SDNU nyadi perengka pemansang Dayak

TERIMA KASIH.. Datuk Alexander Nanta Linggi (tengah) nyuaka insentif pelajar ngagai seiku penerima maya Pengerami Makai Malam beserimbai enggau Hari Krismas enggau Taun Baru 2013 SDNU Pampang Rajang ba Sibu.

SIBU : Serakup Bansa Dayak Sarawak (SDNU) patut nyadi perengka endur ngansak bansa Dayak ngambika mansang ba sukut ekonomi, pelajar sekula enggau pengidup.

Sapit Presiden SDNU ti mega nyadi Kaban Parlimen Kapit, Datuk Alexander Nanta Linggi madah, berindik enggau juluk ati nya, SDNU diatu benung ngaga mayuh program dikena nulung ngemansangka pengidup bansa Dayak.

SDNU betuaika Menteri Pemansang Sosial enggau Urbanisasi, Tan Sri William Mawan Ikom endang begunaka sukung ari bansa Dayak nyapai juluk ati ke udah diperambu nya, ku iya rambau Pengerami Makai Malam beserimbai enggau Hari Krismas enggau Taun Baru 2013 SDNU Pampang Rajang ke diatur ba ditu kena Hari Minggu tu tadi.

Iya madah, semua program ke udah diperambu nya besangkut paut enggau pemansang pengidup bansa Dayak ari sukut sosial, ekonomi, politik, pelajar enggau mayuh agi ke bukai.

Nya alai, enda salah mai politik ke dalam SDNU laban pengawa bepolitik mega enda ulih lari ari pengidup mensia mayuh ke maya hari tu, ku iya.

“Enti politik nya manah dikena ngemansangka pengidup bansa diri, enda salah iya dibai ngagai SDNU ngambika meri penguntung ngagai semua raban bansa Dayak ba negeri tu,” ku iya.

Laban SDNU nyadi gerempung Dayak ke pemadu taui ba nengeri tu, iya endang patut ditegapka agi ngambika ulih mengkang dipeda sepemanjai maya,  ku iya.

“Politik beguna amat dikena ngerak SDNU. Tuju iya ngambika SDNU meri ngatur pengidup raban bansa Dayak di nengeri tu.

"Nya alai, nadai salah SDNU dibalut enggau politik taja pan sekeda orang madah SDNU enda patut dibalut enggau politik,” ku iya.

Alexander Nanta madah, politik bisi ba dini-dini endur lalu ukai semua politik enda manah laban politik mega ulih meri pengidup.

Ba pengerami nya, bisi 10 iku pelajar ari bala anak kaban SDNU Pampang Rajang nerima insentif pelajar berindik ari penyulut sida dalam peresa perintah ke udah lalu.

Sida ke nerima intensif tu iya nya Melvin Nyalu, Veronica Yean Chumping, Natalie Pawa Jefferson Jamit, Eryl Varena Michael, Audrey Alicia Ani Nair, Dexter Bubong Nair, Ignatius Baxter Nair, Suzana Nyuak, Stanley Jawa enggau Cindy Rua Moses.

Penulung Presiden SDNU, Anthony Banyan, Seketeri Politik Kepala Menteri, Tengku Geruna, Panglima 9 Briged, Brig. Jen. Datuk Stephen Mundaw enggau bini iya, Datin Jacqualine Peris, Mejar Kehormat Askar Wataniah, Edmund Erong Tun Jugah, Sapit Walikota Majlis Daerah Kapit, Jefferson Jamit Unyat, Sapit Chairman SDNU Pampang Sibu, Jawi Anom enggau Chairman SDNU Pampang Rajang, Mejar Moses Ripai bela bisi datai maya nya.

Ngenang pengerami Hari Krismas, Alexander Nanta ngelalau semua raban bansa Dayak ke ngintu Hari Krismas ulih ngena peluang nya endur ngerapitka kaul enggau pangan diri, pia mega enggau bala kaban ari bansa bukai.

SCORE ngubah ekonomi S'wak

"Aku nesau semua raban nembiak di nengeri tu bela ngambi peluang sereta nyikap diri empu enggau mayuh penemu kelebih agi dalam bidang teknologi enggau pengelandik teknikal awakka nyamai minta pengawa ke bisi disediaka dalam projek SCORE jemah ila."

Tun Datuk Patinggi Abang Haji Muhammad Salahuddin Abang Barieng
Tuai Pemegai Menua (TYT) Negeri Sarawak




KUCHING : Tuai Pemegai Menua (TYT) Negeri Sarawak, Tun Datuk Patinggi Abang Haji Muhammad Salahuddin Abang Barieng nyadaka pengaga ati sereta meri terima kasih ngagai perintah nengeri tu laban ke udah mujur ngangkatka ekonomi nengeri tu.

Ambika chunto, projek Koridor Renewable Energy Sarawak tauka SCORE udah mujur narit raban orang dagang ari menua luar beranakka puku di nengeri ba ditu.

"Pekara nya beguna amat laban pemansang tauka pengurang sesebengkah nengeri balat bepanggai ba gaya ekonomi iya empu," ku iya bejaku dalam surat pesan Hari Krismas enggau Taun Baru 2013 ke dianjung ngagai Utusan Sarawak kemari (Hari Satu).

Berebak enggau nya, ku iya perintah negeri mega mujur ngatur pelin ekonomi dudi hari ngambika meri pengelantang pengidup ngagai semua rayat di nengeri tu.

"Aku nesau semua raban nembiak di nengeri tu bela ngambi peluang sereta nyikap diri empu enggau mayuh penemu kelebih agi dalam bidang teknologi enggau pengelandik teknikal awakka nyamai minta pengawa ke bisi disediaka dalam projek SCORE jemah ila," ku iya.

Beserimbai enggau pengerami Hari Krismas, Abang Salahuddin nangkan semua pupu raban bansa di nengeri tu bela negapka konsep 1Malaysia enggau chara ngabang ngagai rumah diri sebilik, kaban belayan enggau orang bukai ke dikelala dikena ngerapitka kaul sereta meri basa ngagai Hari Krismas.

"Anang ngumbai tanggungjawap ngetanka penyerakup semina dipegai perintah aja, tang tanggungjawap nya patut dijaga semua taja pan kitai enda sebaka jalai pengarap," ku iya lalu minta semua rayat di negeri tu bela nemu bebasaka ke pangan diri, sereta neritka kaul setipak enggau konsep 1Malaysia.

Tun Datuk Patinggi Abang Salahuddin mega ngelalau mensia mayuh ti mulaika diri ngagai menua meseti bejimat lebuh ti betengahka jalai alun sereta anang enda nitihka undang-undang ke udah ditetap.

