Tekat Bengoh : Apai Indau dilalau nganjung anak besekula

KUCHING : Penulung Menteri Pengerai Rama Sarawak Datuk Dr Jerip Susil ngelalau bala apai indai nembiak ari empat buah kampung bisi kena pangka projek tekat Bengoh dipinta ngemeratka pelajar bala anak sida.
   
Iya madahka diri bisi ditusika senentang beberapa iku nembiak sekula ari Kampung Taba Sait, Kampung Rejoi, Kampung Pain/Bojong enggau Kampung Semban nadai nurun ke sekula berengkah hari keterubah besekula 2 Januari tu tadi laban Sekula Primari  (SK) Semban enggau Sk Taba Sait udah ditutup lalu dibuka ba Skim Berumah Baru Bengoh (BRS).
   
"Pelajar endang pekara ke chukup beguna ngagai pengidup bala anak lalu bala apai indai enda patut ngengaika peluang ngagai bala anak sida ngulihka pemandai.

Semina nengah penemu pelajar ke chukup nya baru pengidup bala anak sida dudi hari ulih tejamin," ku  Kaban Kunsil Negeri Bengoh nya.
   
Setengah ari 204 pintu ruang bilik ari empat buah kampung ke patut mindah ngagai BRS lalu bedau mindah lalu pekara nya ngujungka anak sida ke besekula ba SK Pangkalan Ampat tauka SK Bengoh tepasa bedarat sejam tauka dua jam ngagai sekula.

Mayuh bengkah pekara nyadika keserah rayat ke enggai pindah ngagai BRS nyengkaum madahka diri nadai duit dikena bepungkal baru.
   
Dr Jerip madah, ruang bilik ke kena pangka projek tekat Bengoh enti nitih udah pindah ngagai BRS sebedau pengerami Krismas tu tadi tang ketegal gaya hari ke nadai manah ngujungka agih belanja laun diberi lalu sida nyau laun mindah.
   
Iya madah, pengawa mindahka sidai tu dikereja ngena bilun Soldadu Langit Diraja Malaysia (TUDM) tang iya madahka haribulan nya agi bedau temu ketegal agih belanja kena sida nya pindah agi bedau diberi.
   
Iya madah, bala sida deka berunding enggau raban orang ke besangkut paut dikena ngelengkas pengawa meri agih belanja nya lalu ngarapka semuya sida ke besangkut paut setuju pindah ngagai rumah baru ke chukup disediaka perengka guna baka bekal ai enggau elektrik pechuma.
   
BRS dikemansangka ba tanah 130 hektar lalu beungkus RM129 juta bepalan ba Penrissen, ngerimbai Kampung Semadang, Jalai Puncak Borneo, lebih kurang 20 kilometer ari Tekat Bengoh.
   
Pengawa ngaga tekat Bengoh ngampuhka kandang menua kira 1,600 hektar lalu ungkus dikena ngaga pemansang tu kira RM310 juta bepun dikereja ari taun 2007 lalu tembu 2010 tang nyentuk ke diatu lalu bedau ulih dipenyadi laban pengawa mindahka rayat bisi penanggul.
   
Tekat tu ulih ngempang ai 144.1 juta meter padu air ke deka disambung ngagai loji ai beresi Batu Kitang dikena nambahka penyampau ai ke diatu  786 mega liter sehari (MLD) ngagai 2,047 MLD ungkup napi peminta guna ai rayat ke diau ba menua Kuching enggau Kota Samarahan. Bernama.

Taska patut ditumbuhka ba Opis Pengerai Menua Kuching

KUCHING : Menteri Pengintu Pengelantang, Orang Indu enggau Pemansang Ruang Bilik Datuk Hajah Fatimah Abdullah minta Kelab Lumba enggau Main (KSR) Opis Pengerai Menua Kuching numbuhka Palan Penyaga Anak Mit (Taska) ba opis sida.

Fatimah madah, pengawa numbuhka Taska ba palan endur gawa tu beguna amat dikena nulung bala orang indu ke beranak mit bekereja.

"Penyampau orang indu ke gawa ke maya hari tu nyau majak mayuh lalu sida dipeda nulung ngangkatka penatai pemisi menua. Nya alai, penumbuh Taska ba palan endur gawa dipeda siti konsep ke bela 'menang-menang'.

"Nangkan ke nya, perintah bisi nyediaka agih belanja ungkup opis kompeni tauka opis perintah ke deka numbuhka Taska ba palan bekereja. Entara pemeri ari perintah ngagai opis-opis ke deka numbuhka Taska ba palan endur gawa iya nya duit RM200,000, subsidi yuran RM180 sebulan ngagai genap iku anak ari apai indai ke gawa perintah ke ngembuan penatai pemisi kurang ari RM5,000 sebulan.

"Udah nya, perintah mega deka meri bantu yuran Taska RM250 sebulan ngagai apai indai ke ngembuan penatai pemisi enda ngelui RM920 sebulan enti sida nganjung anak ngagai Taska swasta ke udah dirijsta ba Opis Pengintu Pengelantang Raban Bansa (JKM) berengkah Januari 2014," ku iya.

Iya ti mega nyadi Penyanding Penemu KSR Opis Pengerai Menua Kuching madah munyi nya rambau Pengerami Makai Malam ke diatur kelab nya ba sebengkah hotel tebilang ditu kena Hari Enam tu tadi.

Fatimah madah, penumbuh KSR ba Opis Pengerai Menua Kuching chukup beguna laban ulih dikena ngerapitka kaul entara bala staf ke gawa ba opis nya. Kelimpah ari nya mega, ku iya ulih nyadi palan ke pemadu manah dikena nyaga pengelantang pendiau bala staf.

"Ari kelab tu bala staf ulih ngasaika pengaga ati ari ke tepejuh gawa nengah mayuh bengkah aktiviti main ke bisi diatur baka main futsal enggau badminton. Kelimpah ari nya mega, kitai ulih ngelala pengelandik siku-siku sereta dikena ngangkatka pemanah rita opis tu empu," ku iya.

Rambau pengerami nya, Fatimah bisi muji pengawa kerejasama ke udah kala diatur entara Opis Pengerai enggau Opis Menteri Pengintu Pengelantang, Orang Indu enggau Pemansang Ruang.

Entara program ke kala diatur nya baka Kimpin Meri Tusi Indai ungkup anak mit ke beumur kurang ari enam bulan, kimpin nyaga pemeresi agu enggau kandang opis, Healthy Athlete Program begulai enggau Special Olympic Sarawak enggau ngaduka servis ungkup mansa ampuh bah.

Berebak enggau pengerami, Kaban Kunsil Negeri (ADUN) Dalat tu mega bisi nyuaka pemeri chek ungkup Projek Mit Menua Pesisir (MRP) RM3,000 besereta Trofi Pekit Bowling enggau Badmintin ungkup KSR Opis Pengerai Menua Kuching.

Sama bisi datai iya nya Pemesai Opis Pengerai Menua Kuching Dr. Kamalrudin Lajim sereta lebih kurang 400 iku kaban KSR Opis Pengerai Menua Kuching.

DBKU dipinta ngetanka pesaka menua

KUCHING : Kepala Menteri Pehin Sri Haji Abdul Taib Mahmud muji mayuh bengkah program pemansang ke diatur Dewan Bandaraya Kuching Utara (DBKU) kenyau 25 taun ke udah laban dipeda meri mayuh penguntung ngagai bandar besai tu.

Iya madah, taja baka nya agi bisi pekara ke mit patut dinan laban nya mandangka identiti menua tu baka Jalai Gambier. Pengawa dagang ke dikereja ba sepemanjai jalai tu ukai semina mandangka Kuching nyadi bandar moden tang meh agi ulih dijaga nyadika pesaka menua.

"Kesatu kebuah bandar besai Kuching meseti dijaga laban ngembuan sejarah lama (pesaka menua) tauka pemansang ke mengkang besambung-sambung, udah nya kedua bandar besai Kuching diuan rayat mayuh ke chukup pengerah enggau sebarang orang lalu pekara tu nyau baka pendiau pengidup orang ke diau ba kampung," ku iya.

Iya madah munyi nya rambau bejadi Pengerami Agenda DBKU 2014 bepalan ba Esplanade Kuching, Jalai Gambier ditu, pagi kemari (Hari Lima).

