Raban nembiak diperansang nyeretai aktiviti bemukun

SIBU : Sekretrariat Sosial, Main Asal, Lumba enggau Penyerakup N. 49 Nangka meransang raban nembiak nyeretai pekit tanda bemukun ti deka diatur ba Dewan MUC, Sibu kena malam 28 haribulan April.

Pekit tu tebuka ngagai semua urang di Sibu lalu lelaki ke ngeluie umur 15 taun. Genap bengkah tim mesti ngembuan dua iku urang lalu penyampau bayar yuran semina RM20 ungkup sebuah tim.

Tim ke bisi ngambi bagi dalam pekit tu deka diasuh betanda 7 minit sereta nyadaka tiga buah pantun. Haribulan kepenudi endur nganjung pom iya nya kena 26 April, 2012, pukul 5.00 lemai. Haribulan enchabut undi kena 28 April, pukul 2 lemai bepalan ba Dewan MMB, Jalai Kampung Hilir, Sibu.

Urang ke nyadi champion, lumur dua enggau tiga deka diberi perais duit enggau trofi. Pengatur pekit mega bisi nyediaka tujuh iti perais rindu ati.

Tuju pekit tu diatur laban deka ngelala bagi raban nembiak ke ngembuan pengelandik ba pengawa bemukun, kelimpah ari nya mega endur neritka kaul ke manah entara pupu raban bansa sereta meransang raban nembiak ngemeratka konsep 1 Malaysia.

Penerang ke silik pasal pekit tauka endur bulih pom, mensia mayuh tau betanya ngagai Rajeli Abdul Rahim (Led), Menija Pekit Bemukun ngena lumur (016-8988010), tauka bala bukai baka Edmund Chua (017-8084576), George Yong Lin Tak (010-8079809)enggau Mohamad Saffian Samin (019-8478356).

20 kaban K1M nyereta Kus Belajar Komputer

MARUDI : Bisi 20 iku kaban Komuniti 1Malaysia (K1M) Rh. Randie Sg. Brit nyereta Kus Belajar Komputer ke diatur Opis Pemadah Marudi kerejasama enggau K1M Rh. Randie Sg. Brit , Pusat Jalur Lebar (PJK ) Marudi.

Kus Belajar Komputer tu diatur dalam kandang dua berangkah kemari enggau sehari tu bepalan ba Pusat Jalur Lebar Marudi. Kus tu beduduk ari langgur penemu K1M Rh. Randie Sg. Brit.

Nya alai, Pemesai Opis Pemadah Marudi Joseph James madahka, tuju kus tu diatur ngambika bala kaban K1M Rh. Randie Sg. Brit teleba sereta landik ngena perengka Komputer.

Joseph Kursus madah, kus ke sama bansa tu mega deka diatur kena 25 ngagai 26 Mei ungkup kaban K1M kampung Pemindahan, udah nya ungkup K1M Kampung Narum deka diatur kena 15 ngagai 16 Jun 2012. Ku iya, bala kaban K1M ke bisi nyereta kus pengelama dua hari tu diberi Setipikit ti disuaka ba haribulan ti deka dipadah jemah.

NGANSAH PENEMU…Sekeda kaban K1M Rh.Randie Sg. Brit ti bisi nyereta Kus Belajar Komputer ngambika sida landik ngena komputer udah tu.

Pesta Ikan Tapah Pantu diatur ujung bulan tu

SRI AMAN : Pasar Pantu enda lama agi deka rami laban ba endur tu deka diatur sebengkah pengerami iya Pesta Ikan Tapah Pantu renggat ketiga berengkah 28 ngagai 29 April tu.

Kaban Kunsil Negeri (ADUN) Balai Ringin, Snowdan Donald Lawan lebuh ke dirandau, madahka mayuh bengkah main udah dirintai ngambika ulih diatur nyerumba pengerami Pesta Ikan Tapah Pantu ila.

Entara achara dipelabaka ulih mai pengerindu ngagai bala temuai ke datai rambau Pesta Ikan Tapah Pantu 2012 tu ila iya nya pekit karaoke, kedai bejualka bemacham bansa barang, konset, Kumang Ikan Tapah, pengawa mandangka main asal enggau mayuh agi kebukai, ku iya.

“Pesta Ikan Tapah Pantu sebengkah ari pengerami asal, maya keterubah iya diatur 2009 suba pengerami tu diatur ba Pasar Pantu. Udah nya, ba taun ke dua iya diatur terus diberi nama Pesta Pantu rambau taun 2010.

“Taja pia, pengudah ninga penemu Menteri Pemansang Tanah iya nya Tan Sri Dr James Jemut Masing, nama Pesta Pantu ditukar nyadi Pesta Ikan Tapah Pantu ungkup ke sekali tu," ku iya.

Kelimpah ti engkeman amat enggau nama pengerami nya, ku Snowdan logo Ikan Tapah ti bisi ba simpang jalai Pasar Pantu mega besangkut paut enggau pemisi ikan tu dalam Sungai Batang Strap, Pantu.

kelimpah ari nya, iya madah sigi enda setuju langgur penemu sekeda urang ti deka ngatur Pesta Ikan Tapah Pantu ba pasar Lachau tauka ba Keranggas Gayau. Ku iya, Pesta Ikan Tapah sebengkah produk dikena ngemansangka Pasar Pantu ke dipegai DUN Balai Ringin lalu pengerami tu enda tau mindah ngagai palan bukai enti ukai ba Pantu.

“Tambah mega, Pesta Ikan Tapah Pantu udah bisi sukung ari mensia mayuh. Nya alai, aku ngarapka semua rayat ke bisi ati deka meda Pesta Ikan tapah Pantu anang enda sampal datai kena 28 ngagai 29 April tu ila,” ku iya.

Snowdan madah, aum kepenudi pasal Pesta Ikan Tapah Pantu 2012 deka diatur ba Opis Pelilih Menua Pantu kena 17 haribulan April tu.

Pasar Pantu bepalan lebih kurang 62 kilometer penyauh ari Bandar Sri Aman lalu mensia mayuh nyamai ngenataika diri ngagai pasar tu laban udah bisi jalai raya ke manah ari Jalai Sri Aman – Serian.

DEKA RAMI...Pasar Pantu enda lama agi deka penuh digulu bala mensia ke datai ngemataka Pesta Ikan Tapah ti berengkah diatur kena 28 ngagai 29 April tu.

Pesta Lawas enda lama agi

LAWAS : Pesta Lawas taun tu dipelabaka rami agi laban sebengkah program deka ditambah iya nya Program Bejalai Expo Makit (JEP) RTM Sarawak ti diatur kerejasama entara kompeni swasta Citra Alti enggau komiti Pesta Lawas ti betuaika Pemesai Daerah Lawas.

Beduduk ari nya, kira 300 buah kedai eksibisyen enggau bejual deka mayuh berintai ba bandar Lawas ti ngayanka mayuh macham barang ke bisi ba serata menua Sarawak nyengkaum ari Lawas empu. Kelimpah ari nya mega, bala RTM Sabah enggau Opis Pemadah Negeri Sabah mega deka datai sama enggau ngerami ngayanka eksibisyen produk ari negeri di Bawah Bayu.

Pemesai Daerah Lawas, Haji Mohd Supaih Haji Hamdan ti udah dipaduka Menteri Perambu Sumber enggau Rampa Menua II, Menteri Rengka Rama enggau Menteri Pemansang Industri Sarawak ti mega ADUN Bukit Sari, Datuk Amar Haji Awang Tengah Ali Hasan mesan semua orang patut bekerejasama ngambika Pesta Lawas ke sekali tu ulih mujur lalau nempa sejarah.

Maya nya ila, RTM deka mansutka terus dalam Program Selamat Pagi Malaysia bepalan ba Pesta Lawas begulai enggau Datuk Amar Haji Awang Tengah Ali Hasan, Kaban Parlimen Lawas, Dato Henry Sum Agong enggau Pemesai Daerah Lawas.

Kelimpah ari nya, bala RTM Sarawak nengah pengerami tu nguji ngelaku tauka ngasuh orang ngelala bala pengeluar program tauka Dj ke semina didingga kuchah-kuchah ba dalam radio ngelama tu. Bala RTM mega bisi ngaga promosyen pasal produk sida ke bukai dikena beteleba agi enggau mensia mayuh ke datai ari negeri Sarawak, Sabah enggau menua Brunei.

Achara ke pemadu manah maya pesta Lawas tu ila iya nya regatta Lawas ti mandangka bala campion lumba perau ari Brunei, Baram, Limbang, Kalimantan Indonesia sereta tim Saratok ke suah ngena gelar Citra Alti.

Taun tu, tim Citra Alti deka mai 5 buah perau laban sida ke deka nyereta semua pekit ti bisi disediaka rambau Pesta Lawas, ku Menija tim Citra Alti, Mohamad bin Dhuri. Nyerumba pengerami Pesta Lawas tu ila, sekeda artis tebilang ari Semenanjung, Sabah enggau Sarawak deka datai merindang lalu dikemujurka RTM Sarawak.

Mensia mayuh ke diau ba Wilayah Teluk Bruneiditesau datai awakka sama enggau ngerami Pesta Lawas 2012 laban Pesta Lawas tu bisi penyelaie ari pesta bukai iya nya nyediaka mayuh pemakai ke nyamai ari menua tu empu baka produk Tahai.

“Mai Tah ke Lawas, Bisai Hantap, Ma Taga entara jaku asal ke dikembuan rayat di menua tu ti ngelaluka penatai mensia mayuh ngelawa Lawas,” ku Haji Mohd Supaih.

Manah amat demonstrasyen ukui penyidi dadah

SADONG JAYA : Demonstrasyen ukui penyidi dadah enggau jenayah ari bala Polis Diraja Malaysia (PDRM) chukup ngerinduka ati rambau pengawa ngelancharka Skim Rondaan Sukarela (SRS) ba Pasar Sadong Jaya, empai lama.

Nengah demonstrasyen tu mensia mayuh ulih meda sereta nemu chara bala polis nyidi dadah nyema iya dibai orang ngena kantung besai tauka dalam kerita.

Tu sebengkah ari program SRS nengah Opis Penyerakup Menua enggau Integrasyen Nasional Sarawak ke bekerejasama enggau Indu Opis Polis Daerah (IPD) Samarahan ditumbuh awakka ulih mantu bala polis enggau mensia mayuh munaska penyalah.

Kelimpah ari nya, aktiviti bukai ke diatur beserimbai enggau program tu iya nya pekit futsal futsal kategori nembiak biak ari 12 taun, pekit bebatak tali entara tim kampung, lumba nembiak, kedai barang, eksibisyen jenayah enggau senentang penusah bebadi jalai alun.

Pengerami tu dipenyadi Kaban Parlimen P200 Batang Sadong Hajah Nancy Haji Shukri. Sama bisi datai maya nya Kaban Kunsil Negeri (ADUN) Sadong Jaya Ir. Aidel Lariwoo, Pengarah Opis Penyerakup Menua enggau Integrasyen Nasional Dirwana Haji Azool enggau kepala Polis Daerah IPD Samarahan DSP Abdul Rahman Ahmad.

PROGRAM SRS ... Hajah Nancy Haji Shukri (tengah), Ir. Aidel Lariwoo, Dirwana Haji Azool enggau DSP Abdul Rahman Ahmad begambar ngambika pengingat begulai enggau champion pekit futsal Nembika beserimbai enggau pengawa ngelancharka SRS di Pasar Sadong Jaya.

Pemujur pelajar ulih negapka pemansang menua

DEBAK : Kira 39 iku mahasiswa ari Universiti Utara Malaysia (UUM) ngemujurka Program Baktisiswa UUM 2012 bepalan ba Debak berengkah 9 ngagai 12 April 2012.

Program ti keterubah iya diatur Majlis Komiti Pemesai Tuai enggau Pemansang Siswa, Balai Bemalam Pelajar Tenaga Nasional (JKPS DPP TNB) tu dikena meri peransang ngagai mensia mayuh pasal pemujur pelajar ke tau negapka pemansang menua.

Dalam timpuh program tu diatur, bala pelajar deka diau begulai enggau apai indai ambu sida lalu program bukai ti udah diperambu baka program agama, mantu mensia mayuh, meransang nembiak sekula enggau mantu orang ke diau semak ba menua nya.

Kaban Kunsil Negeri (ADUN) Saribas, Mohammad Razi Sitam lebuh ke bejaku bejadi program tu madahka, mahasiswa mesti bebendar mandangka pengeransing ati sida mantu mensia mayuh sereta nunjukka chunto ti manah ngagai bala nembiak sekula.