"Ngena peluang tu aku enggau kami sebilik meri Selamat Ngintu hari Krismas ngagai semua orang ke bepengarap Kristian ba serata menua Malaysia kelebih agi ke diau ba nengeri Sarawak.

"Aram meh kitai bela besampi ke menua tu kelebih agi nengeri Sarawak awakka terus likun sereta lantang sepemanjai maya," ku iya.

Anak mit baru ada dibuai baruh rumah

DARO : Seiku anak mit dipelabaka baru ada ditemu dibuai orang ba baruh sebuah rumah di Kampung Baru ba ditu tumu pagi Hari Minggu tu tadi.

Anak mit nya agi dibalut plastik lebuh ke ditemu sereta agi mengkang tali pusat, udah nya tubuh iya agi bisi bekau darah ke baru pansut ari perut.

Pengari Polis Pelilih Daro madah, polis nerima kangau telefon ari mensia mayuh bekaul enggau penusah nya urung pukul 1.30 pagi.

“Bala kami berumban ngagai palan penusah nya lalu meda anak mit nya agi idup.

“Diatu, mansa di jaga orang ba Hospital Daro. Berindik ari nya, kami benung bebendar ngiga orang ti ngadaka anak mit nya, ” ku iya madah ngagai Utusan Sarawak ba ditu apin lama ke udah.

Pengari Polis nya mega madahka, anak mit nya ada meruan sereta bepengerai.
"Kes nya dipansik nitihka Seksyen 317 Kanun Keseksaan ke ngundan ukum jil tujuh taun tauka ukum mata duit tauka kedua-dua bengkah ukum nya nyema ditemu amat salah, "ku iya.

Iya minta mensia mayuh ti bisi meda diri sebilik tauka orang ke nyelai terus betelefon ngagai polis enggau jampat.

Barang sapa ke bisi ngembuan sebarang penerang ulih betelefon ngagai Indu Opis Polis Daro, 084-823222  tauka dini-dini balai polis ke semak dikena mantu tasat.

Nangkan ke nya, seiku orang ke semina dikangau nama Dollah, 56, madah, sebedau penusah nyadi iya bisi ninga sabak anak mit urung pukul  1.00 pagi.

 "Maya nya, aku deka ke dapur. Enda mukai-mukai aku ninga nyawa anak mit.

Terubah iya, aku ngumbai nya nyawa antu tang, nyau kelama-lama nyawa nya makin inggar-seinggar lalu aku nenggau iya ngena lampu pichit.

Aku tekenyit pengudah tepedaka seiku anak mit agi idup, " ku iya.

Dollah madah, nya meh terubah iya penusah ke bakanya nyadi ba Daro.

“Indai anak mit nya meseti betanggungjawap. Enti enggai ke anak sua ngagai orang bukai. Anang muai iya laban pengawa ke baka nya ngelanggar undang-undang sereta bedosa besai,"ku iya.

BN aja ulih nampung pemansang - Henry Sum

1MALAYSIA…Ajat Iban dipandangka ngagai mensia mayuh ke datai ngagai ngabang Krismas ba rumah Kaban Parlimen Lawas, Dato Henry Sum Agong.

LAWAS : Pengerami Hari Krismas ba pelilih menua Lawas chukup rami lalu pengerami nya disambut pupu raban bansa ke nguna menua nya.

Rayat ari pupu raban bansa bela datai ngabang Hari Krismas ngagai kaban belayan enggau bala pangan ke dikelala.

Berebak enggau nya, Kaban Parlimen Lawas, Dato Henry Sum Agong nyadaka pengaga ati lebuh beratika pemansang enggau pengelikun ke disepi rayat ba menua tu.

Henry madah munyi nya meda sukung ke chukup manah rayat ngagai iya lebuh sida ti ngabang ngagai rumah iya ba simpang pasar  Sundar semak Jalai Trusan, Lawas ba Hari Keterubah enggau Kedua Hari Krismas.

Entara temuai dipebasa ke bisi datai ngabang ngagai rumah Henry Sum iya nya sida Pemesai Pelilih Lawas sebilik, Haji Mohd Supaih Haji Hamdan enggau bala tuai-tuai opis perintah, Chairman Kelab Dagang Temuai Lawas(KEPALA) ti mega nyadi Tuai Pampang Opis Pengangkut Jalai Lawas, Julaihee Dison enggau Operayen Raban Nembiak Parti Pesaka Bumiputera Bersatu Sarawak Pampang Bukit Sari ti betuaika, Kr. Semie Haji Nasip.

Kaban komponen parti Barisan Nasional(BN) ba Lawas ke bela bisi datai iya nya chairman sida empu iya nya SPDP N.71 betuaika Kr. Yong Kah Sing, SUPP betuaika Kr. Liaw Ho Peng enggau PRS betuaika Kr. William Sipak Agong.

Henry Sum mega madahka pemesai reti kerejasama enggau penyerakup entara rayat dipegai BN beguna amat dikena napi pemari taun baru nyin ila.

Kelimpah ari BN, pedis amat rayat deka ngasaika pengelantang ba nengeri tu, laban semina perintah BN ulih nampung agenda pemansang.

“Kita anang sesekali alah laban jaku ke enda amat ari orang ke nadai betanggungjawap. Kebuah pia laban semina BN ulih mutarka penanggul rayat bepun ari kelia nyentuk ke diatu.

“Enti kitai alah mendingka jaku ari orang ke baka nya tentu kitai deka rugi dudi hari. Kitai meseti nemu pedis amat deka nikal pulai baru, ambika chuto pekara ke nyadi ba Semenanjung Malaysia ulih nyadika teladan kitai," ku iya.

Pengerami Krismas ke disambut ba rumah Henry Sum dirami enggau pengawa mandangka main asal raban bansa Iban enggau Cina Lawas.

Sama bisi datai ngabang iya nya mensia mayuh ke diau semak pasar Sundar baka Pemesai Pelilih Menua Mit Sundar, Ladin Atok enggau Pemesai Opis Pelajar enggau mensia mayuh ke datai ari Merapok.

Orang indu diperansang aktif dalam gerempung

MATU : Raban orang indu ba pelilih menua tu dilalau ngambika terus ngemeratka tanggungjawap nyadi penyaga rumah, indai seretai enggau juluk ati ngulihka pemansang nengah chara aktif dalam gerempung.

Kaban Kunsil Nengeri Jemoreng, Abu Seman Jahwie madah, tanggungjawap ba rumah enda tau dileka laban orang indu pemadu beguna nulung laki nempa pengelantang enggau pemaik dalam ruang bilik.