Nangkan ke nya, Taib madah pemujur bandar Kuching berindik ari pengawa dagang, nya alai taja pan pengawa dagang majak dikemansang tang kitai anang seseklai ngelengkaka pengawa lama nyengkaum sejarah pesaka bansa.

" Ari pendiau pengidup rayat ke bechampur bansa tu, DBKU meseti bebendar agi ngereja pengawa ngatur pengawa enggau manah-manah. Sekali agi aku nyebut, jaga manah pesaka menua tauka sejarah lama ke udah disebut aku tadi," ku iya seraya ngelalau raban bansa Melayu enggau bansa China terus bekerejasama dalam ngemansangka menua Kuching.

Dulu ari nya, Datuk Bandar DBKU Datuk Haji Abang Abdul Wahap Abang Julai madah, program ke bansa nya diatur DBKU kenyau dua taun ke udah lalu tuju iya ngambika bisi endur rayat begelumu sereta bekunsika penemu begulai enggau perintah, pengari swasta, enggau pengari ari gerempung-gerempung ukai dikuasa perintah (NGO).

"Enggau tu kami ngarapka bandar besai Kuching ulih nyadi sebengkah menua ke tebilang rita ba taun 2017 iya nya deka nyadi bandar besai ke idup (A City with a Soul), baka nyadi Pelin Lima taun tu," ku iya.

Berebak enggau pengerami nya, DBKU bisi ngelancarka siti model pengelikun bandaraya asil ari kerejasama perintah, swasta enggau rayat mayuh tauka 3P (People, Private and Public) ke mungkur staf DBKU empu, Polis, Bomba raban pengari swasta enggau rayat mayuh.

Tuju program tu dikena nambahka pengelikun ba menua besai tu ukai semina ngagai rayat ditu empu tang mega ungkup bala temuai ke bisi datai ngagai Kuching.

Program Agenda DBKU  diatur berengkah 24 ngagai 26 Januari 2014 lalu entara aktiviti ke bisi diatur nyerumba pengarami tu iya nya eksibisyen, bejualka pemakai, street soccer, bowling nyiur, konsert agenda DBKU, meri darah, pekit main dart, bibat lengan, mandangka tanda tradisional enggau mayuh agi ke bukai.

Nya alai, rayat kelebih agi ke diau ba bandaraya Kuching dilalau sampal bebala mayuh ngalawa Esplanade Kuching jam ke diatu ngambika sama enggau berami ngemujurka program Agenda DBKU 2014.

Sama bisi datai ba pengerami tu Seketeri Perintah Negeri Sarawak Tan Sri Datuk Amar Morshidi Abdul Ghani, Menteri Pengawa Berumah enggau Dagang Temuai Datuk Amar Abang Johari Tun Openg, Menteri Kereja Raya Datuk Fadillah Yusof, bala Penulung Menteri enggau sekeda pengari rayat.

Sarawak ngembuan semua pakej dagang temuai

KUCHING : Perintah andal Sarawak deka nyadi palan dagang temuai ke baru ba menua ASEAN tu dalam kandang lima taun ke deka datai, ku Menteri Dagang Temuai Sarawak Datuk Amar Abang Johari Tun Abang Haji Openg.

Iya madah, trend industri dagang temuai dunya ke maya hari tu jauh udah berubah laban temuai lebih numouh ngagai ekodagang temuai lalu Sarawak endang setipak amat ngembuan semua pakej nya.

"Sarawak deka nyadi palan dagang temuai ke baru ba pelilih menua tu setipak enggau pengerembai pemansang industri dagang temuai menua, nya alai Forum Dagang Temuai ASEAN 2014 (ATF 2014) deka nulung ngangkatka kerejasama entara menua ASEAN enggau Sarawak nengah industri dagang temuai intra-ASEAN," ku iya.

Iya madah munyi nya ngagai pengarang berita rambau Aum Menteri Dagang Temuai ASEAN Ke-17 ke diatur ditu lalu digulu 10 iku menteri dagang temuai ASEAN.

Johari madah, Sarawak deka mandangka pemisi ke dikembuan negeri tu iya nya ekodagang temuai dalam ngelakuka indsutri dagang temuai ngagai rayat ba serata dunya.

"Kitai ngembuan mayuh pesaka ekodagang temuai ke ulih dipandangka ngagai menua-menua bukai, ambika banding kitai ngembuan empat bengkah endur taman negara iya nya di Kuching kitai bisi Taman Negara Bako, Taman Negara Tanjong Datu, Taman Negara Gunung Gading enggau Taman Negara Wetlands Kuching lalu timpuh pejalai ngelawa palan tu lebih kurang 40 minit ari bandar besai Kuching," ku iya.

Berebak enggau nya, iya madah nengah ATF 2014, Malaysia deka naka ulih ngelakuka penyelai enggau pemayuh utai idup enggau utai tumbuh ke bisi ba menua tu.

"Ba Sarawak, perintah negeri deka nyungkak pemansang infrastruktur iya nya pelin besai dagang temuai ke nyengkaum dagang temuai ba kandang menua pesisir.

"Pelan besai tu deka nyengkaum mayuh bengkah bidang ke deka dipansik enggau silik laban kitai deka ngemansangka industri dagang temuai ditambah enggau pemanah rampa menua enggau pengeraja asal," ku iya.

Johari madah, pansik pelan besai nya dipelabaka tembu kena bulan Oktober tu lalu aum deka diatur begulai enggai perintah besai sereta kompeni.

Kelimpah ari nya, iya madah nyentuk ngagai Disember 2013, bisi 4.1 juta temuai dirikodka datai ngagai negeri tu lalu penyampau belanja ke dikena sida sekumbang ke raun ba menua tu lebih kurang RM 8 bilion.

Nya alai, aku pechaya penyampau penatai temuai kitu taun tu deka betambah mayuh agi.

Dulu ari nya, Menteri Dagang Temuai Enggau Main Asal Malaysia, Dato Seri Mohamed Nazri Abdul Aziz nyadi chairman Aum Menteri Dagang Temuai ASEAN Ke-17.

Kes nyeludup minyak diesel subsidi seruran dipunas

KUCHING (13 Feb 2014) : Sebuah kerita pajero enggau minyak diesel subsidi 1,000 liter ke berega RM26,0000 mujur dirampas asil kerejasama Opis Menteri Dagang Dalam Negeri enggau Pekara Bebeli Barang Sarawak begulai enggau raban Polis Diraja Malaysia (PDRM) Sarawak kena 5 Febuari tu tadi.

Direktor Opis Dagang Dalam Negeri enggau Pekara Bebeli Barang Sarawak (PPDNKK), Stanley Tan madah, rambau kes nya nyadi siku lelaki beumur lebih kurang 30 taun ditangkap lebuh iya benung ngepam minyak diesel ke dalam tangki besi ke udah diubah ba belakang sebuah kerita pajero di sebuah stesyen minyak di Siburan.

"Lelaki nya diatu benung ditan laban deka dipansik sereta semua penerang ari iya deka dirikod magang," ku iya madah rambau Aum Pengarang Berita ke diatur bekaul enggau kes ngerampas minyak subsidi ari kapal orang berikan ba Pengkalan Balai Polis Tasik, Bintawa ditu kemari (Hari Tiga).

Kes tu deka dipansik nitihka Seksyen 21 Akta Kawalan Bekaln 1961. Enti ditemu besalah orang ke ngelanggar undang-undang tu ulih diukum duit enda ngelui RM100,000 tauka djil enda ngelui tiga taun.

Nangkan ke nya, Stanley madah siti agi kes lebih kurang sebaka nyadi ba Baraj Sejingkat kena 10 Febuari tu tadi iya nya kes sebuah kapal orang berikan dirampas laban ke ngundan minyak diesel subsidi 20,000 liter ke berega RM140,000 mujur dirampas staf PPDNKK enggau PDRM lebuh ti bejalaika pengawa matau ba tasik.

"Berindik ari kes tu, sebuah kapal orang berikan sereta dua iku jeragan enggau siku kuli ditangkap laban deka dipansik.

"Minyak diesel ke diundan sida tu dipelabaka deka dijual ngagai menua luar tauka dijual ngagai kilang-kilang ke semak ditu," ku iya.