Kelimpah ti tau nambahka penemu sereta nelebaka sida ngatur pengawa, pemanah program ke bansa tu mega ku Razi ulih ngasuh mensia mayuh meretika pemanah pelajar sekula ke tau nyungkak pemansang.Iya madah munyi nya lebuh bejadi Program Baktisiswa UUM 2012 sereta madahka bagi anak ambu ungkup bala apai indai bepalan ba Dewan Lakid Debak.

Pemanah pengawa ke diatur bala mahasiswa tu ku iya ulih nempa kaul ke manah entara sida enggau mensia mayuh ke diau ba kampung. "Bala nembiak sekula patut nunda perangai bala mahasiswa ke udah bebendar belajar nyentuka sida mujur belajar datai ba tikas universiti," ku iya.

Program tu mega, ulih nempa raban nembiak ari menua Debak nyadi modal mensia ke buna jemah. Maya nya, Razi bisi nyuaka bantu belanja RM10,000 dikena sida ngemujurka program manah agi. Bisi tiga bengkah sekula dibai masuk ngemujurka program tu iya Sekula Primari (SK) Suri, SK Datuk Bandar Debak enggau Sekula Sekondari (SMK) Saribas.

KE PENGINGAT... Mohammad Razi Sitam begambar begulai enggau bala anak ambu dalam Program Baktisiswa UUM 2012 di Debak.

Jereki belimpah asil ari pengawa berikan

KABONG : Lebuh bulan kembung, tu meh maya ke dianti-anti bala orang berikan laban maya ke baka tu ikan sigi ngaban sereta bisi telu. Tanda iya endang nyengala amat ba pengidup seiku orang berikan pengudah pukat ke ditan iya penuh bulih ikan terubok ke benung betelu berat lebih 500 kilogram malam, empai lama.

Uri Haji Bujang, 56, lebuh ke dirandau Utusan Sarawak madahka pengaga ati laban ke udah bulih ikan mayuh begulai enggau tiga iku anak bujang iya. Uri datai ari Kampung Maludam madahka, gaya hari ke chukup manah ngemuntangka pengawa sida menyanak ngentan pukat enggau nadai penanggul.

Maya nya, bulan endang kembung nya alai enda bangat lama kami menyanak udah ngenan pukat tak berasai amat pukat beguyat ketegal dilantak raban ikan terubuk ke benung ngaban. “Kami menyanak pan lalu berumban ngangtkat ke pukat, pengudah pukat ke diangkat kami meyanak chukup tekenyit sereta gaga meda pukat nyau burak laban ikan. Iya ke pemadu mayuh dipeda ikan terubok betelu gred A.

“Semak dua jam baru kami menyanak tembu ngumpul ikan lalau mai ikan pulai ke rumah. Perau aku ke sedang iya pemesai nyau sarat laban ikan terubok ke bechampur enggau ikan bukai. "Taja pan tubuh berasai lelak ngangkat ke ikan ari perau tang kami menyanak berasai gaga laban ke udah bulih jereki ti belimpah malam nya," ku iya.

Ku iya, enti baka selama timpuh sida menyanak mulai ke diri ari tasik ngagai pengkalan kampung kira dua jam. Tang laban perau ke sarat ngundan ikan ngujungka kami menyanak nyau lunggar timpuh empat jam mulai ke diri ari tasik malam nya.

Ku iya, diatu endang musin ikan terubok ngaban berengkah bulan Februari nyentuk ngagai bulan September taun tu. Jereki kami ke sekali tu endang belimpah amat.

Ngelama tu kami menyanak tebal agi bulih kira 300 kilogram tiap kali nurun berikan ke tasik. Dipelabaka asil ikan terubok ke dijual semak RM6,000 laban rega ikan terubok enti iya ke mudah pan dijual Gerempung Orang Berikan Kabong RM10 sekilogram.

IKAN TERUBOK… Pemayuh ikan terubok ke ulih Uri Bujang di Kabong asil ari pengawa berikan.

Bejimat ngena rengka rama

SARIKEI : Mensia mayuh dilalau bejimat lebuh ti bekenaka rengka rama ngambika perengka tu enda rusak sereta ulih dikena semua orang.

Kaban Parlimen Sarikei Ding Koung Hiing madah, enti sema rengka rama tu rusak ngapa, nya balat ngerugika mensia mayuh enggau perintah empu laban perintah nyau tebasau duit dikena miki perengka nya.

"Dikena nyeliahka pekara ti bansa tu, kitai mesti nemu berunding panjai sereta ngembuan tanggungjawap awakka rengka rama nya seruran manha berari," ku iya.

Iya madahka, Belanja ti dikena kitai miki rengka rama ke rusak nya ulih dikena kitai ngaduka projek pemansang ti ulih mai penguntung ngagai mensia mayuh.

"Ngagai sida ke rindu ngereja ulah ke enda menuku tu, kami ngarapka kita badu meh ngerusak rengka rama ke diberi perintah laban nya nadai mai pemanah enggau penguntung," ku iya. Iya madah munyi nya lebuh ngabas Pegung Nyemerai Sarikei.

Ding madah, semua rengka rama ti disediaka perintah endang ungkup semua orang, lalu nya patut dijaga serete dikena enggau meruan. Ku iya, naka ke diatu Pegung Nyemerai Sarikei benung dimiki baka ngaduka bilik endur nukar gari, agu enggau bilik mandi.

"Semua ungkus dikena miki Pegung Nyemerai tu endang dipelanja kami magang laban kami deka meri penyamai ngagai bala pengguna. Servis Pegung Nyemerai tu endang dibuka baka selama, enti bisi penanggul ti ngeruga pengelantang bala pengguna kami minta ampun," ku Ding.

Sama bisi datai nguluka Ding bejalai kia iya nya Supervisor Pegung Nyemerai Sarikei, Awang Bagong, Kunsilor Teng Ung Woo sereta sekeda staf Pegung Nyemerai Sarikei.

BERATIKA PENANGGUL...Kaban Parlimen Sarikei Ding Koung Hiing mendingka penerang ari Awang senentang penanggul ke nuntung Pegung Nyemerai Sarikei.

Pekit nyura Pesta Benak rami amat

SRI AMAN : Pekit nyura rambau Pesta Benak Sri Aman entara aktiviti ke penudi chukup rami diatur ba Panggau Main Asal berengkah ari pukul 8.00 nyentuk ngagai 11.00 pagi.

Pekit nyura tu bisi dipasuk semak 20 iku pesereta ti dibagi ngagai dua bengkah kategori iya nya sekula pra enggau tahap satu. Ba kategori pra sekula nembiak ke mujur nyadi champion iya nya Lee Ching Ping ari sekula Tadika Methodist. Beduduk ari nya Lee nerima perais bup enggau perengka dikena nulis. Nembiak ke lumur dua nangkan Lee iya nya Annie Wong ari Sekula Tadika Methodist enggau lumur tiga Farsha Razi ari Sekula Tadika Hikmah.

Udah nya, ba kategori Tahap Satu nembiak ke mujur nyadi champion iya nya Gareth Law ari Sekula Tadika Chung Hua Simanggang, ditangkan ka Po Kuang Ching enggau Joana Sii Yong Yee bulih lumur dua enggau tiga ba ketegori ke sebaka.

Bala nembiak ke bukai, sida mega diberi perais rindu ati ari bala pengatur pekit. Menteri Muda Pemansang Menua Pesisir enggau Pengawa Berumah, Datuk Francis Harden Hollis enggau Kaban Parlimen Sri Aman, Masir Kujat diberi basa nyuaka perais ngagai bala nembiak ke udah menang ba pekit nyura nya.

Sama bisi datai maya nya, Residen Sri Aman, Johnathan Lugoh enggau sapit iya Felicia Tan, Tuan DO Sri Aman, Ismawie Salleh, Enjinir JKR Sri Aman, Cassidy Morris enggau Walikota Sri Aman, Piau Inggot.

KE PENGINGAT...Harden (tengah) enggau Masir (kiba) begambar begulai enggau bala nembiak ke nyereta pekit nyura rambau pesta benak.

PDRM Mukah ngatur pekit nimbak

SIBU : Lebih 60 iku bala orang pemesai enggau Kepala Opis bagi menua Mukah bisi ngambi bagi nyereta Pekit Nimbak ke diatur aPolis DiRaja Malaysia Daerah Mukah bepalab ba taba besai, KM25, Jalai Sibu/Bintulu, empai lama.

Kaban kunsil Negeri Jemoreng ti mega Seketeri Politik Kepala Menteri, Abu Seman Jahwie bejadi pekit nimbak tu beserimbai enggau hari pengada PDRM Ke 205.

Abu Seman begulai enggau Kepala Polis Daerah Mukah, DSP Omar Bakhtiar Yaacob nyereta pekit nimbak ngena pistol 9mm 12 igi peluru penyauh nimbak 15 meter enggau 20 meter, udah nya ngena HK MP5 20 igi peluru penyauh nimbak 15 meter enggau 20 meter.

Entara bala bukai ke bisi nyereta pekit nimbak tu iya nya raban PDRM, Opis Penyaga Menua Malaysia (JPAM), Rela enggau bala Kepala Opis-Opis Perintah di Mukah enggau Kanowit. Udah nya, DSP Omar Bakhtiar terus nyuaka perais ngagai sida ke udah menang.

Tuju pekit tu diatur iya nya dikena nempa kaul entara staf opis perintah di Mukah enggau Kanowit, kelimpah ti nambahka penyikar bala raban PDRM, Rela enggau JPAM ngena senjata.

BENUNG NGICHING… Abu Seman bejadi pekit nimbak entara raban VVIP, pemesai enggau bala Kepala Opis bagi menua Mukah ba taba besai di Sibu lalu dikemataka bala komiti enggau penyereta pekit.

Safari Rakit Baleh-Kapit bisi mandangka main asal

KAPIT : Pengerami ninting taun Safari Rakit Baleh-Kapit nulung mantaika main asal di menua tu kelebih agi daya idup ba rumah panjai enggau ba bandar.

Seketeri Politik Kepala Menteri, Wilson Nyabong Ijang madah, Kapit ngembuan produk dagang temuai ti ulih dikerembaika ngagai temuai entarabansa.

Entara produk ke ulih dikerembai baka adat pengidup raban bansa Iban, rumah panjai, pengeraja asal utai tumbuh enggau idup ti bedau kala ditegu, ku iya madah lebuh ke bejaku rambau Pengerami Tuai Begulai enggau Rayat beserimbai enggau Safari Rakit Baleh-Kapit ke belabuh ari Rumah Salang, Pulau Sibau, Mujong, empai lama.

Iya ngarika Menteri PemansangTanah, Tan Sri Dr. James Jemut Masing. Wilson Nyabong madahka, pemayuh pesereta bukai ti datai ari luar menua Kapit nyereta Safari Rakit Baleh-Kapit mai penguntung ngagai rayat di Kapit laban nya tau nyungkak penatai pemisi sida.

“Taun tu Safari Rakit besai bendar reti laban berebak enggau Hari Easter,” ku iya. Ngenang pasal politik, iya madahka, kerusi Parlimen Huju Rejang maya pengawa bepilih besai ti deka datai dipelabaka deka ngemansutka orang baru nyadi chalon iya nya Seketeri Tan Sri Dr. James Jemut, Wilson Ugak Kumbong.

Ngena peneleba ti lama udah gawa nyadi Seketeri Politik, iya andal bendar Wilson Ugak ulih bejalaika tanggungjawap nyadi pengari rayat ke manah nyema iya diberi peluang udah tu. Ba pengerami nya iya meri puji ngagai Pengulu Salang anak Batang laban ke udah dipadu nyadi Pengulu. Safari Rakit Baleh-Kapit taun bisi dipasuk 39 buah tim.

Bala Seketeri Politik Kepala Menteri, Dr. Richard Will, Tengku Geruna enggau Daniel Jubang, Sapit Residen, Mohd. Ikhmal Abdullah, Walikota Majlis Daerah Kapit, Philimon Nuing, CEO CMS, Datuk Richard Curtis, Wilson Ugak Kumbong enggau Pemancha Tan Kian Hoo entara temuai dipebasa ke bisi datai.

Entara aktiviti ke bisi diatur beserimbai enggau Pengerami Tuai Begulai enggau Rayat iya nya beperesa pengerai pechuma, ceramah pasal pengerai, ceramah nagang angus enggau demotrasyen madamka api.

ADAT MIRING… Wilson Nyabong (kiba) benung ngaduka piring lalu dikemataka (ari kiba) Pengulu Salang, Datuk Richard Curtis, Philimon, Malcom, Daniel enggau Dr. Richard Will ba sebengkah Pengerami Tuai Begulai enggau Rayat ba Rh. Salang, Pulau Sibau, Mujong di Kapit.

