Penyampau pengajar pinchin dipansik

BAUM… Habibah Abdul Rahim (kanan) benung meri penerang bekaul enggau ripot tumu pasal (Penerang Eksekutif) Pelin Pemansang Pelajar Menua Malaysia 2013-2025 bepalan ba Opis Menteri Pelajar Malaysia ba Kuala Lumpur, Putrajaya.

MIRI : Kira 11.5 peratus tauka 668 iku penyampau kepala pengajar enggau prinsipal ba sekula primari enggau sekula sekondari ba Sarawak deka pinchin entara taun 2012 ngagai 2017, ku Chairman Pelin Pemansang Pelajar Menua Malaysia (PPPM) 2013-2025 Habibah Abdul Rahim.

Habibah lebuh dilawa bala media ari Gerempung Pemberita Utara Sarawak (NSJA) ba Opis Menteri Pelajar Menua Malaysia (KPM) ba Kuala Lumpur (Putrajaya) apin lama ke udah, madah kira 668 iku ari 572 prinsipal enggau 96 kepala pengajar ba Sarawak deka pinchin dalam timpuh nya.

Iya madah, statistik penyampau ba serata Malaysia bisi 5,812 iku kepala pengajar enggau prinsipal ba semua sekula primari enggau sekula sekondari ba Malaysia deka pinchin entara taun 2012 ngagai 2017.

 Ari 5,812 iku sida nya, kira 4,424 prinsipal enggau 1,388 kepala pengajar deka pinchin dalam timpuh nya.

Enti umur pinchin manggai ngagai 60 taun dikena, nyadi penyampau nya deka betambah enti dibanding enggau penyampau ke bisi dalam PPPM laban penyampau ke bisi dalam PPPM nya nitihka taun 2011, lalu penyampau ke diberi diatu nitihka penyampau ari PPPM ba taun 2012, ku iya.

Nangkan ke nya, bekaul enggau Ripot Tumu (Penerang Eksekutif-September 2012) PPPM 2013-2025 iya nya kena Oktober 2011, KPM udah ngatur pansik bekaul enggau sistem pelajar dalam menua dikena ngemansangka Pelin Pemansang  Pelajar sekula ke baru.

Iya madah, perintah udah ngaga pemutus bejalaika pansik nya dikena mansik sistem tauka atur sekula ke baru dikena napi pemar jeman ke-21.

“Pengudah  11 bulan pansik nya dipejalai, KPM bisi nerima timbal ari mayuh bengkah sumber baka ari pakar pasal pelajar ari UNESO, Bank Dunia, OECD enggau enam buah Palan Pelajar Tinggi Awam.

“Pansik tu mega nyengkaum bala ketuai ba sekula, pengajar, apai indai, mensia mayuh enggau nembiak sekula ba serata menua. Lalu pekara nya ngujungka PPPM ulih meda pengulih pemanah Atur Pelajar Dalam Menua Malaysia ngambika dibanding enggau tikas pelajar entarabansa," ku iya.

Iya madah, pelin tu mandangka tinjau atur pelajar sekula enggau tikas pengelandik nembiak dikena napi peminta guna menua dudi hari. Pelin tu mega ku iya, bisi nerangka pasal 11 bengkah atur strategik enggau operasi ke patut digaga KPM dikena nyapai juluk ati pelin pemansang nya.

Pengawa benung dikemansang dikena ngubah atur pelajar sekula lalu ngarapka mensia mayuh ulih mereti senentang pekara tu, ku iya.

Beduduk ari nya mega, ku iya Opis Menteri Pelajar Menua Malaysia agi deka beratika timbal bekaul enggau ripot tumu ari semua orang ke udah dipilih bekaul enggau pelin tu ambis laun bulan Disember 2012.

Sektor Pengangkut pemadu beguna

"Diatu kompeni penerebai bilun MASwings bisi nyediaka servis ba empat bengkah menua dalam BIMP-EAGA lalu kompeni tu bisi ngaga peminta ngagai Opis Menteri Pengangkut Malaysia ngambika ulih muka mayuh agi palan penerebai bilun ba endur bukai jemah."
Dato' Sri Kong Cho Ha
Menteri Pengangkut Malaysia


KUCHING : Sektor pengangkut entara sebengkah utai ke pemadu beguna dikena nyaup nengeri tu nyadung barang pemakai ba serata menua.

Menteri Pengangkut Malaysia, Dato' Sri Kong Cho Ha madah, Sarawak ngembuan mayuh ketuai ba dalam nengeri ke landik ari suba nyentuk ke diatu lalu tu ngujungka nengeri tu balat mansang sehari tu.

"Enti dibanding enggau negeri bukai ba Malaysia, Sarawak ngembuan mayuh padang bilun enggau pengkalan kereban pengangkut ai lalu tu setipak enggau peneka pemansang ekonomi," ku iya.

Iya madah munyi nya rambau Pengerami Makai Malam Beserimbai Enggau Aum Opis Menteri Pengangkut Menua Asia Timur Brunei Darussalam, Indonesia, Malaysia, Filipina (BIMP-EAGA) 2012 ketujuh bepalan ba sebengkah hotel tebilang ba ditu ensana (Hari Dua).

Kong madah, negeri tu mega ngembuan kompeni ngaga kapal ke pemadu besai ba dunya.

Nya alai, ku iya mayuh projek aktiviti industri enggau dagang bebesai digaga ditu beduduk ari pemansang sektor pengangkut di nengeri tu.

"Kitai bela nemu, BIMP-EAGA sebengkah kaul begulai enggau menua luar ke ditumbuh taun 1994 lalu tuju iya dikena ngulihka asil dagang, dagang temuai, enggau asil ari beranakka puku ari menua dikuasa EAGA.

"Objektif tu ulih dijapai nengah chara anang nekul pengikup mensia mayuh, tuju iya ngambika produk enggau servis iya ke dikemansang ulih laku," ku iya.

Kelimpah ari nya mega, iya madah ba aum ke sekali tu, bala iya bebendar agi berundingka chara ngemansangka kereban pengangkut ba darat, tasik enggau langit awakka ulih nguntungka semua orang.

"Diatu kompeni penerebai bilun MASwings bisi nyediaka servis ba empat bengkah menua dalam BIMP-EAGA lalu kompeni tu bisi ngaga peminta ngagai Opis Menteri Pengangkut Malaysia ngambika ulih muka mayuh agi palan penerebai bilun ba endur bukai jemah," ku iya.

Kong madah, atur pengangkut ke sikar diatur ngelimpas menua luar entara utai ke mar tang enda ibuh irau laban pemansang sosio-ekonomi dalam menua BIMP-EAGA endang tetap bekerejasama.

Sama bisi datai ba pengerami makai malam tu iya nya Kepala Menteri Pehin Sri Haji Abdul Taib Mahmud enggau bini iya, Puan Sri Raghad Kurdi Taib, Sapit Kepala Menteri Datuk Patinggi Tan Sri Alfred Jabu Numpang, Menteri Pemansang Infrastruktur enggau Penyambung Dato Sri Michael Manyin Jawong sereta bala menteri kabinet negeri ke bukai.

