PRU-13 : BN tetap malas pemanah rayat

KENA MERUAN...Rayong nyuaka insentif ngagai seiku penerima lalu dikemataka Nyalau rambau Pengerami Tuai Begulai Enggau Rayat ba Rumah Tambi, Nanga Tisak, Lidong Skrang, Engkilili.

ENGKILILI : Barisan Nasional (BN) deka terus malas pemanah rayat ke diau ba menua sitak Parlimen Lubok Antu seagi sida nulak penatai parti ke ukai BN maya Pengawa Bepilih Besai Ke-13 (PRU-13) tu ila.

Tanda iya, sekumbang BN udah menang ba Lubok Antu maya PRU-12, perintah malas enggau chara meri mayuh projek pemansang ungkup rayat udah nya.

Kaban Kunsil Negeri (ADUN) Engkilili, Dr Johnnical Rayong Ngipa madah munyi nya rambau bejadi Pengerami Tuai Begulai Enggau Rayat ba  Rumah Tambi, Nanga Tisak, Lidong Skrang, Engkilili apin lama ke udah.

“Kenyau ari taun  2008, rayat ba sitak Parlimen Lubok Antu nerima mayuh projek baka jalai raya, bekal kuasa karan, ai beresi, lalu semua tu perais ari perintah BN.

“Nya alai, rayat endang patut nulak chalon ke ukai BN maya PRU-13 ila, laban aku arap bendar perintah deka meri mayuh agi projek pemansang dalam kandang lima taun ke deka datai," ku iya.

Rayong mega ngelalau rayat ba menua Lubok Antu anang sesekali alah ninga jaku manah ari parti penyakal ke ngumbai sida kaling BN ngelama tu.

Iya madah, parti nya nyediaka insuran enggau duit dikena ngumpan rayat taja pan penyampau nya jauh mimit enti dibanding enggau projek ke udah diberi BN ba ditu ngelama tu.

“Nya semina chara dikena parti penyakal, Parti Pekerja Sarawak (SWP) diatu. Tambah mega sida nguji nganjung chalon ke ukai peranak asal Lubok Antu bediri ngelaban chalon BN ba ditu.

“Aku ngarapka rayat Lubok Antu ulih berunding panjai sebedau ke ngaga pemutus ngundi orang ke ukai chalon BN, anang sesekali ngundi orang ke ukai bansa Dayak tauka ukai orang asal ba menua tu maya PRU-13 ila," ku iya.

Ba pengerami nya mega, Kaban Parlimen Lubok Antu, William Nyalau Badak madahka penyampau agih belanja dikena nulung rayat ba rumah panjai Tambi nukar atap enggau RM3,000 ungkup gerempung indu ba rumah panjai nya.

Niang Datuk Kanang diintu penuh beradat

BASA ARI RABAN SOLDADU...Raban soldadu bepangkat Pegawai Waran 1 ari servis darat, laut enggau udara ngesan sentubong niang Datuk Temenggong Kanang Langkau sebedau niang disembiangka ba Gerija St Thomas Cathedral, Kuching.

KUCHING : Niang Pegawai Waran 1 (B) Datuk Temenggong Kanang anak Langkau terus diberi basa ke penudi ari semua pupu raban bansa nyengkaum bala pemesai perintah, orang ke ngelala, kaban belayan enggau sida sebilik

Entara pemesai perintah ke enda tinggal datai ngabas niang ba Dewan Suarah iya nya Panglima Angkatan Tentera Jen Tan
Sri Zulkifeli Mohd Zin.
   
Iya datai urung pukul 11.50 pagi, ngaga awak 25 minit meri basa ke penudi ngagao niang, pia mega berandau enggau sida niang sebilik sebedau ke nyain bup endur ngenataika jaku penyinu ati.

Sama bisi datai iya nya Panglima Tentera Darat Jen Tan Sri Zulkifli Zainal Abidin ; Panglima Tentera Udara Jen Tan Sri Rodzali Daud; enggau Sapit Panglima Tentera Laut Laksamana Madya, Datuk Mohammed Noordin Ali.
   
Kelimpah ari nya, niang mega nerima basa ari 78 iku veteran soldadu ari raban1 enggau 8 Renjer, udah nya ari raban Rejimen Askar Melayu Diraja ke datai ngena bilun Charlie C-130 Hercules, ari Pangkalan Tentera Udara Diraja Malaysia Subang.
   
Pahlawan negara, Kanang Langkau diberi basa enggau penuh beradat ngena chara soldadu berengkah pukul 1 tengah hari ari Dewan Suarah dibai ngagai Gerija St Thomas Cathedral, lalu disembiang sebedau ke dikubur ba Pendam Pahlawan, Jalai Taman Budaya urung pukul 3.00 lemai (Hari Minggu).

Jalai raya digaga besai

PASAR MINGGU...Datuk Amar Abang Johari Tun Abang Openg (tiga kanan) benung nanyaka rega daun jabang rambau ngabas Pasar Minggu Satok ba ditu, kemari. Bela bisi dipeda Datuk Haji Fadillah Haji Yusof (empat kiba).

KUCHING : Projek ngemesaika jalai dikena meri pengelantang ngagai pengguna jalai raya ke pansut ari pasar Medan Niaga Satok nuju ngagai Satok deka digaga taun tu.

Menteri Dagang Temuai, Datuk Amar Abang Johari Tun Abang Openg madah, jalai raya ke besambung ari pasar Medan Niaga Satok nuju ngagai baruh jematan Satok ngelawa Jalai Satok deka digaga empat lurung begembar.

"Kami udah ngatur perambu projek tu lalu nadai tetemu sebarang penanggul, projek nya deka digaga taun tu," ku iya madah ngagai pemberita maya pejalai ngabas Pasar Minggu Satok begulai enggau Sapit  Menteri Sains, Teknologi enggau Inovasi (MOSTI) Datuk Haji Fadillah Haji Yusof, ba ditu pagi kemari (Hari Minggu).

Johari madah, enti jalai raya nya udah tembu jemah, bala pengguna enda ibuh nengah Jalai Gita agi.

"Projek tu dipelaba beungkus RM5 juta," ku iya lalu madahka nadai agi penanggul jalai sekut udah tu.

Kaban Kunsil Negeri (ADUN) Satok nya mega madahka, palan endur paking ba pasar Medan Niaga Satok deka digaga besai dudi hari.

