600 Kampung di s'wak bulih Wifi taun 2013

PAKAN : Pun taun baru taun siti nyin ila, 600 kampung di Sarawak deka ngasaika rengka rama wayarles (Wifi) asil ari pengeransing perintah ngemansangka rayat ti diau ba menua pesisir. Sapit Menteri Pemadah Komuniksyen enggau Main Asal Datuk Joseph Salang madah, naka ke diatu bisi 210 endur rengka rama tu udah beroperasyen ba serata negeri tu. Iya madah munyi nya rambau pengawa nyuaka lebih 300 buah komputer pangku 1Malaysia ngagai nembiak enggau tuai raban bansa ba sitak Parlimen Julau bepalan ba Nyalak Ladong, Pakan. Nangkan ke nya mega iya madahka diatu kira 116 genturung endur benung dalam proses digaga. Ba Julau aja, ku iya 12 genturung endur udah ulih dikena lalu 13 buah agi deka ulih dikena enda lama agi. Salang madah, pekara ke bansa tu endang dikemeratka perintah laban deka meda rayat nemu ngena perengka teknologi komunikasyen pemadah. Tuju iya ngambika rayat enda tinggal ari arus pemansang jeman moden. Diatu ku iya, bisi 295 buah menara komunikasyen udah beroperasyen ba serata negeri, tiga buah ba Julau, enggau 10 buah agi benung digaga. Ngenang pasal komputer pangku 1Malaysia, iya madahka ba Sarawak aja bisi 150,000 buah udah disadung enggau chara berenggat-renggat. Bejaku ba pekara politik, Salang ngelalau rayat mesti bejimat ngambika enda alah umbuk orang ngena duit rambau pengawa bepilih besai ke deka datai. "Pemesai Suruhanjaya Penagang Makai Suap Menua deka nyaru diri maya kimpin dikena nyeliahka pekara tu nyadi," ku iya. Salang berasai enda liat ati sereta asa meda perangai seiku kaban politik menua tu ke nguji deka ngaruk nama iya ba mua mensia mayuh. Iya madah, kaban politik nya bekempit enggau tuai penyakal lalu deka bediri ngelaban iya rambau pengawa bepilih besai ke deka datai ila.

Perintah ngemendarka NCR nyadi tanah Rizab Gunasama Bumiputera

BAU : Perintah negeri tu seruran deka ngemendarka tanah hak adat bumiputera (NCR) sereta gazet nyadika tanah Rizab Gunasama Bumiputera nitihka atur Seksyen 6 Kanun Tanah Negeri. Kaban Kunsil Negeri (ADUN) Opar, Ranum Mina madahka, enggau pemendar nya, kandang NCR tulin diempu raban bansa ba endur nya enggau terang agi. "Tu udah meri penyenang ngagai raban bansa ba endur nya nemu antara tanah sida, baka antara tanah sida enggau tanah perintah ke patut disukat sereta diempu . "Nya alai, nadai bisi penemu ti nuduh perintah deka ngerampas tanah NCR ari rayat pribumi ba negeri tu. Sama mega ngagai rayat diau ba Kampung Stenggang tu, laban perintah sigi ngemendarka tanah NCR ngelama tu ," ku iya. Iya mansutka jaku munyi nya ba pengerami ngelancharka pengawa nyukat tanah nitihka atur inisiatif baru NCR ngagai genturung pendiau Kampung Stenggang Bau, apin lama ti udah. Bisi pengeluas 3,599 hektar kandang tanah NCR ba Kampung Stenggang deka dikemendarka disukat kelinggi ( perimeter) ba endur nya. Ranum madahka, pengudah pengawa nyukat kelilinggi diatur ulih nyeliahka penyarut antara menua ba endur nya ila. Pia mega , pengawa ti deka nyukat tanah NCR nya tau alai ngatur pengawa dagang betanan enggau betupi ti besai tauka dimansangka begulaia enggau agensi perintah, baka nyereta SALCRA enggau RISDA. "Perintah ukai simina ngemendarka tanah NCR, tang mega deka ngemansangka tanah NCR nya nitihka Konsep Pemansang Tanah NCR tauka ladang rayat ti deka nyendiaka pemanah ekonomi rayat," ku iya. Ranum ngelalau rayat Kampung Stenggang berandau terus enggau staf Opis Tanah enggau Survei (JTS) enti sema bisi napi penanggul bekaul enggau pengawa ti nyukat kelinggi tanah NCR ba kandang menua nya ila. Iya mega ngelalau rayat ba kampung nya bekerejasama enggau staf JTS ti gawa sepemanjai timpuh pengawa nyukat tanah NCR ti deka diempu sida ila. "Ari bantu sereta kerejasama ari orang ti bempu tanah, pengawa nyukat ulih diatur nitihka atur ti udah ditaga," ku iya. Iya madahka, inisiatif nya mega deka diatur dikena nyukat lot-lot tanah diri empu awakka aulih disediaka geran nitihka atur tanah Seksyen 18 Kanun Tanah Negeri. Sama bisi datai enggau ngulu pengerami ngelancharka pengawa nyukat tanah nya, Tuan DO Pelilih Bau, Simon Jiput Tiok, Pemesai Tanah enggau Survei Bagi menua Kuching, Mohd Izzidin Haji Basri, Temenggung Datu Stephen Jussem, Pemancha Daniel Teho, Penghulu Jinep Jiheng enggau Tuai Raban Bansa, Motion Sodiap.

NGELANCHARKA ... Ranum Mina ngelancharka pengerami dikena nanda pengawa ti deka nyukat tanah nitihka atur inisiatif baru NCR ba genturung pendiau Kampung Stenggang, Bau.

