Seiku misi kena runtun lebuh nurun sembiang

MIRI : Seiku misi rugi lebih RM1,000 pengudah kantung sandik iya ke ngundan siti telefon binching enggau duit kena runtun ba sebengkah penusah ke nyadi ba Pujut 7, ditu kena Hari Minggu tu tadi.

Ba penusah ke nyadi pukul 7.30 pagi nya, misi (mansa) ke beumur 28 taun nya benung bejalai kediri-diri ngelawa sebuah gerija ke semak laban deka besembiang.

Sumber madah, maya ke benung bejalai enda mukai-mukai seiku lelaki ke ngena motosikal datai ari belakang lalu ngeruntun kantung sandik mansa ke dikepit ba bau kanan.

“Saspek terus laju ngeris motosikal lalu mansa enda sempat minta sah orang bukai laban maya nya langsung nadai tepedaka orang bukai sama ba endur nya.

“Mansa mega enda sempat malik lumur plat motosikal saspek laban ti kelalu kesal," ku iya.

Berindik ari penusah nya, mansa terus ngaga ripot ngagai Balai Polis Pusat Miri awakka nasat pekara nya.

Nangkan ke nya, pengari polis madah bala sida amat bisi nerima ripot bekail enggau kes nya lalu pansik agi benung dipejalai.

Penusah Jalai Raya semakin nyadi!

JALAI raya sigi ukai palan alai empelita. Jalai raya sigi ukai menalan endur belumba. Jalai raya sigi ukai kelang alai mandangka pengelandik diri. Jalai raya mega sigi ukai tempat ti endur ngayanka ati enda liat, enda kudat, enda tat.

Rambai jaku ke munyi tu suah amai didinga kitai lebuh ngenang pasal pengelikun ba jalai raya. Mayuh bendar rambai jaku bukai ke ditempa, disebut sereta dikelembungka nengah mayuh macham media sekalika nya ti bechelak tauka media elektronik, ngambika kitai sama megai pengelikun lebuh betengahka jalai raya. Kitai mega sigi enda lembau beajar-ajar pangan diri bejimat lebuh nengah jalai raya.

 Orang politik, pemesai-pemesai , enggau bala tuai ngelalau rayat. Orang ke tuai umur ngelalau orang ke biak. Apai-indai ngelalau anak. Menyadi sendi, kaban belayan, suku juru sama belalau pangan. Aku ngelalau nuan. Dik ngelalau aku.  Suah!  Ukai ti sekali dua kitai beajar-ajar. Kitai semampai ngingatka pangan diri nengah jalai raya. Enda nemu leju,  sigi enda bansu kitai ke belalauka pangan.

Nama kebuah dih wai stastik kes belantak, aksiden tauka kemalangan ba jalai raya ti nabanka nyawa agi tinggi amai ba menua kitai?.
Enti nitihka stastik ti ayan ba laman web Jabatan Keselamatan Jalan Raya Malaysia, kenyau ari taun 2003 nyentuk ke taun 2011, enda kurang ari 7000 iku orang bisi mati ba jalai raya di Malaysia ninting taun, reti nya dalam kandang  lapan taun nya lebih lima puluh ribu iku orang udah mati bebadi di jalai raya di Malaysia. Nyeregu bulu pegu meda stastik nya.  Udu mayuh amat nya wai! Kasih endar, ninga mensia ditinggang  penusah ti nyadi baka nya.

 Di Sarawak tu aja enti nitihka berita ti ayan ba surat kabar kena 15 Ogos 2011 tu,  pukul rata iya enda kurang ari tiga ratus iku orang bebadi tauka mati ninting taun ba Sarawak,  kenyau ari taun 2008 ngagai taun 2010. Dalam kandang tiga taun ti disebut nya  lebih seribu iku orang danjan ditabanka penusah ba jalai raya.
Sinu wai, ngenang orang ke bangat ngemayuh nya bebadi. Orang ti bisi kaban belayan, orang ke segulai sejalai, tauka orang sebilik enggau orang ke udah bebadi tentu mega chukup penusah, chukup penyinu, chukup pemerinsa ditinggalka orang ke bebadi ba jalai raya nya.