"Medan Niaga Satok dibuka dua minggu ke udah, lalu pejalai trafik dipeda sekut laban mensia mayuh kiruh beambika barang kulu kili, gaya ke baka nya deka ngetu enda lama agi," ku iya.

Iya madah, sebidang tanah ke semak endur nya diperambu deka digaga nyadika palan paking kereban pengangkut.

Beduduk ari nya, Johari madah, pemeresi bilik mandi enggau agu baMedan Niaga Satok deka seruran diabas ngambika meri pengelantang ngagai bala pengguna.

"Pengguna deka dicaj RM0.20 sen genap kali ngena agu ba endur nya," ku iya.

Kelimpah ari nya, iya madah jalai nuju ngagai kedai-kedai makai /Benteng (Blok D) deka digaga manah agi.

Johari madah, dua iti lampu besai deka digaga bapasar Medan Niaga Satok awakka palan nya semampai tampak dipeda maya malam hari.

"Naka ke diatu, aku berasai puas ati meda pemujur ke udah digaga ba pasar Medan Niaga Satok lalu tebal agi orang ke datai enggau orang dagang chukup berasai gaga meda palan baru tu.

"Kebuah pia, laban sekeda ari sida datai ari jauh iya nya ari Bau, Serian enggau ari Limbang," ku iya.

Medan Niaga Satok beungkus RM46.6 juta lalu ngembuan 2,241 palan endur bedaja, kira lima hektar pemesai lalu dibagi ngagai Zon Basah, Zon Kering, Benteng, Pasar Minggu enggau Pasar Borong.

Sama bisi datai rambau pengawa tu iya nya Direktor Lembaga Makit Betanam Betupi (FAMA) Sarawak, Paza Dan.

Eva Atong champion Pekit Puteri Mukah 2013

DARA BAJIK...Raban pemenang Pekit Puteri Mukah Ambang 2013 iya nya Eva Atong (tengah), Mimi (kanan) enggau Connilia (kiba).

MUKAH : Eva Atong, 25, mujur nyadi champion Pekit Puteri Mukah Ambang 2013 beserimbai enggau Pengerami Nyambut Taun Baru 2013 ke diatur Gerempung Raban Nembiak Parlimen Mukah bepalan ba Dewan Suarah Mesra Mukah kena 1 hari bulan Januari tu tadi.

Indu dara penakan China Iban ke ngarika pelilih Mukah ngembuan peninggi 156 cm  ngena gaun bechura mansau mujur narit ati bala akim sereta ngalahka 12 pengari ke bukai.

Udah nya, Mimi Sofea Han,18, ari Dalat bulih lumur dua, Connilia Tu, 22 ari Sibu, bulih lumur tiga ditangkanka Christina Andrea Tiuh,27, ngarika Miri, enggau Hasiah Hanisah Hasmi, 18, ari Sarikei bela bulih perais pengaga ati.

Pemenang penuduk lumur satu nerima perais Jumpang pala, Duit, Selampai, Segupung Bungai, Gaun Malam Dipelanja Latip Collections, udah nya, pemenang lumur dua enggau tiga bela nerima Jumpang pala, duit, selampai enggau gupung bungai.

Pengari bukai ke semina bulih perais tepa (ke pengingat) ari orang ke melanja program iya nya Noremiza Mohd.. Shamsul, Jeslyn Carlisa Katlen, Nurazian Arbi, Maryanne Paul, Rasyidah Hassan, Elvynna Hailari, Felicia Ong Linn Yeoh,  enggau Nur Malawati Jamal.

Pemenang pekit, Eva Aton , madah, pemujur nya meri pengandal ngagai iya ngambika ransing agi nyereta dini-dni pekit pemajik ke bisi diatur ba endur bukai udah tu.

"Indai melika aku perais baju gaun mansau tu maya hari pengada aku kena  25 Disember tu tadi. Iya madah, kebuah iya meri perais laban aku bagas gawa, sayauka iya, pia mega indai madah aku seiku indu ke landik betanda nitihka main ke dikembuan pupu raban bansa di nengeri tu.

Perais ungkup bala pemenang disuaka Walikota Majlis Daerah Dalat enggau Mukah (MDDM), Ali Suhaili.

Sama bisi datai iya nya Seketeri Politik Kepala Menteri Sarawak, Kenil Jerai’ie, Walikota MDDM Mukah, Ali Suhaili,  Presiden Gerempung Raban Nembiak Parlimen Mukah, Fauziah Adeni, Chairman Pengatur Program, Royston Valentine sereta digulu lebih 300 iku temuai ke bukai.

Pekit Betanda Baka Santa mujur

KUCHING: Kira 18 tim nyengkaum nembiak ke beumur biak ari 15 taun nyereta Pekit Betanda Baka Santa ke diatur Absolute Cool Event (ACE) bepalan ba Kuching Sentral, apin lama ke udah.

Chairman Parti Rayat Bersatu Sarawak (SUPP) ke ngarika Menteri Kereja Raya, Sih Hua Tong madah, aktiviti ke baka nya endang manah diatur dikena meransang bala nembiak landik betanda sereta nempa kaul enggau pangan diri.

"Aku ngarapka mayuh bela nyukung pengawa ngatur aktiviti ke baka tu laban nya entara program ke ulih ngerapitka kaul enggau pangan diri," ku iya.

Berindik ari sukung ke chukup manah ari mensia mayuh, ngujungka komiti pengatur pengawa bisi nambahka penyampau perais iya nya ari lapan iti ngagai 12 iti nyengkaum lumur satu, ngagai lumur tiga sereta mayuh perais ke bukai baka Pemenang Pekayan Pemadu Manah, Pemadu Tebilang, Pemadu Landik Betanda, Pemadu Manah Begulai enggau tiga bengkah perais rindu ati.

Kelimpah ari nya bala pemenang mega diberi perais trofi enggau baucher RM2000 enggau RM1000.

Pekit nya disponser Grand Supermarket, H & L Supermarket, Hon Lee, Facelook enggau Nestle Bliss, Treasure Land, Sugarbun, Singapore Chicken Rice (SCR) , Kentucky Fried Chicken (KFC) sereta disukung Majlis Perbandaran Padawan.