Iya madah, pemujur bala anak ke nyadi orang ke menyana dudi ari balat bepanggai ba pengelandik enggau pemintar orang indu ngaduka ruang bilik.

Abu Seman ti mega nyadi Seketeri Politik Kepala Menteri madah munyi nya  rambau pengerami makai malam enggai ngintu taun baru 2013 Persekutuan Perkumpulan Wanita Sarawak (PPWS) Pampang Matu ba Kampung Jemoreng, apin lama ke udah.

Sama bisi datai maya nya Chairman PPWS Pampang Matu, Ratna Shahdan.

Iya madah, raban orang indu kelebih agi sida ke kereja semina nyaga rumah meseti aktif dalam gerempung tauka dalam parti politik.

Kebendar iya orang indu ba menua chukup betuah laban sebaka enggau orang lelaki ba sukut pelajar, pengawa dikereja, ku iya lalu madahka opis menteri endang udah bisi pengandal ngagai orang indu lebuh ngereja pengawa ngelama tu.

Ba pengawa perintah enggau swasta, iya madah orang indu udah mayuh megai tanggung pengawa lalu nya nandaka orang indu nyau sebaka enggau pengawa orang lelaki.

Nya alai, aku ngelalau sida ke indu anang sesekali ngeleka ke pengawa nyadi bini enggau seiku indai ke meruan.

"Enti ulih orang indu patut nyaup mutarka penanggul tauka penusah rama ke nuntung raban nembiak ke maya hari tu," ku iya.

Iya madah, laban orang indu ngembuan jaku ke mentas nya alai sida engkeman meri jaku ajar ngagai raban nembiak awakka enda mudah ngereja pengawa ke nadai menuku.

Pengerami makai malam enggau ngintu taun baru  2013 nya dirami enggau pengawa mandangka main asal, bekaraoke enggau bemukun.

Pemanah Sibu dipandang ngagai temuai Korea

SIBU : Empat raban pengari Majlis Daerah Guro, Soul, Korea Selatan dibai nemuai ngagai Rumah Panjai Adin Jawa semak Sungai Engkala, lemai Hari Empat tu tadi.

Penatai raban pengari tu diuluka Menteri Wang Kedua, Dato Sri Wong Soon Koh, Penulung Chairman Majlis Daerah Guro, Park Jong Hyeon, Seketeri Politik Kepala Menteri, Andrew Shilling Bangit, Pemancha Stanley Geramong sereta bala ke bukai.

Dulu ari nya, raban sida dibai raun meling bandar Sibu lalu diuluka Datuk Bandar Majlis Bandaraya Kuching Selatan (MBKS), Datuk James Chan, pengudah dua bengkah pengari tu nyain sempekat bambu kaban, apin lama ke udah.

Mua ke pagi, raban sida tu dibai raun ngabas Pasar Sentral Sibu lalu nguji nyepi pemakai ke bisi dijual ba endur nya.

James Chan madah, tuju pengawa raun entara raban pengari nya diatur dikena ngerapitka kaul.

"Ba penemu aku ti nyadi Datuk Bandar Kuching Selatan, tu meh sebagi ari pengawa ke chukup manah diatur dikena ngepunka taun 2013.

"Kami ukai semina beratika menua Kuching, tang selampur menua Sarawak. Aku chukup berasai gaga laban penatai kami chukup dipebasaka rayat ba endur tu," ku iya.

Iya mega ngarapka pengawa ke baka nya ulih suah agi diatur dikena betukar betemu enggau rayat menua luar ba senentang sukut dagang temuai.

"Aku chukup berasai gaga ati laban ulih mai sida raun meda menua Sibu laban Sibu entara menua ke pemadu manah ba Sarawak.

"Ba ditu kami ngembuan pasar ke pemadu besai lalu deka dipandangka ngagai bala kaban ari menua Korea,"ku iya.

Nembiak PBB mantu anak patu balu besekula

BINTULU : Sepuluh iku anak patu balu ari empat ruang bilik ba Kampung Jepak nerima tulung perengka dikena besekula baka gari sekula, enggau perengka dikena nulis ari Komiti Raban Nembiak Parti Pesaka Bumiputera Bersatu (PBB) N.58 Jepak.

Perengka tulung nyadi disuaka Sapit Tuai Raban Nembiak PBB N.58 Jepak, Effendi Laili ti ngarika Tuai Raban Nembiak PBB Zon Bintulu ti mega nyadi Penulung Tuai Raban Nembiak PBB Nengeri, Pandi Suhaili.

Iya ngarapka bantu nya ulih nyadika peransang ngagai bala nembiak ngambika bebendar agi belajar sereta ngulihka pemutus peresa ke manah.

Nangkan ke nya, iya madah raban komiti PBB endang seruran berundingka chara dikena mantu nyema bisi raban orang deka begunaka tulung sida.

Effendi mega ngelalau bala anak patut balu ke udah nerima bantu ngena peluang belajar ke bisi diatu endur nulung ngemansangka pengidup diri laban semina nengah pelajar sekula sida ulih nyamai minta pengawa dudi hari sereta ulih nyadi mensia ke menyana.

Yong sedia meri penemu ngagai chalon Parlimen Stampin

KUCHING : Pemegai kerusi Parlimen Stampin sedia meri penemu tauka "tips istimewa" dikena ngulihka sukung ari pengundi ngagai chalon ke deka nukar iya ba parlimen nya maya Pengawa Bepilih Besai (PRU) ke-13.

Sapit Menteri Kerja Raya ti mega nyadi Kaban Parlimen Stampin, Dato' Yong Khoon Seng madah, laban ke udah teleba bediri ba endur nya, iya nemu baka ni chara dikena ngulihka sukung ari rayat dia.

"Taja baka nya, penemu nya semina deka dipadah ngagai chalon nya empu lalu enda ditesau nengah media," ku iya madah ngagai media rambau bejadi Sekula Tebuka Baru Ungkup 2013 ba Sekula Sekondari (SM) Min Lit, Batu Kawa, ba ditu pagi kemari (Hari Lima).

Berebak enggau nya, iya ngelalau semua kaban Parti Rakyat Bersatu Sarawak (SUPP) meseti bebendar ngaga pelin dikena napi PRU enda lama agi.

"Udah datai maya iya, kitai (semua kaban SUPP) ngereja tanggungjawap diri empu ngemansangka pengidup rayat ba Sarawak sereta nyaga pengelantang sida.

