RM300j diberi perintah besai dikena miki jalai batang

BEKENU : Perintah Besai ngungkupka agih belanja RM300 juta dikena miki jalai batang ke udah rusak awakka ulih dikena rayat ke diau ba menua pesisir di serata negeri tu.

Sapit Menteri Besai, Tan Sri Muhyiddin Yassin madah, bala iya deka ngasuh Opis Menteri  Menua Pesisir berunding enggau Perintah Nengeri Sarawak ngerintaika jalai-jalai ke patut dimiki.

"Agih belanja tu dikemendar endang dikena miki jalai-jalai batang ke udah maju awakka ulih ditengah dikena ngelawa rumah panjai tauka kampung-kampung ba menua pesisir.

"Kami (perintah) ngarapka tu pekera keterubah dikena miki jalai batang," ku iya.

Iya madah munyi nya nya lebuh ke dirandau pemberita pengudah Pengerami Begulai Enggau Orang Melayu ISlam ba Kampung Pantai Bungai Bekenu, apin lama ke udah.

Muhyiddin madah, agih belanja nya mega sebagi ari pengawa perintah dikena nlung rayat ba Sarawak kelebih agi berebak enggau Bajet 2013 ke udah dipadah.

"Semua utai tu digaga nitihka langgur pemansang ke udah diperambu dalam NKRA menua pesisir ke deka meda semua rengka rama baka jalai raya manah ditengah," ku iya.

Muhyiddin ngarapka semua jalai ulih dimiki enggau mujur nengah agih belanja ke udah ditambah mayuh agi ari ke udah.

"Kami deka minta rintai projek-projek ba kamoung, bekal ai enggau elektrik ngambika ulih diperunding enggau Opis Menteri Menua Pesisir," ku iya madah nyemetak bendar.

Meseti ngemeranka pelajar sekula

NYUAKA GELAR... Tuai Pemegai Menua  Tun Datuk Patinggi Abang Haji Muhammad Salahuddin nyuaka Gelar Ijazah Kehormat Doktor Falsafah (Pansik Pemansang) ngagai Kepala  Menteri Pehin Sri Haji Abdul Taib Mahmud (kiba) beserimbai enggau Pengerami Konvokesyen ke-16 UNIMAS.

“Pengawa ngaga mayuh agi sekula sekalika di bandar tauka di menua pesisir udah meri mayuh agi peluang ngagai pelajar nampung pelajar sida ngagai sekula sekondari lalu nya mandangka komitmen perintah ke deka nentuka menua tu ulih ngeluarka pengereja pengawa ke landik asil ari pelajar."  
PEHIN SRI HAJI ABDUL TAIB MAHMUD
Kepala Menteri Sarawak

KOTA SAMARAHAN:  Semina nengah pelajar kitai ulih mansutka modal mensia ke ulih mantu perintah dalam ngemujurka juluk ati ke deka ngatur semua program pemansang dalam menua tu. 

Kepala Menteri Pehin Sri Haji Abdul Taib Mahmud madahka, pemesai guna pelajar nulung perintah ngemujurka program pemansang selepas merdeka ari pegai British, ke alai kitai mujur ngapuska peresa Common Entrance ke diatur perintah Koloni ke alai semina meri peluang ngagai 30 peratus pelajar menua tu ulih neruska pelajar ngagai peringkat sekula sekondari. 

Iya madahka, asil ari polisi nya, mayuh pelajar nadai ulih neruska pelajar sida ngagai peringkat ke lebih tinggi agi. Ketegal nya menua kita kurang pengereja pengawa ke ngembuan pengelandik. 

“Pelajar nya siti ari batu pemun dalam pengawa nempa modal mensia. Sepemanjai aku udah ngemeranka pengawa dalam politik aku udah meda penyeranta ke tekelalu ngasuh kitai nyabak dalam ati lebuh beratika pemerinsa pendiau enggau penyuntuk rayat di menua pesisir ke selalu nganti pemansang dibai ngagai tempat sida. 

“Rayat amat arapka bala tuai kena nebus nasip sida sereta mantu ngeluarka pengidup sida ari penyeranta.

Nya alai peneleba bakatu ngasilka ati diri bekereja enggau naka ulih kena mantu sereta ngubah nasip rayat ke kenyau ari suba auska pemansang," ku iya.  

Iya bejaku munyi nya dalam pengerami meri terima kasih serimbai enggau pemeri Anugerah Ijazah Kehormat Doktor Falsafah (Kajian Pembangunan) ngagai Kepala Menteri ba pengerami Konvokesyen Ke-16 Universiti Malaysia Sarawak (UNIMAS) di DeTAR PUTRA UNIMAS ditu hari tu. 

Ku iya, penemu ke begantung enggau tulung ari expatriate ke kering lebuh era pengudah medeka taja pan perintah udah mupuk ngatur program pemansang ke alai mayuh agi sekula udah digaga kena nampung peminta rayat sereta penyampau pelajar ke betambah selepas sistem peresa common entrance diapuska.

Pehin Sri Taib madahka, pengawa ke ngaga mayuh agi sekula dibandar enggau di menua pesisir udah ngujungka lebih mayuh agi pelajar bepeluang nampung pelajar sida ngagai peringkat sekula sekondari.

Tiu mandangka pengeras komitmen perintah deka meda menua tu ulih ngeluarka pengereja pengawa ke ngembuan pengelandik nengah sistem pelajar. 

“Penumbuh universiti perintah ari luar Kuala Lumpur  enggau Lembah Klang mega nyadi manifestasi pengeras perintah ngemeranka pelajar sekula ngagai rayat kena nentuka modal mensia ke ulih mantu perintah ngemujurka program pemansang menua. 

“Penumbuh UNIMAS dalam taun 1992 nya siti ari pengawa perintah kena ningkatka pengeluar modal mensia di Sarawak kena nampung peminta pasar pengereja pengawa kemaya hari.

Aku temegah ati meda pemanah pengawa  UNIMAS ke udah mujur ngeluarka graduan ke bekualiti setimpal enggau juluk ati ke numbuhka institusyen tu 20 taun ke udah lalu," ku iya.

Ku iya, raban nembiak kemaya hari tu amat betuah laban diadaka maya menua tu udah merdeka lalu benung ngasaika arus pemansang ke majak nambah.

Pemansang kemaya hari tu patut diguna enggau penuh ulih raban nembiak baru kena nentuka mayuh agi pemansang dudi hari ila.

“Sida mega patut mereti ke juluk ati perintah ke deka nyapai status menau maju perintah begunaka lebih mayuh agi modal mensia ke landik dalam mayuh macham bidang kena mantu program pemansang ke lebih efektif," ku iya. 
Iya mega madahka, raban nembiak kemaya hari patut nyikapdiri enggau penemu ke lebih tinggi kena ngerebut peluang ke bisi disediak, lebbih agi dalam bidang pengelandik kena nangkup chabar baru dalam era realiti kemaya hari. 

Nitihka iya mega, dalam era realiti baru, dia raban nembiak patut besedia nangkup chabar C.O.M.E (Change,Opportunity, Mobility and Equality) ke minta raban nembiak siap sedia napi ubah dalam arus pemansang menua. 

“Sida mesti berani ngaga ubah sereta pandai ngerebut peluang ke disediaka ulih perintah laban potensi dudi hari amat manah.

Lebuh kita nemu pemayuh peluang ke disediaka ulih perintah, raban nembiak tu mega patut sedia nerima konsep mobiliti dalam milih kereja. 