Sama bisi datai rambau pekit tu Pengatur Pengawa, Lim Sin Ying, pengari Grand Supermarket, Liew Gah Lim, Menija Kompleks Kuching Sentral, Jerry Tai, Pengajar Seni Tari, Bernard Kho enggau pengari H&L supermarket, Betty Chia.

Taman Tema patut digaga kena ngumpan temuai Arab

KUCHING : Sarawak patut berundingka sebengkah pemansang ngaga palan awakka nyadi ikon tauka "Taman Tema' dikena ngumpan temuai kelebih agi ari menua Arab datai ngagai nengeri tu, ku Sapit Menteri Dagang Temuai, Datuk James Dawos Mamit.

Taja pan ba nengeri kitai tu udah ngembuan rumah muzium ke chukup manah sereta sekeda perengka lama orang Islam, tang Sarawak meseti bebendar agi ngemanahka palan nya dikena ngumpan temuai ari menua Arab.

Tebal agi orang Arab ke raun ngagai menua tu bebelika barang sampai RM7, 000 seiku enti dikira pupu rata.

"Tu entara penyampau belanja ke pemadu mayuh dikena seiku temuai ari menua luar lebuh ke bebelika barang ba menua Malaysia," ku iya.

Dawos madah munyi nya ngagai pemberita pengudah bejadi Pengerami Dagang Temuai Betanda Pemisi 1Malaysia 2012 ba ditu, kemari (Hari Minggu).

Nangkan ke nya. Dawos madah penyampau temuai menua luar majak mayuh datai ngagai menua tu iya nya bisi 3.2 juta iku dirikod bepun ari bulan Januari ngagai Oktober taun tu. Taja baka nya penyampau temuai ari menua Arab dipeda pemadu mimit enti dibanding enggau menua bukai.

Iya madah, menua Melaka, Johor, Pulau Pinang enggau Langkawi entara palan ke pemadu dikerinduka temuai ari menua Arab, ke ngujungka menua tu ngerikod penyampau temuai  400,000 iku taun siti ke udah.

Menua likun laban nitihka ajar pengarap - Nyalau

KENA MANAH - MANAH...Nyalau (empat kanan) nyuaka insentif ngagai seiku pelajar lalu dikemataka bala temuai ke bukai maya Pengerami Merarau Saint Benedick Chapel ba Skrang, Engkilili.

ENGKILILI : Sukut pengarap tauka agama beguna amat dikena nentuka pengelikun enggau pengelantang pengidup pupu raban bansa di nengeri tu.

Kebuah pia, laban nengah pengarap meh ti ngajar mayuh orang ti pechaya nemu bebasaka ke pangan diri, ku Kaban Parlimen Lubok Antu, William Nyalau Badak.

“Nadai siti pan jalai pengarap ti ngajar orang jai enggau orang bukai, ku iya rambau bejadi Pengarami Merarau Saint Benedick Chapel, Skrang ba Balai Raya Skim Skrang, Engkilili apin lama ke udah.

Iya madah, sukut pengarap sebagi ari pemun ti ngujungka kaul pupu raban bansa di nengeri nyadi terit.

Kelai ti nyengala dipeda mandangka sukut pengarap ulih ngerapitka kaul pupu raban bansa di negeri tu iya nya nengah pengerami besai ke diintu segulai enggau pangan diri niniting taun, ku Nyalau.

“Aku deka nesau semua kita ngambika terus nyukung perintah ke megai menua kitai jam ke diatu ngambika pengelantang pengidup rayat di menua terus tejamin.

“Kitai ke diau ba menua Malaysia patut berasai temegah ati laban naka ke diatu menua tu dipeda udah jauh mujur bendar pengudah ke dipegai lima iku Menteri Besai,” ku iya.

Nya alai, aku ngarapka rayat pupu raban bansa enggau jalai pengarap di nengeri tu ulih ngetanka penyerakup ngambika pengelantang enggau penyenang terus disepi sampai ke jemah ila.

Giat Mara nulung ngemujurka program munaska penyeranta

TABI PUJI… Datuk Aaron Ago Dagang nyuaka setipikit ngagai seiku pelatih maya pengerami GiatMara Zon Tengah ll ba Sibu kemari (Hari Lima). Sama bisi dipeda Irwan Abdullah (tengah).

SIBU : Kelimpah ari meri latih pengelandik, GIATMARA (GM) mega nulung perintah nempa orang landik ba pengawa dagang lalu ngemujurka mayuh program munaska penyeranta.

Supervisor GiatMara Zon Tengah ll ti mega nyadi Menija GiatMara Selangau, Irwan Abdullah madah, nengah program munaska penyeranta taun tu, GiatMara enggau ngemujurka projek PBR, program incubator, program latih 1Malaysia, program latih pengelandik enggau batang kereja, program latih 1Azam, enggau program kelab teknologi.

Nitihka projek PBR, GiatMara bisi enggau ngemujurka ngaga 16 buah GM ba Parlimen Kanowit, 19 buah GM sereta miki sebuah GM ba Parlimen Sibu enggau 22 buah GM dimiki bari ba Parlimen Selangau, ku iya rambau pengerami graduasi GiatMara Zon Tengah ll ba ditu kemari (Hari Lima).

Kaban Parlimen Kanowit, Datuk Aaron Ago Dagang diberi basa nyuaka setipikit ngagai 135 iku pelatih ke mujur nembuka latih sida ungkup  Sesi Julai 2012.

Bala pelatih tu datai ari GM Julau, GM Kanowit, GM Lanang, GM Sibu, GM Selangau enggau GM Tanjung Manis.

Iya madah, GM Kanowit deka muka siti agi kus iya nya Kus Teknologi Ngaga Tekang Ais enggau Aircon taun baru lalu palan nya deka mindah ari sebuah kedai ba Taman Muhibbah ngagai kedai tiga tingkat semak BSN Kanowit.

Berindik ari nya, ku iya ngarapka mensia mayuh ke diau ba Parlimen Kanowit ulih nemu pemisi GM ke ditumbuh ba endur nya dikena nempa nembiak bepenemu dalam bidang pengelandik.

“Chukup senang masuk GM. Pekara ke patut bisi dikembuan iya nya 3M, pandai nulis, pandai macha enggau ngembuan pengerindu ba bidang ke dipilih sereta beumur lebih 15 taun.