Mawan nyerakupka urang baru enggau lama nyadi kaban MT SPDP

KUCHING : Parti Demokratik Progresif Sarawak (SPDP) ensanus (Hari Enam) udah milih 14 iku kaban Majlis Pemadu Besai (MT) parti iya ke baru, beduduk ari nya Nelson Balang Rining agi mengkang nyadi Seketeri Besai dalam parti. Lebuh ke berandau enggau raban media pengudah tembu nyadi chairman Aum MT SPDP, Presiden iya, Tan Sri William Mawan Ikon madahka, beduduk ari penyerakup dua bengkah kaban baru enggau lama tu, iya andal bendar musin 2012-2015 ulih mai ubah pemansang ke chukup manah ngagai parti SPDP. Ku iya, penyerakup dalam MT SPDP ke sekali tu dipeda ulih mai pemanah ketegal peneleba enggau pemintar bala sida dalam pengawa nyadi tuai lalu meri penguntung ngagai parti enggau rayat. "Ba runding aku, bala kaban baru iya ke dipilih tu ulih mai ubah ke pemadu manah ngagai parti sema sida udah mangku pengawa nyadi MT. Taja pia, kitai agi bepanggai ba peneleba kaban lama laban tegal sukung ari bala sida meh atur pengawa dalam parti ulih mujur," ku iya. Maya Aum Besai Tiga Taun Sekali (TGA) SPDP ke diatur kena 18 haribulan March suba, Mawan udah ngenanka penuduk iya nyadi Presiden SPDP, udah nya Datuk Seri Tiong King Sing nyadi Sapit Presiden Parti ke baru ungkup musin 2012-2015. Sebedau tu, Tiong nyadi Tuai Akaun Pemesai parti ti nganti Datuk Peter Nyarok Entri ti dipadu nyadi Presiden Dipebasa seumur idup. Nganti iya (Tiong) nyadi Tuai Akaun Pemesai iya nya Senator Pau Chiong Ing. Sapit Menteri Dalam Negeri Jelaing Mersat enggau Sapit Menteri Dagang Entarabangsa enggau Industri Datuk Jacob Dungau Sagan dipilih nyadi Sapit Presiden Senior parti. Pengawa nyadi Sapit Presiden parti ke dipilih iya nya Kaban Kunsil Negeri (ADUN) Meluan Wong Judat, Dr Roland Dom Matu enggau Kapten Zainuddin Tan Sri Hamdan. Rambau Aum Besai nya mega, Kepala Indu SPDP Chiew Yen Chew, Kepala Raban Nembiak Robert Ayu enggau Kepala Puteri, Barbara William Mawan agi mekang ngenanka penuduk pengawa sida. Udah nya, nyau ngenang Aum MT SPDP ti diatur ensanus Paul Igai dipadu nyadi Sapit Seketeri Besai lalu Prof Mohd Shafiq Abdullah enggau Rayan narong dipadu nyadi Sapit Presiden parti. Kapten Tiong Kuong Ching dipadu nyadi Sapit Tuai Akaun Besai, udah nya Kepala Pemadah enggau Sapit Kepala Pemadah parti iya nya Jacky Chan Jet hui enggau Churchill Edward. Tong Chen dipadu nyadi Kepala Raban Putera SPDP, udah nya Josephine Tuah, Kunsilor Wan lah, Micheal Siten, Kunsilor Lawas, Gines Ruwah enggau Wendy Trang dipadu nyadi kaban diri MT. Iya ke bukai, Maslinda enggau Haji udin Ali dipadu nyadi pengari parti ba pengawa ti besangkut paut enggau komuniti.

Deriba teksi patut ngemeranka pengelikun penumpang

SIBU : Chairman Majlis Bandar Sibu (MPS), Datuk Tiong Thai King ngelalau semua urang ke deriba teksi ngemeranka pengelikun enggau pengelantang bala penumpang. Iya madah, tuju pekara tu dikemerat awakka nyamin pengelikun penumpang datai ba endur ti dituju sida. "Penyampau urang ti bebadi nyawa ba jalai alun entara 4,000 ngagai 5,000 setaun, begunaka tanggungjawap sereta kerejasama ari bala urang ke deriba teksi. Jaku tu dipansutka iya rambau bejadi Pengerami Makai Malam Begulai Enggau Bala Deriba Teksi Sarawak, empai lama. Tiong ti mega Kaban Parlimen Lanang madahka, bala deriba teksi patut betanggungjawap nulung ngangkatka dagang temuai di negeri tu. "Urang ke deriba teksi tu entara urang keterubah ti betemu enggau bala temuai menua luar nyema temuai bisi nemuai ngagai menua kitai. Nya alai, perangai sida (deriba teksi) mandangka semua ulah pendiau rayat di menua tu ngagai temuai menua luar," ku iya. Ku iya, perangai ti pejaku sereta servis ke manah bala deriba teksi tau bendar narit ati bala temuai luar deka nemuai baru ngagai menua tu dudi hari. "Aku ngelalau semua kita ke deriba teksi anang sesekali beambi ulih baka ngechas tambang mar ngagai temuai. Kebuah pia, laban pekara ke bansa tu tau bendar ngayanka runding ti enda manah bala deriba teksi ngagai temuai menua luar," ku iya. Pengerami tu bisi digulu Chariman Gerempung Deriba Teksi Sarawak, Jong Choon Fah, Chairman Gerempung Deriba Teksi Sibu, Robert Angkah enggau bala ke bukai.

