DCCI meransang Dayak ransing bedagang

KUCHING : Dayak Chamber of Commerce & Industry (DCCI) meransang raban bansa Dayak bebendar sereta ngeransing diri ba pengawa dagang setipak enggau ubah pemansang ke maya hari.

Presiden iya, Datuk Amar Tan Sri Leo Moggie madah, bansa Dayak patut landik ngambi nama-nama aja peluang ba pengawa dagang ke bisi disediaka perintah ke maya hari tu baka ba Koridor Renewable Energy Sarawak (SCORE) awakka pemujur ari bala Dayak nya jemah ulih nyadika chunto.

"Mayuh bengkah industri tauka pengawa dagang ke ulih nyungkak penatai pemisi kitai (Dayak) baka ba pengawa betanam betupi, betanamka utai tumbuh baka getah, sawit, lada enggau mayuh ke bukai.

"Kitai bansa anang malu ngepunka diri ba pengawa dagang ke mit-mit taja ukai asal peturun orang ba pengawa dagang, mupuk meh belubah napi peluang ke bisi lalu enda ibuh berumban nangkup projek ke bebesai," ku iya.

Iya madah munyi nya beserimbai enggau pengawa Randau Begulai Enggau Kaban Baru DCCI ke diatur ba sebengkah hotel tebilang ba ditu, malam ensana (Hari Lima).

Lebih kurang 30 iku kaban baru DCCI bisi ngulu pengawa randau ke diatur dalam pengelama dua jam bepun pukul 7.00 lemai. Tuju randau nya diatur dikena bekunsika penemu senentang ngemansangka diri ba pengawa dagang ari bala kaban baru DCCI.

DCCI udah ditumbuh kena 11 Januari 2003 lalu tuju penumbuh iya dikena meransang raban bansa Dayak ngembuan penau, penemu enggau pengelandik ba pengawa dagang enggau industri.

Sama bisi datai Sapit Menteri Pemadah enggau Main Asal Menua Datuk Joseph Salang Gandum, dua iku Sapit Presiden DCCI, iya nya Datuk Amar Tan Sri Leonard Linggi Jugah enggau Dato' Sri Celestine Ujang sereta bala kaban DCCI ke bukai.

Penyakal nadai agenda ngempung rayat

KE PENGINGAT… Dato’ Mukhriz (baju burak) begambar begulai enggau Dato’ Jacob Dungau Sagan sereta enggau raban RELA ari Long San ke bela bisi datai ba sebengkah pengerami ke diatur ba sebuah kampung Penan Long Sayan.

MULU : Rayat ke nguan menua ba sitak Parlimen Baram ditangkan ngambika enda mudah alah laban danji penyakal ke nguji deka nguingka rundingka sida ari ke ngundi Barisan Nasional (BN) ba pengawa bepilih besai ke -13 tu ila.

Sapit  Menteri Dagang Entarabansa enggau Industri Dato’ Mukhriz Tun Dr Mahathir madah munyi nya rambau Pengerai Tuai Begulai Enggau Rayat ba Kampung Long Sayan, ditu apin lama ke udah.

Mukhriz, ti mega nyadi Kaban Parlimen (MP) Jerlun ba Kedah, madah orang ba Kedah diatu baru nemu diri kena tipu laban perintah nengeri Kedah ke merintah menua nya diatu enda mujur ngamatka danji sida ngagai rayat.

“Rayat Kedah alah umbuk Pakatan Rayat (PR) maya pengawa bepilih besai 2008 ke nguji minta diri sepenggal merintah.

"Pengudah empat taun lapan bulan megai menua Kedah rayat langsung nadai nerima nama-nama pemansang ari PR.

“Taja baka nya, penyakal berani ngumbai diri udah ngaga 80.7 peratus pemansang ke kala disemaya ngagai rayat ba Kedah," ku iya.

Taja pan enda ulih ngamatka danji sida, diatu PR agi minta rayat Kedah meri sida peluang sekali baru merintah menua nya nengah pengawa bepilih besai ke-13 ke deka datai tu, ku iya.

Mukhriz ngelalau rayat raban Penan enda ibuh irau ati laban perintah BN enda kala ngemeluka pengidup sida taja pan penyamapu sida nadai mayuh nguan menua tu.

Iya mada, BN ngembuan rikod ke chukup manah merintah menua kenyau udah medeka.

Raban penyakal dipeda tebal besaup enggau gerempung ukai perintah (NGO) endur ngemujurka jukuk ati sida mambarka pengidup rayat, agenda sida ukai ngempung pengidup rayat nuju pekara ke meruan, ku iya.

Iya mega ngelalau rayat ngambika enda mudah alah mendingka jaku selebubu ari Radio Free Sarawak (RFS) ke enda temu endur pengkalan sereta orang ke gawa ba stesyen radio nya.

“Taja pia, nyangka rayat enda nemu ari ni penatai sida? Nya alai, enda patut rayat enda pecahya ngagai BN ke udah ditemu ulu ili lalu udah mai mayuh pemansang ngagai menua," ku iya.

Chara ke dikena Radio Free Sarawak nadai bida enggau chara ke dikena raban Komunis rambau menua siga kelia, ku Mukhriz.

Bela bisi mansutka penemu rambau pengerami tu iya nya MP Baram Dato’ Jacob Dungau Sagan, Tuai Raban Bansa Penan Sarawak Temenggong Datuk Hassan Sui, Tuai Raban Bansa Orang Ulu Miri Temenggong Pahang Ding, Tuai Raban Bansa Kenyah Long San Pengulu Paul Kalang, Tuai Kampung Long San Ajang Kiew enggau Pemesai Pengatur Pengawa  Sarawak (SAO) Long Lama Louis Michael Balau.

Penyulut akademik nadai nyamin bulih kereja

KOTA SAMARAHAN : Penyulut akademik nadai nyamin muntang bulih kereja tang berindik ari pengeransing diri empu.

"Penyulut akademik semina dikena ngepunka pejalai tang pemujur iya jemah balat bepanggai ba pemintar seiku-seiku.

"Nya alai, anang kelalu gaga meda diri bisi pemandai tang meseti landik ngenampakka diri lebuh nguji minta pengawa.

Sapit Penulung Chanselor Pekara Pelajar enggau Alumni UNIMAS,  Profesor Mohd Fadzil Abdul Rahman madah munyi nya rambau Pengerami Nyuaka Perais Gelar  ZECON ungkup bala pelajar Fakulti Enjinir Universiti Malaysia Sarawak (UNIMAS) kena lemai Hari Tiga tu tadi.

Iya madah, bala pelajar patut nyikap diri enggau mayuh bengkah pemandai ngambika ulih ngereja semua pengawa enggau manah.

"Enti udah teleba ngereja pengawa, chukup nyamai ngereja sebarang pengawa ke diasuh orang.

"Berindik ari nya, kitai deka dipebasaka orang bukai, ukai semina dipuji pengaji tang mega mensia mayuh.

"Nya alai, kitai patut deka ngereja sebarang pengawa enggau ati ke tebuka sereta meseti bebendar ngereja iya," ku iya.

Profesor Mod Fadzil mega ngelalau bala pelajar awakka enda ngeninggika diri pengudah bulih gelar graduan ari universiti menua tu.