Ba GM Lanang mega deka dibuka siti agi kus iya nya Kus Teknologi Automotif ba taun baru. GM Lanang mega deka mindah ari sebuah ba Sibu Jaya ngagai palan ke lebih besai ba industri Sibu Jaya,” ku iya.

Naka ke diatu, GM ba serata menua nyedika 24 buah kus lalu timpuh belajar ba endur pengelama enam bulan ngagai setaun, ku iya lalu madahka GM benung berunding deka nambahka timpuh belajar dalam kus kursus Fashion & Dressmaking (bejait gari) enggau teknologi welding enggau fabrikasi besi ari enam bulan ngagai setaun.

Ngagai bala pelatih, iya madah setipikit ke diterima sida nya ukai nyadika tanda sida badu belajar tang nya dikena sida ngepunka diri napi pemar pengidup dudi hari.

Curtin Sarawak majak nyulut

MIRI : Tim Curtin Universiti, Sarawak Malaysia (Curtin Sarawak) chukup gaga ati pengudah mujur bulih lumur tiga dalam dua kategori beserimbai enggau Simposium Enjinir Kimia Negara (NACES) ke diatur kena 14 ngagai 16 Disember tu tadi ba Kedah.

Simposium tiga hari enggau aktiviti ninting taun ke diatur ba Universiti Kebangsaan Malaysia ba Bangi nyadi palan endur bala pelajar enjinir kimia ari institusi-institusi pelajar tinggi perintah enggau swasta mandangkan pengelandik enggau penemu diri bekaul enggau chara mutarka isu rampa menua.

Bala pesereta nyengkaum pelajar ari serata menua enggau menua-menua bukai ke semak baka Indonesia, Thailand enggau Singapura.

Simposium ninting taun nya berambaika jaku, ‘Climate Revolution : The Rise of the Earth' lalu digulu lebih 300 pesereta ari 17 institusi pelajar  tinggi.

Curtin Sarawak diarika pelajar taun ketiga kus Enjinir kimia iya nya Hwang Zi Zin, Muniandi Sarven Shan, Yong Choon Ping, Chin Wan Ching, Ling Jing Hong enggau Goh Wui Seng.

Nitihka penerang Pengelicha Kus Enjinir Kimia, Lau Shiew Wei, bala pelajar bepun nyereta pekit kena bulan bulan Ogos lalu sida udah  mayuh ngena jam enggau hari dikena nyediaka diri nyereta pekit nya.

Iya madah, Sekula Enjinir enggau Sains seruran nyukung tim sida nyengkaum meri jaku ajar ba penmu teknikal enggau ba nulung ba guna belanja.

Tuai Jabatan Enjinir Kimia, Profesor Madya Dr Chua Han Bing madah, pemujur tim sida nandaka siti ari penyulut ke pemadu beguna ngagai bala pelajar ari kus kimia Curtin Sarawak.

"Bulan Oktober tu tadi, lima iku ari pelajar taun keempat kus enjinir kimia udah bulih perais lumur dua ba Honeywell UniSIM Design Challenge 2012.

“Penyulut nya chukup besai reti nandaka penau enggau pengelebih bala pelajar ke belajar ba endur tu," ku iya.

Perkeso beguna sukung ari raban media

John Riba Marin

KUCHING : Gerempung Pengelikun Sosial (Perkeso) begunka sukung ari raban media enggau gerempung ukai perintah (NGO) ngambika bela nesau mensia mayuh bekaul enggau tanggaung pengawa sereta sukut pengelikun ke dijaga gerempung nya, ku Direktor Perkeso Sarawak John Riba Marin.
   
Iya madah, kelebih agi raban pekereja enggau pengaji patut nemu hak enggau pekara ke patut dipinta sida nitihka skim Perkeso dalam Skim
Pinchin Ilat enggau Skim Insurans Penusah Maya Kereja, nyema penusah nyadi enda disadang baka ngujungka lenyau nyawa, bebadi tauka sakit ketegal ari pengawa ke suah dikereja.
   
"Ambi ke banding ba opis Kuching aja, taun tu bisi 82 notis kompaun tauka ukum udah diberi ngagai pengaji sepanjai Ops Kesan laban sida ditemu enda ngerijista dagang enggau orang ke gawa enggau sida," ku iya rambau bejadi pengawa makai malam Perkeso Begulai enggau Media sereta NGO ba sebengkah hotel tebilang ba ditu malam Hari Empat tu tadi.
   
Iya madah, raban pengaji patut nemu tanggung pengawa sida nitihka Akta Keselamatan Sosial Pekerja iya nya meseti ngerijista pekereja sida taja pan ngembuan seiku pekereja lalu pekereja tau dirijista tu ngembuan gaji enda kurang ari RM3,000.
   
Ngenang pasal program beperesa pengerai enda bebayar ngagai orang ke ngembuan insurans Perkeso iya nya pekereja ke beumur 40 ke atas bepun bulan Januari 2013, iya madah, baucher deka diberi ngagai orang ke patut kelebih agi sida ke diau ba menua pesisir enggau entigis sungai di nengeri tu.

120 iku nerima bantu insuran Agro Kasih-i 1Azam

MERI BANTU... Julaihi Kadir diperatika Zakaria Mohamad enggau Sahari Gani nyuaka bantu insuran Agro Kasih-i 1Azam ngagai seiku penerima ba Saratok.

SARATOK : Kira 120 iku penerima nyengkaum orang bumai, orang berikan, orang bekebun enggau orang dagang ngati ke diri nerima bantu  insuran Agro Kasih-i 1Azam kemari (Hari Enam).

Pemesai Agro Bank Pampang Saratok, Zakaria Mohamad madah, nengah insuran nya bala sida ke nerima bantu ulih dijaga nitihka skim penyaga khas ari bank.

Iya madah, raban orang ke nerima tu nyadi renggat orang keterubah nerima insuran ke dipelanja Lembaga Penyerakup enggau Pengibun Tanah Persekutuan (FELCRA), Opis Betanam Betupi Malayisa, Lembaga Pemansang Ikan Malaysia (LKIM) enggau Lembaga Industri Kayu  Malaysia (MTIB).

"Semua sida ke nerima insuran keterubah tu endang dipilih perintah lalu sida dijaga bank nyema dituntung penusah ke enda disadang tauka pemati.