"Nya alai, kitai meseti bagas ngabas rayat laban nengah chara ke baka nya kitai ulih nemu penanggul ke bisi nuntung sida," ku iya.

Ngenang pasal pengerami nya, Yong ngelalau semua pengajar ngambika bebendar agi ngemanah pemutus peresa nembiak sekula.

Iya madah, pengajar mseti besaup enggau pangan diri berundingka chara baka ni deka ngasuh bala nembiak rindu lebuh maya sida ngajar.

"Nengah atur ke baka nya, kitai ulih nemu baka ni deka meransang nembiak rindu belajar sereta mujur dalam pemutus peresa," ku iya.

Dulu ari nya, iya bisi nyadaka agih belanja RM40,000 ngagai Lembaga Pengurusan SM Min Lit, Batu Kawa dikena sida ngatur program tauka aktiviti ba sekula nya.

Sama bisi datai ba pengerami tu iya nya Chairman SM Min LIt, Thian Shen Fon enggau Prinsipal SM Min Lit, Chang Kok Yah.

Seruran dikenang

 

 

 

DIKINGAT BELAMA...Pendiau pengidup niang Datuk Kanang anak Langkau, deka seruran dikenang sepanjai maya.

 

 

 

 

 

 

Filem ngenang pemerani Niang Datuk Temenggung Kanang deka digaga

KUCHING : Siti filem ngenang pemerani Pahlawan Negara, Niang Datuk Temenggung Kanang anak Langkau deka digaga lalu dipandangka maya nyambut Hari Malaysia taun tu.

Menteri Penyaga Menua, Dato' Seri Dr. Ahmad Zahid Hamidi madah, lebuh agi idup, niang Kanang kala betemu lalu berunding enggau iya senentang filem nya.

"Kami duai udah berandau senentang jalai jerita, lalu pelakon ke megai batang jerita endang deka ditangkup niang empu.

"Taja baka nya, niang udah nadai ninggalka kitai kena 3 Januari tu tadi, nyadi jalai jerita deka diaduka baru," ku iya.

Iya madah munyi nya ngagai pemberita lebuh ngabas tubuh niang ba Rumah Hospital Besai Sarawak (HUS) ba ditu, kemari (Hari Lima).

Berebak enggau nya, iya madah, filem nya deka berengkah digaga bepun bulan Februari tu lalu dipelaba tembu dalam timpuh empat bulan.

"Orang ke megai batang jerita dalam filem tu agi diperunding lalu tepulai ngagai direktor filem milih pelakon ti engkeman megai watak niang Kanang," ujarnya,

Nangkan ke nya, iya madah, taja pan ungkus dikena ngaga filem tu dipelanja semua ari opis swasta tang perintah deka meri agih belanja dikena nulung ngemujurka filem tu.

Zahid madah, raban pengeluar enggau direktor filem mega bisi enggau datai ngabas niang tanda meri basa ke penudi ngagai pemulai niang.

Nangkan ke nya, ku  Zahid, niang ti kala nerima midul pemadu berani, Sri Pahlawan Gagah Perkasa (SP) endang patut nyadi chunto tauka ikon ngagai bala anembiak ke maya hari tu.

"Jerita pemerani niang mega deka dipelajarka raban pelatih Program Latih Ke Menua Enggau Bansa (PLKN) awakka meri peransang sid sayau ke menua tu," ku iya.

Iya madah, tulung keterubah deka diberi ngagai balu niang, Datin Brawang Chunggot kelimpah diberi tulung ari tabung operasyen Soldadu Menua Malaysia (ATM).

Berebak enggau nya, sida Zahid sebilik ngenataika penyinu ati ngagai sida niang sebilik.

Panglima Gagah Berani tu ninggal enam iku anak, iya nya Augustine,50, Betoria Evelyn, 47, Marylim, 46, Pauline, 40, Judith, 36 enggau Langgi, 31.

Urung pukul 3.00 lemai kemari, niang dibai ngagai Kem Penrissen, udah nya dipindah ngagai Dewan Suarah sehari tu (Hari Enam) lalu ditanam ba Tanah Pendam Pahlawan, semak Taman Budaya ba ditu, kena Hari Minggu (6 Januari) tu.

Program nyambut Taun Baru diatur ba ParkCity Mall, Bintulu

BINTULU : Mensia mayuh ke ngelawa palan Bebeli Barang ParkCity Mall bepeluang ngasaika pengagit ati nyambut penatai Taun Baru 2013 diserumba enggau mayuh bengkah aktiviti beperindang ke dipandang mua ke malam 31 Disember tu.

Mayuh bengkah aktiviti enggau main ke diatur dikena nganti penatai Taun Baru 2013 dikena merindang mensia mayuh ke bisi datai ngagai palan nya, ku Kepala Pemesai Eksekutif ParkCity Mall enggau New World Suites, Keith Pointer.

Program nya ku iya deka berengkah pukul 7.30 malam lalu achara ke penudi iya nya nikauka kutak perais nyengkaum baucher duit, kupon diskaun, telefon binching enggau mayuh agi ke bukai, ku iya madah ngagai media ba palan bebeli barang nya.

Kelimpah ari nya, Keith madah, mensia mayuh ke bisi datai mega deka diperindang bala penyanyi baka Z Tank Band, tanda Zumba ari de Oasis Fitness Centre, pengawa mandangka ngepan orang kahwin enggau fesyen ari coiFection.

Udah nya, mensia mayuh ke bisi datai bepeluang nyereta pekit Makai Wasabi ke dipelanja Sushi King, pekit betanda Gangnam ke ngundang mayuh perias ke manah-manah.

Keith mega madahka, program nyambut Taun Baru 2013 tu ila deka dirami enggau penatai Miss Globe Malaysia 2012/13, pemenang lumur dia Miss Global International Malaysia 2012 enggau Miss ParkCity Mall 2012/13 peranak menua Kota Kinabalu Sabah, Kieren Laurent Simon.

Kelimpah ari nya, ku iya Kieren mega deka diberi basa enchabut tiket betuah beserimbai enggau ulang taun ke-lima New World Mart kelimpah madahka orang ke nyadi temuai ke-15,000 ngelawa Parkcity Mall Fan Page malam nya.

SARAWAKfm program baru ditabur ba radio

KUCHING : Dikena ngerapitka kaul entara staf Radio Televisyen Malaysia Sarawak (RTM) enggau opis perintah, Radio RTM Sarawak ngatur pengerami Jalinan Mesra enggau Aprisiasi RTM Sarawak 2012.

Tuju pengerami nya diatur dikena meri basa ngagai pengawa ke udah dikereja agensi perintah ngagai RTM kelebih agi ngagai radio.