Projek BELB ngelantangka pengidup rayat Kpg. Bukit Manang

LAWAS : Rayat ke diau ba Kampung Bukit Manang di Merapok Lawas deka nerima elektrik ke pemadu manah enti sema projek Bekal Elektrik Menua Pesisir (BELB) udah tembu digaga Kompeni Citra Alti jemah.

Beduduk ari nya, sebengkah pengawa ngabas taba projek lalu nerangka pasal projek ngagai Tuai Raban Bansa baka Pengulu Joseph Gusa ti ngarika raban bansa Lun Bawang, Pengulu Tiga Buyun ngarika raban bansa Tagal enggau Pemancha Rosili bin Majid diatur begulai enggau bala SESCo Lawas, Citra Alti enggau Pemesai Khas Opis Menteri Rengka Rama Sarawak.

Maya nya mega, Menija Projek Citra Alti, Haji Mohamad Dhuri andal bendar projek tu ulih tembu taun tu awakka jampat mai penyamai ngagai rayat ke diau semak jalai enggau sida ke diau ba Kampung Bukit Manang nyentuk ngagai sida di Kampung Sasa ba Ulu Merapok.

Nya alai, iya ngarapka mensia mayuh ulih meri kerejasama awakkka projek tu ulih digaga enggau mujur nyentukka iya tembu jemah. Bala SESCo bulih deka bulih penguntung beduduk ari projek elektrik tu dudi hari.

Pengulu Joseph Gusa madah, rayat tetap deka meri kerejasama laban projek tu endang mai penguntung ngagai mensia mayuh. Udah nya, Pemancha Rosili pan bisi bejaku, ngelalau bala sida pengereja pengawa awakka ngereja pengawa enggau manah ngambika nadai penanggul ngagai bala pengguna dudi hari.

Sama bisi datai maya nya, Pemesai Khas Opis Menteri Rengka Rama Sarawak, Husaini Hakim, Enjinir Sesco Daerah enggau bala staf Sesco.

BERUNDING DULU….Haji Mohamad Dhuri benung berunding pasal genturung pendiau ke deka diberi projek BELB di Lawas.

IPD Miri mujur ngatur kimpin meri darah

MIRI : Ketegal ke nemu pemesai reti guna darah ngagai mensia mayuh, nya alai Indu Opis Polis Daerah (IPD) Miri ngemujurka sebengkah program kimpin meri darah ti diatur ba Dewan Gerempung Ruang Bilik Polis ba endur nya, apin lama ke udah.

Bisi 54 iku orang ke datai besaup meri darah berengkah ari pukul 9.00 pagi ngagai 12.00 tengah hari. Taja pia, ari penyampau nya, semina 48 iku aja sida ke mujur meri darah, iya ke bukai enda dikemendar tegal enda bepengerai.

Nitihka penerang Kepala Polis Daerah Miri, Asisten Komisioner Mun Kock Keong, program tu diatur beserimbai enggau Hari Polis Ke-205. Iya meri basa sereta puji ngagai bala polis bantuan ari bala Petronas, Shell sereta raban sukarelawan polis enggau pekereja-pekereja ari Hospital Miri tegal udah meri sukung enggau kerejasama ngemujurka program nya.

Seiku orang ke sama nyereta pengawa meri darah tu, iya nya Andrew Balan, 49, lebuh dirandau iya madahka, program ke bansa tu manah amat dikena meri chunto ngagai mensia mayuh awakka sama besaup meri darah ngagai otang bukai.

“Kelimpah ulih mantu orang bukai, aku mega ulih nyaga pengerai diri. Tubuh berasai lempung enti udah meri darah laban darah lama udah diganti enggau darah ke baru.

Kitai enda nemu, pagila lusa, nyangka orang ti begunaka darah nya kaban belayan kitai empu. Naka ke diatu, aku sigi nadai kala bisi penanggul lebuh ti meri darah," ku iya diatu udah 33 kali meri darah agai orang bukai. Kelimpah ari iya, seiku agi orang ke sama bisi meri darah maya nya, Dayang Hilfee,27 madahka, terubah iya sigi amat berasai takut tang meh diumba enggau pengeran ati pengujung iya ulih ga berasai atakut agi.

“Tu meh kerubah iya aku meri darah, udah meri darah sigi bisi berasai lain mimit tang enti udah makai enggau ngirup iya deka baka selama.
Pengawa manah ke bansa tu endang deka diteruska aku baru ba maya ti deka datai awakka ulih mantu ngidupka seput orang bukai," ku iya.

MANAH ATI... Sekeda orang ke bisi datai ngemujurka program Kimpin Meri Darah ke diatur Indu Opis Polis Daerah Miri.

Pengawa puang : 2,500 peluang kereja disedia

SIBU : Opis Tenaga Kereja Sibu deka ngatur Program Nyedia Peluang Kereja bagi menua Sibu 2012 bepalan ba Dataran Sibu ll kena 14 haribulan April berengkah pukul 8.00 pagi ngagai 5.00 lemai.

Bisi 39 buah kompeni datai ngambi bagi dalam program tu lalu sida deka milih chalon tauka pekereja ti ulih napi pengawa puang ti bisi disedia nitihka pengulih. Maya tu mega lima bengkah agensi perintah deka datai milih pekereja.

Nitihkapenerang komiti pengatur pengawa, nyentuk ke diatu bisi 2,500 peluang kereja bisi disedia lalu mensia mayuh ditesau awakka nguji minta nitihka pengulih diri empu.

Beduduk ari tu mega, bala siswazah enggau bala nembiak ke udah abis belajar anang muai peluang, datai meh nguji minta pengawa ti bisi disedia.

Rambau program tu ila, bala pengatur pengawa bisi muka dua buah kaunter dikena mensia mayuh betanyaka penerang sereta ngiga pengaji ti dikerinduka sida. Dua bengkah kaunter tu iya nya Kaunter Penerang begualai enggau Kaunter Milih Kerrja lalu siti da iya nya Kaunter endur Interbiu.

Ngagai mensia mayuh ke benung begigaka pengawa ti deka nemu penerang ke silik pasal Undang-undang Buruh tauka penerang bukai pasal ngerijista diri minta pengawa tau peda ba ruai siber (online) ba JobsMalaysia, sida mega ulih betanya enggau silik pasal penerang rambau program tu ila.

Taun tu, Opis Tenaga Kereja Sibu bisi nyediaka sebengkah kaunter khas interbiu awakka ulih mantu orang ke deka datai interbiu. Mensia mayuh dilalau bepekayan manah sereta mai setipikit akademik enggau fotostart dokumen iya ke besangkut paut.
Penerang silik pasal program tu, kita tau betanya terus ngagai Muhd. Nurfitri enggau Salfarina ba Opis Tenaga Kereja Sibu ngena lumur 084-330700.

Pengawa raban Rela dikerinduka mensia mayuh

MIRI : Kaban Relawan Rayat Menua Malaysia (Rela) diatu dikerinduka mensia mayuh ketegal tanggungjawap sida ti beguna amat iya nya nyaga pengelantang enggau pengelikun orang bukai.

Kaban Kunsil Negeri (ADUN) Telang Usan, Dennis Ngau madahka, tanggungjawap sida jam ke diatu endang beguna amat lalu nadai agi baka suba nitihka singkang arus pemansang jeman moden.

"Diatu, tanggungjawap raban Rela ti nyaga pengelantang enggau pengelikun majak ditemu mensia mayuh. Taja pia, utai ke bguana amat diatu iya nya, kita kita raban (Rela) patut bebendar agi ngereja pengawa sereta terus ngembuan disipilin dikena ngangkatka kualitit organisasyen Rela jemah," ku iya.

Iya madah munyi nya lebuh bejadi Kompeni Rela Orang Ulu ti digulu lebih 1,000 iku staf kompeni di Miri. Dennis Ngau mega ngelalau raban Rela awakka seruran ngembuan kaul ke manah enggau raban pengelikun ke bukai baka bala polis enggau Bomba.

Ku iya, enti bisi kaul ke manah entara raban rela enggau raban pengelikun ke bukai endang lantang amat pengidup mensia mayuh di menua tu.
"Enda tinggal mega raban Rela mesti ngembuan kaul ke manah enggau mensia mayuh," ku iya.

Nyau ngenang, Kaban Kompeni Rela Orang Ulu ti baru ngerijista diri, nya endang beguna amat ngambika Orang Ulu majak dikelala raban bansa bukai di negeri tu. "Lebuh kita ti bejalaika pengawa, aku ngarapka kita seruran bejimat anang sampai besemunka nyawa lebuh ti napi pengawa ke mar," ku iya.

Iya mega mansutka penemu ngasuh kompeni tu nganjung surat ngagai Residen Miri minta ngena perengka perintah dikena raban Rela bejalaika pengawa ba maya ti deka datai. Sama bisi datai maya tu, Sapit Residen Emang Uyo Emang, Lt kol. Jeffery Pasang Pengulu Saging, mejor Agong Bangau, Lt Muda Albert Ding, enggau Kepala Platun Lt Muda Larry Anyi Wan.

KE PENGINGAT... Dennis Ngau begambar ngambika pengingat begulai enggau sekeda raban Kompeni Rela Orang Ulu pengudah iya tembu bejadi raban Rela kompeni nya di Miri.

Urang Pantu nerima perengka elektrik

PANTU : Pengawa negika tiang elektrik meri pengaga ngagai semua rayat ke diau ba Pantu kelebih agi sida di Rumah Hearold Ernest, Selantik Ili.

Pengudah tiang elektrik ke berengkah didegika ba Selantik Ili kenyau empat hari ke udah, rakyat di Selantik Ili diatu chukup gaga ati sereta muji pengawa ke udah digaga perintah Barisan Nasional (BN).

Tuai Rumah Hearlod Ernest lebuh ke dirandau, madahka nembiak iya endang tetap meri kerejasama ngagai bala kontraktor ti benung nembuka pengawa sida ngaduka elektrik ba sebelah rumah panjai.

“Aku ngarika rayat Selantik Ili, Pantu meri puji tanda gaga ati ngagai perintah BN laban udah bebendar ngemansangka pengidup rayat ba menua pesisir," ku iya.

Taja pan, bekal elektrik tu laun tembu, nyangka tembu bulan March taun siti nyin ila kini, tang meh kami di Selantik tetap nganti enggau nadai pengirau. Enti udah bisi karan dudi hari, aku ngelalau mensia mayuh kelebih agi kami di Selantik Ili, Pantu awakka sama ulih bekelimatka belanja.

“Sekeda rayat di Selantik Ili, Pantu naka ke diatu agi ngena injin api diri empu, sereta bisi mega mengkang ngena lampu kelita. Kami endang tetap nganti projek tu tembu enggau chukup pegaga," ku iya.

Selantik Ili sebengkah ari rumah panjai ti dipegai Kaban Parlimen Sri Aman Masir Kujat enggau Kaban Kunsil Negeri (ADUN) Balai Ringin Snowdan Lawan.

RINDU MEDA...Seiku orang benung ngemataka pengawa ngaduka tiang elektrik di Selantik Ili, Pantu.

Saman penyalah patut dibayar enggau lengkas

BINTULU : Opis Pemansang Bintulu (BDA) minta barang sapa pengguna jalai raya ke ngembuan penyalah salah endur engkah kerita anang laun mayar saman sida nanggika kena tinggang undang-undang ke lebih berat.

Undang-undang deka dipansut nyema orang ke besalah enda mayar ukum tauka penyalah salah endur engkah kerita pengudah 14 hari. Enti kita deka ngechek status kerita, kita tau datai ngelawa bilik 004-Opis Seksyen Lumba, Rekreasyen enggau Parkir Opis Servis Bandar ke bepalan ba Jalai Sultan Iskandar maya opis tebuka tauka betelefon nuju lumur 086-332662.

BDA ngelalau barang sapa orang ke bisi nerima surat kanggau ngasuh mayar, kita mesti datai enggau lengkas ngelawa kaunter endur bebayar maya opis tebuka berengkah 8.00 pagi nyentuk ngagai 3.30 lemai iya nya Hari Satu ngagau Hari Empat lalu Hari Lima berengkah pukul 8.00 pagi ngagai 3.15 lemai.

BDA mega ngelalau mensia mayuh ti kala nerima kompaun ketegal salah endur engkah kerita datai mayar saman sida enggau lengkas ngambika bisi diskaun 20 peratus. Diskaun tu semina ungkup orang ke ngaga penyalah ungkup taun tu lalu sida dipinta mayar dalam timpuh tiga hari bekereja belabuh ba haribulan iya ditemu salah.

