Pengawa ngaduka tanah jelai rita

KUCHING : Pengawa Perintah Negeri Sarawak ti mujur ngaduka tanah di Sarawak udah jelai endar rita ba tikas entarabansa, tanda iya negeri tu udah bulih perais Geospatial World Excellence Award ba sebengkah pengerami makai malam Forum Geospatial Sedunia ke diatur ba Pusat Eksibisyen enggau Konvensyen RAI di Amsterdam, Belanda. Penyulut tu ungkup Opis Tanah enggau Sukat (JTS) Sarawak enggau Sarawak Information Systems (SAINS). Sapit Menteri Tanah enggau Sukat Arab Saudi Muhammad Al-Rajhi nyuaka perais nya ngagai Menteri Perambu Sumber enggau Rampa Menua Datuk Amar Haji Awang Tengah Ali Hassan ti mega nyadi kepala delegasyen Sarawak rambau ke ngulu forum nya. Sama bisi datai ba pengawa nyuaka perais tu iya nya Presiden ke-11 Republik India Dr APJ Abdul Kalam enggau chairman Lembaga Eksekutif Netherland Drs TH A J Burmaje. Forum Geospatial Tikas Dunya tu diatur ba Amsterdam belabuh 23 April ngagai 27 April lalu dipenyadi Menteri Infrastruktur enggau Rampa Menua Netherland Melanie Schultz Van Haegen-Maas Geesteranus. Pengari ari nengeri Sarawak iya nya chairman SAINS Sdn Bhd Datuk Patinggi Tan Sri Dr George Chan Hong Nam, Menteri Muda Promosyen Pelajar enggau Teknikal Datu Len Talif Salleh, Seketari Opis Menteri Perambu Sumber enggau Rampa Menua Datu Sudarsono Osman, Kepala Pemesai Eksekutif ti mega Pengarah Pengatur Pengawa SAINS Dato Teo Tieng Hiong sereta Pengarah JTS Sajeli Kipli.

TEMEGAH ATI … Datuk Amar Awang Tengah (tengah) enggau raban delegasyen Sarawak temegah ati mandangka anugerah ke pemadu besai ba Amsterdam.

St. John Ambulance Sarawak begunaka sukung ari mensia mayuh

KUCHING : Sebengkah Gerempung Ke Ukai Dikuasa Perintah (NGO) iya nya St. John Ambulance ba nengeri tu beguna amat ke sukung ari mensia mayuh ba pengawa mupu pemeri ke deka diatur sida. Chairman enggau Komander gerempung tu, iya nya Dato Sri Ang Lai Soon madahka, meri besai puji ngagai media kelebih agi ngagai pengarang berita laban ke sama meri sukung beberitaka pasal pengawa ke dikereja gerempung St. John Ambulance ngelama tu. Iya madah munyi nya, lebuh randau begulai enggau bala pemberita pengudah pengawa ngelancharka Menira St. John Ambulance ke dipenyadi Kepala Menteri Pehin Sri Haji Abdul Taib Mahmud ba Ringkat 23, Menara Pelita, pagi kemari. Rambau pengawa tu, Pehin Sri bisi nyuaka tulung duit ngagai tabung St. John Ambulance tanda sukung iya ngagai gerempung tu. Udah tu, St. John Ambulance deka bejalai ba sebelah bandar besai, ngambika mensia mayuh ulih sama bela besukung nyuaka tulung ngagai tabung duit turu gerempung tu. "Pengawa bejalai mupu pemeri ari mensia mayuh tu deka berengkah dipejalaika sehari tu (26 April) nyentuk ngagai 29 April 2012" ku Ang. Ang ngarap bendar penyampau belanja ke ulih dipupu tu ila mayuh agi ari taun ke udah. Laban sebedau tu, orang ke pemadu mayuh meri bantu iya nya endang ari bala pemesai perintah nengeri empu. "Nya alai, aku ngarapka mensia mayuh ulih sama bela meri sukung ngagai kami laban tuju pengawa gerempung kami tu endang ungkup nulung sereta ngidupka seput seput sapa-sapa orang ti tasah enda ngira ba dini-dini endur", ku iya. Penyampau tulung agi belanja ari perintah ngagai gerempung tu ninting taun iya nya RM5,000.00. Udah nya, belanja ke bukai asil pupu pemeri ari mensia mayuh. Ba taun 2011, penyampau pupu pemeri ari mensia mayuh iya nya lebih kurang RM98,000.00 lalu sida ke nyuka pemeri tu bisi diberi menira tauka cap St. John Ambulance Sarawak siti seiku. Kelimpah arinya mega, Gerempung St. John Ambulance Sarawak ti betuaika Ang empu, ngelalau agensi perintah enggau nama-nama aja organisasyen di nengeri tu ngambi numbuhka sebengkah unit khas dikena meri bantu nyema nyadi sebarang penusah ke enda disadang ba opis sida. "Kami sedia meri latih nyema kita begunaka penemua ba senentang chara nulung orang bukai lebuh maya ke tasah. Pekara tu enda masau hari sereta enda ngerugika kita" ku iya. Sama bisi datai maya pengawa tu iya nya Joseph Kiu Chiong Kiet, Sekeretari Jeneral Gerempung St. John Ambulance Sarawak enggau bala raban nembiak St. John Ambulance.

PEMERI... Kepala Menteri, Pehin Sri Haji Abdul Taib Mahmud dikemataka Dato Sri Ang Lai Soon (tengah) lebuh ti nyuaka duit pemeri tanda bejadi Menira St. John Ambulance Sarawak ba Menara Pelita, Kuching, kemari.