Nangkan ke nya, pengerami nya mega diatur dikena meri peransang ngagai staf RTM enggau agensi ke bukai bebendar agi gawa udah tu.

Berindik ari nya, lebih 20 bengkah agensi enggau opis perintah ba Kuching bisi nyereta program nya ke diatur ba sebengkah hotel tebilang ba ditu malam Hari Empat tu tadi.

Berebak enggau nya, Direktor Pengeluar Program Sarawak, Fee Lin Chew bejadi program baru iya nya SARAWAKfm.

"Mayuh bengkah udah digaga ungkup program stesyen nya,"ku iya.
Entara program ke berubah iya nya ba sukut timpuh segmen enggau program ke deka berubah belabuh 1 Januari 2013.

Fee madah, program nya dibagai ngagai enam segmen iya nya Layan, Pagi Tuk, Citra, Ritma, Simfoni enggau Gatra.

"Radio tu deka ditabur pengelama 24 jam sehari lalu genap bengkah segmen deka dipansutka pengelama empat jam lalu program tu deka berengkah ditabur pukul 1 pagi," ku iya.
Iya madah, nengah ubah ke baka nya, bisi tiga ngagai empat iku DJ gawa naburka program nengah stesyen SARAWAKfm.

Sama bisi datai ba pengerami tu iya nya, Kepala Penulung Direktor Seksyen Radio ti mega nyadi Menija SARAWAKfm, Montogomary Montahar.

Kualiti pra sekula SJK Chung Hua Pantu dipuji

PANTU : Bisi 18 iku nembiak ke beumur lima ngagai enam taun ngerijista diri masuk pra sekula ba Sekula (SJK) Chung Hua Pantu kemari (Hari Lima).

Utusan Sarawak bisi ngabas palan nya lalu ngemataka bala apai indai nembiak begelumu ba luar kelas nya berengkah pukul 7.30 pagi laban deka ngerijista bala anak sida.

"Kelas pra sekula ba endur nya dibagi ngagai Tadika Satu enggau Tadika Dua. Tang ba taun 2013 semua 18 iku anak mit ke beumur lima enggau enam taun belajar ba kelas ke sama,"ku seiku orang ba endur nya.

Semua 18 iku anak mit ba endur nya, ku iya deka bepun belajar 2 Januari taun baru begulai enggau nembiak sekula Taun Satu ngagai Taun Enam ba SJK Chung Hua Pantu.

Bala nembiak taun Satu ngagai Taun Enam ungkup SJK Chung Hua Pantu dipeda bepun ngemenuhka sekula nya laban deka ngerijista diri belajar ba taun 2013.

Dulu ari nya, seiku apai nembiak ke belajar ba endur nya madahka diri muji kualiti nembiak belajar ba endur nya berindik ari pengawa bala pengajar ke manah ngajar ba SJK Chung Hua Pantu ba taun 2012.

"Pemutus akademik anak aku sekumbang belajar ditu chukup manah. Nya alai, aku ngaga pemutus terus nagnjung anak aku belajar ditu ungkup taun  2013," ku iya.

Aku mega ngarapka bala pengajar ke ngajar nembiak pra sekula SJK Chung Hua Pantu ulih ngetanka kualiti pelajar nembiak ngambika udah tu mayuh agi penyampau nembiak ke pintar belajar taja umur agi ba pra sekula jemah.

Raban nembiak diperansang nyereta program kreatif

KUCHING : Bala raban nembiak ba nengeri tu ditesau ngambika ngenataika diri ngulu mayuh bengkah program ke bisi diatur ngambika sida ulih bulih mayuh penemu ke baru.

Kaban Kunsil Nengeri (ADUN) Samariang, Sharifah Hasidah Sayeed Aman Ghazali madah, pekara nya engkeman enggau juluk pemansang perintah nengeri ke deka meda raban nembiak regas sereta pintar ngatur mayuh pengawa dalam nama-nama aja bidang.
  
"Perintah nengeri besai bendar pengarap ngagai raban nembiak, nya alai perintah udah ngatur mayuh pelin pemansang ungkup raban nembiak dikena meransang runding sida lebih bepenemu," ku iya maya bejadi 'Projek Linkages Peringkat Sarawak' ba ditu kemari (Hari Lima).

Projek Lingkages berambaika jaku 'Kesihatan dan Kesejahteraan' diatur Gerempung Inovasyen enggau Kreativiti Malaysia (Macri) lalu nyadi sebengkah pekit bejerita kreatif ngena media sosial lalu meransang bala raban nembiak bekunsika penemu enggau pengelandik ke ditemu sida ari orang tuai.

Ngenang pasal pekit nya, Sharifah Hasidah mega madahka perintah nengeri endang meransang bala raban nembiak nyereta pekit ke baka nya dudi hari.
  
"Sarawak ngembuan 27 etnik ari mayuh bengkah raban banasa, nangkan ke nya mega mayuh penti pemali ke enda tau dikereja, dalam pekit tu mega bala raban nembiak dipinta nyeritaka penti pemali nya enggau chara bejerita," ku iya.
   

Orang indu meseti berani bedagang

SIMUNJAN : Raban orang indu meseti berani nitihka jaku tesau perintah iya nya ngeransing diri dalam pengawa dagang dikena nambahka penatai pemisi diri empu.

Kaban Parlimen Batang Sadong, Hajah Nancy Haji Shukri madah, pengawa orang indu dalam pengada dagang manah amat laban asil ari pengawa dagang nya ulih dikena nambahka anak belanja ke ulih laki diri empu.

"Dikena meransang orang indu nyereta pengawa dagang, perintah bisi nyediaka Amanah Ikhtiar Malaysia tauka dikumbai AIM endur orang indu ngulihka lon tauka puku dikena ngepunka pengawa dagang.

"Nya alai, aku nesai orang indu kelebih sida ke nadai pengawa tauka indai tunggal nguji minta lon nya tang anang minjau duit ari  'along' laban enggai diri empu nyau tusah dudi hari," ku iya.

Iya madah munyi nya rambau bejadi Program Sukaneka ke diatur Amanah Ikhtiar Malaysia (AIM) Blok Simunjan bepalan ba Dewan Mesra, Simunjan apin lama ke udah.

Nancy mega madahka, bantu belanja ti disediaka AIM nya ulih mantu orang indu bedagang sereta ngerembaika dagang sida dudi hari.

Nangkan ke nya, Penulung Pengatur Pengawa AIM Pampang Serian, Syarif Sedi mega madhaka, AIM naka ke diatu ngembuan 339 kaban lalu sida tu datai ari semilan buah kampung kenyau ari 2008 tu tadi.