Asil ari kes tu, Stanley madah PPDNKK begulai enggau PDRM deka terus bejalaika pengawa matau kandang tasik dikena ngurangka kes nyeludup minyak diesel subsidi ari menua tu.

Sebuah rumah di Kampung Plaman Banteng angus

SERIAN (12 Feb 2014) : Sebuah rumah dua tingkat ba Kampung Planman Banteng ditu angus urung pukul 12.10 tengahari kemari.

Nitihka penerang penusah angus nyadi bepun ari sadau rumah nya.

Udah nya, Pemesai Senior Bomba II, Duno Bunggang, madahka bala sida bisi nerima kanggau tasah urung pukul 12.10 tengahari nengah Opis Operasyen Sarawak.

Sebuah kereban pengangkut ke ditepan tujuh iku pekereja Balai Bomba enggau Penyelamat Serian berumban ngesah palan penusah ke bepalan kira 20 kilometer ari balai.

Lebuh datai ba palan penusah angus urung pukul 12.30 tengahari, pengawa ngerara api terus dipejalai.

"Nadai sebarang penusah bakal diripot, api mujur dirara ambis pukul 12.56 tengahari," ku Duno lebuh dirandau Utusan Sarawak kemari.

Berindik ari nya kira 50 peratus rumah nya angus, udah nya kebuah enggau penyampau pengerugi agi benung dipansik.

MPOC bejuraika pemar enggau peluang industri nengah seminar

KUCHING : Menteri Pemansang Pengawa Ladang enggau Komoditi, Datuk Amar Douglas Uggah Embas, ngulu pengawa bejadi dialog begulai enggau bala kaban industri minyak sawit ba sebengkah pengerami ke diatur Opis Minyak Sawit Malaysia (MPOC), lalu berambaika jaku "Reach & Remind Friends of the Indsutry Seminar 2014 and Dialogue : Challenges and Opportunities in 2014' bepalan ba sebengkah hotel tebilang ditu empu.

Sama bisi datai ba pengerami tu iya nya Sapit Kepala Menteri Datuk Patinggi Tan Sri Dr Alfred Jabu anak Numpang, Seketeri Jeneral Opis Menteri Pemansang Pengawa Ladang enggau Komoditi Datin Paduka Nurmalam Abdul Rahim, Chairman Lembaga Minyak Malaysia Dato Wan Muhammad Khair-il Anuar Wan Ahmad, Chairman Opis Minyak Sawit Dato Lee Yeow Chor, Direktor Jeneral Opis Minyak Sawit Malaysia Datuk Dr. Choo Tuen May, enggau Kepala Pemesai Opis Minyak Sawit Malaysia Tan Sri Datuk Dr. Yusof Basiron.

Program tu endang sebengkah ari pengawa ke digaga Opis Minyak Sawit Malaysia (MPOC) ngerapitka kaul entara Menteri Pemansang Pengawa Ladang enggau Komoditi begulai enggau industri kelapa sawit Malaysia enggau chara mantaika isu-isu ke besai sereta peluang ke bisi dalam industri minyak sawit Malaysia nengah seminar, dialog enggau eksibisyen.

Uggah madah, sektor komoditi dipeda nyulut ngerembai nengah pengawa eksport. Dalam timpuh Januari ngagai Disember 2013, penyampau minyak sawit enggau produk minyak sawit eksport ngerikod untung RM61.29 bilion, lalu penyampau tu dipeda besai agi ari taun 2012 ke ngerikod 24,59 juta tan lalu taun 2013 ngerikod 25. 66 million tan metrik.

Udah nya, asil eksport dipeda labuh ngagai 14.15% bebanding enggau RM71.4 bilion ba taun 2012. Tu nyangka laban penyampau pupu rata sebulan rega CPO ti mit berengkah bulan Julai 2013 iya nya RM2, 289 lalu rega iya dipeda niki kena bulan Disember iya nya RM2, 618.

Stok CPO ngerikod 1.98 juta tan metrik kena bulan Disember 2013, bebanding enggau penyampau ke lebih besai agi 2.63 juta tan metrik dirikod ba bulan Disember 2012.

"Pemain lama Industri enggau bala pakar pengawa dagang ngumbai rega minyak betapat enggau minyak sawit mata ba makit global, pia mega besemekih enggau rega minyak mata (petroleum).

Kelimpah ari nya, rega minyak kachang soya mega dipeda beretan manah agi ari rega minyak sawit lalu kitai naka ulih ngenyemakka tikas rega dua bengkah minyak tu," ku Uggah.

"Tu nyangka awakka ke engkeman endur ngiga pemasik bekaul  enggau chara ke pemadu manah dikena mutarka takah rega lalu ngiga chara ngasuh rega minyak sawit niki," ku iya.

Ba pemansang ke bukai, Uggah bisi nimbal penemu bekaul enggau kimpin anti minyak sawit ke digaga Gerempung Ukai Perintah (NGO) menua barat ke ngumbai diri deka ngelindung pemanah rampa menua.

"Kebendar iya pengawa industri minyak sawit dikereja dikena nyediaka perengka pemakai, munaska penyeranta enggau ngemansangka ekonomi menua. Utai ke bansa nya endang jaku tuduh sengapa laban di menua tu indsutri tu dikereja enggau meruan sereta nadai ngeruga pemanah ikas rampa menua," ku iya.

Nangkan ke nya, Uggah meri jamin perintah deka terus nulung ngangkatka industri minyak sawit ngerembaika makit-makit baru sereta munaska sebarang pekara ke ulih ngechau indsutri tu.

Berebak ari nya, Uggah ngelalau kompeni-kompeni ke bisi penau dalam pengawa pansik enggau pemansang tauka landik ba pengawa teknologi baru ulih bekunsika penemu ngemansangka industri minyak sawit di Malaysia.

Dulu ari nya, program seminar ke diatur pengelama sehari nya dikena meri peluang ngagai bala pesereta industri minyak sawit bejuraika isu-isu ke besangkut paut enggau pemar ke ditapi enggau peluang dalam Industri minyak sawit 2014.

Bejimat ari kena tipu orang ke nadai dikelala

MUKAH (11 Feb 2014) : Sekeda kes enchuri emas dipelabaka nipu ngena penemu puchau lalu suah nipu orang tuai enggau bini orang ke nadai bekereja, terus ngachau runding rayat ke diau ba kandang menua tu kenyau beberapa bulan ke udah.

Ba sekeda kes, siku ari raban sida ke ngereja pengawa nya dipesebutka indu, iya ditusi ngelawa mansa ba palan mayuh orang lalu ngaku diri staf ari Opis Pengintu Pengelantang (JKM).

Nitihka penerang sumber, udah tembu berandau indu nya deka mai mansa nitihka iya nepan van lalu madahka diri deka ngelawa opis perintah awakka diinterbiu sebedau sida diberi duit bantu.

“Ba rantau jalai mansa dipinta begambar laban gambar nya deka digaga nyadika rikod, kenu.

“Udah nya, ngambika pemesai ulih pechaya, orang ke deka bulih bantu nya meseti muka marik, gelang tinchin enggau sumpin emas ke dikena diri.

“Laban barang berega ulih nanggul sida ke deka bulih bantu," ku sumber ti enggau nama iya disebut madah ngagai Utusan Sarawak.

Mansa ke nemu diri udah kena tipu pengudah meda van ke ditepan iya nya jauh limpang ari opis ke dituju, tang enda ulih ngaga nama-nama laban irauka pengelikun diri.

Mansa semina bengap-bengap, udah nya disangkai ba siti simpang sebedau dilawa orang bukai ke nganjung iya pulai ke rumah, ku sumber.

Kelimpah ari nya, siti agi chara dikena orang nipu iya nya nyaru diri nyadi tukang nyual barang ari kompeni, udah nya iya niki sekeda rumah orang kampung.

Nitihka penerang orang ke sebilik enggau mansa, orang ti kena tipu nemu barang berega iya lenyau pengudah tukang nyual barang nya pulai.

Entara chara sida ke bukai iya nya nyediaka pakej kikis lalu menang lalu madahka sida ti mujur deka bulih perais.