SDNU nambahka tiga iku penulung sapit presiden

KUCHING: Sarawak Dayak National Union (SDNU) deka nambahka tiga kerusi penuduk penulung sapit presiden sereta enam kerusi penuduk raban esekutif. Presiden SDNU, Tan Sri William Mawan Ikom madahka, peminta ke deka nambahka dua penuduk nya udah dipejuraika sereta udah disetuju sebedau direjista ba Opis Pengerijista Gerempung (ROS). “Kitai patut berubah sereta nyingkang ke mua ngatur pengawa ke baru laban enti enda baka nya kita agi bejalaika pengawa ke sama ke tau ngasuh mensia mayuh enggai nyereta kita agi,” ku iya. Ku iya, semua kaban gerempung tau bepekit berebutka penuduk nya laban nadai undang-undang udah ditetapka nyekat sida ke deka baka nya. Nya alai iya enda setuju enggau penemu ke ngumbai gerempung nya semina dibuka ngagai raban bansa Iban aja. “Gerempung tu dibuka ngagai semua orang enda ngira raban bansa baka Orang Ulu tauka Bidayuh,” ku lalu madahka tebal agi kaban gerempung nya ari raban bansa Iban. "Mawan ti mega Menteri Pemansang Sosial madahka, pengerindu ati ulih berunding enggau pangan diri sereta bekerejasama patut ditanam ba genap iku kaban gerempung nya. Dulu agi ari nya Mawan nyuaka geran ngagai tiga buah gerempung iya nya Kuching Divison Journalist Association, Kota Samarahan Wholesaler and Retailer sereta Tabika KEMAS Sugai ba siti pengerami ke diatur ba opis iya empai lama ke udah.

Pesta Lawas : Tim menua luar nyereta pekit lumba perau

LAWAS : Pesta Lawas ke deka diatur bepalan ba Sungai Batang Lawas taun tu dipelabaka chukup rami laban bisi diseretai bala pelumba perau ari menua luar. Nitihka penerang Chairman Pesta Lawas enggau Regatta Lawas, Haji Mohd Supaih Haji Hamdan ti mega Tuan DO Lawas, bisi tujuh buah tim ari menua Brunei enggau dua buah tim ari negeri Sabah udah ngerijista diri nyereta Regatta Lawas taun tu. Kelimpah ari nya mega, pekit tu bisi disereta tim ari raban bansa China Lawas enggau sekeda tim ari luar Lawas baka Landas (Opis Tanah enggau Sukat), PUSAKA ari Kuching sereta tim ke kala bulih gelar Raja Sungai Lawas regatta taun siti nyin kemari iya nya tim ari Saratok ke dikumbai Citra Alti. Utai ke pemadu ngerinduka ati taun tu iya nya tim ari menua Brunei bisi nambahka penyampau perau ti dikena sida nyereta pekit. pekaran ke bansa tu manah amat laban ulih ngerami agi Regatta Lawas 2012. Kitai anang enda nemu tim ari negeri Sabah, sebengkah tim ke enda disadang kitai pengering. Tim tu dipelabaka ulih besemekih enggau tim ke kala nyadi champion tauka bulih gelar Raja Batang Baram iya nya Tedung Melanchar ari Marudi. Main bukai ke sama diatur dikena ngerami Pesta Lawas kena 25 ngagai 27 Mei tu iya nya eksibisyen pemansang, kedai bejual barang lebih kurang 300 buah. Komiti pengatur Pesta Lawas enggau Regatta udah dipenyadi lalu genap bengkah opis perintah udah dipadu nyaup ngemujurka pengerami tu. Nya alai, iya nesau mensia mayuh kelebih agi sida ke diau ba menua Lawas ulih sama sampal datai enggau ngerami Pesta Lawas 2012.

Meri pemansang ngagai menua

Menua begunaka rebak baru ti bepenemu sereta pintar SPAOH : Mission menua tu deka nyadi sebengkah menua ti nguan besai penatai pemisi deka tejanggal enti sema rebak baru nadai ngembuan pengelandik, pemintar enggau penemu ke tinggi. Nya alai, ba pengawa nempa rebak baru ti pbepenmu sereta pintar begunaka sukung ari bala apai indai enggau bala pengajar di sekula. Kaban Kunsil Negeri (ADUN) Saribas, Mohammad Razi Sitam madahka, apai indai enggau bala pengajar patut nemu pengulih bala anak ba tikas sekula. "Ba jeman moden tu, urang ke bepenemu sempama baka reta tengkira ti pemadu berega ngagai menua. Nembiak rebak baru entara reta ke pemadu beguna ngagai menua. Nya alai, sida patut diiri enggau penemu ke manah ngambika sida tau mai pemansang ngagai menua tu dudi hari," ku iya. Iya madah munyi nya lebuh bejaku ngarika Menteri Muda Pengintu Pendiau Mensia Mayuh, Robert Lawson Chuat lalu bejadi Program Gutung- Ruyung Perdana enggau Pengerami Ngelancharka Jogathon ke diatur Gerempung Apai Indai enggau Pengajar (PIBG) SMK Spaoh. Razi madah, kaul ke terit entara staf sekula enggau bala apai indai begunaka amat ngambika tau besaup nempa pemansang pelajar bala anak. "Laban aku pan kala nyadi pengajar, nya alai aku ngemeratka pengawa pelajar laban semian ari pelajar sekula pengidup kitai ulih maju jemah. Diatu, kitai sama nemu menua endang ngiga urang ke landik ngereja pengawa ngambika ulih napi pengawa ba SCORE sereta ulih ngemansangka menua menua Malaysia enggau Sarawak," ku iya. Udah nya, YDP PIBG SMK Spaoh, Othman Matzain madahka, tuju program tu diatur ngambika bala apai indai ulih meda sereta nemu nama utai ke diguna bala anak sida ba SMK Spaoh. "Nengah program tu, apai indai ulih nemu baka ni gaya sekula endur anak sida belajar sereta meda prestasi pelajar bala anak diri empu. Pekara tu ulih meri peransang ngagai bala apai indai awakka meransang anak bebendar agi belajar udah tu,"ku iya. Apai indai mega ulih neritka kaul begulai enggau sida sama sida sereta bekerejsama mantu sekula. Maya nya mega, Prinsipal SMK Spaoh, Hajemi Jahan madahka, tuju pengerami Ngelancharka Jogathon diatur awak nambahka belanja PIBG dikena ngemujurka aktiviti sekula ba maya bukai. Nyerumba pengerami tu, bisi diatur iya nya pengawa nyuaka Komputer Pangku 1Malaysia ngagai 450 iku pelajar ungkup Fasa kedua. Ba maya pengerami tu, Razi bisi nyuaka bantu RM5,000 dikena SMK Spaoh ngatur aktiviti. Sama bisi datai maya tu iya nya Residen Mukah, Saudi Narani, Pemesai Kunsil Sarawak Daerah Spaoh, Bujang Ladi, Tuai-tuai opis perintah, bala Tuai Raban Bansa enggau bala apai indai nembiak.