Sistem Tagang ulih ngumpan ati temuai

BARIO : Serakup Babas Sarawak (SFC) besaup enggau Opis Babas Sarawak sereta  Opis Betanam Betupi Sarawak mujur ngatur "Sistem Tagang" ba Sungai Kelapang ke mungkur  tiga buah kampung iya nya Pa Dalih, Pa Mada enggau Kampung Ramudu.
   
Penulung Menteri Rampa Menua Datuk Len Talif Salleh madah, atur nya manah amat awakka ikan ba sungai nya majak mayuh sereta ulih narit ati bala temuai menua luar nemuai ngagai Sarawak jemah.
   
Reti Sistem Tagang tu iya nya dikena nagang mensia mayuh nyaga ikan awakka mayuh dulu sereta meransang eko-dagang temuai kelimpah ti nyaga pemeri sungai.
   
"Naka ke diatu bisi 52 iti "Tagang" ba serata nengeri tu lalu kitai naka ulih ngasuh atur tu sebagi ari chara dikena narit ati temuai nemuai ngagai menua tu," ku iya ba ditu.

Iya madah, mensia mayuh ke nguan menua nya dilalau nyukung sistem tagang ngambika eko-dagang temuai majak mujur jemah.
   
Nengah kerejasama entara agensi perintah enggau rayat ke nguan menua tu, aku pechaya projek tu endang nadai penanggul dikemujur, ku iya.

SCORE entara koridor pemadu manah di M'sia

PENGGI SEDUAI… Rosey Yunus nyuaka perais ngagai duai iku pesereta program ke udah mujur ba sebengkah pekit ke diatur, bela bisi dipeda Mohamad Ariff Azahari.

BATU NIAH : Koridor Renewable Energy Sarawak (SCORE) sebengkah ari agenda pemansang ke epmadu manah enti dibanding enggau koridor-koridor bukai di Malaysia, juluk ati SCORE deka nempa Sarawak nyadi sebuah negeri ekonomi ngembuan penatai pemisi ke besai maya taun 2030.

Pemujur SCORE tu jemah balat bepanggai ba raban nembiak peranak (Sarawak) empu laban tebal agi pengawa puang ke disedia ba  SCORE endang ngiga nembiak ba nengeri tu empu, taja pia ukai nyamai deka napi nyatup pengawa nya enti bala nembiak ngibuhka pelajar sekula.

Penulung Menteri Pelajar Tumu Nembiak enggau Pemansang Ruang Bilik Rosey Yunus madah munyi nya rambu Program Pemansang Nembiak  “Gegaran Belia Niah” diatur Angkatan Zaman Mansang (AZAM) Sarawak bepalan ba Dewan Masyarakat Batu Niah malam Hari Minggu tu tadi.

Iya madah, tuju program nya diatur ba pun taun tu dikena meransang bala nembiak ari menua pesisir, beratika pengelandik sereta nyungkak pengulih sida dikena napi pemansang dalam gelumbang kedua ba Sarawak.

Program tu mega nyadi pantar endur nempa pemanah ulah enggau daya idup ke bepengerai awakka sida nembiak ulih nyadi orang ke menyana dudi hari, ku iya.

Rosey ti mega nyadi Kaban Kunsil Negeri N.61 Bekenu madah, mayuh bengkah pengawa puang disedia ba SCORE lalu bidang ke pemadu laku iya bidang teknikal.

“Kenyau ari taun 2008, mayuh bengkah kompeni bebesai ari menua luar milih SCORE endur beranakka puku sida, nya alai industri tu begunaka mayuh orang ke landik enggau setengan pengelandik baka Enjinir sivil, mekanikal, hospitaliti enggau mayuh agi ke bukai.

“Taja pan Batu Niah enda kena bungkur projek SCORE, tang pengawa puang tetap tebuka ngagai semua orang ke bisi ngembuan pemandai ke setipak enggau peneka  SCORE iya kira 1.3 juta pengawa puang diadang dibuka maya taun 2030 ila," ku iya.

Nangkan ke nya, Kaban Opis Direktor, AZAM Sarawak Mohamad Ariff Azahari madah, timbal ari nembiak Sekula Sekondari Nasional (SMK) SUBIS manah amat nengah dua bengkah program ke diatur baka Tribal Boot Camp enggau Skated4Community.

“Program Skated4Community terubah iya diatur bulan June tu tadi ba PERYATIM Miri. Tu sebagi ari langgur penemu seraban pemain papan selaju iya nya Kelab Papan Selaju SD awakka main nya dikerinduka bala nembiak ari menua pesisir.

"Udah nya, program Tribal Music Boot Camp endur ngiga bala nembiak ke landik ngena perengka muzik ari Kuching sereta enggau nembiak ari menua pesisir," ku iya.

Bisi 20 iku nembiak AZAM ari Kuching bela enggau ngemujurka program nya begulai enggau lebih kurang 400 pelajar ari SMK Subis.

250 Tuai rumah nulak SWP

KE PENGINGAT...Kunsilor Entalai begulai enggau Nyalau, Rayong sereta temuai ke bukai pengudah tembu Aum Besai Gerempung Tuai –Tuai Rumah N.28 Engkilili.

ENGKILILI : Parti Pekereja Sarawak (SWP) dipeda langsung nadai nerima sukung ari bala Tuai Rumah ba sitak Parlimen Lubok Antu maya nyau semak Pengawa Bepilih Besai Ke-13 (PRU-13) tu.

Pekara nya nyengala dipeda pengudah 250 iku  tuai rumah ba menua ke dipegai Kunsil Negeri (DUN) Engkilili bela beamat-amat madahka sida enggai nyukung chalon SWP ke deka bediri ba kerusi Parlimen Lubok Antu iya nya Larry Sng Wei Shien.

Sida enggai meda kerusi Parlimen Lubok Antu nyadi menalang endur raban SWP betuie, ku Chairman Gerempung  Tuai-Tuai Rumah DUN Engkilili, Kunsilor Tr Roy Edward Entalai.

“Beduduk ari nya kami naka ulih nyukung William Nyalau Badak awakka iya ulih ngetanka kerusi parlimen tu ngena tiket Barisan Nasional (BN) maya PRU-13 ila," ku iya.

Entalai mega ngelalau semua pengundi ba Parlimen Lubok Antu ngambika enda pambar ari pangan diri, udah nya nulak Larry Sng laban iya ukai orang asal datai kandang parlimen nya.

Tambah mega, ex ADUN Engkili sebedau tu iya nya Toh Heng San bisi meri jaku lalau enda ngasuh rayat ba endur nya milih orang bukai ke ukai peranak asal ba menua nya.

“Badu ngena isu  Toh Heng San. Udah datai maya iya rayat ba sitak Parlimen Lubok Antu milih orang menua tu empu nyadi pengari rayat maya PRU-13 ila," ku iya.

Tr Kanselor Entalai madah munyi nya ngagai pemberita pengudah tembu Aum Besai Gerempung  Tuai – Tuai Rumah N.28 Engkilili ke diatur ba ditu kena Hari Enam tu tadi.