"Tang sida nadai nemu diri emas dalam rumah udah kena churi," ku iya seraya madahka bisi kes nipu ke sebaka nyadi tang chara sida nipu enggau chara bukai sereta nadai diripot ngagai polis.

Berebak enggau nya, polis lebuh dirandau kena Hari Satu tu tadi madahka kes nya endang amat bisi nyadi nyengkaum kala diripot kena bulan September enggau Oktober 2013.

Nya alai, polis ngelalau rayat mayuh anang mudah pechata ngagai orang ke nadai dikelala.

SWTC nambahka pengelandik orang indu bejaku

KUCHING (11 FEB 2014) : Raban orang indu di Sarawak patut nguna peluang ke bisi dipeda enggau chara masuk sebengkah kelab ke dikumbai Sarawak Women Toastmaster Club (SWTC) dikena nambahka pengelandik sida bejaku enggau orang bukai.

Menteri Pengintu Pendiau Orang Indu enggau Pemansang Ruang Bilik, Datuk Hajah Fatimah Abdullah madah, kelab nya ukai semina nyadi komiti dikena mantu mensia mayuh ngenataika buah penemu tang mega dikena ngerapitka kaul enggau pangan diri.

Iya madah, pekara nya beguna amat laban ari pemandai pelajar, pengelandik bejaku deka meri pengelebih ngagai siku-siku orang kelebih agi orang indu ngulihka pemujur dalam pengidup.

"Nya alai, kitai begunaka dua bengkah pengelandik tu iya nya landik bejaku ba mua mensia mayuh sereta berandauka pekara-pekara ti besangkut paut enggau isu ke baru nyadi.

"Berindik ari nya, aku meransang raban sida tu ngambika datai masuk nyadi kaban SWTC awakka dikena nambahka penemu enggau dikena ngerebut peluang ke bisi datai dudi hari," ku iya.

Iya madah munyi nya rambau pengerami makai malam ke diatur SWTC ba sebengkah hotel tebilang di Kuching.

Sama bisi datai iya nya Direktor Komiti Indu Sarawak, Noriah Haji Ahmad enggau Presiden SWTC, Kuspa Arina Mohamad Bohari.

Fatimah madah, nengah pengawa ke bansa nya, juluk perintah negeri ke deka meda mayuh orang indu ba Sarawak mujur endang ulih nyadi nyata.

"Tambah mega diatu perintah bebendar deka meda ambis nadai 30 peratus orang indu di Sarawak mangku pengawa ngaga pemutus ba opis perintah enggau kompeni.

"Nya alai, aku pechaya enggau chara masuk SWTC, raban sida tu ulih dilatih nyadi orang indu ke bepenemu sereta ngembuan mayuh pengelandik ba sukut bejaku ba mua mayuh," ku iya.

BERITA LUMBA

Tim Sarawak 2014

PEKIT MAIN BOL

PEMUTUS MANGKUK FA
(11 Febuari 2014)
Felda United Nyatup Sarawak 
Kelantan Nyatup PKNS 
JDT 1 Nyatup Kedah 
PDRM Nyatup Pahang 



MANGKU FA
18 Febuari (HARI Dua)
Sarawak Nyatup Felda United
(Stadium Negeri, 8.15 malam)

LIGA SUPER 2014
15 Febuari (Hari Enam)
Sarawak Nyatup Perak
(Stadium Negeri, 8.15 malam)

8 March (Hari Enam)
T-Team Nyatup Sarawak
(Stadium Sultan Ismail, 8.45 malam)

Pemutus naka 11 Febuari 2014

                               P M S  K  J  B  MT
1.Selangor              4  3  0  1  6  3  9
2.Terengganu          3  2  1  1  4  2  7
3.ATM                   4  2  1  1  5  3  7
4.Sarawak             4  2  0  2  5  3  6
5.Kelantan              4  2  0  2  5  5  6
6.Pahang                4  2  0  2  4  4  6
7.PKNS                 4  2  0  2  4  5  6
8.Perak                  4  2  0  2  3  4  6
9.Lions XII             4  1  2  1  4  4  5
10.Johor DT          4  1  1  2  6  6  4
11.T-Team             4  1  1  2  3  6  4
12.Sime Darby      4  1  0  3  3  7  3

Nama penganti Taib nyangka ditemu hari enam tu?

KUCHING (11 Feb 2014) : "Anti aja hari enam tu, pengudah Yang Amat Berhormat (Pehin Sri Taib) betemu enggau TYT (Tuai Pemegai Menua) nya baru kitai nemu sapa ke deka dikamat nukar iya (Taib)," ku Menteri Pengintu Pendiau, Orang Indu enggau Pemansang Ruang Bilik, Datuk Hajah Fatimah Abdullah.

Fatimah madah munyi lebuh dipinta pemberita meri penemu bekaul enggau nama Menteri Pekara Khas ba Opis Kepala Menteri, Tan Sri Datuk Amar Adenan Satem tu dikaitka nyadi orang ke deka nyadi Kepala Menteri nukar Taib dipansutka dalam siti surat kabar di menua tu apin lama ke udah.

"Sapa-sapa aja ulih ngaga spekulasi tang kebendar utai nya meseti nitihka atur iya, sama-sama meh kitai nganti lalu kitai enda ulih nentuka sekalika berita nya betul tauka enda," ku iya rambau dirandau pemberita pengudah tembu bejadi 'Program Titik Sentuhan Kasih Taun Baru China Petronas' ke diatur ba Muzium Sarawak kemari (Hari Dua).

Nangkan ke nya, Fatimah ti mega nyadi Sapit Tuai Orang Indu PBB, madahka sebedau tu kaukus Parti Pesaka Bumiputera Bersatu (PBB) rambau aum komiti besai bela udah setuju nyukung sapa-sapa orang ke dipilih Kepala Menteri (Taib) nukar iya.

"Berebak enggau nya, kitai ngarapka semua pengawa tauka program ke diperambu dikena nempa Sarawak nyadi menua maju ulih disambung sereta ulih japai nengah orang baru ke dipilih nyadi Kepala Menteri.

"Kelimpah ari nya, kitai ngarapka polisi ti meri peluang ngagai orang dalam nulung ngemansangka menua tu dalam mayuh bengkah bidang ulih dikemeranka kepala menteri baru.

"Kitai empu meda, dalam PBB tanggung pengawa orang indu dipeda dipeguna amat, tambah mega penyampau orang indu diatu majak ditambah nyadi Seketeri Politi, nyadi Tuai Raban Bansa, Pemancha enggau bisi mega nyadi Tuai Rumah ba rumah panjai.

Pekara tu nandaka orang indu endang seruran bisi diberi peluang mangku tanggung pengawa, "ku tandu Fatimah.

"Taja pia, kami endang bisi berasai sinu sereta meri besai pengaga ati laban meda pemanah pengawa ke udah digaga iya (Taib) ngagai negeri Sarawak nyentuk gaya pemansang ke bisi dipeda kitai diatu.

Bekaul enggau program ke diatur Petronas nya, Fatimah madah, program ke bansa nya endang chukup manah laban meri reti ke chukup besai ngagai bala anak mit ti bisi penimpang pendiau.

Rambau program nya, Fatimah diberi basa nyuaka Ang Pow Taun Baru China ngagai bala nembiak ke diau ba Palan Pengandai Anak Mit (PDK) Samarahan, kaban Dyslexia Association Sarawak enggau Rumah Kanak-Kanak Kuching.

Udah nya, bala nembiak PDK nya dibai raun meda eksibisyen ke dipandangka ba sebelah Muzium Sarawak.

Sama bisi datai rambau program tu iya nya Menija Besai PETRONAS Wilayah Sarawak, Samsur Taha, Direktor Opis Pengintu Pengelantang Negeri Sarawak Abang Shamsuddin Abang Seruji enggau Residen Menua Samarahan Abdul Rahman Sanusi.

Peresa dulu kereban pengangkut

KUCHING : Opis Pengelikun Jalai Raya (JKJR) Sarawak ngelalau mensia mayuh ti deka pulai ke menua beserimbai enggau pemisi Hari Raya Aidilfitri meseti ngemeratka pengelikun tauka dikumbai 'Power Check' kelebih agi ngagai pengerai, merambu pejalai sereta meresa dulu kereban pengangkut diri empu sebedau ke berengakah bejalai jauh.