Beserimbai enggau pengerami nya mega mayuh bengkah aktiviti bisi diatur baka pekit karaoke, sukaneka enggau mayuh agi ke bukai lalu dikemataka tuai opis perintah enggau bala tuai raban bansa ba endur nya.

MPS majak nyulut

TERIMA KASIH...Soon Koh nerima tepa tanda basa ari Daniel (tengah) rambau Pengerami Makai Malam MPS ba sebengkah hotel tebilang ba Sibu.

"Sepemanjai 31 taun udah ditumbuh, MPS dipeda chukup bebendar nulung perintah ngemansangka menua Sibu. Aku ngarapka MPS ulih ngereja manah agi pengawa ungkup mensia mayuh udah tu."
Dato Sri Wong Soon Koh
Menteri Wang Kedua

SIBU : Majlis Perbandaran Sibu (MPS) udah mandangka penyulut pengawa ba sepemanjai taun 2012 pengudah ke nerima Empat Bintang Anugerah Penilaian Majlis Tempatan ulih Opis Menteri Pengawa Berumah enggau Perintah Pelilih Menua.

Menteri Wang Kedua, Dato Sri Wong Soon Koh madah, pemujur enggau penyulut nya berindik ari kerejasama enggau pemanah pengawa bala staf MPS ke deka ngemansangka menua Sibu.

"Sepemanjai 31 taun udah ditumbuh, MPS dipeda chukup bebendar nulung perintah ngemansangka menua Sibu.

 "Aku ngarapka MPS ulih ngereja manah agi pengawa ungkup mensia mayuh udah tu," ku iya.

 Iya madah munyi nya rambau Pengerami Makai Malam MPS ke diatur ba sebengkah hotel tebilang ba ditu malam Hari Empat tu tadi.

Soon Koh ti mega nyadi Menteri Perintah Pelilh Menua enggau Pemansang Mensia Mayuh ngarapka semua Kunsilor MPS bebendar agi ngereja pengawa sereta berunding panjai lebuh ngaga pemutus mutarka sebarang penanggul ke bisi nuntung mensia mayuh.

"Kunsilor patut besedia ngereja pengawa enggau ati ke lurus ngambik aulih nyadi teladan ke chukup manah ngagai mensia mayuh," ku iya.

Iya mega madahka bandar Sibu nyadi pusat hub wilayah tengah negeri Sarawak lalu sedia napi mayuh projek besai kelebih agi pemansang ungkup menua Sibu.

"Ambika chunto, pemansang jalai ari Sibu ngagai Tanjung Manis udah digagaka jematan awakka meri pengelantang ngagai mensia mayuh ke semak sereta nyungkak pemansang ekonomi ditanngkan enggau projek ngemesaika Padang Bilun Sibu.

"Kelimpah ari nya, Sibu mega ngasaika penguntung asil ari projek pemansang Koridor Renewable Energy Sarawak (SCORE) ke nyediaka mayuh pengawa puang, dagang enggau pemansang bukai ngagai menua  Sibu enggau negeri Sarawak,"ku iya.

Sama bisi datai maya tu iya nya Sapit Chairman MPS, Daniel Ngieng Kiong Ann, Seketeri MPS, Hii Chang Kee, semua kunsilor MPS enggau staf MPS.

Tanggungjawap pengajar majak besai

KUCHING : Pemansang infrastruktur baka jalai raya ba kandang menua pesisir ulih ngemuntangka pejalai kelebih agi dalam bidang pelajar sekula.

Kaban Parlimen Batang Sadong, Nancy Shukri madah, mensia mayuh seruran beguna ubah pemansang dikena ngemuntangka sistem pelajar sekula bejalai enggau mujur.

"Kami seruran ngemanahka perengka infrastruktur baka sekula enggau bekal elektrik ba menua Batang Sadong ngambika pengidup rayat lantang agi baka ba menua bandar,"ku iya.

Iya madah munyi nya mya bejadi pengerami alumni orang ke kala belajar ba Sekula Primari (SK) Abang Man enggau Sekula Sekondari (SMK) Simunjan No. 1 begulai enggau bala pengajar ba sebengkah program ke diatur ba hotel tebilang ba ditu, malam Hari Lima tu tadi.

"Tanggungjawap pengajar jam ke diatu besai amat laban betapi enggau pemansang teknologi pemadah enggau penyambung. Nya alai, bala pengajar meseti bebendar ngelalau pelajar ngambika enda terunda-runda enggau pemansang dunya siber," ku iya.

Nancy madah, jaku ajar bala pengajar dulu kelia chukup dipebasaka apai indai laban nulung ngajar bala anak nyadi orang ke menyana, enti diatu apai indai kelalu ngasika bala anak sida.

"Nya alai, aku meransang Gerempung Apai Indai enggau Pengajar (PIBG) meseti ngemataka sereta besaup ngajar bala nembiak sekula," ku iya.

Dulu ari nya, seiku orang ke kala nyadi Prinsipal SMK Simunjan No.1, Ahmad Majarie madah, tanggung pengawa penjar jam ke diatu endang berat agi enti dibanding enggau jeman sida kelia.

"SMK Simunjan No.1 suba balat dikerinduka bala pelajar ba menua Batang Sadong sebedau SMK Semera ditumbuh. Maya nya, tanggungjawap kami ke nyadi pengajar enda kala ditanggang lebuh ngelunsin ba pelajar," ku iya.

Udah nya, orang ke ngatur program, Awla Deris madah, raban nembiak rebak diatu patut beterima kasih laban gaya sekula diatu jauh lebih manah enti dibanding enggau dulu suba.

"Tuju program tu diatur dikena mulaika pengingat lama sereta ngerapitka kaul entara pengajar enggau bala nembiak sekula," ku iya.

Koperasi Belia Sibu Berhad nguji bedagang sayur

TANDA BASA… Abu Seman Jahwie (tengah) nerima tepa ari Chairman Gerempung Raban Nembiak Sibu (PPS), Bunsu Junaidi pengudah bejadi aum besai Koperasi Belia Sibu Bhd ba Sibu lalu dikemataka Mohd. Zaidi (kanan) enggau Morshidi Federick (Kiba).

SIBU : Pengawa ke bisi penau dikemansangka Koperasi Belia Sibu Berhad iya nya ngudar bemacham sayur ngagai Matu enggau Daro sereta kandang menua pesisir baka Pulau Bruit enggau Tanjung Manis.