"Kebendar iya nadai bida entara graduan dalam menua enggau graduan ari menua luar laban pengaji semina beratika kualiti sida lebuh ngereja pengawa.

"Kitai patut mandangka kualiti kereja laban nya nandaka pengulih seiku-seiku orang.

"Nama meh reti ngembuan setipikit pelajar tinggi ari menua luar enti enda landik ngereja pengawa setipak enggau batang pengawa ke diberi.

"Nya alai, anang malu nyema kita ngembuan setipikit ari universiti dalam menua.

"Tebal agi orang ke mega tanggung pengawa ke bebesai diatu endang pansut ari universiti dalam menua lalu kualitit kereja sida mega dipeda chukup manah," ku iya.

Pengawa kompeni meresi babas di Santubong diasuh ngetu

BAU : Sebuah kompeni ke bejalaika tanggung pengawa meresi babas ba Santubong dipinta  Opis Tanah enggau Sukat  Sarawak ngetuka pengawa sida nya.
   
Menteri Perambu Sumber enggau Rampa Menua Kedua, Datuk Amar Awang Tengah Ali Hassan udah ngamatka pekara nya lalu madah raban sida ke bekuasa udah dianjung ngelawa genturung endur nya.

"Kami udah ngasuh Opis Tanah enggau Ukur ngelawa endur nya awakka nagang kompeni nya neruska pengawa sida," ku iya madah ngagai pemberita pengudah bejadi skim bekal elektrikmenua pesisir ungkup lima buah kampung ba Bau.
   
Iya madah munyi nya lebuh ke dipinta meri penemu bekaul enggau ripot sebengkah surat kabar dalam menua ke bisi ngenang pasal pengawa meresi babas nya dikereja sebuah kompeni swasta dikena ngaga projek kerita kabel.
   
"Sida (kompeni) bisi madah ngagai kami senentang projek nya tang sida patut nganti pemendar ari orang ke lebih bekuasa endur netapka atur," ku iya.

Penusah bebadi jalai raya ketegal ulah diri empu

BERI PUJI...Felicia benung nyuaka perais ngagai seiku nembiak lalu dikemataka (ari kanan) Jasme, Ismawie, Mujah enggau Kunsilor Shia rambau Pekit Pejalai Shell ke diatur ba Taman Lalulintas MDSA.

SRI AMAN : Kira 65 peratus kebuah penusah bebadi nyadi ba menua tu beduduk ari ulah mensia empu, ku Sapit  Residen (Sosial) Sri Aman iya nya Felicia Tan Yian Hua.

Iya madah entara ulah mensia ke ngujungka penusah bebadi tu baka begaut, enda bejimat, enda tan ati enggau mayuh agi ke bukai lebuh ke benung deriba ba jalai raya.

“Udah nya, 27 peratus ari kebuah penusah nyadi ketegal gaya jalai raya ke lichau pengudah hari ujan enggau mayuh agi ke bukai.

“Nya alai, aku ngelalau bala penguna jalai raya meseti likun enggau diri empu ngambi ulih nyeliahka penusah bebadi tu nyadi," ku iya.

Iya madah munyi nya rambau bejadi Pekit Pejalai Shell (STG) 2012 ke diatur ba  Taman Lalulintas Awam, Majlis Daerah Sri Aman (MDSA), apin lama ke udah.

Nangkan ke nya, Menija Wilayah Sarawak Shell Timur, Jasme Mohd Johan madah, STG sebengkah program ke diatur dikena meransang sereta ngajar bala penguna ngambika bejimat lebuh betengahka jalai raya.

“Kami (Shell) rindu ngatur program ke disukung mensia mayuh sereta ulih ngajar raban pesereta pasal pengelikun," ku iya.

Iya mega madah bisi 3,000 iku pelajar di Sarawak dipelaba deka nyereta STG ba taun 2012 lalu penyampau semua pelajar ba sereta menua Malaysia ke kala nyereta pekit tu bisi 20,000 iku.

Dulu ari nya, kira 85 nembiak ari lima buah sekula di Sri Aman bisi ngambi bagi dalam pekit ke diatur iya nya SJK Chung Hua Simanggang, SK Saint Lawrence, SMK Sri Aman, SMK Simanggang enggau SMK Saint Luke.

Pekit Pejalai Shell 2012 berengkah pukul 8.15 pagi ngagai 10.30 paginya diatur Sarawak Shell Berhad begulai enggau Opis Pengelikun Jalai Raya Sarawak enggau Majlis Daerah Sri Aman.

Sama bisi datai iya nya Pemesai Opis Pelilih Menua Sri Aman, Ismawie Salleh, Seketeri Majlis Daerah Sri Aman (MDSA), Nelson Mujah Girie enggau pengari Walikota Sri Aman, Kunselor Shia Bik Ju.

Tuai Rumah diperansang suah ngelawa opis perintah

DIPENYADI...Mong (lima kanan) bejadi bekal ai paip ari Opis Kereja Raya (JKR) ba Rumah Howell, Entulang Pra, Sri Aman lalu dikemataka bala pemesai opis perintah enggau bala tuai rumah ba endur nya.

SRI AMAN : Bala Tuai Rumah ari menua pesisir ba Sri Aman diperansang ngambika suah agi ngelawa opis-opis perintah udah tu, ku Penulung Menteri Batanam Betupi Moden, Datuk Mong Dagang.

Mong madah, tuju pekara nya patut digaga baka nya ngambika bala Tuai Rumah ulih nemu nama-nama program tauka projek ke ulih dipinta ungkup rayat ba rumah panjai.

“Perintah nengah opis iya seruran nyediaka mayuh program enggau projek baka ba sukut betanam betupi, sosial, bedagang mit enggau mayuh agi ke bukai ungkup rayat ba serata nengeri.

“Pekara nya tepulai ngagai Tuai Rumah empu sekalika deka betanya enggau opis perintah nama bansa program ke ulih dipinta sida ungkup rayat rumah panjai," ku iya.

Iya madah munyi nya rambau Pengerami Tuai Begulai Enggau Rayat Sereta Bejadi Ai Paip JKR ba Rumah Howell Kendawang, Entulang Pra, Sri Aman ensana (Hari Tiga).

Kelimpah ari nya, Mong ti mega nyadi Kaban Kunsil Nengeri (ADUN) Bukit Begunan ngelalau rayat ke dijaga iya bela nyukung Masir Kujat ti deka nyadi chalon bediri ba kerusi Parlimen Sri Aman ba pengawa bepilih besai ke deka datai tu ila.

“Pemujur iya ke nyadi chalon Barisan Nasional (BN) beguna amat ngambika pemansang ke benung digaga ba Sri Aman diatur terus ditampung," ku iya.

Iya mega madah, ngagai bujang dara ke beumur entara 21 taun ngagai  40 taun patut ngerijista diri awakka ulih Bantu Rayat 1 Malaysia 2.0 nyema sida empai ngerijista diri.

Sama bisi datai iya nya Seketeri Opis Pelilih Menua Sri Aman, Nelson Mujah Girie, Penulung Enjinir Opis Entali Ai  Sri Aman Henry Tuah, Penulung Senior  JASA Bukit Begunan, Jesi Bintoh enggau bala tuai rumah ba endur nya.