Penulung Pengarah JKRJ Sarawak Redzuan bin Haji Hamdan madah, ninting taun pengerami Hari Raya disambut enggau penuh pengaga tang bisi mega sekeda ruang bilik kena tuntung penusah ke enda disadang.

"Lebuh datai musin pengerami jalai raya endang penuh laban pengguna ti bela pulai ke kampung nyambut Hari Raya begulai enggau kaban belayan semenua. Pekara ke bansa tu endang udah nyadi adat di menua kitai tang maya nya mega meh nyadi penusah bebadi ba jalai raya," ku iya.

Iya madah munyi nya ngagai pemberita rambau Program Kimpen Pengelikun Jalai Raya Beserimbai Enggau Pengerami Hari Raya ke diatur bepalan ba Terminal Bas Kuching Sentral kena malam Hari Satu tu tadi.

Nangkan ke nya iya madah, laban ti kelalu gagit deka pulai nyambut pengerami, dia deh mayuh pengguna jalai raya enda ingat meresa kereban pengangkut baka tayar, minyak injen, stiring enggau utai bukai ke tau ngujungka penusah bebadi.

"Kami endang suah meri jaku tangkan tang mayuh pengguna enggau mending. Tebal agi sida ngumbai pekara bejimat nya semina nitihka undang-undang dalam 'akta pengangkutan jalanraya 1987' tang kebendar iya lalau kami lebih ari nya.

"Pekara ke bisi dalam undang-undang nya semina pekara pemun nyengkamum ulah pengguna ti tau ngujungka eksiden.

"Ambika banding entudi kerita bukai enggau takah ke selamat meseti bisi laban jalai raya ba Sarawak chukup mayuh selikuh sereta semina jalai dua iti urung aja.

"Siti agi iya nya pengguna meseti ngembuan penemu ke besabar lebuh datai ba palan lampu trafik enggau ba simpang jalai. Ulah ti nitihka atur baka tu patut bisi ba genap iku pengguna jalai raya awakka sida ulih datai ba palan ke dituju," ku iya.

Berebak enggau program tu mega bisi 30 iku raban alumni Program Latih Ke Menu Enggau Bansa tauka dikumbai Briged Sukarelawan Khidmat Negara (BSKN) nyadung pemeri ngagai mensia mayuh ti pulai ngena bas ekspress MTC malam nya sereta enggau pengguna bas ekspress ke bukai.

Bela bisi datai rambau program tu iya nya Pengarah JKJR Sarawak Dabina Englina enggau Pengarah BSKN Zon J (Betong, Serian, Bau enggau Sematan) Abdul Rahman Buk.

KPN ngamatka peranak menua Taiwan dibunuh sereta ditabanka seraban lelaki besenjata ba Semporna

JOHOR BAHARU (16 Nov 2013) : Kepala Polis Menua Tan Sri Khalid Abu Bakar kemari (Hari Lima) ngamatka ripot bekaul enggau kes culik lalu munuh ke nuntung dua iku temuai ari menua Taiwan, dipelabaka dua iku melaki bini ba Pulau Pom Pom, Semporna, Sabah tumu pagi Hari Lima.
   
Iya madah, raban polis agi benung nyidi raban lelaki ke nguna senjata ke disadang besangkut paut enggau kes ke naydi urung pukul 1 pagi nya.
   
"Penusah tu nuntung seiku temuai lelaki peranak menua Taiwan ke ditimbak sampai parai, udah nya seiku agi temuai indu ke dipelabaka bini mansa ditabanka raban lelaki nya," ku iya.

Iya madah munyi nya lebuh ke dirandau media pengudah nemuai ngagau Indu Opis Polis Kontijen Johor Baharu ditu kemari (Hari Lima). Sama bisi datai iya nya Kepala Polis Johor Datuk Mohd Mokhtar Mohd Shariff.
   
Nitihka penerang, dua iku mansa nya bemalam ba resort pulau nya belabuh Hari Dua tu tadi lalu nyadang diri deka pansut ari pulau nya kena Hari Tiga minggu baru.

Ba pekara bukai, Khalid madah naka ke diatu polis bedau kala nerima sebarang peminta nguna senjata api ari opis pekara agama ba menua tu.
   
"Bisi atur ke diletak lalu meseti dititihka peminta ke deka ngembuan senjata api, enti tetitihka atur baru kami meri pemendar. Tang naka ke diatu kami agi bedau bisi nerima (peminta ari opis agama)," ku iya.

Iya madah munyi nya lebuh nimbal buah penemu ke dipansutka Menteri ba Opis Menteri Besai Datuk Seri Jamil Khir Baharom ke ngasuh kaban ari Opis Agama Islam diberi  senjata api maya sida bejalaika pengawa.
   
Bekaul enggau kes munuh Kepala Pegawai Opis Agama Islam Pahang (JAIP) Ahmad Raffli Abdul Malik, Khalid ngasuh laluh 27 iku agi sida ke nitihka penemu bula 'Tuhan Harun' ngambika datai nyerah diri.

"Enti enda datai, kami deka ngiga sida lalu kot empu deka ngemansutka jaku gerah ngasuh nangkap ketuai sida ke puntan nyerah diri ngagai kot," ku iya.

Kena Hari Minggu tu tadi, Ahmad Raffli, 49, mati kena timbak seiku ari tiga saspek ke ngelawa rumah iya ba Indera Mahkota 2, Kuantan. sumber Bernama.

Pemakai ulih ngerapitka kaul

Malaysia endang menua ke ngembuan mayuh bansa pemakai ke nyelai kelebih agi pemakai tradisional ke bisi ba genap bengkah negeri.
   
Tu meh pekara ke nyelai seretai ngelai sesebengkah negeri muntang dikelala bala temuai ari dalam menua tu empu enggau ari menua luar.
   
Ambika chunto, Johor tebilang laban pemakai ke dikumbai laksa Johor enggau soto, Kedah tebilang enggau laksa utara laban ngembuan penyamai baka Laksa Penang. Baka nya mega  Negeri Sembilan chukup tebilang enggau rempah dagin salai lalu Melaka tebilang enggau
ikan disumai bisa.
   
Pemakai ke bansa tu endang dikerinduka rayat Malaysia enggau rayat ari menua luar ke bisi nemua ngagai menua tu.

Kelimpah ba Semenanjung, Sabah enggau Sarawak mega ngembuan pemakai ke majak dikerinduka semua orang nyengkaum rayat ari Semenanjung.
   
Diatu mayuh orang Semenanjung balat tetenguk deka nyepi pemakai ke tebilang ba dua bengkah negeri tu baka laksa Sarawak, kuih lapis Sarawak, mee kolok, ikan terubuk masin, ambuyat ari Sabah enggau mayuh agi pemakai ke bukai.   
   
PENYELAI KITAI
   
Taja pan beserara ketegal Tasik China Selatan, tang pekara nya ukai nyadika penanggul negapka kaul kenyau penumbuh serakup Malaysia 50 taun ke udah.
   
Udah nya ari sukut kereban pengangkut enggau teknologi pemadah, rayat di menua tu majak ulih nerima sereta nemu. Enti maya pun penumbuh menua Malaysia mayuh amat pekara ke nyekat kaul.

Diatu bansa pemakai tradisional nyadi pekara ke pemadu beguna ulih ngerapitka kaul sereta dikena bekelala enggau pangan diri.
   
Kebuah baka nya laban pemakai ke nyamai suah digiga orang lalu bisi sekeda sanggup deriba jauh ketegal deka nyepi pemakai ke dikingin ati.

Nya alai, kitai tentu enda alit ati nyema bisi orang Semenanjung sanggup terebai ke Sarawak ketegal deka makai ikan terubuk masin tauka nyepi kuih lapis Sarawak ke chukup pegari ba negeri nya.
   
Tauka ngagai Sabah ketegal deka nyepi pemakai ari tasik ke chukup mudah sereta nyamai bebanding enggau ba endur bukai baka ba Pantai Remis enggau Bagan Lalang ba Selangor.
   
Ukai semina ketegal penyamai pemakai nya aja, tang ketegal pengerindu rayat ba menua tu ke gauk begulai enggau pangan diri lalu penyali nya bisi dipegedika sekeda menua ba dunya.