"Taja pan rega insuran ke diberi nya semina RM50 setaun tang mayuh meri penguntung ngagai orang ke nerima iya," ku iya.

Iya madah munyi nya ngagai pemberita pengudah nyuaka insuran ngagai bala penerima ramabu Pengerami Bejadi Regata Saratok 2012 bepalan ba Tebing Sungai Krian ba ditu kemari.

Iya mega madahka, penyampau bayar endang dipelanja penuh opis-opis perintah ke besangkut paut lalu dalam  program 1Azam di sini, Agro Bank udah dipilih.

Berebak enggau nya Pemesai Pelilih Menua Saratok, Julaihi Kadir diberi basa bejadi tanda nyuaka insuran ngagai lima iku peserta renggat keterubah meri insuran Agro Kasih-1 1Azam nya.

Perkeso nyedia ripot servis ngena SMS

KUCHING : Raban orang ke bisi ngerijista diri ba Gerempung Pengelikun Sosial (Perkeso), kelebih agi iya ke diau ba nengeri tu diatu ulih ngenataika ripot ngena chara jaku pesan pandak (SMS), ku Menija Pampang Opis Servis iya, Chan Hood Cheng.
  
Iya madah, kelimpah ari media sosial ke bukai, servis SMS dipeda ulih nulung ngemanahka servis ke bisi diatu.
  
Chara ngenataika ripot ngena SMS tu iya nya taip PERKESO ADUANNo KPPNRipot
anjung ngagai 15888.
  
"Servis tu chukup nyamai dikena, kelebih agi ngagai orang ke diau ba menua pesisir ba Sarawak," ku iya rambau program seminar Perkeso begulaui enggau media ke diatur ba sebengkah hotel tebilang ba ditu, apin lama ke udah.
  
Tuju seminar nya diatur dikena meri penemu ngagai raban pekereja enggau pengaji ngambi nitihka undang-undang ke udah diletak dalam Akta Keselamatan Sosial Pekerja.

RELA diperansang nulung nyukung BN

SRI AMAN : Kaban Tim Orang Ke Gawa Enda Begaji Malaysia tauka RELA diperansang bela nulung rayat nyukung pengari Barisan Nasional (BN) maya pengawa bepilih besai ke deka datai.

Kaban Parlimen Sri Aman, Masir Kujat madah munyi nya rambau bejadi Pengerami Tuai Begulai Enggau RELA ke diatur ba Rumah Raden, Lachau Ulu, kira 50 kilometer ari pasar Sri Aman kena Hari Lima tu tadi.

Iya madah, RELA patut nulung perintah ngulihka pemujur maya pengawa bepilih besai ke deka datai tu ngambika semua pemansang ke udah dilanggur ungkup rayat ulih ditampung.

“Tanggung pengawa RELA iya nya nulung polis nyaga pengelikun pengidup rayat. Taja baka nya, RELA mega ulih nulung perintah ngemansangka pengidup rayat ba genturung pendiau sida.

“Chara sida iya nya terus nyukung chalon BN ba pengawa bepilih besai ke deka datai. Nya alai, aku ngarapka RELA ulih bebendar nyukung perintah ngambika BN menang baru ba Parlimen Sri Aman ila,” ku iya.

Beserimbai enggau pengerami nya, Masir madahka penyampau tulung ungkup Projek Mit Menua Pesisir (MRP) ba taun 2013 iya nya RM5,000 ungkup RELA ba pelilih menua Sri Aman.

Sama bisi datai ba pengerami tu iya Sapit Direktor Operasyen RELA Negeri Sarawak, Kolonel (RELA) Walen anak Gujak, Pemesai RELA Pelilih Sri Aman, Bajuri Haji Adon enggau bala tuai raban bansa ke semak menua nya.

Pengerami nya digulu 350 iku kaban RELA enggau sida Rumah Raden serumah. Berebak enggau pengerami nya mega diatur pengawa nyuaka pangkat ungkup kaban RELA, nyuaka kad RELA enggau nyuaka gari RELA ngagai Platun RELA Keranggas.

Idup bansa Penan tejamin

TERIMA KASIH...Datuk Patinggi Tan Sri Alfred Jabu Numpang nyuaka paung getah ngagai seiku orang Penan ba menyampaikan anak pokok getah kepada salah seorang penduduk Penan ba Long Latei, Baram.

"Nyema bansa Penan terus nitihka program ke udah diatur perintah, genap pintu ruang bilik deka ngasaika penguntung asil ari getah nya RM2,500 ninting bulan dalam timpuh enam taun ke deka datai enti dibanding semina bulih pupu rata asil getah kurang RM200 jam ke diatu."
Datuk Patinggi Tan Sri Alfred Jabu Numpang
Sapit Kepala Menteri Sarawak


BARAM : Lebih RM300,000 agih belanja disadaka Sapit Kepala Menteri Datuk Patinggi Tan Sri Alfred Jabu Numpang ungkup 19 buah kampung Penan ba menua Baram enggau Miri dikena sida ngaga gerija.

Penyampau tulung agih belanja dikena ngaga gerija nya dipadahka iya maya bejadi Adet Penan tauka Kod Adat Penan ba Long Latei, ba ditu kena Hari Empat tu tadi.

Genap buah kampung deka diberi RM17,000 ari penyampau agih belanja nya lalu ari iya empu meri (RM171,000), Sapit Menteri Dagang Entarabansa enggau  Industri, Dato Jacob Dungau Sagan ( RM95,000) enggau Kaban Kunsil Negeri (ADUN) Telang Usan (RM57,000).

Kelimpah ari nya, Alfred Jabu ti mega nyadi Menteri Betanam Betupi Chara Moden bisi nyuaka paung getah enggau anak manuk ngagai rayat ke diau ba menua nya dikena nulung sida ngemansangka pengidup diri.

Nangkan ke nya Jabu ngelepaska 5,000 iku anak ikan empurau ba sungai Long Latei lalu berabak enggau nya iya nangkan raban bansa Penan meseti ngena Sistem Tagang awakka utai idup ba sungai nya ulih idup meruan.

Kelimpah ari nya, Jabu minta raban bansa Penan terus nyukung perintah Barisan Nasional (BN) ngambika semua program pemansang ke udah dilanggur ulih terus digaga.