1MALAYSIA...Mohammad Razi Sitam begambar begulai enggau bala nembiak enggau apai indai nembiak ti bisi datai rambau Program Gutung-Ruyung Perdana enggau Pengerami Ngelancharka Jogathon ke diatur Gerempung Apai Indai enggau Pengajar di SMK Spaoh.

Papan tanda salah endur engkah?

PANTU : Urang ke diau ba Pantu minta Perintah Pelilih Menua (PBT) ngaduka baru papan tanda ti diengkah semak simpang jalai masuk nuju ngagai Pasar Pantu udah tu. Seiku rayat menua nya ke benama Brandon Uno lebuh ke dirandau madahka, papan tanda ‘Pantu’ dilindung papan tanda bukai ti diengkah berimbai enggau iya. Ku iya, papan tanda tu enda terang dipeda pengguna jalai raya enti sema sida enda ngetu dulu ba simpang jalai nya. “Nya alai, aku ngarapka PBT ulih ngaduka baru palan endur engkah papan tanda tu ngambika nyamai agi dipeda ngagai sapa-sapa urang ti deka ngelawa Pasar pantu udah tu," ku iya. Wilson Embah mega madahka, ngasuh PBT ngaduka papan tanda nya enggau lengkas sebedau pengerami Pesta Ikan Tapah Pantu berengkah ujung bulan tu. Ku iya, pekara tu patut diadu enggau lengkas ngambika bala temuai nyamai ngiga endur Pasar Pantu nyema sida deka datai meda Pesta Ikan Tapah ti berengkah 28 April 2012. Iya mega mesan, mensia mayuh ti deka ngiga Pasar Pantu, tau tama terus nyema sida bisi tepedaka tugu Ikan Tapah ba simpang jalai.

LINDUNG...Papan tanda nunjukka tunga Pasar Pantu dipeda lindung lalu patut diadu baru.

Jematan Batang Strap tau ditengah pengudah bulan Jun tu

SRI AMAN : Jematan Batang Strap ke enda jauh ari Pasar Pantu, dipelabaka ulih ditengah mensia mayuh enda sema iya udah beroperasyen belabuh ari bulan Jun taun tu. Kaban Kunsil Negeri (ADUN) Balai Ringin, Snowdan Donald Lawan madahka, Jematan Batang Strap, Pantu kira 182.4 meter pemanjai udah tembu kena bulan Februari tu tadi. Ungkus ngaga jematan tu semak RM20.4 juta, lalu bala Opis Kereja Raya (JKR) deka meresa pengelikun jematan tu dulu sebedau iya ulih ditengah mensia mayuh udah tu. “Naka ke diatu, kami agi nganti kontraktor nyuaka dokumen projek ngagai JKR ngambika pengelikun jematan tu ulih diperesa nitihka atur sukat ti udah ditetap," ku madah lebuh ke dirandau pengarang berita. Iya melabaka Jematan Batang Strap, Pantu udah berengkah ditengah mensia mayuh pengudah iya ti tembu bulan Februari tu tadi. “Tang enti bisi nama-nama nyadi anang nyalahka urang," ku iya. Nambahka nya iya madah, penyampau urang ti deka betengahka jematan tu semak 4,000 iku nyengkaum sida ke diau semak Sungai Batang Strap enti deka ngelawa Pasar Pantu. Jematan tu digaga suba, asil ari langgur penemu Snowdan enggau apai iya Donald Lawan lalu seduai maduka sebuah kompeni perunding swasta ngaga pansik awakka jematan Sungai Batang Strap di Pantu ulih digaga. Udah nya, pansik nya dianjung ngagai Kepala Menteri, Pehin Sri Haji Abdul Taib Mahmud sebedau pengawa pechah tanah dipenyadi ba taba projek nya kena 19 Januari 2010.

Pesta Matu kena 5 Mei tu

MATU : Kaban Kunsil Negeri (ADUN) Jemoreng Abu Seman Jahwie nesau mensia mayuh ke diau di menua Mukah datai sampal ngagai Matu kena 5 haribulan Mei 2012 awakka sama enggau ngerami Pesta Matu. Urang di Matu ngintu pengerami kena 5 Mei, 2012, beserimbai enggau Hari Daerah Matu ti dipelabaka deka dipenyadi Menteri Perambu Sumber enggau Rampa Menua II, Datuk Amar Awang Tengah Ali Hassan. Abu Seman ti mega nyadi Penyanding Penemu pengerami Hari Daerah Matu, madahka, entara program ti bisi diatur maya tu ila iya nya eksibisyen ari opis-opis perintah. kelimpah ari nya, komiti pengtur pengawa ti mega Tuan DO Matu , Habari Bakar udah ngerintaika mayuh program bukai. Entara program ti ulih narit mensia mayuh rambau pengrami tu ila iya nya lumba nembiak, lumba tradisional, panggau rayat, pekit karaoke, bemukun, kedia bejual barang, kraf enggau mayuh agi ke bukai. Iya nesau urang di Matu, Igan, Oya, Mukah awakka sampal datai ngulu pengerami tu. “Tuju pengerami tu diatur dikena ngenang Matu ti diangkatka nyadi sebengkah Daerah kena 5 Mac 1991, pia mega dikena ngerapitka kaul entara pupu raban bansa di Matu,’ ku iya. kenyau 21 taun ke udah, iya madah Matu diatu ukai agi nyadi pasar mit, tang Matu nyau majak maju. Tanda iya, Matu udah bisi jalai raya Sibu-Tanjung Manis, tu ngujungka pejalai ari Matu ngelawa Sibu nyau majak dampih. Abu Seman ngarapka Matu ulih dipasukka dalam langgur pemansang Koridor Sarawak Energy (SCORE) ngambi nambahka pemansang ba Matu dalm timpuh 10 taun ti deka datai. Tanjung Manisudah dipilih nyadi hub pemakai halal lalu enda jauh ari Matu, pekara tu ku iya ulih ngerampit Matu nyadi mansang jemah. Menteri Muda Perambu Sumber enggau Rampa Menua, Datuk Haji Mohd. Naroden Majais dipelabaka sama datai ngemataka pengerami bejadi Hari Daerah Matu ila.