“Lebuh betukar ngagai tunga 'industrial society' raban nembiak patut nemu pengawa dudi hari ila ukai semina bekereja dalam opis aja, tang nyengkaum bekereja di luar opis.

Tu realiti ke deka diterima raban nembiak dudi hari, lalu semua tu ulih nyadi nyata enti sida sedia nyaut chabar C.O.M.E, “ ku iya.

Iya mega arapka  UNIMAS ulih ngeluarka raban nembiak ke ulih nyaut pemar C.O.M.E laban universiti nya tempat bala nembiak belajar berunding sereta alai ngulihka pemandai. 

Ketuai patut meri penerang penuh MRP ngagai nembiak

KE PENGINGAT...Harden (tengah) begambar enggau bala tuai raban bansa enggau bala penerima MRP rambau pengawa Nyuaka MRP ke diatur ba Opis SUPP Simanggang.

SRI AMAN : Genap iku pengari tauka orang ke bisi nerima agih belanja Projek Mit Menua Pesisir (MRP) ari perintah dipinta meri penerang ke penuh ngagai gerempung, serakup tauka rumah panjai sida.

Penulung Menteri Pemansang Menua Pesisir Enggau Pengawa Berumah, Datuk Francis Harden Hollis madah, pengawa ke baka nya beguma amat ngambika enda charut tauak saru penemu entara rayat enggau ketuai sida udah tu.

"Gerempung mega patut ngatur aum enggau bala kaban dalam gerempung tauka entara Komiti Pemansang enggau Pengelikun Kampung (JKKK) enggau tuai rumah sida pengudah nerima MRP.

"Rayat enggau baka kaban deka nemu kini penungga agih belanja nya. Iya ke beguma amat dikena nyeliahka saru penemu ari bala kaban bekaul enggau bala ketuai ke bekaul enggau agih belanja nya," ku iya.

Iya ti mega nyadi Kaban Kunsil Negeri (ADUN) Simanggang madah munyi nya rambau pengawa Nyuaka MRP ke diatur ba Opis Parti Rakyat Bersatu Sarawak (SUPP) pampang Simanggang kemari (Hari Empat).

Kelimpah ari nya, Harden mega ngarapka MRP ke diberi perintah nya ulih dikena enggau meruan baka dikena ngatur pogram ke udah diperambu gerempung tauka JKKK udah tu.

“Iya ke beguna amat, MRP nya ulih dikena ngemujurka program ti diatur gerempung tauka JKKK lalu pengujung iya meri penguntung ngagai mensia mayuh," ku iya.

Dulu ari nya, Harden bisi nyuaka chek agih belanja MRP kira RM63,000 ungkup semila buah JKKK, siti gerempung enggau Opis Pelajar Daerah Sri Aman.

Orang indu dilalau beperesa tusu

KUCHING : Orang Indu ba nengeri tu dilalau meresa pengerai tusu diri ba klinik tauka hospital ke semak awakka ulih nemu sekalika sida bisi ngembuan penyakit riman tusu tauka enda.

Kebuah pia laban penyampau orang indu ke ditemu ngembuan penyakit riman diatu nyau majak nambah sereta balat ngirauka ati.

Tuai Opis Bebuntasti mega nyadi Chairman Raban Penyukung Riman Tusu (BCSG), Nik Azim Nik Abdullah madah, ba taun  2005, penyampau orang ke diperubat bisi 834 enti dibanding enggau 750 iku dalam taun 1996 ngagai 2000.

"Riman tusu dirintai pemadu mayuh iya nya bisi ngerikod 17.5 peratus enti dibanding enggau riman sarang anak 12.7 peratus.

"Tu nandaka agi mayuh orang indu ba nengeri tu bedau mereti sereta enda nangika penyakit riman tusu," ku iya rambau bejadi Kimpin Bulan Mereti Pasal Riman Tusu ba Hospital Umum Sarawak (HUS) ba ditu, apin lama ke udah.

Iya madah, mayuh bengkah atur udah digaga dikena meri penerang ngagai mensia mayuh bekaul enggau penyakit riman laban nya tau dikumbai penyakit pemadu dikenangika sereta tau munuh orang indu.

"Riman tusu ulih gerai nyema iya ditemu tumu sereta diperubat enggau lengkas, tebal agi mayuh orang datai berubat lebuh penyakit udah raya.

"Pansil tumu udah digaga nengah Beperesa Ke Diri Empu (PSP) ungkup bala orang indu ke beumur lebih 20 taun.

"Nyema selalu diperesa orang indu ulih nemu enggau tumu nyema bisi penyelai ba tusu sida lalu anang laun datai ngelawa doktor," ku iya.

Taja pia, Nik Azim madah, mayuh orang indu enda ngemeratka penykait nya lalu bisi mega sekeda langsung enda nguji meresa iya.

"Sida mega enggau betemu enggau doktor nyema bisi penyelai nyadi ba tusu sida kelebih agi nyema orang ke ngubat pemedis sida nya doktor lelaki.

"Enti udah raya, nya baru sida datai betemu enggau doktor tang maya nya nama-nama chara enda ulih digaga agi.

"Kebuah pia laban semua sel-sel dalam tusu udah kembai lalu ngerampit ngagai lempuang, jantung, ati enggau tulang.

"Bisi mega sekeda terus nadai bedau sempat berubat ba hospital laban penyakit udah kelalu raya," ku iya.

Nya alai, mensia mayuh patut diberi penerang enggau mayuh bekaul enggau penyakit riman tusa ngambika penyampau orang ke ngembuan penyakit tu ulih mimit agi, ku iya.

Peluang anak Sarawak mantaika pengelandik

MERI PENERANG... Fee Lin Chew (dua kiba) benung meri penerang ngagai bala pemberita bekaul enggau Karnival Bakat "My Gempak" ke deka diatur ba RTM Kuching berengkah 15 ngagai 20 Oktober 2012.

KUCHING : Mensia mayuh ke ngembuan pengelandik enggau penau diperansang nyereta sesi nguji pengelandik beserimbai enggau Karnival Bakat "My Gempak" ke diatur ba RTM Kuching berengkah 15 ngagai 20 Oktober tu.

Lebuh randau begulai enggau pemberita ba RTM kemari (Hari Empat), Sapit Direktor Penabur Berita RTM Sarawak, Fee Lin Chew madah, sesi nguji pengelandik tu tebuka ngagai barang sapa orang enda ngira peringkat umur asal ngembuan pengelandik dalam bidang seni awakka ulih diangkat ngagai tikas ke lebih tinggai.

Karnival nya, ku iya diatur kerejasama Opis Main Asal enggau Pengawa Rama Menua (JKKN) enggau Radio Televisyen Malaysia (RTM) dikena ngamyuhka asil program seni awakka ulih diayanka nengah Program TV.

Bisi empat bagi program nguji pengelandik ke deka diatur beserimbai enggau karnival tu iya nya Sri Pantun, My Ekspressi, Lantai Cilik enggau Mimpi Ke Bintang (Pengelandik 1Malaysia).

Program Sri Pantun endang ngiga orang ke landik bepantun lalu diatur bepalan ba Gelanggang Badminton RTM. Program tu deka dipansutka ba TV2 berengkah 16 Oktober ninting Hari Dua bepun pukul 8.30 malam.

Udah nya program My Ekspressi baka konsep realitit TV dikena ngiga raban orang ke landik dalam bidang seni muzik enggau mayuh bengkah tarian pupu raban bansa di Malaysia. Program tu diatur bepalan ba Panggau Ulih Mindah JKKN / Balai RTM lalu dipelabaka ulih dipansut ba TV bulan Januari taun baru.