Aum nya dipenyadi Kaban Parlimen Lubok Antu, William Nyalau Badak sereta diuluka Kaban Kunsil Nengeri (ADUN) Engkilili,  Dr Johnnical Rayong Ngipa.

Penyeranta sida Wong sebilik dipalik e-Kasih

NGABAS RAYAT…ADUN Telang Usan Dennis Ngau begulai enggau Tuai Rumah Sg. Brit TR. Randie enggau pengari Kapitan ba Poyut Tie Ching Ming ngabas gaya rumah Wong Chin Ung (enda bebaju ) enggau bini iya  Puan Huang (dua kiba).

MARUDI : Penyeranta sida Wong sebilik dipalik program e-kasih nengah bantu Projek Rumah Rayat ke beungkus RM50,000.

Orang ke bempu rumah tu Wong Chin Ung, 56, enggau bini iya Puan Huang Ah Moi, seduai diau ba rumah ke chukup merempit begulai enggau enam iku anak seduai kenyau 20 taun ke udah.

Wong madah, iya enggau bini iya enda tegaga ke rumah baru laban ngembuan penanggul suntuk belanja.

Lebuh ke dirandau Utusan Sarawak, iya madahka diri nadai ngembuan kereja tetap lalu gaji ke ulih iya semina chukup kena meli barang dapur, pia mega dikena nyengulaka bala anak.

“Aku meri terima kasih ngagai perintah BN laban udah nulung kami sebilik ngaga rumah baru lalu aku gaga ati sereta gagit ati deka nguna rumah baru nya.

Wong madah, dua iku anak iya ke benung besekula diatu seiku lelaki ba pom dua lalu seiku indu ba pom enam belajar ba sekula sekondari Marudi.

Nangkan ke nya, empat iku anak iya ke bukai gawa ba Miri enggau Kuching lalu anak iya ke tuai beumur 26 taun gawa ba Brunei.

“Aku gaga ati nerima penatai pengari rayat Dennis Ngau sereta bala iya laban ke sanggup nyenguk pengidup kami sebilik sereta nulung mutarka penanggul ke ditapi ngelama tu," ku Wong.

Rumah Arau deka digaga mayuh agi

MERESA AGU ... Dr Haji Mohd Puad Zarkashi meresa agu nembiak sekula SK Sangan Iban ke disempulang Datuk Joseph Entulu enggau Tuai Dipebasa  PIBG SK Sangan Iban, Jubang Seri.

BINTULU : Opis Menteri Pelajar Malaysia deka ngaga mayuh agi Rumah Arau ba menua pesisir di nengeri tu ngambika mayuh agi nembiak  prasekula ulih bemalam belajar ba sekula.

Sapit Menteri iya, Dr Haji Mohd Puad Zarkashi madah, pemanah Rumah Arau nya digaga dikena ngemuntangka bala apai indai nembiak bemalam lebuh ke nganjung bala anak sida belajar ba sekula.

"Apai indai enggau nembiak prasekula dikemendarka bemalam ba Rumah Arau endur nguan anak sida pengudah ambis belajar ba prasekula," ku iya rambau aum begulai enggau media pengudah ngabas SK Sangan Iban ba DUN Kakus ditu.

Ba Sarawak, opis menteri pelajar udah ngaga dua buah Rumah Arau ba Nanga Mentah, Kapit enggau ba Lubok Ipoh semak Song ke beungkus RM50,000 sebuah, ku iya lalu madah opis menteri iya mega deka ngaga pansik ngambika Rumah Arau ulih digaga ba SK Nanga Penyarai.

Iya ti mega nyadi Kaban Parlimen Batu Pahat madah, semina apai indai ke bisi nganjung anak ngagai prasekula aja dikemendar diau ba Rumah Arau sepemanjai anak sida nembuka pelajar.

Nangkan ke nya, iya mega madahka Rumah Arau tu bisi disediaka enggau lapan bilik, sereta disediaka enggau perengka dapur nyengkaum perengka ke bukai dikena nyumai.

Puad madah, Opis Menteri Pelajar arap bendar udah tu deka mayuh agi penyampau nembiak prasekula ngerijista diri ba sekula iya nya niki ngagai 92 peratus maya taun 2015 ila.

Kebuah pia, ngelama tu semina 87 peratus aja nembiak prasekula bisi ngerijista diri belajar ba sekula.

“Ba taun 2012, kami meda bisi 87 peratus nembiak masuk prasekula, lalu berebak enggau nya mega nembiak ke beumur empat taun mega dikemendarka besekula.

“Belajar baka tu meh sebagi ari chara perintah dikena mantu rayat ari menua pesisir laban semian ari pelajar sekula sida ulih ngubah pengidup diri dudi hari," ku iya.

Nangkan ke nya, iya ngelalau bala apai indai nembiak ngambika terus meransang bala anak sereta meri sukung ngagai bala pengajar ke ngajar bala anak sida.

“Anang ngumbai belajar ba menua pesisir nyadika penanggul bala anak ulih mujur baka orang bukai. Tang meseti nyadika penusah nya peransang endur bala anak ransing agi belajar.

“Pemujur SK Ulu Lubai, ba Limbang patut diambi nyadika chunto laban sekula nya udah nyadi Sekula Tikas Tinggi (SBT), kebuah pia laban sekula tu mega ba menua pesisir," ku iya.

Kelimpah ngabasa SK Sangan Iban, Puad mega bisi ngabas  SK Nanga Tau, SK Sungai Muput, SK Nanga Penyarai, SK Sungai Sepiring, SK Nanga Kua enggau SK Nanga Arau di Ulu Mukah sereta SK St. Mark, Nanga Tamin, Oya lalu pejalai iya disempulang Sapit Menteri Pemansang Menua Pesisir Wilayah ti mega nyadi Kaban Parlimen Selangau,  Datuk Joseph Entulu anak Belaun sereta Penulung Menteri ba Opis Kepala Menteri ti mega nyadi  ADUN Kakus, Datuk John Sikie anak Tayai.

Miki perengka sekula

RM29.77 juta bantu diberi ngagai sekula mission ba negeri tu

1MALAYSIA... Dato' Sri Peter Chin Fah Kui enggau bala pemesai ke bukai begambar ngambika pengingat rambau Pengerami Nyuaka Duit Bantu Ungkup Sekula-Sekula Mission ba Sarawak ke diatur bepalan ba Sekula Sekondari Nasional (SMK) St. Joseph Kuching.

KUCHING : Bisi 127 buah sekula mission ba serata nengeri tu nerima chek duit RM29.77 juta ari perintah besai ungkup taun tu.

Menteri Tenaga, Teknologi Gadung enggau Ai Malaysia, Dato' Sri Peter Chin Fah Kui madah, tuju duit bantu nya diberi dikena miki perengka guna ba sekula baka miki opis pengajar, bilik kelas nembiak, meli jemari baru enggau perengka guna ke bukai.

"Rintai sekula ke patut dulu diberi bantu udah dikelala berindik ari penemuai Opis Menteri Pelajar ke udah ngabas ngagai genap buah sekula tu sebedau tu,' ku iya.