1,400 Rela mantu polis ba serata negeri

Sama betulung munaska jenayah SIBU : Kira 1,400 iku Kaban Ikatan Relawan Rayat Malaysia (Rela) mantu bala polis bejalaika pengawa nyidi orang ke ngereja penyalah ba serata negeri tu. Pengarah RELA Negeri, Brig. Jen. Rini Tupong madahka, kelimpah mantu polis nyidi orang ke ngereja penyalah, 380 iku agi kaban RELA mantu ba pengawa nyaga pengelikun ba enam bengkah padang bilun ba serata negeri tu. Pengawa raban RELA ke dikereja raban rela tu nandaka perintah endang bisi bendar pengarap ngagai sida iya bejalaika pengawa. Iya madah munyi nya lebuh pengerami makai malam beserimbai enggau pengawa angkat sumpah nyadi kaban komiti Pusat Operasyen RELA Apollo Sibu, empai lama. Chairman Pusat Operasyen RELA Apollo Sibu, Wong Ling Tong nguluka bala kaban komiti ke bukai ngaga angkat sumpah nerima pengawa nya. Pengerami tu bisi digulu Pemesai RELA Daerah Sibu, Moses Sipang engggau Temenggong Vincent Lau Lee Ming. Rini madahka, RELA meh endur rayat mandang tanda pengasih ngagai menua," Kitai ke nyadi Rela kebendar iya mandangka pengasih kitai ngagai menua". Kelimpah ari nya, iya madah rayat ti enda sebaka bansa ulih bekaul manah nengah Rela laban sida seruran begulai sereta besaup enggau pangan diri ngereja pengawa. Bala RELA mesti nunjuka perangai ti manah ngagai mensia mayuh ngambika orang majak rindu meda bala Rela, kelimpah ari nya iya madah Rela diatu udah besedia nulung mensia mayuh sereta nyadi ejen perintah. Wong Ling Tong lebuh ke bajaku madahka, pengawa betulung enggau pangan diri beguna amat ngambika operasyen RELA Apollo mujur ba maya ti deka datai. Sama enggau ngangkat sumpah nerima pengawa tu iya nya Sapit Chairman iya, Ching Leong Hook, Seketeri– Ting Duang Chiang enggau Penulung-penulung Seketeri – Waili Haji Suhaili enggau Ling Eng Chuo, Tuai Akaun – Kiu Lien Yung, Pemesai Hal Ehwal – Yu Siong Sing, Kepala Penyambung – Rita Ling enggau 32 iku kaban komiti ke bukai.

SAIN JARI… Brig. Jen. Rini Tupong (duduk tengah) berimbai enggau Temenggong Vincent Lau Lee Ming (kanan) lalu dikemataka Wong Ling Tong ngaga sain jari tanda nerima pengawa nyadi Chairman Pusat Operasyen RELA Apollo maya pengerami makan malam di Sibu.

PBB Baleh tetap nyukung chalon BN ari PRS

KAPIT : Parti Pesaka Bumiputera Bersatu (PBB) pampang Baleh deka terus nyukung chalon Barisan Nasional ari Parti Rayat Sarawak (PRS) ke bediri rambau pengawa bepilih besai ke deka datai. Kepala iya, Kr. Tapah Ata madahka, ba pengawa politik bala kaban parti komponen BN patut begempung ati ngambika chalon BN menang sereta PBB pampang Baleh arap bendar chalon BN ke sekali ulih nyadi seiku pengari ti ulih ngawa ke rayat. Taja pia, orang ke megai pengawa nyadi kepala parti mesti ulih ninga langgur penemu ari bala penyukung nyengkaum ari bala kaban parti komponen BN, ku iya ti bejaku rambau pengerami ke diatur PBB Ranting Hulu Baleh ba rumah Encik Rantai di Nanga Spaku, Baleh. Ku iya, bala tuai parti patut mendingka langgur penemu bala penyukung kelebih agi ari bala kaban BN ke bukai ba senentang pekara ke besangkut paut enggau pengari sida. “Kebuah pia, ngambika chalon BN ulih menang besai ba pengawa bepilih besai ke deka datai," ku iya. Kaban Parlimen Kapit, Datuk Alexandeer Nanta Linggi, Kaban Parlimen Hulu Rajang, Datuk Billy Abit Joo, Sapit Walikota MKD, Jefferson Jamit Unyat, Kepala Pengajar SK Sungai Amang, John Lang Likong enggau Supervisor Senior Kemas, Ambrose Abong Bugek entara temuai ke sama bisi datai.

KE PENGINGAT… Encik Rantai nyuaka tepa ngagai Tapah Ata (kanan) ba sebengkah pengerami ke diatur PBB Ranting Hulu Baleh ba Nanga Spaku, Kapit.