Projek PR1MA nulung rayat ti jelan penatai pemisi

KUCHING : Projek berumag nengah Program Berumah 1Malaysia (PR1MA)deka dikemansangka ba nengeri tu dikena mantu rayat ke jelan iya penatai pemisi kelebih agi sida ke diau ba bandar. Menteri Pengawa Berumah, Datuk Amar Abang Haji Johari Tun Abang Haji Openg, madahka PR1MA tu datai ari langgur penemu Menteri Besai, Datuk Seri Najib Tun Razak ti deka nulung rayat kelebih orang biak ke baru bekereja tauka sida ti baru lepas graduate ari Institut Pelajar Tinggi Awam (IPTA) Institut Pelajar Tinggi Swasta (IPTS). "Bisi 111 buah rumah teres dua ringkat udah diperambu deka digaga ba Demak Laut Fasa 1 lalu deka dikemujurka Opis Pemansang Pengawa Berumah (HDC) enggau opis PR1MA," ku iya lebuh randau begulai enggau media bepalan ba taba eksibisyen rumah PR1MA bepalan ba tengah laman Wisma Bapa Malaysia beserimbai enggau 'Jelajah Janji Ditepati' sehari tu enggau pagi ila (28 enggau 29 April, 2012). Nambahka nya mega, iya madah sida iya diatu benung berunding enggau Perintah Negeri Sarawak terus ngemansangka rumah PR1MA tu di di Kuching, Miri, Bintulu enggau Sibu. Eksibisyen tu diatur HDC bekerejasama enggau konteriktor swasta ti deka mandangka pelin perambu projek PR1MA. Sama bisi datai kitu iya nya Menteri Besai, Datuk Seri Najib Tun Razak. Iya ti mega Menteri Dagang Temuai madahka, rumah PR1MA tu berega RM150,000 ngagai RM300,000 lalu ngarapka rega rumah tu ulih tangkup sida ke jelan iya penatai pemisi ari RM2,500 ngagai RM7,500 sebulan. "Pelin rumah tu diayanka enggau pelin kontemporari enggau moden iya nya bisi bilik 3+1, tiga buah bilik mandi lalu sebuah rumah nya deka dijual enggua rega ke mudah," ku iya. Iya madah, langgur penemu menetri besai tu manah amat dikena nulung rayat ke enda besai penatai pemisi, awakka sida ulih meli rumah ke diri empu ba bandar. "Pelin rumah tu sebaka enggau pelin rumah ke benung digaga ba Sungai Besi, Kuala Lumpur, " ku iya

MERESA PELIN PR1MA... Datuk Amar Abang Johari Tun Openg meresa pelin rumah ke benung digaga lalu iya diberi penerang ari Pengarah Urusan Dynaku Sdn Bhd, Hj Zamahari Hj Ahmad (kiba) lebuh ke nemuai ngabas taba eksibisyen beserimbai enggau "Jelajah Janji Ditepati". Sama bisi dipeda Seketeri Tetap Opis Menteri Pengawa Berumah Wan Liz Ozman Wan Omar (dua ari kiba).

Projek NKEA Padi Batang Lupar nguntungka rayat Sri Aman

SRI AMAN: Projek Bidang Ekonomi Utama Negara (NKEA) Padi Batang Lupar dipelabaka ulih ngubah gaya pemansang ba kandang menua Sri Aman, kelebih agi ba Batang Lupar. Sapit Menteri Dagang Dalam Negeri, Koperasi enggau Pengguna , Datuk Hajah Rohani Abdul Karim madahka, menua Batang Lupar deka nyendiaka asil beras keterubah ba Sarawak, enti sema projek tu udah beroperasyen. “Aku ngarapka projek tu ulih ngubah tikas pemanah ekonomi enggau perengka guna rayat diau ba kandang Batang Lupar, Sri Aman enti sema projek nya udah laku dijual. “Enti sema projek tu udah mujur, Projek NKEA Padi Batang Lupar ulih ngeluarka 12 tan padi ba sehektar sebaka enggau asil ba Sekincan, Selangor diatu,” ku iya. Rohani ti mega nyadi Kaban Parlimen Batang Lupar mansutka jaku nya ba pengawa Randau Projek NKEA Padi Batang Lupar ke disereta 200 iku orang ke diatur ba Dewan Suarah Sri Aman , apin lama ti udah. Kelimpah ari rayat kandang Batang Lupar, iya madahka diri deka meransang orang bukai sama enggau ngemujurka projek sebedau dikerembai ngagai menua bukai. “Rayat ke diau ba Batang Lupar, Sri Aman patut nemu perintah semina nginjau tanah sida pengeluas 5,000 hektar dikena ngemansangka projek perintis bedandang padi keterubah iya ba negeri tu. “Tanah nya sigi agi diempu kita. Enggau pengawa kerejasama rayat, aku melalabaka nya ulih nyendiaka peluang gawa ngagai kita dudi hari ila," ku iya. Sama bisi datai enggau ngulu pengawa nya, Menteri Muda Betanam Betupi Moden, Datuk Mong Dagang, Kaban Kunsil Negeri (ADUN) Lingga Hajah Simoi Haji Peri, Residen Sri Aman Johnathan Lugoh enggau pengari Pemesai Sekeretari Opis Menteri Betanam Betupi, Paul Vincent Ritom. Projek NKEA Padi Batang Lupar nyadika siti pemansang perintah diatur ex- Menteri Besai dulu suba , Datuk Seri Abdullah Ahmad Badawi dikena ngurangka krisis bekal pemakai menua tu ba taun 2008. Ex- Menteri Betanam Betupi Moden Sarawak Datuk Patinggi Tan Sri Dr George Chan udah milih 50,000 hekar tanah ba negeri tu sebedau ke milih kandang Batang Lupar alai ngatur projek nya.

GAGA ...Rohani (tengah) begulai enggau Simoi, Mong, Johnathan sereta pesereta ke bukai sebedau pengawa berandau pasal projek ti diterangka pengari Opis Betanam Betupi.