Iya madah munyi nya rambau Pengerami Nyuaka Duit Bantu Ungkup Sekula-Sekula Mission ba Sarawak ke diatur bepalan ba Sekula Sekondari Nasional (SMK) St. Joseph Kuching, ba ditu kemari (Hari Lima).

Chin madah, bala opis menteri enggau komiti pekara khas udah ditumbuh ngambika mansik bekaul enggau pekara ke patut dimiki ba sekula mission tu.

"Maya 11 haribulan September tu tadi, perintah udah numbuhka Pelin Pemansang Pelajar (PPP) ke deka belabuh dikena taun 2013 ngagai 2025 lalu bisi 11 batang atur dikena nyungkak ubah pelajar menua nuju tikas ke tinggi agi," ku iya.

Kaban Parlimen Miri tu mega madah, tuju ripot keterubah ari PPP dikena beratika timbal ari mensia mayuh sebedau pelin nya diputuska kena bulan Disember ila.

"Pelin tu deka dikena dalam timpuh 13 taun lalu iya dibagi ngagai tiga renggat Gelumbang 1 (2012-2015) lebih ngagai pekara miki atur enggau ngiga chara nyukung pengajar sereta enggau nempa pekara asal ; Gelumbang 2 (2016-2020) ngelengkaska semua atur ke udah digaga dalam gelumbang keterubah ; enggau Gelumbang 3 (2021-2025) nuju ngagai tikas penyulut nengah operasi ari bemacham chara," ku iya.

Nya alai, ku iya, perintah Barisan Nasional (BN) endang ngemeratka pekara tu bepun nembiak belajar ba tikas ke pemadu baruh ngagai tikas ke pemadu tinggi.

"Taja pan kitai ngembuan kuing politik ke enda sebaka, tang aku ngarapka semua kitai ulih besekung ngemeratka pemanah pelajar sekula ngambika meri penguntung ngagai raban nembiak rebak dudi," ku iya.

Bela bisi datai maya nya, Sapit Kepala Menteri, Datuk Patinggi Tan Sri Alfred Jabu Numpang, Menteri Pengeraja Asal enggau Rampa Menua, Dato Sri Douglas Uggah Embas, Sapit Menteri Sains, Teknologi enggau Inovasi (MOSTI), Datuk Haji Fadilah Haji Yusof, Sapit Menteri Dagang Dalam Menua, enggau Pekara Bebeli Barang (KPDNKK), Datuk Hajah Rohani Abdul Karim enggau Sapit Menteri Luar, Datuk Richard Riot Jaem.






 

RTM dipinta nyaup nabar berita ari RFS

BEJADI PENGERAMI...Nyalau diuluka bala temuai ke bukai melah kek tanda bejadi Pengerami Medeka Raya RTM Sri Aman 2012.

SRI AMAN : Radio Televisyen Malaysia (RTM) dipinta nyaup perintah nabar berita ke dipansutka Radio Free Sarawak.

Kaban Parlimen Lubok Antu, William Nyalau Badak madah, Radio Free Sarawak (RFS) suah ngemansutka berita bejai perintah Barisan Nasional (BN) lalu pekara nanggi dikarapka rayat ke diau ba menua pesisir.

“Jaku petenah ari RFS suah dikumbai orang amat. Berita bula baka nya patut ditabar RTM enggau lengkas ngambika rayat menua pesisir pechaya baru ngagai perintah.

“Nya alai, aku ngarapka RTM bebendar agi nyadaka pekara ke amat senentang perintah BN awakka meri penguntung ngagai semua rayat kelebih agi sida ke diau ba menua pesisir," ku iya.

Iya madah munyi nya lebuh bejadi Pengerami Merdeka Raya 2012 ke diatur ba mua bilik besai dalam opis RTM Sri Aman, apin lama ke udah.

Nangkan ke nya, Nyalau ngarapka program berita jaku Iban ke ditabur terus nengah Astro Tvi ditampung panjai agi ngagai setengah jam enti dibanding semina 15 minit aja ngelama tu.

“Timpuh program berita Iban ba Astro TVi pengelama setengah jam tu dipelaba ulih meri penerang ke mayuh agi ngagai orang Iban bekaul enggau berita pemansang enggau isu dalam menua.

“Tambah mega, orang Iban nyamai agi mendingka berita dalam jaku Iban empu. Nya alai, enti ulih aku ngarapka program ke mayuh baka ngerindang ati dalam TVi ulih diganti enggau program ke manah agi baka tu," ku iya.

Sama bisi datai iya nya Sapit Residen (Pemansang) Sri Aman, Haji Hamsein Atar, Pengari Penulung Direktor Pengeluar Program Sarawak, Faridah Sulong, Menija RTM Sri Aman, Valentine Jefferson, Menija RTM Sibu, Albert Mentri, bala pemesai opis perintah enggau bala tuai raban bansa ke semak.

Pengerami nya mega dirami enggau sekeda aktiviti baka pengawa bekaraoke ari bala staf RTM Sri Aman, nyuaka bantu ngagai ruang bilik niang Balkis Abdul Wahed, pemeri ngagai bala nembiak ke nadai bidik lansik, sumbangan kepada kanak-kanak istimewa, nyabuit tiket benasit enggau makai malam.

Lima iku kaban SUPP pansut ari parti

Asa ketegal bala tuai lubah ngatur Pelin Transformasi SUPP

BETERUS TERANG ... Kapitan Kuek benung madahka pemutus diri badu nyadi kaban komiti Pampang SUPP ngagai media ba opis SUPP Simanggang.

SRI AMAN : Lima iku kaban Parti Rayat Bersatu Sarawak (SUPP) ngaga pemutus ngemansutka diri ari nyadi kaban komiti parti nya berengkah ari kemari (Hari Empat).

Chai Tze Hiung enggau Tiong Chong Onn ari SUPP pampang Simanggang, Kapitan Kuek Aik Seng enggau Edward Radin Utek ari SUPP pampang Lingga sereta Liew Shan Boo ari SUPP pampang Pantu madahka diri pansut ari parti lalu pengawa sida nya dikemataka Seketeri Kereja SUPP Simanggang Kunsilor Sawing Sumar enggau Seketeri SUPP Lingga, Waterkiller James Junit ba Opis SUPP Simanggang kena pukul 3 lemai.

“Pemutus nya digaga baka nya ketegal lima iku sida tu asa ati meda perangai bala tuai SUPP kelalu lubah ngatur Pelin Transformasi SUPP baka ke udah disemaya ngelama tu.

“Kami nyadaka pengasa ati bekaul enggau pekara nya laban ketuai parti tu dipeda enda bebendar nyerakupka bala kaban dalam parti," ku Kapitan Kuek.

Pemuntan  bala tuai SUPP mutarka penanggul nya ku iya,  ngujungka bala kaban dalam parti nya pambar nyentuk ngagai gerempung bansa China jba maya  ke diatu.

Taja pia, sida lima iku nya agi angkun ngagai SUPP sereta terus nyukung pengari rayat SUPP N.27 Simanggang iya nya Datuk Francis Harden Hollis ngambika pengidup rayat ba endur nya terus dikemansang.