Program Lantai Cilik (PLC) diatur enggau chara pekit ungkup bala nembiak beumur biak ari 12 taun. Tuju iya dikena ngiga raban nembiak ke landik betanda tradisonal ari pupu raban bansa tauka beraban-raban. PLC dipelaba ulih dipansutka ba TV bepun November ngagai Disember 2012 kena Hari Enam enggau Hari Minggu.

Program Mimpi Ke Bintang (MKB) entara program baru dikena ngiga pengelandik nyengkaum mayuh kategori baka bejenaka, akrobatik, silap mata, main pekakas muzik enggau chara nyelai, pengelandik ngaga utai, pengelanchat ke enda kala dipeda, pengelandik ari batang tubuh tau penemu runding, formasi kretaif, pengulih nunda munyi/ sada nyawa, mandangka pemerani enggau mayuh agi ke bukai.

Program nguji pengelandik MKB berengkah 15 ngagai 18 oktober bepalan ba Panggau Ulih Mindah JKKN / Balai RTM lalu program tu deka dipansutka ba TV1 berengkah 20 Oktober ninting Hari Enam.

Berebak enggau karnival tu mayuh bengkah aktiviti bukai ke bela diatur baka aktivitivi Interaktif, eksibisyen, bedagangka barang, bengkel main asal, panggau main asal, DJ begulai enggau peminat sereta mayuh agi ke bukai.

Nangkan ke nya, beserimbai enggau karnival mega mensia mayuh bepeluang betemu enggau sekeda bala artis tebilang menua tu baka Dayang Nurfaizah, Noraniza Idris, Jimmy Palikat, Fizo Omar, Azreen Azhar, Kina Mentor, Dely Ahli Fikir, Bob AF, Anding, Iwan Hj Dasri enggau Adi Putra.

Bela bisi datai maya randau tu Pemangku Direktor JKKN Tuan Haji Saini bin Lihi, Tuai Penulung Direktor Seksyen TV RTM Kuching Abg Sulaiman Hj Abg Joh, Penulung Direktor TV Rauyah Hj Marzuki, Direktor Filem Menua Yahya Sulaiman enggau Penulung Penerit Adat Finas Saslinda binti Ahmad.

Kaban GCC, menua Asia ditesau nyereta SCORE

DOHA : Bala kaban Majlis Kerjasama Teluk (GCC) enggau menua-menua bukai ba Asia udah ditesau perintah negeri Sarawak beranakka puku ba industri Koridor Renewable Energy Sarawak (SCORE).
   
Menteri Perambu enggau Pengatur Sumber Kedua, Datuk Amar Awang Tengah Ali Hassan madah, naka ke diatu peranak puku asil ari industri tu empu bisi US$9.2 bilion lalu ba kandang menua Samalaju bisi 12,912 pengawa puang.
   
"Industri-industri tu udah dilakuka nengah SCORE lalu entara industri tu baka aluminium, kaca/gelas, industri minyak enggau besi.
   
"Tuju iya dikena ngemansangka agi 10 batang pun industri," ku iya rambau randau ba Forum Inside Invest Forum Asia 2012 bepalan ba St Regis Hotel, di Doha, Qatar, apin lama ke udah.

Ba sebengkah berita ke bukai, Opis Pemadah Sarawak madahka Awang Tengah bisi nyebut pasal projek-projek nya diadang ulih narit orang dagang ari menua luar laban penyulut iya ungkup pemansang dudi hari SCORE.
   
Iya madah, Sarawak endang ngelaluka penatai orang dagang ari menua luar beranakka puku dalam industri nya sereta bidang bukai ke besangkut paut enggau SCORE baka minyak sawit, berikan, betanam betupi, pengawa kereja batang, enjinir tasik enggau dagang temuai.

PBT dipinta ngaduka jalai rusak

ADU LENGKAS...Ramli nunjukka jalai rusak ba jalai raya Kampung Muhibbah ke patut ditar PBT udah tu.

SRI AMAN : Rayat ke diau ba Kampung Muhibbah Sri Aman minta tulung raban Pemesai Pelilih Menua (PBT) ngetar jalai ke belubang ba genturung pendiau sida.

Seiku orang ke diau ba genturung pendiau nya, Ramli Abu Sera madah, berita bekaul enggau jalai rusak ba genturung pendiau sida nya udah dua kali dipansut ba surat kabar tang nyentuk ke sehari tu jalai raya ke rusak lalu mengkang baka nya belama.

“Jalai raya ke rusak nya majak nambah. Lubang jalai raya ke rusak pan majak dalam enda baka sebedau tu laban ke suah ditengah prengka pengangkut ke berat-berat.

“Nya alai, aku ngarika mensia mayuh ba Kampung Muhibbah minta tulung PBT ngetar jalai raya ke rusak awakka nyamin pengelikun menisa mayuh ke bela betengahka jalai nya udah tu," ku iya.

Kelimpah ari nya, musin pengujan ke nyadi diatu mega ngujungka penguna pedis deka nyeliahka jalai rusak nya.

Lebuh ai ujan menuhka lubang jalai ke rusak pengguna pedis deka milih ni bagi jalai ke manaah ditengah, ku Ramli.

"Aku chukup irauka orangti ngena motosikal. Enti jalai tu alu enda ditar, penusah bebadi endang ulih nyadi sebarang maya kelebih agi ngagai sida ke ngena motosikal," ku iya.

Chalon BN semina ngena lambang dachin - Masir

PANTU : Orang ke nyadi chalon komponen parti Barisan Nasional (BN) ulih dikelala nengah lambang dachin ke dikena sida bekimpin.

Nya alai, chalon ke ngumbai diri ngarika BN meseti ngembuan lambang dachin dikena sida meri pengarap ngangai rayat maya pengawa bepilih besai tu ila.

Kaban Parlimen Sri Aman, Masir Kujat ngemansutka pekara ya rambau bejadi Pengerami Tuai Begulai Enggau Rayat ke diatur JASA Sri Aman bepalan ba Rumah Yokubus, Munggu Ridan ba pelilih menua Pantu ensana (Hari Empat).

TANDA BASA...Masir nerima tepa ari bini Tuai Rumah Yokubus iya nya Miah ba sebengkah pengerami ke diatur ba Munggu Ridan, Pantu.

"Bisi chalon BIbas maya bekimpin ngumbai diri ngarika BN. Pekara ke nyadi penanggul diatu iya nya raban orang nya langsung nadai mai lambang menira dachin lebuh bekimpin ba rumah panjai.

"Lambang dachin kebendar iya 'lesen' madahka sida endang amat ari BN. Reti nya enti sida nadai mai menira lambang daachin sida endang ukai pengari BN...rayat patut nemu berundingka senentang pekara tu maya pengawa bepilih besai tu ila," ku iya.

Chara ke baka nya, ku iya benung dikena bala chalon Parti Pekereja Sarawak (SWP) ke ngumbai diri kaling BN dikena sida ngulihka sukung rayat maya pengawa bepilih besai Ke-13 (PRU-13) tu ila.

Nya alai, Masir ngarapka rayat anang mudah pechaya ngagai chalon bibas enggau raban penyakal ke ngumbai diri ngarika BN, semua nya dikena sida ngemulaka rayat.

“Pekara ke pemadu beguna rayat ba sitak Parlimen Sri Aman anang sesekali alah penemu ninga danji bula ke disebut penyakal udah tu," ku iya.