Ba taun 2011, bisi 20 iti kes salah endur engkah kerita lalu taun tu, BDA benung ngaga pansik deka nemu penyampau kes ti patut dibai ngagai kot.

MDL berengkah miki pasar besai

LAWAS : Ketegal nerima ripot ari orang dagang di Pasar Besai Lawas pasal infrastruktur rumah ke bangat rusak, Majlis Daerah Lawas (MDL) berengkah miki rumah nya kena bulan Mei tu ila.

Nitihka Seketeri MDL, Zulkifli Haji Sahari madahka, tender miki rengka rama Pasar Besai Lawas udah dibuka lalu disebut BP1 di Kuching.

Nya alai, pengawa miki pengerusak tu deka bepun bulan Mei pengudah kontraktor dipadu MDL. Kereja ke patut dimiki nyengkaum sistem paip, nukar besi tutup parit enggau pengerusak ke bukai ba pasar nya.

Industri kraf ulih nambahka jereki

KAPIT : Industri pengelandik jari tauka kraf enti dikereja beamat-amat ulih mai penguntung nambahka jereki ti belimpah ngagai urang ti landik ngereja iya.

Residen Kapit, Dahim Nadot madahka, industri kraf tu endang bisi jalai ulih ngerembai nitihka pengelandik sereta pemanah asil kraf tradisional ke digaga sida baka pua kumbu, ukir kayu, marik, tikai rotan enggau timpa.

Utai ke beguna bendar diatu iya nya, semina ngiga chara baka ni deka ngelakuka asil tenun enggau ukir ngambika diterima ba makit ti besai-besai, ku iya bejaku rambau pengerami nutup eksibisyen perengka kraf tradisional Iban bepalan ba Yayasan Tun Jugah (Kubu Sylvia) di Kapit.

Menteri Muda Pengawa Berumah enggau Dagang Temuai, Datuk Gramong Juna bejadi pengerami nutup bengkel lalu nyuaka perais ngagai urang ke menang dalam pekit nenun pua kumbu, nusuk marik enggau ngaga kuih aising.

“Kitai di Kapit ngembuan mayuh urang ke landik ngaga ukir tradisional, nenun pua kumbu, nusuk manik, ngayam timpa enggau anak raga, enggau ngaga bot lumba. Produk ti digaga sida tu mega dikerinduka bala temuai menua luar, dibeli sida nyadi tepa," ku iya.

Dahim madah, selambar pua kumbu ‘ubong gar’ enggau ‘ubong biasa’ kira 4 x 8 kaki pemesai berega semak RM1,000, lalu pua kumbu ari Nanga Kain, Batang Baleh suah amat ditempah urang ari Kuching enggau ari menua bukai.

Pengerami tu diatur Sarakup Indu Dayak Sarawak (SIDS) lalu disaup gerempung bukai baka Gerempung Indu Kaban Chiang Chuan, Gerempung Indu Kampung Baru, Gerempung Raban Bansa Orang Ulu (OUNA) enggau Gerempung Dayak Bidayuh (DBNA).

Dalam pekit pua kumbu 'ubong gar', urang ke mujur nyadi champion iya nya Naja Ambang ditangkan urang bulih lumur dua iya nya Engang Tukau enggau Nora Enggong bulih lumur tiga. Reni Reba champion ba ketegori ubong biasa ditangkanka Egong Mudang bulih lumur dua enggau Milis Balan lumur tiga.

Ba kategori nusuk marik, Emah Bang bulih gelar nyadi champion ditangkanka Patricia Bang bulih lumur dua lalu lumur tiga diempu Juman Anjan. Udah nya ba pekit pemanah marik lumur satu iya nya Rani Empin, lumur dua Engang Tukau enggau lumur tiga Patricia Bang.

Ma Tian Kock bulih lumur satu dalam pekit ngaga kek aising ditangkanka Nurul Askin bulih lumur dua, lalu lumur tiga iya nya Bawang Majah.
Tim perubat champion dalam pekit marut nyiur, OUNA bulih lumur dua lalu SIDS bulih lumur tiga. Semua urang ke menang nerima perais duit enggau hamper.

Sama bisi datai maya nya, Temenggong Datuk Kenneth Kanyan, bala Seketeri Politik Kepala Menteri, Daniel Jubang enggau Maurice Giri, Sapit Walikota Majlis Daerah Kapit, Jefferson Jamit Unyat enggau Chairman komiti pengatur pengawa, Minor Panyau.

ASIL KRAF… Dahim Nadot benung bejaku rambau eksibisyen, bejual enggau pekit pua kumbu di Kapit.

Negapka pelajar pengerai di negeri Sarawak

SIBU : Kolej ITA Sibu bekerejasama enggau Opis Hal Ehwal enggau Pemansang Pelajar kolej nya deka nunjukka chunto peransang ngagai bala pelajar awakka nyeretai program nulung mensia mayuh.

Kepala Pemesai Eksekutif Kolej ITA, Dato’ Sri Dr. Benny Lee madahka, objektif kolej tu iya nya deka nelebaka sida misi ngereja pengawa nengah kursus sereta program ti udah diatur.

Opis Hal Ehwal enggau Pemansang Pelajar Kolej ITA, arap bendar program ke bansa tu ulih nelebaka bala misi landik ngereja pengawa sereta rindu begulai enggau mensia mayuh kelebih agi ba senentang chara nyaga pengerai ke pemadu manah.

Maya bulan Februari enggau March ke udah, pelajar Kolej ITA Sibu bisi nyereta mayuh bengkah program berubat baka dalam karnival lumba SMK Chung Hua, SMK Bandar Sibu, Rumah Sri Kenangan, pekit lumba entara sekula di Sibu enggau Rumah Giman di Sarikei.

Maya program tu, bala pelajar bepeluang ngena penemu ke udah dipelajarka sida ari Kolej ITA dikena nulung mensia mayuh, ku iya naka ke diatu Kolej ITA bisi nyediaka kursus Diploma Psioterapi enggau Diploma Misi.

Nengah program tu, bala pelajar bepeluang nelebaka diri gawa baka ke udah lama iya nulung madahka chara nyaga pengerai ngagai mensia mayuh.

Raban sida tu tebal agi disebut orang raban penulung enggau penyelamat laban sida suah nulung orang ke seranta. Bala pelajar Kolej ITA deka terus meri tulung enggau sukung nyema sida bisi dikanggau.

Kolej ITA deka terus nempa staf pengawa berubat profesional lalu ngajar sida enggau naka pemanah. Kelimpah ari nya, Kolej ITA deka terus meri servis pasal pengerai ngagai mensia mayuh.

Kolej ITA bisi nyediaka endur bemalam ke pechuma, uniform enggau bup teks, perengka pengangkut, lon PTPTN, pengelicha akademi ke udah teleba mangku pengawa enggau latih pratikal ba hospital perintah enggau swasta ngagai pelajar. Semua kus ti disedia endang dikemendarka MOHE, MQA, LJM enggau KKM.

INDU MISI… Bala misi ari Kolej ITA Sibu ke bisi nyereta program nulung mensia mayuh ti diatur ba Sibu enggau Sarikei, empai lama.

Rayat menua pesisir dipinta terus nyukung BN

NGAMBAT YB...Rayat Rumah Brown benung betabi enggau Nyalau tanda bebasaka penatai iya ngagai Rumah Brown, Nanga Stapang, Engkari, Lubok Antu.

LUBOK ANTU : Rayat ke diau ba entigis sungai, menua pesisir dipinta terus meri sukung ngagai perintah Barisan Nasional (BN) maya pengawa bepilih besai Ke-13 (PRU13) tu ila.

Kaban Parlimen Lubok Antu, William Nyalau anak Badak madah munyi nya lebuh bejadi pengerami Tuai Begulai enggau Rayat di Rumah Brown, Nanga Stapang, Engkari, Lubok Antu, empai lama.

Sukung ari bala rayat menua pesisir ngagai BN beguna amat laban nya tau negapka pengering BN sereta ngemujurka perintah ngangkatka pengidup rayat ari sukut pemansang.

“Aku nemu mayuh bala kita ba Stapang nyukung penyakal maya pengawa bepilih besai taun 2008 suba. Nya alai, udah tu kita ke diau ba Lubok Antu mesti berunding panjai sebedau ngundi penyakal maya PRU13 ila laban semina BN aja ke ulih ngubah pengidup kita," ku iya.

Nyalau madah, rayat patut meri puji ngagai BN laban perintah mayuh amat udah meri bantu ngemansangka rayat ngelama tu. Maya nya, iya ngajar rayat, ngambi seruran ingatka pemanah perintah BN ti enda kala nejuka pengidup rayat menua pesisir.

Pengerami tu diatur JASA Parlimen Lubok Antu, lalu rambau pengerami tu Nyalau bisi madahka diri deka nulung sida di rumah panjai Nanga Satapang ngemesaika ruai rumah, meri RM5,000 ungkup JKKK enggau RM3,000 ungkup gerempung indu ba rumah panjai nya.

Sama bisi datai maya nya, Kepala Polis Daerah Lubok Antu, DSP James Johnanthan, Pemesai Pemadah Parlimen JASA P.203 Lubok Antu, Geoffery Baja Ricky Maba, bala staf opis perintah enggau bala Tuai Rumah ti semak menua nya.

TEGAS nulung nempa modal mensia

KUCHING : Tuju Tabung Ekonomi Gagasan Anak Sarawak (TEGAS) ditumbuh awakka dikena ngemansangka sosioekonomi raban bansa bumiputera nengah pelajar teknikal enggau vokasional ngambika mayuh agi modal mensia nyaup ngemansangka negeri Sarawak.

Sapit Kepala Raban Nembiak PBB Sarawak, Pandi Suhaili madah, pemanah pengawa ke bansa tu digaga ngambika ulih nyukung pemansang ba Koridor Sarawak Energy (SCORE).

Ku iya, ngena agih belanja ke chukup mayuh diberi perintah ngagai TEGAS, ngarapka mayuh agi raban nembiak ari menua pesisir bisi ngaga peminta nyambung belajar ngagai palan pelajar tinggi ngena duit bantu ari TEGAS.

“Pemanah TEGAS ditumbuh ngambika ulih nyukung pemansang pelajar teknikal enggau vokasional di negeri tu," ku iya madah ngagai Utusan Sarawak.

Ku iya, TEGAS sebengkah ari chara dikena perintah negeri nempa pelajar ke landik ba pengawa teknikal enggau vokasional. Tambah mega dua bengkah bidang tu diatu, endang dikerinduka bala raban nembiak bumiputera ke diau ba bandar enggau menua pesisir.

“Dua bengkah bidang tu ulih mai penguntung ngagai menau. Bala nembiak suah ngumbai dua bengkah bidang tu pedis amat deka dikena minta pengawa. Tang kebendar iya sida agi enda nemu peluang ke bisi laban nadai orang nerangka ngagai sida," ku iya.

Nya alai, diatu bala tuai patut ngelawa bejaku meri penerang pasal TEGAS ngagai bala nembiak. Penumbuh TEGAS mandangka perintah endang bebendar deka ngangkatka tauka ngubah pengidup rayat kelebih agi sida ke diau ba menua pesisir.

“Aku pechaya TEGAS ulih mujur enti sema bisi sukung ari mensia mayuh. Kebuah pia laban tu meh chara ke pemadu manah dikena nempa modal insan ke menyana, ngembuan pengelandik sereta bepenemu dalam bidang teknikal enggau vokasional jemah,” ku iya.

Mantu komiti dikena nyukung aktiviti orang tuai

BINTULU : Kaban Komiti Palan Servis Orang Tuai Bintulu ti betuaika Seketeri iya Abdul Mutalip Othman udah nemuai ngagai Opis Residen Bintulu, empai lama ke udah.

Penatai sida disambut Residen Bintulu, Muhamad Yakub Kari enggau bala staf opis nya. Maya penemuai nya, Muhammad madahka diri deka mantu sereta meri kerejasama enti nyema iya dikanggau. Kelimpah ari nya mega iya deka nulung sereta meri sukung ngagai komiti pengatur pengawa aktiviti orang tuai di Bintulu sepemanjai taun 2012 tu.

Iya mega ngelalau bala kaban gerempung awakka seruran bekempit enggau pangan diri lebuh ti ngemujurka program tauka aktiviti ti mai penguntung ngagai kaban gerempung nya. Ku iya, penyerakup sereta kaul ke manah entara raban komiti ulih narit ati mayuh agi raban orang tuai di Bintulu masuk gerempung tu.

PENEMUAI BASA…Muhammad Yakub begambar ngambika pengingat begulai enggau bala kaban komiti Palan Servis Orang Tuai Bintulu lebuh ke nemuai ngagai Opis Residen Bintulu.