Rega sebaka manah ungkup rayat di menua pesisir

KUALA LUMPUR : Program Rega Sebaka (PPH) dikemujurka Opis Menteri Dagang Dalam Negeri, Koperasi enggau Pengguna dipeda badas bendar sereta mai penguntung ngagai rayat kelebih agi sida ke diau ba menua pesisir di Sarawak enggau Sabah. Sapit Menteri Dagang Dalam Negeri, Koperasi enggau Pengguna Datuk Tan Lian Hoe madah, beduduk ari program tu, rayat ke diau ba menua pesisir di Sabah enggau Sarawak ulih ngasaika sereta barang subsidi ti sebeka enggau orang di Semenanjung. "Nyentuk ke diatu, perintah agi benung bejalaika program tu, awakka semua rega barang ke dijaga sebaka magang ba serata menua," ku iya madah lebuh ke nyaut tanya ari Senator Yunus Kurus lebuh sidang Dewan Negara, empai lama. Tan madah, chunto iya ngelama tu di Bario, Sarawak, rega petrol RON95 enggau diesel semak RM5 seliter, udah nya gas petroleum belaie (LPG) semak RM110 setong (14 kilogram) tang pengudah program tu dikemujur, orang di Bario semina meli petrol RON95 berega RM1.90 seliter enggau LPG ke berega RM26.60 setong. Iya madah, enti sebedau tu rega semua utai tu endang mar amat ketegal gaya menua ke bebukit ngujungka kos pejelai nyau tinggi tang meh pengudh program tu mujur mensia mayuh ulih bebelika barang tu enggau rega ke mudah. Iya mega madah, nengah program ke bansa tu, perintah udah maduka bala pengudar barang ulih mai barang baka berau, gula, tepung gandum, minyak makai, LPG, petrol enggau diesel ngagai menua pesisir. "Kelimpah ari barang subsidi tu, perintah mega udah neteapka barang bukai nitihka peminta mensia mayuh ba endur ke dianjung barang," ku iya. Tan madahka, opis menteri udah seruran meresa sereta ngasuh bala pengudar mesti mai 60 peratus barangan subdisi enggau 40 peratus barang Coop 1Malaysia ngagai menua pesisir di Sabah enggau Sarawak. "Produk Coop 1Malaysia udah dijual ba Sabah enggau Sarawak ngena rega ke sebaka enggau ba Semenanjung lalu tau mega dikumbai 1Malaysia 1Harga," ku iya. Semina barang subsidi aja ke sebaka rega ba serata menua Malaysia, tang meh rega barang servis agi mengkang baka selama, ku Tan.

Pengerami Malam Anugerah JPJ malam tu

LAWAS : Kepala Pengarah Opis Pengangkut Jalai Menua Malaysia bisi dikanggau datai ngulu Pengerami Nyuaka Anugerah Sevis JPJ Negeri Sarawak ke deka diatur keterubah iya bepalan ba Lawas malam tu (15 April 2012).

Nitihka penerang Kepala JPJ Daerah Lawas, Julaihee Dison lebuh ke dirandau ba opis, iya madahka Pengarah JPJ Negeri Sarawak, Ibrahim bin Othman sama bisi datai ngulu pengerami malam tu.

Temuai dipebasa ti deka datai malam tu legi iya nya Menteri Perambu Sumber enggau Rampa Menua II, Menteri Rengka Rama enggau Menteri Pemansang Iindustrian Sarawak, Datuk Amar Haji Awang Tengah Ali Hasan enggau Kaban Parlimen Lawas, Dato Henry Sum Agong.

Malam tu mega, pengawa nyuaka Setipikit pemanah prestasi ngagai bala kepala pampang JPJ di serata negeri Sarawak. Kelimpah ari nya mega, Julaihee madah, nyerumba pengerami tu deka diatur sebengkah randau media sereta pengawa begambar begulai enggau bala Kepala Pengarah JPJ Menua Malaysia ba pengujung program.

Konset Gegar Kapit kena 28 April

SIBU : Keterubah iya di Kapit, seraban rekoding artis Iban tebilang deka ngaga ‘Konset Gegar Kapit’ bepalan ba Dewan Suarah Kapit kena 28 haribulan April berengkah pukul 2.00 ngalih hari nyentuk ngagai 7.00 malam.

Pengari raban artis tu iya nya seiku rekoding artis Iban ke endang udah tebilang, Eddie Kuwing madah,entara artis Iban bukai sama enggau nyereta konset tu iya nya Raban Ensermai, Melissa Francis, Lucy M, raban band tebilang Masterpiece, Hevance, Lila enggau dua iku komedi Iban Bunyau enggau Mujap.

Eddie madah, tiket masuk meda konset tu berega RM30 enggau RM50, udah berengkah dijual 7 ngagai 8 April beserimbai enggau pengerami Safari Rakit Belah-Kapit enggau panggau rayat di Kapit, apin lama ke udah.

Mensia mayuh ulih meli tiket tu ninting hari Enam enggau hari Minggu ba kaunter promosyen di Balai Bandar Kapit kena 14 enggau 15 April, udah nya 21 enggau 22 April berengkah pukul 8.30 pagi nyentuk ngagai 5.00 lemai, ku iya.

Penereng ke silik tauka enti deka nempah tiket, kita tau betelefon ngagai Eddie Kuwing ngena lumur 013 - 5755022 tauka nengah facebook (Eddie Kuwing) tauka ngena email eddiekuwing@gmail.com.

Mensia mayuh ke meli tiket berega RM50, kita diasuh duduk ba mua penuduk bala VIP lalu rega tiket tu nyengkaum pakej begambar begulai enggau rekoding artis pengudah tembu konset, udah nya, urang ke meli tiket berega RM30, kita deka diasuh duduk ba penuduk belakang, ku Eddie.

Iya madah, tuju konset tu diatur dikena nelebaka bala artis bekelala enggau mensia mayuh sereta bebasaka pengulih sida ti udah bebendar ngangkatka industri lagu Iban di negeri tu.

Kelimpah ari nya mega, iya ngarapka konset tu ulih nulung ngemansangka industri muzik Iban, lalu minta mensia mayuh sama sampal datai nyukung ngemujurka konset tu. “Semina sukung ari mensia mayuh aja ulih ngangkatka industri muzik Iban di Sarawak," ku iya.

KETERUBAH IYA… Poster mandangka raban artis ti bisi ngambi bagi dalam Konsert Gegar Kapit ke deka diatur bepalan ba yang Dewan Suarah Kapit kena 28 haribulan April tu.