Raban Dayak anang ngadai politik ketegal duit - Nyalau

WILLIAM NYALAU BADAK

SRI AMAN : Raban bansa Dayak kelebih agi ke diau ba kandang menua Lubok Antu anang sesekali begadai politik ketegal alah suap orang ngena duit, ku Kaban Parlimen Lubok Antu, William Nyalau Badak.

Iya madah, mensia mayuh meseti berunding panjai ngambika enda nyadi perengka orang ke semina deka nguna sida dikena bepolitik aja.

“Ulah ke baka nya benung nyadi ba sitak parlimen ke dijaga aku, iya nya Parti Pekerja Sarawak (SWP) benung nguji ngulihka sukung bala pengundi Dayak ngena duit laban deka meda Larry Sng bediri maya pengawa bepilih besai.

“Enti pengundi Dayak alah ketegal diberi orang duit, nyadi orang bukai ulih nemu bansa kitai chukup nyamai dialah ngena duit dalam politik dudi hari," ku iya lebuh ke dirandau media kemari (Hari Lima).

Kelimpah ari nya, aku nangkan semua pengundi ba sitak Parlimen Lubok Antu enda ngundi orang bukai ke ukai peranak asal di menua tu nyadi pengari rayat ditu.

Kebendar iya, Parlimen Lubok Antu ku Nyalau meseti dipegai pengari rayat  Barisan Nasional (BN) ke endang rayat peranak asal Lubok Antu empu sereta endang peturun Bumiputera Dayak.

“Tambah mega tuju parti politik dikena ngemansangka pengidup rayat lalu ukai ngereja pengawa nyual insuran ngagai rayat baka ke digaga SWP ngelama tu.

“Insuran tu semina pemanah danji politik SWP. Pendiau ke baka tu nyengala bendar mandangka parti politiknya nadai ngembuan pengelurus dalam ngemansangka pengidup rayat enti udah pengawa bepilih besai tu," ku iya.

Enti diperati ba sukut pemansang sitak Parlimen Lubok Antu benung mansang kenyau Nyalau nyadi pengari rayat ba menua nya berengkah ari taun 2008 suba.

Projek kerita kabel agi diperunding

Datuk Amar Abang Johari

KUCHING : Projek kerita kabel nuju ngagai tuchung Gunung Santubong lalu bedau bisi pemutus ari perintah.

Menteri Dagang Temuai, Datuk Amar Abang Johari Tun Abang Openg madah, langgur penemu deka ngaga projek nya agi diperunding lalu perintah nengeri mega bedau ngerah sebarang pengawa meresi kandang menua ke dibungkur projek nya.

"Projek nya meseti ngembuan penemu ke sama deka setuju ngambika iya ulih mujur.

"Iya ke temu aku, naka ke diatu, agi bedau gerah endur ngemujurka projek laban pansik agi dipejalai," ku iya madah ngagai pemberita pengudah Nyuaka Gelar Pelajar Nyulut Gerempung Pengajar Bumiputera Sarawak (KGBS) ba sebengkah hotel tebilang ba ditu, apin lama ke udah.

Iya madah, diatu enda ibuh meresi kandang endur nya seagi nadai gerah ari perintah.

"Kitai endang bela nemu Gunung Santubong entara palan ke balat narit ati temuai menua luar.

"Enti kerita kabel nya mujur digaga jemah diadang mayuh agi temuai datai tang diatu pansik bekaul enggau projek nya lalu empai tembu. Nya alai, anang guai meresi kandang endur nya," ku iya.

Projek dipadahka kena bulan Mei 2007 lalu beungkus RM50 juta diadang ulih nyungkak industri dagang temuai di Sarawak iya nya narit temuai ari  Sabah, Brunei enggau Kalimantan.

Enti projek nya mujur jemah, iya deka nyadi projek kereta kabel 2,385 meter pemanjai tauka lumur dua pemadu panjai nangkan kerita kabel ba Genting Highlands ke bisi 2.5 kilometer pemanjai.

Wira enggau Wirawati PLKN nyadi pemun pengelikun menua

NGIRUP TONGKAT ALI... Sapit Tuai Direktor Opis Latih Pengawa Ke Bansa  Enggau Menua (JLKN), Awang Alik Bin Jeman (dua kanan) diuluka bala pematih kem PLKN Similajau ngirup ai Tongkat Ali. Bela bisi dipeda Komandan Kem PLKN Similajau, Mejar Azahari.

BINTULU :  Wira enggau wirawati Kem Latih Pengawa Ke Bansa  Enggau Menua (PLKN) Samalaju dilalau terus ngetanka penyerakup entara raban bansa laban pekara ke baka nya nyadi tiang pemun pengelikun menua.

Sapit Tuai Direktor Opis Latih Pengawa Ke Bansa  Enggau Menua (JLKN), Awang Alik Bin Jeman madah, kitai patut bebasa sereta nempa kaul enggau pangan diri awakka ulih nemu adat asal bala kaban ke baru enggau bekelala.

"Ba Sarawak aja, bisi lebih ari 30 buah raban bansa bedau ke dichampur enggau bansa bukai ba serata menua Malaysia.

"Nya alai, kebuah PLKN ditumbuhka endang dikena nyerakupka semua pupu raban bansa di Malaysia awakka sida ulih belajarka adat asal bansa bukai," ku Awang.

Iya madah munyi nya rambau Penemuai Sapit Tuai Direktor JLKN ngagai Kem PLKN Similajau lemai ensana (Hari Dua).

Nangkan ke nya, Awang ngelalau bala pelatih PLKN awakka terus segulai sejalai bebai enggau pangan diri sepanjai nyereta program nya.

"Aku suah nitihka jaku apai aku ke ngajar aku munyi tu : Manah agi ngembuan seribu kaban ari ke ngembuan seiku munsuh.

"Nya alai, aku ngelalau bala wira enggau wirawati patut bekelala enggau mayuh kaban laban pengidup kitai baka tayar seruran beputar lalu bisi maya kitai deka tusah kaban meh palan endur ngenduh," ku iya.

Udah nya, Komandan Kem PLKN Samalaju, Mejar Azahari nyadaka pengaga ati nerima penatai Sapit Tuai Direktor JLKN ngagai kem nya lalu ba maya dudi sida ngarap bisi agi orang datai nemuai ngagai kem nya.

Mua ke lemai, Sapit Tuai Direktor JLKN ngabas Kem Ikhtiar Hidup ke ngundan mayuh utai tumbuh ke diambi ari babas sereta iya depeluang meda panjuk-panjuk ke ditan ba babas.


Nangkan ke nya tuju staf kem ngaga langkau arau ngambika bala pelatih bepeluang meda baka ni chara ngidupka diri ba dalam babas.

Pansik lengkas kebuah baya suah ayan ba Sungai Niah

MESETI DIBURU JAMPAT... Rosey Yunus diuluka Kunselor Sulaiman Ahmad maya ngabas Sungai Niah berindik ari ripot ke pansut ba surat berita senentang baya ke suah ayan (ke diengkelung dalam gambar) ba endur nya.

NIAH (Sepupok) : Orang ke bekuasa meseti mansik kebuah baya suah ayan ba Sungai Niah, sekalika ketegal aktiviti pemansang tauka ketegal pekara bukai.