Nembiak Dayak tau nyereta tim betanda

SRI AMAN : Raban nembiak bansa Dayak ari sereta negeri tu dikerah awakka ngerijista diri nyadi kaban Dayak Street Group Dancer And Group nyema sida bisi pengerindu ba pengawa betanda. gerempung tu baru ditumbuh kenyau ari tiga bulan ke udah.

Dayak Street Group Dancer And Group bepegai ba baruh kompeni Dayak Pictures And Tech Sendirian Berhad lalu nembiak bansa Dayak ke deka nyereta gerempung tu mesti beumur entara 18 ngagai 30 taun.

Pengari gerempung tu, Joez Evenster madah ngagai Utusan Sarawak, tuju numbuhka Dayak Street Group Dancer And Group laban deka ngangkatka main asal betanda tradisonal ngagai tanda moden ke dikembuan raban bansa Dayak.

Ku iya, langgur penemu numbuhka gerempung tu beduduk ari sukung bala ke diau ba Semenanjung Malaysia ti rinduka konsep tanda enggau muzik tradisional ke dikembuan raban Dayak.

“Pekara tu meh meransang kami ngerembaika tanda tradisional raban bansa Dayak ngambika ulih tebilang jelai berita datai ke tikas dunya jemah ila.

“Tanda tradisional baka Ngajat, endang bisi jalai narit ati barang sapa orang ke meda taja pan elemen ngajat tu nadai diubah," ku iya.

Bayar masuk nyadi kaban semina RM30 seiku. Joez madahka, Street Group Dancer And Group deka ngatur mayuh bengkah aktiviti enti sema penyampau orang ke masuk nyadi kaban gerempung tu udah chukup.

“Nembiak Dayak ke bisi pengerindu ba pengawa betanda, kita tau ngerijista diri laban promosyen udah berengkah dibuka belabuh ari 6 ngagai 7 April semak Open Air Market Sri Aman beserimbai enggau Pesta Benak Sri Aman.

“Kita mega tau betanya terus nuju lumur telefon kami iya nya 082-577334 tauka datai ngelawa opis kompeni ke bepalan ba AB 203, Ringkat Satu, Block 217, Batu Kawah New Township, Jalai Batu Kawa, 93250 Kuching,” ku iya.

Kompeni Dayak Pictures And Tech mega bisi ngaga promosyen ba kaunter Projek Dayak Pop Stars ti nyediaka perais ungkup champion RM3,500, lumur dua RM2,500 enggau lumur tiga RM1,500.

ARAM BETANDA...Evenster, Tom enggau Jeff benung begambar ba tisi poster promosyen masuk nyadi kaban Dayak Street Group Dancer And Group beserimbai enggau Pesta Benak Sri Aman 2012.

Rumah panjai Melanau Sok patut dimiki

MATU : Rumah panjai Melanau tunggal di negeri Sarawak beumur lebih 100 taun di Kampung Sok diatu dipeda nyau majak repuk lalu deka diperundingka kaban Kunsil Negeri Jemoreng Abu Seman Jahwie.

Iya ti mega seketeri politik ngagai Kepala Menteri datai ngabas rumah panjai nya laban deka meda gaya iya kena Hari Dua (03 April). Penemuai iya kia diuluka Tuai Raban Bansa Kampung Sok, Waili Rajaie.

Nitihka penerang, rumah panjai tu udah diangkat nyadi produk dagang temuai kenyau ari suba, lalu bisi ngembuan bup temuai. Abu Seman madahka, papan ke dikena ninding rumah nya nyau repuk bendar laban ti udah kelalau lama.

“Rumah panjai tu patut dimiki enggau lengkas," ku iya ti enda tentu mayuh jaku. Rumah panjai diuan kurang ari lima pintu ruang bilik. Kelimpah ari nya, iya madahka, agih penyampau RM150,000 disediaka perintah dikena miki rumah panjai nya.

Taja pia, ketegal sida ke deka miki rumah nya enggau chara begutung-ruyung ngujungka pengawa miki rumah nya nyau puntan. Abu Seman madah, pekara nya nyadi sebedau iya ke megai pengawa nyadi pengari rakyat Jemoreng.

NYAU REPUK... Dinding papan ba rumah panjai Melanau Kampung Sok nyau majak repuk.

10 kes lenyau lumpit rambau Pesta Benak

SRI AMAN : Bisi 10 iti kes lenyau lumpit diripot nyadi ba Bandar Sri Aman rambau pengerami Pesta Benak Sri Aman 6 April ke udah.

Kepala Polis Daerah Sri Aman, Deputi Superitendence Police (DSP) Mat Jusoh Muhammad lebuh ke dirandau madahka, nyerumba pengerami tu mega sebuah kerita (4WD) bisi diripotka lenyau kena 7 haribulan April.

“Diatu bala polis agi benung ngaga pansik kes lenyau lumpit enggau kerita nya. Naka ke diatu, polis benung mansik sekalika lumpit nya teberayan tauka sigi lenyau ketegal dikebuk orang bukai," ku iya madah ngagai pengarang berita.

Kelimpah ari nya, Jusoh nangkan mensia mayuh ke datai ngulu Pesta Benak Sri Aman jemah mesti bejimat-jimat awakka penusah ke sama bansa tu nadai nyadi agi.

Iya mega ngelalau mensia mayuh ti bisi mai kerita mesti masang sistem pengelikun ba kerita ti ditinggalka sida lebuh ke meda pengerami.“Anang sesekali ninggalka barang ti berega dalam kerita kita. Utai ke bansa tu tau bendar ngasuh ati bala orang jai ngerusak sereta ngambi barang dalam kerita kita," ku iya.

Pekit BOTB beserimbai enggau Pesta Kaul 28 April

MUKAH : Rashdan Entertainment Groups (REG) deka ngatur Battle of The Bands beserimbai enggau Kaul Mukah 2012 kena 28 haribulan April bepalan ba Dataran Pehin Setia Raja.

Menija REG Zabidin Haji Zamhari madahka, urung pukul 9.30 pagi nyentuk ngagai 12.00 tengah hari deka diatur ngujika munyi band lalu ditangkanka enggau pekit bepun ari pukul 1.30 ngagai 6.00 lemai, udah nya ditampunbg baru ari pukul 7.30 ngagai 12.00 tengah malam.

Penyampau bayar yuran dikena ngerijista diri masuk pekit tu RM100 ungkup siti tim.
“Perais duit, setipikit enggau trofi nganti pemenang lumur satu ngagai lumur tiga.

Tiga bengkah raban ke menang tu ila bepeluang nguji ngerikot muzik sida pengelama dua jam ba Studio REG, Bintulu,” ku iya madah nengah email ngagai Utusan Sarawak.

Iya madahka, otang ke ngempu majalah pemerindang Malaysia ROTTW deka dikanggau datai nyadi akim nyerumba pengerami Kaul Music Fest --- Battle of the bands tu.

Ku iya, pom dikena ngerijista sereta penerang pasal pekit tu ulih diambi ari Man Yaq (Mukah) ba lumur 013-821 2508 & Amy (Bintulu; 019-854 7310) tauka peda ba facebook R.E.G. studio.

Safari Rakit Baleh-Kapit mujur datai ba adan

KAPIT : Sempulang Gana F1 (Opis Betanam Betupi), Kelab Rekreasyen Opis Pelajar Kapit, Usun United 5, PBB Indu Ulih enggau OUNA pampang Kapit A udah mujur nyadi champion dalam pekit ke bisi diatur rambau Safari Rakit Baleh-Kapit ke mujur datai ba adan, apin lama ke udah.

Sempulang Gana F1 mujur nyadi champion dalam kategori Rakit Buluh Lelaki tetutup ti ngerikot timpuh semina 3 jam 32 minit 14 saat, ditangkan KADICO (Majlis Daerah Kapit) bulih lumur dua 3 jam 47 minit 59 saat lalu lumur tiga iya nya Raja Renali (3 jam 52 minit 36 saat).

Tim ke bulih perais rindu ati ke bulih lumur empat ngagai 10 iya nya tim Tembawai Meligai Opis Betanam Betupi Serian, Sokanjaya A, Sound Timber Contractor, SMK Kapit, Seraban enggau SK Nanga Balang Usun United 5 ke mujur dalam kategori Lelaki Bebas ngerikot timpuh 2 jam 49 minit 38 saat lalu sida diberi perais Trofi Datuk Billy Abit Joo. Lumur dua KPSU enggau pengelama timpuh sida ke ngena rakit 3 jam 43 minit 4 saat lalu lumur tiga JKKK Rh. Bangkong (Lachau Bejembi) 4 jam 18 minit 22 saat.

Empat bengkah tim ke nerima perais rindu ati ungkup kategori tu iya nya Opis Pengerai Kapit, KPDNKK, Medical enggau Bujang Tuai Nguji Ngapa (JKKK Rh Nuang). PBB Indu Ulih mujur nyadi champion kategori Rakit Buluh Indu tebuka enggau timpuh 3 jam 54 minit 47 saat, ditangkan Indu Kapung Puan Sri Tiong bulih lumur dua enggau Dara Grovi Tuai bulih lumur tiga. Indu Sebala Ulih enggau RELA Kapit semina bulih perais rindu ati.

Sida ke bulih champion ba tiga bengkah kategori tu nerima perais duit RM2,000 besereta trofi, lumur dua RM1,500 besereta trofi, enggau lumur tiga RM1,000 besereta trofi. Tim ke bulih lumur empat nerima perais duit RM800, lumur lima RM700 enggau lumur enam RM600, udah nya lumur tujung ngagai sepuluh nerima perais duit RM300.

Kelab Rekreasyen Opis Pelajar Kapit champion kategeori Lelaki Tebuka ke mujur ngerikot timpuh 6 jam 33 minit 57 saat. Achara tu berengkah belabuh ari Rumah Pengulu Salang, Pulai Sibau. Lumur dua ba kategori tu iya nya Lelaki PBB enggau lumur tiga Team 510.

Tim ke bulih lumur empat ngagai lumur sepuluh iya nya PRS Baleh, Ukin Engineering, Pemadah Komuniti 1Malaysia, Rando Daerah Kapit, Opis Raban Nembiak enggau Lumba, PIBG SK Mujong enggau CMS ROAR 1.

Beduduk ari pemujur tu Kelab Rekreasyen Opis Pelajar Kapit nerima perais duit RM3,000 besereta Trofi Tan Sri Dr. James Jemut Masing. Lelaki PBB mujur bulih perais duit RM2,500 besereta trofi enggauTeam 510 semina nerima perais duit RM1,500 besereta trofi.

Kelimpah ari nya, OUNA Kapit A nyadi champion kategori Perau entara pekit ti keterubah iya diatur lalu mujur dipasuk lima bengkah tim. Lumur dua dipenggi Bumi Putra Balleh Kenyalang Terebai enggau lumur tiga OUNA Kapit B. JKKK Rumah Pengulu Salang enggau JKKK Rumah Nuang ke semina bulih perais rindu ati.

Residen Kapit ti mega Chairman Komiti Safari Rakit Baleh-Kapit, Dahim Nadot nyuaka perais ngagai bala sida ke menang. Sama bisi datai maya nya bala Seketeri Politik Kepala Menteri, Daniel Jubang enggau Tengku Geruna, Sapit Residen, Mohd. Ikhmal Abdullah, Walikota Kapit, Philimon Nuing CEO CMS, Datuk Richard Curtis, Datuk Temenggong Kenneth Kanyan enggau Pemancha Tan Kian Hoo.

Taun tu, Safari Rakit Baleh-Kapit dipasuk 39 buah tim. Taja pia, semina siti tim ke enda nyadi masuk. Lima bengkah kategori ti dientaruhka iya nya Rakit Lelaki Buluh Tebuka, Perau, Rakit Lelaki Buluh Tetutup, Rakit Orang InduTebuka enggau achara ngati ke diri orang lelaki.

CHAMPION… Dahim Nadot begulai enggau raban Kelab Rekreasyen Opis Pelajar Kapit ke udah mujur nyadi champion pekit kategori Lelaki Tebuka Safari Rakit Baleh-Kapit 2012.

Seiku nembiak bepemedis nerima bantu

MARUDI : Menteri Muda Rengka Rama (Bekal Ai) enggau Menteri Muda Pengawa Betanam Betupi (Gerempung Peladang )
Datuk Sylvester Entri anak Muran nyuaka pemeri duit tulung iya ngagai seiku nembiak iya nya Mohd. Khairy Hazry Kamil ke ngembuan pemedis tungkul belakang belubang kenyau ari ada.