“Aku nesau rayat Penan meseti bekerejasama enggau agensi-agensi perintah ngambika juluk pemansang ulih dijapai, nya alai aku ngarapka Opis Betanam Betupi ulih nulung rayat ba endur tu ngemujurka program nanam getah awakka iya tumbuh enggau meruan.

"Sepuluh ekar tanah deka diagih ungkup orang Penan sepintu biliik dikena nanam getah lalu dalam masa tiga ngagai empat  taun ke deka datai getah tu nyau tau ditangkal,"ku iya.

Jabu meri jaku jamin, nyema bansa Penan terus nitihka program ke udah diatur perintah, genap pintu ruang bilik deka ngasaika penguntung asil ari getah nya RM2,500 ninting bulan dalam timpuh enam taun ke deka datai enti dibanding semina bulih pupu rata asil getah kurang RM200 jam ke diatu.

Nangkan ke nya, nyentuk ke diatu bisi tujuh Kod Adat udah digaga iya nya ungkup bansa Lun Bawang, Kelabit, Bisaya, Kayan-Kenyah, Bidayuh, Iban enggau iya ke diatu ungkup bansa Penan.

Adet Penan digazet ba taun 2011 lalu adat nya berengakah dititihka bepun 28 hari bulan April 2011.

Objektif Adet tu digaga dikena ngetanka penyerakup entara pupu raban bansa sereta dikena ngemansangka pengidup rayat ke diau ba rumah panjai enggau ba kampung.

Sama bisi datai ba pengerami tu iya nya Penulung Menteri ba Opis Kepala Menteri Datuk John Sikie Tayai, Sapit Seketeri Perintah Negeri Datu Ose Murang enggau Dennis Ngau.

Sekula Primari ba pelilih Daro majak nyulut

SIBU : Semua sekula primari ba pelilih menua Daro mandangka pemanah ba pemutus peresa nembiak ke bulih 5A dalam Ujian Penilaian Sekolah Rendah (UPSR) taun tu.

Pemesai Opis Pelajar Pelilih Daro, Awet Haji Gapor madah, taun tu bisi 23 iku nembiak ari sekula primari ba pelilih menua nya bulih 5A bebanding 20 iku aja ba taun siti ke udah.

SK Ulu Daro, Daro, ba penuduk ke pemadu atas ngalahka sekula primari ke bukai iya nya bisi enam iku nembiak ba sekula nya bulih 5A, ku iya rambau Pengerami Meri Basa  2012 ke diatur ba Opis Pelajar Pelilih Menua Daro ba ditu kena malam Hari Enam tu tadi.

Kaban Kunsil Negeri (Adun) Jemoreng ti mega nyadi Seketeri Politik Kepala Menteri, Abu Seman Jahwie nyadi temuai dipebasa ba pengerami nya.

Adun Semop ti mega nyadi Kepala Seketeri Politik Kepala Menteri, Abdullah Haji Saidol enggau Adun Daro, Dr. Murni Suhaili mega sama bisi datai.

Enam iku nembiak SK Ulu Daro ke mujur bulih 5A dalam UPSR taun tu iya nya Dayang Asrafanni Rahim, Muhd. Nuriman Ramadhan Masni, Nor Shahwatie Ramzy, Nurassakirah Hamidi enggau Siti Rizzah Rajman, ku iya.

SK Pangtray, Daro mujur ngadaka tiga iku nembiak bulih 5A. Sida tu iya nya Nurbillah Maisarah Abdul Rahim, Nurfitri Farahanie Yusuf enggau Wan Erwan Haziq Muhaini, ku iya.

Awet madah, SK Kuala Matu, Matu, mega mujur ngadaka tiga iku nmebiak bulih 5A (Ahmad Adzmie Noh, Ahmad Nazreen Noh enggau Nurul Natasya Mohd. Azlan), SK OKM Pakeri, Paloh (Azman Zulkarnain enggau Mohd. Hakimi Japar Sidek) enggau SK Campuran Daro (Athirah Ismaili enggau Muhd. Arman Ismail).

Bela mujur bulih  5A iya nya  Irna Ismail enggau Nur Syamimi Hazwani Median ari SK Bawang-Tian, enggau Mohd. Zainirie Mohd. Ali (SK Penibong), Izyan Khaliesah Empang Mohd. Khir (SK Bekakong), Hazanariah Nassir (SK OK Sergunim), Syahmina Fatzen Amlan (SK Abang Gesa) enggau Wan Muhd. Haimin Farhan Wan Mahala (SK Sebako).

Nangkan ke nya, ku iya, Raban Inovatif enggau Kreatif (KIK) ari sukut bebayarka gaji Opis Pelajar Pelilih Daro udah mujur nyadi champion ba peringkat negeri lalu pemujur nya KIK ila deka dipandangka ba peringkat nasional.

Ba pengerami nya, Abu Seman Jahwie bisi nyuaka setipikit tanda basa ngagai bala staf ke udah ngemujurka KIK iya nya Omar Ramain, Raeyah Haji Seman, Hamjah Kiprawi, Frezah Wet, Ayub Hassim, Aruan Samion, Musa Haidir, Hadeli Japarudin enggau Seliah Haji Semah.

Sarawak manah alai ngerembaika pengawa seni

TABI YB...Datuk Dr Jerip Susil betabi enggau 40 iku raban Gerempung Seni Sanggar Pangkalan Mas, Kalimantan Barat, Indonesia pengudah sida mandangka tanda, belakon enggau sketsa ba ditu.

KUCHING : Nengeri tu ngembuan pemanah endur ngerembaika pengawa seni main asal ke bisi ba menua tu, ku Konsulat Jeneral Republik
Indonesia ba Sarawak Djoko Harjanto.
   
Iya madah, pemanah nya lih dipeda nengah chara Sarawak ke suah ngatur bemacham pengerami bekaul enggau muzik, ambi ke chunto Sarawak
Rainforest World Music Festival, enggau program bepandangka main asal enggau menua Kalimantan, Indonesia.
   
"Ngatur program seni ulih ngemansangka main asal di menua tu, lalu pengawa ke baka tu mega ulih endur kitai betukar penemu enggau pangan diri.

"Kenyau ari suba, nengeri Sarawak dipeda ukai semina landik ngatur pengawa (program) tang mega ngembuan penemu ke chukup mayuh," ku iya.