Udah tu meseti suah matau Sungai Niah ngambika pengelikun mensia mayuh ba semak sungai tejamin, ku Penulung Menteri Pelajar Tumu Nembiak Enggau Pemansang Ruang Bilik Rosey Yunus lebuh ke dirandau pemberita, apin lama ke udah.

“Mensia mayuh ti agi bekenaka kereban pengangkut sungai sereta suah nginti tauka berikan meseti bejimat laban baya nya tau nganu sebarang maya.

“Nya alai, orang ke bekuasa patut mutarka pekara tu enggau lengkas, enti ulih baya tu patut diburu ngagai endur bukai tauka dianjung ngagai taman baya di Miri,” ku Rosey.

Nangkan ke nya, seiku nembiak Sekula Sekondari Nasional (SMK) Suai, Jolias Ugak, 17 lebuh ke dirandau pemberita madah, baya ke suah ayan nya endang ngenakutka mensia mayuh ba endur nya laban lebuh iya lapar diadang tau negam sebarang orang.

“Sebedau tu, aku kala meda baya negam seiku ukui China Kebun.

“Diatu perintah patut jampat mutarka penanggul baya mangah ngambika enda ngachau pengidup mensia mayuh ke suah betengah sungai," ku iya.

Utusan Sarawak dipadahka, baya nya seruran enggai ninggalka pengkalan ke diempu seiku China kebun ba endur nya.

Seiku China kebun ke enggai nama iya dipansut, madahka pasal baya ke suah ayan ba endur nya lalu iya ngarapka semua orang ngemeratka pengelikun  diri lebuh bejalaika sebarang aktiviti ba sungai nya.

“Baya nya dipeda enda nangika mensia ke suah beratika iya, nya alai bala apai indai patut ngajar anak diri empu awakka enda nurun kediri lebuh deka nginti ba sungai nya.

“Orang ke bekuasa patut mutarka pekara tu enggau lengkas, kala mega dipadah ngagai raban penguasa, pia mega pengari rayat nulung madah ngagai orang ke bekuasa ngambika penusah ke nuntung seiku nembiak ke kala ditagup baya ba sungai nya enda nyadi baru," ku iya.

Udah nya, Manin Jasin, beumur lebih kurang 50 taun ari Rumah Panjai Tr. Limbang Saeh madah, baya nya chukup mangah, sebedau sebarang penusah nyadi, manah orang ke bekuasa jampat mindahka baya nya.

Kena 17 Februari 2012 tu tadi, Millie Nueh, 35, ari Rumah PanjaiSigi Batu Niah kala kena tarit baya lebuh iya benung mandi tumu pagi hari.

Millie Nueh benasib amat laban mujur ngelepaska diri, maya iya ke belaban enggau baya kaki iya teindikka mata baya lalu ngujungka baya nya ngeluaka Millie. Beduduk ari penusah nya, indu tu putus tunjuk kaki ketegal kena ketup baya.

SADIA enggau PBB dipinta terus negapka kaul

KE PENGINGAT… Datuk Alexander Nanta (tengah) nyuaka tepa ngagai Kelimbik Sibat lalu dikemataka bala kaban SADIA Kapit ba sebengkah pengerami ke diatur ba Kapit.

KAPIT : Bala kaban Gerempung Dayak Iban Sarawak (SADIA) enggau Parti Pesaka Bumiputera Bersatu (PBB) dipinta terus negapka kaul enggau pangan diri ngambika penyerakup ke udah lama dikembuan nya tau meri penguntung ke sebaka.

Kaban Parlimen Kapit, Datuk Alexander Nanta Linggi madah, enda ngiraka sekalika mensia mayuh ba ditu nyadi kaban SADIA, PBB tauka Serakup Nasional Dayak Sarawak (SDNU), pekara besai ke patut dikemerat iya nya neritka kerejasama ke udah dikembuan kenyau ari suba.

Iya madah munyi nya rambau pengerami beserara ke diatur SADIA Pampang kapit enggau PBB Pampang Pelagus ba ditu kena malam Hari Minggu ke udah.

Pengerami beserara nya dikena ngerami Seketeri SADIA Kapit enggau Tuai Akaun PBB Pampang Pelagus, Kelimbik Sibat. Kelimbik ti lama udah mangku pengawa nyadi Tuai Akaun Majlis Daerah Kapit ditikika pangkat lalu diasuh gawa ba Majlis Daerah Mukah/Dalat mangku pengawa nyadi Penulung Seketeri.

Alexander Nanta madah, pengawa bala staf perintah ke mindah endang udah nitihka atur bala selama awakka sida mayuh agi bulih penemu ke baru sereta ulih ngiring ngembing bala kaban SADIA enggau SDNU ngatur mayuh agi program ke meri penguntung ngagai mensia mayuh.

"Nama-nama aja pangkat ke dipegai kitai, tanggungjawap kitai endang dikena nulung sida. Ba Kapit kitai ngembuan kaul ke terit ari sukut main asal enggau pemesai opis pengeri menau luar, Dr Hasheem Fuda sereta ex Pemesai Opis Pengerai ba menua, Dr Krishnan,” ku iya.

Dulu ari nya, Chairman SADIA Kapit, Edward Manggah Kendawang  madah, Kelimbik seiku Seketeri ke chukup bagas gawa sereta betanggungjawap.

“Kelimbik udah mandangka teladan ke manah lalu pemujur SADIA endang ungkup semua," ku Edward.

Pemesai Pelilih Menua Kapit, Elvis Didit, Sapit Walikota MDK, Jefferson Jamit Unyat, Seketeri Gerempung Graduan Dayak Sarawak, Jona Kerani, Chairman Kelab SERABAN, Narok Ukin, Prinsipal SMK Selirik, Ujai Sambau, Senior Supervisor Kemas, Ambrose Abong Bugek enggau Menija Pampang MayBank Kapit, Johnary Janggau entara temuai ke bisi datai.

Peluang kontraktor bumiputera

MERI PENERANG...Suzaimah Yusuf (dua kiba) benung meri penerang pasal Lesen Opis Servis Kontraktor (PKK) rambau Randau Ngemaruka Lesen Begulai enggau Opis Servis Kontraktor (PKK) enggau Atur Pasal Tender ba Kuching. Bela bisi dipeda Sapit Presiden DCCI, Dato Sri Celestine Ujang Jilan (dua kanan).

"Kontraktor bumiputera Dayak diatu dipeda chukup bebendar nulung perintah ngamatka agenda pemansang menua. Bala kontraktor mega bisi ngembuan lesen ke setipak enggau tender ke disediaka perintah lalu projek nya endang ulih ditangkup sida."
Dato Sri Celestine Ujang ak Jilan
Sapit Presiden DCCI


KUCHING : Perintah dikarapka ulih meri peluang ngagai bala kontraktor Dayak bumiputera ngulihka tender projek infrastruktur enggau servis perintah baka ba sekula kelebih agi ba menua pesisir.

Sapit Presiden Gerempung Dagang enggau Industri Dayak (DCCI) Dato Sri Celestine Ujang anak Jilan madah, peluang ke baka nya manah amat ngambika bala kontraktor Dayak ulih nulung perintah ngemansangka menua tu.

"Kontraktor bumiputera Dayak diatu dipeda chukup bebendar nulung perintah ngamatka agenda pemansang menua.

"Bala kontraktor mega bisi ngembuan lesen ke setipak enggau tender ke disediaka perintah lalu projek nya endang ulih ditangkup sida," ku iya.