Raban nembiak diperansang nyeretai aktiviti bemukun

SIBU : Sekretrariat Sosial, Main Asal, Lumba enggau Penyerakup N. 49 Nangka meransang raban nembiak nyeretai pekit tanda bemukun ti deka diatur ba Dewan MUC, Sibu kena malam 28 haribulan April.

Pekit tu tebuka ngagai semua urang di Sibu lalu lelaki ke ngeluie umur 15 taun. Genap bengkah tim mesti ngembuan dua iku urang lalu penyampau bayar yuran semina RM20 ungkup sebuah tim.

Tim ke bisi ngambi bagi dalam pekit tu deka diasuh betanda 7 minit sereta nyadaka tiga buah pantun. Haribulan kepenudi endur nganjung pom iya nya kena 26 April, 2012, pukul 5.00 lemai. Haribulan enchabut undi kena 28 April, pukul 2 lemai bepalan ba Dewan MMB, Jalai Kampung Hilir, Sibu.

Urang ke nyadi champion, lumur dua enggau tiga deka diberi perais duit enggau trofi. Pengatur pekit mega bisi nyediaka tujuh iti perais rindu ati.

Tuju pekit tu diatur laban deka ngelala bagi raban nembiak ke ngembuan pengelandik ba pengawa bemukun, kelimpah ari nya mega endur neritka kaul ke manah entara pupu raban bansa sereta meransang raban nembiak ngemeratka konsep 1 Malaysia.

Penerang ke silik pasal pekit tauka endur bulih pom, mensia mayuh tau betanya ngagai Rajeli Abdul Rahim (Led), Menija Pekit Bemukun ngena lumur (016-8988010), tauka bala bukai baka Edmund Chua (017-8084576), George Yong Lin Tak (010-8079809)enggau Mohamad Saffian Samin (019-8478356).

20 kaban K1M nyereta Kus Belajar Komputer

MARUDI : Bisi 20 iku kaban Komuniti 1Malaysia (K1M) Rh. Randie Sg. Brit nyereta Kus Belajar Komputer ke diatur Opis Pemadah Marudi kerejasama enggau K1M Rh. Randie Sg. Brit , Pusat Jalur Lebar (PJK ) Marudi.

Kus Belajar Komputer tu diatur dalam kandang dua berangkah kemari enggau sehari tu bepalan ba Pusat Jalur Lebar Marudi. Kus tu beduduk ari langgur penemu K1M Rh. Randie Sg. Brit.

Nya alai, Pemesai Opis Pemadah Marudi Joseph James madahka, tuju kus tu diatur ngambika bala kaban K1M Rh. Randie Sg. Brit teleba sereta landik ngena perengka Komputer.

Joseph Kursus madah, kus ke sama bansa tu mega deka diatur kena 25 ngagai 26 Mei ungkup kaban K1M kampung Pemindahan, udah nya ungkup K1M Kampung Narum deka diatur kena 15 ngagai 16 Jun 2012. Ku iya, bala kaban K1M ke bisi nyereta kus pengelama dua hari tu diberi Setipikit ti disuaka ba haribulan ti deka dipadah jemah.

NGANSAH PENEMU…Sekeda kaban K1M Rh.Randie Sg. Brit ti bisi nyereta Kus Belajar Komputer ngambika sida landik ngena komputer udah tu.

Pesta Ikan Tapah Pantu diatur ujung bulan tu

SRI AMAN : Pasar Pantu enda lama agi deka rami laban ba endur tu deka diatur sebengkah pengerami iya Pesta Ikan Tapah Pantu renggat ketiga berengkah 28 ngagai 29 April tu.

Kaban Kunsil Negeri (ADUN) Balai Ringin, Snowdan Donald Lawan lebuh ke dirandau, madahka mayuh bengkah main udah dirintai ngambika ulih diatur nyerumba pengerami Pesta Ikan Tapah Pantu ila.

Entara achara dipelabaka ulih mai pengerindu ngagai bala temuai ke datai rambau Pesta Ikan Tapah Pantu 2012 tu ila iya nya pekit karaoke, kedai bejualka bemacham bansa barang, konset, Kumang Ikan Tapah, pengawa mandangka main asal enggau mayuh agi kebukai, ku iya.

“Pesta Ikan Tapah Pantu sebengkah ari pengerami asal, maya keterubah iya diatur 2009 suba pengerami tu diatur ba Pasar Pantu. Udah nya, ba taun ke dua iya diatur terus diberi nama Pesta Pantu rambau taun 2010.

“Taja pia, pengudah ninga penemu Menteri Pemansang Tanah iya nya Tan Sri Dr James Jemut Masing, nama Pesta Pantu ditukar nyadi Pesta Ikan Tapah Pantu ungkup ke sekali tu," ku iya.

Kelimpah ti engkeman amat enggau nama pengerami nya, ku Snowdan logo Ikan Tapah ti bisi ba simpang jalai Pasar Pantu mega besangkut paut enggau pemisi ikan tu dalam Sungai Batang Strap, Pantu.

kelimpah ari nya, iya madah sigi enda setuju langgur penemu sekeda urang ti deka ngatur Pesta Ikan Tapah Pantu ba pasar Lachau tauka ba Keranggas Gayau. Ku iya, Pesta Ikan Tapah sebengkah produk dikena ngemansangka Pasar Pantu ke dipegai DUN Balai Ringin lalu pengerami tu enda tau mindah ngagai palan bukai enti ukai ba Pantu.

“Tambah mega, Pesta Ikan Tapah Pantu udah bisi sukung ari mensia mayuh. Nya alai, aku ngarapka semua rayat ke bisi ati deka meda Pesta Ikan tapah Pantu anang enda sampal datai kena 28 ngagai 29 April tu ila,” ku iya.

Snowdan madah, aum kepenudi pasal Pesta Ikan Tapah Pantu 2012 deka diatur ba Opis Pelilih Menua Pantu kena 17 haribulan April tu.

Pasar Pantu bepalan lebih kurang 62 kilometer penyauh ari Bandar Sri Aman lalu mensia mayuh nyamai ngenataika diri ngagai pasar tu laban udah bisi jalai raya ke manah ari Jalai Sri Aman – Serian.