Perintah bebendar meri pemansang

"Semua projek pemansang ke deka digaga nya endang dulu dipansik enggau silik ngambika ulih mujur dipenyadi."
Datuk Amar Haji Awang Tengah Ali Hasan Menteri Rengka Rama enggau Menteri Pemansang Industri


BAU : Perintah seruran bebendar ngemansangka pengidup rayat ke diau ba menua pesisir di nengeri tu nengah mayuh bengakah program pemansang ke diatur.

Kebuah pia, laban perintah deka meda pengidup rayat ba nengeri tu enda tinggal ari sebarang pemansang ke udah dilanggur.

Menteri Rengka Rama enggau Menteri Pemansang Industri Sarawak, Datuk Amar Haji Awang Tengah Ali Hasan madah munyi nya rambau bejadi Projek Bekal Elektrik Menua Pesisir (BELB) ke diatur ba Dewan Masyarakat Krokong ba ditu kemari (Hari Lima).

Iya madah, perintah seruran ngemeratka penanggul rayat kelebih agi bekaul enggau sukut pemansang menua pesisir.

"Nya alai, rayat patut ngenang semua nya lalu anti aja meh program pemansang nya dikemujur.

"Semua projek pemansang ke deka digaga nya endang dulu dipansik enggau silik ngambika ulih mujur dipenyadi.

"Kebuah atur digaga baka nya ngambika rayat ulih ngasaika pemansang nyentuk ke jemah ila," ku iya.

Iya mega madah, penyampau BELB ke udah digaga ba serata negeri tu diatu bisi 74 peratus enggau penyampau iya ke ditemu baru iya nya dengan 84 peratus ari penyampau rayat.

"Nengah program NKRA, perintah melabaka bisi 95 peratus pemansang ke baka tu deka ditambah ungkup rayat ba menua pesisir.

"Tuju bekal elektrik ke digaga perintah nya dikandalka ulih ngemansangka pengidup rayat rayat kelebih agi ba sukut ekonomi sereta ngemujurka pengawa dagang ke jelan pemesai.

"Nengah perengka elektrik tu rayat ulih ngaga mayuh bengkah pekara baka ngaga roti, kek enggau mayuh agi ke bukai," ku iya.

Awang Tengah ngelalau mensia mayuh ngambika terus nyukung nama-nama aja program pemansang ke deka digaga perintah ba menua sida.

"Projek BELB beguna ungkus ke besai tang perintah tetap ngemujurka iya ba menua pesisir ngambika rayat enda tinggal pemansang setipak enggau pengingin pengidup ba jeman moden.

"Ngena rengka rama tu mega, ngarapka pengidup rayat majak lantang sereta terus nulung perintah ngemansangka menua tu," ku iya.

Ungkus projek BELB bisi RM8.5 juta lalu nguntungka lapan buah kampung ba Krokong enggau Serumbu iya nya Kampung Batu Sepit, Peros, Pisa, Pengkalan Tebang, Ledan Gumbang, Kopit, Sungai Pinang enggau Petak.

Sama bisi datai, Menteri Dagang Temuai ti mega nyadi Kaban Parlimen Mambong, Datuk Dr James Dawos Mamit, Penulung Menteri Rengka Rama (Bekal Ai), Datuk sylvester Entri Munan, Penulung Menteri Perintah Pelilih Menua enggau Pemansang Mensia Mayuh ti mega nyadi ADUN Bengoh, Dr Jerip Susil sereta bala tuai raban bansa ba menua nya.

Penemu rayat patut dipuji - Henry Sum

MERI TULUNG…Henry Sum nyuaka tulung duit ari iya enggau Datuk Amar Haji Awang Tengah Ali Hasan ngagai Singa Labor ti diuluka bini enggau anak indu seduai.

LAWAS : Penemu mensia mayuh ba daerah Lawas patut dipuji laban sida enda mendingka jaku asut ari sekeda raban orang ke semina nujungka laya.

Pemereti runding rayat ke baka nya ngujungka daerah tu terus maju sebaka enggau menua-menua bukai di nengeri tu.

Taja pia, pengawa sekeda orang ke nyabung belaya ba dalam ruai siber patut dianu laban nya balat ngasuh orang ringgat.

Kaban Parlimen Lawas, Dato Henry Sum Agong madah, pengawa nabur berita bula dalam ruai siber mayuh diatur orang luar kelebih sida ke ukai nguan daerah tu sereta ukai raban bansa Lun Bawang.

Ulah sida baka nya chukup ngenyinuka ati laban ukai semina ngenusahka ruang bilik orang ke udah tasah tang kebendar iya sida deka nguntungka diri empu aja.

“Kitai patut besampika semengat niang sereta anang nyebut bansa Lun Bawang enda manah tauka ngasuh raban sida belaya.

“Anang ngelakka kitai nyadi perengka orang bukai...sida nadai ulih ngaga nama-nama enti kitai dituntung penusah, nya alai kitai patut berunding panjai,”ku iya.

Henry Sum bisi ngelawa ruang bilik niang ba padang bilun entarabansa Kota Kinabalu sebedau iya bekejang ngagai Kuala Lumpur.

Berebak enggau nya iya nyuaka pemeri tulung duit ari iya enggau Datuk Amar Haji Awang Tengah Ali Hasan ngagai Singa Labor, iya nya apai niang Mathew Singa ke mati dibunuh seraban orang ba bandar Lawas kena malam 21 September tu tadi.

Naka ke diatu, bala Polis mujur nangkap Semilan saspek lalu benung ngiga seiku agi saspek ke dipelaba bela enggau munuh niang ba bandar Lawas.

Semua saspek diatu diengkah ba Rumah Pasung Limbang seraya ke nganti kes dichara ba Kot Tinggi Limbang kena 10 haribulan Oktober tu.

Singa Labor agi berasai sinu ketegal penusah ke udah nyadi lalu iya ngarapka kes munuh niang nya ulih diputarka ba kot sereta sida ke ngereja penyalah nya ulih diukum nitihka undang-undang ke patut.

Saspek ke udah ditangkap tu ari tiga pupu raban bansa, lalu datai ari kampung ke bebida. Sida deka diukum nitihka  Seksyen 302 Kanun Keseksaan ke ngundan ukum gantung sampai mati enggau Seksyen 149 kanun ukum ke sebaka laban ngereja penyalah beraban-raban.

Nangkan ke nya, sekeda raban orang bisi kena tinggang undang-undang ari raban bekuasa ketegal nyadung berita ke enda manah nengah  laman sosial facebook, sereta ngirum gambar ba telefon binching nengah MMS enggau SMS.

Diatu bandar Lawas dipeda baka selama lalu tabal agi mensia mayuh berasai sinu enggau penusah ke udah nyadi lalu ngarapka bala Polis enggau RELA terus bejalai matau kandang endur nya 30 iku sesebengkah maya.

Pengawa bala Polis mega patut dipuji laban mujur mutarka kes nyentukka bala saspek ulih tangkap dalam timpuh lapan hari.

Penyulut akademik nadai nyamin bulih kereja

KOTA SAMARAHAN : Penyulut akademik nadai nyamin muntang bulih kereja tang berindik ari pengeransing diri empu.