Bulan siti ke udah, Mohd. Khairy Hazry ke beumur lima taun setengah ti benung sekula pra ba Sekula Dato Sharif Hamid dianjung bebuntas ba Institut Jantung Negara Kuala Lumpur lalu diatu udah pulai ngagai rumah sida iya empu di Kampung Narum.

Nitihka penerang ari apai iya Kamil Bin Tahir 45 tahun, anak iya nya diasuh berubat lima taun sekali dikena nukar injab buntas.

Bantu duit tulung nya disuaka Datuk Sylvester Entri anak Muran ba rumah Khairy empu di Kampung Narum dikena ngelempungka belanja sida berubat ngelawa pakar tungkul belakang ba hospital Kota Samarahan di Kuching.

NGABAS... Datuk Sylvester Entri anak Muran ngabas Khairy Hazry di Kampung Narum pengudah ke dibuntas ba IJN Kuala Lumpur ketegal pemedis tungkul belakang belubang.

Perais besai pekit karaoke PBB Bekenu

BATU NIAH : Gerempung Indu Parti Pesaka Bumiputera Bersatu (PBB) pampang N.61 Bekenu bisi nyediaka perais ti besai ungkup bala pemenang pekit karaoke tebuka enggau Ratu Kebaya ke diatur ba Dewan Masyarakat Sepupok Niah kena 13 enggau 14 haribulan April tu.

Kaban komiti pengatur pengawa enggau Gerempung Indu PBB N.61 Bekenu Magdelin Simunjan madahka, tuju program tu diatur deka nempa kaul sereta neritka penyerakut entara mensia mayuh ke diau ba Parlimen Sibuti.

Ku iya, pekit tu tebuka ngagai sida ke bisi ati lalu pom dikena nyereta RM20 tau diambi ari Muhibbah Mini Restaurant (Batu Niah), Kedai Makai Bismi (Simpang Sepupok) enggau Ajibah (019-8912494). Penerang ke silik mensia mayuh tau betanya ngagai Magdelin Simunjan ngena lumur 019-4899342, Zehan (019-8904245) enggau Iyat Rotor (013-5686903).

Pekit karaoke tu dibagi ngagai dua bengkah kategori iya nya Lagu Iban enggau Lagu Melayu. Perais ungkup dua bengkah kategori tu iya nya champion diberi duit RM300 engau trofi, lumur dua enggau tiga diberi duit RM200 enggau RM100 besereta trofi. Lumur empat ngagai sepuluh deka diberi perais rindu ati penyampau RM30 enggau medal.

Kelimpah ari nya, perais ungkup Pekit Ratu Kebaya champion deka nerima duit RM300 enggau trofi, lumur dua enggau tiga diberi RM200 enggau RM100 besereta trofi. Penerang ke silik enggau pom dikena nyereta pekit Ratu Kebaya tau diambi ari Mariaty Ahmad di Muhibbah Mini Restaurant (Batu Niah) tauka ngena lumur telefon binching iya 019-8980113.

Pengawa bejadi Pekit Karaoke enggau Ratu Kebaya tu ila deka dipenyadi Kaban Parlimen Sibuti Ahmad Lai Bujang lalu temuai dipebasa ke sama bisi datai maya tu ila iya nya Menteri Muda Pelajar Tumu Nembiak enggau Pemansang Ruang Bilik Rosey Yunus.

Lydia Desmond bulih gelar Miss Tourism Benak 2012

TUCHUM TANDA GAGA... Lydia Desmond Bangga mujur digelar Ratu Dagang Temuai Benak 2012 lalu iya nerima perais ari Simba Nalang, Datuk Rohani Karim, Hajah Simoi Haji Peri enggau Felicia Tan ba Panggau Main Asal, Sri Aman.

SRI AMAN : Endang chukup bajik anak dara ibuk iya nya Lydia Desmond Bangga pengudah ke bulih gelar Miss Tourism Benak 2012.

Lydia, 23, endang peranak asal ari menua Sri Aman, bebansa Iban mujur ngalahka empat iku finalis ke bukai lain. Bala akim tekuing meda pemajik mua sereta pengelandik Lydia ke bejaku nyaut tanya ngagai iya rambau final pekit nya.

Pengudah ke menang anak pengkuan ari tiga iku diri menyadi ke benung nyambung belajar ba UITM tu nerima perais duit RM1,500, tikit bilun pulai enggau mansang ari Kuching-Kuala Lumpur, mahkota, setipikit, trofi, bungai enggau selampai.

Orang ke bulih lumur dua iya nya Liyana Eddie Eskal Eyaw, 21, penakan China enggau Melayu datai ari menua Kuching lalu lumur tiga Jacqualyn Jubin, 22, penatai asal ari menua Sibu.

Beduduk ari nya, Liyana enggau Jacqualyn nerima perais RM1,250 enggau 1,000 udah nya diberi baucher palan endur bemalam dua hari semalam ba Damai Beach Resort, setipikit, tfofi enggau bungai. Kategori Ratu Landik 2012 (Miss Talented 2012) dipenggi Shazmin Naziela Mohd Zuhairi penatai asal ari Sarikei, udah nya, Tracy Hilary Kinyang ari menua Sri Aman empu bulih gelar Ratu Gambar Bajik 2012 (Miss Photogenic 2012).

Beduduk ari ke bulih gelar nya Shazmin enggau Tracy nerima perais duit RM500, baucher endur bemalam dua hari semalam ba Hotel Magherita Kuching, setipikit, trofi enggau bungai. Empat iku pesereta bukai ke udah mujur datai ba tikas semak final nerima perais rindu ati iya nya Zierra Enjoo, Ragnall Johnothan, Priscilla Yii enggau Alice Yii, sida empat mega diberi duit RM200, tikit raun ngagai Kampung main Asal Sarawak, setipikit enggau trofi.

Dua iku agi pesereta ke semina datai ba tikas semak final lalu bulih lumur lima enggau enam. Dua iku indu dara tu diberi perais rindu ati iya nya duit RM200, bungai enggau setipikit. Bini Menteri Muda Pemansang Tanah, Simba Nalang ti disempulang Sapit Menteri Opis Menteri Dagang Dalam Negeri, Koperasi enggau Pengguna (KPDNKK) Datuk Rohani Karim, Kaban Kunsil Negeri (ADUN) Lingga, Hajah Simoi Haji Peri enggau Sapit Residen Sri Aman, Felicia Tan udah bejadi pengawa nyuaka perais ngagai bala pemenang.

Sama bisi datai maya nya, Datuk Patinggi Tan Sri Jabu Numpang enggau bala temuai ke dipebasa ke bukai. Kelimpah ari pekit tu, mensia mayuh ti datai malam nya diperindang bala artis ari menua tu empu enggau champion benak Idol 2012, Malam Main Asal Pesta Benak Sri Aman 2012 ti sereta meda tanda main asal.

Pekit Ratu Dagang Temuai Benak 2012 dikemataka lebih 5,000 iku bala temuai lalu pengawa malam nya dirami enggau bunga api pengudah pemutus pekit disebut.

Projek tembu nitih maya ke patut

SARIKEI : Perintah seruran ngemujurka projek bantu ngagai rayat nitih maya ke patut, chunto iya 14 buah jematan udah mujur tembu digaga ba Parlimen Sarikei ke beungkus RM50 juta. Tu meh nandaka perintah enda kala nejuka pengidup rayat.

Kaban Parlimen Sarikei, Ding Koung Hiing madah, 10 buah da jematan udah dikemendarka perintah Parlimen Sarikei lalu jematan tu deka berengkah digaga taun tu.

“Enti nadai jematan, pedis amat rayat deka meraka sungai bejalaika pengawa sida iya ninting hari, tambah mega enti ngena jalai darat jauh amat, pia mega enti ngena jalai sungai agi ngena perau," ku iya.

Jematan Sungai Sarikei125 meter ke beungkus RM1.3 juta tembu 6 bulan tummu agi maya ke patut, projek tu berengkah digaga kena bulan April 2008 lalu haribulan iya ke dipelabaka tembu suba bulan September 2012.

"Penembu projek ke digaga dalam timpuh 48 bulan tu nandaka perintah endang beamat-amat udah betanggungjawap ngemujurka rengka rama ungkup rayat," ku iya.

Iya madah munyi nya lebuh ngabas jematan Sungai Sarikei di Jalai Meruton/Merudu kira 7 kilometer ari bandar Sarikei.

Ku iya, taja pan udah alah maya pengawa bepilih besai Kunsil Negeri (DUN) ngelaban penyakal, nya ukai reti kitai badu mantu rayat. Iya madah, tuju ngaga jematan tu, awakka rayat enda tinggal pemansang sereta ulih mantu sida ngulihka penatai pemisi ba endur nya.

"Perintah enggai meda seiku pan rayat tinggal ari pemansang, semua mesti ampit ngasaika pemansang," ku iya.

Kira 50 iku kaban Parti Bersatu Rayat Sarawak (SUPP) pampang Sarikei, kaban Gerempung Ke Ukai Dikuasa Perintah (NGO) sama bisi enggau raun ngabas jematan nya.

kelimpah ari nya mega, sama bisio datai iya nya ex ADUN Repok, Datuk David Teng Lung Chi, Enjinir Opis Kereja Raya (JKR) Sarikei Clement Sia enggau sekeda staf JKR ke bukai.

Jalai Sri Aman - Serian ke rusak patut diadu

SRI AMAN : Orang ke betanggungjawap ba senentang pengerusak jalai raya patut berundingka pengelikun mensia mayuh ti suah betengahka jalai Sri Aman–Serian ke dipeda bisi bendar rusak diatu ba entara menua Panggil enggau Kemintin Klauh, Sri Aman.

Pengudah ke diperatika ngelama tu, Utusan Sarawak meda jalai raya nya udah lama rusak kenyau beberapa taun ke udah. Gaya jalai ke besenggal kira penyauh 30 meter tu tau bendar ngeruga pengelikun bala pengguna jalai raya Sri Aman–Serian.

“Bisi endur ke balat rusak, merekah ba jalai ti nuju ke Kuching. ketegal jalai ke bansa tu meh kerita ke dikena kami suah amat berentak lebuh ke nengah jalai nya," ku seiku pengguna ke benama Joshua.

Bala pengguna tepasa belubah lebuh ke nengah jalai nya," ku iya.

Seiku agi pengguna jalai raya ke benama Min Sen madahka, nyangka ketegal tanah ba endur nya tanah kerapa nya alai tanah dia enda kering sereta nyamai tenggelam enti ditengah kereban pengangkut ke berat ninting hari.

“perintah tau berundingka baru chara ngaduka jalai nya, sida tau mega nimbuk tanah dikena ngeninggika jalai raya ba endur nya," ku iya.

Iya ngelalau bala pengguna awakka seruran bejimat lebuh ke nengah jalai raya ke rusak nya, laban enti enda teleba driba ba endur nya tau bendar ngujungka penusah bebadi, ku iya.

Nulung orang bukai nengah Kimpin Meri Darah

KAPIT : Beserimbai enggau pengerami Hari Polis Ke-205 ti disambut kena 25 haribulan March ninting taun, raban Polis DiRaja Malaysia (PDRM) Kapit bisi ngatur Program Meri Darah beraban-raban bepalan ba Hospital Kapit.

Kimpin meri darah tu disereta kaban Kelab Maksak Kapit ti betuaika Sapit Residen Kapit, Mohd. Ikhmal Abdullah enggau Pemesai Kunsil Sarawak, SAO Robert Liman.

Nitihka penerang Pemesai Penyaga Opis CID Kapit, ASP Chua Su Wang, kimpin meri darah tu sebengkah ari program ke diatur beserimbai enggau Hari Polis taun tu.

Kimpin meri darah beraban-raban tu, ku iya dikena nyaut kanggau Hospital Kapit ti minta mayuh agi bekal darah, awakka bisi dikena rambau tasah.

Iya madahka, program meri darah sebengkah ari pengawa ke chukup manah dikena nulung mensia mayuh ari bala PDRM lalu udah tu ngarapka mayuh agi bala polis datai enggau sampal meri darah.

Achara kepenudi rambau Hari Polis tu iya nya pengawa baris ari raban polis empu, maya nya mega bisi 26 bala polis enggau staf perintah niki pangkat lalu semilan agi kebukai bulih setipikit tanda puji ari KPD Kapit, DSP Entusa Imam.

Program bukai ke diatur nyerumba Hari Polis tu baka main badminton, lumba mit-mit, pengawa agama ungkup raban Kristian enggau Islam. Kaban PERKEP bisi ngabas ngagai wad nembiak mit Hospital Kapit lalu nyadung darah.

Udah nya, 21 iku staf Opis Kampung enggau Gerempung Kampung Sarawak nyengkaum staf Harwood Timber Kapit sama bisi enggau meri darah. Kimpin meri darah iya ke sigi tu bereseimbai enggau Hari kampung Serata Dunya kena 21 March ke udah.