DEKA RAMI...Pasar Pantu enda lama agi deka penuh digulu bala mensia ke datai ngemataka Pesta Ikan Tapah ti berengkah diatur kena 28 ngagai 29 April tu.

Pesta Lawas enda lama agi

LAWAS : Pesta Lawas taun tu dipelabaka rami agi laban sebengkah program deka ditambah iya nya Program Bejalai Expo Makit (JEP) RTM Sarawak ti diatur kerejasama entara kompeni swasta Citra Alti enggau komiti Pesta Lawas ti betuaika Pemesai Daerah Lawas.

Beduduk ari nya, kira 300 buah kedai eksibisyen enggau bejual deka mayuh berintai ba bandar Lawas ti ngayanka mayuh macham barang ke bisi ba serata menua Sarawak nyengkaum ari Lawas empu. Kelimpah ari nya mega, bala RTM Sabah enggau Opis Pemadah Negeri Sabah mega deka datai sama enggau ngerami ngayanka eksibisyen produk ari negeri di Bawah Bayu.

Pemesai Daerah Lawas, Haji Mohd Supaih Haji Hamdan ti udah dipaduka Menteri Perambu Sumber enggau Rampa Menua II, Menteri Rengka Rama enggau Menteri Pemansang Industri Sarawak ti mega ADUN Bukit Sari, Datuk Amar Haji Awang Tengah Ali Hasan mesan semua orang patut bekerejasama ngambika Pesta Lawas ke sekali tu ulih mujur lalau nempa sejarah.

Maya nya ila, RTM deka mansutka terus dalam Program Selamat Pagi Malaysia bepalan ba Pesta Lawas begulai enggau Datuk Amar Haji Awang Tengah Ali Hasan, Kaban Parlimen Lawas, Dato Henry Sum Agong enggau Pemesai Daerah Lawas.

Kelimpah ari nya, bala RTM Sarawak nengah pengerami tu nguji ngelaku tauka ngasuh orang ngelala bala pengeluar program tauka Dj ke semina didingga kuchah-kuchah ba dalam radio ngelama tu. Bala RTM mega bisi ngaga promosyen pasal produk sida ke bukai dikena beteleba agi enggau mensia mayuh ke datai ari negeri Sarawak, Sabah enggau menua Brunei.

Achara ke pemadu manah maya pesta Lawas tu ila iya nya regatta Lawas ti mandangka bala campion lumba perau ari Brunei, Baram, Limbang, Kalimantan Indonesia sereta tim Saratok ke suah ngena gelar Citra Alti.

Taun tu, tim Citra Alti deka mai 5 buah perau laban sida ke deka nyereta semua pekit ti bisi disediaka rambau Pesta Lawas, ku Menija tim Citra Alti, Mohamad bin Dhuri. Nyerumba pengerami Pesta Lawas tu ila, sekeda artis tebilang ari Semenanjung, Sabah enggau Sarawak deka datai merindang lalu dikemujurka RTM Sarawak.

Mensia mayuh ke diau ba Wilayah Teluk Bruneiditesau datai awakka sama enggau ngerami Pesta Lawas 2012 laban Pesta Lawas tu bisi penyelaie ari pesta bukai iya nya nyediaka mayuh pemakai ke nyamai ari menua tu empu baka produk Tahai.

“Mai Tah ke Lawas, Bisai Hantap, Ma Taga entara jaku asal ke dikembuan rayat di menua tu ti ngelaluka penatai mensia mayuh ngelawa Lawas,” ku Haji Mohd Supaih.

Manah amat demonstrasyen ukui penyidi dadah

SADONG JAYA : Demonstrasyen ukui penyidi dadah enggau jenayah ari bala Polis Diraja Malaysia (PDRM) chukup ngerinduka ati rambau pengawa ngelancharka Skim Rondaan Sukarela (SRS) ba Pasar Sadong Jaya, empai lama.

Nengah demonstrasyen tu mensia mayuh ulih meda sereta nemu chara bala polis nyidi dadah nyema iya dibai orang ngena kantung besai tauka dalam kerita.

Tu sebengkah ari program SRS nengah Opis Penyerakup Menua enggau Integrasyen Nasional Sarawak ke bekerejasama enggau Indu Opis Polis Daerah (IPD) Samarahan ditumbuh awakka ulih mantu bala polis enggau mensia mayuh munaska penyalah.

Kelimpah ari nya, aktiviti bukai ke diatur beserimbai enggau program tu iya nya pekit futsal futsal kategori nembiak biak ari 12 taun, pekit bebatak tali entara tim kampung, lumba nembiak, kedai barang, eksibisyen jenayah enggau senentang penusah bebadi jalai alun.

Pengerami tu dipenyadi Kaban Parlimen P200 Batang Sadong Hajah Nancy Haji Shukri. Sama bisi datai maya nya Kaban Kunsil Negeri (ADUN) Sadong Jaya Ir. Aidel Lariwoo, Pengarah Opis Penyerakup Menua enggau Integrasyen Nasional Dirwana Haji Azool enggau kepala Polis Daerah IPD Samarahan DSP Abdul Rahman Ahmad.

PROGRAM SRS ... Hajah Nancy Haji Shukri (tengah), Ir. Aidel Lariwoo, Dirwana Haji Azool enggau DSP Abdul Rahman Ahmad begambar ngambika pengingat begulai enggau champion pekit futsal Nembika beserimbai enggau pengawa ngelancharka SRS di Pasar Sadong Jaya.

Pemujur pelajar ulih negapka pemansang menua

DEBAK : Kira 39 iku mahasiswa ari Universiti Utara Malaysia (UUM) ngemujurka Program Baktisiswa UUM 2012 bepalan ba Debak berengkah 9 ngagai 12 April 2012.

Program ti keterubah iya diatur Majlis Komiti Pemesai Tuai enggau Pemansang Siswa, Balai Bemalam Pelajar Tenaga Nasional (JKPS DPP TNB) tu dikena meri peransang ngagai mensia mayuh pasal pemujur pelajar ke tau negapka pemansang menua.