"Penyulut akademik semina dikena ngepunka pejalai tang pemujur iya jemah balat bepanggai ba pemintar seiku-seiku.

"Nya alai, anang kelalu gaga meda diri bisi pemandai tang meseti landik ngenampakka diri lebuh nguji minta pengawa.

Sapit Penulung Chanselor Pekara Pelajar enggau Alumni UNIMAS,  Profesor Mohd Fadzil Abdul Rahman madah munyi nya rambau Pengerami Nyuaka Perais Gelar  ZECON ungkup bala pelajar Fakulti Enjinir Universiti Malaysia Sarawak (UNIMAS) kena lemai Hari Tiga tu tadi.

Iya madah, bala pelajar patut nyikap diri enggau mayuh bengkah pemandai ngambika ulih ngereja semua pengawa enggau manah.

"Enti udah teleba ngereja pengawa, chukup nyamai ngereja sebarang pengawa ke diasuh orang.

"Berindik ari nya, kitai deka dipebasaka orang bukai, ukai semina dipuji pengaji tang mega mensia mayuh.

"Nya alai, kitai patut deka ngereja sebarang pengawa enggau ati ke tebuka sereta meseti bebendar ngereja iya," ku iya.

Profesor Mod Fadzil mega ngelalau bala pelajar awakka enda ngeninggika diri pengudah bulih gelar graduan ari universiti menua tu.

"Kebendar iya nadai bida entara graduan dalam menua enggau graduan ari menua luar laban pengaji semina beratika kualiti sida lebuh ngereja pengawa.

"Kitai patut mandangka kualiti kereja laban nya nandaka pengulih seiku-seiku orang.

"Nama meh reti ngembuan setipikit pelajar tinggi ari menua luar enti enda landik ngereja pengawa setipak enggau batang pengawa ke diberi.

"Nya alai, anang malu nyema kita ngembuan setipikit ari universiti dalam menua.

"Tebal agi orang ke mega tanggung pengawa ke bebesai diatu endang pansut ari universiti dalam menua lalu kualitit kereja sida mega dipeda chukup manah," ku iya.

Anang kelalu milih kereja

KOTA SAMARAHAN : Bala pelajar ke udah pansut ari palan pelajar tinggi dilalau anang kelalu milih ngiga pengawa puang laban ulah ke baka nya semina meri pengerugi ngagai sida.
Anang ngumbai pengawa ke deka dipinta enda setipak enggau tikas pemandai tauka enda engkeman enggau kus ke udah dipelajar.

Penulung Presiden Wang Zecon Berhad, Jamil Jamaludin madah munyi nya rambau Pengerami Nyuaka Perais Gelar ZACON ungkup bala pelajar Fakulti Enjinir Universiti Malaysia Sarawak (UNIMAS) lemai Hari Tiga tu tadi.

Iya madah, mayuh graduan lepas pelajar degree puntan bulih pengawa laban sida kelalu milih kereja sereta enggai milih kereja ke mit-mit dulu.

"Kelimpah ari nya, bisi mega sida enggai gawa ketegal gaji enda setipak enggau tikas pemandai akademik ke dikembuan.

"Semua tu (milih kereja enggau gaji) semina deka meri pengerugi ngagai bala graduan.
"Nya alai, aku ngelalau bala graduan anang kelalu milih kereja, terima aja meh sebarang pengawa enggau ati tebuka.

"Kitai patut nemu semua pemujur bepun ari baruh laban nadai jalai muntang enti deka mujur," ku iya.

Jamil mega ngelalau bala pelajar ngambika landik ngena jaku bansa bukai kelebih agi jaku Inggeris laban tebal agi bala graduan agi kurang landik bejaku Inggeris.

"Tu meh balat meri penanggul ngagai bala graduan lebuh sida interbiu laban orang interbiu sida mayuh ngena jaku Inggeris.

"Nyema sida mujur interbiu sereta terus diberi mangku pengawa, sida bisi penanggul mangku pengawa nya laban kurang landik bejaku Inggeris.

"Nya alai, landik bejaku Inggeris beguna amat ngambika bala graduan berasai arap ke diri empu lebuh ke nguji minta sebarang pengawa.

"Tu ukai reti kitai enda belajarka jaku menua tu empu tang meh kitai meseti berundingka pemesai reti jaku bansa bukai," ku iya.

Iya mega ngelalau bala graduan ngambika seruran betanya enggau bala kaban ke bukai lebuh bekereja awakka kualitit pengawa manah dipeda orang bukai.

"Ukai reti nyadi injinir kitai enda tau betanya enggau bala kaban ke mangku pengawa bukai, tang ke bendar iya patut segulai pengawa enggau pengawa pangan diri.

"Enti kitai seruran betanya enggau orang bukai, semua pengawa ke dikereja muntang magang laban bisi penemu ke baru ditemu kitai," ku iya.

Taib diberi gelar Ketuai Chunto Chap Legenda 2012

TANDA BASA...Chairman BrandLaureate Dr KK Johan (dua kiba) nerangka pasal gambar ngagai Kepala Menteri Pehin Sri Abdul Taib Mahmud (tiga kiba) lalu dikemataka Tuai Pemesai Eksekutif BrandLaureate Chew Bee Peng, Senator Datuk Raja Ropiaah Raja Abdullah, BrandLaureate chairman  Jeneral Tan Sri Mohammed Hashim Mohd Ali, enggau Datuk Wira Jalilah Baba.

KUALA LUMPUR : Kepala Menteri Pehin Sri Haji Abdul Taib Mahmud diberi basa nerima gelar Ketuai Chunto Chap Legenda 2012 ulih Yayasan Chap Asia Pasifik dikena ngenang pemadas iya ke udah nyadi tuai ba nengeri enggau menua.

Pengerami nyuaka gelar nya diatur malam ensana (Hari Tiga) lalu dipenyadi presiden Yayasan Chap Asia Pasifik KK Johan.

Nengah surat Johan ngagai Pehin Sri Taib, iya madah negeri Sarawak udah mujur dikemansang ari sukut ekonomi menua pesisir lalu nyadi sebengkah negeri ke chukup moden sereta tegap.

“Nengah langgur penemu enggau polisi ke manah, Pehin Sri Taib dipeda mujur ngemansangka nengeri Sarawak ba tikas penatai pemisi dalam menua (GDP) ke chukup nyulut dalam timpuh dua puluh taun lalu ngujungka Bumi Kenyalang ba penuduk lumur tiga.

“Ari sukut penatai pemisi per kapita, Sarawak entara nengeri pemadu kaya ba Malaysia sekumbang betuaika iya," ku Johan.

Asil ari pengawa iya mega, pemansang rengka rama baka jalai raya nyau deka ambis digaga ba serata negeri Sarawak, ku iya lalu madah pekara nya meransang rayat bela enggau nyaup ngemansangka nengeri.

JKM Sarawak dipinta neladan FAMAT

BERUBAT CHARA DOUSA HOU...Datuk Hajah Fatimah Abdullah nerima fail pasal Kus Dousa Hou ari Supervisor  Am FAMAT Jipun, Ara Masafumi, rambau pengerami  'Working Dinner' berebak enggau Kus Dousa Hou Ke-33 Renggat  2/2012 Peringkat Negeri ba sebengkah hotel tebilang ba Kuching. Bela bisi dipeda  Robert Lawson Chuat,Datuk Hajah Dayang Morliah Datuk Haji Awang Daud, Haji Adnan Abu Bakar enggau Noriah Haji Ahmad.