DAPUR SARAWAK BA SEMENANJUNG
   
Diatu, majaka mayuh kedai nyual pemakai ari Sarawak enggau Sabah dibuka ba  Semenanjung, baka nya mega pemakai ke balat tebilang ba Semenanjung majak laku ba Sabah enggau Sarawak baka roti canai, asi lemak enggau utai bukai.

Pekara tu mandangka semua rayat udah ulih nerima penyelai pangan diri.
   
Menija 'Restoran Dapur Sarawak', Sharifuddin Junaidi ke bisi muka kedai makai madahka, pemakai endang pekara ke ulih ngerapitka kaul entara rayat di menua tu enggau pangan diri.
   
Kelimpah nyepi pemakai ke bisi dibantai, sida mega tentu deka betanyaka senentang pemakai nya enggau penyelai iya.
    
"Pemakai ke nyamai deka terus dikingat belama ba batang rekung," ku iya ti bisi mukai restauran ba belakang hospital Tawakal ba Jalai Pahang.
   
Ngenahka pemakai baka mee kolok, laksa Sarawak, umai, manuk pansuh, asi goreng dabai enggau kuih lapis Sarawak, balat mantupka pengelenggau rayat Sarawak ke diau ba Semenanjung.
   
Iya madah, orang ke datai makai ba restauran nya ukai semina rayat Sarawak aja tang mega mayuh orang Semenanjung ke deka nguji pemakai ari Sarawak.
   
"Utai bukai ke dibai ari Sarawak baka gula apong ke dikena ngelumai ai teh nyadi ai irup ke balat dikerinduka bala temuai ditu," ku iya seraya madahka tukang sumai ba restauran nya endang peranak asal ari menua Sarawak.

Seiku misi kena runtun lebuh nurun sembiang

MIRI : Seiku misi rugi lebih RM1,000 pengudah kantung sandik iya ke ngundan siti telefon binching enggau duit kena runtun ba sebengkah penusah ke nyadi ba Pujut 7, ditu kena Hari Minggu tu tadi.

Ba penusah ke nyadi pukul 7.30 pagi nya, misi (mansa) ke beumur 28 taun nya benung bejalai kediri-diri ngelawa sebuah gerija ke semak laban deka besembiang.

Sumber madah, maya ke benung bejalai enda mukai-mukai seiku lelaki ke ngena motosikal datai ari belakang lalu ngeruntun kantung sandik mansa ke dikepit ba bau kanan.

“Saspek terus laju ngeris motosikal lalu mansa enda sempat minta sah orang bukai laban maya nya langsung nadai tepedaka orang bukai sama ba endur nya.

“Mansa mega enda sempat malik lumur plat motosikal saspek laban ti kelalu kesal," ku iya.

Berindik ari penusah nya, mansa terus ngaga ripot ngagai Balai Polis Pusat Miri awakka nasat pekara nya.

Nangkan ke nya, pengari polis madah bala sida amat bisi nerima ripot bekail enggau kes nya lalu pansik agi benung dipejalai.

Penusah Jalai Raya semakin nyadi!

JALAI raya sigi ukai palan alai empelita. Jalai raya sigi ukai menalan endur belumba. Jalai raya sigi ukai kelang alai mandangka pengelandik diri. Jalai raya mega sigi ukai tempat ti endur ngayanka ati enda liat, enda kudat, enda tat.

Rambai jaku ke munyi tu suah amai didinga kitai lebuh ngenang pasal pengelikun ba jalai raya. Mayuh bendar rambai jaku bukai ke ditempa, disebut sereta dikelembungka nengah mayuh macham media sekalika nya ti bechelak tauka media elektronik, ngambika kitai sama megai pengelikun lebuh betengahka jalai raya. Kitai mega sigi enda lembau beajar-ajar pangan diri bejimat lebuh nengah jalai raya.

 Orang politik, pemesai-pemesai , enggau bala tuai ngelalau rayat. Orang ke tuai umur ngelalau orang ke biak. Apai-indai ngelalau anak. Menyadi sendi, kaban belayan, suku juru sama belalau pangan. Aku ngelalau nuan. Dik ngelalau aku.  Suah!  Ukai ti sekali dua kitai beajar-ajar. Kitai semampai ngingatka pangan diri nengah jalai raya. Enda nemu leju,  sigi enda bansu kitai ke belalauka pangan.

Nama kebuah dih wai stastik kes belantak, aksiden tauka kemalangan ba jalai raya ti nabanka nyawa agi tinggi amai ba menua kitai?.
Enti nitihka stastik ti ayan ba laman web Jabatan Keselamatan Jalan Raya Malaysia, kenyau ari taun 2003 nyentuk ke taun 2011, enda kurang ari 7000 iku orang bisi mati ba jalai raya di Malaysia ninting taun, reti nya dalam kandang  lapan taun nya lebih lima puluh ribu iku orang udah mati bebadi di jalai raya di Malaysia. Nyeregu bulu pegu meda stastik nya.  Udu mayuh amat nya wai! Kasih endar, ninga mensia ditinggang  penusah ti nyadi baka nya.

 Di Sarawak tu aja enti nitihka berita ti ayan ba surat kabar kena 15 Ogos 2011 tu,  pukul rata iya enda kurang ari tiga ratus iku orang bebadi tauka mati ninting taun ba Sarawak,  kenyau ari taun 2008 ngagai taun 2010. Dalam kandang tiga taun ti disebut nya  lebih seribu iku orang danjan ditabanka penusah ba jalai raya.
Sinu wai, ngenang orang ke bangat ngemayuh nya bebadi. Orang ti bisi kaban belayan, orang ke segulai sejalai, tauka orang sebilik enggau orang ke udah bebadi tentu mega chukup penusah, chukup penyinu, chukup pemerinsa ditinggalka orang ke bebadi ba jalai raya nya.

Patut bendar kitai di Malaysia nyengkaum kitai di Sarawak tu, berunding enggau dalam sereta panjai dalam pekara tu. Kitai sama berunding enda ngira parti politik, enda ngira nya Gerempung dikuasa Perintah tauka Ukai dikuasa Perintah, berunding enda ngira bansa enggau asal penatai. Penusah bebadi ba jalai raya tu ukai pekara ti ulih ditangkup, ditapi tauka diputarka  Perintah, Gerempung, Parti Politik, tauka sebarang Institusyen ke bisi di menua kitai kediri tang nyerangkung semua rayat Malaysia ti idup sereta bekenaka jalai raya. Belantak, eksiden tauka kemalangan jalan raya tu patut amat dipasukka tauka digaga nyadi National Key Result Areas (NKRA) menua Malaysia.

Nama kini kebuah ti bendar ti ngasuh aksiden ti nabanka nyawa mensia tau ngemayuh nya nyadi. Kati nya ketegal perangai mensia ti deka mai kereban pengangkut tekelalu laju? Kati nya tegal sida deriba ke enda bejimat, deriba bedau landik, deriba tekelalu lelak sereta  ngantuk ? Nya sekeda pekara ke bisi besangkut paut enggau orang ke mai kereban pengangkut ti tau diperundingka lebuh ngusaika ke kebuah tu nyadi.

Kereban pengangkut ti dikena mega tau diperundingka lebuh kitai deka nentuka kebuah iya nyadi. Mayuh mega tanya ba senentang tu tau dipansutka, baka umur kereban pengangkut. Bisi enda kini kereban pengangkut diservis nitihka taga ti udah ditetapka. Kati berek iya makai? Kati tayar agi meruan bungai? Kati lampu kereban pengangkut nya agi sekena? Bah, baka ni ku gaya kereban  dikena nyaga pengelikun diri dalam perengka pengangkut ti dikena, agi meruan, agi tan, agi menyana nya dia?

Kelimpah ari ti berundingka orang ti bebaika perengka pengangkut, umur enggau gaya perengka pengangkut, kitai mega tau berundingka gaya jalai raya ti ditengah. Enti jalai enda chukup manah, enti jalai tekelalu sempit, enti jalai tekelalu tekul enggau enti jalai tekelalu renjan nya mega tau nyadi siti ari kebuah penusah bebadi ba jalai raya nyadi.

