu ngambika sama enggau berami ngemujurka program Agenda DBKU 2014.

Sama bisi datai ba pengerami tu Seketeri Perintah Negeri Sarawak Tan Sri Datuk Amar Morshidi Abdul Ghani, Menteri Pengawa Berumah enggau Dagang Temuai Datuk Amar Abang Johari Tun Openg, Menteri Kereja Raya Datuk Fadillah Yusof, bala Penulung Menteri enggau sekeda pengari rayat.

Sarawak ngembuan semua pakej dagang temuai

KUCHING : Perintah andal Sarawak deka nyadi palan dagang temuai ke baru ba menua ASEAN tu dalam kandang lima taun ke deka datai, ku Menteri Dagang Temuai Sarawak Datuk Amar Abang Johari Tun Abang Haji Openg.

Iya madah, trend industri dagang temuai dunya ke maya hari tu jauh udah berubah laban temuai lebih numouh ngagai ekodagang temuai lalu Sarawak endang setipak amat ngembuan semua pakej nya.

"Sarawak deka nyadi palan dagang temuai ke baru ba pelilih menua tu setipak enggau pengerembai pemansang industri dagang temuai menua, nya alai Forum Dagang Temuai ASEAN 2014 (ATF 2014) deka nulung ngangkatka kerejasama entara menua ASEAN enggau Sarawak nengah industri dagang temuai intra-ASEAN," ku iya.

Iya madah munyi nya ngagai pengarang berita rambau Aum Menteri Dagang Temuai ASEAN Ke-17 ke diatur ditu lalu digulu 10 iku menteri dagang temuai ASEAN.

Johari madah, Sarawak deka mandangka pemisi ke dikembuan negeri tu iya nya ekodagang temuai dalam ngelakuka indsutri dagang temuai ngagai rayat ba serata dunya.

"Kitai ngembuan mayuh pesaka ekodagang temuai ke ulih dipandangka ngagai menua-menua bukai, ambika banding kitai ngembuan empat bengkah endur taman negara iya nya di Kuching kitai bisi Taman Negara Bako, Taman Negara Tanjong Datu, Taman Negara Gunung Gading enggau Taman Negara Wetlands Kuching lalu timpuh pejalai ngelawa palan tu lebih kurang 40 minit ari bandar besai Kuching," ku iya.

Berebak enggau nya, iya madah nengah ATF 2014, Malaysia deka naka ulih ngelakuka penyelai enggau pemayuh utai idup enggau utai tumbuh ke bisi ba menua tu.

"Ba Sarawak, perintah negeri deka nyungkak pemansang infrastruktur iya nya pelin besai dagang temuai ke nyengkaum dagang temuai ba kandang menua pesisir.

"Pelan besai tu deka nyengkaum mayuh bengkah bidang ke deka dipansik enggau silik laban kitai deka ngemansangka industri dagang temuai ditambah enggau pemanah rampa menua enggau pengeraja asal," ku iya.

Johari madah, pansik pelan besai nya dipelabaka tembu kena bulan Oktober tu lalu aum deka diatur begulai enggai perintah besai sereta kompeni.

Kelimpah ari nya, iya madah nyentuk ngagai Disember 2013, bisi 4.1 juta temuai dirikodka datai ngagai negeri tu lalu penyampau belanja ke dikena sida sekumbang ke raun ba menua tu lebih kurang RM 8 bilion.

Nya alai, aku pechaya penyampau penatai temuai kitu taun tu deka betambah mayuh agi.

Dulu ari nya, Menteri Dagang Temuai Enggau Main Asal Malaysia, Dato Seri Mohamed Nazri Abdul Aziz nyadi chairman Aum Menteri Dagang Temuai ASEAN Ke-17.

Kes nyeludup minyak diesel subsidi seruran dipunas

KUCHING (13 Feb 2014) : Sebuah kerita pajero enggau minyak diesel subsidi 1,000 liter ke berega RM26,0000 mujur dirampas asil kerejasama Opis Menteri Dagang Dalam Negeri enggau Pekara Bebeli Barang Sarawak begulai enggau raban Polis Diraja Malaysia (PDRM) Sarawak kena 5 Febuari tu tadi.