KUCHING : Staf Opis Pengintu Pendiau Mensia Mayuh (JKM) Sarawak diperansang neladan sereta nitihka pengawa enda begaji ke dikereja staf Fukushima Association Motor Training Action (FAMAT), Jipun.

Menteri Pengintu Pendiau enggau Pemansang Ruang Bilik, Datuk Hajah Fatimah Abdullah madah, JKM ngembuan kaul ke manah enggau bala  pelatih enda begaji  FAMAT ari menua Jipun lebuh ngemujurka sesebengkah program.

"Aku dipadahka bala pelatih FAMAT tu gawa enda begaji lalu sida datai ke Malaysia, milih siti palan endur diau enti nyema deka ngelawa sesebngkah endur," ku iya.

Iya madah munyi nya rambau ngulu Pengerami 'Working Dinner' beserimbai enggau Kus Dousa Hou Ke-33 Renggat 2/2012 Peringkat Negeri ba sebengkah hotel tebilamng ba ditu, malam Hari Tiga tu tadi.

Fatimah madah, staf JKM Sarawak dilalau bebendar agi ba pengawa enda begaji laban nya tau meri penguntung ngagai semua sida ke besangkut paut kelimpah ti bekunsi penemu asil ari aktivti.

Nya alai, iya madah kus DOUSA HOU tauka Teknik DOUSA ke digaga FAMAT ba menua tu kenyau ari taun 1989 bisi 33 kali lalu iya ke sekali tu terubah iya diatur ba Sarawak sereta kedua kali ba Malaysia Timur.

"Reti DOUSA HOU iya nya ngeraika psikologi enggau proses fisiologi Jipun dikena nyaga pengerai psikologi," ku iya lalu madahka program nya ungkup orang timpang pendiau (OKU) autisme, sindrom down enggau spastik.

Iya madah, bisi 80 pesereta nyengkaum bala supervisor, pengatur pengawa, apai indai enggau bala pelatih Palan Pengerai Mensia Mayuh (PDK) ngulu kus DOUSA HOU pengudah 20 iku pelatih dipilih tumu kena 27 Ogos tu tadi.

"Aku ngarapka mayuh agi latih pengelandik ke memanah diatur dikena ngerembaika pemanah servis rehabilitasi ba PDK.

"Program tu diatur mega chukup engkeman enggau objektif opis menteri iya nya ngemanahka kualiti servis awak ulih nitihka peneka pengguna JKM,"ku iya.

Fatimah madah, Sarawak ngembuan 33 PDK enggau 2,045 iku OKU ke dirijista ba PDK enggau 487 iku OKU dirijista ba rumah.

"Ari sukut belanja pengawa ngaduka PDK ba taun tu bisi RM7,672,644.00 nyengkaum mayar elaun OKU pusat, elauan OKU ba rumah, elauan supervisor, elauan pengatur pengawa, KWSP supervisor, KWSP pengatur pengawa, sewa palan, utiliti, perengka dikena enggau aktiviti," ku iya lalu madahka bisi lima buah PDK benung dalam proses digaga peminta ungkup taun baru.

Nyentuk ngagai 18 haribulan September 2012, Sarawak bisi 29,865 OKU dirijista lalu iya ngarapka bala apai indai ulih ngerijista anak sida ti  OKU ba  PDK.

"Ba PDK, bala anak sida tu deka diajar nengah mayuh bengkah program enggau aktiviti baka latih vokasional, nyikap diri empu, pasal pengidup nyema sida udah besai awak sida ulih nupi diri sereta enda bepanggai ba orang bukai," ku iya.

Iya mega madah, PDK sebagi ari chara ke pemadu manah JKM dikena mantu OKU aktif bekaul enggau pengidup ruang bilik enggau chara begulai enggau orang bukai.

Sama bisi datai Penulung Menteri Pengintu Pendiau, Robert Lawson Chuat, Direktor Opis Pemansang OKU, JKM Malaysia, Haji Adnan Abu Bakar, Direktor JKM Sarawak, Noriah Haji Ahmad enggau Supervisor Am FAMAT Jipun, Ara Masafumi.

Perintah nempa rayat pintar IT

TERIMA KASIH...Chambai (dua kiba) benung nyuaka Laptop 1 Malaysia ngagai tuai raban bansa ba kandang Kunsil Negeri N33 Kalaka lalu dikemataka Sherry (kiba) sereta bala ke bukai.

SARATOK : Perintah diatu benung bebendar nulung rayat ba menua pesisir ngambika sida bela ulih besambungka internert sereta nemu ngena perengka komputer.

Tanda iya nyengala dipeda nengah 1,142 buah laptop  1Malaysia (K1M) udah diberi ngagai rayat ke diau ba kandang Kunsil Nengeri (DUN) N33 Kalaka.

Laptop nya disadung ngagai bala kaban-kaban parti komponen Barisan Nasional (BN), Tuai Raban Bansa, kaban Komiti Pemansang enggau Pengelikun Kampung (JKKK), kaban Ukai Opis Perintah (NGO) sereta bala orang ke ngembuan penatai pemisi enda ngeluie  RM3,000 sebulan.

Sapit Menteri Pengangkut Malaysia, Jelaing Mersat nengah surat jaku iya ke dibacha Kaban Pemesai Parti Demokratik Progresif Sarawak (SPDP), Chambai Lindong madah, tuju pengawa ke baka diatur ngambika ulih nempa raban nembiak ke pintar ngena perengka Komputer enggau Teknologi Pemadah (IT).

"Taun tu, ba Parlimen Saratok bisi  4,400 buah K1M udah disadung ngagai mensia mayuh berengakh ari pun taun tu tadi.

"Nengah K1M tu, kami lebih ngemeratka iya diberi ngagai bala pelajar, iya nya 2,650 buah K1M udah diberi ngagai pelajar ba Parlimen Saratok nyengkaum 5 buah sekula sekondari ke bisi ba parlimen tu, lalu pengawa tu tembu diatur kena tengan taun tu tadi.

Chambai madha munyi nya rambau Pengerami Nyuaka K1M Bagi DUN Kalaka ke diatur ba Dewan Masyarakat Roban, pagi Hari Tiga tu tadi.

Pengerami nya diatur Opis Pekara Khas N33 Kalaka ke bekereja sama enggau Komisioner Komunikasyen Multimedia Malaysia (SKMM).

Chambai madah, tuju perintah nyadung K1M ukai semina ngemuntangka pengidup sida tang mega ngambika mensia mayuh kelebih agi sida ke diau ba menua pesisir nemu cahra bekenaka perengka komputer sereta nemu pemesai reti guna iya dalam pengidup kemaya hari tu.

"Enti kitai berati, kamay hari tu mayuh amat pengawa ke diatur bepaggai ba perengka komputer. Pengawa nya nyengkaum pengawa bebaayarka bil, pengawa bekaul enggau bank sereta mayuh agi pengawa ke bukai.

"Pengawa ke diatur ngena perengka komputer chukup muntang, pia mega enda masau hari enti kitai landik ngena komputer.