Dalam timpuh program tu diatur, bala pelajar deka diau begulai enggau apai indai ambu sida lalu program bukai ti udah diperambu baka program agama, mantu mensia mayuh, meransang nembiak sekula enggau mantu orang ke diau semak ba menua nya.

Kaban Kunsil Negeri (ADUN) Saribas, Mohammad Razi Sitam lebuh ke bejaku bejadi program tu madahka, mahasiswa mesti bebendar mandangka pengeransing ati sida mantu mensia mayuh sereta nunjukka chunto ti manah ngagai bala nembiak sekula.

Kelimpah ti tau nambahka penemu sereta nelebaka sida ngatur pengawa, pemanah program ke bansa tu mega ku Razi ulih ngasuh mensia mayuh meretika pemanah pelajar sekula ke tau nyungkak pemansang.Iya madah munyi nya lebuh bejadi Program Baktisiswa UUM 2012 sereta madahka bagi anak ambu ungkup bala apai indai bepalan ba Dewan Lakid Debak.

Pemanah pengawa ke diatur bala mahasiswa tu ku iya ulih nempa kaul ke manah entara sida enggau mensia mayuh ke diau ba kampung. "Bala nembiak sekula patut nunda perangai bala mahasiswa ke udah bebendar belajar nyentuka sida mujur belajar datai ba tikas universiti," ku iya.

Program tu mega, ulih nempa raban nembiak ari menua Debak nyadi modal mensia ke buna jemah. Maya nya, Razi bisi nyuaka bantu belanja RM10,000 dikena sida ngemujurka program manah agi. Bisi tiga bengkah sekula dibai masuk ngemujurka program tu iya Sekula Primari (SK) Suri, SK Datuk Bandar Debak enggau Sekula Sekondari (SMK) Saribas.

KE PENGINGAT... Mohammad Razi Sitam begambar begulai enggau bala anak ambu dalam Program Baktisiswa UUM 2012 di Debak.

Jereki belimpah asil ari pengawa berikan

KABONG : Lebuh bulan kembung, tu meh maya ke dianti-anti bala orang berikan laban maya ke baka tu ikan sigi ngaban sereta bisi telu. Tanda iya endang nyengala amat ba pengidup seiku orang berikan pengudah pukat ke ditan iya penuh bulih ikan terubok ke benung betelu berat lebih 500 kilogram malam, empai lama.

Uri Haji Bujang, 56, lebuh ke dirandau Utusan Sarawak madahka pengaga ati laban ke udah bulih ikan mayuh begulai enggau tiga iku anak bujang iya. Uri datai ari Kampung Maludam madahka, gaya hari ke chukup manah ngemuntangka pengawa sida menyanak ngentan pukat enggau nadai penanggul.

Maya nya, bulan endang kembung nya alai enda bangat lama kami menyanak udah ngenan pukat tak berasai amat pukat beguyat ketegal dilantak raban ikan terubuk ke benung ngaban. “Kami menyanak pan lalu berumban ngangtkat ke pukat, pengudah pukat ke diangkat kami meyanak chukup tekenyit sereta gaga meda pukat nyau burak laban ikan. Iya ke pemadu mayuh dipeda ikan terubok betelu gred A.

“Semak dua jam baru kami menyanak tembu ngumpul ikan lalau mai ikan pulai ke rumah. Perau aku ke sedang iya pemesai nyau sarat laban ikan terubok ke bechampur enggau ikan bukai. "Taja pan tubuh berasai lelak ngangkat ke ikan ari perau tang kami menyanak berasai gaga laban ke udah bulih jereki ti belimpah malam nya," ku iya.

Ku iya, enti baka selama timpuh sida menyanak mulai ke diri ari tasik ngagai pengkalan kampung kira dua jam. Tang laban perau ke sarat ngundan ikan ngujungka kami menyanak nyau lunggar timpuh empat jam mulai ke diri ari tasik malam nya.

Ku iya, diatu endang musin ikan terubok ngaban berengkah bulan Februari nyentuk ngagai bulan September taun tu. Jereki kami ke sekali tu endang belimpah amat.

Ngelama tu kami menyanak tebal agi bulih kira 300 kilogram tiap kali nurun berikan ke tasik. Dipelabaka asil ikan terubok ke dijual semak RM6,000 laban rega ikan terubok enti iya ke mudah pan dijual Gerempung Orang Berikan Kabong RM10 sekilogram.

IKAN TERUBOK… Pemayuh ikan terubok ke ulih Uri Bujang di Kabong asil ari pengawa berikan.

Bejimat ngena rengka rama

SARIKEI : Mensia mayuh dilalau bejimat lebuh ti bekenaka rengka rama ngambika perengka tu enda rusak sereta ulih dikena semua orang.

Kaban Parlimen Sarikei Ding Koung Hiing madah, enti sema rengka rama tu rusak ngapa, nya balat ngerugika mensia mayuh enggau perintah empu laban perintah nyau tebasau duit dikena miki perengka nya.

"Dikena nyeliahka pekara ti bansa tu, kitai mesti nemu berunding panjai sereta ngembuan tanggungjawap awakka rengka rama nya seruran manha berari," ku iya.

Iya madahka, Belanja ti dikena kitai miki rengka rama ke rusak nya ulih dikena kitai ngaduka projek pemansang ti ulih mai penguntung ngagai mensia mayuh.

"Ngagai sida ke rindu ngereja ulah ke enda menuku tu, kami ngarapka kita badu meh ngerusak rengka rama ke diberi perintah laban nya nadai mai pemanah enggau penguntung," ku iya. Iya madah munyi nya lebuh ngabas Pegung Nyemerai Sarikei.

Ding madah, semua rengka rama ti disediaka perintah endang ungkup semua orang, lalu nya patut dijaga serete dikena enggau meruan. Ku iya, naka ke diatu Pegung Nyemerai Sarikei benung dimiki baka ngaduka bilik endur nukar gari, agu enggau bilik mandi.