Iya madah munyi nya rambau Pengerami Malam Program Pertukaran Budaya 2012 ke diatu ba ditu malam Hari Enam tu tadi.
   
Sama bisi datai iya nya Penulung Menteri Pelilih Menua enggau Pemansang Mensia Mayuh (Pengerai Mensia Mayuh) Dr Jerip Susil, enggau penganti Direktor Opis Main Asal Nengeri Sarawak, Saini Lihi.
   
Nangkan ke nya, Saini madah, kaul entara perintah menua Malaysia enggau Indonesia ulih dikerembai kelebih agi ngagai bala raban nembiak.
   
Ba pengerami nya, lebih kurang 100 iku mensia mayuh ke datai ngemataka main asal ke bisi dipandang nyengkaun teater, tanda, enggau sketsa ari 40 iku Kaban Gerempung Seni Sanggar Pangkalan Mas, Kalimantan Barat, Indonesia.
   

Penyulut dalam bidang lumba nyadi peransang akademik

KUCHING : Pemujur dalam pengawa lumba ukai nyadika penanggul seiku-seiku orang nyulut dalam bidang akademik, ku Penulung Menteri Muda Dagang Temuai, Datuk Haji Talib Zulpilip.

Iya madah munyi nya rambau nyuaka perais Krismas ngagai jaguh terejun menua ti udah bulih midul engekeraju dalam lumba Olimpik 2012, Pandelela Rinong.

"Enti kitai beratika bala pemain ragbi menua New Zealand, bisi sekeda ari sida orang ke pintar ba sekula enggau ba universiti, pia mega bisi ari sida nya orang ke pansut nyadi doktor tang masuk ba pengawa lumba enggau main," ku iya rambau ngintu pengerami nya ba sebengkah hotel tebilang ba ditu, kemari (Hari Satu).

Nangkan ke nya, Talib madah, nengah pemujur ke udah diulih sida mega mandangka seiku-seiku orang ke nyulut ba pengawa lumba enggau main ulih mujur dalam bidang akademik.

"Pengawa lumba enggau akademik entara dua bidang ke bebida tang seruran besangkut paut endur nentuka pemujur," ku iya.

Nangkan ke nya, ngenang pemujur ke udah diulih Pandelela, Talib madah, tentu iya endang berasai temegah ati laban nyadi seiku ari peranak menua Sarawak enggau Malaysia, ke mujur ngenampak rita diri ba peringkat entarabansa taja umur agi biak.

"Ba ditu kitai berasai gaga ati laban deka meda pemujur nya terus ditampung bala atlet bukai ke agi biak ngambika menua tu terus tampak rita," ku iya.

Iya ngarapka Pandelela terus nyulut sereta bulih mayuh agi pemujur kelebih agi ba pengawa lumba enggau dalam bidang akademik ngambika pengidup majak lantang dudi hari.

Sama bisi datai ba pengerami tu iya nya Menija Besai Opis Pemansang Ekonomi Sarawak (SEDC), Haji Soedirman Aini, enggau sida Pandelela Rinong sebilik, Pamg Joheng, Hartini Lamim, Pardika Indoma, Pici Parnia enggau Parcelia Renyelia.

SDNU nyadi perengka pemansang Dayak

TERIMA KASIH.. Datuk Alexander Nanta Linggi (tengah) nyuaka insentif pelajar ngagai seiku penerima maya Pengerami Makai Malam beserimbai enggau Hari Krismas enggau Taun Baru 2013 SDNU Pampang Rajang ba Sibu.

SIBU : Serakup Bansa Dayak Sarawak (SDNU) patut nyadi perengka endur ngansak bansa Dayak ngambika mansang ba sukut ekonomi, pelajar sekula enggau pengidup.

Sapit Presiden SDNU ti mega nyadi Kaban Parlimen Kapit, Datuk Alexander Nanta Linggi madah, berindik enggau juluk ati nya, SDNU diatu benung ngaga mayuh program dikena nulung ngemansangka pengidup bansa Dayak.

SDNU betuaika Menteri Pemansang Sosial enggau Urbanisasi, Tan Sri William Mawan Ikom endang begunaka sukung ari bansa Dayak nyapai juluk ati ke udah diperambu nya, ku iya rambau Pengerami Makai Malam beserimbai enggau Hari Krismas enggau Taun Baru 2013 SDNU Pampang Rajang ke diatur ba ditu kena Hari Minggu tu tadi.

Iya madah, semua program ke udah diperambu nya besangkut paut enggau pemansang pengidup bansa Dayak ari sukut sosial, ekonomi, politik, pelajar enggau mayuh agi ke bukai.

Nya alai, enda salah mai politik ke dalam SDNU laban pengawa bepolitik mega enda ulih lari ari pengidup mensia mayuh ke maya hari tu, ku iya.

“Enti politik nya manah dikena ngemansangka pengidup bansa diri, enda salah iya dibai ngagai SDNU ngambika meri penguntung ngagai semua raban bansa Dayak ba negeri tu,” ku iya.

Laban SDNU nyadi gerempung Dayak ke pemadu taui ba nengeri tu, iya endang patut ditegapka agi ngambika ulih mengkang dipeda sepemanjai maya,  ku iya.

“Politik beguna amat dikena ngerak SDNU. Tuju iya ngambika SDNU meri ngatur pengidup raban bansa Dayak di nengeri tu.

"Nya alai, nadai salah SDNU dibalut enggau politik taja pan sekeda orang madah SDNU enda patut dibalut enggau politik,” ku iya.

Alexander Nanta madah, politik bisi ba dini-dini endur lalu ukai semua politik enda manah laban politik mega ulih meri pengidup.

Ba pengerami nya, bisi 10 iku pelajar ari bala anak kaban SDNU Pampang Rajang nerima insentif pelajar berindik ari penyulut sida dalam peresa perintah ke udah lalu.

Sida ke nerima intensif tu iya nya Melvin Nyalu, Veronica Yean Chumping, Natalie Pawa Jefferson Jamit, Eryl Varena Michael, Audrey Alicia Ani Nair, Dexter Bubong Nair, Ignatius Baxter Nair, Suzana Nyuak, Stanley Jawa enggau Cindy Rua Moses.