"Nya alai, kami ngarapka pemutus pansut ari parti tu ulih ngasuh bala bukai dalam parti berunding manah agi enti deka enggau bebendar ngaduka Pelin Transformasi SUPP udah tu," ku iya.

Kuek ti mega nyadi Chairman SUPP pampang Lingga meri terima kasih ngagai bal tuai parti nya laban ke udah kala meri peluang ngagai sida nyadi kaban komiti pampang parti nya ngelama tu.

Dulu ari nya, parti SUPP deka ngatur Aum Pampang Komiti (CC) bepalan ba indu opis parti nya kena 23 haribulan September ti ba Kuching.

Bajet 2013 entara 'Bajet Manah' - Peter

KUALA LUMPUR (Putrajaya) : Bajet 2013 ke deka dipejuraika Menteri Besai Datuk Sri Najib Tun Razak kena 28 September tu ila dikumbai ‘Bajet Manah’ lalu meri penguntung ngagai semua rayat.

Menteri Tenaga, Teknologi Gadung enggau Ai Datuk Sri Peter Chin Fah Kui madah munyi nya rambau randau begulai enggau bala pemberita ari Gerempung Pemberita Utara Sarawak (NSJA) ba opis menteri iya ba ditu kemari (Hari Empat).

“Aku ngarapka Bajet 2013 ke deka dipejuraika tu ila ulih nyadi 'Bajet Manah' ke meri penguntung ngagai semua orang.

“Bajet manah tu reti nya meri penguntung ngagai menua enggau bansa lalu udah nya ngangkatka pemujur ba tikas sosial enggau ekonomi,”ku iya.

Iya madah, penguji ke pemadu mar ditapi kitai iya nya nguji ngubah penatai pemisi menua ba tikas ke meruan manah baka selama lalu udah nya ngatur belanja dalam menua ngambika enda ngelui ari pemisi ke bisi dalam menua.

Dikena nyapai juluk ati nya, kitai begunaka mayuh pekara ke ulih narit ati orang dagang ari menua luar endur beranakka puku ba menua tu awakka ngemujurka Program Transformasi Ekonomi baka ke suah disebut Menteri Besai,ku iya.

Lebuh ditanya senentang kemaya pengawa belilih besai (PRU) ke-13 diatur. Peter Chin melabaka PRU 13 diatur kena bulan April 2013.

Pia mega, PRU 13 engka diatur pengudah Bajet 2013 dipejurai, pekara tepulai ngagai tuai parti  Barisan Nasional.

Iya mega nyadaka chalon ke nukar iya maya PRU 13 ila ba sitak Parlimen Miri iya nya Dato Sebastian Ting ti mega nyadi Seketeri Politik ngagai Menteri Tenaga, Teknologi Gadung enggau Ai, ku iya.

GAGA ATI… Datuk Peter Chin Fah Kui enggau Dato Sebastian Ting mandangka pengaga ati rambau berandau enggau bala pemberita ari Gerempung Pemberita Utara Sarawak ba opis iya di Putrajaya.  

Raban nembiak PBB ngerami penatai Menteri Besai

SIBU : ‘Pemuda Menyokong Kepimpinan Pehin Sri’ enggau ‘Janji Ditepati, Rakyat Sejahtera’ entara genteran jaku dalam baner ke dipegai raban nembiak PBB Wilayah Tengah rambau nyambut penatai Menteri Besai enggau Kepala Menteri ba ditu kena 16 September tu tadi.

Menteri Besai, Datuk Patinggi Mohd. Najib Tun Abdul Razak ke diuluka bini iya, Datin Patinggi Rosmah Mansor enggau Kepala Menteri, Pehin Sri Haji Abdul Taib Mahmud enggau bini iya Puan Sri Ragad Kurdi Taib disambut bala raban nembiak  PBB maya iya ngulu Pengerami Ramah Tamah Hari Raya Aidilfitri begulai enggau Menteri Besai ba laman Masjid An-Nur ditu.

Baner nya dipegai bala nembiak PBB sereta dibai bejalai kira sekilometer penyauh ari Jalai Kuda nyentuk ngagai mua laman Masjid An-Nur.

Lebih 2,500 iku kaban PBB Wilayah Tengah ba negeri tu bisi sama enggau bejalai bebala mayuh betuaika Penulung Ketuai sida iya, Pandi Suhaili enggau kaban komiti, Haji Radin Kadri Radin Budiman.

Sama bisi datai iya nya Tuai Raban Nembiak Pampang PBB ba menua tengah.

Bala kaban nembiak PBB ke bisi enggau bejalai bebala mayuh tu iya nya sida ari Saribas, Saratok, Sarikei, Bintangor, Semop, Kanowit, Kapit, Song, Selangau, Dalat, Mukah enggau Sibu empu.

Penatai bala nembiak PBB nyau ngerami agi pengerami Hari Raya Aidilfitri begulai enggau Menteri Besai nya lalu tu nandaka bala nembiak PBB endang nyukung kepala menteri enggau parti iya.

NYUKUNG BALA TUAI...Raban nembiak PBB Wilayah Tengah megai baner lebuh ke nyambut penatai Menteri Besai enggau Kepala Menteri ba  Sibu.

Opis menteri minta Seksyen 294 Kanun Tatacara Jenayah diubah

KUCHING : Opis Menteri Pengintu Pendiau Orang Indu enggau Pemansang Ruang Bilik minta Seksyen 294 Kanun Tatacara Jenayah diubah baru ngambika bisi atur ke manah agi ungkup bala nembiak mit ke nyadi mansa kes jenayah.

Menteri iya, Datuk Hajah Fatimah Abdullah madah, bala nembiak ke nyadi mansa pasung patut dijaga tauka diintu laban sida agi biaka sereta bedau nemu runding bekaul enggau undang-undang.

Iya madah, pekara ke baka nya diperundingka pengudah iya nerima dua it ripot pasal kes pasung senentang  nembiak ke baruh umur lalu nya dikumbai kes 'Rogol Berkanun'.

"Orang ke besalah ngereja pengawa nya beumur 21 enggau 19 taun lalu mansa baru beumur 12 enggau 13 taun.

"Taja baka nya, dua iku pesalah nya udah dilepau sereta dikat jamin RM25,000 ngaduka pemereti ati, seduai iya enda dijil pengudah dituduh masung indu baruh umur," ku iya.

Nya alai, iya madah, ubah patut digaga bekaul enggau undang-undang ngambika nembiak ke udah kena pasung nya ulih dijaga perintah.

TERIMA KASIH ... Dato Vincent Chapman (enam kiba) nyuaka chek ngagai Chairman Kaban Opis Temuai Taman Sri Putri Kuching (TSPK), Raja Hajah Noor Akmar Raja Kamil (empat kanan) sereta diperatika  Datuk Hajah Fatimah Abdullah, Rosey Yunus (tiga kanan), Noriah Ahmad, Datin Hajah Natsiah Mahfoz (kanan) sereta bala kaban TSPK ba Kuching.