"Taja pia dalam mayuh-mayuh pemanah iya endang tetap bisi penyai iya, tang pekara nya bepanggai ba seiku-seiku orang endur milih ni bagi laman web ke manah dipeda enggau iya enda," ku Chambai.

Nya alai, iya ngelalau bala apai indai ngambika seruran ngemataka pengawa bala anak lebuh sida bepedaka internet ngambika sida enda muka laman web ke enda menuku.

Sama bisi datai ba pengerami tu iya Penulumng Direktor SKMM Sarawak, Sherry Belayong, Pemesai Pengatur Pengawa Pelilih Menua (SAO) Roban, Laga Kueh, Pemesai JASA N33 Kalaka, Kasim Tomik sereta 1142 iku bala penerima K1M.

   

Anang ngaga penyarut

BANTU DAGANG... Ali Shikh Ahmad nyuaka replika bantu dagang ngagai Mohd Yusree Mohd Zain (kanan) sereta dikemataka Sapit Kepala Menteri Tan Sri Alfred Jabu Numpang enggau Sylvester Entrie Muran (kiba) ba sebengkah Aum Besai PPNS ke-27 ke diatur ba Kuching.

"Anang sesekali enggau orang ngereja pengawa ke enda munuku baka tu laban nya ukai chara pengidup kitai mandangka pengeringat sebelah jalai lalu ngujungka penyarut."
Datuk Patinggi Tan Sri Alfred Jabu ak Numpang
Sapit Kepala Menteri


KUCHING : Bala kaban Gerempung Orang Bumai Negeri Sarawak (PPNS) dilalau ngambika enda enggau orang ngaga penyarut ba sebelah jalai enti sema bisi berasai enda puas ati bkaul sesebengkah isu.

Sapit Kepala Menteri Datuk Patinggi Tan Sri Alfred Jabu ak Numpang madah, pengawa begelumu ba jalai alun ulah ke nadai mereti lalu ukai chara pengidup rayat Sarawak.

"Anang sesekali enggau orang ngereja pengawa ke enda munuku baka tu laban nya ukai chara pengidup kitai mandangka pengeringat sebelah jalai lalu ngujungka penyarut," ku iya.

Iya madah munyi nya maya bejadi Aum Besai Ninting Taun Ke-27 ba sebengkah hotel tebilang ba ditu, kemari (Hari Empat).

Jabu madah, penyarut ke digaga sebelah jalai alun ukai semina ngujungka pengerusak perengka guna tang mega tau ngemedis orang bukai.

Iya meri jaku tangkan munyi nya berindik ari bala pemberita ke kala bakal maya ke benung bejalaika pengawa bekaul penyarut nya.

"Anang ngumbai penyarut ke baka tu ulih meri pengawa puang ngagai mensia mayuh, tang semina meri pengerugi.

“Kitai bisi chara bukai endur ngenataika sesebengkah pekara dikena mutarka sebarang penanggul," ku iya.

Jabu ti mega nyadi Menteri Pengawa Betanam Betupi Moden madah, pengawa orang ke ngaga penyarut nya mandangka ulah sida ke chukup nadai beradat.

"Pengidup kitai diatu udah chukup manah lalu penyarut ke bisi nyadi nya nyau ngerusak pengelantang,' ku iya.

Jabu madah, perintah seruran ngamatka danji ke kala disemaya sereta seruran ingatka sukung rayat.

Sama bisi datai rambau pengerami tu, Penulung Menteri Betanam Betupi (Penyelidikan) Datuk Mong Dagang, Penulung Menteri Pemansang Menua Pesisir Datuk Francis Harden Hollis, Penulung Menteri Perintah Pelilih Menua enggau Pemansang Komuniti (Servis Mensia Mayuh) Datuk Peter Nansian Nguise enggau Chairman PPNS Datuk Sylvester Entri ak Muran.

                 

Lebih 10 ribu sekula diberi perengka internet Jun 2014

KUALA LUMPUR : Kira  10,019 buah sekula perintah ba serata menua tu deka diberi perengka kena nyambung Internet ke chukup manah maya Jun 2014 ila.

Sapit Menteri Pelajaran Datuk Seri Wee Ka Siong madah, nengah projek 1BestariNet genap bengkah sekula tu deka ulih bepedaka internet enggau  4mbps pengelaju.

"Udah nya, kira 600 buah sekula ba menua pesisir diberi perengka 'Very Small Aperture Terminal' (VSAT) enggau pengelaju 2mbps.

"Projek tu diadang ulih ngubah pemanah pelajar ba peringkat sekula di menua tu, pia mega ngerapitka kaul entara nembiak ari menua pesisir enggau bandar," ku iya lebuh ke nyaut tanya ari Er Teck Hwa (DAP-Bakri) maya aum Dewan Rayat ba ditu, apin lama ke udah.

Er bisi nanyaka penyampau ungkus ungkup program nya sereta rintai nama sekula ti kena pilih.

Wee madah, Majlis Ekonomi Negara udah ngungkupka belanja RM660 juta dikena ngemujurka projek nya bepun tain baru tu ila.

Iya madah, kontraktor ke dipilih nyediaka perengka internet tu endang orang ke udah bulih lesen ari Akta Komunikasi enggau Multimedia 1998 sereta diadang ngembuan peneleba enggau pengelandik ngereja pengawa bekaul enggau internet.

Ku iya program 1BestariNet digaga berindik ari pansil BCG Consulting Group sereta dikemataka Projek SchoolNet ti kala digaga ngelama tu.

"Sebarang servis ke nadai sain kontrak, patut bisi pemendar ari perintah lalu pemutus deka digaga nitihka pematut enti udah diperunding,' ku iya.







   

Bajet 2013 : Agih belanja ba menua pesisir patut ditambah

BAU : Perintah dikarap ulih nambahka penyampau agih belanja dikena ngemansangka program ba menua pesisir.

Kebuah pia laban menua pesisir dipeda agi jauh bendar tinggal pemansang enti dibanding enggau pemansang ke udah mayuh digaga ba menua bandar.

Penulung Menteri Pemansang Mensia Mayuh, Datuk Peter Nansian Ngusie madah, tebal agi orang ke diau ba menua pesisir nadai ngembuan gaji ke besai sereta ukai orang ke begaji tetap sereta sida balat bepanggai ba penatai pemisi asil ari betanam padi, getah, sawit enggau mayuh agi ke bukai.

"Nya alai, pengidup sida seranta agi enti dibanding enggau pengidup orang ba bandar ke ngembuan gaji tetap.

"Perintah patut berunding ngangkatka pengidup raban sida tu ari segi perengka infrastruktur enggau ekonomi, awakka pengidup sida nyamai agi dudi hari," ku iya madah ngagai Utusan Sarawak ba Pusat Komuniti Redeems, Singgai ditu kemari (Hari Tiga).

Iya madah, perintah patut meri subsidi sereta bejalaika mayuh program pemansang awakka rayat ditu ulih ngasaika pengidup lantang agi.

"Aku ngarapka perintah ulih nambahka penyampau agih belanja dikena ngemansangka pengidup rayat ba menua pesisir.

"Perintah mega patut meri sukung sereta meri bantu ngagai rayat ba menua pesisir bekaul enggau chara ngelakuka asil betanam betupi laban nya tau nguntungka sida.