Direktor Opis Dagang Dalam Negeri enggau Pekara Bebeli Barang Sarawak (PPDNKK), Stanley Tan madah, rambau kes nya nyadi siku lelaki beumur lebih kurang 30 taun ditangkap lebuh iya benung ngepam minyak diesel ke dalam tangki besi ke udah diubah ba belakang sebuah kerita pajero di sebuah stesyen minyak di Siburan.

"Lelaki nya diatu benung ditan laban deka dipansik sereta semua penerang ari iya deka dirikod magang," ku iya madah rambau Aum Pengarang Berita ke diatur bekaul enggau kes ngerampas minyak subsidi ari kapal orang berikan ba Pengkalan Balai Polis Tasik, Bintawa ditu kemari (Hari Tiga).

Kes tu deka dipansik nitihka Seksyen 21 Akta Kawalan Bekaln 1961. Enti ditemu besalah orang ke ngelanggar undang-undang tu ulih diukum duit enda ngelui RM100,000 tauka djil enda ngelui tiga taun.

Nangkan ke nya, Stanley madah siti agi kes lebih kurang sebaka nyadi ba Baraj Sejingkat kena 10 Febuari tu tadi iya nya kes sebuah kapal orang berikan dirampas laban ke ngundan minyak diesel subsidi 20,000 liter ke berega RM140,000 mujur dirampas staf PPDNKK enggau PDRM lebuh ti bejalaika pengawa matau ba tasik.

"Berindik ari kes tu, sebuah kapal orang berikan sereta dua iku jeragan enggau siku kuli ditangkap laban deka dipansik.

"Minyak diesel ke diundan sida tu dipelabaka deka dijual ngagai menua luar tauka dijual ngagai kilang-kilang ke semak ditu," ku iya.

Asil ari kes tu, Stanley madah PPDNKK begulai enggau PDRM deka terus bejalaika pengawa matau kandang tasik dikena ngurangka kes nyeludup minyak diesel subsidi ari menua tu.

Sebuah rumah di Kampung Plaman Banteng angus

SERIAN (12 Feb 2014) : Sebuah rumah dua tingkat ba Kampung Planman Banteng ditu angus urung pukul 12.10 tengahari kemari.

Nitihka penerang penusah angus nyadi bepun ari sadau rumah nya.

Udah nya, Pemesai Senior Bomba II, Duno Bunggang, madahka bala sida bisi nerima kanggau tasah urung pukul 12.10 tengahari nengah Opis Operasyen Sarawak.

Sebuah kereban pengangkut ke ditepan tujuh iku pekereja Balai Bomba enggau Penyelamat Serian berumban ngesah palan penusah ke bepalan kira 20 kilometer ari balai.

Lebuh datai ba palan penusah angus urung pukul 12.30 tengahari, pengawa ngerara api terus dipejalai.

"Nadai sebarang penusah bakal diripot, api mujur dirara ambis pukul 12.56 tengahari," ku Duno lebuh dirandau Utusan Sarawak kemari.

Berindik ari nya kira 50 peratus rumah nya angus, udah nya kebuah enggau penyampau pengerugi agi benung dipansik.

MPOC bejuraika pemar enggau peluang industri nengah seminar

KUCHING : Menteri Pemansang Pengawa Ladang enggau Komoditi, Datuk Amar Douglas Uggah Embas, ngulu pengawa bejadi dialog begulai enggau bala kaban industri minyak sawit ba sebengkah pengerami ke diatur Opis Minyak Sawit Malaysia (MPOC), lalu berambaika jaku "Reach & Remind Friends of the Indsutry Seminar 2014 and Dialogue : Challenges and Opportunities in 2014' bepalan ba sebengkah hotel tebilang ditu empu.