Nya alai, berindik ari pengulih enggau peneleba bala kontraktor Dayak ke maya hari tu endang enda ulih dipetenah laban DCCI udah nyediaka mayuh program pemansang ungkup sida (kontraktor) baka seminar, cheramah enggau randau dikena nerangka ngagai sida penemu ke baru enggau mayuh macham ajar ke besangkut paut.

"Program-program ke baka nya diatur dikena nulung bala kontraktor Dayak ngulihka tendar projek ba pengawa dagang enggau industri dikena ngangkatka penatai pemisi raban bansa Dayak," ku iya.

Iya madah munyi nya rambau Randau Ngemaruka Lesen Begulai enggau Opis Servis Kontraktor (PKK) enggau Atur Pasal Tender ba sebengkah hotel tebilang ba ditu, kemari (Hari Tiga).

Nangkan ke nya, Celestine madah, bala kontraktor Dayak meseti landik ngulihka peluang dagang sereta berani besemekih ba tikas dunya ngambika sida enda tinggal dalam agenda pemansang menua.

"Beduduk ari nya, kita (bala kontraktor) meseti nyikap diri enggau mayuh penemu ke baru sereta seruran bernunding panjai.

"Nya alai, randau ke diatur sehari tu meri penerang ngagai bala chara ngemaruka lesen PKK ke udah bisi lalu ngerijista iya baru ba PKK. Ngena lesen ke bisi nya, bala kontraktor Dayak tau bulih penguntung sereta bepeluang nangkup mayuh tendar besai ke bisi disediaka perintah menua," ku iya

Pengawa randau nya digulu lebih kurang 30 raban kontraktor Dayak lalu orang ke nyadi tuai randau iya Penulung Direktor Negeri 1 PKK Sarawak, Suzaimah Yusuf ari PPK.

Suzaimah madah, berengkah 15 haribulan Oktober tu perintah ngepunka "Sistem Satu Pendaftaran Kontraktor" ungkup bala kontraktor lalu nengah sistem nya lesen kontraktor iya ke lama automatik diketu lalu meseti ditukar enggau "Sijil Perolehan Kerja Kerajaan" (SPKK).

Iya madah, SPKK ulih dipinta ari Opis Pemansang Industri Berumah Malaysia (CIDB), udah nya baru PPK ngemendarka setipikit nya diberi status kontraktor bumiputera.

"Nya alai, kontraktor Kelas 1-4 enggau Gred A-F ke udah bisi status bumiputera, sida automatik bulih SPKK," ku iya.

Berebak enggau nya iya madah, PKK bisi nyediaka kus-kus teknikal enggau pasal menua ungkup bala kontraktor dikena nempa pengelandik sida ngatur pengawa.

Nengah kus ke baka nya, bala kontraktor deka diberi point awak ngemuntangka sida ngemaruka lesen ba CIDB, ku Suzaimah.

Tuai Akaun Gerempung Dagang enggau Industri Dayak, Allan Keripin Ningkai bela bisi enggau ngemataka pengawa randau nya.

































 

Orang dagang diperansang nyereta MR1M

PEMAKAI 1 MALAYSIA...Datuk Rohani diuluka mensia mayuh nandang tanda 1Malaysia lalu megai pemakai MR1M ke dipenyadi iya ba Kantin Opis Perintah Besai, Opis Sultan Iskandar, Jalai Simpang Tiga ba Kuching. Bela bisi dipeda Datuk MD Yahaya bin Basimin, Wan Ahmad Uzir bin Hj. Wan Sulaiman enggau Surini binti Sulaiman.

KUCHING : Opis Menteri Dagang Dalam Nengeri, Koperasi Enggau Pengguna (KPDNKK) terus meransang mayuh agi orang dagang kedai makai di nengeri tu nyereta Program Pemakai Rayat 1Malaysia (MR1M).

Sapit Menteri Dagang Dalam Nengeri, Koperasi Enggau Pengguna Datuk Hajah Rohani madah, tuju program MR1M dikerembai awakka ulih nulung rayat bekelimatka belanja berindik ari rega barang ke majak niki ke maya hari tu.

"Tu mandangka penyinu perintah ngagai rayat kelebih agi ngagai sida ke bekereja laban penyuntuk masa ngujungka sida berumban nurun gawa enggau lalu enda sempat nyumai ba rumah," ku iya.

Datuk Rohani madah munyi nya rambau bejadi Program Menu Rayat 1Malaysia ke diatur ba Kantin Opis Perintah Besai, Opis Sultan Iskandar, Jalai Simpang Tiga ba ditu kemari (Hari Dua).

Orang dagang ke nyereta MR1M ba nengeri tu, ku Rohani ulih nyediaka bansa pemakai nitihka pengelandik orang ke bempu kedai nya empu. Taja pia, rega ke diletak sida ungkup ngirup pagi meseti RM2.50 tauka kurang lalu rega pemakai merarau meseti RM5.00 tauka kurang agi.

"Juluk ati perintah iya nya deka meda 3000 buah kedai nyereta MR1M ba serata menua nyentuk ngagai bulan Disember taun tu.

"Naka ke diatu bisi 2629 buah kedai ba serata menua bisi nyereta MR1M, lalu kitai ba Sarawak bisi 163 buah.

"Sebengkah palan ke pemadu mayuh muka kedai MR1M ba nengeri tu iya nya ba Universiti Malaysia Sarawak (UNIMAS) ke bisi muka 23 buah dikemujurka bala pelajar empu," ku iya.

Program MR1M tu tebuka ngagai semua orang ke bisi muka kedai makai, kedai kopi, restauran enggau kiosk. Semua peminta bekaul enggau program tu ulih diatur ba Opis Dagang Dalam Nengeri, Koperasi Enggau Pengguna (PPDNKK Nengeri).

Sida ke nyereta progra deka diberi baner enggau poster lalu sida meseti nandang iya ba mua kedai sida.

Kelimpah ari nya, orang ke bisi nyereta program tu meseti ngerintaika bansa pemakai ke bisi disedia ba kedai sida. Pengawa dagang sida deka diperesa sebarang maya.

Penguntung naggai orang ke nyereta program MR1M iya nya dagang sida bepeluang dilakuka nengah ruai siber laban nama sida deka dipasukka ba laman web www.1pengguna.com.

Sama bisi datai rambau pengawa tu Seketeri Perintah Sarawak Datuk MD Yahaya bin Basimin, Direktor PDNKK Sarawak Wan Ahmad Uzir bin Hj. Wan Sulaiman, Tauke Kantin Surini binti Sulaiman enggau bala tauke kedai makai ke bukai.

Rumah Kiling, Lidong bulih lon rumah RM280,000

NULUNG KITA...Harden nyuaka surat pemendar lon rumah panjai ngagai Tr Kiling lalu dikemataka Rayong enggau Nyalau rambau Pengerami Tuai Begulai Enggau Rayat ba Lidong, Engkilili.

ENGKILILI : Opis Menteri Pengawa Berumah bisi ngemendarka lon RM280,000 ungkup Rumah Kiling, Buyong Panjai, Lidong, Engkilili, apin lama ke udah.

Penulung Menteri Pengawa Berumah, Datuk Francis Harden Hollis madah, tuju loan nya diberi dikena nulung 28 pintu ruang bilik ba rumah panjai Buyong Panjai di Lidong nya ngentak rumah baru.

“Rumah Kiling udah kala angus lalu ngujungka semua sida serumah idup chukup seranta jam ke diatu.

“Nya alai, genap pintu ruang bilik ba Rumah Kiling bisi diberi lon RM10,000 ke dibelika barang dikena ngaga rumah baka semen, kayu, atap enggau perengka guna ke bukai,” ku iya.