Iya madah munyi nya ngagai pemberita pengudah pengawa nyuaka chek ulih Menija Korporat Pemansang Tanah KTS Holding Sdn Bhd nengah Yayasan KTS, Dato Vincent Chapman ngagai Taman Seri Puteri Kuching (TSPK) ba Wisma Wanita, ditu apin lama ke udah.

Chek ungkup bala kaban opis temuai TSPK dikena ngintu pengelantang bala nembiak ke dianjung ngagai TSPK kelebih agi bekaul enggau aktiviti pelajar enggau latih bala nembiak ke bisi dia.

TSPK diatu bisi 24 pelatih tetap, lima iku pelatih reman enggau empat pelatih patut dijaga enggau jmapat (nyengkaum tiga iku indu ke ribat)lalu penyampau semua pelatih diatu bisi 33 iku.

Berebak enggau nya, Fatimah madah kes ngandung anak ampang ke diripot nyadi ba nengeri besai baka ba Kuching, Sibu, Miri enggau Bintulu makin hari majak nambah.

Iya madah, opis menteri iya mega bisi meri bantu ngagai raban indai tunggal dikena nulung raban sida nya.

Ngemansangka tanah puang dikena betanam betupi

NYADIKA PENGINGAT... Sekeda raban  penyereta begambar enggau ADUN Saribas, Mohammad Razi Sitam pengudah pengerami Nyuaka Perengka Betanam Betupi Ngagai Penyereta  Betanamka  Limau Manis diatur ba  Dewan LAKID, Debak.  

DEBAK: Nyerumba pengawa dikena nyungkakka pemanah tikas  sosio-ekonomi rayat Debak,  mayuh bengkah atur enggau peminta perintah udah diperambu dikena ngemansangka tanah puang rayat.

Kaban Kunsil  Negeri (ADUN) Saribas, Mohammad Razi Sitam madahka, tu nyengkaum semua tanah ke puang ke ditejuka pia aja.

Iya madahka, rayat patut meri kerejasama ke manah ngagai perintah lalu madahka perintah sigi enda ngambi tanah rayat tang nguji deka ngemansangka tanah puang awakka meri penguntung.

"Perintah udah mayuh ngaga perambu pemansang dikena mantu rayat nambahka penatai pemisi sida.

"Nyadika chunto, skim namam  limau manis  ba  tanah  Kampung Lalang ditu, lalu enti sema iya diatur enggau  bebendar iya  ulih nguntungka asil ke mayuh," ku iya.

Iya mansutka jaku munyi nya lebuh bejadi pengerami Nyuaka Perengaka  Pengawa Betanam  Betupi Ngagai Penyereta Betanamka  Limau Manis ke diatur ba  Dewan LAKID, apin lama ke udah.

Iya  mega madahka, rayat patut berasai lantang ati sereta meri besai terima kasih ngagai perintah ketegal ulih meri mantu semua perengka ke berega  beratus ribu  chara pechuma.

"Tu mandangka pemendar ati perintah  Barisan Nasional (BN) ke sigi amat ngemeranka  nasip rayat , lebih agi mantu sida ngangkatka tikas pemanah penatai pemisi.

Ku iya, kelimpah ari  projek namam  limau, perintah mega nitihka atur ari  agensi IADA  ke deka nyendiaka  projek nupi  kambin, manuk , chapi  enggau serati ba taun baru ila.

" Aku ngarapka rayat ngena peluang enggau ruang tu gawa enggau bebendar agi awakka terus maju.

"Baka nya  mega, aku enggau kaban  Parlimen P.204 Betong, Dato Sri Douglas Uggah Embas deka terus mantu rayat ngambika sama enggau ngemajuka menua," ku iya.

Nya alai, iya ngarapka pengawa perintah tu ulih mantu rayat lebih agi ngagai sida  ke diau ba sitak  DUN Saribas dikena ngurangka tikas penyeranta ngagai  rayat ke diau ba menua pesisir.

Ba pengerami ke sama  Razi  mega madahka iya sigi bebendar deka ngemansangka kandang  Debak  enggau Saribas lebih agi ba pengawa ngemansangka sektor betanam betupi sereta deka nyendiaka siti  Pasar Tamu  ba Debak.

"Beduduk ari nya, aku ngarapka rayat nyukung penuh perintah  BN ngambika nyulut ba  agenda pemansang ," ku iya.

Dulu agi ari pengawa tu, bisi  38  iku penyereta nerima bantu perengka  skim namam  limau ke diatur Komiti Pengawa Betanam Betupi Pelilih  Debak begulai enggau IADA Bagi menua  Betong.

Perais besai nganti pemenang pekit nginti Tasik Belawai Ke-2

PERAIS PEKIT NGINTI… Pengari Shimano, Yeo Tsin Ee (tengah) nyuaka perais disponser ngagai Chairman Kelan Pemkancing Sibu, Wong King Uieng lalu dikemataka Peter Sia (tengah) enggau bala ke bukai ba Sibu. Perais nya ungkup bala pemenang pekit nginti Tasik Belawai Ke-2 Kali diatur kena 16 September tu.

SIBU : Raban orang ke rindu nginti ba serata nengeri tu dipinta sampal datai nyereta pekit nginti ba Tasik Belawai Ke-2 Kali ba ditu kena 16 September tu.

Pengatur Pekit bisi nyediaka perais duit enggau perengka dikena nginti ke beungkus lebih RM20,000.00 ngagai orang ke mujur nyadi champion. Perais deka diberi ngagai orang ke mujur bulih lumur satu ngagai lumur 10, ku Chairman pengatur Pengawa, Peter Sia.

Iya madah munyi nya ngagai pemberita pengudah nerima perais ke dispnser pengari Shimano, Yeo Tsin Ee ba ditu, hari Empat tu tadi.

Pekit nginti ba Tasik Belawai Ke-2 kali tu diatur Kelab Nginti Sibu bekerejasama enggau Kelab Rando Belawai lalu disponser Shimano sereta disukung OFT Pancing Sdn. Bhd.

Peter Sia madah, pekit tu dibagi ngagai dua kategori iya nya Kategori A ditatak ngagai orang ke nginti ngena perengka Shimano lalu Kategori B dibuka ngagai semua pesereta.

Kategori A nyediaka perais perengka nginti chap Shimano ngagai orang ke mujur nyadi champion nyentuk ngagai lumur 10, udah nya, ba Kategori B nyedia perais duit enggau trofi ngagai bala pemenang lumur satu ngagai lumur 10.

Champion Kategori A deka nerima Spinpower reel + Areo cast rod, lumur dua – PA prosurf thick plus + Vengeance surf rod, (Tiga) – PA albrid cl4 + Alivic surf rod, (Empat)– Sienna 4000Fd, (Lima) – Alivio 6000FA, (Enam) – Hyperloop 6000FB, (Tujuh)  – FX 4000, (Lapan) – FX 2500, (Semilan)– Cruzarm 2902 enggau lumur sepuluh – 2802.

Nangkan ke nya mega Champion B deka nerima perais duit RM1,000 enggau trofi, lumur dua – RM600 enggau trofi, (Tiga) RM300 enggau trofi, lumur empat ngagai sepuluh bela nerima RM100 enggau trofi.