Seketeri Politik Kepala Menteri ti mega nyadi Kaban Kunsil Nengeri Jemoreng, Abu Seman Jahwie madahka, kenyau ari mya aiya besekula menya nyentuk ke diatu iya nemu sayur ke dijual ba Matu enggau Daro endang diudar ari Sibu.

“Nya alai, koperasi tu patut berunding panjai ngambika sayur sida ulih diudar ngagai Matu enggau Daro sereta ngagai menua pesisir,” ku iya rambau bejadi aum besai Koperasi Belia Sibu Berhad ke diatur Gerempung Raban Nembiak Sibu (PPS) ba ditu kena malam Hari Lima tu tadi.

Abu Seman madah, koperasi tau berengkah nguji bedagang mimit-mimit baka muka kedai ba kampung-kampung ke diadang ulih beretan lama.

Iya mega ngelalau bala kaban gerempung nya ngambika ulih milih ketuai ke lurus penemu, ngambika koperasi sida mansang maju sereta mujur.

Penemu ke lurus sereta ngembuan tanggungjawap nyadi pekara ke patut dikembuan orang ke nyadi tuai ngambika orang bukai enda lari ninggalka koperasi.

Iya mega madahka mayuh penguntung, diulih enti masuk kopersi nya lalu iya madahka koperasi nya meseti chukup puku sereta bejalaika pengawa enggau naka pemanah.

“Entti atur pengawa udah meruan, ditambah enggau kaban dalam gerempung sepenemu sereta enda alah tipu orang bukai, tentu koperasi tu ulih mujur jemah," ku iya.

Enti ulih, gaga meh koperasi tu nyadi kedai ke pemadu maju ba endur tu. Naka ke diatu lebih 800 koperasi bisi ba nengeri tu, ku iya.

Maya aum nya, Mohd. Zaidi Haji Abdul Rahman dipilih nyadi Chairman Koperasi Belia Sibu Berhad, udah nya Morshidi Federick naydi Sapit Chairman. Orang ke nyadi Seketeri iya nya Mohd. Nazim Haji Masni lalu iya dibantu  Jamaludin Taha. Orang ke nyadi Tukang Wang iya nya Mariam Talib lalu disaup Shahmie Jamali.

Chairman Gerempung Raban Nembiak Sibu (PPS), Bunsu Junaidi sama bisi datai maya aum tu.

PBT dipinta nyaup ngerapitka kaul

ULANG TAUN KE-60… Dato Sri Wong Soon Koh (tengah) begulai enggau Datu Dr. Penguang Manggil, James Laju Ambok, Justani Joni, Datuk Tiong Thai King melah kek beserimbai enggau pengerami makai malam Majlis Daerah Luar Bandar Sibu (SRDC) ba Sibu. Bela bisi dipeda Temenggong Datuk Haji Wan Hamid Edruce.

SIBU : Semua staf Opis Pelilih Menua (PBT) ba serata nengeri tu di seluruh negeri tu diangkan ngambika bela besaup ngerapitka kaul entara pupu raban bansa setipak enggau pelin baru PBT Sarawak.

Menteri Rampa Menua enggau Pemansang Mensia Mayuh, Dato Sri Wong Soon Koh madah, genap iku pupu raban bansa di negeri tu meseti begempung beserakup enggau pangan diri lalu anang semina berunding ngati ke diri.

Kepala Menteri, Pehin Sri Haji Abdul Taib Mahmud, sebedau tu udah ngatur baru pelin PBT laban iya enggai meda pengawa orang ti nadai ibuh ke orang bukai, ku iya.

Iya madah munyi nya maya pengerami makai malam beserimbai enggau pengerami ngintu ulang taun ke-60 Majlis Daerah Luar Bandar Sibu (SRDC) ba ditu, kena Hari Lima tu tadi.

Sama bisi datai ba pengerami tu iya nya Seketeri Tetap Opis Menteri Rampa Menua enggau Pemansang Mensia Mayuh, Datu Dr. Penguang Manggil, Chairman SRDC, James Laju Ambok, kaban Parlimen Lanang, Datuk Tiong Thai King enggau Seketeri SRDC, Justani Joni.

Soon Koh ti mega nyadi Menteri Wang Kedua madahka, dikena napi pemansang ekonomi ke maya hari, mensia mayuh patut patut besukung betulung enggau pangan diri.

Nya alai, endang udah nyadi tanggungjawap semua staf Majlis meransang mensia mayuh nitihka konsep 1 Malaysia ke ditempa Menteri Besai, ku iya.

Iya mega madahka, perintah udah mutus ati nginsur servis semua staf Majlis PBT ba serata nengeri ngagai enam bulan agi laban pengawa bepilih besai ke-13 deka diatur taun baru.

"Aku ngarapka semua staf Majlis PBT ulih bebendar agi nulung perintah nempa pemanah kaul enggau pengelikun menua ba nengeri tu," ku iya.

PBT diatu nyadi kepala perintah, meri servis ke pemadu manah ngagai genap iku rayat ba nengeri tu, ku iya lalu minta semua staf PBT beratika pengawa ke udah dikereja sepemanjai taun tu ngambi nyadika teladan pengawa ba taun 2013.

“Kitai meda udah mayuh pemansang enggau pemujur ulih SRDC sepanjai taun tu. Taja baka nya agi mayuh pekara ke patut digaga lebih manah.

"Anang beguai berasai puas ati enggau pengulih ke udah dijapai. Ngarapka bala staf  SRDC terus manah ngereja pengawa ungkup mensia mayuh," ku iya.

Ba pengerami nya, Soon Koh diuluka Dr. Penguang sereta bala ke bukai baka James Laju, Justani Joni, Datuk Tiong Thai King, Temenggong Datuk Haji Wang Hamid Edruce enggau staf Majlis SRDC melah kek dikena nyambut ulang taun ke-60 SRDC.

MNS, Kubah Ria nyadi pasar besai

TERIMA KASIH … Penganti Direktor pengeluar Program Sarawak, Fee Lin Chew nyuaka tepa ngagai Datuk Amar Abang Johari  Tun  Abang Haji Openg maya Pengerami Bejadi Satok Fest 2012, ba Kuching.

"Nengah pemansang pasar nya jemah, pendiau nengeri Sarawak diadang berubah laban palan nya nyau nyadi pasar besai ke lalu nyungkak penatai pemisi rayat ke diau semak nya."
Datuk Amar Abang Johari Tun Abang Haji Openg
Menteri Pengawa Berumah enggau Dagang Temuai


KUCHING : Medan Niaga Satok (MNS), Kubah Ria deka digaga nyadi sebagi ari pelin pemansang awakka nyadi Palan Pasar Besai ke baru ba Petra Jaya.