Harden madah munyi nya rambau bejadi Pengerami Tuai Begulai Enggau Rayat sereta Pengawa Nyuaka Lon Dikena Ngaga Rumah Rumah ke diatur ba Rumah Kiling, Buyong Panjai, Engkililili, apin lama ke udah.

Kelimpah ari nya, iya madah pekara nya nandaka perintah Barisan Nasional (BN) endang beamat-amat ngemeratka pengidup rayat ba rumah panjai di nengeri tu.

“Kelimpah ari nya, BN endang ngembuan pengulih ngereja pengawa ke baka nya enti dibanding enggau raban penyakal ke semina landik bejaku sereta bejai polisi perintah ba mua rayat.

“Nya alai, aku ngarapka kita rayat kelebih agi ke diau ba menua pesisir meseti tegap nitihka perintah BN awakka pengelantang pengidup kita seruran dijaga sepanjai maya,”ku iya.

Sama bisi datai rambau pengerami tu Kaban Parlimen Lubok Antu, William Nyalau Badak, Kaban Kunsil Negeri (ADUN) Engkilili, Dr Johnnical Rayong Ngipa enggau bala pemesai ari opis menteri pengawa berumah Sarawak .

Anang meleka ari BN - Rayong

KE PENGINGAT...Rayong (tengah) enggau Nyalau (kiri) begambar begulai enggau bala temuai dipebasa ke bukai ba Rumah Janggin, Lidong sebedau Pengerami Begulai Enggau Tuai BN ba endur nya.

ENGKILILI : Rayat terus ditangkan ngambika enda nyukung pengari parti penyakal ke nguji deka nukar pengari rayat Barisan Nasional (BN) ke ngarika kerusi Kunsil Negeri (DUN) maya pengawa bepilih besai ke deka datai.

Kebuah pia laban pemanah pengawa ke deka dikereja pengari rayat parti penyakal nya bedau temu sebaka enggau pemanah pengawa ke kala digaga pengari rayat BN ngelama tu, ku ADUN Engkilili, Dr Johnnical Rayong Ngipa.

“Tambah mega, pemansang rayat empu empai dijamin sekalika pengari rayat ari parti penyakal ke diundi sida nya ulih mai ubah ke manah tauka enda.

“Nya alai, anang meleka ari BN. Jalai pemansang entara rayat enggau perintah endang semina nengah pengari rayat BN ke udah diundi rayat ba genap kali pengawa bepilih besai ba menua tu," ku iya.

Iya madah munyi nya rambau Pengerami Begulai Enggau Tuai BN ke diatur ba Rumah Janggin, Kejemut, Lidong Engkilili ensana (Hari Satu).

Kelimpah ari nya, rayat ba menua pesisir ku Rayong patut terus nyukung perintah BN laban agi mayuh program pemansang benung diperambu sereta deka digaga ba kandang menua tu jemah.

“Ulah ke nyukung penyakal semina ngujungka pemansang perintah tejanggal...nya alai, aku ngarapka rayat badu kiruhka penyakal awakka BN nyamai ngatur pemansang udah tu," ku iya.

Pengerami nya dipenyadi Kaban Parlimen Lubok Antu, William Nyalau Badak lalu berebak enggau nya mega Rayong madahka tulung agih belanja RM10,000 ungkup JKKK Rumah Janggin enggau RM3,000 ungkup gerempung indu ba rumah panjai nya.

Pekit Nginti Seborneo nyadi aktiviti ninting taun

UNTUNG AMAT…Awang Damit begambar enggau bala pemenang pekit nginti ke diatur ba Kampung Dato Kuala Lawas.

LAWAS : Pekit nginti Tebuka Lawas Kampung Dato Kuala Lawas ke terubah iya diatur taun tu deka diangkat nyadi Pekit Nginti SeBorneo sereta nyadi aktiviti ninting taun.

Tu berindik ari sukung ari bala orang ke rindu nginti ngemenuhka tanah laman Masjid Dato Haji Pengiran Matussin rambau program nya diatur.

Kira 120 iku peserta bisi ngambi bagi ba pekit nginti ke diatur nya.

Beduduk ari nya, chairman pengatur pengawa, Awang Damit Ali Hasan arap bendar program ke baka nya nerima sukung bala kaban ari Sabah enggau Brunei.

Pekit nya diatur Kelab Bestari Pemuda Kampung Dato, Kuala Lawas lalu orang ke mujur nyadi champion iya nya Harun Rumbia lalu iya nerima perais duit RM1,000.00 besereta enggau pekakas ke nginti chap Shinamo.

Orang ke bulih lumur dua, Rahim Kudi nerima perais duit RM800,00 besereta pekakas kena nginti chap ke sebaka lalu ditangkanka Awangku Putra bulih lumur tiga nerima perais RM600,00 sereta enggau pekakas kena nginti.

Orang ke bulih lumur empat ngagai lumur sepuluh nerima perais pekakas kena nginti chap Shinamo enggau Europro.

Bela diatur beserimbai enggau aktiviti tu iya nya pekit nyumai enggau pekit karaoke ke bela bisi nerima perais ari komiti pengatur pengawa.

Sama bisi datai rambau nyuaka perais ngagai bala pemenang iya nya Pemesai Pelilih Menua Lawas, Abdul Malek, Pengulu Ali Hasan Durahman enggau Pengulu Haji Hasan Pilus.

Orang ke menang ba pekit nyumai bela nerima perais ti disuaka bini chairman pengatur pengawa iya nya Puan Norpah Awang Akip.

Snowdan neladan pemujur apai iya

Snowdan Lawan

 KUCHING : Ukai semina landik ngereja pengawa politik tang iya mega bebendar ngemansangka diri ba pengawa dagang sereta aktif dalam aktiviti sosial baka ngemansangka pelajar bala anembiak ba kandang menua ke dikuasa iya.

Kaban Kunsil Negeri (ADUN) Balai Ringin, Snowdan Lawan madah, dagang ke dikembuan sida iya sebilik diatu asil ari pengeransing pengawa ke dikereja apai iya, Donald Lawan.

"Apai aku seiku orang ke nyadika chunto dalam pengidup aku. Iya seiku orang ke kala megai pengawa ba perintah sebedau ke ngemaduka diri maya taun 1970-an lalu udha nya iya ngemunka diri ba pengawa dagang. Iya seiku orang ke panjai runding lalu beratika pengidup kami sebilik ungkup 10 taun ke deka datai," ku iya.

Terubah suba, iya semina nyual van Toyota ungkup mai sayur lalu tiga buah kerita ke bukai. Iya bulih pemendar enggau lesen import (AP) ari Opis Menteri Dagang Entarabansa enggau Industri (MITI) kira 70 peratus ba taun 1980-an.

Ketegal ngembuan rikod ke manah ba pengawa dagang nyual kerita dalam kandang 10 bulan, udah nya, raban MITI meri AP ngagai penyampau ke mayuh agi nyentuk ke diatu.

Dalam timpuh 30 taun, M&D World of Cars Sendirian Berhad (Sdn. Bhd) enggau MD Motors Sdn. Bhd terus bulih pengarap ari raban MITI nyual kerita import. Bisi tiga buah bilik eksibisyen kompeni tu ba Kuching nyengkaum Proton, dua ba Kuala Lumpur (Klang Lama enggau Jalai Kuching), lalu siti ba Johor enggau Melaka.