"Semua ungkus dikena miki Pegung Nyemerai tu endang dipelanja kami magang laban kami deka meri penyamai ngagai bala pengguna. Servis Pegung Nyemerai tu endang dibuka baka selama, enti bisi penanggul ti ngeruga pengelantang bala pengguna kami minta ampun," ku Ding.

Sama bisi datai nguluka Ding bejalai kia iya nya Supervisor Pegung Nyemerai Sarikei, Awang Bagong, Kunsilor Teng Ung Woo sereta sekeda staf Pegung Nyemerai Sarikei.

BERATIKA PENANGGUL...Kaban Parlimen Sarikei Ding Koung Hiing mendingka penerang ari Awang senentang penanggul ke nuntung Pegung Nyemerai Sarikei.

Pekit nyura Pesta Benak rami amat

SRI AMAN : Pekit nyura rambau Pesta Benak Sri Aman entara aktiviti ke penudi chukup rami diatur ba Panggau Main Asal berengkah ari pukul 8.00 nyentuk ngagai 11.00 pagi.

Pekit nyura tu bisi dipasuk semak 20 iku pesereta ti dibagi ngagai dua bengkah kategori iya nya sekula pra enggau tahap satu. Ba kategori pra sekula nembiak ke mujur nyadi champion iya nya Lee Ching Ping ari sekula Tadika Methodist. Beduduk ari nya Lee nerima perais bup enggau perengka dikena nulis. Nembiak ke lumur dua nangkan Lee iya nya Annie Wong ari Sekula Tadika Methodist enggau lumur tiga Farsha Razi ari Sekula Tadika Hikmah.

Udah nya, ba kategori Tahap Satu nembiak ke mujur nyadi champion iya nya Gareth Law ari Sekula Tadika Chung Hua Simanggang, ditangkan ka Po Kuang Ching enggau Joana Sii Yong Yee bulih lumur dua enggau tiga ba ketegori ke sebaka.

Bala nembiak ke bukai, sida mega diberi perais rindu ati ari bala pengatur pekit. Menteri Muda Pemansang Menua Pesisir enggau Pengawa Berumah, Datuk Francis Harden Hollis enggau Kaban Parlimen Sri Aman, Masir Kujat diberi basa nyuaka perais ngagai bala nembiak ke udah menang ba pekit nyura nya.

Sama bisi datai maya nya, Residen Sri Aman, Johnathan Lugoh enggau sapit iya Felicia Tan, Tuan DO Sri Aman, Ismawie Salleh, Enjinir JKR Sri Aman, Cassidy Morris enggau Walikota Sri Aman, Piau Inggot.

KE PENGINGAT...Harden (tengah) enggau Masir (kiba) begambar begulai enggau bala nembiak ke nyereta pekit nyura rambau pesta benak.

PDRM Mukah ngatur pekit nimbak

SIBU : Lebih 60 iku bala orang pemesai enggau Kepala Opis bagi menua Mukah bisi ngambi bagi nyereta Pekit Nimbak ke diatur aPolis DiRaja Malaysia Daerah Mukah bepalab ba taba besai, KM25, Jalai Sibu/Bintulu, empai lama.

Kaban kunsil Negeri Jemoreng ti mega Seketeri Politik Kepala Menteri, Abu Seman Jahwie bejadi pekit nimbak tu beserimbai enggau hari pengada PDRM Ke 205.

Abu Seman begulai enggau Kepala Polis Daerah Mukah, DSP Omar Bakhtiar Yaacob nyereta pekit nimbak ngena pistol 9mm 12 igi peluru penyauh nimbak 15 meter enggau 20 meter, udah nya ngena HK MP5 20 igi peluru penyauh nimbak 15 meter enggau 20 meter.

Entara bala bukai ke bisi nyereta pekit nimbak tu iya nya raban PDRM, Opis Penyaga Menua Malaysia (JPAM), Rela enggau bala Kepala Opis-Opis Perintah di Mukah enggau Kanowit. Udah nya, DSP Omar Bakhtiar terus nyuaka perais ngagai sida ke udah menang.

Tuju pekit tu diatur iya nya dikena nempa kaul entara staf opis perintah di Mukah enggau Kanowit, kelimpah ti nambahka penyikar bala raban PDRM, Rela enggau JPAM ngena senjata.

BENUNG NGICHING… Abu Seman bejadi pekit nimbak entara raban VVIP, pemesai enggau bala Kepala Opis bagi menua Mukah ba taba besai di Sibu lalu dikemataka bala komiti enggau penyereta pekit.

Safari Rakit Baleh-Kapit bisi mandangka main asal

KAPIT : Pengerami ninting taun Safari Rakit Baleh-Kapit nulung mantaika main asal di menua tu kelebih agi daya idup ba rumah panjai enggau ba bandar.

Seketeri Politik Kepala Menteri, Wilson Nyabong Ijang madah, Kapit ngembuan produk dagang temuai ti ulih dikerembaika ngagai temuai entarabansa.

Entara produk ke ulih dikerembai baka adat pengidup raban bansa Iban, rumah panjai, pengeraja asal utai tumbuh enggau idup ti bedau kala ditegu, ku iya madah lebuh ke bejaku rambau Pengerami Tuai Begulai enggau Rayat beserimbai enggau Safari Rakit Baleh-Kapit ke belabuh ari Rumah Salang, Pulau Sibau, Mujong, empai lama.

Iya ngarika Menteri PemansangTanah, Tan Sri Dr. James Jemut Masing. Wilson Nyabong madahka, pemayuh pesereta bukai ti datai ari luar menua Kapit nyereta Safari Rakit Baleh-Kapit mai penguntung ngagai rayat di Kapit laban nya tau nyungkak penatai pemisi sida.

“Taun tu Safari Rakit besai bendar reti laban berebak enggau Hari Easter,” ku iya. Ngenang pasal politik, iya madahka, kerusi Parlimen Huju Rejang maya pengawa bepilih besai ti deka datai dipelabaka deka ngemansutka orang baru nyadi chalon iya nya Seketeri Tan Sri Dr. James Jemut, Wilson Ugak Kumbong.