Menteri Pengawa Berumah, Datuk Amar Abang Johari Tun Abang Haji Openg madah, pelin pemansang ba endur nya deka digaga berenggat-renggat.

Iya madah, naka ke diatu perintah udah nembuka projek pemansang ungkup rengat keterubah iya nya ngaga MNS enggau Medan Kubah Ria (MKR) ke diadang tau narit ati temuai raun ngagai nengeri tu.

"Kelimpah ari nya, sekeda pasar besai digaga berimbai enggau palan nya dikena nyungkak pemansang ekonomi rayat ke nguan endur nya.

"Nengah pemansang pasar nya jemah, pendiau nengeri Sarawak diadang berubah laban palan nya nyau nyadi pasar besai ke lalu nyungkak penatai pemisi rayat ke diau semak nya," ku iya.

Iya madah munyi nya rambau bejadi Satok Fest 2012 ke diatur Palan Gerempung Pendiau Dagang Temuai Satok (PKPS), Opis Penabur Program Sarawak (RTM) sereta sekeda agensi perintah ba MNS, Kubah Ria, ba ditu malam Hari Lima tu tadi.

Sama bisi datai ba pengerami tu iya nya Datuk Bandar Dewan Bandar Raya Kuching Utara, Datuk Abang Abdul Wahap Abang Julai, Chairman Pengatur Pengerami Satok Fest 2012, Shah Iszhan Haji Isnin enggau Penganti Direktor RTM, Sarawak, Fee Lin Chew.

Johari ti mega nyadi Menteri Dagang Temuai madahka, ba renggat kedua ila, sebuah panggung teater ke beungkus RM5 juta enggau sebuah skrin elektronik besai deka digaga dikena narit temuai ngelawa endur nya.

Iya madah, panggung nya ila deka digaga berimbai enggau MNS, udah nya skrin elektronik deka digaga semak Jematan Tunku Abdul Rahman.

"Reti nya, mensia mayuh nyengkaum temuai ari menua luar ulih nemu mayuh penerang bekaul enggau program sereta barang ke bisi dijual ba endur nya," ku iya.

Berebak enggau nya, iya madah, perintah diatu benung merambu deka ngaga pengkalan ke ngena teknologi ari menua Australia dikena ba Sungai Sarawak.

"Udah nya, dua iti agi pengkalan ke digaga ba Sungai Lazim enggau Sungai Bintangor awakka dua bengkah palan nya nyadi palan penyangkai temuai ke raun semak menua nya," ku iya.

Ba pemansang ke sebaka mega, Kaban Kunsil Nengeri Satok nya madahka, eprintah nengeri udah sedia ngaga baru Jematan Gantung Satok ke udah runtuh taun 2004.

Taja baka nya, ku iya perambu ngagai jematan kira 130 meter pemanjai nya agi benung diperunding lalu ungkus dikena ngaga jematan nya dipelabaka RM5 juta.

Ba pengerami nya, Johari madahka orang ti menang dalam pekit Satok Fest 2012 deka dipelanja tiket bilun raun ke menua Semenanjung Malaysia kena bulan April taun tu.

"Sida (pemenang) tu deka diasuh raun ngagai nengeri Melaka ngambika meda pengerami ke bisi diatur ba endur nya lalu sida deka diasuh mandangka main asal ari negeri Sarawak," ku iya.

Ibun pesaka bansa ungkup nembiak rebak dudi

KUCHING : Iventori ke bisi dipandangka ba muzium entara pesaka bansa ke chukup berega, ku Seketeri Tetap Opis Menteri Pemansang Sosial Nengeri Sarawak, Datu Affandi Keli.

Iya madah, inventori ke baka nya patut dijaga enggau meruan awakka bisi dipeda raban nembiak rebak dudi.

PENGARI SARAWAK...Datu Affandi Keli (Kanan) nyuaka menira Sarawak ngagai Direktor Muzium Sarawak, Ipoi Datan (Kiba) ti nyadi Tuai Kontijen Muzium Sarawak rambau Hari Muzium Peringkat Nasional 2012. Pengawa nyuaka ke menira nya diatur ba Opis Baitulmakmur, Kuching.

"Enti barang pesaka bansa tu enda dijaga enggau manah, kitai deka punas barang-barang lama, nya alai iya patut diibun enggau meruan," ku iya.

Iya madah munyi nya ngagai pemberita rambau pengawa nyuaka menira Sarawak ngagai Tuai Kontijen Muzium Sarawak iya nya Direktor Muzium Nengeri Sarawak Ipoi Datan beserimbai enggau Hari Muzium Entarabansa 2012, ke diatur ba Opis Baitulmakmur apin lama ke udah.

Nitihka penerang Affandi, muzium chukup beguna laban endur nyimpan barang-barang pesaka lama.
"Berindik ari nya, kitai deka nemu sejarah ke kala nyadi ba menua tu lalu nya meh kebuah barang-barang nya patut diibun enggau meruan," ku iya.

Ngenang pasal rintai barang ke bisi dipandangka ba muzium Sarawak, iya madah entara  barang nya baka barang arkeolologikal, zoologikal, etnografik enggau arkib.

“Naka ke diatu, penyampau inventori ke bisi dipandang bedau mayuh lalu kami deka naka ulih nambahka penyampau nya dalam timpuh dua taun ke deka datai.

“Enti kitai meda pemasang muzium ba menua luar, chukup bebida enggau ba menua tu. Nya alai kami deka berundingka chara berunding enggau opis muzium ari menu luar,” ku iya.

Berebak enggau nya, iya nyuaka menira Sarawak ngagai Tuai Kontijen Muzium Sarawak ke deka ngarika negeri tu rambau Pengerami Hari Muzium Entarabansa 2012 ke deka diatur ba pasar Pekan, Pahang kena 17 ngagai 21 Oktober tu.

Mayuh bengkah aktiviti deka diatur beserimbai enggau pengerami nya baka main enggau lumba, aum besai ungkup bala staf muzium ba serata menua enggau mayuh agi ke bukai.

Affandi madah, nengah program ke baka tu bala staf muzium ulih neritka kaul sereta bekunsi penemu enggau bala orang ke bisi nyereta program.

Kira 40 iku staf ke deka ngarika kontijen muzium Sarawak rambau pengerami tu ila.

Iya madah, program nya diatur beserimbai enggau Pengerami Meri Nama Muzium Sultan Abu Bakar ba Pekan, Pahang lalu Sarawak deka nyadi palan endur ngatur program ke sebaka taun baru nyin ila.