Raban pengatur pengawa mega, ku iya bisi nyediaka perais baka kekili Alivio 10000FA ngagai orang ke mujur bulih ikan lebih 2kg pemerat (kelimpah ari ikan pari, yu enggau belut) udah nya, 30 hamper disedia ungkup bala pemenang chabut tiket benasit (no. pesereta nginti).

Yuran dikena nyereta pekit tu RM20 ungkup Kaban Kelab Pemancing Sibu, RM35 ungkup orang ke ukai nyadi Kaban enggau RM40 pengudah limpas haribulan kepenudi endur ngerijista diri iya nya kena 10 September, 2012.

Iya madah, 80 pesereta ke pemadu tumu ngerijista diri ba ditu enggau 50 iku tumu orang ari Belawai deka nerima perais.

Penerang ke silik enggau pom dikena nyereta pekit tau diambi ba Suria Trading ba Pusat Tanahwang, Jalai Pedada, Sibu (084-324982), Mr. Wong 019-8167327, Mr. Lu 013-8081969 enggau Peter Sia 016-8884811.

RM30,000 diberi LSC ngagai Pandelela

Pendelela Rinong

KUCHING : Lea Sports Centre (LSC) Sdn. Bhd. chukup berasai gaga meda pemujur seiku peranak menua Sarawak ke udah bulih midul engkeraju kategori Pantar 10M Indu ba Lumba Olimpik London 2012.

Berindik ari nya, LSC deka meri perais duit RM30,000 ngagai pandelela kena nandaka pengaga ati enggau tabi puji ngagai iya.

Direktor Pengatur Pengawa Lea Group of Companies, Raymond Sim madah, "aku chukup meri tabi puji enggau pengaga ati ngagai Pandelela enggau sida iya sebilik laban ke udah mujur ba lumba nya. Iya diatu nyau nyadika chunto ngagai orang bukai laban ke udah ngangkatka nama menua Malaysia ba tikas lumba ke pemadu besai ba dunya.

"Nya alai, kami ( LSC) sebagi ari kompeni ke bisi ba menua tu deka meri perais duit RM30,000 ngagai Pandelela," ku iya.

GTP nyungkak ekonomi

MERI PENERANG... Datuk Seri Idris Jala benung meri penerang pasal GTP The Roadmap 2.0 ba mua mensia mayuh ke bela bisi datai rambau program nya.

"Pengawa perintah ti bebendar ngaduka ekonomi begunaka sukung ari semua orang. Tang, nengah GTP 2.0 pemendar perintah dipeda nyengala chukup nyata dalam pemansang  ekonomi menua."
PEHIN SRI HAJI ABDUL TAIB MAHMUD
Kepala Menteri Sarawak


KUCHING : Program Transformasyen Perintah (GTP) diatu udah ngemansutka asil lalu nya nandaka ke iya mujur nyungkak ekonomi menua kenyau iya ditumbuh tiga taun ke udah.

Kepala Menteri Pehin Sri Haji Abdul Taib Mahmud madah, GTP nyadi perambu ti kedua dikemujurka Unit Pengatur Prestasi enggau Pemujur Pengawa (PEMANDU) lalu sida deka bebendar agi udah tu ngaduka menua menua nyapai juluk ati nyadi sebengkah menua ke ngembuan penatai pemisi ke besai.

Iya madah, dikena ngemujurka juluk ati nya mayuh bengkah chara enggau perambu pemansang deka digaga nengah Bidang Keberhasilan Utama Negara (NKRA) lalu nyerangkum mayuh sukut.

"Pengawa perintah ti bebendar ngaduka ekonomi begunaka sukung ari semua orang. Tang, nengah GTP 2.0 pemendar perintah dipeda nyengala chukup nyata dalam pemansang  ekonomi menua," ku iya.

Iya madah munyi nya rambau bejadi Program Transformasyen Perintah 2.0  ke diatur ba sebengkah hotel tebilang ba ditu, ensana (Hari Lima).

Iya madah, pengulih terubah ke kala digaga GTP suba deka nyadika peransang pemujur GTP ke dua kali tu laban nya beduduk ari pemintar enggau pengelandik Datuk Seri Idris Jala.

Pehin Sri Taib madah, Sarawak dipeda mujur bejalaika GTP dikena ngangkatka servis perintah ba nengeri tu sereta nyungkak pemanah servis Opis Residen enggau Opis Kunsil.

"Sistem perintah pelilih menua deka diaduka baru ba maya dudi. Tuju iya diaduka baru ngambika semua ubah ti diperambu mujur magang," ku iya.

Iya madah, bala pemesai pelilih menua meseti nemu mayuh isu sereta ngelala raban orang ke patut dibantu ngambika sida bela ampit nerima bantu nengah program e-kasih.

"Atur pemansang ke diperambu ungkup rayat di nengeri tu bepun ari atur perintah besai lalu nya meh ke dititihka kitai," ku iya.

Ba maya nya, Pehin Sri Taib ngelalau rayta ba nengeri tu ngambi ulih nelebaka diri enggau pengawa ekonomi ke bebaru setipak enggau ubah ke maya hari.

"Koridor Energy Sarawak (SCORE) deka nyadi pun pemansang ekonomi Sarawak ba maya dudi lalu iya mega deka nyediaka mayuh pengawa puang kelebih agi bekaul enggau bidang teknikal.

"Nya alai, kitai ngarapka rayat bela ulih besemekih enggau pangan diri ngambi peluang ke bisi nya lalu naka ulih nempa diri enggau mayuh penemu teknikal awakka uih nangkup pengawa ba endur nya," ku iya.

PRU 13 : Peter Chin badu bediri

MERI PENERANG ... Datuk Seri Peter Chin lebuh dirandau pemberita pengudah Bebuka Puasa begulai enggau mensia mayuh ba sebengkah hotel tebilang Miri. Sama bisi dipeda nyempulang iya, Dato' Sebastian Ting.

"Ba Miri aku udah kelalu lama nyadi kaban parlimen. Nya alai, aku deka meri peluang ngagai orang ke biak awakka sida neruska pemansang ti diberi perintah Barisan Nasional ba Miri.
Datuk Seri Peter Chin
Kaban Parlimen Miri


MIRI : Kaban Parlimen Miri, Datuk Seri Peter Chin nyemetak bendar madahka iya enda bediri ngetanka kerusi parlimen nya ba Pengawa Bepilih Besai Ke-13 (PRU13) tu ila.

Bisi enam renggat iya udah megai Parlimen Miri, lalu diatu, iya chukup meh maya nyurutka diri lalu meri peluang ngagai chalon ke biak laban sida tu diadang ulih neruska pengawa mai pemansang ngagai rayat Miri.

Pekara nya dipansutka iya ba mua bala ketuai enggau penyukung Barisan Nasional (BN) beserimbai enggau pengawa Bebuka Puasa  ba sebengkah hotel tebilang ba ditu.

Lebih kurang 1,000 iku orang ke datai bela tekenyit ninga penerang ti dipansutka Peter Chin nya.