PMS ngatur AGM kena 29 April tu

SIBU : Gerempung Melanau Sibu (PMS) deka ngatur Aum Besai Niting Taun (AGM) bepalan ba Indu Opis Gerempung Melanau, Lot 25, Jalan Awang Ramli Amit, Sibu kena 29 haribulan April tu. Aum tu berengkah diatur urung pukul 2.00 lemai lalu deka dipenyadi Kaban Kunsil Negeri (ADUN) Nangka, Dr Annuar Rapa'ee. Beduduk ari nya, Chairman PMS, Felix Bohari nesau semua kaban gerempung ngambika sama datai ngulu aum tu. Ngagai bala kaban gerempung ke bisi ati deka mangku pengawa nyadi komiti musin 2012/2014, kita dipinta ngambi pom nyadi chalon ari Encik Drahman Jabar nengah lumur 019-8153129, Michael Akam (010-9672011) enggau Encik Michael Bujang (012-8923162). Pom ke udah tembu diisi tau disuaka ngagai orang ke disebut nama tadi, anang laun ari 22 haribulan April 2012 (Hari Minggu) pukul 5.00 lemai.

Orang indu anang malu beperesa pengerai

SELANGAU : Pencheramah pengerai Dr Ali Puji ngelalau raban orang indu ke diau ba menua pesisir ngambika anang malu beperesa pap smear dikena nagang penyakit riman sarang anak. Iya madah, agi mayuh amat irang indu enda ngemeratka pasal pemedis riman sarang anak taja pan nemu pemedis tu entara pemedis ti pemadu disenakutka orang indu nangkan pemedis riman tusu. "Taja pan pemedis tu ulih ditemu tumu, tang mayuh amat orang indu enggau beperesa. Sida tebal agi ngelawa doktor enti pemedis udah raya," ku iya madah rambau ke nyadi pencheramah beserimbai enggau Program Tuai Begulai enggau Rayat di Rumah Jelai, Sungai Tamin, Selangau, empai lama. Ku iya, pansik ba senentang orang indu ke bisi beperesa pasal pemedis riman sarang anak tu agi kurang bendar. "Tebal agi orang indu madahka sida kelau kiruh gawa ngujungka nadai hari deka beperesa pengerai," ku iya. Dr Ali madah, tanda deka nemu pemedis penyakit riman ba sarang anak tu iya nya pengudah orang indu beperesa pap smear. “Riman tu ulih ditemu baka ngasaika pemedis tauka bedarah lebuh ti beleman. kelimpah ari nya mega, enti bedarah dalam utai orang indu entara timpuh iya ke datai bulan, pansut darah ari utai sereta bau, tauka pansut darah ba orang indu ti udah chukup umur (menopaus) nya meh entara tanda-tanda orang indu ngembuan penyakit riman,”ku iya. Iya madah, nadai kebuah orang indu enggai beperesa pengerai laban diatu perengka sepital udah jauh amat manah sereta chukup nyengkaum ba menua pesisir. "Nya alai, patut bendar orang indu nyeliahka diri ari pemedis tu nengah perubat betuchuk vaksin ditangka beperesa pap smear betakah," ku iya. Tuju beresa pap smear ngambika doktor ulih nemu tnada pemedis tu bisi nyadi nengah chara kolposkopi iya nye nerupung ngena perengka mikroskop meda tisi sarang anak orang indu. Sama datai rambau program ceramah tu iya nya Kepala Operasyen Indu Parti Rayat Sarawak (PRS) N.52 Tamin, Liah Umal.

Hajijah Bohari dipilih nyadi Chairman PPWS Sibu

SIBU : Hajijah Bohari udah dipilih nyadi Chairman Gerempung Orang Indu Negeri Sarawak (PPWS) pelilih Sibu ba rengat 2012/2015 rambau Aum Besai ninting taun diatur ba Sibu , apin lama ti udah. Orang ke nyadi tuai ba Aum Besai nya Chairman PPWS Kawasan Sibu, Sarikei enggau Kapit ke alai Hajah Ta’siah Ibrahim dipilih nyadi Sapit Chairman enggau Lucy Lau Pick Kiong nyadi Penulung Chairman. Sekereteri PPWS dipangku Hashimah Rashid lalu Sharifah Rabiah Wan Hadion dipadu nyadi Tukang Wang. Lima iku agi dipilih nyadi kaban komiti, nyengkaum Hajah Salemah Chali, Latipah Putit, Hajah Sakinah Haji Bujang, Halimah Udin enggau Tang Hie Chai. Salasri Dairi enggau Shahibah Abu Bakar dilantik nyadi kaban komiti baru nya.

NYADI CHAIRMAN … Hajijah Bohari (duduk tiga ari kiba ) begambar begulai enggau kaban komiti PPWS Pelilih Sibu ti udah dipilih ba Aum Besai diatur ba Sibu.

ARMADA PBB Sarawak datai ba Lawas 5 Mei

LAWAS : Operasyen ARMADA Raban Nembiak Parti Pesaka Bumiputera Bersatu (PBB) Sarawak deka ngelawa Lawas kena 5 haribulan Mei lalu dipelaba bisi perambu baru ba ubah baru raban nembiak Pemuda PBB Sarawak di Lawas udah tu. Aum kepenudi nyambut penatai ARMADA Raban Nembiak PBB Sarawak di Lawas udah diatur ba Opis PBB Bukit Sari ti bela digulu sayap Indu enggau bala kaban ari agensi perintah ngambika program tu ila mujur. Mayuh main deka dibantai rambau penatai sida tu ila, baka pengawa mandangka motor, pekit bot controller, kugiran, pekit nyura enggau mayuh agi main ke bukai. Penatai ARMADA tu betuaika Kepala Raban Nembiak PBB Sarawak ti mega Sapit Menteri Sains Teknologi enggau Inovasi Malaysia, Datuk Haji Fadillah Yusof. Pengawa nutup pengerami tu deka diatur muak ke malam bepalan ba Dewan Stadium Tetutup Lawas. Dipelabaka 1000 iku orang deka datai lalu pengerami tu deka dipenyadi Menteri Perambu Sumber enggau Rampa Menua II, Menteri Rengka Rama enggau Menteri Pemnasang Industri Sarawak, Datuk Amar Haji Awang Tengah Ali Hasan. Nitihka Kepala Raban Nembiak PBB Zon 8, Kr. Awangku Jinal Abedin Pengiran Haji Jawa, ba Lawas ila, Raban Nembiak PBB deka ngaga rikot baru iya nya ngatur Kimpin Meri Darah ke pemadu mayuh ba menua Malayisa kena 5 Mei ari pagi nyentuk ke lemai tegal deka ngulihka lebih 1000 pain darah. Program Armada Raban Nembiak sebengkah ari program ti deka ngasuh tuai Raban nembiak tikas negeri betemu enggau bala kaban operasyen raban nembiak PBB pampang Ranting bepun ari Kuching ti deka dipenyadi Kepala Menteri Sarawak ti mega Presiden PBB Sarawak, Pehin Sri Haji Abdul Taib Mahmud, lalu ba ila pengawa nutup dipenyadi Awang Tengah. Raban Armada dipelabaka datai ba Mengkalab lemai 5 haribulan Mei lalu deka diambat Kaban Parlimen Lawas, Dato Henry Sum Agong. Ba pengawa ke diatur sida sebedau tu, sama bisi datai iya nya Kaban Parlimen Lawas, Dato Henry Sum Agong dan Kr. Awangku Jinal Abedin chairman pengatur pengawa, Walikota Majlis daerah Limbang ti mega kepala Raban Nembiak PBB Bukit Kota enggau Kepala Raban Nembiak PBB Bukit Sari, Kr. Semie Haji Nasip sereta bala Kepala Indu PBB Bukit Sari, Hajah Aisah Bahar.