Dalam berita ti kala dibacha aku mega dipadahka, bisi  25 arung jalai di Sarawak ti selalu endur orang aksiden ti ngujungka pemati. Sekeda ari ti disebut nya baka jalai Kuching - Sri Aman, semak jalai Simpang Punda, semak Bukit Bagunan, jalai entara Memalui enggau Pais di Betong ke udah ngujungka pemati 10 iku dalam minggu siti tu tadi ari beberapa kes belantak ba jalai ti kelalu sempit, jalai semak Bukit Sebangkoi, semak Bukit Lambir. Amat enti agi baru-baru deriba nurun Bukit Bagunan nya, sigi getar-getar pala patung, takut.

Nya alai laban sida ti bekuasa baka sida Opis Pengemata Pengelikun Jalai Raya  udah nemu arung jalai ke selalu endur aksiden ti  balat sereta selalu nabanka nyawa, sida ti bekuasa patut jejampat berunding ngiga jalai ngurangka aksiden nyadi ba urung nya. Enti jalai ba arung nya tekelalu pikul, peruruska ga, enti jalai nya tekelalu renjan, tumpurka ga awakka jalai nya baruh agi, enti tekelalu sempit gaga luaska agi ga, enti tekelalu bebelit sereta betanjung putung ga jul tanjung nya. Enti jalai kelau belubang biki ga lalu enti jalai kelalu jai biki manahka agi.  Ngena pengawa ti bansa nya kitai besampika aksiden ti nabanka nyawa mensia tau kurang agi nyadi.

Sigi amat, dini endur menua ti bekenaka jalai raya, aksiden nya endang bisi nyadi tang kitai ngarapka diri ulih ngurangka iya. Kitai ngarapka diri ulih ngelindung mayuh agi nyawa enggau reta tengkira ti lenyau tegal bebadi di jalai raya.

G5 enda diburu ari BN?

“Enda patut kami deka muru sida (G5) ngagai penyakal laban pekara ke baka nya tau meri pengering ngagai penyakal ari 15 kerusi nyadi 19 kerusi ketegal ulah diri empu.”
Datuk Amar Haji Mohamad Asfia Awang Nassar
Speaker Kunsil Negeri Sarawak



BATU NIAH : Anang muru G5 ke nyadi pengari rayat ke endang udah dipilih rayat empu, sida endang kaban Barisan Nasional laban udah menang ba pengawa bepilih besai negeri (PRN Sarawak 2011) ngena tiket Barisan Nasional (BN).

Speaker Kunsil Negeri Sarawak (DUN), Datuk Amar Haji Mohamad Asfia Awang Nassar lebuh ke dirandau Utusan Sarawak lemai Hari Enam tu tadi madah, tegapka kaul enggau kaban BN manah agi ari ke muru sida.

Iya madah, dalam DUN Sarawak bisi 71pengari, 54 endang kaban BN, 17 (penyakal) lalu dua iku (bibas), bekaul enggau ADUN Bekenu ditu iya nya  Rosey Yunus enggau empat agi ADUN (G5) endang kaban BN taja pan sida nadai parti pengudah ke mansutka diri ari Parti Demokratik Progressif Sarawak (SPDP).

“Pengudah nyadi ADUN Bekenu (Rosey) dipilih Kepala Menteri Sarawak Pehin Sri Haji Abdul Taib Mahmud nyadi Penulung Menteri Pelajar Tumu Anak Mit enggau Pemansang Ruang Bilik, nya alai kami sigi enda muru sida ke endang udah dipilih rayat.

“Enda patut kami deka muru sida (G5) ngagai penyakal laban pekara ke baka nya tau meri pengering ngagai penyakal ari 15 kerusi nyadi 19 kerusi ketegal ulah diri empu,” ku iya seraya ngering jaku bebendar ngetanka BN Sarawak.

Ku iya mega, Rosey Yunus enggau tiga iku agi pengari rayat ukai agi kaban SPDP, sida G5 udah menang PRN ngena tiket BN lalu kitai patut narit kaban penyakal masuk BN, ukai muru orang BN masuk penyakal.

Nya alai, rayat ba menua Bekenu patut ngetanka penuduk Rosey Yunus lalu ukai semina ba Tikas Kabinet Sarawak enggau DUN, kitai deka meda negapka agi menua tu ngambika BN ulih menang besai udah tu, ku iya.

Nangkan ke nya, Rosey Yunus madah iya enggau G5 meri terima kasih ngagai Chairman BN Sarawak, Pehin Sri Haji Abdul Taib Mahmud ke agi muka pintu ngagai sida masuk ni-ni parti dalam komponen BN kelimpah ari SPDP.

Iya madahka diri semina nitihka sida ke kering agi penemu nentuka ni bagi parti ke patut dipasuk laban pengering iya (Rosey) endang bepanggai ngagai rayat Bekenu empu endur nentuka penuduk iya.

Kelimpah ari nya, iya meri terima kasih ngagai Presiden Parti Rayat Sarawak (PRS) Tan Sri Dr. James Jemut Masing laban udah nelengaka  pintu ngagai G5 masuk PRS.

“Enti deka masuk PRS, aku meseti berunding begulai enggau G5 laban pengering aku endang bepanggai ngagai sida dalam Kelab Barisan Nasional Sarawak begulai enggau rayat baDUN Bekenu ditu.

“Aku enda ulih ngaga pemutus kediri aja laban rayat Bekenu ti ari mayuh pupu raban bansa enggau jalai pengarap udah madah sida endang agi begunaka aku mangku pengawa ke diatu," ku iya.

Nya alai, peminta rayat bekaul enggau pengawa aku ke nyadi ADUN Bekenu patut disambung ngambi terus ngetanka BN ba Bekenu ditu, ku iya.

Bekaul enggau pengerami nya, tuju iya diatur dikena ngerapitka kaul antara perintah besai, perintah negeri, DUN sereta enggau rayat ditu lalu tu mandangka kaul ke rapit begulai enggau DUN sereta enggau ADUN Bekenu endang ulih ngemansangka pengidup rayat..

Anang ngumbai perintah ngerampas tanah rayat - John Sikie

BINTULU : Penulung Menteri ba Opis Kepala Menteri (Pekara Adat Bumiputera enggau Penan) sereta nyadi Penulung Menteri Perintah Pelilih Menua Datuk John Sikie Tayai nganu sekeda orang ke nuduh perintah nguji deka ngerampas tanah temuda asal bumiputera rayat  ba negeri  tu.

Iya ngumbai jaku tuduh ke baka nya enda patut, lalu iya nerangka lebih RM9 juta pampas udah dibayar ngagai orang ke ngempu tanah enggau pesereta ke dikena bungkur projek pemansang tanah NCR naka ke diatu.

"Kebendar iya, rayat tauka orang ke ngempu tanag ke dibungkur projek pemansang tanah   NCR tu udah ngasaika penguntung asil ari mayuh bengkah sukut pengidup, ku iya.

Nya alai, orang ke nyebar berita bula tauka jaku petenah baka nya kebendar iya begedika asil ke diulih bala pesereta, ku iya rambau pengerami bejadi tanah endur projek pemansang tanah temuda asal bumiputera (NCR) ungkup kandang menua Sungai  Tanyil,  Sungai  Majau   enggau Sungai  Sangan, Tatau ba ditu.

John Sikie  mega madah, perintah endang nadai kuasa deka ngambi tanah NCR rayat enti nadai bulih pemendar ari ornag ke ngempu tanah nya.

Perintah nengah Opis Tanah  enggau Survei semina deka bejalaika pengawa nyukat (tanah) dikena nentuka garis antara tanah NCR enggau tanah Negeri  pengudah nerima surat ari orang ke ngempu tanah NCR awakka tanah sida dikemansangka enggau projek kelapa  sawit, ku iya.

Perintah nengah Opis Menteri Pemansang Tanah,  udah nya deka milih kontraktor dikena ngemansangka tanah  NCR  rayat enggau projek  nanam kelapa  sawit  ke diadang tau meri penguntung ngagai sida nengah dividen, ku iya seraya madahka projek  pemansang tanah NCR   nya deka meri penguntung tauka ngenataika sumber jereki kelimpah bulih jalai raya.