"Enti bisi bantu ari perintah, sida nyamai agi mansang ke mua sereta ulih besemekih enggau pengidup orang ke diau ba bandar," ku iya.

Nangkan ke nya, Datuk Nansian madah, perintah mega deka berundingka pemansang pelajar bala anak ba menua pesisir setipak enggau pemansang rayat ba bandar.

"Nangkan ke nya, perengka guna pelajar ba menua pesisir mega dipeda agi tinggal lalu nya ngujungka sida pedis besemekih sereta kurang bulih penemu ke manah dikena ngiga kereja jemah.

"Kitai bela nemu, mayuh orang ke pandai ari menua pesisir tang taja pia pemandai sida nya meseti engkeman enggau peneka pengaji ke maya hari iya nya nyikap diri enggau penemu teknikal.

"Nya alai, perintah endang patut ngemeratka pekara tu lalu meri  perengka guna teknikal ngambika bala nembiak tu nyamai nempa diri lalu ulih besemekih napi pemar dalam proses nyaup pemansang menua," ku iya.

Iya mega ngarapka perintah ulih berunding sekali baru bekaul enggau penyampau sekula sekondari lalu muka mayuh agi palan pengelandik ba menua pesisir kelebih agi ba Bau awakka bala nembiak tu nyamai agi ngelawa palan nya.

"Jam ke diatu semina bisi tiga buah sekula sekondari enggau sebuah kolej komuniti ba Bau lalu penyampau nya dipeda enda chukup dikena nangkup peminta ba bidang pelajar.

"Ngarapka enti udah bisi palan pelajar ba Giatmara, IKM enggau iya ke bukai besangkut paut enggau pengelandik teknikal diadang mayuh agi orang ke landik ari menua pesisir ditempa udah tu.

"Jemah ila, kitai bela nemu pengelandik teknikal endang beguna amat dikena nyaup perintah ngemansangka nengeri tu.

"Pemansang projek SCORE dipeda balat begunaka orang ke landik dalam bidang teknikal, elektronik, enjinir minyak enggau gas sereta mayuh agi iya ke bukai.

"Tu meri peluang ngagai bala nembiak ari menua pesisir ngulihka pemandai sereta ngangkat penatai pemisi diri empu.

"Nya alai, ngarapka perintah ulih beratika pemansang ba menua pesisir lalu nambahka agih belanja dikena ngamansangka pengidup rayat ke diau ba menua pesisir," ku iya.

Penyampau pengajar pinchin dipansik

BAUM… Habibah Abdul Rahim (kanan) benung meri penerang bekaul enggau ripot tumu pasal (Penerang Eksekutif) Pelin Pemansang Pelajar Menua Malaysia 2013-2025 bepalan ba Opis Menteri Pelajar Malaysia ba Kuala Lumpur, Putrajaya.

MIRI : Kira 11.5 peratus tauka 668 iku penyampau kepala pengajar enggau prinsipal ba sekula primari enggau sekula sekondari ba Sarawak deka pinchin entara taun 2012 ngagai 2017, ku Chairman Pelin Pemansang Pelajar Menua Malaysia (PPPM) 2013-2025 Habibah Abdul Rahim.

Habibah lebuh dilawa bala media ari Gerempung Pemberita Utara Sarawak (NSJA) ba Opis Menteri Pelajar Menua Malaysia (KPM) ba Kuala Lumpur (Putrajaya) apin lama ke udah, madah kira 668 iku ari 572 prinsipal enggau 96 kepala pengajar ba Sarawak deka pinchin dalam timpuh nya.

Iya madah, statistik penyampau ba serata Malaysia bisi 5,812 iku kepala pengajar enggau prinsipal ba semua sekula primari enggau sekula sekondari ba Malaysia deka pinchin entara taun 2012 ngagai 2017.

 Ari 5,812 iku sida nya, kira 4,424 prinsipal enggau 1,388 kepala pengajar deka pinchin dalam timpuh nya.

Enti umur pinchin manggai ngagai 60 taun dikena, nyadi penyampau nya deka betambah enti dibanding enggau penyampau ke bisi dalam PPPM laban penyampau ke bisi dalam PPPM nya nitihka taun 2011, lalu penyampau ke diberi diatu nitihka penyampau ari PPPM ba taun 2012, ku iya.

Nangkan ke nya, bekaul enggau Ripot Tumu (Penerang Eksekutif-September 2012) PPPM 2013-2025 iya nya kena Oktober 2011, KPM udah ngatur pansik bekaul enggau sistem pelajar dalam menua dikena ngemansangka Pelin Pemansang  Pelajar sekula ke baru.

Iya madah, perintah udah ngaga pemutus bejalaika pansik nya dikena mansik sistem tauka atur sekula ke baru dikena napi pemar jeman ke-21.

“Pengudah  11 bulan pansik nya dipejalai, KPM bisi nerima timbal ari mayuh bengkah sumber baka ari pakar pasal pelajar ari UNESO, Bank Dunia, OECD enggau enam buah Palan Pelajar Tinggi Awam.

“Pansik tu mega nyengkaum bala ketuai ba sekula, pengajar, apai indai, mensia mayuh enggau nembiak sekula ba serata menua. Lalu pekara nya ngujungka PPPM ulih meda pengulih pemanah Atur Pelajar Dalam Menua Malaysia ngambika dibanding enggau tikas pelajar entarabansa," ku iya.

Iya madah, pelin tu mandangka tinjau atur pelajar sekula enggau tikas pengelandik nembiak dikena napi peminta guna menua dudi hari. Pelin tu mega ku iya, bisi nerangka pasal 11 bengkah atur strategik enggau operasi ke patut digaga KPM dikena nyapai juluk ati pelin pemansang nya.

Pengawa benung dikemansang dikena ngubah atur pelajar sekula lalu ngarapka mensia mayuh ulih mereti senentang pekara tu, ku iya.

Beduduk ari nya mega, ku iya Opis Menteri Pelajar Menua Malaysia agi deka beratika timbal bekaul enggau ripot tumu ari semua orang ke udah dipilih bekaul enggau pelin tu ambis laun bulan Disember 2012.

Sektor Pengangkut pemadu beguna

"Diatu kompeni penerebai bilun MASwings bisi nyediaka servis ba empat bengkah menua dalam BIMP-EAGA lalu kompeni tu bisi ngaga peminta ngagai Opis Menteri Pengangkut Malaysia ngambika ulih muka mayuh agi palan penerebai bilun ba endur bukai jemah."
Dato' Sri Kong Cho Ha
Menteri Pengangkut Malaysia


KUCHING : Sektor pengangkut entara sebengkah utai ke pemadu beguna dikena nyaup nengeri tu nyadung barang pemakai ba serata menua.

Menteri Pengangkut Malaysia, Dato' Sri Kong Cho Ha madah, Sarawak ngembuan mayuh ketuai ba dalam nengeri ke landik ari suba nyentuk ke diatu lalu tu ngujungka nengeri tu balat mansang sehari tu.

"Enti dibanding enggau negeri bukai ba Malaysia, Sarawak ngembuan mayuh padang bilun enggau pengkalan kereban pengangkut ai lalu tu setipak enggau peneka pemansang ekonomi," ku iya.