Patut bendar kitai di Malaysia nyengkaum kitai di Sarawak tu, berunding enggau dalam sereta panjai dalam pekara tu. Kitai sama berunding enda ngira parti politik, enda ngira nya Gerempung dikuasa Perintah tauka Ukai dikuasa Perintah, berunding enda ngira bansa enggau asal penatai. Penusah bebadi ba jalai raya tu ukai pekara ti ulih ditangkup, ditapi tauka diputarka  Perintah, Gerempung, Parti Politik, tauka sebarang Institusyen ke bisi di menua kitai kediri tang nyerangkung semua rayat Malaysia ti idup sereta bekenaka jalai raya. Belantak, eksiden tauka kemalangan jalan raya tu patut amat dipasukka tauka digaga nyadi National Key Result Areas (NKRA) menua Malaysia.

Nama kini kebuah ti bendar ti ngasuh aksiden ti nabanka nyawa mensia tau ngemayuh nya nyadi. Kati nya ketegal perangai mensia ti deka mai kereban pengangkut tekelalu laju? Kati nya tegal sida deriba ke enda bejimat, deriba bedau landik, deriba tekelalu lelak sereta  ngantuk ? Nya sekeda pekara ke bisi besangkut paut enggau orang ke mai kereban pengangkut ti tau diperundingka lebuh ngusaika ke kebuah tu nyadi.

Kereban pengangkut ti dikena mega tau diperundingka lebuh kitai deka nentuka kebuah iya nyadi. Mayuh mega tanya ba senentang tu tau dipansutka, baka umur kereban pengangkut. Bisi enda kini kereban pengangkut diservis nitihka taga ti udah ditetapka. Kati berek iya makai? Kati tayar agi meruan bungai? Kati lampu kereban pengangkut nya agi sekena? Bah, baka ni ku gaya kereban  dikena nyaga pengelikun diri dalam perengka pengangkut ti dikena, agi meruan, agi tan, agi menyana nya dia?

Kelimpah ari ti berundingka orang ti bebaika perengka pengangkut, umur enggau gaya perengka pengangkut, kitai mega tau berundingka gaya jalai raya ti ditengah. Enti jalai enda chukup manah, enti jalai tekelalu sempit, enti jalai tekelalu tekul enggau enti jalai tekelalu renjan nya mega tau nyadi siti ari kebuah penusah bebadi ba jalai raya nyadi.

Dalam berita ti kala dibacha aku mega dipadahka, bisi  25 arung jalai di Sarawak ti selalu endur orang aksiden ti ngujungka pemati. Sekeda ari ti disebut nya baka jalai Kuching - Sri Aman, semak jalai Simpang Punda, semak Bukit Bagunan, jalai entara Memalui enggau Pais di Betong ke udah ngujungka pemati 10 iku dalam minggu siti tu tadi ari beberapa kes belantak ba jalai ti kelalu sempit, jalai semak Bukit Sebangkoi, semak Bukit Lambir. Amat enti agi baru-baru deriba nurun Bukit Bagunan nya, sigi getar-getar pala patung, takut.

Nya alai laban sida ti bekuasa baka sida Opis Pengemata Pengelikun Jalai Raya  udah nemu arung jalai ke selalu endur aksiden ti  balat sereta selalu nabanka nyawa, sida ti bekuasa patut jejampat berunding ngiga jalai ngurangka aksiden nyadi ba urung nya. Enti jalai ba arung nya tekelalu pikul, peruruska ga, enti jalai nya tekelalu renjan, tumpurka ga awakka jalai nya baruh agi, enti tekelalu sempit gaga luaska agi ga, enti tekelalu bebelit sereta betanjung putung ga jul tanjung nya. Enti jalai kelau belubang biki ga lalu enti jalai kelalu jai biki manahka agi.  Ngena pengawa ti bansa nya kitai besampika aksiden ti nabanka nyawa mensia tau kurang agi nyadi.

Sigi amat, dini endur menua ti bekenaka jalai raya, aksiden nya endang bisi nyadi tang kitai ngarapka diri ulih ngurangka iya. Kitai ngarapka diri ulih ngelindung mayuh agi nyawa enggau reta tengkira ti lenyau tegal bebadi di jalai raya.

G5 enda diburu ari BN?