Nya alai, ku John Sikie orang ke ngempu tanah NCR  anang sesekali mendingka jaku selebubu ngapa ke ngumbai perintah ke deka ngerampas tanah  NCR rayat laban utai ke baka nya enda amat lalu semina deka dikena raban orang ke nadai betanggungjawap ngulihka undi kelebih agi rambau PRU13 tu tadi.

Projek  pemansang tanah  NCR ba menua Sungai  Tanyil,  Sungai  Majau  enggau Sungai  Sangan  dipasuk lebih 1,050  iku pesereta   ari 14   buah  rumah  panjai ari DUN   Kakus   enggau Parlimen  Selangau  ke mungkur 5,727   ekar  pemesai tauka 916  hektar   tanah  NCR.

Nangkan ke nya, chairman Komiti Pemansang Genturung Pendiau (ADC)  Projek   Pemansang Tanah  NCR  Sungai   Tanyil,  Sungai  Majau   enggau Sungai  Sangan,  Tr.  Gerosen  ak  Jubin   ngelalau rayat kelebih agi ke bisi ngempu tanah dalam projek nya bela bebendar ngemansangka tikas ekonomi pengidup diri.

Perintah, ku iya enda kala mejal rayat (pengempu tanah  NCR)  nyereta projek baka nya, tang tepulai ngagai sida ngaga pemutus.

Bela bisi datai iya nya pengari ari Opis Menteri Pemansang Tanah  Wilfred Jolie, Pengarah Pengatur Pengawa Ikrar Gemilang Sdn. Bhd.,  Datuk Ahmad Ibrahim enggau Pegawai Daerah Tatau, Nyurak Keti.


  

Kerembaika jaku Iban ngena perengka ICT

BETONG : Pengawa ngerembai sereta ngangkatka jaku Iban endang patut digaga bebendar setipal enggau ubah pemansang perengka teknologi, ku Menteri Pengawa Ladang enggau Komoditi Dato Seri Douglas Uggah Embas.

Iya madah, setipak enggau ubah ke maya hari tu, tanggungjawap orang Iban empu bebendar ngetanka jaku nya ngambika penulen iya enda lenyau jemah.

"Nya alai, tanggungjawap apai indai nyengkaum Gerempung Pemansang Jaku Iban (AEDIL) tu endang patut amat ngambika jaku Iban ti dikena enggau chara ke enda betul sereta balat bebalut ba sida ke nembiak ke maya hari tu.

"Ukai nya aja, aku ngarapka AEDIL sereta gerempung-gerempung ke ngembuan juluk ke sebaka ulih ngemeratka atur ke manah dikena terus ngemansangka jaku Iban," ku iya.

Iya madah munyi nya rambau bejadi Aum Besai AEDIL 2013 semak ditu kemari (Hari Enam).

Nangkan ke nya, sehari tu sepil muntang sereta ngena jaku ke bechampur nyau ngerekai amay nyengkaum ba aktiviti belajar enggau maya peresa ba palan-palan pelajar.

"Tu endang siti utai ke patut dikemata sereta dirara enggau lengkas ngambika enda majak nyadi.

"Kitai enggai meda pemanah jaku Iban ke dipeda nyelai nyau dikenyai," ku iya.

Uggah ti mega nyadi Kaban Parlimen Betong madah, setipak enggau penatai perengka teknologi ICT iya mega ngasuh raban bansa Iban ba menua tu ulih nguna perengka nya dikena nyapai juluk ngemansangka jaku Iban.

"Kena perengka teknologi diatu baka laman sosial Facebook berandauka atur dikena ngetanka jaku Iban.

"Aku mega ngarapka, AEDIL ulih ngaga laman web awakka bisi dipeda serea endur berundingka mayuh pekara nyengkaum nyediaka kamus jaku Iban Iban ngambika nembiak kemaya hari tu ulih belajarka jaku Iban enggau betul ari laman web nya," ku iya.

Dulu ari nya, Uggah nyadaka agih belanja MRP penyampau RM30,000 ngagai AEDIL dikena belajaika program ngeringka jaku Iban ba pengerami nya.

"Gaga mayuh program baka kus enggau utai bukai laban kitai deka meda AEDIL nyadi tibang tauka palan endur belajarka jaku Iban.

"Ukai nya aja, dikena nyemai pengasai ati rinduka jaku Iban ba sida ke nembiak sereta ngerembaika jaku nya ngagai semua rayat Malaysia, program baka pekit pidato enggau bejerita patut diatur," ku iya.

Berebak enggau nya,  Uggah madahka penyanggup diri nyukung aktiviti dikena ngeringka jaku Iban laban pengarap enggau perintah endang deka mai rayat Malaysia nemu bejaku Iban.

Bela bisi datai ba pengerami tu iya nya Presiden AEDIL, Dr. Lambat Lindong, Pegawai Tadbir Sarawak (SAO), Ludan Lintong, Seketeri Politik Dr Richard Rapu, Chairman Program, Paul Langgang, Kepala enggau pengari opis, AJK enggau kaban AEDIL.

Gerempung orang pinchin agi ngiga kaban

KUCHING : Buah penemu ari kaban Gerempung Orang Pinchin Perintah diguna awakka peminta ti dianjung ulih datai ba orang ke besangkut paut.

Presiden Gerempung Orang Pinchin Perintah Sarawak, Julaihi Ismail madah, taja pan sehari tu, Sarawak ngembuan lebih kurang 40,000 orang pinchin perintah, tang semina  7,047 iku orang pinchin ke bisi ngerijista diri enggau gerempung nya.

"Kami begunaka penemu mayuh orang, tang laban penyampau kaban dalam gerempung tu mimit, peminta ari kami enda bangat didingga orang," ku iya lebuh dirandau media beserimbai enggau Hari Orang Pinchin ke disambut ba Indu Opis Gerempung Orang Pinchin Perintah Sarawak, Rumah Ramin, Jalai Reservoir ditu kemari (Hari Lima).

Julaihi madah, enggau penyampau kaban ke mayuh gerempung mudah ngenataika mayuh utai pinta ngagai perintah.

"Kitai chukup begunaka kaban baru ke datai ngerijista diri masuk gerempung tu, sekalika sida nya orang pinchin ari perintah besai tauka perintah negeri," ku iya.

Ku iya, enti masuk nyadi kaban gerempung tu mayuh pemanah, nya alai orang pinchin ke deka masuk gerempung tu patut nama utai ke ulih digaga sida ngagai gerempung enggau mensia mayuh.

"Ngelama tu kami bisi ngenataika sekeda utai pinta ngagai perintah ngambika diperunding, lalu kami ngarapka peminta nya ulih diberi," ku iya.

Antara peminta ke udah dianjung iya nya, minta geran ninting taun, sebidang tanah dikena ngaga indu opis baru enggau mayuh agi ke bukai.

Nangkan ke nya, Sapit Presiden Gerempung Orang Pinchin Perintah Sarawak, Haji Abg Mohd. Atei Abg Madaan madah, gerempung nya deka ngatur program pengelantang pendiau enggau raban bansa beserimbai enggau bulan Ramadan tu.

"Kami deka meri sukung sereta nulung orang ke begunaka tulong dikena ngelempungka penyuntuk sida sebedau ngintu Hari Raya enda lama agi," ku iya madahka gerempung nya deka nyuaka duit ngagai bala penerima.

Berebak enggau nya, iya nesau orang ke deka masuk nyadi kaban gerempung nulung ngemujurka program nya.

"Kami merambu deka ngatur program tu kena 27 Julai ba Dewan Hikmah, Petra Jaya enggau pengeremi ke numbas iya laban ukai pemesai pengerami ke deka dipeda tang pengelurus atu bekunsika pengaga ati kelebih agi ba pengawa ngabang ngagai pangan diri,' ku iya.

Atei mega madahka, gerempung nya deka ngatur program landik bejaku Inggeris, program nemu kuing pengawa sebedau pinchin ngagau orang ke deka pinchin perintah.

"Kami deka, genap iku orang pinchin perintah ngasaika diri sebagi ari rayat mayuh lalu awakka sida ngasaika diri terus dipebasa taja pan udah badu gawa perintah,' ku iya.

Bela bisi datai iya nya Tuai Akaun Gerempung Orang Pinchin Perintah Sarawak, Ting Hwa Ling enggau Seketeri Gerempung Orang Pinchin Perintah Sarawak, Haji Daud Piee.