"Ba pengawa ngerembaika dagang tu, kami merambu deka bekerejasama enggau raban Perodua ke deka muka pampang kompeni ba Pulau Pinang jenggau ba Kota Kinabalu," ku Snowdan.

Ba pemansang ke sebaka, sida Lawan sebilik mega bisi beranakka puku dalam bidang hartanah ngena nama kompeni ke dikumbai M&D Enterprise Sdn. Bhd.

"Apai aku ngempu tanah ke deka dikemansang nyadi taba endur berumah lalu bulih lon ari Bank Pemansang ke dikumbai SME Bank. Mayuh pekara deka diadu iya nya ngiga raban pekereja baka arkitek enggau perengka guna ari kontraktor," ku iya.

Iya madah, rumah nya dijual ngagai kaban belayan enggau rega patut lalu projek M&D Enterprise Sdn. Bhd terus mansang ngerembai laban besangkut paut enggau prjoek ngaga rumah ba Taman Sukma di Petra Jaya.

Nya alai, projek ngaga rumah ba Merdang Jaya, Kota Samarahan entara projek ke pemadu besai kompeni nya kelimpah ke benung ngemansangka proses muka Kompleks Bebelika Barang empat tingkat enggau hotel 11 tingkat ba Jalai Wan Alwi.

Kelimpah ari nya, sida Lawan sebilik bisi beranakka puku dalam bidang nyediaka pemakai ke dikumbai Supreme Chicken Restauran iya nya pemakai ti belaukka manuk.

"Kami bisi tiga pampang restauran ba Kuching iya nya ba Matang, Tabuan engggau ba Batu 3. Kami mega merambu deka nukar nama restauran tu ngagai One Stop Cafe laban bisi nyediaka mayuh bengkah pemakai ke bukai kelimpah asi manuk," ku iya.

Ba bidang ngemansutka bup bacha, sida Lawan sebilik ngemansutka bup ke dikumbai Buletin Kenyalang lalu bup tu dichelak sekali sebulan enggau penyampau 10 ribu iti. Tuju iya dikena ngemansangka Jaku Iban sereta berandauka mayuh isu.

"Kami ngembuan editor enggau pemberita ke diri empu endur ngiga berita. Buletin tu disadung sereta dijual ba menua pesisir lalu tuju iya dikena meri penerang ngagai mensia mayuh," ku iya.

Kelimpah ari nya, menyadi indu Snowdan bisi numbuhka dua buah taska ke dikumbai Smart Kids' Learning House ba Matang enggau ba Batu 9.

Ba pemansang ke sebaka mega, 60 peratus awak iya dikena bejalaika tanggung pengawa politik, udah nya, 40 peratus dikena ngereja pengawa dagang.

"Aku ulih ngereja pengawa politik enggau dagang lalu ba maya ke sebaka mega aku ulih ngelala mayuh orang tang kami sebilik tetap dikingatka aku belama. Kami sebilik udah nemu aku endang diempu mensia mayuh ke nguan menua Balai Ringin," ku Snowdan.

Ba pengawa deka ngemansangka pengidup diri, Snowdan enda kala ninggalka tanggungjawap nyadi pengari rayat enggau nyadi seiku orang dagang.

Tabung PelajarSnowdan Lawan ditumbuh dikena mantu bala anembiak ke nyulut dalam peresa perintah dalam kandang menua ke dikuasa iya.

"Kami mega bisi meri bantu ngagai gerempung bukai baka PERYATIM lalu tabung pelajar tu ditumbuh dikena meransang bala anembiak ba kandang menua Balai Ringin terus ngeransing diri belajar. Agih belanja dalam tabung tu endang ari kompeni kami empu," ku Snowdan.

Rayat dilalau ngemeratka pengerai

JAGA PENGERAI...Dato' Sri Micheal Mayin anak Jawong (dua kanan) ngabas booth eksibisyen ke bisi dibuka beserimbai enggau Karnival Neresa Pengerai Begulai Enggau Mensia Mayuh peringkat Samarahan ke diatur semak Palan Parkir Kerita, Mua KFC, Pasar Samarahan.

KOTA SAMARAHAN : Rayat di menua tu dilalau ngambika terus likun enggau pengerai batang tubuh awakka ulih nulung perintah menua ngamatka agenda pemansang nyadi menua maju maya taun 2020.

Menteri Pemansang Infrastruktur enggau Penyambung Dato' Sri Micheal Mayin anak Jawong madah, enti deka nulung perintah ngamatka agenda pemansang menua, rayat meseti likun enggau pengerai diri kelebih agi ba pengerai batang tubuh.

Kebuah pia, enti kitai (rayat) nyau bepemedis mayuh ungkus dikena berubat ngidupka diri, nya alai jaga manah pengerai diri awakka belanja nya ulih disimpan lalu nadai tebasau kini-kini, ku iya.

Iya madah munyi nya rambau bejadi Karnival Neresa Pengerai Begulai Enggau Mensia Mayuh peringkat Samarahan ke diatur semak Palan Parkir Kerita, Mua KFC di Pasar Samarahan kemari (Hari Enam).

"Kita (rayat) ukai semina ulih nulung perintah ari sukut pemintar runding tang mega nengah tubuh ke bepengerai kita ulih ngereja mayuh aktiviti," ku iya.

Berebak enggau nya Manyin muji program ke diatur Opis Pengerai Menua nya laban bisi ngatur mayuh aktiviti nyengkaum semua tikas umur bepun ari sida ke nembiak nyentuk ngagai sida ke besai tuai.

Entara aktiviti ke bisi diatur iya nya kimpin media pengerai, info pengerai ngena chara on-line ba laman web Myhealth enggau Infosihat, program pengerai begulai enggau ketuai, program Doktor Biak ba sekula primari enggau PROSTAR ba sekula sekondari, program Siswa Sihat, COMBI Cara Sihat, cheramah-cheramah pasal pengerai ba hospital enggau mayuh agi ke bukai.

Dulu ari nya, Sapit Direktor Opis Pengerai Nengeri Sarawak Puan Marziah Suhaili madah, bisi 88 bengkah Karnival Neresa Pengerai diatur ba serata menua ungkup taun tu lalu ba nengeri tu bisi lapan bengkah endur udah dipilih.

Sebedau tu, program tu bisi kala diatur ba Kuching enggau ba Sri Aman lalu diatu ba Samarahan seretai enggau ba menua Mukah enggau Kapit.

Tuju program karnival nya diatur, ku Marziah dikena meri penerang ngaga mensia senentang daya idup ke bepengerai baka Pemakai Ke Pengerai, Aktiviti Ke Manah Ungkup Tubuh, Ngatur Runding Ke Posiitf, Kimpin Enggau Nginsap, Chara Nagang Penyakit Enda Berampit, Chara Nagang Penyakit Nyamuk, Chara Nagang HIV/AIDS, Chara Nagang Riman Serviks enggau Chara Nagang Penyakit Tibi.

Bereserimbai enggau program nya, Manyin diberi basa nyuaka tulung bangku ruda ngagai lima iku penerima ari Opis Pengerai Negeri Sarawak.

Sama bisi datai iya nya Pemesai Opis Pengerai Samarahan ti mega nyadi Chairman Pengatur Program Dr. Julaidah binti Sharip, Pemesai-Pemesai Senior Opis Pengerai Nengeri Sarawak enggau Perintah Besai, Tuai-Tuai Gerempung Ukai Perintah, Tuai-Tuai Raban Bansa sereta mensia mayuh ke semak menua nya.