Iya madah munyi nya rambau Pengerami Makai Malam Beserimbai Enggau Aum Opis Menteri Pengangkut Menua Asia Timur Brunei Darussalam, Indonesia, Malaysia, Filipina (BIMP-EAGA) 2012 ketujuh bepalan ba sebengkah hotel tebilang ba ditu ensana (Hari Dua).

Kong madah, negeri tu mega ngembuan kompeni ngaga kapal ke pemadu besai ba dunya.

Nya alai, ku iya mayuh projek aktiviti industri enggau dagang bebesai digaga ditu beduduk ari pemansang sektor pengangkut di nengeri tu.

"Kitai bela nemu, BIMP-EAGA sebengkah kaul begulai enggau menua luar ke ditumbuh taun 1994 lalu tuju iya dikena ngulihka asil dagang, dagang temuai, enggau asil ari beranakka puku ari menua dikuasa EAGA.

"Objektif tu ulih dijapai nengah chara anang nekul pengikup mensia mayuh, tuju iya ngambika produk enggau servis iya ke dikemansang ulih laku," ku iya.

Kelimpah ari nya mega, iya madah ba aum ke sekali tu, bala iya bebendar agi berundingka chara ngemansangka kereban pengangkut ba darat, tasik enggau langit awakka ulih nguntungka semua orang.

"Diatu kompeni penerebai bilun MASwings bisi nyediaka servis ba empat bengkah menua dalam BIMP-EAGA lalu kompeni tu bisi ngaga peminta ngagai Opis Menteri Pengangkut Malaysia ngambika ulih muka mayuh agi palan penerebai bilun ba endur bukai jemah," ku iya.

Kong madah, atur pengangkut ke sikar diatur ngelimpas menua luar entara utai ke mar tang enda ibuh irau laban pemansang sosio-ekonomi dalam menua BIMP-EAGA endang tetap bekerejasama.

Sama bisi datai ba pengerami makai malam tu iya nya Kepala Menteri Pehin Sri Haji Abdul Taib Mahmud enggau bini iya, Puan Sri Raghad Kurdi Taib, Sapit Kepala Menteri Datuk Patinggi Tan Sri Alfred Jabu Numpang, Menteri Pemansang Infrastruktur enggau Penyambung Dato Sri Michael Manyin Jawong sereta bala menteri kabinet negeri ke bukai.

Sistem Tagang ulih ngumpan ati temuai

BARIO : Serakup Babas Sarawak (SFC) besaup enggau Opis Babas Sarawak sereta  Opis Betanam Betupi Sarawak mujur ngatur "Sistem Tagang" ba Sungai Kelapang ke mungkur  tiga buah kampung iya nya Pa Dalih, Pa Mada enggau Kampung Ramudu.
   
Penulung Menteri Rampa Menua Datuk Len Talif Salleh madah, atur nya manah amat awakka ikan ba sungai nya majak mayuh sereta ulih narit ati bala temuai menua luar nemuai ngagai Sarawak jemah.
   
Reti Sistem Tagang tu iya nya dikena nagang mensia mayuh nyaga ikan awakka mayuh dulu sereta meransang eko-dagang temuai kelimpah ti nyaga pemeri sungai.
   
"Naka ke diatu bisi 52 iti "Tagang" ba serata nengeri tu lalu kitai naka ulih ngasuh atur tu sebagi ari chara dikena narit ati temuai nemuai ngagai menua tu," ku iya ba ditu.

Iya madah, mensia mayuh ke nguan menua nya dilalau nyukung sistem tagang ngambika eko-dagang temuai majak mujur jemah.
   
Nengah kerejasama entara agensi perintah enggau rayat ke nguan menua tu, aku pechaya projek tu endang nadai penanggul dikemujur, ku iya.

SCORE entara koridor pemadu manah di M'sia

PENGGI SEDUAI… Rosey Yunus nyuaka perais ngagai duai iku pesereta program ke udah mujur ba sebengkah pekit ke diatur, bela bisi dipeda Mohamad Ariff Azahari.

BATU NIAH : Koridor Renewable Energy Sarawak (SCORE) sebengkah ari agenda pemansang ke epmadu manah enti dibanding enggau koridor-koridor bukai di Malaysia, juluk ati SCORE deka nempa Sarawak nyadi sebuah negeri ekonomi ngembuan penatai pemisi ke besai maya taun 2030.

Pemujur SCORE tu jemah balat bepanggai ba raban nembiak peranak (Sarawak) empu laban tebal agi pengawa puang ke disedia ba  SCORE endang ngiga nembiak ba nengeri tu empu, taja pia ukai nyamai deka napi nyatup pengawa nya enti bala nembiak ngibuhka pelajar sekula.

Penulung Menteri Pelajar Tumu Nembiak enggau Pemansang Ruang Bilik Rosey Yunus madah munyi nya rambu Program Pemansang Nembiak  “Gegaran Belia Niah” diatur Angkatan Zaman Mansang (AZAM) Sarawak bepalan ba Dewan Masyarakat Batu Niah malam Hari Minggu tu tadi.

Iya madah, tuju program nya diatur ba pun taun tu dikena meransang bala nembiak ari menua pesisir, beratika pengelandik sereta nyungkak pengulih sida dikena napi pemansang dalam gelumbang kedua ba Sarawak.

Program tu mega nyadi pantar endur nempa pemanah ulah enggau daya idup ke bepengerai awakka sida nembiak ulih nyadi orang ke menyana dudi hari, ku iya.

Rosey ti mega nyadi Kaban Kunsil Negeri N.61 Bekenu madah, mayuh bengkah pengawa puang disedia ba SCORE lalu bidang ke pemadu laku iya bidang teknikal.

“Kenyau ari taun 2008, mayuh bengkah kompeni bebesai ari menua luar milih SCORE endur beranakka puku sida, nya alai industri tu begunaka mayuh orang ke landik enggau setengan pengelandik baka Enjinir sivil, mekanikal, hospitaliti enggau mayuh agi ke bukai.

“Taja pan Batu Niah enda kena bungkur projek SCORE, tang pengawa puang tetap tebuka ngagai semua orang ke bisi ngembuan pemandai ke setipak enggau peneka  SCORE iya kira 1.3 juta pengawa puang diadang dibuka maya taun 2030 ila," ku iya.

Nangkan ke nya, Kaban Opis Direktor, AZAM Sarawak Mohamad Ariff Azahari madah, timbal ari nembiak Sekula Sekondari Nasional (SMK) SUBIS manah amat nengah dua bengkah program ke diatur baka Tribal Boot Camp enggau Skated4Community.

“Program Skated4Community terubah iya diatur bulan June tu tadi ba PERYATIM Miri. Tu sebagi ari langgur penemu seraban pemain papan selaju iya nya Kelab Papan Selaju SD awakka main nya dikerinduka bala nembiak ari menua pesisir.

"Udah nya, program Tribal Music Boot Camp endur ngiga bala nembiak ke landik ngena perengka muzik ari Kuching sereta enggau nembiak ari menua pesisir," ku iya.

Bisi 20 iku nembiak AZAM ari Kuching bela enggau ngemujurka program nya begulai enggau lebih kurang 400 pelajar ari SMK Subis.