KE PENGINGAT...Kepala Raban Nembiak PBB Zon 8, Kr. Awangku Jinal Abedin Pengiran Haji Jawa enggau Kaban PArlimen Lawas, Henry Sum begambar ngambika pengingat begulai enggau raban nembiak PBB ba Lawas.

Perintah nyediaka program tranformasyen sains teknologi

SIBU : Perintah nyediaka program transformasyen ngambika nembiak rebak baru ulih belajar kelebih agi ba senentang pemansang dalam bidang sains enggau teknologi. Pengarah Pelajar Negeri Sarawak, Abdillah Adam madah, semua pengajar di sekula dipinta bebendar nempa bala nembiak sekula di serata menua Malaysia. "Opis Menteri Pelajar Malaysia udah digerah ngambika nempa nembiak bepun ari pra sekula ngambika setipak enggau juluk ati perintah ti deka nyadi menua maju rambau taun 2020,"ku iya. Nengah program LINUS bala pengajar dipinta ngajar nembiak pasal penemu literasi enggau numerasi pengudah tiga taun bala nembiak tu belajar ba sekula primari. "Kelimpah ari nya mega, kitai digerah ngambika ngemayuhka agi sekula ke beprestasi tinggi (SBT), pia mega, ngadaka mayuh agi prinsipal enggau kepala pengajar ke landik mangku pengawa," ku iya. Iya madah munyi nya lebuh bejadi pengerami nyuaka 'Anugerah Perkhidmatan Cemerlang' (APC) 2011 Ungkup Bala Ke Gawa Ba Opis Pelajar Tikas Sibu. Abdullah madah, pemujur organisasyen pelajar bepanggai ba kualiti servis bala pengajar. "Nya alai, kitai mesti bebendar gawa sereta nambahka penemu enggau pengelandik ngambika ulih ngangkatka pemanah pendiau enggau profesion staf ba Opis Pelajar," ku iya. Iya madah, tanggungjawap bala pengajar makin besai laban diatu udah mayuh amat ubah ke diatur ba sekula. "Pengajar ukai semina ngajar ba senentang bidang ke dipelajarka sida, tang mega mayuh agi pengelandik bukai ti tau diajar ngagai bala nembiak. Udah nya, bala penulung staf patut nulung bala pengajar nyapai juluk ati nya ba semua tikas dalam Opis Pelajar," ku iya. Abdullah nesau semua pengajar kelebih agi sida ke ngajar di Sibu ngambika semampai ngemanahka agi prestasi sida. "Opis pelajar udah nyediaka program Operasyen Ngemajuka Sarawak (GeMS). Udah nya mega, kitai bisi Program Pemansang Sekula SIP) ti nulung menua ngurangla penyampau sekula ba tikas Band 6 enggau Band7. "Seninjik enggau nya, sada 'HIGH SPEED-HIGH IMPACT' aku mai genap iku kitai ke ditu mesti gawa bebendar udah tu," ku iya. Ba pengerami tu bisi 480 iku staf ba Opis Pelajar Daerah Sibu, Kanowit enggau Selangau nerima APC. Entara pemesai ke bisi datai maya tu iya nya, Pemesai Pelajar Daerah Sibu, Wong Chong Kung sereta bala ke bukai.

TABI PUJI...Pengarah Pelajar Negeri Sarawak, Abdillah Adam nyuaka APC ngagai seiku orang ba sebengkah pengerami ke diatur ba hotel Kingwood.

Penyampat bomba nyelamatka Balai Polis Sentral Miri

MIRI: Penyampat enggau penau raban bomba mujur madamka api sereta nyelamatka Balai Polis Sentral Miri ari angus ba penusah angus ke bisi nyadi kena Hari Lima ke udah. Raban bomba nerima kangau urung pukul 8.16 malam lalu datai ba endur nya enggau naka pengelengkas ngena sebuah kerita bomba enggau tujuh raban bomba madamka api ba sebuah bilik endur dua iku pemesai nasat ba balai nya. Nitihka jerita, ba penusah angus ke nyadi urung pukul 8.15 malam nya, raban polis ke benung gawa tesiumka bau asap sebedau meresa lalu tepedaka asap tebal berengkah pansut ari bilik nya sebedau sida ngangauka bomba. Tuai Polis Pelilih Miri, Asisten Komisioner, Mun Kock Keong madahka, ba maya ke diatu sida benung nasat nama kebuah penusah nya nyadi lalu iya setuju pekara nya nyadi dipelabaka ketegal penanggul 'short circuit'. Ku iya, penusah angus nya mujur ditemu raban polis ke benung gawa lebih tumu agi sebedau sida ngagauka raban bomba madahka penusah ke bisi nyadi. "Kami enggau naka ulih deka ngemetulka pekara ke udah nyadi nyengkaum deka nganti wayar baru tauka pengawa bukai ke patut. Tang semua nya bepanggai ari asil tasat raban bomba," ku iya. Balai Polis Srentral Miri nya rumah lama ke digaga ba taun 1950an lalu sekeda endur nya digaga ngena kayu.