NULUNG ORANG… Raban Polis Kapit begulai enggau Mohd. Ikhmal Abdullah (duduk kiba) lebuh ke sama meri darah rambau Kimpin Meri Darah beraban-raban beserimbai enggau Hari Polis bepalan ba Hospital Kapit.

SESCO ulih mantu ngemansangka Score

KUCHING : Bala ke gawa ba Kompeni Sesco Berhad Sarawak (SESCO) dipinta meri servis ke pemadu manah laban sida ulih mantu ngemansangka Sarawak Energy (SCORE).

Menteri Perambu Sumber enggau Rampa Menua, Datuk Amar Haji Awang Tengah Ali Hasan madahka, peminta makit majak nambah, nya alai sida patut nambahka pemanah servis nyengkaum semua tikas.

Iya madah, SESCO udah ngangkatka Serakup Pekereja-Pekereja SESCO, nya alai ngarapka sida ulih meri servis ke pemadu manah awakka ekonomi organisasyen majak tegap.

"Mayuh amat kompeni udah maju ketegal ti manah servis enggau bala pengguna, nya alai utai ke bansa tu mesti dichunto SESCO.

"Semua kita ke gawa ba kompeni SESCO patut nyikap diri enggau mayuh bengkah penemu ke baru sereta betanggungjawap laban SCORE diatu majak maju," ku iya.

Iya madah munyi nya lebuh nyain Danji Kolektif entara SESCO Berhad enggau Serakup Pekereja-Pekereja Kompeni SESCO di sebuah hotel tebilang di Kuching, empai lama.

Teks jaku iya dibacha Menteri Muda Rengka Rama, Datuk Sylvester Entri Muran. Entara pekara ti dikemeratka kompeni tu baka pengawa ngambi pekereja laban nya ulih nyungkak pemansang industri.

kelimpah ari nya mega, entara ulah pendiau ke patut dikembuan bala staf iya nya mereti sereta bagas ngereja pengawa setipak enggau juluk ati SCORE, ku Tengah.

Sama bisi datai maya nya, Tuai Pemesai Eksekutif Sarawak Energy Berhad, Torstein Dale Sjotveit enggau Presiden Serakup Pekereja-Pekereja SESCO, Azman Abdullah.

Pemanah kaul dikena ngenanka penyerakup

MUKAH : Kaban Parlimen Mukah Dato Sri Dr Muhammad Leo Michael Toyad bejadi pengerami Gemilang Siswa Jati Diri 1 Malaysia Tikas Negeri 2012 bepalan ba Dewan Kuliah Utama, Politeknik Mukah (PMU) kena Hari Tiga (28 Mac) ke udah.

Program tu diatur Opis Pemadah Menua Malaysia bekerejasama enggau PMU, lalu digulu bala temuai ari sektor perintah, swasta enggau Gerempung Ke Ukai Dikuasa Perintah (NGO).
Forum ke diatur ba balai tu mendingka randau tiga iku panel iya nya Dr Bazrul Bahaman, Profesor Madya Datuk Dr Abu Bakar Md Diah enggau Datu Dr Julaihi Bujang.
Maya pengerami nya, Dr Leo muji pengawa forum tu laban manah bendar ngagai bala pelajar dikena ngajar sida senentang sekeda isu ke maya hari.

Beduduk ari nya, iya ngajar bala nembiak awakka mereti pasal isu ke udah dipejuraika bala panel. “Nya alai, iya ke pemadu beguna iya nya kaul entara pupu raban bansa ke enda sama bansa,agama enggau penatai dikena ngenanka penyerakup," ku iya.

Tuju bukai program tu, ku iya dikena nempa pelajar IPTA enggau IPTS rinduka menua tu. Dulu ari nya, Pengarah Pemadah Negeri Resat Salleh madahka, tuju program tu diatur mega dikena ngerembaika sada 1 Malaysia ngagai bala pelajar IPTA enggau IPTS.

MENDINGKA FORUM... Dr Leo enggau Resat datai ngulu forum beserimbai enggau Gemilang Siswa 1Malaysia bepalan ba Politeknik Mukah.
Sama bisi datai maya nya, Sapit Residen Mukah Philip Peter Salam, Tuan Do Mukah Mohamad Nawawi enggau pengarah PMU Wan Mohd Afifi Abdullah.

Rayat patut terus nyukung BN maya PRU-13

CHEK BANTU... Masir nyuaka chek bantu ngagai seiku orang ba Pengerami Tuai Begulai enggau Rayat ke diatur ba Rumah Jampang, Munggu Sawa, Pantu, Sri Aman.


PANTU : Rayat dilalau awakka enda ngadai pemansang ngagai penyakal lebuh maya pengawa bepilih besai Ke-13 (PRU-13) tu ila.

Kaban Parlimen Sri Aman, Masir Kujat madah, kebuah pia laban negeri Sarawak tu udah mayuh amat nerima projek pemansang ari Perintah Besai sepemanjai maya.

“Menua kitai ditu empu pan nadai kala tinggal pemansang, nya alai rayat anang ngasuh penyakal ulih ngerampas sitak tu ari perintah Barisan Nasional (BN) maya PRU-13 ila.

“Rayat patut ngenanka penuduk Parlimen Sri Aman ke diempu BN, laban kitai enggai meda pengawa pemansang ba endur tu puntan," ku iya.
Iya madah munyi nya ba Pengerami Tuai Begulai enggau Rayat ke diatur ba Rumah Jampang, Munggu Sawa, Pantu, Sri Aman, empai lama.

Masir ngelalau rayat ngapil baru Bantu Rayat 1 Malaysia (BR1M) enti sema peminta sida ditulak. “Timpuh ngapil BR1M agi dibuka, tu nandaka penyinu perintah BN ngagai rayat," ku iya.

Maya pengerami nya, Masir madahka diri deka meri RM20,000 ngagai Komiti Pemansang enggau Pengelikun Kampung (JKKK) Rumah Jampang lalu RM3,000 ungkup gerempung indu sida di rumah panjai nya.

Sama bisi datai maya nya, Penulung khas Masir iya nya Abah Unggie, Pemesai Opis Hal Ehwal Khas (JASA) Parlimen Sri Aman, Whelton Lumpoi enggau bala tuai rumah ba menua nya.

Program Motivasyen PMR

MOTIVASYEN … Kaban Kunsil Negeri Jemoreng Abu Seman Jahwie (bediri tengah) begambar ngambika pengingat maya program motivasyen pelajar PMR di SMK Matu, empai lama. Lebih kurang 400 iku pelajar Pom 3 sekula nya datai enggau program tu. Bejaku ba pogram nya, Abu Seman ngelalau bala pelajar mesti rindu macha bup ninting maya. Iya mega ngelalau bala pelajar awakka seruran bedisiplin sereta bebasaka pengajar. Abu Seman ngasuh bala nembiak bekenaka perengka ICT enggau manah lalu kena peluang nya endur ngulihka penemu ti menuku.

SMK Assyakirin ngarika Sarawak ke karnival kadet

BINTULU : Raban Kadet Penyaga Mensia Mayuh Sekula Sekondari (SMK) Assyakirin, Bintulu deka ngarika negeri Sarawak ke Karnival Kadet Penyaga Mensia Mayuh Tikas Ke Bansa kena 22 ngagai 27 April di Terengganu.

SMK Assyakirin dipilih ngarika Sarawak ketegal sida udah mujur nyadi champion ba sekeda pekit ti kala diatur baka kategori madamka angus, chara nyelamat, enggau nulung orang maya tasah. Sida kala nyadi champion rambau Karnival Kadet Penyaga Mensia Mayuh Tikas Negeri Sarawak 2012 ke diatur ba SMK Bako, Kuching.

Bisi 387 raban kadet ari 21 buah sekula sekondari bisi ngambi bagi karnival ke diatur Opis Penyaga Mensia Mayuh Negeri Sarawak ke bekerejasama enggau Opis Pelajar Negeri Sarawak.

Nitihka pengajar penyanding penemu raban kadet SMK Assyakirin, Aiman Abdullah, pemujur tu beduduk ari disiplin sida iya empu sereta pemendar bala pengajar ke udah meransang sida.

Iya mega meri puji basa ngagai bala pemesai Opis Penyaga Mensia Mayuh Bintulu laban udah kala ngajar sereta meransang bala raban kadet Penyaga Mensia Mayuh SMK Assyakirin.

KE PENGINGAT...Raban Kadet Penyaga Mensia Mayuh SMK Assyakirin begambar ngambika pengingat besereta trofi sida rambau Karnival Kadet Penyaga Mensia Mayuh Tikas Negeri Sarawak.

SMK Saratok champion MSS Bagi Betong

CHAMPION... SMK Saratok mujur nyadi champion Pekit Lumba enggau Main Majlis Sukan Sekula (MSS) Bagi Betong ke-9 kategori sekolah sekondari, apin lama ke udah.



BETONG : Pekit Lumba enggau Main Majlis Sukan Sekula (MSS) Bagi Betong ke-9 udah mujur bendar diatur lalu ba pengujung iya kontinjen ari SMK Saratok mujur nyadi champion ba pengudah dikira pemayuh poin dalam semua kategori pekit.

SMK Saratok mujur ngalahka 14 buah kontinjen ari sekula bukai ke sama bisi ngambi bagi dalam pekit. Lumur dua enggau tiga, iya nya SMK Saint Augustine Betong enggau SMK Spaoh.

Ba kategori sekula primari, Zon Debak mujur nyadi champion ba kesemua bagi pekit ditangkan Zon Betong bulih lumur dua lalu Zon Saratok bulih lumur tiga.

Pekit tu udah diatur lima hari beruntu bepun 27 Mac bepalan ba Kompleks Sukan Betong lalu ngujungka taun tu enam iti rikot baru udah mujur dirikot dalam kategori lelaki enggau indu.

Entara kategori pekit ke mujur ngaga rikot baru tu iya achara 400 meter kategori lelaki dipecahka Caulin Unti ari SMK BM Saratok, udah nya Faradillah ari SMK Spaoh mujur ngaga rikot baru dalam achara 800 meter enggau 400 meter bagi kategori indu. Seduai terus diberi gelar nyadi olahragawan enggau olahragawati dalam pekit ke sekali tu.

Pengerami pekit tu dipenyadi Pemesai Opis Pelajaran Daerah Betong, Samsudin Drahman. Bejaku ba pengawa bejadi pengerami tu iya meri puji sereta tanda basa ngagai SMK Beladin laban ke udah bebendar ngatur pekit nya enggau mujur.

“Tabi puji ngagai pengatur pekit laban ke udah bebendar ngemujurka pekit lumba enggau main ke sekali tu di menua kitai. “Taja pan mayuh penanggul lebuh ke ngatur pengawa tang SMK Beladin landik amat mutarka ke iya," ku iya.
Maya nya mega iya madahka, SMK Saratok deka nyadi penatur pengawa ba pekit lumba enggau main edisi ke-10 taun 2013.

Sama bisi datai maya hari kepenudi pekit tu iya Sapit Pemesai Opis Pelajaran daerah betong, Vevien Mujah, Prinsipal SMK Beladin Mohd Nor Naruddin, bala prinsipal, kepala pengajar enggau bala pemesai pekit.

Pemanah enti burung lelayang ngaga sarang dalam rumah

NYELAIE..Kaban belayan Ngumbang nunjukka endur Burung Lelayang ke ngaga sarang ba siling rumah iya.


SIMUNJAN : Kenu ku cherita enti burung lelayang ngaga sarang ba dalam rumah nya tau ngasuh rumah chelap embap nadai penyial.

Tu meh pekara ke nyadi ba rumah Ngumbang Aron, 55, seiku Burung Lelaayang ka amat ngaga sraang ba rumah iya taja pan udah tiga kali dibuai iya.

“Udah tiga burung lelayang tu ngaga sarang ba rumah aku,' ku seiku orang ke udah pinchin nyadi soldadu ke diau ba Kampung Kesindu, Simunjan kenyau ari taun 1996.

Ku iya terubah iya suba, burung lelayang tu ngaga sarang ba ruai maya taun 20008 tang diatu ba sukut ke bukai. Terubah iya suba, burung tu ngaga sarang ba sepiak lampu pendaflour tang udha nya mindah ngagai tiang bukai maya taun 2010.

“Burung tu enggai lari taja pan kitai semak iya dia, tang iya nemu amat enti kitai nguji deka negu, iya terus terebai ke bukai. Enda lama udah nya iya deka datai baru.