"Ba Miri aku udah kelalu lama nyadi kaban parlimen. Nya alai, aku deka meri peluang ngagai orang ke biak awakka sida neruska pemansang ti diberi perintah Barisan Nasional ba Miri.

"Nya alai, enda lama agi, aku nadai agi bepeluang bejaku baka tu (enti udah ambis PRU13).

"Taja pan bedau temu sapa chalon ke amat, tang pekara nya enda ibuh dikemerat laban pekara ke pemadu begunba iya nya kitai meseti nyukung BN, lalu kitai tentu ulih ngetanka  kerusi Parlimen Miri asal kitai besaup enggau pangan diri," ku iya.

Iya ti mega nyadi Presiden Parti Rayat Bersatu Sarawak (SUPP) madah, iya udah lama berundingka pemutus nya

Taja pia ku iya, dikena bebasaka tuai BN, iya deka nganjung surat ngagai Menteri Besai Datuk Seri Najib Tun Razak, awakka iya (Najib) ngemendarka pemutus nya.

"Aku udah lama ngejar orang ke deka nukar aku. Nya endang udah tanggungjawap aku ngajar iya lalu meri tanggung pengawa tu ngagai orang ke biak.

"Udah datai maya iya lalu tu meh pengujung iya. Tang aku deka nganti pemendar ari PM (Menteri Besai)," ku iya.

Taja pan enda nyebut nama orang ke nukar iya, tang mensia mayuh udah nemu Seketeri Politik iya, Dato' Sebastian Ting dipelabaka nyadi chalon nganti iya ngetanka kerusi Parlimen Miri ungkup BN.

Lebuh ripih nama chalon ungkup Parlimen Miri ke bediri PRU13 dianjung, dua iku nama ke udah disebut nyemetak diperundingka Najib iya nya iya empu (Peter Chin) enggau Sebastian.

Iya madah, Sebastian seiku orang ke udah bejalaika pengawa ngarika iya enggau chukup pemanah kenyau iya (Sebastian) mangku pengawa nyadi Seketeri Politik Menteri Tenaga, Teknologi Gadung enggau Ai nyentuk ke sehari tu.

“Orang Miri ngelala iya (Sebastian) laban iya suah datai mantu rayat, pia mega kita (pemeberita) tentu nemu pemendar iya ngereja pengawa.

"Aku chukup gaga ati meda pemanah pengawa ke udah dikereja iya," ku Peter Chin.

Lebuh ditanya enti sema pengawa iya ke narit diri nyadi chalon enda diterima Najib, Chin madah pemutus nya endang bepanggai ba iya empu lalu iya endang enggai agi nyadi Kaban Parlimen Miri.

Taja pia, iya madahka diri deka terus mangku pengawa nyadi Presiden SUPP laban timpuh iya nyadi Presiden agi lama nyentuk ngagai 2014.

Penyeranta tau nyadi peransang pengidup

ASAJAYA : Penyeranta ukai utai ke bepurih, tang kebendar iya nyadi ngagai seiku orang ngambika iya bisi peransang dikena ngubah pengidup diri ngagai tikas ke lebih manah.

Penulung Menteri Raban Nembiak enggau Pengawa Berumah, Haji Abdul Karim Rahman Hamzah madah, apai indai meseti bebendar meransang bala anak ngambika terus mujur dalam pelajar sekula.

"Ari pelajar sekula, kitai ulih ngubah nasib diri, nya alai apai indai meseti ngajar bala anak ngambika enda nyadika penyeranta penanggul endur sida ngemansangka diri," ku iya.

Iya madah, enti deka ngena pelajar ngubah pengidup diri, orang nya meseti bebendar belajar.

Iya madah munyi nya rambau Program Sejambak Kasih 2012 ke diatur Opis Pengintu Pendiau Mensia Mayuh (JKM) Samarahan ba Kampung Sambir, ba ditu, apin lama ke udah.

Ku iya, genap buah kampung endang bisi orang ke nadai nasip  lalu perintah enda kala ngemeluka pengidup sida ngambika sida ulih angkat mansang sebaka enggau orang bukai.

"Perintah mega udah numbuhka JKM dikena mantu raban sida ke baka nya, tang iya ke beguna amat sida empu meseti bebendar ngubah pengidup diri," ku iya.

Iya ti mega nyadi Kaban Kunsil Nengeri (ADUN) Asajaya madah, Asajaya ngembuan tanah ke ami alai betanam betupi sereta ngembuan asil tasik ke chukup mayuh.

"Kitai meseti landik ngena peluang ke bisi dipeda, kereja utai nya ngambika ulih ngenataika asil  lalu meri penguntung ke besai," ku iya.

Sama bisi datai maya nya, Menteri Pengintu Pendiau, Orang Indu enggau Pengelantang Mensia Mayuh, Datuk Hajah Fatimah Abdullah.

Pemujur tukuh mensia patut dikemerat - Dr. Hazland

LANDIK NYUMAI...Dr. Hazland Abang Hipni mandangka pengelandik iya nyumai bubur lambuk rambau Program Roadshow Bubur Pedas enggau Bubur Lambuk SABERKAS BERNAS ba Kampung Bako Seberang, Kuching.

BAKO : Kaban Kunsil Nengeri (ADUN) Demak Laut, Dr. Hazland Abang Hipni merambu deka bebendar agi ngemeratka pemansang pemanah perangai mensia kelebih agi ba kandang menua ke dijaga iya.

Taja pia, Hazland madah ba sukut perengka rama pan enda dileka ke iya berebak enggau juluk ati nya.

"Kenyau aku ke udah nyadi pengari rayat ba Demak Laut, dia aku meda pemansang pemanah perangai mensia patut bendar dipaju ba endur tu," ku iya.

Iya madah munyi nya rambau Program Roadshow Bubur Pedas enggau Bubur Lambuk SABERKAS BERNAS bepalan ba Padang Main Takraw, Kampung Bako Seberang ba ditu, apin lama ke udah.

Iya madah, pengawa nempa tukuh mensia ke bekualiti ukai pengawa ke muntang laban kandang menua Demak Laut enda baka endur bukai.

"Bisi sekeda kampung dipeda agi jauh tinggal pemansang ketegal agi tejanggal line komunikasyen," ku iya.

Ku iya, pekara nya kala dikenataika ngagai opis menteri enggau opis perintah ke betanggungjawap rambau aum kunsil nengeri ke udah lalu diatu benung nganti saut ari sida (perintah).

" Bisi sekeda projek nerima saut ke manah lalu bisi sekeda benung diperunding," ku iya lalu madahka bisi sekeda ari projek nya deka dirintaika dalam Langgur Pemansang Malaysia Lumpar -10.

Dulu ari nya, Kaban Pengatur Pengawa, Abang Abdul Aziz Datuk Abang Rauf madah, bisi 480 kilogram beras ditulung BERNAS dikena ngaga bubur pedas enggau bubur lambuk ba endur nya.

Udah nya, kira 50 kilogram bubur pedas ditulung sida ari Opis Betanam Betupi.