Penulung Presiden SDNU, Anthony Banyan, Seketeri Politik Kepala Menteri, Tengku Geruna, Panglima 9 Briged, Brig. Jen. Datuk Stephen Mundaw enggau bini iya, Datin Jacqualine Peris, Mejar Kehormat Askar Wataniah, Edmund Erong Tun Jugah, Sapit Walikota Majlis Daerah Kapit, Jefferson Jamit Unyat, Sapit Chairman SDNU Pampang Sibu, Jawi Anom enggau Chairman SDNU Pampang Rajang, Mejar Moses Ripai bela bisi datai maya nya.

Ngenang pengerami Hari Krismas, Alexander Nanta ngelalau semua raban bansa Dayak ke ngintu Hari Krismas ulih ngena peluang nya endur ngerapitka kaul enggau pangan diri, pia mega enggau bala kaban ari bansa bukai.

SCORE ngubah ekonomi S'wak

"Aku nesau semua raban nembiak di nengeri tu bela ngambi peluang sereta nyikap diri empu enggau mayuh penemu kelebih agi dalam bidang teknologi enggau pengelandik teknikal awakka nyamai minta pengawa ke bisi disediaka dalam projek SCORE jemah ila."

Tun Datuk Patinggi Abang Haji Muhammad Salahuddin Abang Barieng
Tuai Pemegai Menua (TYT) Negeri Sarawak




KUCHING : Tuai Pemegai Menua (TYT) Negeri Sarawak, Tun Datuk Patinggi Abang Haji Muhammad Salahuddin Abang Barieng nyadaka pengaga ati sereta meri terima kasih ngagai perintah nengeri tu laban ke udah mujur ngangkatka ekonomi nengeri tu.

Ambika chunto, projek Koridor Renewable Energy Sarawak tauka SCORE udah mujur narit raban orang dagang ari menua luar beranakka puku di nengeri ba ditu.

"Pekara nya beguna amat laban pemansang tauka pengurang sesebengkah nengeri balat bepanggai ba gaya ekonomi iya empu," ku iya bejaku dalam surat pesan Hari Krismas enggau Taun Baru 2013 ke dianjung ngagai Utusan Sarawak kemari (Hari Satu).

Berebak enggau nya, ku iya perintah negeri mega mujur ngatur pelin ekonomi dudi hari ngambika meri pengelantang pengidup ngagai semua rayat di nengeri tu.

"Aku nesau semua raban nembiak di nengeri tu bela ngambi peluang sereta nyikap diri empu enggau mayuh penemu kelebih agi dalam bidang teknologi enggau pengelandik teknikal awakka nyamai minta pengawa ke bisi disediaka dalam projek SCORE jemah ila," ku iya.

Beserimbai enggau pengerami Hari Krismas, Abang Salahuddin nangkan semua pupu raban bansa di nengeri tu bela negapka konsep 1Malaysia enggau chara ngabang ngagai rumah diri sebilik, kaban belayan enggau orang bukai ke dikelala dikena ngerapitka kaul sereta meri basa ngagai Hari Krismas.

"Anang ngumbai tanggungjawap ngetanka penyerakup semina dipegai perintah aja, tang tanggungjawap nya patut dijaga semua taja pan kitai enda sebaka jalai pengarap," ku iya lalu minta semua rayat di negeri tu bela nemu bebasaka ke pangan diri, sereta neritka kaul setipak enggau konsep 1Malaysia.

Tun Datuk Patinggi Abang Salahuddin mega ngelalau mensia mayuh ti mulaika diri ngagai menua meseti bejimat lebuh ti betengahka jalai alun sereta anang enda nitihka undang-undang ke udah ditetap.

"Ngena peluang tu aku enggau kami sebilik meri Selamat Ngintu hari Krismas ngagai semua orang ke bepengarap Kristian ba serata menua Malaysia kelebih agi ke diau ba nengeri Sarawak.

"Aram meh kitai bela besampi ke menua tu kelebih agi nengeri Sarawak awakka terus likun sereta lantang sepemanjai maya," ku iya.

Anak mit baru ada dibuai baruh rumah

DARO : Seiku anak mit dipelabaka baru ada ditemu dibuai orang ba baruh sebuah rumah di Kampung Baru ba ditu tumu pagi Hari Minggu tu tadi.

Anak mit nya agi dibalut plastik lebuh ke ditemu sereta agi mengkang tali pusat, udah nya tubuh iya agi bisi bekau darah ke baru pansut ari perut.

Pengari Polis Pelilih Daro madah, polis nerima kangau telefon ari mensia mayuh bekaul enggau penusah nya urung pukul 1.30 pagi.

“Bala kami berumban ngagai palan penusah nya lalu meda anak mit nya agi idup.

“Diatu, mansa di jaga orang ba Hospital Daro. Berindik ari nya, kami benung bebendar ngiga orang ti ngadaka anak mit nya, ” ku iya madah ngagai Utusan Sarawak ba ditu apin lama ke udah.

Pengari Polis nya mega madahka, anak mit nya ada meruan sereta bepengerai.
"Kes nya dipansik nitihka Seksyen 317 Kanun Keseksaan ke ngundan ukum jil tujuh taun tauka ukum mata duit tauka kedua-dua bengkah ukum nya nyema ditemu amat salah, "ku iya.

Iya minta mensia mayuh ti bisi meda diri sebilik tauka orang ke nyelai terus betelefon ngagai polis enggau jampat.

Barang sapa ke bisi ngembuan sebarang penerang ulih betelefon ngagai Indu Opis Polis Daro, 084-823222  tauka dini-dini balai polis ke semak dikena mantu tasat.

Nangkan ke nya, seiku orang ke semina dikangau nama Dollah, 56, madah, sebedau penusah nyadi iya bisi ninga sabak anak mit urung pukul  1.00 pagi.

 "Maya nya, aku deka ke dapur. Enda mukai-mukai aku ninga nyawa anak mit.

Terubah iya, aku ngumbai nya nyawa antu tang, nyau kelama-lama nyawa nya makin inggar-seinggar lalu aku nenggau iya ngena lampu pichit.

Aku tekenyit pengudah tepedaka seiku anak mit agi idup, " ku iya.

Dollah madah, nya meh terubah iya penusah ke bakanya nyadi ba Daro.

“Indai anak mit nya meseti betanggungjawap. Enti enggai ke anak sua ngagai orang bukai. Anang muai iya laban pengawa ke baka nya ngelanggar undang-undang sereta bedosa besai,"ku iya.