Kunsilor madahka diri nadai muai kad kaban SPDP

LUNDU: Raban kunsilor di Mas Gading enda setuju enggau repot ke madahka sida udah muai kad kaban Parti Demokratik Progresif Sarawak (SPDP), tang madahka kad nya deka diberi pulai ngena chara ke berenggat. Pengari raban nya, Kunsilor Rosadi Ugit nanya nama kebuah sekeda orang sanggup nuduh pekara ke baka nya laban iya nadai bisi nyadi. "Nya siti pengawa ke bejai bala kami enti sida nuduh kami ngetan sereta muai kad raban SPDP di Mas Gading. Iya ke enda betul amat nya nama kebuah kami ngambi kad kaban sereta nyaga iya ngambika enda abis timpuh, enti nitihka atur parti pekara nya endang sigi nadai. . "Nya alai, kami deka nyuaka kad nya pulai baru terus ngagai Indu Opis SPDP enda lama agi ... sekalika kami mulaika iya kediri empu tauka nitihka pampang SPDP di Mas Gading," ku iya madahka Utusan Sarawak. Sebedau tu iya madahka senentang repot surat berita ke bisi nyebut Penulung Sapit Presiden SPDP, Rayan Narong bisi nyebut pengawa muai kad kaban SPDP di Mas Gading ngagai Geng 5 (G5) nyadika tanda nyukung Kelab Barisan Nasional empai lama ke udah ukai reti nya sida udah pansut ari parti ke udah dikemendarka. Nitihka Penulung Sapit Presiden SPDP Rayan Narong, pengawa ke ngumpul kad nya ari kaban parti lebih agi sida ke baruh agi diatur seiku orang diasuh bejalaika pengawa ngambika kad nya dilindung sereta enda abis timpuh, tang lebuh sida deka ngidupka timpuh nya baru iya enda diberi pulai ngagai orang ke ngempu. "Nya kebuah sida iya bisi ngembuan mayuh kad lalu kami bisi tepedaka nya lebuh nemuai ngagai kampung lalu mayuh agi kad nya diberi ngagai sida ke indu sereta datai ke sehari tu bisi sekeda deka ngambi laban deka ngidupka timpuh kad nya, tang orang ke nyimpan kad nya enggai meri iya pulai baru," ku iya. Nya alai ku Rayan, pengawa ke baka nya sigi nadai etika sereta enda patut nyadi. "Enti sida betul-betul deka pansut ari parti, sida datai ngagai indu opis sereta nyuaka kad nya ditu ... nya pekara ke patut digaga," ku iya. Rosadi madahka, dipelabaka urung 6,000 iku kaban ari 14 pampang SPDP di sitak Parlimen Mas Gading deka nyuaka kad nya pulai baru enda lama agi. "Enti sida setuju, kami deka nyuaka kad nya pulai baru ngena chara ke betul, ukai muai iya," ku Rosadi.

Eksport sarang burung walet mai untung

KUALA LUMPUR: Sida ke bejalaika pengawa enggau kompeni sarang burung walet menua tu bisi peluang ke besai amat deka ekspot asil sida ngagai menua China, ku Menteri Betanam Betupi enggau Industri Ngena Asil Betanam Betupi Datuk Seri Noh Omar. Taja pia, sida patut nitihka tiga atur ke patut iya nya ngembuan setipikit 'Veterinary Health Mark' (VHM) ari Opis Servis Veterinar, Setipikit Pengerai Jelu ari Opis Menteri Pengerai Malaysia (KKM) sereta Diperesa Ngambika Ditemu Ngena Frekuensi Radio (RFID) iya nya sistem dikena nentuka endur asla sarang burung walet nya. Perintah netapka atur ngena chara proaktif dikena nentuka asil ke diskspot ngagai menua China iya ke pemadu manah sereta bekualiti, ku iya madahka pemberita pengudah bejadi Eksibisyen Entarabansa Discus Malaysia Ke-6 2012 kena Hari Empat ke udah. Noh enda setuju enggau dawa 200 iku sida ke bejalaika pengawa dagang ke bisi dipansutka ba sebuah surat berita jaku China ke ngumbai pengawa ekspot sarang burung walet dimonopoli sekeda kompeni aja. “Aku ngasuh sida ke bisi mansutka jaku baka nya datai betemu enggau aku sereta meri penerang nitihka baka utai ke udah disebut sida. “Ba maya ke diatu lapan kompeni ke dikemendarka bejalaika pengawa nya nitihka atur ke udad ditetapka,” ku iya. Presiden Gerempung Discus Malaysia, Foo Pin Khooi madahka, eksibisyen Discus nya patut diatur di Duisburg, Jerman taun tu nya pekit ikan ngias Discus tikas entarabansa. “Bisi Sembilan kategori ba pengawa ngias ikan Discus ke deka dipekitka lalu champion ba tetiap kategori deka nerima mata duit penyampau RM1,000 enggau trofi, lumur dua nerima mata duit RM500 enggau trofi sereta lumur tiga nerima RM300 enggau trofi. “Sida ke menang ba tetiap kategori deka nyereta pekit ngerebut perais mata duit penyampau RM15,000 enggau trofi disembur enggau emas rega RM7,000,” ku iya. Pekit entarabansa nya iya ke pemadu besai kala diatur ba maya ke diatu. Bisi 290 penyereta udah diterima ari 18 buah menua di serata dunya nyengkaum Amerika Syarikat, Jepun, Jerman enggau Malaysia.