Ngena peneleba ti lama udah gawa nyadi Seketeri Politik, iya andal bendar Wilson Ugak ulih bejalaika tanggungjawap nyadi pengari rayat ke manah nyema iya diberi peluang udah tu. Ba pengerami nya iya meri puji ngagai Pengulu Salang anak Batang laban ke udah dipadu nyadi Pengulu. Safari Rakit Baleh-Kapit taun bisi dipasuk 39 buah tim.

Bala Seketeri Politik Kepala Menteri, Dr. Richard Will, Tengku Geruna enggau Daniel Jubang, Sapit Residen, Mohd. Ikhmal Abdullah, Walikota Majlis Daerah Kapit, Philimon Nuing, CEO CMS, Datuk Richard Curtis, Wilson Ugak Kumbong enggau Pemancha Tan Kian Hoo entara temuai dipebasa ke bisi datai.

Entara aktiviti ke bisi diatur beserimbai enggau Pengerami Tuai Begulai enggau Rayat iya nya beperesa pengerai pechuma, ceramah pasal pengerai, ceramah nagang angus enggau demotrasyen madamka api.

ADAT MIRING… Wilson Nyabong (kiba) benung ngaduka piring lalu dikemataka (ari kiba) Pengulu Salang, Datuk Richard Curtis, Philimon, Malcom, Daniel enggau Dr. Richard Will ba sebengkah Pengerami Tuai Begulai enggau Rayat ba Rh. Salang, Pulau Sibau, Mujong di Kapit.

Projek BELB ngelantangka pengidup rayat Kpg. Bukit Manang

LAWAS : Rayat ke diau ba Kampung Bukit Manang di Merapok Lawas deka nerima elektrik ke pemadu manah enti sema projek Bekal Elektrik Menua Pesisir (BELB) udah tembu digaga Kompeni Citra Alti jemah.

Beduduk ari nya, sebengkah pengawa ngabas taba projek lalu nerangka pasal projek ngagai Tuai Raban Bansa baka Pengulu Joseph Gusa ti ngarika raban bansa Lun Bawang, Pengulu Tiga Buyun ngarika raban bansa Tagal enggau Pemancha Rosili bin Majid diatur begulai enggau bala SESCo Lawas, Citra Alti enggau Pemesai Khas Opis Menteri Rengka Rama Sarawak.

Maya nya mega, Menija Projek Citra Alti, Haji Mohamad Dhuri andal bendar projek tu ulih tembu taun tu awakka jampat mai penyamai ngagai rayat ke diau semak jalai enggau sida ke diau ba Kampung Bukit Manang nyentuk ngagai sida di Kampung Sasa ba Ulu Merapok.

Nya alai, iya ngarapka mensia mayuh ulih meri kerejasama awakkka projek tu ulih digaga enggau mujur nyentukka iya tembu jemah. Bala SESCo bulih deka bulih penguntung beduduk ari projek elektrik tu dudi hari.

Pengulu Joseph Gusa madah, rayat tetap deka meri kerejasama laban projek tu endang mai penguntung ngagai mensia mayuh. Udah nya, Pemancha Rosili pan bisi bejaku, ngelalau bala sida pengereja pengawa awakka ngereja pengawa enggau manah ngambika nadai penanggul ngagai bala pengguna dudi hari.

Sama bisi datai maya nya, Pemesai Khas Opis Menteri Rengka Rama Sarawak, Husaini Hakim, Enjinir Sesco Daerah enggau bala staf Sesco.

BERUNDING DULU….Haji Mohamad Dhuri benung berunding pasal genturung pendiau ke deka diberi projek BELB di Lawas.

IPD Miri mujur ngatur kimpin meri darah

MIRI : Ketegal ke nemu pemesai reti guna darah ngagai mensia mayuh, nya alai Indu Opis Polis Daerah (IPD) Miri ngemujurka sebengkah program kimpin meri darah ti diatur ba Dewan Gerempung Ruang Bilik Polis ba endur nya, apin lama ke udah.

Bisi 54 iku orang ke datai besaup meri darah berengkah ari pukul 9.00 pagi ngagai 12.00 tengah hari. Taja pia, ari penyampau nya, semina 48 iku aja sida ke mujur meri darah, iya ke bukai enda dikemendar tegal enda bepengerai.

Nitihka penerang Kepala Polis Daerah Miri, Asisten Komisioner Mun Kock Keong, program tu diatur beserimbai enggau Hari Polis Ke-205. Iya meri basa sereta puji ngagai bala polis bantuan ari bala Petronas, Shell sereta raban sukarelawan polis enggau pekereja-pekereja ari Hospital Miri tegal udah meri sukung enggau kerejasama ngemujurka program nya.

Seiku orang ke sama nyereta pengawa meri darah tu, iya nya Andrew Balan, 49, lebuh dirandau iya madahka, program ke bansa tu manah amat dikena meri chunto ngagai mensia mayuh awakka sama besaup meri darah ngagai otang bukai.

“Kelimpah ulih mantu orang bukai, aku mega ulih nyaga pengerai diri. Tubuh berasai lempung enti udah meri darah laban darah lama udah diganti enggau darah ke baru.

Kitai enda nemu, pagila lusa, nyangka orang ti begunaka darah nya kaban belayan kitai empu. Naka ke diatu, aku sigi nadai kala bisi penanggul lebuh ti meri darah," ku iya diatu udah 33 kali meri darah agai orang bukai. Kelimpah ari iya, seiku agi orang ke sama bisi meri darah maya nya, Dayang Hilfee,27 madahka, terubah iya sigi amat berasai takut tang meh diumba enggau pengeran ati pengujung iya ulih ga berasai atakut agi.

“Tu meh kerubah iya aku meri darah, udah meri darah sigi bisi berasai lain mimit tang enti udah makai enggau ngirup iya deka baka selama.
Pengawa manah ke bansa tu endang deka diteruska aku baru ba maya ti deka datai awakka ulih mantu ngidupka seput orang bukai," ku iya.

MANAH ATI... Sekeda orang ke bisi datai ngemujurka program Kimpin Meri Darah ke diatur Indu Opis Polis Daerah Miri.