“Aku suah amat muai sarang burung nya, tang udah nya burung tu ngaga sarang iya dia baru,. Nya alai aku terus nejuka iya besarang dia nyetukka anak burung nya udah nemu terebai," ku iya.

Kenyau sebulan ke udah, iya enggai agi ngasuh burung nya besarang dia. “Enda mukai-mukai, lebuh aku ke deka muai sarang burung tu, datai siku kaban china ngerara aku enda ngasuh aku muai sarang burung nya.

“Ku iya, enti burung lelayang ngaga sarang semak enggau pengidup mensia reti nya sida nya sebilik deka idup lantang senang nadai tinggang penusah. Beduduk ari nya aku enda nyadi muai sarang burung nya," ku iya.

Iya mega bisi berasai iran mimit laban burung lelayang tu chukup rindu ngaga sarang ba endur rumah mensia.

“Amat tauka enda pekara nya aku enda nemu. Diatu aku deka ngelakka anak burung nya besai besarang dia lalu muia iya dudi hari,' ku iya.

Titihka atur polis rambau Pesta Benak

AUM TRAFIK...Mat Jusoh baum enggau bala media pasal atur trafik di Bandar Sri Aman beserimbai enggau Pesta Benak.


SRI AMAN : Bala pengguna jalai raya ke ngulu bandar Sri Aman dipinta nitihka atur jalai raya ke udah ditetapka bala polis nyerumba Pesta Benak ke benung diatur diatu.

Kepala Polis Daerah Sri Aman, DSP Mat Jusoh Muhammad madah ngagai pemberita, semina siti jalai raya ke lurus ditengah rambau pesta benak, kebuah pia ngambika jalai kurang sekut.

“Jalai Resak, Jalai Kolam Air, Jalai Durian, Jalai Foochow enggau Jalai Mangga deka ditengah setuju tauka ke mua aja rambau pengerami Pesta Benak Sri Aman ke sekali tu.

“Tu jalai ke patut ditengah enti nyema bala pengguna deka ngelawa Kampung Hilir, ke Lingga tauka deka ngengkah kerita sida ba Padang Lama KPSU Sri Aman maya pengerami tu," ku iya.

Mensia mayuh tau ngengkah kerita sida ba Sri Aman New Township atauka ba endur ti nadai tanda kon polis awakka jalai enda sekut laban kerita maya pengerami tu.

Enti mensia mayuh enti nitihka atur ke bansa tu ku Jusoh, bala polis deka narit kerita sida. “Pengguna jalai raya mega dilalau awakka meri kerejasama ngagai bala polis enggau bala Opis Pengangkut Jalai.” ku iya.

Kelimpah ari nya, ila ngelalau mensia mayuh ti datai ngulu Pesta Benak Sri Aman seruran bejimat laban nanggika nyadi kes jenayah ngebuk kochek tanchut orang bukai.

“Mensia mayuh ke diau ba Bandar Sri Aman mega dilalau seruran ngidupka lampu ba luar rumah maya malam hari, pia mega minta tulung orang ke sepiak rumah sida mindah ke bukai deka meda pesta benak.

“Anang sesekali ninggalka barang ti berega dalam kerita. Pia mega bala apai indai, anang mai bala anak mit bediri kelalu semak tebing ai lebuh meda lumba ai di Sungai Batang Lupar,” ku jaku tangkan iya.

Jalai Hospital agi mengkang ulih ditengah pulai enggau mansang tang Jalai Foochow mesti dikena naydi jalai pansut ari Bandar Sri Aman rambau pesta tu.

Utusan Sarawak mega dipadahka, bala pengguna enda diasuh tama nengah simpang CIMB Bank tang sida tau meling jalai ke segala ba sepiak Everise enti nyema deka kia.

Paip bumbus : Sida di Lawas ditangkan besimpanka ai

LAWAS : Rayat ke diau ba Kampung Seberang Kedai enggau Kampung Mission ba seberai Batang Lawas dilalau awakka nyimpan ai memayuh minggu tu.

Kebuah pia, ku Enjinir Opis Kereja Raya Lawas, Norman Jan laban JKR Lawas diatu udah tetemuka endur paip ti bumbus ba Batang Lawas. Nya alai, nyangka bisi penanggul mimit ba senentang ke dikena mensia mayuh dalam timpuh orang ke ngaduka paip nya.

Beduduk ari penanggul tu, bala JKR Lawas minta saup raban Bomba enggau Penyelamat nulung sida ngaduka paip laban raban bomba endang landik ba senentang pengelikun ngaduka pengawa.

“Kami udah nemu endur paip ke bumbus lalu kami deka ngaduka iya enggau lengkas, nya alai rayat ke diau ba endur tu patut besimpanka ai memayuh sereta anang ngerua ai.

Penanggul ke bansa tu endang enda ulih diseliah lalu rayat enda ibuh irau laban paip ke bumbus nya tetap deka diadu enggau meruan," ku iya.

PAIP BUMBUS…Bala JKR ngepam angin ngagai batang paip awakka nerujuka ai ngagai seberai bandar Lawas dikena ngiga endur paip ke bumbus ba Batang Lawas.

Pekit ngarang esei Pesta Kaul Mukah 2012

MUKAH : Beserimbai enggau pengerami Pesta Kaul Mukah 2012 di Pantai Kala Dana kena 21 ngagai 29 April, Opis Pelajar Daerah Mukah deka ngatur pekit ngarang esei Pesta Kaul Mukah 2012 .
Tiga bagi kategori pekit iya nya kategori Sekula Primari ungkup nembiak Taun 4 ngagai 6 sahaja, pelajar Sekula Sekondari enggau Maktab Rendah Sains MARA (MRSM)  pelajar Pom 6 sereta Pom 1 ngagai 5 sereta mensia mayuh di Negeri Sarawak nyengkaum pelajar Institut Pelajar Tinggi.
Atur pekit bansa tu, esei mesti asil karang diri empu ditulis dalam jaku Malaysia besangkut paut enggau Pesta kaul lalu dikelapungka enggau sumber enti bisi. Esei mesti ditaip takah1.5 ngena keretas A4 , Font 12 Times New Roman. Pemanjai esei enda kurang 250 kela jaku kategori A enggau 500 leka jaku kategori B enggau C.
Esei mesti nitihka rambai jaku ke udah ditetapka tu : kategori A: Sekula Primari - SAYA SUKA PESTA KAUL MUKAH,  Kategori B : Sekula Sekondari/MRSM - PESTA KAUL MEREALISASIKAN KONSEP 1 MALAYSIA, enggau Kategori C: Mensia Mayuh - MENJULANGI PESTA KAUL MUKAH.
Nitihka pengatur pengawa Pekit  Ngarang Esei 'Pesta Kaul Mukah 2012', Jamil ibrahim, kategori A enggau kategori B tebuka ngagai semua rayat peranak menua Malaysia ke diau ba  Mukah aja lalu esei sida mesti dikemendarka Prinsipal enggau Kepala Pengajar. Sebedau nya sekula sida dipinta meresa sesi nya dulu lalu mina  milih lima iti ke pemdau manah aja dianjung ngagai pengatur pekit.
Jamil madah, bagi pekit Kategori A enggau B, perais sida ke bulih lumur satu ngagai lumur tiga iya nya duit enggau setipikit. Udah nya, 10 iti perais pemeri.
Udah nya, perais ungkup kategori C (mensia mayuh) lumur satu ngagai lumur tiga deka diberi duit enggau setipikit. udah nya, lima iku deka diberi perais pemeri.
Pom dikena masuk pekit tu ulih dipinta ari sekula enggau Opis Pelajar Daerah Mukah tauka ba Laman web: www.mukahro.Sarawakgov.my.
Semua esei deka diempu pengatur pengawa lalu pemutus bala akim nadai tau dibantah.

Enti bisi pekara deka ditanya, kita tau betanya ngagai Mastura Mohamad Mansor,  Patrick Philip Mos, Jamil Ibrahim enggau Dayang Rabia'a Awang Mohsin ba Opis Pelajar Daerah Mukah tauka betelefon terus nuju lumur 084-871259. Haribulan kepenudi endur ngerijista diri masuk pekit tu iya sebedau pukul 4.00 lemai kena 11 April 2012 (Hari Tiga).

Pekit ngarang esei Pesta Kaul Mukah 2012

MUKAH : Beserimbai enggau pengerami Pesta Kaul Mukah 2012 di Pantai Kala Dana kena 21 ngagai 29 April, Opis Pelajar Daerah Mukah deka ngatur pekit ngarang esei Pesta Kaul Mukah 2012 .
Tiga bagi kategori pekit iya nya kategori Sekula Primari ungkup nembiak Taun 4 ngagai 6 sahaja, pelajar Sekula Sekondari enggau Maktab Rendah Sains MARA (MRSM) pelajar Pom 6 sereta Pom 1 ngagai 5 sereta mensia mayuh di Negeri Sarawak nyengkaum pelajar Institut Pelajar Tinggi.
Atur pekit bansa tu, esei mesti asil karang diri empu ditulis dalam jaku Malaysia besangkut paut enggau Pesta kaul lalu dikelapungka enggau sumber enti bisi. Esei mesti ditaip takah1.5 ngena keretas A4 , Font 12 Times New Roman. Pemanjai esei enda kurang 250 kela jaku kategori A enggau 500 leka jaku kategori B enggau C.
Esei mesti nitihka rambai jaku ke udah ditetapka tu : kategori A: Sekula Primari - SAYA SUKA PESTA KAUL MUKAH, Kategori B : Sekula Sekondari/MRSM - PESTA KAUL MEREALISASIKAN KONSEP 1 MALAYSIA, enggau Kategori C: Mensia Mayuh - MENJULANGI PESTA KAUL MUKAH.
Nitihka pengatur pengawa Pekit Ngarang Esei 'Pesta Kaul Mukah 2012', Jamil ibrahim, kategori A enggau kategori B tebuka ngagai semua rayat peranak menua Malaysia ke diau ba Mukah aja lalu esei sida mesti dikemendarka Prinsipal enggau Kepala Pengajar. Sebedau nya sekula sida dipinta meresa sesi nya dulu lalu mina milih lima iti ke pemdau manah aja dianjung ngagai pengatur pekit.
Jamil madah, bagi pekit Kategori A enggau B, perais sida ke bulih lumur satu ngagai lumur tiga iya nya duit enggau setipikit. Udah nya, 10 iti perais pemeri.
Udah nya, perais ungkup kategori C (mensia mayuh) lumur satu ngagai lumur tiga deka diberi duit enggau setipikit. udah nya, lima iku deka diberi perais pemeri.
Pom dikena masuk pekit tu ulih dipinta ari sekula enggau Opis Pelajar Daerah Mukah tauka ba Laman web: www.mukahro.Sarawakgov.my.
Semua esei deka diempu pengatur pengawa lalu pemutus bala akim nadai tau dibantah.

Enti bisi pekara deka ditanya, kita tau betanya ngagai Mastura Mohamad Mansor, Patrick Philip Mos, Jamil Ibrahim enggau Dayang Rabia'a Awang Mohsin ba Opis Pelajar Daerah Mukah tauka betelefon terus nuju lumur 084-871259. Haribulan kepenudi endur ngerijista diri masuk pekit tu iya sebedau pukul 4.00 lemai kena 11 April 2012 (Hari Tiga).

40 raban nembiak kpg Narum nyereta Saberkas Pasar Marudi

MARUDI : Unit Saberkas Pasar Marudi mujur ngerijista lebih 40 iku raban nembiak ari Kampung Narum maya pengerami makai malam ke diatur begulai enggau raban nembiak kampung nya, empai lama.

Sama bisi enggau masuk ngerijista diri nyadi kaban Unit Saberkas Pasar Marudi tu sida ke besai tuai iya nya Pengulu Ayub Bin Haji Hassan.

Pengerami makai malam tu diatur kaban komiti Saberkas Unit Kampung Narum (SUKNA) ke udah diketu lalu sida diatu nyereta Unit Saberkas Pasar Marudi.

Maya nya Sapit Chairman ll Saberkas pampang Marudi Zulkarnain Abdullah bisi nerangka tanggung pengawa ke patut digaga bala kaban Saberkas nitih polisi ti udah ditetap.

Kelimpah ari nya, Chairman Unit Saberkas Pasar Marudi bekerjasama enggau kaban pemesai Saberkas pampang Marudi deka bebendar agi nambahka penyampau orang ke masauk ngerijista diri nyadi kaban Saberkas kelebih agi sida ke nembiak.

Naka ke diatu, Unit Saberkas Pasar Marudi ngembuan 130 iku kaban ke udah ngerijista diri. Nitihka polisi Saberkas di Marudi, genap unit mesti ngembuan endang kurang ari 50 iku orang ke nyadi kaban.