Sama bisi datai ba pengerami tu iya nya Sapit Kepala Menteri Datuk Patinggi Tan Sri Dr Alfred Jabu anak Numpang, Seketeri Jeneral Opis Menteri Pemansang Pengawa Ladang enggau Komoditi Datin Paduka Nurmalam Abdul Rahim, Chairman Lembaga Minyak Malaysia Dato Wan Muhammad Khair-il Anuar Wan Ahmad, Chairman Opis Minyak Sawit Dato Lee Yeow Chor, Direktor Jeneral Opis Minyak Sawit Malaysia Datuk Dr. Choo Tuen May, enggau Kepala Pemesai Opis Minyak Sawit Malaysia Tan Sri Datuk Dr. Yusof Basiron.

Program tu endang sebengkah ari pengawa ke digaga Opis Minyak Sawit Malaysia (MPOC) ngerapitka kaul entara Menteri Pemansang Pengawa Ladang enggau Komoditi begulai enggau industri kelapa sawit Malaysia enggau chara mantaika isu-isu ke besai sereta peluang ke bisi dalam industri minyak sawit Malaysia nengah seminar, dialog enggau eksibisyen.

Uggah madah, sektor komoditi dipeda nyulut ngerembai nengah pengawa eksport. Dalam timpuh Januari ngagai Disember 2013, penyampau minyak sawit enggau produk minyak sawit eksport ngerikod untung RM61.29 bilion, lalu penyampau tu dipeda besai agi ari taun 2012 ke ngerikod 24,59 juta tan lalu taun 2013 ngerikod 25. 66 million tan metrik.

Udah nya, asil eksport dipeda labuh ngagai 14.15% bebanding enggau RM71.4 bilion ba taun 2012. Tu nyangka laban penyampau pupu rata sebulan rega CPO ti mit berengkah bulan Julai 2013 iya nya RM2, 289 lalu rega iya dipeda niki kena bulan Disember iya nya RM2, 618.

Stok CPO ngerikod 1.98 juta tan metrik kena bulan Disember 2013, bebanding enggau penyampau ke lebih besai agi 2.63 juta tan metrik dirikod ba bulan Disember 2012.

"Pemain lama Industri enggau bala pakar pengawa dagang ngumbai rega minyak betapat enggau minyak sawit mata ba makit global, pia mega besemekih enggau rega minyak mata (petroleum).

Kelimpah ari nya, rega minyak kachang soya mega dipeda beretan manah agi ari rega minyak sawit lalu kitai naka ulih ngenyemakka tikas rega dua bengkah minyak tu," ku Uggah.

"Tu nyangka awakka ke engkeman endur ngiga pemasik bekaul  enggau chara ke pemadu manah dikena mutarka takah rega lalu ngiga chara ngasuh rega minyak sawit niki," ku iya.

Ba pemansang ke bukai, Uggah bisi nimbal penemu bekaul enggau kimpin anti minyak sawit ke digaga Gerempung Ukai Perintah (NGO) menua barat ke ngumbai diri deka ngelindung pemanah rampa menua.

"Kebendar iya pengawa industri minyak sawit dikereja dikena nyediaka perengka pemakai, munaska penyeranta enggau ngemansangka ekonomi menua. Utai ke bansa nya endang jaku tuduh sengapa laban di menua tu indsutri tu dikereja enggau meruan sereta nadai ngeruga pemanah ikas rampa menua," ku iya.

Nangkan ke nya, Uggah meri jamin perintah deka terus nulung ngangkatka industri minyak sawit ngerembaika makit-makit baru sereta munaska sebarang pekara ke ulih ngechau indsutri tu.

Berebak ari nya, Uggah ngelalau kompeni-kompeni ke bisi penau dalam pengawa pansik enggau pemansang tauka landik ba pengawa teknologi baru ulih bekunsika penemu ngemansangka industri minyak sawit di Malaysia.

Dulu ari nya, program seminar ke diatur pengelama sehari nya dikena meri peluang ngagai bala pesereta industri minyak sawit bejuraika isu-isu ke besangkut paut enggau pemar ke ditapi enggau peluang dalam Industri minyak sawit 2014.