“Enda patut kami deka muru sida (G5) ngagai penyakal laban pekara ke baka nya tau meri pengering ngagai penyakal ari 15 kerusi nyadi 19 kerusi ketegal ulah diri empu.”
Datuk Amar Haji Mohamad Asfia Awang Nassar
Speaker Kunsil Negeri Sarawak



BATU NIAH : Anang muru G5 ke nyadi pengari rayat ke endang udah dipilih rayat empu, sida endang kaban Barisan Nasional laban udah menang ba pengawa bepilih besai negeri (PRN Sarawak 2011) ngena tiket Barisan Nasional (BN).

Speaker Kunsil Negeri Sarawak (DUN), Datuk Amar Haji Mohamad Asfia Awang Nassar lebuh ke dirandau Utusan Sarawak lemai Hari Enam tu tadi madah, tegapka kaul enggau kaban BN manah agi ari ke muru sida.

Iya madah, dalam DUN Sarawak bisi 71pengari, 54 endang kaban BN, 17 (penyakal) lalu dua iku (bibas), bekaul enggau ADUN Bekenu ditu iya nya  Rosey Yunus enggau empat agi ADUN (G5) endang kaban BN taja pan sida nadai parti pengudah ke mansutka diri ari Parti Demokratik Progressif Sarawak (SPDP).

“Pengudah nyadi ADUN Bekenu (Rosey) dipilih Kepala Menteri Sarawak Pehin Sri Haji Abdul Taib Mahmud nyadi Penulung Menteri Pelajar Tumu Anak Mit enggau Pemansang Ruang Bilik, nya alai kami sigi enda muru sida ke endang udah dipilih rayat.

“Enda patut kami deka muru sida (G5) ngagai penyakal laban pekara ke baka nya tau meri pengering ngagai penyakal ari 15 kerusi nyadi 19 kerusi ketegal ulah diri empu,” ku iya seraya ngering jaku bebendar ngetanka BN Sarawak.

Ku iya mega, Rosey Yunus enggau tiga iku agi pengari rayat ukai agi kaban SPDP, sida G5 udah menang PRN ngena tiket BN lalu kitai patut narit kaban penyakal masuk BN, ukai muru orang BN masuk penyakal.

Nya alai, rayat ba menua Bekenu patut ngetanka penuduk Rosey Yunus lalu ukai semina ba Tikas Kabinet Sarawak enggau DUN, kitai deka meda negapka agi menua tu ngambika BN ulih menang besai udah tu, ku iya.

Nangkan ke nya, Rosey Yunus madah iya enggau G5 meri terima kasih ngagai Chairman BN Sarawak, Pehin Sri Haji Abdul Taib Mahmud ke agi muka pintu ngagai sida masuk ni-ni parti dalam komponen BN kelimpah ari SPDP.

Iya madahka diri semina nitihka sida ke kering agi penemu nentuka ni bagi parti ke patut dipasuk laban pengering iya (Rosey) endang bepanggai ngagai rayat Bekenu empu endur nentuka penuduk iya.

Kelimpah ari nya, iya meri terima kasih ngagai Presiden Parti Rayat Sarawak (PRS) Tan Sri Dr. James Jemut Masing laban udah nelengaka  pintu ngagai G5 masuk PRS.

“Enti deka masuk PRS, aku meseti berunding begulai enggau G5 laban pengering aku endang bepanggai ngagai sida dalam Kelab Barisan Nasional Sarawak begulai enggau rayat baDUN Bekenu ditu.

“Aku enda ulih ngaga pemutus kediri aja laban rayat Bekenu ti ari mayuh pupu raban bansa enggau jalai pengarap udah madah sida endang agi begunaka aku mangku pengawa ke diatu," ku iya.

Nya alai, peminta rayat bekaul enggau pengawa aku ke nyadi ADUN Bekenu patut disambung ngambi terus ngetanka BN ba Bekenu ditu, ku iya.

Bekaul enggau pengerami nya, tuju iya diatur dikena ngerapitka kaul antara perintah besai, perintah negeri, DUN sereta enggau rayat ditu lalu tu mandangka kaul ke rapit begulai enggau DUN sereta enggau ADUN Bekenu endang ulih ngemansangka pengidup rayat..